Dotteessa

Ninkena? Hendeemmohu Yihowa hedanno garinniitinso, alamete manni hedanno garinniiti? Kiristaana ikkinoommo daafira, Magano hagiirsiisannore assa hasiꞌneemmo. Yihowa hedanno garinni hedate woy mitto coye isi laꞌꞌanno garinni laꞌꞌate sharrammeemmo? Heeꞌnoommohu busha alamera ikkino daafira, hatto assa shota diꞌꞌikkitino. (Efe. 2:2) Qoleno duucha woyite alamete heeꞌranno manni ninkeneeto banxeemmo gede jawaachishannonke daafira, insa yaannore macciishsha giwa fonqolo ikkitankera dandiitanno. Yihowa hedanno garinni heda shota diꞌꞌikkitino; alamete manni hedanno garinni heda kayinni diqarrissanno. Alamete hedo harunsineemmoha ikkiro, ninkeneeto banxeemmore ikkinammoranna danchanna busha ani afiꞌreemmo yine hendammora dandiineemmo. (Maq. 7:21, 22) Konni daafira “mannunnita” ikkikkinni Maganu hedo heedhannonke gede sharrama hasiissannonke. w18.11 18 guf. 1; 19 guf. 3-4

Yihowa babbaxxitino yannara sase hige naadisi woyite Yesuusi lowo geeshsha jawaatinoti dihuluullissannote. Yesuusi Yordaanosi Lagira cuuame fuli gedensaanni Yihowa, iima heeꞌre coyiꞌrino. Yihowa coyiꞌri yannara macciishshinohu Yohaannisi calla ikkikki digatino. Yesuusi reyara mittu diri albaannino, soqqamaasinesi giddo sasu Yihowa Yesuusi daafira togo yaanna macciishshitino: “Hagiirsiisannoehu, baxeemmohu Beettiꞌya konneeti; isi yaannota macciishshe!” (Mat. 17:5) Qoleno Yesuusi reyara shiimu barri gate heeꞌreenna Yihowa iima heeꞌre Beettosi hasaawisino. (Yoh. 12:28) Yesuusi, Magano xonino yine kaphunni kassanse shollinshe shinannisita afinoha ikkirono, isi fajjo ikkikkinni Yihowa fajjo woꞌmitanno gede huucciꞌrino. (Mat. 26:39, 42) Yesuusi alame naaddasira ikkikkinni Annisi naadasira hasiꞌrino daafira, “shollinye waajjikkinni” qarru haqqira sutame reyino.—Ibi. 12:2. w18.07 10-11 guf. 15-16

Yesuusi Mootichu Hurbaate xinti gedensaanni, worba ikkinota leellishino. Hiittoonni? Yesuusi Magano xonino yine beebbate shinannisita afinoha ikkirono, Annisi fajjinore maahoyye yiino. (Mat. 26:65, 66) Yesuusi, Maganu suꞌminna aliidimmasi ayirritanno gede, hattono maaro eanno manni hegerera heeꞌranno faro afiꞌranno gede Yihowara ammanamino. Qoleno Yesuusi harunsaanosi shiima yanna gedensaanni iillannonsa fonqolira qixxeessinonsa. Yesuusi yaachishannosi coyi aana illachisha agure ammanantino soqqamaasinesi kaaꞌlate aana illachishasi worba ikkinota leellishshanno. Yesuusi Yihuda haꞌrisi gedensaanni xintinohu bikku hurbaati, ayyaanunni buurantanno harunsaanosi duꞌnantinoti Yesuusi mundeenna haaru gondoori miilla ikkansa kaaꞌlitannonsa gara qaagganno gede assannonsa.—1 Qor. 10:16, 17. w19.01 22 guf. 7-8

Yesuusi Anni iima heeꞌre, “Suꞌmaꞌya ayirrisoommo; ledeno ayirriseemmo” yee qolino. Yesuusi Yihowara ammaname heeꞌra hasiissannosita wodanchino daafira, lowo geeshsha yaadino. Yesuusi gannannisitanna qarrinse shinannisita afino. (Mat. 26:38) Baalunkunni roore, Yesuusi Annisi suꞌmi ayirranno gede assa hasiꞌrino. Yesuusi Magano xonino yine kassansoonnisi daafira, reyosi Yihowa suꞌmi mishamanno gede assitanno yee yaadino. Ninkeno Yesuusinte gede, Yihowa suꞌmi mishamara dandaanno yine yaandeemmoha ikkara dandaanno. Yesuusi gede ninkerano taashsho xeꞌinori iillanni noonkeha ikkara dandaanno. Woy gibbannonkeri ninke daafira kapho coyidhanno woyite, lowo geeshsha dadillinammora dandiineemmo. Insa coyidhanno kaphi, Yihowanna dirijjitesi mishantanno gede assanno yine hendeemmoha ikkara dandaanno. Tenne yannara, Yihowa Yesuusira coyiꞌrinori lowo geeshsha sheshifachishannonke. Yihowa suꞌmisi ayirranno gede assanno.—Far. 94:22, 23; Isa. 65:17. w19.03 11-12 guf. 14-16

