Badheessa

Kalaqamu maxaafira uminna layinki fooliishsho nabbambeemmo woyite, Addaaminna Heewani yannankera mannu halcha agurranna afiꞌra dandaannokki wolapho afidhinota huwanteemmo. Insa hasiisannonsare baala afidhino, qoleno waajjishannonsarinna gadadisannonsahu dino. Kuri minaanninna minaama sagalenna looso hoongeemmo yee, hattono dhiwammeemmonna reyineemmo yee diyaadanno. (Kal. 1:27-29; 2:8, 9, 15) Ikkirono dannu nookki wolapho noosihu Magano Yihowa callaati. Togo yineemmohu mayiraati? Korkaatuno baalankare kalaqinohunna kalqete alame giddo Aliidihu isooti. (1 Xim. 1:17; Aju. 4:11) Iimanna uulla noo kalaqami baalaho noonsa wolapho kayinni dannu noote. Insa taalo, gara ikkinohanna quwa sainokki danna worate qoosso noosihu Magano Yihowa ikkinota ammana hasiissannonsa. Maganu Yihowa umo manna kalaqi woyite togoo danna worino. w18.04 4 guf. 4, 6

Heeꞌnoommo alame giddo cincine heeꞌra dandiineemmohu Yihowa kaaꞌlonni callaati. (2 Qor. 4:7, 8) Ikkollana Yihowa ledo muli jaalooma kalaqirinokki mannira tenne alame giddo iillannonsa fonqolo dandee heeꞌra mageeshshi geeshsha qarra ikkitannonsaro hedi. Yesuusi gede, ninkeno mararreemmonsa, hattono insara “dancha duduwo” kula hasiꞌneemmo. Hakko daafira manna rosiisatto woyite cinca ikki. Soqqamatto woyite xaadatto manni giddo mitu, ninke seekkine anfoommoha mito Qullaawu Maxaafi halaale insa horo afinokkiha ikkara dandaanno. Qoleno batinyu mannira uminsahu ammananno coyi noonsa. Hattono ammanansa maatensa, budinsanna dagoominsa ledo noonsa aante kaajjishshannohu gede asse hedanno. Mannu “akkala” rosonsa aguranno gede kullammora albaanni, balanxe xa rosanni nooha “haaro” roso yaano konni albaanni afinokkiha Qullaawu Maxaafi halaale seekke huwatanno gede assa hasiissanno. Konni albaanni noonsa lao biddi assiꞌra dandiitannohu, hatto assinummoro callaati. Mannu konni garinni hedonsa biddi assiꞌranno gede kaaꞌlate yanna hasiissanno.—Rom. 12:2. w19.03 23 guf. 10, 12; 24 guf. 13

Yihowa Beettosi baxannotanna isi hagiirsiisinosita coyiꞌrasi, ninkeno woloota jawaachinsheemmo faro hasiꞌneemmo gede assitannonke. (Yoh. 5:20) Mittu ayirrinseemmo manchi baxille leellishannonkenna assinoommohu danchu coyiꞌra galatannonke woyite tashshi yaannonke. Hatteente gede, songote noo roduuwinkera baxille leellishanna insa jawaachisha hasiissannonke. Woloota galatanke, ammanansa kaajjitannonna Yihowara ammanante soqqantanno gede kaaꞌlitannonsa. Roorenkanni annuwunna amuuwu oosonsa jawaachisha hasiissannonsa. Annuwunna amuuwu oosonsa godowinta galatansanna baxille leellishansa oosonsa lattanno gede assitanno. “Hagiirsiisattoehu” yaasi, Yihowa Yesuusi ammaname Annisi fajjo wonshannota ammanannota leellishshanno. Yihowa Beettosi ammanino; ninkeno Yesuusi Yihowa eino qaale woꞌmunni woꞌma ammaname wonshannota addaxxa dandiineemmo. (2 Qor. 1:20) Yesuusi lawishsha hendeemmo woyite, albinni roore isiwiinni rosatenna faalesi haꞌrate murciꞌneemmo.—1 Phe. 2:21. w19.03 8 guf. 3; 9 guf. 5-6

Mittu manchi muxxe aamamooshshe uyinkero galanteemmositi egennantinote. Israeele Yihowa Gibitsete gobbanni fushshe uyinonsa wolapho dinaaddino. Insa Gibitsetenni fultuhunni boodu agani gedensaanni, alba Gibitsete ittannonna aggannorira wojji yaa hanaffino; hattono Yihowa uyinonsare mishshe galagalte Gibitse higa hasidhino. Insa ‘qulxuꞌme, baaqulu, daraamu shunkurti, duumo shunkurtinna tumu’ Maganu Yihowa uyinonsa wolapho roorannohu gede assite heddino. Tennera Yihowa lowo geeshsha hanqasi dhagge ikkitannonkeni? (Kir. 11:5, 6, 10; 14:3, 4) Insa xaggenni ninke lowore ronseemmo! Soqqamaasinchu Phaawuloosi baalanka Kiristaana Yihowa Beettisi Yesuusi Kiristoosi widoonni shaqqillunni uyinonke wolapho mulluri gede assine laꞌneemmokki gede amaalinonke.—2 Qor. 6:1. w18.04 9-10 guf. 6-7

