Wocawaaro

Yesuusi Maartanna Maariyaami mararino. Insa rodiinsa Aliaazaari reyonni xissiisiꞌrino gara lae, ‘Yesuusi wiꞌlino.’ (Yoh. 11:32-35) Isi wiꞌlinohu muli jaalasi hoogino daafira calla diꞌꞌikkino. Qoleno isi Aliaazaari reyotenni kayisannota afino. Hatteentenni Yesuusi wiꞌlinohu muxxe jaallasi Maartanna Maariyaami xissiisiꞌrino gara huwatinonna isi umisi dadillino daafiraati. Yesuusi mararannoha ikkinota afanke lowo geeshsha kaaꞌlitannonke. Ninke isi gede guuta ikka hoongummorono, isi manna mararasi banxeemmosi gede assitannonke. Isi xa Maganu Mangiste Moote ikke gashshe noota afanke jawaachishshannonke. Yesuusi muli yanna giddo qarra baala hunanno. Isi mancho ikke uullate aana heeꞌrino daafira, Sheexaanu gashshooti abbino qarranna shetto baala hune mannu ooso kaaꞌla dandaanno. Addaho, “wolqanke anjera [kaaꞌlannonke]” Gashshaanchi noonke daafira maassammoommoreeti.—Ibi. 2:17, 18; 4:15, 16. w19.03 17 guf. 12-13

Wolootu Maganu daafira rossanno gede kaaꞌla dandiineemmoha ikkirono, qaru loosi kayinni ninkeha diꞌꞌikkino. (1 Qor. 3:6, 7) Manna minisira abbannohu Yihowaati. Mittu mittunku manchi wodanisi garinni dancha duduwo macciishshe adhara woy hoogara dandaanno. (Mat. 13:4-8) Uullate aana heeꞌrino manni baalunkunni roore Rosiisaancho ikkirono, batinyu manni Yesuusi sokka macciishshinokkita qaagi. Konni daafira, batinyu manni dancha duduwo macciishsha giwiro hexxo mudha dihasiissannonke. Soqqammeemmo woyite manna mararreemmoha ikkiro, dancha guma afiꞌneemmo. Hatto assinummoro, sabbakate loosi albinni roore baxisannonke. Qoleno mannaho uyine afiꞌnanni hagiirre afiꞌneemmo. Hattono “hegere heeshsho afiꞌrate gara ikkitinoti wodanu dooꞌꞌo noonsari” dancha duduwo macciishshite adhitanno gede kaaꞌlineemmo. (Soq. 13:48, NW) Konnira, “Coyi injiinkero, manna baalaho . . . dancha coye assino.” (Gal. 6:10) Hatto assinummoro, iimi Anninke ayirranno daafira tashshi yaannonke.—Mat. 5:16. w19.03 25 guf. 18-19

Moote Daawiti, “Kaaliiqi lowoho; lowo galati hasiisannosiho” yee borreessino. (Far. 145:3) Isi Yihowa baxanno; qoleno Yihowara noosi baxilli “songote mereero” iso guwisiꞌranno gede assinosi. (1 Dud. 29:10-13; Far. 40:5) Yannankera Yihowa guwisiꞌneemmo doogga giddo mitte, Kiristaanu gambooshshiwa dawaro qolate. Wolootu gambooshshunniwa qoltannota babbaxxitino dawaro macciishsha hagiirsiissannonke. Shiimmaaddu qaaqquulli giddonsanni kaꞌe harancho dawaro qoltanno woyite tashshi yaannonke. Halaale haarote rossinori, rossino halaali daafira iibbado giddonni coyidhanna macciishsha jawaachishshannonke. Mitootu manna ille qasse laꞌꞌa waajjitannoha woy ninke qaale rossanni nooha ikkirono, “jawaante” afidhe dawaro qoltanno woyite naandeemmonsa. (1 Tes. 2:2) Insa sharrantanno sharro naandeemmota leellisha dandiineemmohu hiittoonniiti? Gambooshshu gedensaanni qoltinote jawaachishshanno dawarora galantammonsara dandiineemmo. Insa jawaachisha dandiineemmoti wole doogo, ninke uminke dawaro qolate. Hatto assineemmoha ikkiro, ninke calla jawaante afiꞌneemmoha ikkikkinni wolootano jawaachisha dandiineemmo.—Rom. 1:11, 12. w19.01 8 guf. 1-2; 9 guf. 6