Yesuusi rosaanora isi kulinonsari masisinonsa. Insa Yesuusi Israeelete gashshoote qolanno yite heddanni heedheenna, isi kayinni shiima yanna gedensaanni qarrame reyannota kulinonsa. Hatte yannara balaxe coyiꞌrinohu Pheexiroosiiti. Isi togo yiino: “Mooticha, horontanni diꞌikkanno! Kuni coyi atera iilloonkehe!” Hakkiinni Yesuusi togo yee qolinosi: “Ati Sheexaanu muliꞌyanni hoꞌli! Ati mannunnita ikkinnina Maganunnita hedattokki daafira ati anera gufichoho.” (Mat. 16:22, 23; Soq. 1:6) Yesuusi hatto yee coyiꞌrasi, Maganu hedonna Sheexaanu alamera heeꞌranno manni hedo mereero badooshshu noota leellishshanno. (1 Yoh. 5:19) Pheexiroosi Yesuusi batinyu alamete manni gede umisira roorsiꞌranno gede jawaachishino. Yesuusi kayinni Annisi hedo Pheexiroosi hedowiinni baxxitinota afino. Yesuusi Pheexiroosira qolino dawaro, isi alamete hedo giwannotanna Yihowa hedo harunsannota leellishshanno. w18.11 18 guf. 1-2

Hanni alamete doyichora noohu lowo miliyoone ikkanno manni Mootichu Hurbaate ayirrisate gamba yaanno woyite Yihowara mayi macciishshamannosiro hedi. Isi baalanka manna xaphoomunni calla ikkikkinni, konne gambooshshe dayinoha mitto mittonka mancho laꞌꞌanno. Lawishshaho isi ammanante diru kiiro konne ayyaana ayirrisate daggannore laꞌꞌanno. Insa giddo mitootu konne ayyaana ayirrissannohu buutote darti giddo heedhe ikkara dandaanno. Mitootu wole gambooshshe ganyite daggannokkiha ikkirono, Qaagooshshu Ayyaana gata hasiissannonsakki gambooshshi gede assite laꞌanno. Konni albaanni Qaagooshshu Ayyaana dagge egentinokkiri konni ayyaani daafira afate quqquxante dagganno woyite Yihowa insano laꞌꞌanno. Yihowa batinyu manni Qaagooshshu Ayyaana daanno woyite hagiidhannoti egennantinote. (Luq. 22:19) Ikkollana, isi konne ayyaana dagganno gede assinonsa korkaati aana illachishanno. Yihowa aannonkehanna dirijjitesiwiinni afiꞌneemmo biddishsha quqquxamme harunsineemmo?—Isa. 30:20; Yoh. 6:45. w19.01 26 guf. 1-3

Yesuusi rosaanosira yee reyate calla ikkikkinni, heeshshote noo yannarano umisi injonni roore insa horo balaxisiisate maahoyye yiino. Lawishshaho isi daafure woy baasa yaade noo yannara nafa harunsaanosi hasaawisino. (Luq. 22:39-46) Hattono Yesuusi harunsaanosi assitannosiri aana ikkikkinni, isi insara assa dandaanno coyi aana illachishino. (Mat. 20:28) Ninke addu Kiristaani maamari miilla ikkate qoosso afiꞌnoommo; qoleno wolootuno konni maamari miilla ikkitanno gede koyisate dandaaminkere baala assineemmo. Ikkirono roorenkanni ‘ammanate’ roduuwanke ikke heeꞌrenni ayyaanaamittensa shoshshoggitino roduuwanke kaaꞌlate aana illachinsheemmo. (Gal. 6:10) Kuri roduuwa gambooshshuwanke roorenkanni Qaagooshshu Ayyaana daanno gede jawaachinshe banxeemmonsata leellinsheemmo. Yihowanna Yesuusi gede, ayyaanaamittetenni shoshshoggitinori Yihowawa higganno woyite tashshi yaannonke.—Mat. 18:14. w19.01 29 guf. 12, 14; 30 guf. 15

Yesuusi reyosi Qaagooshshe xintate Faasiku ayyaaninni gatino timanna woyine calla horoonsiꞌrino. Yesuusi soqqamaasinesira kuri lamunku coyi shiima yanna gedensaanni insara yee kakkalo asse shiqishannoha maalasinna mundeesi riqiwannota kulinonsa. Soqqamaasinesi kuni lowo geeshsha hasiisannohu haaru hurbaati damboowa ikkasinni dhagge assidhinokkiha ikkara dandaanno. Mayira? Boodu agani albaanni muli jaallasi yaano Aliaazaari, Maartanna Maariyaami mine Yesuusi insa rosiisa hanafino. Maarta mine nooha ikkirono, ayirradu wosinchira sagale qixxeessate kabbi facci yitino. Yesuusi tenne lae, Maarta lowo sagale qixxeessa hasiissannohu woꞌmante yannara ikkinokkita huwattanno gede shaqqillunni amaalinose. (Luq. 10:40-42) Gedensoonni Yesuusi reyara shiima saate gatte heedheenna isi umisi hattenne amaale harunsino. Isi Qaagooshshu Ayyaana bikkunni ayirrisino. w19.01 20-21 guf. 3-4