Ninke baalunku wolootu baxxankera hasiꞌneemmo. Qoleno taashsho xeꞌinore assinankera dihasiꞌneemmo. Baxille leellisha hoonginkeronna miincinkero ninkeneeto tidhinoommokkiri gede assine laꞌnammoranna hexxo mudhinammora dandiineemmo. Yihowa baxillunna taashsho hasiissannonketa afino. (Far. 33:5) Maganinke lowo geeshsha baxannonketanna taashsho afiꞌnammora hasiꞌrannota addaxxa dandiineemmo. Yihowa Muse widoonni Israeelete uyino Seera xiinxallanke tenne wodanchate kaaꞌlitannonke. Muse Seera xiinxallineemmo woyite baxillaanchu Maganinke Yihowa lowo geeshsha baxannonketa huwanteemmo. (Rom. 13:8-10) Yihowa baalanka coye assannohu baxillunni ikkino daafira, Muse Seeri xintaminohuno baxillu aana ikkinota wodanchineemmo. (1 Yoh. 4:8) Yihowa Muse Seera woꞌma fushshinohu ‘Magano baxinna’ ‘manna baxi’ yitannote lame qara hajajo horoonsiꞌreeti. (Lew. 19:18; Mar. 6:5; Mat. 22:36-40) Muse Seeri giddo nooti 600 saꞌanno hajajo woꞌmanti Yihowa baxilli daafira rosiissannonke. w19.02 20-21 guf. 1-4

Iyyoobi galtesi ikkinokki meentiwa garimale diaananno. (Iyo. 31:1) Isi galtesi ikkitinokki meyatera gara ikkinokki baxille leellisha soꞌro ikkitinota afino. Xaa yannara heeꞌnoommo alame amanyoote bainore assineemmo gede fonqoltannonke. Ninkeno Iyyoobinte gede galtenke ikkitinokkitera gara ikkinokki baxille leellisha gimbeemmo? Ayi garinnino shiqqinota teeda baꞌino misilla laꞌꞌa effiꞌne gimbeemmo? (Mat. 5:28) Konni garinni barru baala umonke eemadhineemmoha ikkiro, minshe nookkire ikkine heeꞌrate murciꞌnoommore ikkineemmo. Iyyoobira maalaamittete coyira noosi laono isi Yihowa waajjannoha ikkinota leellishshanno. Iyyoobi maalaamittete coye addaxxannoha ikkiro, tini lowo soꞌro ikkitinotanna qorichishamannota afino. (Iyo. 31:24, 25, 28) Heeꞌnoommohu maalaamittete coye quwa sae baxanno manni woꞌmino alameraati. Qullaawu Maxaafi woxenna jiro lainohunni gara ikkitino lao heedhannonke gede aannonke biddishsha harunsinummoro, minshe nookkire ikkine heeꞌra dandiineemmo.—Law. 30:8, 9; Mat. 6:19,20. w19.02 6 guf. 13-14

Yesuusi assootisi baalunkunni Maganu ninke lowo geeshsha baxannonketa leellishino. (1 Yoh. 4:8-10) Baalunkunni roore Yesuusi baxillunni kae heeshshosi ninkera uyinonke. Qullaawu ayyaaninni buurammoommore woy “wolu geꞌreewi” wido ikkinummorono, Yihowanna Yesuusi wodote kakkalo widoonni leellishshinonke baxillinni horo afiꞌneemmo. (Yoh. 10:16; 1 Yoh. 2:2) Qaagooshshu ayyaaniwa shiqanno coyino Yesuusi rosaanosi baxannotanna insara hedannonsata leellishanno. Hiittoonni? Yesuusi raqaxaminoha ikkikkinni bikku hurbaate xinte qullaawu ayyaaninni buurantino harunsaanosi baxannota leellishino. Yannate gedensaanni buurantino harunsaanosi Qaagooshshu Ayyaana diru kiiro babbaxxitino basera lawishshaho usuru mine ayirrisa hasiissinonsa. (Aju. 2:10) Insa Yesuusira hajajante Qaagooshshu Ayyaana ayirrisa dandiitino? Ee dandiitino! Umi xibbi dirinni kayise yannanke geeshsha, addu Kiristaani Yesuusi reyo qaagooshshe ayirrisate sharramanno. w19.01 24 guf. 13-15

Yesuusi coyiꞌrino wolapho kaphu ammaꞌnonni, afibbeelatenninna bushu rosichinni wolaphate. tini “Maganu oosota ayirrinyu wolapho” leellishshanno. (Rom. 8:21) Xaa yannara nafa ‘Kiristoosi rosiisinonkere agadhinummoro’ tenne wolapho afiꞌra dandiineemmo. (Yoh. 8:31) Konni garinni, rosunni calla ikkikkinni heeshshonke giddo harunsine “halaale afa” dandiineemmo. Tenne baꞌara rakkino alame giddo, dancha heeshshooti yinanniti nafa hagiirru nookkitenna geeddannokkite. Gaꞌa mayi ikkannoro dianfoommo. (Yai. 4:13, 14) Konni daafira, ‘halaalaancho heeshshowa’ yaano hegere heeshshowa massitanno doogo aana qaafa hasiissannonke. (1 Xim. 6:19) Maganu tenne doogo aana hadhe yee digiddeessannonke. Doorshu ninkeho. Yihowa ‘iqqakki’ assiꞌri. (Far. 16:5) Isi uyinoheha batinye “dancha coye” naadi. (Far. 103:5) Hattono Yihowa harshammonna “hegere hagiirre” aannoheta addaxxi.—Far. 16:11. w18.12 28 guf. 19, 21