Baasa qarraminohu tonnu manni no. Insa dhiigu amadinonsa; insara hurre afidhanno hexxo dinonsa. Ikkollana barrunni mitto barra, Bayiru Rosiisaanchi Yesuusi daanna xeertote heedhe laꞌu. Insa Yesuusi dhibba baala hursannota macciishshitino. Konni daafira, “Yesuusa, Biilonke ballo, eeggatena saonke agurinke” yitanni raartu. Hakkiinni tonnunku woꞌmunni woꞌma hurtu. Tonnunku Yesuusi shaqqille leellishinonsa daafira, giddonsanni galattinositi egennantinote. Insa giddo mittu kayinni, wodanisinni calla galata agure Yesuusiwa mare isi assinosirira galatasi mare coyiꞌre kulino. Dhibbisinni hurinohu kuni Samaarichi “Magano galatate” kaino. (Luq. 17:12-19) Ninkeno Samaarichu gede, shaqqille leellishinonke manna galata hasiꞌneemmo. Woloota galata lainohunni Yihowa dancha lawishsha ikkinonke. Isi konne assanno doogga giddo mitte, hagiirsiisannosi manna baꞌraasasiiti. (2 Sam. 22:21; Far. 13:6; Mat. 10:40, 41) Qullaawu Maxaafi, “Maganu baxanno ooso ikkitinoonnihura, iso labbe” yee jawaachishannonke. (Efe. 5:1) Konni daafira, galanteemmore ikka hasiissannonke korkaati giddo mittu, Yihowa lawishsha harunsa hasiꞌneemmo daafiraati. w19.02 14 guf. 1-2; 15 guf. 4

Mitte beetto rosu mine ayirrinsanni ayyaani Magano hagiirsiisannokkita affino daafira, konne ayyaana ayirrissannokkita rosiisaanchoho ayirrinyunni kultusi. Mittu manna ille qase laꞌꞌa waajjanno wedellichi minunni mine haꞌranni soqqamanni no. Hakkiinni, Yihowa Farciꞌraasine mishannohu ledosi rosanno beetti heeꞌranno mine mari. Maatesira hasiisannore shiqishate diinaggaawe loosannoha mitto mancho, loosiisaanchu ammanama xeꞌinore woy higge fajjitannokki coye assi yiisi. Isi loosiweelo gatara dandaannoha ikkirono, ammanamanna higgete hajajama hasiissannosita, hattono Maganu soqqamaasinesi togo assitara hasiꞌrannota loosiisannosi manchira xawise kulino. (Rom. 13:1-4; Ibi. 13:1-25) Kuri sasunku manni hiikkonne akata leellishshino? Haammata akatta, lawishshaho worbimmanna ammanama leellishshinota wodanchoottoha ikkara dandaanno. Ikkollana insa roorenkanni hasiisannoha mitto muxxe akata leellishshino; hakkuno minshe nookkire ikkine heeꞌrate. Insa sasunku Yihowara ammanantino. Mittu mittunku Maganu biddishsha diiga gibbino. Minshe nookkire ikkite heeꞌransa togo assitanno gede kakkayissinonsa. Yihowa insa konne akata leellishshino daafira lowo geeshsha hagiidhinoti egennantinote. Ninkeno iimi Annanke hagiirsiisa hasiꞌneemmo. w19.02 2 guf. 1-2

