Birra

Ninke Yihowanna Yesuusi gede mannu wodanira noore afa didandiineemmo. Ikkirono wolootu hedo huwatate woꞌnaala dandiineemmo. (2 Qor. 11:29) Heeꞌnoommohu umonsa calla baxanno manni woꞌmino alamera ikkirono ‘woleho woyyannore hendo ikkinnina, uminkera woyyannore calla laꞌnoonke.’ (Fil. 2:4) Roorenkanni songote cimeeyye marartannore ikka hasiissannonsa. Yihowa towaattanno gede uyinonsa geꞌreewo garunni towaata hoogguro xaꞌmannonsata affino. (Ibi. 13:17) Songote cimeeyye ammanate roduuwansa kaaꞌlate, marartannore ikka hasiissannonsa. Cimeeyye woloota marartannota leellisha dandiitannohu hiittoonniiti? Manna mararanno cimeessi ammanate roduuwisi ledo yanna sayisanno. Isi xaꞌmo xaꞌmanno, hattono cince macciishshanno. Roorenkanni giddonsata fushshite hasaapha hasidhe heedhenni coyidhe kuꞌla hogginore seekke macciishsha hasiissanno. (Law. 20:5) Mittu cimeessi roduuwu ledo yanna sayisannoha ikkiro, insa ammantannosi, insa ledo dancha aante heedhannosi, hattono baxxannosi.—Soq. 20:37. w19.03 17 guf. 14-17

Galatu coommitanno sagale gedeeti; coommitanno sagale mannu ledo beeqqine intiro roore hagiidhinanni. Hatteente gede, wolootu ninke galattannonke woyite tashshi yaannonke. Ninkeno woloota assitinonkerira galanteemmonsa woyite insa hagiidhitanno. Mitto mancho galanteemmoha ikkiro, isi ninke kaaꞌlate woy hasiisannonkere wonshate assinori mulla daafuro ikkinokkita huwatanno gede assineemmo. Tini qolte isinna ninke mereero noo jaaloomi kaajjanno gede assitanno. Techohu barru qummeeshshi yaannonte gede, woloota galatate coyiꞌneemmori lowore kaaꞌlanno. Birrunni seekkinoonni uduunnichira worroonniti culkunni seekkinoonni poome mageeshshi geeshsha xuma ikkitinoro heda dandaatto! Qoleno togoo poome lowo waaga afidhinoti egennantinote! Togoo afansha uyinihero hiitto ikkattoha lawannohe? Wole manna galatate coyiꞌrattorino hattonni lowo waaga afiꞌrino. Hanni hedi: Culkunni seekkinoonni poome lowo yanna keeshshitara dandiitanno. Hatteente gede, galantoommosi manchi, coyiꞌnoommore heeshshosi diro woꞌma qaagaranna lowori gede asse laꞌꞌara dandaanno. w19.02 15 guf. 5-6

Addaaminna Heewani danchanna busha badde leellishshanno haqqicho guma ittu woyite, Yihowanna biddishshasi addaxxitannokkita leellishshino. Insa uminsara danchanna busha bade kulanno biddishsha fushshiꞌra doodhitino. Ikkollana insa hatto assansanni mageeshshire huꞌnitinoro heda dandaatto. Insa Yihowa ledo noonsa jaalooma huꞌnitino. Hattono hegerera heeꞌrate qoossonsa hooggino; qoleno oosonsara cubbonna reyo ragisiissino. (Rom. 5:12) Mittu Itophiyu manchi, Filiphoosi farciꞌrisi woyite Addaaminna Heewani assitinorinni baxxinore assino. Kuni manchi Yihowanna Yesuusi assitinosire lowo geeshsha naadino daafira, hakkawoyintenni cuuamino. (Soq. 8:34-38) Ninkeno heeshshonke Maganoho sayinse uyineemmonna hakko manchi gede cuuammeemmo woyite, Yihowanna Yesuusi assitinonkere naandeemmota leellinsheemmo. Hattono Yihowa addaxxineemmotanna bushanna dancha bade kulate qoosso noosihu iso ikkinota huwantoommota leellinsheemmo. w19.03 2 guf. 1-2

Maganu soqqamaasine minshe nookkire ikkitinota leellisha dandiitannohu hiittoonniiti? Yihowa woꞌmu wodaninninna geedote baxillinni baxxe, hattono woꞌmante yannara isi fajjo assiteeti. Qullaawu Maxaafi giddo minshe nookkire ikka yaanno qaali, xalala, keeraancho woy xeꞌne nookkire ikkate yaate. Lawishshaho Yihowara kakkalo assine shiqinshanni saada keeraancho woy muso afidhinokkita ikka hasiissanno. (Lew. 22:21, 22) Maganu manni naaffinota, macca taꞌinota woy ille baꞌinota, hattono dhiwantino saada kakkalo asse shiqishara difajjinanni. Yihowa isira kakkalo assine shiqinshanni saada xalala, keeraancho woy xeꞌne nookkita ikkitara hasiꞌranno. (Mil. 1:6-9) Yihowa keeraanchimma woy xalalle hasiꞌrasi dhagge diꞌꞌikkitannonke. Mayira? Dikkotenni mitore hidhineemmo woyite lawishshaho laalo, maxaafu woy wolu uduunni muso nooha woy gama wido dadhaminoha ikkiro hakkonne uduunne hidha dihasiꞌneemmo. Ninke baalunku xeꞌne nookkire hidha hasiꞌneemmo. Hatteente gede Yihowa, isira noonke baxillinna ammanama woꞌmanna xeꞌne nookkita ikkitara hasiꞌranno. w19.02 3 guf. 3