Baalunku Kiristaani Yesuusinna Yihowa gede adhanna adhama ayirrisa hasiissannonsa. Ikkollana mannu ooso guuntete xeꞌne noonsare ikkitino daafira, mitootu hatto assa hooggara dandiitanno. (Rom. 7:18-23) Konnira umi xibbi diro mitu Kiristaanira adhamansa giddo buutote qarri iillinonsata nabbambeemmo woyite tini dhagge diꞌꞌikkitannonke. Phaawuloosi, “Minaama minaanniwiinni baxxitoonke” yee amaalinoha ikkirono, togoori kalaqamino woyiti no. (1 Qor. 7:10) Phaawuloosi, minaanninna minaama babbaxxe heeꞌranno gede assannori maatiro dixawisino. Babbaxxine heeꞌnanni gede assanno qarri foorre ikkitinokkita anfoommo. Hatto ikkoommero minaanni woy minaama galtensa diigate korkaatu heeꞌrannonsa. Phaawuloosi minaannisewiinni baxxitino minaama “mine assidhukkinni ofolto” yiino. Babbaxxe heeꞌrirono lamunku Maganu albaanni mittoho. Phaawuloosi minaanninna minaama mereero aye geeshshi qarri kalaqamirono, foorinohu hoogi geeshsha qarransa tirte mitteenni heeꞌrate sharrantanno gede amaalino. Lamunku, songote cimeeyye Qullaawu Maxaafi aana xintantino amaale uyitannonsa gede xaꞌmira dandiitanno. w18.12 13 guf. 14-15

Xaa yannara Maganu mannisi isi ledo noonsa jaalooma kaajjishiꞌraranna loososi woꞌmu wodaninni loosara hasiꞌranno. (Mat. 28:19, 20; Yai. 4:8) Ikkollana mitu manni suwashshu wodaninni kae tenne assineemmokki gede assate woꞌnaalara dandaanno. Lawishshaho, loosiisaanchikki lowo saate loosittoro woxe ledeemmohe yaara dandaanno; ati kayinni hatto assittoro ayyaanaamittete coye assatto yanna hoogattota afootto. Woy rosu mine xeertowa hadhe roore roso rosatto gede koyinsanniheha ikkara dandaanno. Huuccatto assidhe xiinxallattohu, hattono tenne assate murciꞌrakkira albaanni amaale xaꞌmirattohu togoo coyi iillihehu gedensaanniiti? Yihowara tenne hajo daafira mayi lao noosiro afatenna isi hedanno garinni hedate xaanni mayira diwoꞌnaalatto? Woꞌmante yannara togo assattoha ikkiro, fonqolo baala qeela shota ikkitahera dandiitanno. Yihowara soqqantanni heeꞌrate murciꞌrootto daafira maa assattoro seekkite afootto. w18.11 27 guf. 18

Selemooni Israeelete moote ikkinohu wedellichu heeꞌreeti. Isi gashsha hanafi balla, Yihowa ajuujatenni “Maa aammohera hasiꞌratto?” yee xaꞌminosi. Selemoonino “Ani lowo geeshsha shiimaho; gashshinanni garano diegennoommo. . . . Kunnira bushanna dancha bade afe mannakki halaalunninna taalotenni gashsheemmo gede egenno [“owaata wodana,” NW] uyie” yiino. (1 Mot. 3:5-10) Selemooni Yihowa “owaata wodana” aannosi gede xaꞌmiꞌrasi dhukasi afinoha ikkinota leellishshanno. Yihowa Selemooni baxinohu iseraati. (2 Sam. 12:24) Maganu kuni wedellichu moote xaꞌmiꞌrinori hagiirsiisinosi daafira, ‘egennaamonna wodancha’ wodana uyinosi. (1 Mot. 3:12) Selemooni Yihowara ammanami yanna baalantera lowo atoote afiꞌrino. Isi “Israeelete Magani Kaaliiqirano suꞌmasi ayirrinsanniha qullaawa mine” minate qoosso afiꞌrino. (1 Mot. 8:20) Isi Maganu uyinosi hayyonni egennaminoha ikkino. Qoleno Qullaawu Maxaafi giddo Selemooni Maganu ayyaaninni coyiꞌrinore amaddinoti sase maxaaffa no. Kuri giddo mittu Lawishshu maxaafaati. w19.01 14 guf. 1-2

Mitu manni “Maa heda hasiissannoero ayino dikulannoe. Hedeemmore ani afoommo” yaanno. Insa hatto yitannohu, hasidhinore uminsa doodha baxxannohuranna hatto assate qoosso noonke yite heddannohura ikkara dandaanno. Qoleno wolu manni illaallisansaranna wolootu lawishsha harunsitanno gede xixxiimbansara dihasidhanno. Ikkollana hedonke Yihowa hedo ledo sumuu yitanno gede assiꞌneemmo yaa, uminke hedo dihendeemmo yaa diꞌꞌikkino. Layinki Qorontoosi 3:17 kultanno garinni “Mootichu Ayyaani noowa wolapho no.” Yihowa uminke ayimma heedhannonke gede wolapho uyinonke. Mittu mittunkura banxeemmori heeꞌrankera dandaanno. Yihowa kalaqinonkehuno konni garinniiti. Ikkollana wolaphonke dannu noote. (1 Phe. 2:16) Yihowa kuni bushaho woy kuni danchaho yine murreemmo woyite dancha doorsha doodhate Qaalesi horoonsiꞌnammora hasiꞌranno. w18.11 19 guf. 5-6

