Bocaasa

Yihowara soqqammeemmoha ikkiro, Addaaminna Heewani huꞌnitinore baala afiꞌrate hexxo heedhannonke; kuri giddo mitte hegerera heeꞌrate hexxooti. Addaaminna Heewani Yihowara noonsa baxilli lexxanno gede assidhinokki daafira, Isira soqqama hoogate doodhitino. Ikkollana Yihowa insa seeda diro heedhe ooso iltanno gedenna oosonsa hasidhino garinni lossidhanno gede fajjinonsa. Addaaminna Heewani Yihowawiinni fafe heeꞌrate doodhitino doorshi abbino gumi, insa gowwuulle ikkinota leellishanno. Bayiru beettinsa beebbaataamo rodoosi shiino; hattono batinye mannu ooso galte hosse finqilanna umonsa calla baxxannore ikkitino. (Kal. 4:8; 6:11-13) Ikkollana Yihowa Addaaminna Heewani sirchi giddonni isira soqqama hasidhannori gato afidhanno faro qixxeessino. (Yoh. 6:38-40, 57) Yihowa cincino garanna baxillisi daafira roore rossanni haꞌratto woyite, isira noohe baxilli lexxanni haꞌrara dandaanno. Addaaminna Heewani lawishsha harunsa agurte heeshshokki Yihowara sayisse aa hasiꞌrattoti egennantinote. w19.03 2 guf. 3; 4 guf. 9

Wolu manni qarra roore afate, maatekki miillara woy ammanate roduuwikkira iillanni noonsare huwatate woꞌnaali. Songokkira noo wedellira, dhiwantinorira, geerraho, hattono shiidhinorira hedattota leellishi. Insa noo gara xaꞌmi. Giddonsata hasaaphitanno woyite seekkite macciishshi. Illanni noonsa fonqolo huwatoottota affanno gede assi. Hattono dandiitto doogonni kaaꞌlinsa. Hatto assineemmoha ikkiro, addu baxille leellinshanni heeꞌnoommo. (1 Yoh. 3:18) Woloota kaaꞌlineemmo woyite, hayyoota ikka hasiissannonke. Mayira? Korkaatu mannu qarru iillannonsa woyite, hakko qarra laꞌꞌanno gari babbaxxinoho. Mitootu mannaho hasaapha hasidhanno; wolootu kayinni qarransa woleho kuꞌla hasiꞌra hooggara dandiitanno. Insa kaaꞌla hasiꞌneemmoha ikkirono, saalsiissansara dandiitanno xaꞌmo xaꞌma dihasiissannonke. (1 Tes. 4:11) Wolootu giddonsata kuꞌlitanno woyite, coyidhinore baala sumuu yineemmo yaa diꞌꞌikkino. Ikkirono, hatti insa hedo ikkitinota qaaga hasiissannonke. Macciishshate rankoommore, coyiꞌrate muddammeemmokkire ikka hasiissannonke.—Mat. 7:1; Yai. 1:19. w19.03 19 guf. 18-19

Mannu albaanni halaalu daafira farciꞌra waajjishannohe? Hanni Nehimiya lawishsha laꞌno. Isi mittu wolqaataamu moote mine soqqamino. Nehimiya Yerusaalamete huxxinna xullichi diigaminota macciishshino daafira lowo geeshsha dadillino. (Neh. 1:1-4) Moote, ‘Mayira dadillootto?’ yee xaꞌmisi yannara Nehimiyara afale mageeshshi geeshsha beꞌe yitinosiro heda dandaatto! Nehimiya bayichonko huuccatto assiꞌre, mootete dawaro qolino. Hakkiinni moote Maganu manna kaaꞌlate lowore assino. (Neh. 2:1-8) Yoonaasi lawishshano heda dandaatto. Yihowa Yoonaasi Nennewete heeꞌranno mannira yoote sokka duduwanno gede kulisi yannara Yoonaasi lowo geeshsha waajjino daafira wole gobba xooqino. (Yon. 1:1-3) Ikkollana Yihowa kaaꞌlonni Yoonaasi uyinoonnisi looso loosa dandiino. Qoleno isi coyiꞌrinori Nennewete heeꞌranno manna kaaꞌlino. (Yon. 3:5-10) Nehimiya lawishshinni dawaro qollammora albaanni huuccatto assiꞌra kaaꞌlitannonketa ronseemmo. Yoonaasi lawishshinni kayinni, lowo geeshsha waajjineemmoha ikkiro nafa, Yihowa isira soqqammeemmo gede kaaꞌlannonketa ronseemmo. w19.01 11 guf. 12