Yihowa Yesuusa hedinokki garinni ayirrisinosi; Maganu iso reyotenni kayise “woꞌmunkura aliidi darga” worinosi; hattono hakkuyira albaanni mittohono ee egenninokkita reyitannokki heeshsho uyinosi. (Fil. 2:9; 1 Xim. 6:16) Ee, Yesuusi ammaname heeꞌrasinni taalle nookki ayirrinye afiꞌrino! Tenne alamewiinni ayirrinye hasiꞌneemmokki gede mayi kaaꞌlannonke? Yihowa ayewoteno ammanantino soqqamaasinesi naadannotanna baꞌraaꞌra aannonsata qaagi; qoleno duucha woyite togo assannohu hendoonnikki garinniiti. Yihowa ninkerano albillitte hendoommokki atoote aankera dandaanno. Hakka geeshsha kayinni tini alame baꞌannota ikkitinota qaange, tini busha alame iillishshannonke fonqolo qeelle saꞌno. (1 Yoh. 2:17) Baxillaanchu Anninke Yihowa, ‘halaalaancho yoo yaanno daafira, loosonkenna leellinsheemmo baxille dihawanno.’—Ibi. 6:10. w18.07 11 guf. 17-18

Yesuusi soqqamaasinesi ledo goofimarchu hurbaate iti hashsha mittimmate daafira seekke kulinonsa. Insa ledo huuccatto assiꞌri woyite, isi Annisi ledo mitto ikkinonte gede rosaanosi mereerono mittimma heedhara hasiꞌrannota coyiꞌrino. Soqqamaasinesi mereero mittimma heedhuro, fajjosi wonshanno gede Yesuusa uullara soyinohu Yihowa ikkinota mannu huwata dandaanno. Mereeronsa baxillu heeꞌriro, mannu insa Yesuusita addu rosaano ikkitinota huwatanno, hattono mereeronsa mittimma heedhanno. (Yoh. 13:34, 35) Yesuusi hakko hashsha mittimmate daafira lowore kulino; hatto assasi garankolla. Korkaatuno soqqamaasinesi woꞌmunni woꞌma mitto ikkitinokkita afino. Lawishshaho soqqamaasinesi hakkuyira albaanni assitinonte gede hakko hashshano “baalunkunni roorannohu ayeti?” yitanni heewisantino. (Luq. 22:24-27; Maq. 9:33, 34) Wole yannarano, Yaiqoobinna Yohaannisi Yesuusi Mangistesira baalunkunni roorino bayicho aannonsa gede xaꞌmidhino.—Maq. 10:35-40. w18.06 8 guf. 1-2

Yihowa minaanninna minaama mereero heeshshonsa diro woꞌma geedote baxilli heeꞌrara hasiꞌranno. (Mat. 19:3-6) Mittu manchi loosannote bushate bushanna baxillu xeino ikkito giddo mitte soorrote. Konnira Tonne Hajajo giddo lamalkiti “Foortooti” yaase garankolla. (Mar. 5:18) Soorra “Maganu albaanni” cubbo loosatenna galte gawajjate. (Kal. 39:7-9) Mittu manchi fooranno woyite, galtesi baxxanno minaannise kaadinose daafira wodanise madirara dandaanno; tini mada qolte lowo yanna geeshsha hura hooggara dandiitanno. Yihowa oosoteno hedanno. Yihowa, annuwunna amuuwu oosonsara maalaamittete hasatto calla ikkikkinni ayyaanaamittete hasattono wonshitanno gede hajajino. Annuwunna amuuwu afiꞌri faro baalantenni oosonsa Yihowa Seera affannonna ayirrissanno gede rosiisa hasiissannonsa. (Mar. 6:6-9; 7:13) Annuwunna amuuwu oosonsa lashshi assa agurte, Yihowawiinni afidhino ragge gede assite amada hasiissannonsa.—Far. 127:3. w19.02 21 guf. 5, 7