Halaale ronsummo yannara, Yihowara soqqama maalaamittete coye roortannota huwantoommo. Qoleno halaalu giddo millisate maalaamittete coye hagiirrunni facci assine agurroommo. Ikkollana galle honse wolootu yannate dayino uduunnicho hidhitanna woy wole maalaamittete qiniite afidhinota laꞌnammora dandiineemmo. Hatte yannara gate bainori noonkeha lawankera dandaanno. Noonkerinni kassi yaa agurre, ayyaanaamittete coye dulli assine maalaamittete coye gamba assiꞌrate kabbi facci yaa hananfammora dandiineemmo. Deemaasi yinanni rosaanchino hatto assino. Isi “tenne gobba baxe” soqqamaasinchu Phaawuloosi ledo soqqama agurino. Deemaasi Phaawuloosi agure haꞌrinohu mayiraati? Isi hatto assinohu ayyaanaamittete coyinni roorse maalaamitte qiniite hasiꞌrino daafiraati ikka? Woy Phaawuloosi ledo soqqamate yee maalaamittete injo agura hasiꞌrinokkihuraati ikka? Qullaawu Maxaafi tenne daafira kulannori dino. Ninkeno qoropha hoongummoro maalaamittete coyira noonke baxilli lexxe halaaleho noonke baxille hunara dandaanno. w18.11 10 guf. 9

Sheexaanu xagaraamo kaphaanchooti; korkaatuno Heewani iso ammante hatte haqqicho laalo itturo, reyitannota seekke afino. Addaaminna Heewani Yihowara hajajama gibbino daafira yannate gedensaanni reyitino. (Kal. 3:6; 5:5) Qoleno insa loossino cubbinni “reyo manna baala amaddino.” “Addaami gede hajajo hunte cubbo loossinokkiri aana nafa, reyo . . . wolqissino.” (Rom. 5:12, 14) Maganu hedino garinni hegerera heeꞌra dandiinoommokkihunna guuntete xeꞌne noonkere ikkinoommohu iseraati. Hatteentenni “heeꞌneemmohu 70 dirooti; batiꞌraa batiꞌriro 80 ikkanno;” hattono “heeshshonke qarru woꞌminote.” (Far. 90:10) Kuni dadillisanno coyi baalu ikkinohu Sheexaanu kaphinniiti! Yesuusi Daawuloosi assooti daafira coyiꞌranni togo yiino: “Halaalu isiwa nookki daafira, halaalu giddo kaajje diuurrino.” (Yoh. 8:44) Sheexaanunniwa halaalu dino; isi xaano kaphisinni, ‘uulla baala’ soꞌrisiisanni no. (Aju. 12:9) Daawuloosi dogankera dihasiꞌneemmo. w18.10 6-7 guf. 1-4

Keere kalaqate uminsanni kaꞌe sharrantannori hagiirraamma ikka dandiitanno. Rosaanchu Yaiqoobi togo yee borreessino: “Keere baxxannori, keere wixidhe keeraanchimmate guma gamba assidhanno.” (Yai. 3:18) Songote giddono ikko maatete giddo sumuu yinoommokkihu heeꞌriro, keere kalaqa dandiineemmo gede kaaꞌlankera Magano huucciꞌra dandiineemmo. Hakkiinni Yihowa qullaawa ayyaanasi aannonke; kuni ayyaani qole Magano hagiirsiissanno akatta heedhannonkenna hagiirraamma ikkineemmo gede kaaꞌlannonke. Yesuusi keere kalaqa hasiissannota ikkitinota xawisanni togo yiino: “Fushshaatekki Maganoho shiqishiꞌratto yannara giwamoottoha rodookki qaagittoro, fushshaatekki hakko worte agurte hadhe balaxxe giwamootto rodiikki ledo araarami. Hatto assittohu gedensaanni dagge fushshaatekki Maganoho shiqishiꞌri.”—Mat. 5:23, 24. w18.09 21 guf. 17

Yesuusi jeefote hashsha, rosaanosi ledo heeꞌre baxillu daafira mite 30 hige coyiꞌrino. Isi rosaanosi ‘kiꞌne kiꞌneneewa baxamme’ yiinonsa. (Yoh. 15:12, 17) Insa mimmito baxxannoha ikkiro, addu rosaano ikkitinota wolootu huwata dandiitanno. (Yoh. 13:35) Yesuusi kulino baxilli woloota marara calla ikkikkinni, meessi horo agurre loosunni leellinshanniho. Isi togo yiino: “Lubbosi jaalisira sayise aanno manchiha roorino baxilli ayewano dino. Ani hajajoommoꞌnere wonshitiniro, kiꞌne jaallaꞌyaati.” (Yoh. 15:13, 14) Yannankerano Yihowa soqqamaasine mereero noohu addu baxillinna kaajjado mittimma, insa Maganu manna ikkitinota leellishshanno. (1 Yoh. 3:10, 11) Gobbanke, gaꞌrenke, coyiꞌneemmo qaalinna budinke babbaxxinoha ikkirono, alamete doyichora nooti Yihowa soqqamaasine mimmitonsa lubbora baxxanno. w18.09 12 guf. 1-2