Qullaawu Maxaafinni ronsoommo garinni heeꞌrate doodhineemmo woyite, fiixinkenna jaallanke ledo noonke aante biddi assiꞌra hasiissannonkeha ikkara dandaanno. Hatto yineemmohu mayiraati? Yesuusi harunsaanosi daafira huucci woyite, “Halaalikkinni qullaawoota assinsa; ate qaali halaaleho” yiino. (Yoh. 17:17) “Qullaawoota assinsa” yaa “baxxitinore assinsa” yaano ikkitara dandiitanno. Ronsoommo halaali ledo sumuu yine heeꞌra hananfeemmo woyite, alametewiinni baxxineemmo; korkaatuno harunsineemmo biddishshi alametewiinni baxxinoho. Akatinke albiwiinni soorramino daafira mannaho ninkera noonsa lao soorrantanno. Heeꞌneemmohu Qullaawu Maxaafi biddishshi garinniiti. Ninke babbadooshshe kalaqa hasiꞌneemmokkiha ikkirono, mite jaallankenna maatenke miilla xeertidhankeranna ammanankenni kainohunni gibbankera dandiitanno. Tini dhagge diꞌꞌikkitannonke. Yesuusi tenne afinohura, “Mannaho umisi mini manni diina ikkanno” yiino. (Mat. 10:36) Hattono Isi halaale afiꞌrate yine mite coyibba agurrummoro hakkiinni roorino baꞌraarsha afiꞌneemmota buuxisino. w18.11 6 guf. 11

Soqqamaasinchu Phaawuloosi ayyaanaamittete roduuwasi naadino; qoleno naadannonsata coyiꞌrannorinni leellishino. Isi callisi huucciꞌranno woyite, insa daafira Magano galatanno. Insara borreessino sokka giddono naadannonsata xawisino. Phaawuloosi Roomu Sokka fooliishsho 16te noote hanafonnite 15 kiiro giddo calla 27 Kiristaani suꞌma qummi assino. Lawishshaho, Aqiilanna Phirisqilla isi “daafira yite reyote nafa qixxaabbinore” ikkitinota xawisino; hattono Febeni isonna wole “lowo manna kaaꞌlitannota” coyiꞌrino. Phaawuloosi kuri baxillaanonna chaachaara roduuwa galatino. (Rom. 16:1-15) Phaawuloosi kuri roduuwisi guuntete xeꞌne noonsare ikkitinota afino; ikkollana insara noonsate dancha akatta aana illachishino. Tenne sokka songote mereero huuro gotti assine nabbambi yannara, roduuwu mageeshshi geeshsha jawaattinoro heda dandaatto! Tini insanna Phaawuloosi mereero noo aante kaajjitanno gede assitinoti egennantinote. Atino songoꞌnera noo roduuwi coyidhannohanna assitannoha dancha coye naadattota leellishate rosichi noohe? w19.02 16 guf. 8-9

Minshe nookkire ikkate guuta ikka hasiissannonke? Soꞌneemmore ikkinoommo daafira, minshe nookkire ikka didandiineemmo yine hendeemmoha ikkara dandaanno. Yihowa soꞌronke aana illachishannokki daafira, waajja dihasiissannonke. Qaalisi togo yaanno: “Cubbonke kiiroottoha ikkoommero, gatara dandaannohu ayeti?” (Far. 130:3) Isi guuntete xeꞌne noonketanna cubbaataamma ikkinoommota afino daafira, shaqqillunni maarannonke. (Far. 86:5) Hattono Yihowa dhukanke afino daafira wolqankera aleenni ikkino coye asse diyaannonke. (Far. 103:12-14) Yihowa soqqamaasine minshe nookkire ikkitanno gede assannonsahu qaru akati baxilleho. Maganoho noonke baxillinna ammanama woꞌmanna guuta ikka hasiissannose. Baxillinke hattooha ikkiro, fonqolu iillannonke woyite nafa minshe nookkire ikkine heeꞌra dandiineemmo. (1 Dud. 28:9; Mat. 22:37) Yihowa biddishshi qullaawa ikkinota anfoommo; hattono iimi Annanke hagiirsiisate aana illachinsheemmo. Iso banxeemmo daafira, mitto coye doodhinammora albaanni woꞌmanka woyite iso hendeemmo. Hatto assine minshe noonkekkire ikkinoommota leellinsheemmo. w19.02 3 guf. 4-5

Gara ikkinore assa afidhino horo huwantanni haꞌneemmo woyite, ammananke kaajjitanno. (Yai. 1:2, 3) Hatto assinummoro, Yihowa ninke oososi gede asse laꞌꞌannonke daafira tashshi yaannonke; hattono iso hagiirsiisate noonke hasatto lexxitanno. (Law. 27:11) Iillannonkehu mittu mittunku fonqoli baxillaanchu Anninkera soqqammeemmohu woꞌmu wodaninni ikkinota leellinsheemmo faro fanannonke. (Far. 119:113) Fonqolu iillannonke yannara, woꞌmu wodaninkenni Yihowa baxate, isira hajajamatenna fajjosi wonshate muriciꞌnoommota leellinsheemmo. (1 Mot. 8:61) Guuntete xeꞌne noonkere ikkinoommo daafira soꞌnammora dandiineemmo. Soꞌro loonseemmo yannara Moote Hiziqiyaasi lawishsha qaango. Isi soꞌro loosinoha ikkirono, maaro eꞌꞌe Yihowara “woꞌmu wodaninni” soqqamino. (Isa. 38:3-6; 2 Dud. 29:1, 2; 32:25, 26) Konnira Sheexaanu hedo daafannonkekki gede qorophino. Owaatu wodani heeꞌrannonke gedenna Yihowara ammanamme heeꞌneemmo gede huuccatto assiꞌno.—1 Mot. 3:9; Far. 139:23, 24. w19.01 18-19 guf. 17-18