Wodananke agadhate bushu coyi eannota gargadha calla ikkikkinni danchu coyi eanno gedeno assiꞌra hasiissannonke. Biꞌre huxxinoonni katami xullicho agartannori diinu eannokki gede xullicho cuffanno; ikkollana sagalenna wole coyibba katamu giddora eessinanni woyite xullicho fantanno. Xullicho horo fana hoongiro, katamu giddo heeꞌranno manni hudetenni goofara dandaanno. Hatteente gede, ninkeno ganyine Maganu hedo wodaninke giddora eꞌanno gede assiꞌra hasiissannonke. Qullaawu Maxaafi Yihowa hedo amadino; konnira Qullaawa Maxaafa nabbambeemmo woyite Yihowa hedo, hedonkenna assootenke quxxanno gede assiꞌnanni heeꞌnoommo. Qullaawu Maxaafi niwaawenni horo afiꞌra dandiineemmohu hiittoonniiti? Huuccatto assiꞌra lowo geeshsha kaaꞌlitanno. Huuccatto, Yihowa Qaalisi giddo nooha ‘dhagge ikkanno halaale laꞌneemmo gede’ kaaꞌlitannonke. (Far. 119:18) Qoleno nabbamboommore hiinca hasiissannonke. Huuccatto assiꞌneemmoha, nabbambeemmohanna hiincineemmoha ikkiro Maganu Qaali ‘wodaninkera’ coanno daafira Yihowa hedo baxa hananfeemmo.—Law. 4:20-22. w19.01 18 guf. 14-15

Yihowa heeꞌnoommo garinna dandoonke babbaxxitinota ikkitinota afino; qoleno isira shiqishiꞌra dandiineemmo kakkalo ikkitu geeshshitano ikkituro, isi tenne kakkalo naadanno. Hanni Israeelete daga shiqishidhanno kakkalo hedi. Mitu Israeelete manni geꞌrecho woy meicho kakkalo asse shiqishanno. Buxane kayinni, “lame lemboolcho woy lame bukukkaama” shiqisha dandiitanno. Ikkollana mittu Israeelaawichi lame ceicho shiqisha hoogiro, “mitto safaraasincho liiqo bullee” kakkalo asse shiqishiro Yihowa adhanno. (Lew. 5:7, 11) Bullee wole kakkalonni ajjannoha ikkirono, “liiqo” ikkitu geeshsha Yihowa naadanno. Shaqqadu Maganinke Yihowara xaano hattoo lao noosi. Isi gambooshshunniwa dawaro qoltinanni woyite baalunku Aphiloosi gede seekkitine, hattono Phaawuloosi gede ruxxi yitinikki coyiꞌra hasiissannoꞌne yee digiddeessinonke. (Soq. 18:24; 19:8) Yihowa dandoonke deerrinni dawaro qollummo geeshsha hagiidhanno. Lame shiimmaadda saante uyitinota gunnitte mancho qaagi. Ise aa dandiitannore assitino daafira, Yihowa naadinose.—Luq. 21:1-4. w19.01 8-9 guf. 3-5

Kiristoosi harunsaano ikkinoommo daafira mannu giwannonketa anfoommo. Yesuusi, goofimarchu diro rosaanosira buutote darti iillannonsata balaxe coyiꞌrino. (Mat. 24:9; Yoh. 15:20) Isayaasi masaalo diinnanke gibbannonkeha calla ikkikkinni ninke gawajjate babbaxxino massaara horoonsidhannota leellishshanno. Konni massaari giddo mitu, awaawurshaho, waajjo kaphootinna buutote darteeti. (Mat. 5:11) Yihowa diinnanke ninke gawajjate kuri massaara horoonsidhannota dihoolanno. (Efe. 6:12; Aju. 12:17) Ikkollana waajja dihasiissannonke. Yihowa ninke gawajjate “seekkinanni bagadi shuffanno” yiino. (Isa. 54:17) Mitte gimbe wolqaataame wishonni agartannonkente gede, Yihowano ‘diinu foorarinni’ agarannonke. (Isa. 25:4, 5) Diinnanke ninke gawajjate sharranturono diqinaannonsa. (Isa. 65:17) Maganu manna ‘gawajjate heddannori baalu mulla darga ikkitanno.’—Isa. 41:11, 12. w19.01 6-7 guf. 13-16

Wedella, Yihowa wolapho baxanno; kiꞌne kalaqinoꞌnehuno wolapho baxxinanni gede asseeti. Ikkollana afidhinoonni wolapho garunni horoonsidhinara hasiꞌranno; tini qolte agarooshshe ikkitannoꞌne. Teeda baꞌino misilla laꞌannore, maaeela coye assitannore, gawajjitanno ispoorte loossannore woy jingilli assitanno dhagga adhitannorenna ago quwa sayisse aganno ooso afoottoha ikkara dandaanno. Tini ooso yannate geeshsha hagiirre afidhara dandiitanno. Ikkollana kuri coyibba assite afidhanno hagiirri gale hose qarra abbannonsa; lawishshaho, dhibbunna araado amaddansara woy reyitara dandiitanno. (Gal. 6:7, 8) Kuri ooso wolapho afidhinoha lawinsarono, insaneeto dogganni no. (Tit. 3:3) Yihowa biddishshi garinni heeꞌra kayinni uminkera kaaꞌlitannonke. Hatto assanke fayyimmanna addu wolapho afiꞌneemmo gede kaaꞌlitannonke. (Far. 19:7-11) Wolaphoꞌne hayyotenni horoonsidhinanniha yaano, Maganunnihu guutu seerinni massagantinanniha ikkiro, Maganohono ikko anniꞌneranna amaꞌnera addaxxinannirenna wolapho lendanniꞌnere ikkitinoonnita leellishshinanni.—Rom. 8:21. w18.12 22-23 guf. 16-17