Yihowa soqqamaanosi maatensa towaaxxitara hasiꞌranno. Lawishshaho, maatekkira hasiisannoha maalaamittete coye wonshate looso loosa hasiissannoheha ikkara dandaanno. Batinyu amuuwi qaaqquullensa towaaxxate mine hosanno. Anninkenna amanke jajjabbooꞌmanno woyite towaanteemmonsa. Qoleno hatto assanke hasiissannote. Aterano maatete giddo loosu batiꞌrinoheha ikkiro, Yihowara hasiꞌrootto geeshsha soqqama dandaattokkiha lawahera dandaanno. Ikkirono hexxo mudhitooti! Maatekkira hasiisannore shiqishatto woyite, Yihowa hagiidhanno. (1 Qor. 10:31) Mini giddo hakkeeshsha loosu batiꞌrannohekkiha ikkiro, maatensa miilla towaaxxitannore ammanate roduuwakki, xiwantinore, geerra, woy woloota kaaꞌlo hasiissannonsare kaaꞌla dandaatto. Songoꞌnera togoo kaaꞌlo hasiissannonsari no? Hatto assittoro, Yihowa kuni manni huucciꞌrino huuccattora dawaro qolanno woyite ledosi loosatto.—1 Qor. 10:24. w18.08 24 guf. 3, 5

Yooseefi roduuwisi borojjimmate hirtusi yannara 17 diri balla ikkannosi. Insa Yooseefi hirtinohu, annisi iso baxannosi daafira hinaasseeti. (Kal. 37:2-4, 23-28) Yooseefi mito 13 ikkanno diro Gibitsete borojjicho ikke hattono usurame keeshshino; qoleno Yooseefi baxannosi annisiwinni xeertiꞌre heeꞌrino. Hatte yannara Yooseefi hexxo mudhannokkinna giiramannokki gede kaaꞌlinosiri maati? Yooseefi usuru mine qarrame heeꞌre, Yihowa maassiꞌrinosi gara hedinoha ikkara dandaanno. (Kal. 39:21; Far. 105:17-19) Yooseefi wedellichu heeꞌre lainoti albillitte ikkannore leellishshanno ajuuja, Yihowa baxannosita huwatanno gede assitinosi. (Kal. 37:5-11) Qoleno isi duucha hige xissosi Yihowara kuꞌlinoha ikkara dandaanno. (Far. 145:18) Yihowa Yooseefi giddosinni huucciꞌrino huuccatto macciishshe aye geeshshi fonqoli iillisirono ‘ledosi noota’ kule jawaachishinosi. w18.10 28 guf. 3-4

Maalaamittete jiro wolootaho gara ikkitinokki lao heedhannonke gede assitankera dandiitanno. Ikkollana mittu manchi buxicho woy dureessa ikkasi isira noonke lao gara woy gara ikkitannokki gede assitannohu hiittoonniiti? Techo qummeeshshi leellishannonte gede Selemooni qullaawu ayyaaninni guuntete xeꞌne noonsa mannire borreessino. Kuni qummeeshshi maa rosiisannonke? Qoropha hoongummoro, buxane ikkitino roduuwinkewa aana agurre, dureeyye ikkitino roduuwa calla jaallanke assiꞌnammora dandiineemmo. Maalaamittete jiro calla laꞌne wolootaho yoo yaa lowo geeshsha gawajjitanno yineemmohu mayiraati? Togo assineemmoha ikkiro songote giddo babbadooshshe kalanqammora dandiineemmo. Umi xibbi diro togoo babbadooshshi mite songo giddo kalaqamino daafira, rosaanchu Yaiqoobi Kiristaana qorowisiisino. (Yai. 2:1-4) Xaa yannarano songonke gawajjotenni agarate, togoo hedo heedhannonkekki gede assiꞌra hasiissannonke. Manna aana calla laꞌne yoo yineemmokki gede qorophinanni heeꞌnoommoronna teꞌee buuxiꞌra hasiissannonke. w18.08 10 guf. 8-10

Ayyaanaamittete roduuwinke ledo noonke aante Yihowa jaala ikkate qoossonke naandeemmoronna teꞌee leellishshanno. Insano ninkete gede Yihowareeti. Tenne hawa hoongummoro, woꞌmante yannara roduuwinkera danchummanna baxille leellinsheemmo. (1 Tes. 5:15) Yesuusi harunsaanosi togo yiino: “Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.” (Yoh. 13:35) Milkiyaasi Yihowa daga mimmitu ledo hasaabbanno woyite Yihowa ‘macciishshannota’ xawisino. (Mil. 3:16) Ee, Yihowa “isire ikkitinore afino.” (2 Xim. 2:19) Isi ninke coyiꞌneemmonna assineemmoha mitto mittonka coye seekke afino. (Ibi. 4:13) Yihowa roduuwinkera gara ikkinokkire assineemmonna coyiꞌneemmo woyite ‘macciishshanno.’ Mimmitonke gatona yineemmoha, wosina adhineemmohanna shaqqadda ikkinummoro Yihowa tenne laꞌꞌannota dihuluullammeemmo.—Ibi. 13:16. w18.07 26 guf. 15, 17