Gambooshshunniwa dawaro qola ninke uminkera kaaꞌlitannonke. (Isa. 48:17) Hiittoonni? Umihunni, dawaro qolate mixiꞌnummoro, gambooshsheho seekkine qixxaambeemmo. Seekkine qixxaambummoro qole Maganu Qaale seekkine huwanteemmo. Maganu Qaale seekke huwatanke, albinni roore ronsoommore loosunni leellishate kaaꞌlitannonke. Layinkihunni, ninkeno dawaro qolleemmo daafira, gambooshshu baxisannonke. Sayikkihunni, songote giddo dawaro qola shota ikkitinokki daafira, duucha woyite qolloommo dawaro mulenni dihambeemmo. Ammananke daafira coyiꞌneemmo woyite Yihowano hagiidhanno. Yihowa gambooshshunniwa qolleemmo dawaro macciishshannotanna togo assate sharrammeemmo sharro lowo geeshsha naadannota dihuluullammeemmo. (Mil. 3:16) Iso hagiirsiisate sharrammeemmo sharro maassiꞌre naadannonketa leellishanno. (Mil. 3:10) Addaho, gambooshshunniwa dawaro qolleemmo gede assannonkehu batinyu korkaati noonke. w19.01 8 guf. 3; 9-10 guf. 7-9

Yihowa soqqamaasinesi hayyotenni amadannonsa. Isi kiirre tunqannikki seera aantenni baxillu seerinni heeꞌnammora hasiꞌranno. Qoleno isi fushshinoha xintu seera harunsinammoranna bushare gimbammora hasiꞌranno. Tennera dancha lawishsha ikkannohu Yesuusi Ilaalu Sibikatesi yannara rosiisino rosooti; Ilaalu Sibikate illachishshannohu cubbo loonsanniwa qole massanno coyi aanaati. (Mat. 5:27, 28) Maganu Mangiste Moote ikkinohu Yesuusi Kiristoosi, keeraanchimmatenna finqillete daafira isira noosi gedee lao heedhannonke gede haaro alamerano rosiisannonke. (Ibi. 1:9) Qoleno surrenkenna bisinke guuta ikkanno gede kaaꞌlannonke. Hanni hedi! Haaro alamera cubbunniwa hinge dooꞌneemmo gede assitanno hedonnino ikko cubbu abbannohu bushu qarrinni ganteemmo! Hakkiinni Yihowa qaale einonketa “ayirrinyu wolapho” afiꞌneemmo. (Rom. 8:21) Mannu ooso dannu nookki wolapho afiꞌra didandiitanno. Wolaphonke woꞌmunni woꞌma horoonsiꞌnoommo yaa dandiinannihu Maganu baxillinni massagammeemmoha ikkiro callaati.—1 Yoh. 4:7, 8. w18.12 23 guf. 19-20

Mittu Israeelaawichi galtesira “giwisannosi coye aanase afiro” haꞌrisa dandaanno. Muse Seeri “giwisanno” coye yiniri maatiro dikulanno. Ikkollana kuni shiima soꞌro ikkikkinni saalsiisannoha woy shota ikkinokki coye ikkikki digatino. (Mar. 23:14) Yesuusi warono batinyu Yihudu manni ‘kairira baalaho galtensa fushshe’ haꞌrisanno; tini dadillissannote. (Mat. 19:3) Ninke kayinni insa lawishsha harunsa dihasiꞌneemmo. Masaalaanchu Milkiyaasi Yihowa adhanna adhama ma garinni laꞌꞌannoro xawisino. Hatte yannara mannu ‘qeedhimmatenni heeꞌre adhino galte’ xagare haꞌrisa rosaminoreeti; insa hatto assitannohu Yihowa magansiꞌrannokkiha aja meento adhate yite ikkara dandaanno. Milkiyaasi Maganoho adhanna adhamate daafira noosi lao xawisanni, “Ani ayiddaanninna ayiddaama babbaxxannota giweemmo” yee borreessino. (Mil. 2:14-16) Tini Maganoho adhanna adhamate daafira hanafote noosi lao soorrantinokkita leellishshanno; Yihowa adhanna adhama xinti woyite “Mannu annasinna amasi agure, galtesi ledo mitto ikkanno” yiino. (Kal. 2:24) Yesuusi adhanna adhama Annisi laꞌꞌanno garinni laꞌꞌannota leellishino; isi “Maganu mitto assinore mannu badoonke” yiino.—Mat. 19:6. w18.12 11 guf. 7-8

Mitu roduuwi wolewa hadhe soqqama dandiitanno. Insara masaalaanchu Isayaasira noosi gedee lao noonsa. Yihowa “Aye soqqo? Soqqamannonkehu ayeti?” yee xaꞌmita Isayaasi “Ani haꞌreemmona, ane soqqie” yee qolino. (Isa. 6:8) Atino Yihowa looso loosate hasatto noohe? Nootto gari hatto assate fajjannohe? Yesuusi sabbakatenna rosaano assate loosi daafira coyiꞌranni togo yiino: “Gide gamba assate, lowo loosaasine soyanno gede loosu Mooticha huuccidhe!” (Mat. 9:38) Suwisaancho ikkite sabbakkannori roore hasiissannowa soqqama dandaatto? Woy wolootu hatto assitanno gede kaaꞌla dandaatto? Batinyu roduuwi Maganohonna mannaho noonsa baxille leellisha dandiitannoti qara doogo midote looso loossannori roore hasiissannowa hadhe suwisaano ikke soqqama ikkinota huwattino. Atino albinni roore soqqama dandaattoti wole doogo no? Hatto assittoro lowo hagiirre afiꞌratto. w18.08 27 guf. 14-15