Iyyoobi Maganu albillitte aannosi atooti aana illachishe minshe nookkiha ikke heeꞌrino. Iyyoobi minshe nookkiha ikke heeꞌrasi Magano hagiirsiissannota huwatino. Isi fonqolu iillisirono Yihowa gedensoonni baꞌraasannosita addaxxino. Isi konni garinni Yihowa addaxxasi, minshe nookkiha ikke heeꞌranno gede kaaꞌlitinosi. Yihowa, Iyyoobi minshe noosikkiha ikke heeꞌrino daafira, guuta ikka hoogirono lowo atoote uyinosi! (Iyo. 42:12-17; Yai. 5:11) Isinni Iyyoobi albillitte hakkiinni saino atoote afiꞌranno. Maganinke xaano disoorramino. (Mil. 3:6) Minshe nookkire ikkine Yihowa hagiirsiinsummoro, isi albillitte bae atoote aannonketa addaxxa dandiineemmo. (1 Tes. 5:8, 9) Mito woyite minshe nookkiha ikkite heeꞌrate sharrantanni noottohu ate calla ikkoottoha lawahera dandaanno; ikkollana hatto diꞌꞌikkino. Ammaname minshe nookkire ikke heeꞌrannohu alame woꞌmate lowo miliyoone ikkanno manni no. Qoleno hunda heeshshonsa hoogganno gede assara dandaannori iillinsarono minshe nookkire ikkite heedhino labballinna meenti widira kiiramatto.—Ibi. 11:36-38; 12:1. w19.02 7 guf. 15-16

Qaagooshshu Ayyaani yanna saꞌanno woyite, ninkeneeto togo yine xaꞌma dandiineemmo: ‘Yesuusi gede baxille leellisha dandeemmohu hiittoonniiti? Umiꞌya qiniitinni roorse roduuwiꞌya daafira hedeemmo? Roduuwiꞌya wolqansara aleenni ikkino coye assitanno gede hasiꞌreemmonso, dhukansa hedeemmo?’ Ninke baalunku Yesuusi lawishsha harunsine ‘wolootu qarra uminkehu gede assine’ hendo. Kiristoosi Reyo qaagooshshe ayirrinseemmohu hegere geeshsha diꞌꞌikkino. Yesuusi bayiru qarri yannara ‘daanno’ woyite uullate aana gattinore “Maganu doodhinore” gamba assanno; hakkunni gedensaanni Qaagooshshu Ayyaana diayirrinsanni. (1 Qor. 11:26; Mat. 24:31) Qaagooshshu Ayyaana ayirrisa agurrihu gedensaannino, Yihowa manni konne bikku hurbaate umo heeshshi assate, worbimmatenna baxillu lawishsha asse qaagannoti egennantinote. w19.01 25 guf. 17-19

Giddiidi ayimmanke daafira huwatate, hanni bisu fayyimma daafira hendo. Umihunni, giddoyidita bisinke kifilla agadhate, dancha sagale itanna ispoorte loosa hasiissannonke. Hatteente gede ayyaanaamittete fayyimmanke agadhate, dancha ayyaanaamittete sagale sagaꞌlanna Yihowara noonke ammana loosunni leellisha hasiissannonke. Yihowara noonke ammana leellisha dandiineemmo doogga giddo mite, ronsoommore loosunni leellishatenna ammananke daafira wolootaho kulate. (Rom. 10:8-10; Yai. 2:26) Layinkihunni, giddiidinke xiwaminoha ikkirono, aananke calla laꞌne fayyuulle ikkinoommohu gede assine hendeemmoha ikkara dandaanno. Hatteente gede, giddonke busha yorto lophitanni nooha ikkirono, ayyaanaamittete coye assineemmo daafira calla ammananke kaajjadote yine hendeemmoha ikkara dandaanno. (1 Qor. 10:12; Yai. 1:14, 15) Sheexaanu isi hedanno garinni hendammora hasiꞌrannota qaaga hasiissannonke. w19.01 15 guf. 4-5

Ninkeneeto togo yine xaꞌma hasiissannonke: ‘Anino shaqqadu Samaarichi assire assanni noommo? (Luq. 10:30-35) Qarru iillinonsarira albinni roore mararronna danchumma leellisha dandeemmo? Lawishshaho, jajjabbu roduuwira, gunnoottahonna buxoho mitore asse kaaꞌla dandeemmo? Umiꞌyanni kae “wolqiweeloota jawaachisha” dandeemmo?’ (1 Tes. 5:14; Yai. 1:27) Wolootaho shaqqille leellinsheemmo woyite, wolootaho uyine afiꞌnanni hagiirre afiꞌneemmo. Qoleno, hatto assineemmo woyite Yihowa hagiirsiinsanni heeꞌnoommota anfoommo. (Soq. 20:35; Ibi. 13:16) Moote Daawiti wolootaho shaqqille leellishanno manchi daafira coyiꞌranni togo yino: “Kaaliiqi agare lubbotenni worannosi; baattote aanano maassaminoho [hagiirraamoho] yinanna heeꞌranno.” (Far. 41:1, 2) Wolootaho maaronna shaqqille leellinsheemmoha ikkiro, Yihowano ninkera maaro leellishannonke; tini qolte hegere geeshsha hagiirraamma ikkate kaaꞌlitannonke.—Yai. 2:13. w18.09 19 guf. 11-12

