Onkoleessa

Muli diri kawa, duucha gobbara heeꞌranno manni gobbansanni darame wole gobba haꞌranno. Insa afiinni keere haaꞌnanni gara rosate mayira diwoꞌnaalatto? Qoleno hasattonsa lexxitanno gede assannore coyiꞌnanni garano rosa dandaatto. Insa afiinni jw.org webisayitenke nooha ikkiro viidiyubbanna borro afidhanno gara leellisha dandaatto. Yihowa soqqanshonkenni dancha guma afiꞌneemmo gede Kiristaanu Heeshshonna Soqqansho Gambooshshe qixxeessinonke. Konni gambooshshinni afiꞌneemmo qajeelshi waajjinummokkinni manna galagalle marre hasaawinseemmo gedenna Qullaawa Maxaafa xiinxallinseemmo gede kaaꞌlinonke. Annuwanna amuuwa, oosoꞌne dawaro uminsa yaattonni qoltanno gede rosiisse, hatto assitiniro insano xawaabba xawissanno gede kaaꞌla dandiitinanni. Mitu manni qaaqquullu danchu garinni dawaro qoltanna macciishshe halaalunniwa dayino.—1 Qor. 14:25. w18.06 22-23 guf. 7-9

Ninke baalunku bashsho ‘wosina’ ikkine Maganunniwa shiqqi yinummokkinni heeꞌnoommota qaaga hasiissannonke. (Efe. 2:12) Ikkollana Yihowa “lowo baxillinni” isiwa gamba yineemmo gede assinonke. (Hos. 11:4; Yoh. 6:44) Yesuusino isiwa shinqeemmo gede kaaꞌlinonke. Isi Maganu maate miilla ikkineemmo gede doogo faninonke. Yesuusi guuntete xeꞌne noonkeha ikkirono Yihowawa shiqqi yineemmo gede kaaꞌlinonke daafira, ninke mitto manchono giwa dihasiissannonke! Tenne busha alame goofimarchi shiqanni noo daafira, bashshonni roore mannu mittimma nookkihanna mimmito mulla kae giwannoha ikkannoti egennantinote. (Gal. 5:19-21; 2 Xim. 3:13) Ninke Yihowa soqqamaasine kayinni, iimi hayyo noonketa leellinsheemmo; tini hayyo mallaandeemmokki gedenna keerinke lexxanno gede assitano. (Yai. 3:17, 18) Wole gobba manni ledo jaalooma kalaqiꞌra, hattono budensanna coyidhanno qaale rosa hagiirsiissannonke. Togo assinummoro, keerinke lagu gede, keeraanchimmanke baaru dambali gede ikkitanno.—Isa. 48:17, 18. w18.06 12 guf. 18-19

Mittu roomu olamaanchi koatte woy caamma wodha hoogiro olaho qixxaawino yaa didandiinanni. Gogunni seekkinoonnihu kuni faꞌnanchu caammi kaajjadoho. Konne caamma injiinohanna kaajjado ikkanno gede assine seekkinoonni. Roomu olanto konne caamma wodhitannohu ola olamateeti; Kiristaanu kayinni lawishshu caamma wodhannohu keeru sokka duduwateeti. (Isa. 52:7; Rom. 10:15) Ikkirono faro afiꞌneemmo woyite farciꞌrate worbuulle ikka hasiissannonke. Boo yinannihu 20 diro ikkannosi rodii togo yiino: “Alba ledoꞌya rossanno oosora farciꞌra waajjeemmo. Waajjeemmohu saaleemmo daafiraati. Hakka warita qaageemmo woyite kayinni, hatte yannara waajjeemmohu mayiraatiro dileellannoe. Xa darawoꞌyara farciꞌra hagiirsiissannoe.”Batinyu wedelli balaxe qixxaawansa waajjikkinni dancha duduwo duduwate kaaꞌlitinonsata coyiꞌrino. w18.05 29 guf. 9-11

Yesuusi soqqamaasinesira “keereꞌya eemmoꞌne” yiinonsa. (Yoh. 14:27) Tini elto yaano Yesuusi keeri guma laalate kaaꞌlannonkehu hiittoonniiti? Kaajjine sabbankeemmoha ikkiro, Yihowanna Yesuusa hagiirsiinsanni heeꞌnoommota anfoommo daafira giddiidi keere afiꞌneemmo. (Far. 149:4; Rom. 5:3, 4; Qol. 3:15) Yesuusi, soqqamaasinesi hagiirri “woꞌma ikkanno gede” halchannota coyiꞌri gedensaanni, meessi horo agurre baxille leellisha hasiissannohu mayiraatiro xawisino. (Yoh. 15:11-13) Hakkiinni isi “jaallaꞌya yoommoꞌne” yiinonsa. Yesuusi jaala ikka kaajja eltooti! Soqqamaasinesi isi jaalla ikke heeꞌrate maa assa hasiissannonsa? Insa ‘hadhe batinye guma laala’ hasiissannonsa. (Yoh. 15:14-16) Yesuusi mitu lamu diri albaanni soqqamaasinesi togo yee hajajinonsa: “Hadhine, ‘Gordu Gashshooti gamba yiino’ yitine kulle.” (Mat. 10:7) Hakko daafira isi reyara albaanni noo hashsha, hanaffino loosinni kaajja hasiissannonsata kulinonsa.—Mat. 24:13; Maq. 3:14. w18.05 20-21 guf. 15-16