Addaami cubbo loosasi lowore daaffino. Kuri giddo mittu reyote; reyo adhanna adhama gawajjitanno. Soqqamaasinchu Phaawuloosi reyo adhanna adhama diiggannotanna galte shiiꞌrinohu hakkuyi gedensaanni adhama dandaannota coyiꞌrino. (Rom. 7:1-3) Maganu Israeelete dagara uyino Seeri adhanna adhamate daafira tittire kulanno. Kuni Seeri mitte galte sayinse adha dihoolanno; kuni rosichi hanafinohu Maganu Israeelete dagara Seera aansara albaanniiti. Ikkollana Muse Seeri meentonna ooso miincannikki gede kulanno. Lawishshaho, mittu Israeelaawichi borojjicho adhironna yannate gedensaanni wole galte layinki assiꞌriro, umi galtesira uddano, sagalenna wole hasiisannosere shiqisha hasiissannosi. Maganu hasiꞌrannohu, isi ise agarannosenna towaatannose gedeeti. (Ful. 21:9, 10) Ninke Muse Seeri hunda heeꞌnoommoha ikka hoogirono, Yihowa adhanna adhama ayirrisannota konni seerinni rosa dandiineemmo. Tini ninkeno adhanna adhama ayirrinseemmo gede diassitannonke? w18.12 10 guf. 3; 11 guf. 5-6

Imbaaqoomi yaaddosinna qarrasi Yihowa aana tuqqi gedensaanni, Yihowa ma garinni qolannosiro hedikki digatino. Baxillaanchunna wodanchanno Anni Yihowa Imbaaqoomi suwashshu wodaninni kae xaꞌmino xaꞌmora dihanqinosi. Yihowa Imbaaqoomi qarraminotanna kaaꞌlote huucciꞌranni noota afino daafira, ammanaminokkihu Yihudu manni aana muli yanna giddo mayi ikkannoro kulinosi. Yihowa hakkonne finqila manna hunanno yanna gambissinota kulinosihu umi manchi Imbaaqoomi ikkikki digatino. Yihowa Imbaaqoomira bunshe hunate qixxaawe noota leellishinosi. Hatti bushanna finqila ilama qorichishamase digattanno. Yihowa “yannaꞌnera” yaasi, yoo abbannohu Imbaaqoomi woy hakka waro noo Israeele yannara ikkinota leellishano. Yihowa Imbaaqoomira dawaro qolinohu isi hedinokki garinniiti. Ikkina tini raaresiꞌra dawaro ikkitanno? Yihowa Yihudu mannira qarru batiꞌrannonsata kulinosi. w18.11 15 guf. 7-8

Halaale rosinokki manna ma garinni laꞌꞌatto? Soqqamaasinchu Phaawuloosi Yihowa daafira mitore afinohu Yihudu mannira sabbakinoha ikkirono, isi kaphu maganna magansidhannorirano sabbakino. Phaawuloosi umo misiyoone ikke haꞌri woyite, Barnabaasi ledo Lisxiru katama haꞌrino. Hakkiicho heeꞌrannohu Liqooniyu manni Phaawuloosinna Barnabaasi maganu gede asse laino; hattono magannansa suꞌminni Diyanna Hermesi yite woshshitinonsa. Phaawuloosinna Barnabaasi hakkonne guwishsha adhituyya? Insa tenne ikkito hakkuyira albaanni hadhinohu lamu katamira iillinonsa dartinni fooliishshidhanno tunceenyi gede assite laꞌinoni? Kuni guwishshi batinyu manni dancha duduwo macciishshanno gede assanno yite heddinoni? Diheddino! Insa bayichonko uddanonsa darte raartanni mannu widira higge doddanni martino. Hakkiinni togo yitino: “Manna, togo mayira assitinanni? Ninkeno kiꞌne gedee mannaati.”—Soq. 14:8-15. w18.09 4-5 guf. 8-9

Halaale afiꞌratenna Qullaawu Maxaafi biddishshi ledo sumuu yine heeꞌrate hedonkenna akatanke biddi assiꞌra hasiissannonke. Pheexiroosi tenne daafira coyiꞌranni togo yiino: “Hajajantanno ooso ikkitine, alba affinikkinni heedhinita busha yorto haꞌrunsitinoonte.  . . . Heeshshoꞌne baalantenni qullaawoota ikke.” (1 Phe. 1:14, 15) Hunda Qorontoosi katamira heeꞌrannohu batinyu manni amanyootu maaeelle assannoho; hakko heeꞌranno manni halaale rosate lowo coye biddi assiꞌra hasiissannonsa. Insa Yihowa albaanni qullaawa ikkate heeshshonsa gara soorridhino. Hatteente gede, yannankerano batinyu manni halaale afiꞌrate yee Maganu baxannokki amanyoote agurino. Pheexiroosi hakka waro noo Kiristaanira lede togo yiino: “Daga assitanno gede akkimala ikkitonni, busha hamaandenni, dimbatenni, sirbatenni, dimbatenninna battennita kaphu maganna magansiꞌratenni heedhinoonni diri ikkino.”—1 Phe. 4:3. w18.11 6 guf. 13