Yihowawa gamba yee heeꞌra hayyote. Maganinke gedee wolqaataami, hayyichinna baxillaanchi dino! Konnira ninke baalunku isi wido ikka hasiꞌneemmoti egennantinote. (Far. 96:4-6) Ikkollana mite Maganu soqqamaano Isi wido ikkitinota leellishshanno faro afidhinoha ikkirono, hatto assitukki gattino. Hanni Qaaeeli xagge hedi. Isi Yihowa agurranna wole magano dimagansiꞌrino. Ikkollana Qaaeeli shiqishino magansiꞌra Magano dihagiirsiissino. Korkaatuno wodanisi giddo busha hedo muꞌra hanaffe no. (1 Yoh. 3:12) Yihowa Qaaeeli kaaꞌla hasiꞌrino daafira togo yiinosi: “Dancha assoottoha ikkoommero albikki xawanno; dancha assa hoogittoro kayinni cubbu waalchikkira rie agarannohe; hasattosino ate amadateeti; ati kayinni qeelattora hasiisannohe.” (Kal. 4:6, 7) Yihowa Qaaeeli, “Maaro eꞌe ane wido ikkittoro, anino ledokki ikkeemmo” yiinosihu gedeeti. Qaaeeli kayinni Yihowa uyinosi amaale dimacciishshino. w18.07 17 guf. 1, 3; 18 guf. 4

Xawaabbanke xawisa dandiineemmo doogga giddo mitte dancha duduwo duduwatenna manna rosaano assate. (Mat. 28:19, 20) Qoleno dancha akattanke Yihowa ayirranno gede assitanno. Dancha duduwo kulleemmonsa mannino ikko wolootu akattanke laꞌanno. Manna hasaawinseemmo woyite faasiinqe keere haaꞌneemmoha ikkiro farciꞌneemmonsa manni ninkerano ikko magansiꞌneemmo Maganinkera dancha lao heedhannonsa. Yesuusi rosaanosi “Manni minira eꞌinanni woyite, ‘Keeru ledoꞌne heeꞌro’ yiiyye” yiino. (Mat. 10:12) Yesuusinna soqqamaasinesi sabbakkino qooxeessira mannu mininsara marino manna afa hoogirono minira eꞌe yaa rosamino coyeeti. Yannankere kayinni duucha basera togoo budi baino. Ikkirono, marroommohu mayiraatiro baxillunninna danchu garinni kulummonsaro hanqinsa qiidara dandaanno. Togoo yannara faasiinqe hasaawisa lowo geeshsha danchate. Gudumaaleho borro worranni gaare horoonsiꞌre farciꞌranno roduuwino hatto assanno. Mannu faasiinqe keere haaꞌnannita baxanno. w18.06 22 guf. 4-5

Pheexiroosi Yihudu wido ikkino manniwa calla aananno. Ikkollana Maganu, Kiristaanu mallaada hasiissannonsakkita xawisisihu gedensaanni, Roomu olanto roorrichira Qornelewoosira dancha duduwo duduwino. (Soq. 10:28, 35) Hakkunni gedensaanni, Pheexiroosi Yihudu wido ikkinokki Kiristaaniwa aananna ledonsa sagale ita hanafino. Ikkollana lowo diri gedensaanni, Pheexiroosi Antsookiyaho heeꞌrannohu Yihudu wido ikkinokki Kiristaani ledo sagale ita agurino. (Gal. 2:11-14) Konni daafira Phaawuloosi Pheexiroosi seejjinosi; Pheexiroosino seejjosi adhino. Tenne mayinni anfeemmo? Pheexiroosi shiimiidi Iisiyira heeꞌrannohu Yihudunna Yihudu gaꞌre ikkinokki Kiristaanira umi sokkasi borreessi woyite, baalanka roduuwa baxa hasiissannonsata xawisino (1 Phe. 1:1; 2:17) Yesuusi soqqamaasine isi lawishshinni “manna baala” baxa rossino. (Yoh. 12:32; 1 Xim. 4:10) Insa hedonsa biddi assiꞌrate lowo yanna keeshshitinoha ikkirono, togo assa dandiitino. Hundi Kiristaani “haaro mannimma” uddiꞌrino daafira, Maganu gede manna baala taalo illenni laꞌꞌa dandiino.—Qol. 3:10, 11. w18.06 11 guf. 15-16

Umi xibbi diro Roomu olanto gagasoho uddidhanno uddano giddo mitte, siwiillatenni loonsoonnite. Togoo uddano olamaanchu kuni siwiilu uduunni wodhino bayichira nooronna teꞌee buuxate mule mule layiꞌra hasiissannosi. Togo assasi wodanasi woy wole bisisi kifillasi agartannosi. Olamaano uddidhannoti siwiilu uddano, lawishshu wodananke gawajjotenni agartannota Yihowata xalala seerubba dancha gede assite xawissanno. (Law. 4:23) Mittu olamaanchi siwiilunni loonsoonnita gagasu uddanno fushshe hoole, shattara uddano diuddiꞌranno; hatteente gede ninkeno gara ikkinoha Yihowa seera harunsa agurre uminke seerinni massagama dihasiissannonke. Mannu ooso uminsanni lawishshu wodanansa gawajjannore gargadha didandiitanno. (Law. 3:5, 6) Hatteentenni Yihowa uyinonketi ‘siwiilu uddano’ wodananke gawajjotenni agartanno gede, garu basera nooronna teꞌee ganyine buuxa hasiissannonke. Qullaawu Maxaafi halaalira noonke baxilli lexxanno gede assiꞌnummoro, ‘gagasu uddanonke’ duqqa yaano, Qullaawu Maxaafiha xintu seera harunsa diqarrissannonke.—Far. 111:7, 8; 1 Yoh. 5:3. w18.05 28 guf. 3-4, 6-7