Wedella, Yihowa hagiirsiissanno heeshsho heeꞌratenna ayyaanaamittete mixo fushshiꞌrate aana illachishshe. Darawoꞌne boohaarshunna godoꞌlete aana illachishsharanna kiꞌneno ledonsa yanna sayissinanni gede koyissaꞌnera dandiitanno. Mixoꞌne wonshiꞌrate mageeshshi geeshsha murcidhinoonniro leellisha hasiissannoꞌne. Darawoꞌne hedoꞌne billaallitanno gede assitaꞌnera wodhitinoonte. Darawoꞌne gara ikkinokkire assitinanni gede xixxiibbannoꞌne woyite tenne qeela dandiitinanniti duucha doogga no. Fonqolu giddo uwatto gede assannoheriwiinni xooqi. (Law. 22:3) Wolootu faale hadhe gara ikkinokkire assittoro iillannohe qarra hedi. Qoleno wolootu amaale macciishsha hasiissannoheta ammani. Umokki heeshshi assakki, annikkinna amakkino ikko songote giddo noohu gikki yiino roduuwi aannohe amaale adhatto gede kaaꞌlitannohe. (1 Phe. 5:5, 6) Umokki heeshshi assite amaale adhatto? w18.04 28-29 guf. 14-16

Yesuusi Shiimiidi Iisiyira heedhannote mite songuwara soyino sokka aana, harunsaanosi assitinorira galatinonsa. Lawishshaho, Tiyaxirooni songora soyino sokka hanafinohu togo yeeti: “Loosokkinna baxillekki, ammaꞌnakkinna soqqanshokki, cincakkinna albinni roore loosootto looso afoommo.” (Aju. 2:19) Yesuusi kuri Kiristaani albinni roore looso loossinota calla kule diagurino; hatteentenni dancha looso loossanno gede kakkayissinonsa akatta qummi asse galatinonsa. Yesuusi Tiyaxirooni songora heeꞌrannoha mito Kiristaana amaalinoha ikkirono, sokkasi hanafinohuno ikko jeefisinohu jawaachishanno qaalinniiti. (Aju. 2:27, 28) Yesuusi baalante songora umo ikkino daafira, mageeshshi silxaane noosiro heda dandaatto. Konni daafira, isira yine assinoommo coyira ninke galatate giddeeti dinosi. Ikkirono, naandannita xawisa hasiissannota ikkitinota leellishino. Yesuusi songote cimeeyyera dancha lawishsha ikkino! w19.02 16 guf. 10

Umi xibbi diro heeꞌrinohu aliidi bisi songote giddo albisa ikkite soqqantannoreno ikko woꞌma songo jawaachishino. Insa haaru Kiristaanira qullaawu ayyaani dirrannonsa gede huuccitara aliidi bisi miilla ikkitinore Pheexiroosinna Yohaannisi sokkino. (Soq. 8:5, 14-17) Filiphoosino ikko haarote Kiristaana ikkino manni aliidi bisi konni garinni kaaꞌlinonsa daafira lowo geeshsha jawaattinoti dihuluullissannote! Yannankera noohu aliidi bisino Beeteelete maate miilla, qanchoho soqqantannore baxxitinota woꞌma yanna soqqamaanonna alamete doyichora nooha addu Kiristaana baala jawaachishanno. Umi xibbi diri Kiristaani gede yannankera noo Kiristaanino afiꞌranno jawaantenni hagiidhanno! Qoleno 2015nni Aliidi Bisi Yihowawa Higi yitanno biroshere qixxeessino; tini biroshere halaalu mininni fultinore baasa jawaachishshino. w18.04 19 guf. 18-20

Mannu dannu nookki wolapho afiꞌra danchate yee hedanno; kayinni dannu nookki wolapho lame widoonni qara afidhino bise gedeeti. Wolaphote dannu hoogoommero alame hiitto ikkitannoro hedde egennootto? Ze Worlidi Buuki Insayikiloopiidiya yinanni maxaafi togo yaanno: “Baalanti dirijjitta mannu wolapho agaratenna tenne wolaphora danna worate raqaxaawino biddishsha fushshitanno.” “Raqaxaawino biddishsha” yaa garankolla. Yannankera mannu seera amaddinota lowo maxaaffa borreessinoonni, hattono fulino seera mannaho xawissannorinna mannu harunsanno gede assitannori batinyu higgete egennaamminna daanyootu no. Yesuusi coyiꞌrino garinni addu wolapho afiꞌrate lame coye assa hasiissanno: Umihu, isi rosiisino halaale ammanate, layinkihu qole rosaanchosi ikkate. Hatto assinummoro addu wolapho afiꞌneemmo. Kayinni wolaphineemmohu mayinniiti? Yesuusi lede togo yiino: “Cubbo loosannohu baalu cubbu borojjichooti . . . Beettu borojjimmatenni fushshiꞌnero, addintanni borojjimmatenni fultinanni.”—Yoh. 8:34, 36. w18.04 6-7 guf. 13-14