Wongeeluwate xagge, Yihowa maalaamittete coye ma garinni laꞌꞌannoro xawissanno. Yooseefinna Maariyaami dureeyye ikka hoogirono, Yihowa insara Beettosi lossate qoosso uyinonsa. (Lew. 12:8; Luq. 2:24) Yesuusi ilami yannara Maariyaami iso “Wosinu galanno dargi nookki daafira, hoccunni xaaxxe hoowete saadate hayisso worranni badiri aana” goxissino. (Luq. 2:7) Yihowa hasiꞌroommero, Beettisi dancha basera ilamanno gede assa dandaanno. Ikkollana Yihowa, Yesuusa ayyaanaamittete coye balaxisiissanno maate lossitara hasiꞌrino. Yihowa albaanni lowo waaga afidhinoti tenneeti. Tenne xaggenni, Yihowa maalaamittete coye ma garinni laꞌꞌannoro huwata dandiineemmo. Mitu annuwinna amuuwi oosonsa dureeyye ikkitara hasidhanno; tini qolte mitootaho Yihowa ledo noonsa jaaloomi baꞌꞌanno gede assitino. Yihowa qole baalunkurinni roorse laꞌꞌannohu Isi ledo noonke jaaloomaati. Ati tenne hajo lainohunni Yihowa hedanno garinni hedatto? Heeꞌratto heeshsho tenne leellishshanno? w18.11 24 guf. 7-8

Maganu hagiirru Buicho ikkino daafira, ninkeno hagiirraamma ikkinammora hasiꞌranno; qoleno hagiirraamma ikkineemo gede assannoha lowo coye uyinonke. (Mar. 12:7; Ros. 3:12, 13) Ikkollana heeꞌnoommo alamera hagiirraamo ikka qarrissara dandiitanno. Mayira? Shiiꞌneemmo woyite, banxeemmo manchi bohamanno yannara, adhamanke diigantannonna looso hoongeemmo woyite, woy wolu yaachishanno coyi tuncu yaannonke yannara hagiirrinke baꞌꞌara dandaanno. Mini giddo keeru hooganno woyiteno hagiirraamma ikka qarrissankera dandiitanno. Ledonke rossannori woy loossannori mishshannonkeha, dartu iillinonkeha, woy Yihowa magansiꞌneemmo daafira usurroonninkeha ikkiro, hagiirrinke baꞌꞌara dandaanno. Fayyimmate qarri, darga assiꞌrino dhibbi, woy quwa saꞌino yaaddono hagiirre hoongeemmo gede assitankera dandiitanno. Ikkirono “hagiirraamunna taalle noosikki Gashshaanchi” Yesuusi Kiristoosi, manna sheshifachishanna hagiirsiisa baxannota qaagi. (1 Xim. 6:15, NW; Mat. 11:28-30) Yesuusi Ilaalu Sibikatesi yannara, Sheexaanu alame aana babbaxxino fonqoli iillinkerono, hagiirraamma ikkineemmo gede kaaꞌlitannonke akatta qummi assino. w18.09 17-18 guf. 1-3

Halaale afiꞌrate yine Qullaawu Maxaafi ledo sumuu yaannokki budenna rosicho agura shota diꞌꞌikkitino. (Law. 23:23) Mitootaho Qullaawu Maxaafi biddishshi garinni heeꞌrate konne bude agura qarrissannonsakkiha ikkara dandaanno; wolootu kayinni jaallansa, ledonsa loossannorinna maatensa togo assitannokki gede xixxiibbannonsa daafira togoo bude agurate badhera higgara dandiitanno. Hakko iso reyino fiixa ayirrisate yine assinanni bude ikkiro, konne bude agura qarra ikkitara dandiitanno. Jawaachishannohu wolootu lawishshi togoo rosicho agurreemmo gede kaaꞌlankera dandaanno. Efesooni katamira heeꞌrannohu alba agaanintete coye assanno manni Kiristaana ikki gedensaanni Qullaawa Borro ledo sumuu yaannokkiha konne rosicho agure halaale afiꞌrate maa assino? Qullaawu Maxaafi togo yaanno: “Maxaaffansa gamba assite mannu baalu albaanni giirtu. Hatte maxaaffa hirroonni woxi shallangeenna 50,000 kinchu birra ikkino.” (Soq. 19:19, 20) Kuri ammanantino Kiristaani halaale afiꞌrate yite, lowo waaginni hidhitino maxaaffa huntino; qoleno insa hatto assansanni lowo atoote afidhino. w18.11 7 guf. 15-16