“Hegere heeshsho afiꞌrate gara ikkitinoti wodanu dooꞌꞌo” noonsare afa dandiineemmohu hiittoonniiti? Umi xibbi dirinte gede togoo manna afa dandiineemmo doogo, insara farciꞌrate. Konni daafira, Yesuusi, “Martinanni katamira woy qachira sokka macciishsha hasiissannosi mancho hasse” yee hajajinonke hajajo harunsineemmo. (Mat. 10:11, NW) Suwashshu wodani noonsakkihu woy ayyaanaamittete coye baxannokki manni dancha duduwo macciishsha baxanno yine dihendeemmo. Ninke ammanaminoha, umonsa heeshshi assannohanna halaale gooꞌrino manna hanseemmo. Yesuusi hanaatsicha ikke loosanno yannara mini uduunne, saanqa, qambara woy wole uduunne seekkate subbino haqqe hasinoha ikkara dandaanno. Isi dancha haqqe afiꞌri gedensaanni, uduunnichosinna ogimmasi horoonsiꞌre uduunne seekkanno. Ninkeno balanxe suwashshu wodani noonsa manna hanseemmo; hakkiinni noonke uduunnenna ogimmanke horoonsiꞌne Yesuusi rosaano ikkitanno gede kaaꞌlineemmonsa.—Mat. 28:19, 20. w18.10 12 guf. 3-4

Wongeelaawichu Filiphoosi heeshshosi gari soorraminoha ikkirono, soqqanshosi aana illachishino. Yerusaalamete, Isxifaanoosi shini gedensaanni Kiristaanaho buutote darti iillino. Hatte yannara Filiphoosi haaro soqqanshote qoosso afiꞌre no. (Soq. 6:1-6) Ikkollana Kiristaanu darame wolewa haꞌri yannara Filiphoosi anga xaaxire diofollino. Hatteentenni isi sabbakara Samaariya haꞌrino; hakkiicho dancha duduwo macciishsha hasiissannonsahu batinyu manni no. (Mat. 10:5; Soq. 8:1, 5) Filiphoosi Maganu ayyaani massagisiwa baalawa haꞌrate maahoyye yiino; konni daafira Yihowa danchu duduwi iillinokkiwa iillishate horoonsiꞌrinosi. Batinyu Yihudooti Samaariyu manna woffi assite laꞌanno, hattono beebba assidhannonsa; Filiphoosi kayinni Samaariyu manna mulla kae digiwinonsa; hatteentenni insara dancha duduwo hagiirrunni duduwino. Konnira Samaariyu manni “mittu wodaninni seekke macciishshisi.” (Soq. 8:6-8) Filiphoosira heeshshosi gari soorraminoha ikkirono, soqqanshote aana illachishasinni Yihowa isono ikko maatesi maassiꞌrinonsa.—Soq. 21:8, 9. w18.10 30 guf. 14-16

Mitte hige Yesuusi Dikaapoolisi yinanni qooxeessira heeꞌreenna mannu “macciweelonna danqicha mancho isiwa” haaꞌre abbino. (Maq. 7:31-35) Yesuusi iso mannu mereero hursa agure, “mannuwiinni bade qacce fushshe” hursino. Isi hatto assinohu mayiraati? Kuni manchi macciweelo ikkino daafira, Yesuusi iso lowo manni noowa hursisiro tashshi yaa hoogasira dandaanno. Yesuusi qacce fushshe hursinosihu tenne wodanchino daafira ikkara dandaanno. Ninke maalaletenni hursa dandiineemmokkiti egennantinote. Ikkirono, ayyaanaamittete roduuwinkera shaqqillenna danchumma leellisha dandiineemmo; qoleno hatto assa hasiissannonke. Yesuusi macciweelu manchira mayi macciishshamannosiro wodanche shaqqille leellishinosi. Hatteente gede ninkeno geerrahonna dhukiweelootaho heda hasiissannonke. Addu Kiristaana bande anfannihu loosannohu lowo loosinni ikkikkinni leellishanno baxillinniiti. (Yoh. 13:34, 35) Baxillu geerranna dhukiweeloota roduuwanke gambooshshe daannonna soqqansho fulanno gede kaaꞌlate dandiinummore baala assineemmo gede kakkayisannonke. Insa gambooshshe daye woy soqqansho fule assannori shiimare ikkiro nafa, hatto assanno gede kaaꞌla hasiissannonke.—Mat. 13:23. w18.09 29-30 guf. 7-8