Ninke daafira hedannonna mararannonke manni mereero heeꞌranke hagiirsiissannonke. Insa ninke qarra uminsahu gede assite laꞌanno woy hedonke huwatate sharrantanno. Kuni manni mayi hasiisannonkero huwate kaaꞌlannonke; isinni mito woyite insa kaaꞌlitannonkehu kuꞌlinummokki nafa ikkara dandaanno. Ninke ‘qarra uminsahu gede asse laꞌꞌanno’ manna lowo geeshsha galanteemmonsa. Kiristaana ikkinoommo daafira, manna marara woy wolootu qarra ninkehu gede assine laꞌꞌa hasiꞌneemmo. Ikkollana, hatto assa shota diꞌꞌikkitino. Mayira? Umihunni, ninke guuntete xeꞌne noonkereeti. (Rom. 3:23) Konni daafira, uminke daafira calla heda rakkannonke; tenne hedo qeelate sharrama hasiissannonke. Qoleno lossinoonninke gari woy konni albaanni heeshshonke giddo iillinonkeri manna marara qarra ikkitannonke gede assara dandaanno. Hattono alamete aana umonsa calla baxanno manni woꞌmino daafira, manna marara qarra ikkitankera dandiitanno. Tenne goofimarchu yannara batinyu manni woloota dimararanno. Hatteentenni insa ‘umonsa baxanno.’ (2 Xim. 3:1, 2) Ikkirono, Yihowanna Yesuusi lawishsha harunsineemmoha ikkiro, albinni roore manna mararreemmore ikka dandiineemmo. w19.03 14 guf. 1-3

Tonne hajajo giddo jeefonniti yora woy wolu manchi coye halcha hooltannote. (Mar. 5:21; Rom. 7:7) Yihowa konne seera uyinohu mitto hasiisanno roso rosiisateeti; kunino mannu wodanansa yaano hasattonsa, yortonsanna hedonsa agadha hasiissannonsata huwatanno gedeeti. Isi bushu assooti burqannohu busha hedonninna yortonni ikkinota afino. Lawishshaho Moote Daawiti tenne woshshaadonni amadamino. Isi dancha manchooti. Mitte yannara kayinni wolu manchi galte lae yorino. Tini yorto qolte cubbo loosanno gede assitinosi. (Yai. 1:14, 15) Daawiti foorino, hattono manchote minaanna dogate woꞌnaalino; hakkiinni minaannase shiishiishino. (2 Sam. 11:2-4; 12:7-11) Yihowa aaniido calla ikkikkinni giddonkeno laꞌꞌanno. Isi wodananke yaano giddiidi ayimmanke laꞌꞌanno. (1 Sam. 16:7) Isiwiinni goꞌlitino hedo, yorto woy assooti dino. Yihowa giddonke nooha dancha coye laꞌꞌanno; hattono konne dancha coye lossiꞌra dandiineemmo gede kaaꞌlannonke. Ikkollana giddonke nooti busha hedo lophite bushu assootiwa qolte massitankera albaanni afiꞌne qorophinammora hasiꞌranno.—2 Dud. 16:9; Mat. 5:27-30. w19.02 21 guf. 9; 22 guf. 11

Qullaawu Maxaafi Muse “baattote aana noo manni baalunkunni roore jooga” ikkinota kulanno. (Kir. 12:3) Hatto yaa isi dhukiweeloho woy shashaho yaa ikkitinoni? Mitu manni joogu manni hattooho yee coyiꞌranno. Ikkollana togoo hedo halaale diꞌꞌikkitino. Muse jawaatahonna worba Maganu soqqamaasinchooti. Isi Yihowa kaaꞌlonni wolqaataamo Gibitsete gashshaancho shiqe coyishiishino, 3,000,000 meddi yaanno manna halalli gobbara massagino, hattono Israeelete daga diinnansa qeeltanno gede kaaꞌlinonsa. Ninkera Musera iillinohu gedee fonqoli iilla hooginkerono, barru baala jooguulle ikka qarra ikkitannonke gede assannori iillannonke. Ikkirono konne akata lossiꞌneemmo gede kakkayisannonkeri no. Yihowa, “Shaqqaddu [jooguullu] kayinni baatto ragidhanno” yee qaale eino. (Far. 37:11) Ati jooga ikkoottoha lawannohe? Wolootu ate joogaho yitanno? w19.02 8 guf. 1-2

Kalaqami yannanni hanafe Mannaho tiiu noonsa. Addaaminna Heewani Yihowa higge diiggu yannara maaxantino. Tini tiiꞌꞌinsa uurra ofolla hoꞌlinonsata leellishshanno. Tiiansa qajeelsiꞌrinokki manni garunni loossannokki kompaase noose markaawe gedeeti. Loossannokki kompaase noose markaawenni haꞌra qarra kalaqqara dandiitanno. Bubbenna dambalu markaawe wole raga higge hadhanno gede assara dandaanno. Dancha gede loossanno kompaase kayinni markaawe oofanno manchi haꞌra hasiissannosi raga hige haꞌranno gede kaaꞌlitannosi. Tiiꞌꞌinkeno kompaasete gedeeti. Tiiu garanna gara ikkinokki coye badatenna gara ikkino raga hinge haꞌneemmo gede kaaꞌlitannonke dandooti. Ikkollana, tiiꞌꞌinke danchu garinni massagannonke gede qajeelsiꞌra hasiissannonke. Mittu manchi tiiasi danchu garinni qajeelsiꞌra hoogiro, gara ikkinokkire assanno woyite tiiꞌꞌisi diqorowisiisannosi. (1 Xim. 4:1, 2) Togoo tiiꞌꞌi “busha danchaho” yine hendeemmo gede assankera dandaanno. w18.06 16 guf. 1-3