Israeele Yordaanoosi Laga tayisse saꞌuhunni shiima yanna gedensaanni Iyyaasu bise adhino manchinni xaadino. Hakku manchi “Kaaliiqi olanto hajajaanchooti,” Isi Maganu manna agarate qixxaawe nooho. (Iya. 5:13-15) Sokkaasinchu Iyyaasura Iyyaarkote katama qeelate maa assa hasiissannosiro kulinosi. Sokkaasinchu assi yiinosiri giddo mitu kaaꞌlannore lawa hoogara dandaanno. Lawishshaho, olamaasine baala barcintanno gede kulinosi; hatto yaa qole insa boodu barri geeshsha ola olante umonsa gargadha didandiitanno yaate. (Kal. 34:24, 25; Iya. 5:2, 8) Kuri olamaasine ‘Diinu gawajjankera dayiro maatenke hiitto ikkine gargadhineemmo?’ yite heddinoha ikkara dandaanno. Ikkollana Israeele mitte odoo macciishshitino; “Israeeloota waajjatenni kainohunni, Iyyaarkonnita huxxu waalchuwa” cunfoonni. (Iya. 6:1) Kuni duduwi Israeele albinni roore Yihowa biddishsha addaxxitanno gede assinonsaha dilawannohe? w18.10 23 guf. 5-7

Ninkeno Phaawuloosi gede umonke heeshshi assa dandiineemmohu hiittoonniiti? Umihunni, Yihowa wolqanni loonsoommo loosira mannu jajankera dihasiꞌneemmo. Layinkihunni ninkeneeto togo yine xaꞌma hasiissannonke: ‘Sabbakeemmo manna ma garinni laeemmo? Qooxeessiꞌyara wolootu woffi assite laꞌanno manna anino hatto asse laeemmo?’ Alamete doyichora nooti Yihowa Farciꞌraasine qoqqowinsara dancha duduwo macciishshanno manna hassanni keeshshitino. Mitootu isinni wolootu woffi assite laꞌanno manni coyiꞌranno afoo woy bude rosate sharrantanno. Ikkirono Yihowa Farciꞌraasine konne manna roortannohu gede assite horo diheddanno. Hatteentenni insa kuni manni Maganu Mangiste sokka macciishshe adhanno gede kaaꞌlate woꞌnaaltanno. w18.09 5 guf. 9, 11

Roomu manni Yihuda shiino. Yihudu manninna wolaphote laalaatannohu wolu manni Mesihichu daye poletika soorranno yee agadhino. Insa Mesihichu daanno woyite, Israeelete daga bayira assanno, hattono Roomunnihu kadote gashshootinni wolassannonke yite heddino. (Luq. 2:38; 3:15) Batinyu manni, Mesihichu uullate aana Israeelete mereero mangiste xintanno yee ammananno. Hakkiinni gobba baalate billaalle heeꞌrannohu Yihudu manni Israeelete gobba higara dandaanno. Mitte hige Cuuaanchu Yohaannisi Yesuusa “Daanno yinihu ateetinso wole agadhino?” yee xaꞌmino. (Mat. 11:2, 3) Yohaannisi Yihudu manni halcho baala wonshannohu Yesuusa ikkinoronna teꞌee afa hasiꞌrino. Lame rosaano Yesuusi reyotenni kai gedensaanni Eemahusi hadhanni heedhe doogote isinni xaaddino; insara Mesihichu Israeele keere fushshannoha lawinonsa. (Luq. 24:21) Shiima yanna gedensaanni Yesuusi soqqamaasine “Israeelete Gashshoote xaanni galagalchite qolattoni?” yite xaꞌmitinosi.—Soq. 1:6. w18.06 4 guf. 3-4

Roorenkanni Yihowa manni daafira macciishshineemmo woyite qoropha hasiissannonke. Sheexaanu Maganunnite ammanantino soqqamaano suꞌma hunannota horo deꞌooti. (Aju. 12:10) Konni daafira, Yesuusi gibbannonkeri ‘kaphunni suꞌmanke huntannota’ coyiꞌrino. (Mat. 5:11) Konnira, Yihowa soqqamaano daafira waajjishannore macciishshineemmo woyite dimanseemmo. Jaallakkira woy wolu egennootto mannira imeeletenni woy borrote sokka soya baxisannohe? Hatto ikkiro, mitte haaro odoo macciishshatto woyite wolu balaxihekki wolootaho kula hasiꞌrattoha ikkara dandaanno. Ikkollana imeeletenni woy borrotenni sokka soyattora albaanni ateneeto togo yite xaꞌmi: ‘Tini odoo adda ikkitinota seekke buuxoommo?’ Tini odoo adda ikkase buuxoottokkiha ikkiro, hedittokkinni roduuwinke mereero kaphu odoo tuqisattora dandaatto. Odoo adda ikkase huluullamittoro woleho sokkooti; isinni hattenne sokka huni. w18.08 3 guf. 3; 4 guf. 6-7