Mittu mittunku Yihowa soqqamaanchi Maganunna Yesuusi albaanni muxxete; Yesuusi qole heeshshosi wodote kakkalo asse uyino. (Gal. 2:20) Ayyaanaamittete roduuwanke lubbora banxeemmo. Qoleno insa shaqqillunninna baxillunni towaanteemmo. Wolootaho sheshote buicho ikkate, “Mannu ledo keere heeꞌnanni garanna mimmito dhaambanni doogo haꞌrate diinaggaambo.” (Rom. 14:19) Albillitte uulla Gannate ikkitanno woyite, hexxo mudhineemmo gede assannonkeri horo diheeꞌranno! Dhibbu, olu, cubbunni dagganno reyo, dartu, maatete giddo kalaqamanno qarrinna hexxo mudhinanni gede assannori diheeꞌranno. Kumu Diri gedensaanni, mannu ooso baala guuta ikkitanno. Jeefote fonqolo qeelte saꞌannori, uullate aana Maganu Yihowa ooso ikkite “Maganu oosota ayirrinyu wolapho gutantanno.” (Rom. 8:21) Konni daafira, baalunku dhaawanno baxille leellishanna Maganu abbannota haaro alame eꞌneemmo gede mimmito kaaꞌla agurroonke! w18.09 14 guf. 10; 16 guf. 18

Maganu Qaale xiinxallate yaa, mitto roso iimi adda nabbawa woy xaꞌmote dawaro ikkitanno hedo xuruura calla diꞌꞌikkitino. Xiinxallineemmo woyite, nabbambanni heeꞌnoommori Yihowa daafira, doogosirenna hedosi daafira maa rosiisannonkero huwatate woꞌnaalleemmo. Maganu mito coye asse yee wole coye kayinni hoolinohu mayiraatiro wodanchineemmo. Qoleno ronsoommore harunsine heeshshonkenna hedonke biddi assiꞌra hasiissannonke. Xiinxallinummo kiiro kuri coyibba hiinca dandiineemmokkiha ikkara dandaanno; ikkirono nabbamboommore seekkine hiinca hasiissannonke; xiinxallote yanna giddo darate ikkitannota hiincinanni sayisa hasiissannonkeha ikkara dandaanno. (1 Xim. 4:15) Maganu Qaale ganyine hiincineemmoha ikkiro, Yihowa hedo guuta ikkitinota buunxeemmo. Mito coye isi laꞌꞌanno garinni laꞌꞌa hananfeemmo, hattono isi lao ledo sumuu yaannore assineemmo. Qoleno ‘haarooꞌminanni’ haꞌneemmo, hattono wolu garinni heda hananfeemmo. (Rom. 12:2) Galle honse Yihowa hedanno garinni heda ronseemmo. w18.11 24 guf. 5-6

Umi xibbi diro heeꞌrinohu Phaawuloosi, isiniitinna ammanate roduuwisi daafira coyiꞌranni “Ninke Maganu ledo loonseemmoreeti” yiino; hatto yiinohu insa Maganu Mangiste halaali wixa wixxannonna waa hayikkissanno daafiraati. (1 Qor. 3:6, 9) Ninkeno sabbakate loosira yannanke, woxenkenna wolqanke uyineemmoha ikkiro, ‘Maganu ledo loonsanni’ heeꞌnoommo. Tini kaajja qoossooti! Sabbakatenna manna rosano assate loosira yannankenna wolqanke aa lowo hagiirre afiꞌneemmo gede assitannonke. Mitu roduuwi, Qullaawa Maxaafa xiinxallisanno manni ayyaanaamittetenni lophanna laꞌꞌanno woyite lowo geeshsha hagiidhanno. Qullaawa Maxaafa xiinxallinseemmo manni ayyaanaamittete halaale huwatannonna ammanansa kaajjitanno woyite, hattono heeshshonsa biddi assiꞌrannonna rosino halaale wolootaho kulanno woyite tashshi yaannonke. Yesuusi sabbakkara soyinori 70 rosaano dancha guma afidhe ‘hagiidhitanni higgu’ yannara, isino lowo geeshsha hagiidhino.—Luq. 10:17-21. w18.08 20 guf. 11-12

Quwa saꞌne uminke wodancha addaxxa hananfammora dandiineemmo. Qoleno seekkine buunxoommokkiha ikkiro nafa, hakko coye gunde anfoommoha lawankera dandaanno. Macciishshinoommo mashalaqqe buuxa qarra ikkitannonke gede assannohu wolu coyino no; mittu ammanate rodiinkera koffi yinoommoha ikkara dandaanno. Hashsha barra tenne hendeemmoha ikkiro, rodoonke huluullama hananfammora dandiineemmo. Konni daafira, isi daafira gara ikkinokkire macciishshineemmo woyite, ranke adda assiꞌnammora dandiineemmo. Tennenni maa ronseemmo? Roduuwinkera koma amada, coye buunxummokki insara yoo yineemmo gede assitankera dandiitanno. (1 Xim. 6:4, 5) Hinaasonna hamashshaaꞌma wodaninke giddo rumuxxite hedonke daaffannokki gede gargadha hasiissannonke. Yihowa roduuwanke banxammoranna insara wodaninni kaꞌne mulla gatona yinammora hasiꞌrannota dea dihasiissannonke.—Efe. 4:2, 32. w18.08 6 guf. 15; 7 guf. 18