Goꞌlino garinni daggannota alamete hedo wodanchanna togoo hedowiinni xeertiꞌra hasiissannonke. Lawishshaho mite odoo, mite poletiku gaamo dancha ikkitinohu gede assite shiqishshara dandiitanno. Mite odoo qolte alamete mixonna hasatto harunsinanni gede jawaachishshannota ikkitara dandiitanno. Mite filmenna maxaaffa, meessiꞌranna maatete roorsiꞌra hasiissannotanna gara ikkitinohu gede assite xawissanno. Ikkollana togoo hedo Qullaawu Maxaafi ledo sumuu diyitanno. Qullaawu Maxaafi, ninkeno ikko maatenke hagiirru noota ikkitannohu baalunkunni roorsine Yihowa banxeemmoha ikkiro ikkinota kulanno. (Mat. 22:36-39) Hatto yaa kayinni dancha boohaarsha boohaara dihasiissannonke yaa diꞌꞌikkino. Ikkollana ninkeneeto togo yine xaꞌma hasiissannonke: ‘Alamete hedo goꞌlino garinni rosiinsanni woyite wodancheemmo? Anino ikko qaaqquulliꞌya mite televizhiinete pirogiraame woy borro qorophineemmo? Oosoꞌya laꞌannohu alamete coyi hunannonsakki gede, hattono Yihowa hedo heedhannonsa gede kaaꞌlanni noommonsa?’ w18.11 22 guf. 18-19

Yihowa ninke daafira hedenna baxannonketa leellishe ledonke noota buuxisanno. Hanni isi baxannonketa leellishino gara hedi. Yihowa “Kiꞌne [baxeemmoꞌne]” yiino. (Isa. 43:4) Kalqete alame aana, Yihowa soqqamaasinesira baxillesi leellishannokki gede hoolasira dandaannori dino; isi ninkera bagamannokki baxille leellishannonke. (Isa. 54:10) Yihowa qarru iillannoꞌneta hooleemmo yee qaale dieinonke; ikkirono isi “wayi” gede ikkino qarri adhe haꞌrankera woy “buwanu” gede ikkino fonqoli gawajjankera wore dilaꞌꞌanno. Isi konni qarri ‘giddoonni hinge saꞌneemmo woyite’ ledonke ikkaranna kaaꞌlankera qaale eino. Ikkina Yihowa kaaꞌlannonkehu hiittoonniiti? Isi quwa saꞌne waajjineemmokki gede kaaꞌlannonke daafira, heeshshonke hoongeemmo gede assannori nafa tuncu yiinkero isira ammanamme heeꞌra dandiineemmo. (Isa. 41:13; 43:2) Maganu “ani ledoꞌne noommo” yee eino qaale addaxxinummoro, qarru iillannonke woyite waajjinummokkinni qeelle saꞌneemmo. w19.01 3 guf. 4-6

Ati wedellichahoro rosiisaano, rosu mini amaalaano, woy wolu manni kaffi yiino roso rosatto gedenna lowo woxe baantanni looso amadatto gede jawaachishshahera dandiitanno. Yihowa kayinni kawiinni baxxinore assattora amaalannohe. Isi jawaattine rossine looso afidhine umoꞌne dandiitinara hasiꞌrannoti egennantinote. (Qol. 3:23) Ikkollana heeshshoꞌne giddo balaxisiissinanni coyibba doodhitinanni woyite, isi fushshino biddishsha harunsitinara hasiꞌranno; kuni biddishshi tenne goofimarchu yannara iso hagiirsiisanno garinni heedhinanni gede kaaꞌlannoꞌne. (Mat. 24:14) Yihowa alame albillitte ma ikkitannoronna baose gambissinota afino. (Isa. 46:10; Mat. 24:3, 36) Qoleno isi ninke daafira seekke afino; hattono addu hagiirrenna harshammo aannonkerinna dadillenna yaaddo abbannonkeri maatiro afino. Konnira mannu aannonke amaale gara labbunkero nafa, Maganu Qaali aana xintantinota ikka hooggu geeshsha hatti amaale hayyonnite yaa didandiinanni. w18.12 19 guf. 1-2

“Shaqqaddu kayinni baatto ragidhanno; atootenna keere afidhe hagiidhitanno.” Daawiti lede togo yee masaalino: “Keeraano baatto ragidhanno; ise aanano hegerera heedhanno.” (Far. 37:11, 29; 2 Sam. 23:2) Maganu fajjo assa hasiꞌranno mannira kuni qaali mayi hexxo amadino? Maganu soqqamaano, barrunni mitto barra uullate aana keeraano calla heedhannotinna uullate aana Gannatete gedeeti kaashshu base heedhannota hexxa dandiitanno. Batinyu Israeelete manni Yihowa magansiꞌnanni heeꞌnoommo yaanni heeꞌre, Isiranna halaalu magansiꞌrara badhe wodhino. Konnira Maganu dagasi Baabiloonete manni qeelannonna gobbansa horranno gede hattono insa giddonni batinye qafadanno gede fajjino. (2 Dud. 36:15-21; Erm. 4:22-27) Ikkollana Maganu masaalaano dagasi 70 diri gedensaanni gobbansa higgannota coyidhino. Tini masaalo woꞌmitino. Ikkollana tini masaalo albillitte uulla gannate ikkitanno daafira ninkerano lowo tiro afidhino. w18.12 4 guf. 9-10