Muse Seeri roorenkanni umonsa gargadha dandiitannokkirira, lawishshaho annanna ama shiidhino oosora, gunnootahonna wole gobbanni dayino mannira agarooshshe ikkanno. Israeelete heedhanno daanyoota togo yinoonni: “Manni gobba mannira woy annu nookki oosora halaale beeshshitinoonte. Gunnittete imaana amadote adhitinoonte.” (Mar. 24:17) Yihowa dagoomu giddo nooha gadadaamma manna baxxino garinni towaatanno. Hattono togoo manna miiccannore xaꞌmannonsa. (Ful. 22:22-24) Yihowa silxaane noonsari insara woroonni noo mannira baxille leellishshara hasiꞌranno. Isi giddeessine bushiinshannita, fiixu ledo foora, hattono qaaqquulle bushiinshannita tiyyire giwanno; qoleno kaaꞌlannonsahu nookkiri agarooshshenna taashsho afidhara hasiꞌranno. (Lew. 18:6-30) Yihowa taashshanno Magano ikkinota buunxeemmo woyite isira noonke baxilli lexxanno. Maganohonna isi fushshinohu xalalu seerira baxillu heeꞌrinkero qole wolootaho baxillenna taashsho leellinsheemmo. w19.02 24-25 guf. 22-26

Hanni Sheexaanu hedo daaffannonkekki gede gargadha dandiineemmo gara leellishanno lawishsha laꞌno. Yihowa ‘foorre woy saalimale ikkito woy busha yorto duduwi nafa mereeronke horonta heeꞌrannokki’ gede rosiisinonke. (Efe. 5:3) Ikkollana loosu basera woy rosu mine darawonke maaeela coye kayisse hasaawa hanaffuro maa assineemmo? Agaraanchu yaano tiiꞌꞌinke qorowisiisankera dandaanno. (Rom. 2:15) Ikkina tiiꞌꞌinke kulannonkere macciishshineemmo? Darawonke hasaabbannore macciishshate woy insa laꞌanni noo misilla laꞌꞌate fonqolammeemmoha ikkara dandaanno. Ikkollana togoo fonqoli iillannonke woyite wodaninke xullicho cufa yaano wole hasaawa kayisa woy insawiinni agure haꞌra hasiissannonke. Darawonke gara ikkinokkire hendeemmo woy assineemmo gede xixxiibbannonketa qeelate worbimma hasiissanno. Yihowa sharrameemmo sharro laꞌꞌannotanna Sheexaanu hedo qeelate kaaꞌlitanno jawaantenna hayyo aannonketa addaxxa dandiineemmo.—2 Dud. 16:9; Isa. 40:29; Yai. 1:5. w19.01 17-18 guf. 12-13

Hoqino dureessinna wolqaataamu Moote Selemooni, ‘hagiirru maatiro afatenna isonooto hagiirsiisate’ qodhe kaino. (Ros. 2:1-10) Konnira isi minna miꞌnino, kaashshu basenna paarke qixxeessiꞌrino, hattono hasiꞌrinore baala assino. Hakkiinni isira mayi macciishshamisiyya? Isi hagiirrenna harshammo afiꞌrino? Selemooni umisi techo qummeeshshira noo hedo coyiꞌrino. Tennenni kaajja roso ronseemmo! Kiꞌne Selemooni xaggenni rossine hayyoota ikkitinoonnita leellishshinanni? Yihowa qarrantine kaꞌine rossinara dihasiꞌranno. Maganoho hajajamatenna heeshshoꞌne giddo isi fajjo wonshate ammana hasiissannoꞌne. Togoo ammana taalle nookkitenna horonta irraaambanni gede assitannota diꞌꞌikkitino. Ee, Yihowa “leellishshinoonnisi baxille dihawanno.” (Ibi. 6:10) Konni daafira, kaajjado ammana heedhannoꞌne gede sharramme; hatto assitiniro, iimi Anniꞌne baalunkurinni woyyino coye afidhinara hasiꞌrannota wodanchitinanni.—Far. 32:8. w18.12 22 guf. 14-15