Muse umosi roorsiꞌrannokki massagaancho ikkirono, mannu isira gumgumino. Insa gunguntinohu waa hoogginohura calla ikkikkinni waa hoogganno gede assinohu Muse ikkinohu gede assite hedde isirano gunguntino. (Kir. 20:1-5, 9-11) Muse lowo geeshsha hanqino daafira, albi gede joongille leellishikki gatino. Yihowa hajajinosi garinni kinchoho coyiꞌra agure, mannaho hanqino; hattono maalale loosinohu iso ikkinohu gede asse coyiꞌrino. Hakkiinni kincho lame hige ganita wayi dhoohe fulino. Naaxxanna hanqu shota ikkitinokki soꞌro loosanno gede assinosi. (Far. 106:32, 33) Muse joongille leellishikki gatino daafira, Hexxote Gobba eannota hoolloonnisi. (Kir. 20:12) Tenne xaggenni lowore ronseemmo. Umihunni, jooguulle ikkine heeꞌrate woꞌmanka woyite sharrama hasiissannonke. Shiima yanna nafa deꞌnummoro, naaxxa giddonke mudheenna gara ikkinokkire coyiꞌnammora woy assinammora dandiineemmo. Layinkihunni, fonqolo ikkannori iillannonke woyite joongille leellisha roore qarra ikkitankera dandiitanno; konnira togoo coyi iillannonke woyiteno jooguulle ikkate sharrama hasiissannonke. w19.02 12-13 guf. 19-21

Yesuusi sabbankeemmo gede hajajino hajajo duha ikkitinoni? Diꞌꞌikkitino! Yesuusi woyinete haqqicho daafira lawishsha coyiꞌri gedensaanni, Maganu Mangiste sokka dudumbummoro hagiirraamma ikkineemmota coyiꞌrino. (Yoh. 15:11) Isinni isi afiꞌrino hagiirre ninkeno afiꞌra dandiineemmota buuxisinonke. Hiittoonni? Yesuusi isonooto woyinete haqqicho ledo, rosaanosi qole sinnate ledo taashshino. (Yoh. 15:5) Haqqicho, sinna irkisse amaddanno. Sinna waanna wole hasiissanno sagale afidhannohu woyinete haqqichora qaꞌmidhe heedhuro callaati. Hatteente gede, Kiristoosi faale haꞌne isi ledo noonke mittimma agadhine heeꞌnummo geeshsha, isi Annisi fajjo wonshe afiꞌrino hagiirre ninkeno afiꞌra dandiineemmo. (Yoh. 4:34; 17:13; 1 Phe. 2:21) Hanee yinanniti 40 saꞌꞌanno diro suwisaancho ikkite soqqantino rodoo togo yitino: “Soqqamumma gedensaanni macciishshamannoe hagiirri, Yihowara soqqama agureemmakki gede assannoe.” Ee, soqqanshotenni afiꞌneemmo hagiirri, mannu sokkanke macciishshannokki qoqqowira nafa hexxo mudhinummokki sabbankeemmo gede assannonke.—Mat. 5:10-12. w18.05 17 guf. 2; 20 guf. 14

Umi xibbi diro baalunkunni roore ammanate roduuwasi jawaachishinohu Phaawuloosiiti yaa dandiinanni. Isi addi addi maganna magansiꞌrannohu Giriiketenna Roomu mannira haꞌre sabbakanno gede qullaawu ayyaani kulinosi. (Gal. 2:7-9) Phaawuloosi yannankera Turkete gobba noowa, hattono Giriikenna Ixaaliya haꞌre Ayihude ikkinokki manni mereero Kiristaanu songo xintino. Konni haaru Kiristaanira ‘gobbansa manni qarra iillishinonsa’ daafira jawaante hasiissinonsa. (1 Tes. 2:14) Phaawuloosi 50 M.D. balla Teselonqe noote haaro songora togo yee sokka borreessino: “Kiꞌne woꞌmanka woyite huuccattotenni qaanganni, Maganoho galata shiqishiꞌneemmo. Maganinkenna Anninke albaanni ammanaꞌnenni leellishshinanni looso, baxilliꞌne, jawaantenna Mootichinke Yesuusi Kiristoosi widoonni afidhinoonnita jawaata [hexxo] woꞌmanka woyite qaangeemmo.” (1 Tes. 1:2, 3) Insa mimmito jawaachishshanno gede togo yee amaalinonsa: “Xa assitinanni heedhinoonninte gede, mimmitoꞌne jawaaachishshenna dhaabbe.”—1 Tes. 5:11. w18.04 18-19 guf. 16-17