Alame uyitanno amaale giddo roore Qullaawu Maxaafi ledo sumuu diyitanno. Ikkina alame uyitanno amaale Qullaawu Maxaafi amaalenni roortannoni? Yesuusi “Egennote [woy, hayyote] halaalaanchimma gumisenni leeltanno” yiino. (Mat. 11:19) Alame tekinoolojetenni baasa lophitinoha ikkirono, hagiirrenke huntanno coyibba lawishshaho ola, mitto sircho bade giwanna jaddo huna didandiitino. Qoleno alamete aana batinyu manni foorre qarra afiꞌrinokkiri gede asse laꞌꞌanno. Batinyu manni togoo assooti, maate billaallitanno gede assannotanna dhibbanna wole shetto abbannota huwatino. Maganu hedo harunsanno Kiristaanira kayinni, hagiirru noo maate, fayyimmanna alamete doyichora noo roduuwinsa ledo dancha aante noonsa. (Isa. 2:4; Soq. 10:34, 35; 1 Qor. 6:9-11) Tini Yihowa hedo alamete hedonni roortannota dileellishshanno? w18.11 20 guf. 8-10

Maatenke miilla ayirrinseemmohanna shaqqille leellinsheemmonsaha ikkirono, insa hagiirsiisate yine Yihowa seera diingeemmokki gede qoropha hasiissannonke. Muli jaalooma kalaqiꞌra hasiissannonkehu Yihowa baxanno manni ledo callaati. Halaalunni qaaffannori baalu qullaawoota ikka hasiissannonsa. (Isa. 35:8; 1 Phe. 1:14-16) Halaalu minira dangummo woyite, Qullaawu Maxaafiha xalala seera harunsate yine heeshshonke giddo mito coye biddi assiꞌnoommo. Ninke giddo mitootu isinni lowo coye biddi assiꞌra hasiissinonsa. Ikkihano ikkiro, qullaawa heeshsho heeꞌra agurre, maaeela heeshshowa hingeemmokki gede qoropha hasiissannonke. Togoori iillannonkekki gede qoropha dandiineemmohu hiittoonniiti? Yihowa qullaawa heeshsho heeꞌneemmo gede maa uyinonkero hedi. Isi muxxe Beettosi Yesuusa kakkalo asse uyinonke. (1 Phe. 1:18, 19) Yihowa albaanni qullaawoota ikkine heeꞌrate, Yesuusiti wodote kakkalo mageeshshi geeshsha muxxe ikkitinoro woꞌmante yannara heda hasiissannonke. w18.11 11 guf. 10-11

Batinye woꞌma yanna soqqamaano, heeshshonsa gari soorramirono, soqqanshote aana illachishansa hagiirrinsa baꞌꞌannokki gede kaaꞌlitinonsata coyidhino. Kuri lawishshuwa leellishshannonte gede, dandiinummore baala assinummoronna Yihowa addaxxinummoro giddiidi keerinke baikkinni heeꞌra dandiineemmo. Isinni yannate gedensaanni, heeshshonke biddi assiꞌranke Yihowa ledo noonke jaaloomi kaajjanno gede assitinota wodanchinamora dandiineemmo. Heeshshokki gari hedeweelcho soorramiro lawishshaho, soqqanshote qoossokki soorranturo, ordu fayyimma hoogittoro woy maatete giddo loosu lexxannohe woyite Yihowa towaatannohetanna kaaꞌlo hasiissannohe yannara kaaꞌlannoheta huluullantooti. (Ibi. 4:16; 1 Phe. 5:6, 7) Hattono konne tunceenya danchurira horoonsiꞌri. Huuccattotenni iimi Annikkiwa shiqi, woꞌmunni woꞌma iso addaxxa rosi. Hatto assittoro atino heeshshokki gari soorramirono giddiidi keerikki baikkinni heeꞌra dandaatto. w18.10 30 guf. 17; 31 guf. 19, 22

Qullaawu Maxaafi giddo Yihowa mannisira hedannota leellishshannoti batinye lawishshuwa no. Lawishshaho, Yihowa wedellichu Saamueeli Kakkalaasinete Biili Eelira yoote sokka kulanno gede shaqqillunni kaaꞌlinosi gara 1 Saamueeli 3:1-18 kultanno. Yihowa Seeri qaaqquullu jajjabba manna hakko iso roorroota ayirrisa hasiissannonsata kulano. (Ful. 22:28; Lew. 19:32) Ikkina qaaqqu Saamueeli soodo gute kae, Maganu Eeliranna maatesira yiinota waajjishshanno yoo waajjikkinni Eelira kula dandaannoha lawannohe? Didandaanno! Isinni Qullaawu Maxaafi Saamueeli “waajjino daafira laino ajuuja Eelira dikulino” yaanno. Ikkollana Maganu, Saamueeli hasaawisinota Eeli huwatanno gede assino. Konnira Eeli, Saamueeli Yihowa kulinosire mittoreno maaxannokki gede xaꞌmisi. Saamueelino Eelira hajajame “mitto coyeno maaxikkinni gudise” kulinosi. Tini sokka hakkonni albaanni kulinosiri ledo mittu garite. (1 Sam. 2:27-36) Eelinna Saamueeli xagge, Yihowa wolootaho hedannohanna hayyicha Magano ikkinota leellishshanno. w18.09 23 guf. 2; 24 guf. 4-5