Yesuusi wolootaho shaqqille leellinshe hagiirraamma ikkinammora hasiꞌranno. Batinyu manni shaqqille leellinsheemmonsa woyite galatankera dandaanno. Galatannonkehu baalanka manna ikka hoogara dandaanno; ikkirono mittu manchi assinoommosire naadannoha ikkiro, isino wolootaho hatto assara dandaanno. Konnira mannu naadirono naada hoogirono, shaqqillunni aa agurtinoonte. Leellishshinanni shaqqilli woloota mageeshshi geeshsha kaaꞌlannoro diaffinoonni. Baxillunni aanno manchi qolle uyinannie yee dihedanno. Yesuusi tenne xawisanni togo yiino: “Jila jilatto woyite, buxane, laanshaabbinore, naafootanna illiweeloota woshshi. Hatto assittoro, insa qola dandiitannokki daafira maassamatto.” (Luq. 14:13, 14) Mittu borreessaanchi qullaawu ayyaaninni “Shooshaqu manchi maassamanno” yee borreessino. Wolu manchi qole “Gadadaammu daafira xissiisiꞌrannohu baꞌraaꞌrinoho” yee borreessino. (Law. 22:9; Far. 41:1) Ee, wolootaho aa hagiirraamma ikkineemmo gede assitannonke daafira baxillunni aa hasiissannonke! w18.08 21-22 guf. 15-16

Yannankera ammannanni mashalaqqe afiꞌne mittu coyi togooti yine afoo wonshine coyiꞌra qarra ikkitanni no. Mayira? Korkaatuno rooriidi mashalaqqe buunxoonnikkite woy gama wido kaphoho; qoleno ninke guuntete xeꞌne noonkereeti. Ikkina tennera mayi kaaꞌlannonkeyya? Qullaawu Maxaafiha xintu seera afanna harunsa hasiissannonke. Xintu seeri giddo mittu, macciishshinoonniri halaale ikkinota buunxikki dawaro qola gowwimmatenna shollinyeho yaannoho. (Law. 18:13) Wolu Qullaawu Maxaafihu xintu seeri qole, mitto coye buunxummokki adda assiꞌneemmokki gede kulannoho. (Law. 14:15) Qoleno Yihowara soqqammanni keeshshinoommo diri ikki geeshshihano ikkiro, uminke wodancha addaxxineemmokki gede qoropha hasiissannonke. Qullaawu Maxaafihu xintu seeri agarooshshe ikkannonkehu, mittu coyi togooti yine afoo wonshine coyiꞌnammora albaanni seekkine buunxemmoha ikkirootinna hayyote doorsha doodhineemmoha ikkirooti. w18.08 7 guf. 19

Wayinni cuuammeemmo woyite Yihowa jajja ikkanke ammanne adhinoommotanna isira maahoyye yine galate sumuu yinoommota mannu albaanni leellinsheemmo. Yesuusino cuuami woyite tenne leellishino; isi Yihowara “Maganoꞌya fajjokki wonshammora baxoommo” yiinohu gedeeti. (Far. 40:7, 8) Yesuusi cuuami yannara Yihowara mayi macciishshaminosi? Qullaawu Maxaafi togo yaanno: “Yesuusi cuuame kae wayi giddonni fulanni heeꞌreennanni, gordu faꞌnameenna Maganu Ayyaani lembooli gede ikke dirre aanasi ofollanna afi. Hakkawoyintenni, ‘Hagiirsiisannoehu baxeemmo Beettiꞌya isooti’ yitanno huuro gordunni daggu.” (Mat. 3:16, 17) Wonanni Yesuusi iimi Annisi jajja ikkirono, Yihowa Beettisi Iso calla magansiꞌrate isonooto shiqishino daafira hagiidhino. Yihowa ninkeno heeshshonke isira sayinse uyineemmo woyite hagiidhanno; hattono atootesi aannonke.—Far. 149:4. w18.07 23 guf. 4-5

Muse “uyinoꞌneni?” yiinohu isonootonna Aarooni kulate ikkikki digatino. Muse hatto yee coyiꞌrasi maalalete Buicho ikkinoha Yihowa ayirrisannokkita leellishshanno. Faarso 106:32, 33 tenne hedo ledo sumuu yitanno; qummeeshshu togo yaanno: “Meriiba buꞌa mule mannu Kaaliiqa hanqisisi; insanni kainohunni Muse qarru aana uwi. Lowo geeshsha aarsitinosi daafira Muse hiddannaawe coyiꞌri.” (Kir. 27:14) Muse assinori, Yihowara hasiisanno ayirrinyi gatanno gede assino. Yihowa Musenna Aarooni “Lamunku Meriiba Wayiwa hajajoꞌya huntinoonni” yiinonsa. (Kir. 20:24) Ee, insa shota ikkinokki cubbo loossino! Yihowa Israeelete daga isira gara gibbino daafira hatti ilama woꞌma Kanaani gobba eꞌannota hoolino. (Kir. 14:26-30, 34) Konnira Yihowa Muse finqilinotera, hattoo yoo yaasi garankolla. Yihowa Museno Hexxote Gobba eannota hoolino. w18.07 14 guf. 9, 12; 15 guf. 13