Mannu ooso baala kalaqinohu Yihowa ikkino daafira insa baalunku isireeti. (Far. 100:3; Aju. 4:11) Ikkollana hundinni kayise, Maganu mannu ooso mereerinni jajjasi ikkitanno gede mito manna doodhanno! Lawishshaho, Faarso 135 Yihowa hundiha Israeelete manna “umisi jiro asse” doodhinota kultanno. (Far. 135:4) Qoleno Hoosei maxaafira Israeelete wido ikkinokki manni Yihowa manna ikkannota masaalloonni. (Hos. 2:23) Yihowa albillitte Yesuusi ledo gashshitannori wido ikkara Ayihude ikkinokki manna doori woyite, Hoosei masaalo woꞌmitino. (Soq. 10:45; Rom. 9:23-26) Kuni “dooramino sirchi” Yihowaho ‘baxxino miinjaati’; korkaatuno kuni manni iima heeꞌranno gede qullaawu ayyaaninni buuraminoho. (1 Phe. 2:9, 10) Uullate aana heeꞌrate hexxo noonsahu ammanamino Kiristaanina? Yihowa insano ‘mannaꞌya’ yee woshshinonsa.—Isa. 65:22. w18.07 22 guf. 1-2

Addu Kiristaani Yesuusi lawishsha harunsanno; isi wolootaho shaqqille leellisha dandiineemmo gara dancha gede asse leellishinonke. (Mat. 20:28) Mitti mittinke ninkeneeto, ‘Albinni roore Yesuusi lawishsha harunsa dandeemmo?’ yine xaꞌma hasiissannonke. (1 Phe. 2:21) Yihowanna Kiristoosi gede wolootaho hendeemmohanna kaaꞌlo hasiissannonsare towaanteemmoha ikkiro, Magano hagiirsiisa dandiineemmo. Yesuusi shaqqadu Samaarichi daafira coyiꞌrino lawishshi, harunsaanosi baalunku gari manna kaaꞌlitara hasiꞌrannota leellishanno. (Luq. 10:29-37) Yesuusi hakkonne lawishsha coyiꞌrinohu mayiraatiro huwatootto? Mittu Yihudichi “Eliꞌya ayeti?” yee xaꞌmino daafiraati. Yesuusi qolino dawaro, Magano hagiirsiisa hasiꞌnummoro ninkeno Samaarichu manchi gede woloota shaqqillunni kaaꞌla hasiissannonketa leellishshanno. w18.08 19 guf. 5-6

Maariyaami Yesuusa ammanante lossitinotera Yihowa ise ayirrinye afidhanno gede assa agurinoni? Diagurino. Maganu ise xagge Qullaawu Maxaafi giddo borreessantanno gede assino. Yesuusi sase dironna darate uullate aana soqqami yannara Maariyaami ledosi haꞌra dandiitinoha dilawanno. Gunnitte ikkitino daafira, Naazireetetenni fula dandiitinokkiha ikkara dandaanno. Konninni kainohunni ise duucha qoosso hoogginoha ikkirono, Yesuusi reyi woyite ledosi no. (Yoh. 19:26) Qoleno Phenxeqosxete albaanni noo barruwara Maariyaami wole rosaano ledo Yerusaalamete no. (Soq. 1:13, 14) Phenxeqosxete barra Yesuusi rosaanora qullaawu ayyaani dirri woyite iseno qullaawu ayyaaninni buurantukki digattino. Hatto ikkiro, ise hegere geeshsha iima Yesuusi ledo heeꞌrate qoosso afidhino. Ee, ise ammanante soqqamasenni lowo baꞌraaꞌra afidhino. w18.07 9 guf. 11; 10 guf. 14

Yesuusi rosaanosira mittu assooti abbanno qarra huwattanno gede rosiisate xintu seera kulinonsa. Lawishshaho, koma amada finqillanni gedenna busha yorto foorranni gede assitara dandiitannota kulino. (Mat. 5:21, 22, 27, 28) Dancha gede qajeelino tiiꞌꞌi, Yihowahu xintu seerinni massagammeemmo gedenna Iso hagiirsiisannore assineemmo gede kaaꞌlannonke. Qullaawu Maxaafinni qajeelino tiiꞌꞌi noonsari lamu Kiristaanira mittu coyi daafira babbaxxitino lao heedhansara dandiitanno. Hanni agu daafira laꞌno. Qullaawu Maxaafi deerrunni aga dihoolanno. Ikkollana quwa sayisiꞌne angeemmokkinna dimbineemmokki gede qorowisiisannonke. (Law. 20:1; 1 Xim. 3:8) Togo yaa mittu Kiristaanchi heda hasiissannosihu deerra sayise agate daafira callaati yaatenni? Hatto yaa diꞌꞌikkino. Mittu Kiristaanchi tiiꞌꞌisi agannota hoola hoogisirono wolootu tiiꞌꞌi daafira heda hasiissannosi. w18.06 18 guf. 10-11

Yesuusi harunsaanosi Farisootu, Saduqootunna Heeroodisi gashshoote kaaꞌlitannori irshowiinni woy rosiwiinni xeertidhanno gede xawise kulinonsa. (Mat. 16:6, 12) Yesuusi rosaanosira tenne kulinonsahu, Ayihude moote assitasira hasidhuhunni shiima yanna gedensaanniiti. Ammaꞌno poletiku ledo karsantanno woyite finqille kaꞌara dandiitanno. Yesuusi rosaanosi tenne yannara anga wodhitannokki gede rosiisinonsa. Qeesootunna Farisootu Yesuusa shaate mixidhinohu mittu korkaati konneeti. Insa Yesuusi mannu baalu iso harunsanno gede asseenna ammaꞌnotenna poletiku giddo noonke silxaane hoongeemmo yite waajjitino. Konnira togo yitino: “Sammi yine agurrummoro mannu baalu iso ammananno. Roomu roorrootino dagge Qullaawa Minenna mannanke guddanno.” (Yoh. 11:48) Konni daafira, Qeyaafa yinannihu Qeesootu Roorrichi Yesuusa shinanni gede gano ganino.—Yoh. 11:49-53; 18:14. w18.06 6-7 guf. 12-13