Kaphu xaa yannara noo dagoomi giddo halaꞌlino. Y. Botakarje yinanni manchi mitte metseetera “Kaphineemmohu Mayiraati?” yaanno birxichira “kaphu mannu ooso akata ikkino” yiino. Wole yaattonni mannu kaphu nooreentilla yee hedanno. Duucha woyite mannu umonsa gargadhate, balbaꞌlate woy qiniite afiꞌrate kaphanno. Aleenni qummi assini birxichi xawisino garinni mitu manni, “shiimurirano loworirano, wosina, ledonsa loossannore, jaallansanna maatensa miilla mittoreno lawinsakkinni kaphanno.” Kuni baalu kaphi mayi guma abbanno? Mannu mimmito ammanannokki gedenna aantensa baꞌanno gede assino. Faarsaasinchu Daawiti Yihowa, “Ati halaalenna sumbe baxatto” yee huucciꞌrino. (Far. 51:6) Daawiti ammanammeemmohu wodaninkenni ikkinota wodanchino. Addu Kiristaani woꞌmante yannara ‘mimmitinsara halaale coyiꞌranno.’—Zak. 8:16. w18.10 7 guf. 4; 8 guf. 9-10; 10 guf. 19

Israeelete daga 1513 K.A. Gibitsetenni fultu yannara, kiironsa sase miliyoone saꞌukki digattino. Insa mereero qaaqqullu, geerru, wole agurina bisu xeꞌne noonsari nafa nooha ikkara dandaanno. Konne batinye manna Gibitsetenni fushshate mannaho hedannohunna shaqqadu Massagaanchi hasiisanno. Yihowa Muse widoonni hattoo Massagaancho ikkinota leellishino. Konninni kainohunni Israeelete daga lophitino qae agurte fultu woyite dimassino. (Far. 78:52, 53) Yihowa dagasi waajjitannokkinna beꞌe yitannokki gede assinohu hiittoonniiti? Umihunni, isi insa Gibitsetenni fushshinonsahu “olaho qixxaawinohu gede” qinaawino garinniiti. (Ful. 13:18) Insa konni qinaawino garinni fulansa massaganni noonsahu Magano ikkinota addaxxitanno gede assitunsakki digattino. Qoleno Yihowa “barra gomichunni, hashsha giirate xawaabbinni massage” mereeronsa noota buuxxanno gede assinonsa. (Far. 78:14) Wole yaattonni Yihowa togo yiinonsa: “Waajjitinoonte. Ani ledoꞌne heeꞌre massageemmoꞌne; hattono agareemmoꞌne.” w18.09 26 guf. 11-12

Hunda mite ammanantinori Maganu soqqamaasine buutote qarri iillinonsa daafira hexxo mudhite reyo halchitino. Lawishshaho Iyyoobira buutote qarri iillinosi daafira isi “heeshshoꞌya mishoommo; heeꞌrammora horontanni dihasiꞌreemmo” yiino. (Iyo. 7:16) Yoonaasino uyinoonnisi loosinni kainohunni hexxo mudhe “Xa Kaaliiqaꞌya, anera heeꞌrantenni reyo woyyitannoena lubboꞌya haaꞌrie” yiino. (Yon. 4:3) Qoleno ammanamino masaalaanchi Eeliyaasi iillinosi qarrinni kainohunni reyo halchino. Isi togo yiino: “Kaaliiqaꞌya! Xaate ikkinoe. Ani akaakkaꞌya dirooroommona lubboꞌya haaꞌri.” (1 Mot. 19:4) Ikkollana Yihowa kuri ammanantino soqqamaanosi baxannonsa; hattono heeshshotenni heedhara hasiꞌranno. Isi insa coyidhinorira dihanqinonsa; hatteentenni heeshshote heeꞌra baxissannonsa gedenna agurtukkinni isira ammanante soqqantanno gede baxillunni dhaawinonsa. w18.09 13 guf. 4