Yoshiko yinannite ammanantino rodoora dadillisannore kulloonnise. Akimitte ise heeshshotenni heedhannohu boode agana calla ikkinota kultinose. Hatte yannara Yoshiko maa assitino? Ise lowo geeshsha baxxannota, techohu barru qummeeshshira noo hedo qaaggino. Hakkiinni Yoshiko akimittete, Yihowa angase amade noo daafira waajjitannokkita wodanaaꞌmite kultinose. Konni qummeeshshira nooti sheshifachishshanno hedo, Yoshiko woꞌmunni woꞌma Yihowa addaxxitanno gede kaaꞌlitinose. Kuni qummeeshshi ninkerano buutote qarri iillannonke woyite quwa saꞌne yaandeemmokki gede kaaꞌlannonke. Yihowa Isayaasi tenne sokka borreessanno gede assinohu, yannate gedensaanni qafadame Baabiloone haꞌrannoha Yihudu manna sheshifachishateeti. Ikkollana Yihowa qafadame haꞌrinoha Yihudu manna calla ikkikkinni hakkuyi gedensaanni heeꞌranno manna kaaꞌlate tini sokka yannanke geeshsha keeshshitanno gede assino. (Isa. 40:8; Rom. 15:4) Heeꞌnoommohu “qarrissanno yanna” giddo ikkino daafira, Isayaasi maxaafira nooti jawaachishshanno hedo lowo geeshsha hasiissannonke.—2 Xim. 3:1. w19.01 2 guf. 1-2

Minaanninna minaama togoo qarrinni kainohunni babbaxxe heeꞌririno, adhamansa didiigantanno; insa babbaxxiro nafa lowo fonqoli iillannonsa. Phaawuloosi minaanninna minaama babbaxxannokki gede assannonsaha wole korkaata kulino. Togo yiino: “Ammaninokki minaanni ammantino minaamanni keeraaꞌmanno. Ammantinokki minaamano ammanino minaanninni keeraaꞌmitanno. Hakkunni kaꞌa oosoꞌne battaabbinoreeti; xa kayinni keeraaꞌmitanno.” (1 Qor. 7:14) Mitu Kiristaani qarru heeꞌrirono Yihowa magansidhannokki galtensa ledo heeꞌra doodhino. Insa galtensa Yihowa magansidhannota ikkituta, babbaxxa hoogate doodhansa dancha ikkitinota wodanchino. (1 Qor. 7:16; 1 Phe. 3:1, 2) Yannankera alamete doyichora Kiristaanu songo giddo galtensa hagiirru noota assiꞌrino roduuwi no. Kiꞌne songorano batinyu hagiirraamu minaannuwinna minaamuwi nooha ikkara dandaanno. Kuri ammanantino minaannuwi minaamuwansa baxanno; ammanamino minaamuwi qole minaannuwansa ayirrisanno. Insa adhanna adhama ayirrisa dandiinannita leellishshino.—Ibi. 13:4. w18.12 14 guf. 18-19

Edeni yaanno qaali “Hagiirre” yitanno tiro afiꞌrino daafira kaashshu base addinta hagiirsiissannote. Hakko bayichi lowo geeshsha biifadoho, sagale batidhinoho hattono mannunna saadate mereero salaame nooho. (Kal. 1:29-31) Ibiraawootu Afiiha “kaashshu base” yaanno qaale Giriikete Afiinni paradiisosi yinanni. Maakilintokinna Istirongisi yinanni mannooti qixxeessitino Sayikilopiidiyi paradiisosi yaanno qaali daafira togo yee xawisino: “Mittu Giriikete manchi paradiisosi yaanno qaale macciishshanno woyite biifado, mitturino gawajjannori nookki bayicho, maalaꞌlissannoti babbaxxino gumma laaltanno haqqe woꞌmitinowa, xalalu wayi noowanna geꞌreewunna geedimu hoshsha mitteenni hayisso ittannowa halaꞌlado bayicho hedanno.” (Kalaqama 2:15, 16te ledo heewisiisi) Maganu Addaaminna Heewani hattoo gannatera worinonsa; ikkollana insa Maganoho hajajama gibbino. Konnira insano ikko sirchinsa hatte gannatera heeꞌrate qoosso hooggino. (Kal. 3:23, 24) Hakko bayicho mannu keeshsha hoogirono hatti Gannate Nohi warihu Baote Wayi geeshsha heedhukki digattino. w18.12 3-4 guf. 3-5