Atewiinni baxxino tiiꞌꞌi noosi rodii gufiꞌrannokki gede, assa dandaattore ikkiro nafa assa agurate maahoyye yaatto? Togo assattoti egennantinote. Mitu roduuwi halaale rossara albaanni ago deerrimale aggannoha ikkirono, xa kayinni horo aga hoogate murcidhino. Ninke baalunku roduuwinke bashsho assitannoha gara ikkinokki coye assate higganno gede guficho ikka dihasiꞌneemmo. (1 Qor. 6:9, 10) Konni daafira mittu rodii diageemmo yaanna agi yine giddeessa dihasiissannonke. Ximootewoosi 20 diro ikkannosi balla heeꞌre farciꞌrannonsahu Yihudu manni gufiꞌrannokki gede shota ikka hoogisirono barcimate sumuu yiino. Isi togo assinohu soqqamaasinchu Phaawuloosira noosi gedee lao noosi daafiraati. (Soq. 16:3; 1 Qor. 9:19-23) Atino Ximootewoosi gede wolootaho yite umikki horo aguratto? w18.06 18-19 guf. 12-13

Yihowa baxillunni kae suwashshu wodani noonsa manna isiwa abbe ayyaanaamittete maatesi miilla assannonsa. (Yoh. 6:44) Yihowa Farciꞌraasincho ikkinokki manchi ledo mite yitine xaaddinanni woyite, hakko manchi daafira maa afa dandiitinanni? Suꞌmasinna danasi agurranna, garire afa hoogginara dandiitinanni. Yihowa afinonna Iso baxanno manchinni mite yitine xaaddinanni woyite kayinni hatto diꞌꞌikkino. Hakku manchi lophino gari, budisi, gaꞌresi woy gobbasi kiꞌnetenni baxxitinota ikkituro nafa, isi daafira batinye coye afa dandiitinanni; isino kiꞌne daafira duuchare afa dandaanno! Lawishshaho coyidhinanni afii babbaxxinoha ikkirono lamunku halaalunniha “xalala qaale” coyidhinanni. Konnira, Maganu daafira nooꞌne lao, harunsitinannihu amanyootu biddishshinna albillittete daafira nooꞌne hexxo mitte ikkitinota affinanni. Qoleno tenne afaꞌne hakkonne mancho addaxxitinanni gede assitannoꞌne. Kuri, mannu ledo geedanno jaalooma kalaqiꞌrate xinta ikkitino coyibbaati. w18.12 21 guf. 9-10

Aliidi bisi Kiristoosi massageennansa Yihudu wido ikkinokki manni barcima hasiissannonsakkita xawisino. (Soq. 15:19, 20) Ikkollana lowo diri gedensaannino Yihudu wido ikkino Kiristaani oosonsa barcinshiisha diagurtino. ‘Yesuusi reyi yannara Muse Seeri shaaraminoha ikkina, isi barcimate hajo lowo diro qarra ikkitara fajjinohu mayiraati?’ yine hendeemmoha ikkara dandaanno. (Qol. 2:13, 14) Mitu roduuwi, mito roso taashshinanni woyite hakko roso bayichonko ammane adha qarrissansara dandiitanno. Yihudu wido ikkino Kiristaani hedonsa biddi assiꞌrate yanna hasiissinonsa. (Yoh. 16:12) Mitootaho barcima Maganu ledo muli jaalooma kalaqiꞌnoonnita leellishannoha baxxino malaate diꞌꞌikkino yinanniti dirra gibbinonsa. (Kal. 17:9-12) Wolootu qolte wolu Yihudu manniwiinni baxxitinore ikkituro dartu iillannonke yite waajjitino. (Gal. 6:12) Yannate gedensaanni kayinni Phaawuloosi qullaawu ayyaaninni borreessino sokka widoonni Kiristoosi biddishsha lede uyino.—Rom. 2:28, 29; Gal. 3:23-25. w18.10 24-25 guf. 10-12

Qeyaafa hashsha goꞌlite Yesuusa amaddanno gede olanto soyino. Yesuusi tenne gano afino daafira, soqqamaasinesi ledo hurbaate itihu jeefote hashsha insa boode bise qixxeessidhanno gede kulinonsa. Insara mitto hasiisanno roso rosiisate lame bise ikkitanno. (Luq. 22:36-38) Hakko hashsha Pheexiroosi Qeyaafa soyino manni giddo mitto bisetenni gawajjino. Pheexiroosi hatto assinohu mannu hashsha goꞌle Yesuusa amadate dayinohura giirame ikkinoti egennantinote. (Yoh. 18:10) Yesuusi kayinni Pheexiroosi “Bise fushshidhannori bisetenni reyitannona bisekki kou giddora qoli!” yiinosi. (Mat. 26:52, 53) Konni garinni Yesuusi rosaanosi alamete wido ikkitannokki gede rosiisinonsa; isi hatte hawarro tenne hajo daafira huuccatto assiꞌrino. (Yoh. 17:16) Taashshote xeꞌne huna dandaannohu Magano callaho. Hakko daafira ninke keerinkenna mittimmanke baꞌannokki gede sharrama hasiissannonke. Qoleno tenne bebbeehantino alame giddo, Yihowa dagasi mereero mittimma noota laꞌꞌanno woyite lowo geeshsha hagiidhannoti egennantinote.—Sof. 3:17. w18.06 7 guf. 13-14, 16