Maganu ledo loossannori wosina adhatenni egennantinoreeti. Giriikete Afiite Qullaawa Borrora, “wosina adha” yitanno yaatto “anfoonnikki mannira danchumma leellisha” yitanno tiro afidhino. (Ibi. 13:2) Maganu Qaali giddo wosina adhine baxille leellinsheemmo gede jawaachishshanno dhagge no. (Kal. 18:1-5) Ammanate roduuwanke ikkiturono ikka hooggurono, afiꞌnummo tunceenya baala horoonsiꞌne woloota kaaꞌla hasiissannonke. (Gal. 6:10) Woꞌma yanna soqqansho soqqantannore wosinsite Maganu ledo loosa dandaatto? (3 Yoh. 5, 8) Hatto assanke “mimmitonke jawaachinsheemmo” faro fantannonke. (Rom. 1:11, 12) Maganu Qaali, songote giddo noohu labballu roduuwi songote soqqamaasinenna cimeeyye ikke soqqamate sharrame Yihowa ledo loosanno gede jawaachishanno. (1 Xim. 3:1, 8, 9; 1 Phe. 5:2, 3) Hatto assitanno roduuwi, ammanate roduuwansa ayyaanaamittetennino ikko maalaamittetenni kaaꞌlitanno. (Soq. 6:1-4) Togooha hasiisannoha songote looso loossanno roduuwi woloota kaaꞌla lowo geeshsha hagiirsiissannonsata coyidhanno. w18.08 24 guf. 6-7; 25 guf. 10

Ximootewoosi jajjabbu roduuwisi aana silxaane noosiha ikkirono, isi insa shaqqillunninna ayirrinyunni towaatino. Mittu jawu rodii afanni heeꞌre cubbo loose Yihowa dadillisannohalla ikki? Yihowa afanni heeꞌre cubbo loosino manchi jawa ikkino daafira calla gatona yaannosi yaa diꞌꞌikkino. Isayaasi 65:20te nooha xintu seera wodanchi; qummeeshshu togo yaanno: “Xibbu dirinni heeꞌre reyannoha anje heeꞌre reyinohu gede assine kiirranni; hakkuyi kawa reyannohu kayinni rumammohu gede kiiramanno.” Hiziqeelino togooha xintu seera kulino. (Hiz. 9:5-7) Konnira, baalunkunni roore ayirrisa hasiissannonkehu biꞌre birqiiqinni kayise nooha Magano Yihowa ikkinota dea dihasiissannonke. (Dan. 7:9, 10, 13, 14) Yihowa ayirrinseemmoha ikkiro, mittu manchi diri jawa woy shiima ikkino daafira amaalatenni badhera dihingeemmo.—Gal. 6:1. w18.08 11 guf. 13-14

Addu Kiristaana ikkinoommo daafira, mitte mashalaqqe halaale ikkitinotanna teꞌee buuxate dandoonke lossiꞌra hasiissannonke. (Law. 3:21-23; 8:4, 5) Togoo dandoo lossiꞌra hoongummoro, Sheexaanunna alamesi hedonke daaffara dandiitanno. (Efe. 5:6; Qol. 2:8) Qoleno kuni konneeti yine afoo wonshine coyiꞌra dandiineemmohu gara ikkitino mashalaqqe heedhunkero callaati. Yannankera odoo woy mashalaqqe afiꞌnanni doogga bushsha koteeti. Interneetete, televizhiinetenna wolu xaadooshshu buusi widoonni kiirre tunqannikki mashalaqqe shiqqanno. Batinyu mannira jaallansanna wolu egennino manni imeeletenna borrote sokka soyannonsa; sokka soyanno manni hatto assannohu odoo iillishate hede ikkara dandaanno. Ikkollana afanni heeꞌre halaale wire gara ikkitinokki odoo tareessanno manni noo daafira, qorophanna macciishshineemmore seekke buuxa hasiissannonke. w18.08 3 guf. 1, 3

Maganu Beetti uullara daanno yanna iillituta, Yihowa Maariyaami yinanniti mitte umose heeshshi assitanno beetto qaaqqu ama ikkitanno gede doorinose. Maariyaami heedhannohu Yerusaalamete qullaawu miniwiinni xeertiꞌre noohu shiimu Naazireetete katamiraati. (Luq. 1:26-33) Yannate gedensaanni fiixise Elsaabeexi ledo hasaabbino hasaawi, Maariyaami Magano baxxannota leellishanno. (Luq. 1:46-55) Ee, Yihowa Maariyaami lainose, hattono ammanantinota ikkasenni tenne kaajja qoosso uyinosi. Yannate gedensaanni Maariyaami Yesuusa iltu woyite, Yihowa Yerusaalamete heeꞌrannohu ayirradu manni tenne afanno gede diassino. Sokkaasine Beetelihemete gobbaanni geꞌreewo allaaꞌlite noo allaalaasinera Yesuusi ilaminota kultinonsa. (Luq. 2:8-14) Hakkiinni kuri allaalaasine ilamino qaaqqo marte laꞌino. (Luq. 2:15-17) Maariyaaminna Yooseefi, Yihowa Yesuusi konni garinni ayirrisanna laꞌe lowo geeshsha hagiidhitinoti dihuluullissannote! w18.07 9-10 guf. 11-12