Yihowa hagiirsiisanno garinni heeꞌra hasiꞌranno wedellichi soqqansho illachishanno. Sabbakate loosi wiinamme loonsanniha ikkino daafira, heeshshonke giddo balaxisiisa hasiissannonke loosooti. Albinni roore soqqamate mixo fushshiꞌra dandaatto? Suwisaancho ikka dandaatto? Soqqanshokkinni gari geeshsha hagiidha hoogoottoha ikkiro maa assa dandaatto? Danchu garinni farciꞌra dandaattohu hiittoonniiti? Lame coye assa tennera kaaꞌlitannohe: Seekkite qixxaawi; hattono hexxo mudhite rosoottore woleho kula agurtooti. Hatto assakki sabbakate loosinni hedoottokki hagiirre afiꞌratto gede kaaꞌlitannohe. Farciꞌrate seekkite qixxaawate, rosu mine ooso duucha woyite xaꞌmitanno xaꞌmora dawaro qolate woꞌnaali. Jw.org yinanni webisayitenkenna wole borronkera wedellu mannu duucha woyite xaꞌmanno xaꞌmora dawaro qolate qixxaawanno gede kaaꞌlitanno hedo no. Lawishshaho “Ayyaanna ayirrissinannikkihu mayiraati?” yee xaꞌmannohehura dawaro qolate “Maganu Baxillinni Fultinikki Heedhe” yaanno maxaafa fooliishsho 13 qixxaawa dandaatto. w18.04 27 guf. 10-11

Addaaminna Heewani umo duuchu gari wolapho afidhinoha ikkirono, wolaphonsa dannu noote. Mitu danni kayinni kalaqamunni hasiisannoha ikkino daafira, qarrisannoha diꞌꞌikkino. Lawishshaho, Addaaminna Heewani heeshshotenni heeꞌrate foola, itanna goxa hasiissannonsata affino. Insa kuri coyibba assitino daafira, wolapho hoogginoha lawannonsani? Dilawannonsa; korkaatuno Yihowa insa kuri coyibba assite hagiirrenna harshammo afidhanno gede asse kalaqinonsa. (Far. 104:14, 15; Ros. 3:12, 13) Yihowa, Addaaminna Heewani ooso ile uulla woꞌmanno gedenna uulla towaatanno gede hajajinonsa. Tenne hajajo wonsha duha ikkitinoni? Diꞌꞌikkitino! Yihowa guuta ikkitinoti mannu ooso gannate ikkitino uullara hegerera heedhara hedino; Isi, insara tini hedosi woꞌmitanno gede assate qoosso uyinonsa. (Far. 127:3; Isa. 45:18) Addaaminna Heewani Yihowara hajajamoommero, maatensa ledo hagiidhanni hegerera heeꞌra dandaanno. w18.04 4-5 guf. 7-8

Sabbankeemmo woyite manna cincineemmoha ikkiro, Qullaawu Maxaafi halaale macciishshitanni heedhenni adhitanno yine dihendeemmo. Lawishshaho, hanni uullate aana Gannatete heeꞌrate hexxonke daafira mannaho xawisa dandiineemmo gara hedi. Batinyu manni reyo baalunku coyira gumulote woy danchu manni baalu iimira haꞌranno yee ammantannoha ikkara dandaanno.Mittu rodii gannate ikkitino uulla aana hegerera heeꞌrate daafira mannaho xawisanno gara coyiꞌrino. Isi balaxe Kalaqama 1:28 nabbawanno. Hakkiinni hasaawisanni noo mancho Maganu mannu ooso hiikko heedharanna hiittoo heeshsho heedhara hasiꞌrannoro xaꞌmanno. Batinyu manni “Uullate aana hagiirru noo heeshsho heedhara hasiꞌranno” yee qolanno. Hakkiinni kuni rodii Isayaasi 55:11 nabbawi gedensaanni “Maganu hedinori xa soorraminoni?” yee xaꞌmanno. Duucha woyite mannu “Disoorramino” yee qolanno. Jeefote isi Faarso 37:10, 11 nabbawi gedensaanni mannu ooso albillitte ma ikkitannoro xaꞌmanno. Isi kuri qummeeshshuwa horoonsiꞌre, Maganu xaano danchu manni Gannate ikkitino uullara hegerera heeꞌrara hasiꞌrannota huwatanno gede batinye manna kaaꞌlino. w19.03 24 guf. 14-15; 25 guf. 19

Yihowa Beettisi rosiisinore macciishshinammoranna isira hajajammammora hasiꞌrannota xawisino. Yesuusi rosaanosira dancha duduwo dudubbanno gara rosiisinonsa; hattono baqqi yite agadhitanno gede duucha hige qaagiissinonsa. (Mat. 24:42; 28:19, 20) Qoleno hegere heeshsho afiꞌrate sharrantannonna hexxo mudhitannokki gede jawaachishinonsa. (Luq. 13:24) Yesuusi, harunsaanosi insa insanaawa baxantanno gede, mittimmansa agadhite heedhanno gedenna hajajosi harunsitanno gede luphi asse kulinonsa. (Yoh. 15:10, 12, 13) Tini amaale hunda heeꞌrino mannano ikko xaa yannara noo manna kaaꞌlitannote. Yesuusi togo yiino: “Halaalu widoonni uurrinohu qaaleꞌya macciishshanno.” (Yoh. 18:37) “Kiꞌne kiꞌneneewa koffi yitinoonni coye baala cincatenni agurre” yitanno amaale harunsineemmoha ikkiro, Yesuusi huuro macciishshinanni heeꞌnoommo. (Qol. 3:13; Luq. 17:3, 4) Qoleno ‘injiinkerono injaa hooginkerono’ dancha duduwo diinaggaambe dudumbeemmoha ikkiro, Yesuusi yaannore macciishshinanni heeꞌnoommo.—2 Xim. 4:2. w19.03 10 guf. 9-10