Sheexaanu ninke woshshaadate horoonsiꞌrannoti wole hayyo, Yihowara ammanammeemmokki gede assate waajjishiishate. Lawishshaho, gashshaano sabbakate loosonke hooltanno gede xixxiiwansara dandaanno. Woy qole Qullaawu Maxaafi seera harunsineemmo daafira ledonke rossannori woy loossannori haariintannonke gede assara dandaanno. (1 Phe. 4:4) Hattono ninkera heddannoti maatenke miilla gambooshshe haꞌneemmota hooltannonke gede assara dandaanno. (Mat. 10:36) Ikkina konne fonqolo qeela dandiineemmohu hiittoonniiti? Umihunni, Sheexaanu ninke aana ola kayisino daafira, togoori iillannonketa afa hasiissannonke. (Aju. 2:10) Qoleno isi kuni fonqoli iillannonke gede assannohu mayiraatiro heda hasiissannonke: Sheexaanu ‘Mannu ooso Yihowara soqqantannohu injiinsaro callaati’ yee heewisamino. Isi ‘Qarru batiꞌriꞌnero Magano kaaddinanni’ yiino. (Iyo. 1:9-11; 2:4, 5) Jeefote, Yihowa fonqolo qeelleemmo gede wolqa aankera huucciꞌra hasiissannonke. Qoleno Yihowa horo ditugannonke.—Ibi. 13:5. w18.05 26 guf. 14

Sabbankeemmo sokka mannu macciishsha giwirono, loonseemmohu wixa wixate loosi mittoreno dikaaꞌlanno yine heda dihasiissannonke. Batinyu manni kulleemmonsa sokka macciishsha giwannoha ikkirono, ninke laꞌꞌansa digattanno. Bikku uddano uddiꞌneemmota, danchu akati noonketanna manna faasinqe hasaawinseemmota huwattara dandiitanno. Akatinke wolootu ninke daafira noonsa lao gara ikkitinokkita huwatte laonsa biddi assidhanno gede assara dandaanno. Serjonna Olinda yinanni suwisaano togo yiino: “Xissinonke daafira, shiima yanna geeshsha otobise uurritannowa mara hoongoommo. Wole yannara hakka marrummota saꞌꞌaahu higaahu ‘Ma ikkitini? Qaalliwe assitinoonninke’ yaannonke.” Ee, hexxo mudhine Maganu Mangiste wixa wixa agura hoongummo geeshsha, “daga baalantera” sabbankanni heeꞌnoonni loosiꞌra kaaꞌla dandiineemmo. (Mat. 24:14) Baalunkunni roore, Yihowa hagiirsiinsanni heeꞌnoommota afanke tashshi assitannonke; korkaatuno isi “kaajjite guma laaltannore” baxanno.—Luq. 8:15. w18.05 16 guf. 16-18

Mannu ooso cubbo loosse guuntete xeꞌne noonsare ikkitu yannanni kayise Yihowa jawaante aanni keeshshino. Isi Addaaminna Heewani Edenete kaashshu basera Maganoho finqiltanni heedheenna, albillitte ilamanno sirchonsa jawaachishshanno masaalo coyiꞌrino. Kalaqama 3:15te noo masaalo, “Biꞌre albi hamashshi” yaano Sheexaanu Daawuloosi bushu loosisi ledo baꞌꞌannota kultanno daafira mannu oosora hexxo amaddinote. (Aju. 12:9; 1 Yoh. 3:8) Yihowa soqqamaanchi Nohi heeꞌrinohu, Magano waajjannokki manni woꞌmino alameraati; hatte yannara Yihowa magansiꞌrannohu isootinna minisi manna callaho. Hakka waro finqillenna amanyootu maaeelle batidhino daafira, Nohi hexxo mudhinoha ikkara dandaanno. (Kal. 6:4, 5, 9, 11; Yih. 6) Kayinni Yihowa Nohira, busha alame hunara hedinotanna isinna maatesi gattanno gede maa assa hasiissannosiro kulinosi. (Kal. 6:13-18) Ee, Yihowa Nohira jawaante uyinosi. w18.04 15 guf. 1-2

‘Waajjishannoe daafira woloota jawaachisha didandeemmo’ yine heda soꞌrote. Woloota jawaachisha hakkeeshshi geeshsha qarrissannota diꞌꞌikkitino; mitto mancho keere haaꞌneemmo woyite faasiinqe hasaawisa calla jawaachishshasira dandiitanno. Mittu manchi ninke faasinqe hasaawinseemmosi woyite isi qole hatto assannokkiha ikkiro, tini qarru iillinosita leellishshara dandiitanno; tenne yannara hasaaphanno woyite seekke macciishsha jawaachishshasira dandiitanno. (Yai. 1:19) Ninke baalunku jawaante hasiissinonsa roduuwinkera jawaantete buicho ikka dandiineemmo. Moote Selemooni togo yee borreessino: “Yannasira coyiꞌnoonni coyi hiittoo danchaati! Hisataamo alba laꞌꞌa wodana hagiirsiissanno; dancha duduwo macciishsha jawaachishshanno.” (Law. 15:23, 30) Phaawuloosi coyiꞌrinori, mitteenni Maganu Mangiste faarso faarsano jawaachishshannota leellishanno. (Soq. 16:25; Qol. 3:16) Yihowa barri “gamba yaanni” haꞌranno woyite, mimmitonke albinni roorsine jawaachisha hasiissannonke.—Ibi. 10:25. w18.04 23 guf. 16; 24 guf. 18-19.