Yihowa Selemooni hanqinohu mayiraati? Qullaawu Maxaafi togo yaanno: “Israeelete Magani Kaaliiqi lame hige leellinosi. Qoleno wole maganna magansiꞌrannokki gede kulinosi. Selemooni kayinni isi yiino gede diꞌꞌikkino. Roorenka Kaaliiqiwiinni lede fafi.” Konni daafira, Selemooni Maganu eltonna kaaꞌlo hoogino. Hakkunni gedensaanni Selemooni gashshooti bebbeehamino, hattono isinni kainohunni lowo ilama qarrantino. (1 Mot. 11:9-13) Selemooni xagge leellishshanno garinni, Yihowa ledo noonke jaalooma daafara dandaanno coyi giddo mittu Yihowa biddishsha afinokki woy ayirrisannokki manni ledo jaalooꞌmate. Mite songote miillano ayyaanaamittetenni kaajjitinokkire ikkitara dandiitanno. Wolootu qolte Yihowa magansiꞌrannokki fiixanke, ollaanke, ledonke loossannore woy rossannore ikkitara dandiitanno. Ikkihano ikkiro, muli jaallanke Yihowa seera harunsitannokkiha ikkiro, galte hosse Maganu ledo noonke jaalooma huntara dandiitanno. w18.07 19 guf. 9-10

Sheexaanu hedosi halashshate filmenna televizhiine horoonsiꞌranno. Isi mannu xagge macciishsha banxeemmota afino; tini xagge qolte boohaarreemmo gede kaaꞌlitannonkeha calla ikkikkinni hedonkenna assootenke quxxara dandiitanno. Yesuusi mannaho rosiisate tenne hayyo horoonsiꞌrino. Lawishshaho, isi shaqqadu Samaarichirenna qaetenni fule haꞌre raggesi afimalsino beettire kulanno lawishsha coyiꞌrino. (Mat. 13:34; Luq. 10:29-37; 15:11-32) Ikkollana Sheexaanu hedo harunsitannori togoo xagge horoonsidhe hedonke daaffankera dandiitanno. Konnira quwa saꞌꞌa dihasiissannonke. Mite filmenna televizhiinete pirogiraame hedonke daaffukki boohaarreemmo gede woy roso afiꞌneemmo gede kaaꞌlitankera dandiitanno. Ikkollana qoropha hasiissannonke. Boohaarsha doodhineemmo woyite ninkeneeto togo yine xaꞌma hasiissannonke: ‘Tini filme woy televizhiinete pirogiraame maalu yorto harunsa qarra diafidhino yite rosiissannoe?’ (Gal. 5:19-21; Efe. 2:1-3) Mitte pirogiraame Sheexaanu hedo halashshitannota ikkitinota wodanchittoro maa assatto? Taraawanno dhibbiwiinni xeertiꞌrattonte gede togoo coyiwiinnino xeertiꞌri! w19.01 15-16 guf. 6-7

Gullee olamaasinete umo danotenni agartannonte gede, ‘gatote hexxonke’ wodanankenna hedonke agartanno. (1 Tes. 5:8; Law. 3:21) Sheexaanu gulleenke fushshine hoolleemmo gede assate woꞌnaalannohu hiittoonniiti? Hanni Yesuusira assinore hendo. Sheexaanu, Yesuusi mannu ooso gashshate hexxo noosita afinoti egennantinote. Ikkollana, Yesuusi Yihowa murino yanna iillita geeshsha agadha hasiissinosi. Qoleno hakkuyira albaanni qarrame reyaraati. Ikkollana Sheexaanu, Yesuusira mulenni moote ikkanno gede assanno doorsha shiqishinosi. Sheexaanu Yesuusi mitte hige calla guluphe magansiꞌrisiro, hasiꞌrinore baala shiima yanna giddo aannosita kulinosi. (Luq. 4:5-7) Xaa yannarano Sheexaanu Yihowa haaro alamera lowo atoote eemmoꞌne yee qaale einota afino. Ikkollana tini hexxo woꞌmita geeshsha agadha hasiissannonke; hakka geeshsha qole lowo qarri iillankera dandaanno. Sheexaanu tenne afino daafira, xaa yannara qinaabbino heeshsho heeꞌrate sharrammeemmo gede duucha doorsha shiqishannonke. Isi hasiꞌnoommore baala xaanni afiꞌrate sharrammeemmo gede assankera woꞌnaalanno. Qoleno Maganu Mangiste agurre maalaamittete coye balaxisiinseemmo gede assate sharramanno.—Mat. 6:31-33. w18.05 30-31 guf. 15-17

Yihowa wedellichimmaꞌnenni hagiirraamma ikkitinara hasiꞌranno. Ayyaanaamittete mixo illachishshe, hattono mitto doorsha doodhitinanni woyite Yihowa amaale harunse. Anjenni kayissine togo assa hanaffiniro, Yihowa biddishsha aannoꞌneta, agarannoꞌnetanna atootesi aannoꞌneta huwattinanni. Qullaawu Maxaafi giddo noota kaajja amaale seekkitine hedde; hattono ‘anjeꞌne yannanni Kalaqaanchoꞌne qaagge.’ (Ros. 12:1) Kiristaanu songora noo wedella galanteemmonsa. Wedellu ayyaanaamittete mixonsa wonshiꞌrate sharramansanna sabbakate looso balaxisiisansa Yihowa hagiirsiisanno garinni heeꞌrate kaaꞌlitannonsa. Qoleno wedellu tini alame hedonsa billaallitanno gede assitansara wodha dihasiissannonsa. Wedellu daafurinsa mullawa gatannokkita addaxxa dandaanno. Baxillaano ikkitinori ammanate roduuwinsa kaaꞌlitannonsa; qoleno woꞌmunni woꞌma Yihowa addaxxituro baalunkuri qinaannonsa. w18.04 29 guf. 17, 19