Yihowa baxanno manchi Iso addaxxanno, hattono mitto coye laꞌꞌannohu Maganu laꞌꞌanno garinniiti. Qoleno Maganu biddishsha harunsatenna Isira hajajamate murciꞌranno. (1 Qor. 2:12, 13) Daawiti tennera dancha lawishsha ikkannonke. Isi Yihowa “iqqaꞌyaati” yee faarsino. (Far. 16:5) Daawiti ‘iqqi’ giddo mittu golosi ikkino Magani ledo xintiꞌrino jaaloomaati. (Far. 16:1) Daawiti Maganu ledo togoo jaalooma xintiꞌrasi maaho kaaꞌlitinosi? Isi “ledokki heeꞌraꞌya hagiirrunni wonshitannoe” yee borreessino. Ee, baalunkurinni roore Daawiti hagiirsiissinositi Maganu ledo muli jaalooma xintiꞌrasiiti. (Far. 16:9, 11) Maalaamittete hagiirrenna jiro shorritannori Daawiti afiꞌrino gedee hagiirre afiꞌra didandiitanno. (1 Xim. 6:9, 10) Wedella, Yihowara nooꞌne ammana kaajjishiꞌranna isira soqqamaꞌne heeshshoꞌne seekkanno gede assitanno. Ikkina Yihowara nooꞌne ammana lophitanno gede assiꞌra dandiitinannihu hiittoonniiti? Isi ledo yanna sayisatenni yaano, Qaalesi nabbawatenni, isi kalaqinore laꞌꞌatenninna kiꞌnera leellishinoꞌne baxillenna wole akattasi hiincatenniiti.—Rom. 1:20. w18.12 25 guf. 7-8

Phaawuloosi tenne coyiꞌrinohu mulla yaate geeshshira calla diꞌꞌikkino. Hatteentenni isi, mittu mittunku Kiristaanchi adhanna adhama ayirrisanno gede hajajanni no. Atino adhanna adhama konni garinni laꞌꞌatto? Adhanna adhama ayirrisa lainohunni Yesuusi dancha lawishsha ikkinonke. Farisootu Yesuusa galte diigate daafira xaꞌmitusi yannara isi, Maganu umi adhanna adhama daafira coyiꞌrinore qummi assino; togo yiino: “Manchu annasinna amasi agure galtesi ledo heeꞌranno. . . . Kunnira Maganu mitto assinore mannu badoonke.” (Maq. 10:2-12; Kal. 2:24) Yesuusi adhanna adhama xintinohu Magano ikkinotanna galte geedonnita ikka hasiissannoseta coyiꞌrino. Maganu Addaaminna Heewanira galtensa diiga dandaannota dikulinonsa. Hatteentenni Maganu hedo “lamunku” adhamino gedeenni hegerera heeꞌranno gedeeti. w18.12 10-11 guf. 2-4

Umo Yihowa daafira ronsummo woyite isira hajajama mageeshshi geeshsha hasiissannotero wodanchinoommo. Ayyaanaamittetenni lophinanni haꞌneemmo woyite kayinni, Yihowa daafira yaano isi maa baxannoro, maa giwannoro, hattono mitu coyira noosi lao huwanteemmo. Mitto doorsha doodhineemmo woyite Yihowa hedo harunsa roso assiꞌneemmo. Yihowa hedanno garinni heda rosanke hagiirsiissannota ikkiturono, guuntete xeꞌne noonkere ikkinoommo daafira mito coye Yihowa laꞌꞌanno garinni laꞌꞌa qarra ikkitankera dandiitanno. Lawishshaho Yihowa foorre, woxu baxille, sabbakate looso, mundee garimale horoonsiꞌranna wole coyibba ma garinni laꞌꞌannoro anfoommo. Ikkollana Yihowa kuri coyibba hakko garinni laꞌꞌannohu mayiraatiro leella hoogankera dandaanno. Tenne yannara maa assa dandiineemmo? Yihowa hedanno garinni hedate dandoonke woyyeessiꞌrate mayi kaaꞌlannonke? Dawaro afiꞌrate Maganu Qaale xiinxalla, hedosi huwatanna hiinca, hattono isi hedanno garinni heda rosa hasiissannonke. w18.11 23-24 guf. 2-4