Annunna ama oosonsara danchare rosiisa hasidhanno. Ooso Anninsanna amansa rosiisinonsa garinni heeꞌra doodhituro, gedensoonni gaabbote tugannonsakki doorsha doodha dandiitanno. Tini qolte lowo gaabbonna yaaddonni gatissannonsa. Danchu anninna ama gede, Yihowano oososi hagiirru noo heeshsho heedhara hasiꞌranno. (Isa. 48:18) Konnira isi amanyootunna mannu ledo heedhannonke aante daafira biddishsha aannonke. Isi mito coye Yihowa laꞌꞌanno garinni laꞌneemmo gedenna hakko garinni heeꞌnammora hasiꞌranno. Tini qolte furro fuuqqo hoꞌlitannota diꞌꞌikkitino. Hatteentenni, mitto coye heeshshi gotti asse hedate dandoonke woyyeessiꞌrate kaaꞌlitannonke. (Far. 92:5; Law. 2:1-5; Isa. 55:9) Yihowa biddishsha harunsinummoro, hagiirraamma ikkineemmo gede kaaꞌlannonkeha uminke doorsha doodha dandiineemmo. (Far. 1:2, 3) Ee, Yihowa hedo harunsanke duucha doogonni kaaꞌlitannonke! w18.11 19-20 guf. 7-8

Halaalu giddo qaanfanni heeꞌrate, Yihowara soqqamannokki manni hunannonkekki gede qoropha hasiissannonke. Umo halaale ronsummo yannara, Yihowa Farciꞌraasine ikkitinokki jaallankenna maatenke ledo noonke aante biddi assiꞌnoommo. Insa giddo mitootu ammananke ayirrissannoha, wolootu kayinni gibbannoha ikkara dandaanno. Maatenke miilla, ledonke loossannori woy rossannori ayyaanna ledonsa ayirrinseemmo gede koyissankera dandiitanno. Yihowa hagiirsiisannokki rosichonna ayyaanna ayirrinseemmo gede xixxiimbanninke yannara qeelammeemmokki gede mayi kaaꞌlannonke? Kuri ayyaanna Yihowa hagiirsiissannokkihu mayiraatiro woꞌmante yannara heda tennera kaaꞌlitannonke. Mite ayyaanna ayirrisa hananfoonni gara borronke giddo xiinxalla dandaatto. Kuri ayyaanna ayirrisa hasiissannonkekkihu mayiraatiro Qullaawu Maxaafinni buunxummoro, “Mooticha hagiirsiisanno” garinni heeꞌra dandiineemmo. (Efe. 5:10) Yihowanna Qaalesi addaxxanke, ‘manna waajjineemmokki’ gede kaaꞌlitannonke.—Law. 29:25. w18.11 11 guf. 10, 12

Heeshshonke giddo hendoommokki coyi tuncu yaannonke woyite, qarrinke daafira calla hendanni yaandeemmoha ikkara dandaanno. Ikkollana Yooseefi buutote qarri iillisi yannara, quwa sae yaada agure dandaamisire assino. Yooseefi Phoxifaari mine heeꞌre diinaggaawe loosinonte gede, usuru mine heeꞌreno usuru mini roorrichi hajajannosire baala loosino. (Kal. 39:21-23) Ninkerano Yooseefi gede wolqankera aleenni ikkino coyi iillankera dandaanno. Ikkollana kaajjine uurrinummoronna dandiinummore baala assinummoro Yihowa maassiꞌrannore assinanni heeꞌnoommo. (Far. 37:5) Mito woyite ‘garu baꞌꞌankera’ dandaanno; ikkirono Phaawuloosi xawisino garinni ‘hexxo dimudhineemmo.’ (2 Qor. 4:8) Hakko iso soqqanshonke aana illachinsheemmoha ikkiro, Yihowa ledonke ikkanno. w18.10 29 guf. 11, 13

Mittu egennoottonna ayirrisatto manchi suꞌmakki hawiro woy diegennoommohe yiiro mayi macciishshamannohe? Togoori hexxo mudhineemmo gede assankera dandaanno. Mayira? Ninke kalaqamunni egenninankera hasiꞌneemmo. Mannu suꞌmanke calla ikkikkinni, ayimmankenna assinoommore afara hasiꞌneemmo. (Kir. 11:16; Iyo. 31:6) Guuntete xeꞌne noonkere ikkinoommo daafira, wole kalaqamu hasattonte gede wolootu naaddankera hasiꞌrankeno soꞌrisiissankera dandiitanno. Konnira mannu hasiisannonkekki ayirrinye aannonke gede hasiꞌnammora dandiineemmo. Sheexaanu alame maccare ikka hasiꞌneemmo gede xixxiibbannonke; tini qolte iima heeꞌranno Anninke Yihowara hasiisanno ayirrinye uyineemmokki gede guficho ikkitankera dandiitanno.—Aju. 4:11. w18.07 7 guf. 1-2