Sheexaanu horoonsiꞌranno woshshaado, mannu digintete coyi daafira afate quqquxamanno gede assate. Yannankera, isi mannu agaanintete ledo xaadooshshu heeꞌrannonsa gede kaphu ammaꞌno calla ikkikkinni boohaarshu dirijjittano horoonsiꞌranno. Filme, elekitiroonikete godoꞌlenna wolu boohaarshi aana digintete coye baxisannohu gede assine shiqinshanni. Tenne woshshaadonni qeelammeemmokki gede qoropha dandiineemmohu hiittoonniiti? Yihowa dirijjite gara ikkinonna gara ikkinokki boohaarsha baala tittirte kultannonke yine agadha dihasiissannonke. Mitti mittinke Maganu biddishshi ledo sumuu yaanno doorsha doodhate tiianke qajeelsiꞌra hasiissannonke. (Ibi. 5:14) Qoleno, soqqamaasinchu Phaawuloosi aleenni amaalinonke amaale harunsinummoro hayyote doorsha doodha dandiineemmo. Ninkeneeto togo yine xaꞌma hasiissannonke: ‘Doodheemmo boohaarshi dogaancho ikkoommota leellishanno? Qullaawa Maxaafa xiinxalliseemmori woy galagale mare hasaawiseemmonsari doodheemmo boohaarsha laꞌoommero sabbakeemmore loosunni leellisheemmoha ikkoommota heddanno?’ Wolootaho rosiinseemmore balanxe ninke loosunni leellinsheemmoha ikkiro, Sheexaanu woshshaadonni diqeelammeemmo.—1 Yoh. 3:18. w18.05 25 guf. 13

Ninke Phaawuloosi lawishsha harunsa dandiineemmohu hiittoonniiti? Umihunni, “hegere heeshsho afiꞌrate gara ikkitinoti wodanu dooꞌꞌo” noonsa manna afiꞌrate halcha hasiissannonke. Layinkihunni, dancha lao noonsa mannira wodanansa fananno gede Yihowa huucciꞌra dandiineemmo. (Soq. 13:48, NW; 16:14) Silvaana yinanniti 30 meddi yaanno diro suwisaancho ikkite soqqantino rodoo togo yitino: “Qoqqowiꞌyara nooha mitto mine hasaawisammara albaanni, gara ikkitino lao heedhannoe gede kaaꞌlaera Yihowa huucciꞌreemma.” Ninkeno sokkaasine suwashshu wodani noonsa manniwa massitannonke gede kaaꞌlankera Magano huucciꞌra dandiineemmo. (Mat. 10:11-13; Aju. 14:6) Rooberti yinannihu 30 saꞌꞌanno diro suwisaancho ikke soqqamino rodii togo yiino: “Sokkaasinete ledo mittee loosa lowo geeshsha hagiirsiissannote; korkaatuno insa hasaawinseemmo manchira mayi tuncu yiinosiro affino.” Sayikkihunni, sabbankeemmo mannira noonsaha dancha akata wodanchate woꞌnaalanna konni kaꞌa Yihowa soqqamaasine ikkitara dandiitanno yine heda dandiineemmo. Karlii yinanni rodii togo yiino: “Hasaawiseemmo manchira suwashshu wodani noosita leellishshannota shiimmaadda coyibba, lawishshaho, muushshi yiinota, faasiiqa ikkinotanna dancha xaꞌmo xaꞌmannota wodanchate woꞌnaaleemmo.” Ee, ninkeno Phaawuloosi gede cincine guma laala dandiineemmo. w18.05 15 guf. 13; 16 guf. 15

Konni albaanni kaaꞌlinoommonsa manni ammaname Yihowara soqqamanni noota macciishshanke lowo jawaante ikkitannonke. Soqqamaasinchu Yohaannisi tenne daafira coyiꞌranni, “Oosoꞌya halaalaancho heeshsho heedhannota macciishshatenni roorino hagiirri dinoe” yiino. (3 Yoh. 4) Batinye suwisaanono tini gara ikkitinota huwattino; lowo diri albaanni Qullaawa Maxaafa xiinxallissino manni xaa geeshsha Yihowara ammaname soqqamanni nootanna mitu isinni suwisaano ikke soqqamanna laꞌꞌansa lowo geeshsha jawaachishshannonsa. Mitto hexxo mudhino suwisaancho alba Yihowara ammaname hagiirrunni soqqamino gara qaagiissinummosiro lowo geeshsha jawaatanno. Batinyu woradu aliidi laꞌꞌaanonna minaamuwinsa songuwa towaati gedensaanni songuwa borreessitinonsati galatu sokka lowo geeshsha jawaachishshinonsata coyidhino. Ammanante soqqantanno cimeeyye, misiyoone ikkite soqqantannori, suwisaanonna Beeteelete maateno galantanninsa woyite jawaattanno. w18.04 23 guf. 14-15