Imbaaqoomi heeꞌrinohu qarrunna shetto batidhino yannaraati. Hakkawaro bushunna finqilu manni batiꞌrino daafira isi lowo geeshsha yaadino. Imbaaqoomi togo yee xaꞌmino: ‘Tini bunshe baꞌannohu mamooteeti ikka? Yihowa bunshe xaa geeshsha huninokkihu mayiraati?’ Imbaaqoomi umisi gaꞌre ikkinohu Israeelete manni mimmito beebba assiꞌrannanna miicanna laꞌino. Tennera isi hexxo mudhino. Konni daafira isi tenne quuxxote yannara Yihowa konne coye biddi assanno gede huucciꞌrino. Imbaaqoomi Yihowa mannisira heda agurino yee heda hanafinoha ikkara dandaanno. Atino hatto yite hedde egennootto? Ikkina Imbaaqoomi Yihowa addaxxanna Isi eino qaale wonshannota ammana agurinoni? Diagurino! Isi qarrasinna yaaddosi mannaho ikkikkinni Yihowara kuꞌlasi Iso addaxxa agurinokkita leellishshanno. Imbaaqoomi dadillinohu, Maganu hakko qarra hunanno yannanna qarru iillannosi gede fajjinohu mayiraatiro buuxa hoogino daafiraati. w18.11 14 guf. 4-5

Qulxuꞌme woshshaaddannore Pheexiroosinna Indiriyaasi Yesuusi ‘manna woshshaaddanno’ gede koyisinsa woyite “woshshaadonsa agurte” hadhino. (Mat. 4:18-20) Hatto yaa kayinni xaa yannara halaale rosannohu baalu loososi aguranno yaa diꞌꞌikkino. Insa maatensara hasiisannore shiqishate looso loosa hasiissannonsa. (1 Xim. 5:8) Ikkollana mittu manchi halaale rosi gedensaanni maalaamittete coyiꞌra noosi lao biddi assiꞌranna balaxisiisa hasiissannore balaxisiisa hasiissannosi. Hanni Maariya yinanni beetto lawishsha laꞌno. Ise qolleete godoꞌle lubbora baxxanno, hattono mixose tenne godoꞌlenni maccata ikkite lowo woxe afiꞌrate. Hakkiinni Maariya Qullaawa Maxaafa xiinxalla hanaffino. Halaalu heeshshose biddi assidhanno gede kaaꞌlinose daafira hagiidhitino. Maariya ayyaanaamittetenna maalaamittete coye mitteenni illachisha dandiinannikkita wodanchitino. (Mat. 6:24) Ise qolleete godoꞌle agurtino. Xaa yannara Maariya suwisaancho ikkite soqqantanni no; hattono, “hagiirraamenna woyyaabbino heeshsho heeꞌranni noomma” yitino. w18.11 5 guf. 9-10

Yesuusi 30 diro ikkisita, hanaatsimmate looso agure rosiisa hanafino; isi hatto assinohu kuni loosi wolu baalunkunni roore hasiisannoha ikkinota afino daafiraati. Isi Maganu uullara soyinosi korkaati giddo mittu Maganu Mangisteha dancha duduwo duduwate ikkinota coyiꞌrino. (Mat. 20:28; Luq. 3:23; 4:43) Yesuusi heeshshosi giddo roore illachishinohu sabbakate loosi aanaati, qoleno wolootu hatto assitara hasiꞌrino. (Mat. 9:35-38) Ninke hanaatse ikka hoongammora dandiineemmo; ikkollana ninke baalunku Maganu Mangisteha dancha duduwo dudumbeemmoreeti. Kuni loosi lowo geeshsha hasiisannoha ikkino daafira, Maganu ledonke loosanno; konnira ninke “Maganu ledo loonseemmoreeti.” (1 Qor. 3:9; 2 Qor. 6:4) Yihowa ‘qaali woꞌmunni woꞌma halaale’ ikkinota dihuluullammeemmo. (Far. 119:159, 160) Soqqammeemmo woyite, ‘halaalu qaale taashshine’ rosiinseemmohu iseraati. (2 Xim. 2:15) Konni daafira, Qullaawa Maxaafanna wole borruwanke horoonsiꞌne mannaho Yihowa, Yesuusinna Maganu Mangiste daafira halaale rosiisate, kuri uduunnicho horoonsiꞌnanni gara seekkine rosa hasiissannonke. w18.10 11 guf. 1-2