Sheexaanunna agaanintesi mannu ‘awaawuranno’ gede xixxiibbannonsata afanke dhagge diꞌꞌikkitannonke. (1 Xim. 4:1, 2) Roorenkanni ammaꞌnote massagaano kaphi lowonta gawajjanno; korkaatuno mannu insa yitinore ammane Maganu giwanno coye assiro hegere heeshsho afiꞌrate tunceenya hooggara dandiitanno. (Hos. 4:9) Yesuusi hakka waro nooti ammaꞌnote massagaano manna soꞌrisiissanota afino. Isi insara albaanni togo yiinonsa: “Kiꞌne lawisiisaano, Seeru rosiisaanonna Farisootu, kiꞌnera aanneꞌe! Mitto mancho kiꞌne ammaꞌno widira qoꞌlate baarunna baattote aana doyitinanni. Qoꞌlitinihu gedensaanni, kiꞌnenni roore erote erotera gaannaamete [hegere bao] giirara qixxaawinoha assitinanni.” (Mat. 23:15) Yesuusi kaphu ammaꞌno massagaano, ‘manna shiinohu’ anninsa Daawuloosi gedeere ikkitinota coyiꞌrino.—Yoh. 8:44. w18.10 7 guf. 5-6

Yesuusi hatto yaasi mayyaate? Isi lede togo yiino: “Gordu gashshootira lowo waaga afidhinanni daafira tashshi yooꞌne; hagiidhe. Kiꞌnera albiidi himanaanono hatto xiiwamanna qarra iillishshinonsa.” (Mat. 5:11, 12) Soqqamaasine ganninsanna sabbaka agurtanno gede hajanjinsa yannara, “tashshi yaannansa songote albinni fulte” hadhino. Insa hagiidhitinohu gannoonninsa daafira diꞌꞌikkino. Hatteentenni insa hagiidhitinohu “Yesuusi suꞌmira yite shollinye adha hasiissannonsata egentino” daafiraati. (Soq. 5:41) Yannankerano Yihowa manni Yesuusi suꞌmira yiteenna qarru iillannonsa woyite woy buutote fonqoli tuncu yaannonsa yannara hagiirrunni cincitanno. (Yai. 1:2-4) Yesuusi soqqamaasinente gede ninkeno qarru iillannonketa dibanxeemmo. Ikkollana, qarru yannara Yihowara ammanammeemmoha ikkiro, waajjinummokki cincineemmo gede kaaꞌlannonke. Hagiirraamo Magano Yihowa tashshi assineemmoha ikkiro dartu iillinkerono, maatenke gibbunkerono hagiirraamma ikka dandiineemmo.—1 Xim. 1:11. w18.09 21 guf. 18-20

Tini heeꞌnoommoti ‘qarrissanno yanna’ “qarru woꞌminota” ikkitino daafira, batinyu mannira addi addihu dadillisanno coyi iillannonsa. Batinyu manni lowo qarri iillannonsa daafira, hexxo mudhanno. (2 Xim. 3:1-5) Diru kiiro 800,000 saꞌꞌanno manni insaneeto shaanno yine hendanni; hatto yaa qole 40 sokondi giddo mittu manchi isonooto shaanno yaate. Mitu Kiristaani nafa, yaaddotenni kainohunni hexxo mudhe insaneeto shaate geeshsha iillino; tini dadillissannote. Yannankera batinyu roduuwira yaachishanno coyi iillannonsa daafira, baxillunni dhaawannonsahu hasiisannonsa. Mitu roduuwira dartenna mishsho iillitannonsa. Woloota qole loosu basera suꞌmansa hunnanni. Insa lowo saate loossannohura woy loosu batiꞌrannonsahura yaaddannoha ikkara dandaanno. Wolootaho maatensa giddo qarru kalaqamara dandaanno. Lawishshaho, Yihowa Farciꞌraasincho ikkitinokki galtensa mishshanni qarrissannonsaha ikkara dandaanno. Konninna wolu fonqolo ikkanno coyinni kainohunni songote giddo noohu batinyu roduuwi dhuka hooginoha lawannonsa. w18.09 13 guf. 3, 5

Kiristaana ikkino anninna ama oosonsa ayyaanaamittete mixo fushshidhanno gede kaaꞌlannoha ikkiro, Yihowa ledo loosanni no. Batinyu anninna ama hatto assino; konnira yannate gedensaanni oosonsa woꞌma yanna soqqansho hanaffe xeertowa hadhe soqqamate insaneeto shiqishshino. Insa giddo mitu misiyoone, wolootu qolte suwisaano ikkite sabbakkannori roore hasiissannowa hadhe, mitootu qole Beeteelete soqqantanno. Oosonsa qaetenni xeertidhe soqqantanno daafira, annuwunna amuuwu hasidhu gede xaada hooggara dandiitanno. Ikkirono, Maganu Mangiste balaxisiisanno anninna ama oosonsa soqqanshonsanni kaajjitanno gede jawaachishanno. Mayira? Korkaatuno oosonsa Maganu Mangiste balaxisiissanni noota afansa tashshi assitannonsa. Mitu annuwinna amuuwira Haanna gede ikke macciishshamansara dandaanno; Haanna qaaqqose Saamueeli Yihowara ‘uyitinota’ coyidhino. Annuwunna amuuwu konni garinni Yihowa ledo loosate qoosso afiꞌransa ayirrinyeho. Insa kawiinni saino hagiirri nookkita afino.—1 Sam. 1:28. w18.08 24 guf. 4