Selemooni konne seera diige, yannate gedensaanni 700 meento adhino. Qoleno wole 300 ikkannoha irkote meento abbiꞌrino. (1 Mot. 11:3) Meentisi giddo batinyu kaphu maganna magansiꞌrannohonna Israeelete wido diꞌꞌikkinoho. Konni garinni Selemoonino wole gobba meento adhe Maganu seera diigino. (Mar. 7:3, 4) Selemooni sunu sununni Yihowa seeriwiinni xeertiꞌrasi shota ikkinokki cubbo loosanno gede assitinosi. Isi Astaarooti yinanni maganchoranna Kamooshi yinannihu kaphu maganira kakkallanni bayicho seekke meentisi ledo magansiꞌrino. Qoleno wolu bayichi heeꞌreenna, isi tenne magannara kakkallanni bayicho seekkinohu qullaawu minira albaanni noo ilaaliraati! (1 Mot. 11:5-8; 2 Mot. 23:13) Selemooni ‘Qullaawu mini giddo kakkalo shiqisha agura hoogummo geeshsha Yihowa busha assooteꞌya lashshi asse aguranno’ yee hede isonooto doginoha ikkara dandaanno. Ikkollana Yihowa busha assoote horo lashshi asse diaguranno. w18.07 18-19 guf. 7-9

Sheexaanu aananke olannote ‘giirate gede wala yitanno koottalla’ giddo mitte Yihowa daafira coyiꞌnanni kaphooti. Sheexaanu Yihowa ate daafira hedannokkihunna baxannohekkihu gede assite hedattora hasiꞌranno. Hanni 19 diro ikkannosete Iida lawishsha laꞌno; Iida ‘Ani ditidhoommate’ yite heddanno. Ise togo yitino: “Alba ‘Yihowa anewa dishiqanno, hattono Jaalaꞌya ikka dihasiꞌranno’ yee duucha woyite hedeemma.” Ise tenne hedo qeeltanno gede kaaꞌlinoseri maati? Iida togo yitino: “Gambooshshu ammanaꞌya kaajjishinoe. Bashsho mittu manchino ani qoleemma dawaro macciishshannoha lawannoekki daafira, gambooshshunniwa sammi yee anga xaaxire ofolleemma. Xa kayinni gambooshsheho qixxaawe haꞌre lame sase dawaro qoleemma.” Iida lawishshi mitto coye huwanteemmo gede kaaꞌlannonke: Olamaano wonqidhanno wonqo mittu garite; ammanate wonqonke kayinni geeshsha ajjara woy lexxitara dandiitanno. Ammananke lexxitanno woy ajjanno gede assiꞌneemmori ninkeeti. (Mat. 14:31; 2 Tes. 1:3) Konni daafira ammananke kaajjishiꞌrate sharrama hasiissannonke! w18.05 29-30 guf. 12-14

Usuru mini agaraanchi hedosi biddi assiꞌre kaaꞌlo xaꞌmiꞌrinohu baattote huxano kaꞌu gedensaanni. (Soq. 16:25-34) Hatteente gede, konni albaanni Qullaawu Maxaafi halaale macciishsha giwino manni, heeshshonsa giddo buutote qarri iillannonsa woyite hedonsa biddi assiꞌre kaaꞌlo xaꞌmirara dandaanno. Mitu lowo diro loossanni keeshshitino looso hedeweelcho hoogge baasa dadillitinoha ikkara dandaanno. Wolootu qolte buutote xibbi amadinonsaha, woy shiidhe manchittinoha ikkara dandaanno. Insa ‘Isi kalaqammoommohu mayiraati?’ yite xaꞌmitara dandiitanno. Hattono ‘Gatate maa assa hasiissannoe?’ yite heddannoha ikkara dandiitanno. Togoo manninni xaandeemmo woyite, heeshshonsa giddo mite yite kulleemmonsa sokka macciishshate sumuu yitara dandiitanno. Konni daafira sabbakate looso agurrummokkinni ammanamme loosanke, mannu dancha duduwo macciishsha hasiꞌranno yannara sheshifachishate kaaꞌlitannonke.—Isa. 61:1. w18.05 19-20 guf. 10-12

Yannankera batinyu manni tenne alame magani wodanansa beeshshino daafira, ammaꞌnote, jirotenna poletikaho borojje ikke no. (2 Qor. 4:4) Konni daafira Yesuusi gede ninkeno mannu wolapho aanno Magano Yihowa afe Iso magansiꞌranno gede kaaꞌlate qoosso afiꞌnoommo. (Mat. 28:19, 20) Kuni shota looso diꞌꞌikkino; konne looso loonseemmo woyite batinyu fonqolo ikkannori iillannonke. Mite gobbara mannu Maganu daafira rosa dihasiꞌranno, mitootu isinni farciꞌneemmonsa woyite hanqitanno. Ikkirono Yihowa sabbankeemmo gede hajajinonke daafira, ninkeneeto togo yine xaꞌma hasiissannonke: ‘Afiꞌroommo wolapho Maganu Mangiste looso loosate horoonsiꞌra dandeemmo?’ Yannankera batinye Yihowa soqqamaano goofimarchu gambisinota huwatte, woꞌma yanna soqqansho hanafansa lowo geeshsha hagiirsiissannote; insa woꞌma yanna soqqansho hanafate heeshshonsa bikkunnita assidhino. (1 Qor. 9:19, 23) Insa giddo mitu qooxeessinsara noo qoqqowira suwisaano ikkite soqqantanno; wolootu qolte sabbakkannori roore hasiissannowa hadhe soqqantanno. Lowo roduuwi afidhino wolapho Yihowara soqqante hayyotenni horoonsiꞌransa tashshi assitannote!—Far. 110:3. w18.04 11-12 guf. 13-14