Yesuusi dureessu Maganu Mangiste ea didandaanno diyiino. Isi qole “Maganu Gashshooti kiꞌneha ikkino daafira, kiꞌne buxane baꞌraadhinoonnireeti” yiino. (Luq. 6:20) Togo yaa buxane baala Yesuusi roso harunsitino woy baxxino atoote afidhino yaa diꞌꞌikkino. Batinye buxane Yesuusi roso diharunsitino. Konni daafira, mittu manchira Yihowa ledo noosi jaaloomi maalaamittete jirosi aana xintaminoho yaa didandiinanni. Yihowa baxannonna isira woꞌmu wodaninsanni soqqamannori buxanenna dureeyye roduuwi noonke. Qullaawu Maxaafi dureeyye, ‘Hawaqiꞌnannikki coye hexxa agurte Magano hexxitanno’ gede amaalanno. (1 Xim. 6:17-19) Maganu Qaali Isi soqqamaano dureeyyeno ikkito buxane woxu baxillinni umonsa agadhitanno gede qorowisiisanno. (1 Xim. 6:9, 10) Ee, roduuwanke Yihowa laꞌꞌanno garinni laꞌneemmoha ikkiro, noonsaha maalaamittete coye calla laꞌne yoo diyineemmo. w18.08 10-11 guf. 11-12

Yihowa mannasi asse ayirrisinonke daafira iso galata hasiꞌneemmoti egennantinote. Uminke fajjonni heeshshonke isira sayinse uyine jajjasi ikkinoommota ammananke hayyote. Bunshe effiꞌne gimbeemmo. Qoleno ammanate roduuwinke Yihowa jajja ikkitinota anfoommo daafira, banxeemmonsa, hattono ayirrinseemmonsa. (Rom. 12:10) Qullaawu Maxaafi ‘Yihowa mannasi diaguranno’ yaanno. (Far. 94:14) Tini Yihowa woꞌmante yannara ledonke ikkannota leellishshanno. Reyinummoro nafa isi dihawannonke. (Rom. 8:38, 39) ‘Heeꞌnummorono reyinummorono Mootichunnireeti.’ (Rom. 14:8) Yihowa ammanantino jaallasi baala reyotenni kayisanno barra quqquxamme agadhineemmo. (Mat. 22:32) Xa nafa lowo atoote afiꞌnoommo. Qullaawu Maxaafi yaanno garinni, “Kaaliiqi Maganonsa ikkino manni baꞌraaꞌrinoho; isire assiꞌre doodhinonsa gosa baꞌraadhinote.”—Far. 33:12. w18.07 26 guf. 18-19

Mitootu rosunna loosu annu annu doorsha ikkino daafira, tiiꞌꞌinsa hoola hooginsa geeshsha hasidhure doodha dandiitannoha lawannonsa. Mittu mittunku manchi umisi doorsha doodha dandaannoha ikkirono, wolaphonkera dannu nootanna doodhineemmo doorshi baalu gawajjankera woy kaaꞌlankera dandaannota dea dihasiissannonke. Hakko daafira, Phaawuloosi techohu barru qummeeshshira coyiꞌrino hedo, wolaphonke horoonsiꞌne uminke doorsha doodhineemmo woyite, ninke injonni roore balaxisiisa hasiissannonke coyi noota hendeemmo gede kaaꞌlitannonke. w18.04 10 guf. 10

Yannankera mittu Kiristaanchi Yihowa magansiꞌreemmo yaanni heeꞌre, gara ikkinokkire assara dandaanno. (Yih. 11) Lawishshaho, maaeela coyenna hafuurre hedannoha, woy wodanisinni ayyaanaamittete roduuwasi giwannoha ikkara dandaanno. (1 Yoh. 2:15-17; 3:15) Togoo hedo cubbunniwa qolte massitara dandiitanno. Mittu Kiristaanchi giddosi togoo hedo heedheenna diinaggaawe soqqamannoha woy gambooshshe ganye haꞌrannoha ikkara dandaanno. Wolu manni giddonketa afa hoogirono, Yihowa kayinni baalankare laꞌꞌanno daafira, woꞌmu wodaninkenni isi wido ikkinoommoronna teꞌee afa dandaanno. (Erm. 17:9, 10) Ikkollana Yihowa rahe hexxo mudhe diagurannonke. Yihowa isiwiinni xeertisannonkere assa hananfummoro “Anewa higge” yaannonke. Yihowa laanfenke qeelate sharrammeemmo woyite busha ikkinore gimbammora hasiꞌranno. (Isa. 55:7) Hatto assinummoro isino cubbonke ‘qeelate’ kaaꞌlitannota ayyaanaamittetenna giddoyidi jawaante oye ledonke ikkanno.—Kal. 4:7. w18.07 18 guf. 5-6