Minaanni, umosi ikkinoha Yesuusi Kiristoosi lawishsha harunsannoha ikkiro, minaamasira iso ‘ayirrisa’ diqarrissannose. (Efe. 5:22-25, 33) Minaama minaannase ayirrissannoha ikkiro, isira qarru iillannosi woyite qarrisi leellannose. Minaanninna minaama mimmitoho hedannoha ikkiro, oosonsara dancha lawishsha ikkanno. Qoleno insa oosonsara wolootaho heda dandiinanni gara rosiisa hasiissannonsa. Lawishshaho, annuwunna amuuwu oosonsa Gambooshshu Addaraashe giddo dodantannokki gede rosiisa dandiitanno. Lowo manni gamba yiinowa, sagale jajjabbu manni adha geeshsha agartanno gede annuwunna amuuwu oosonsara kula dandiitanno. Mittu qaaqqi dancha coye assannonke woyite lawishshaho saanqa faninkero galata hasiissannonke. Hatto assa qaaqquulle jawaachishsharanna ‘adhannonkunni roore aannohu’ hagiirraamo ikkinota rossanno gede assitara dandiitanno. w18.09 29 guf. 5-6

Gashshe noohu Moote Yesuusi Kiristoosi aannonke biddishshi xaano ikko albillitte kaaꞌlannonkeho. Konni daafira, muli yannara woyyeessinoonni coye hagiirrunni harunsino. Lamalate gambooshshe woy soqqansho lainohunni woyyeessinoonni coyi kaaꞌlinoꞌne gara maatete magansiꞌra yannara hasaawa dandiitinanni. Yihowa dirijjite uyitannonke biddishsha harunsa kaaꞌlitannonketa qaangummoro, konne biddishsha hagiirrunni harunsa shota ikkitannonke. Attammanni borro ajisha woxe qoxxowate kaaꞌlitanno; qoleno haarote dayinoha tekinoolojete uduunnicho horoonsiꞌra alame woꞌmate Maganu Mangisteha dancha duduwo albinni roore duduwate kaaꞌlitannonke. Hakko daafira elekitiroonikisete fultanno borronna viidiyubba horoonsiꞌranke danchate. Hatto assineemmoha ikkiro, Maganu dirijjite woxe danchu garinni horoonsidhanno gede kaaꞌlineemmo; Kiristoosino hatto assinammora hasiꞌranno. Kiristoosi biddishsha seekkine harunsineemmoha ikkiro, wolootu ammananna mittimmanke kaajjitanno. w18.10 25-26 guf. 17-19

Maganu gede shaqqille leellinsheemmoha ikkiro, dadillino manni ninke widoonni huuccattonsara dawaro afiꞌrara dandaanno. (2 Qor. 1:3-6) Ikkirono ayyaanaamittete roduuwikki guuntete xeꞌne noonsare ikkitinota deꞌooti. Ayyaanaamittete roduuwikkira gara ikkitino lao heedhohe. Soꞌro loosa dihasiissannonsa yite heda gara diꞌꞌikkitino. (Ros. 7:21, 22) Yihowa soqqamaasinesiwiinni quwa sainore agadhannokkita qaagi. Ninkeno isi lawishsha harunsineemmoha ikkiro, kuꞌu kuꞌuyita guuntete xeꞌne duqqine heeꞌra dandiineemmo. (Efe. 4:2, 32) Tidhinore assitinokkihu gede assine coyiꞌra agurre, assitanni noorira galata hasiissannonke. Tini jawaachishshansara dandiitanno. Wodaninni galata, woloota dhaabbanno; hattono qullaawa soqqanshonsanni hagiidhitanno gede assitanno. Roduuwanke wolootu ledo heewisiisa agurre galanteemmonsaha ikkiro, jawaattanno.—Gal. 6:4. w18.09 16 guf. 16-17

Yesuusira, Maganu fajjo wonsha sagalete gedeeti. Hiittoonni? Unto ikkitanno sagale sagaꞌla hagiirsiissannonke, hattono maqee lexxineemmo gede assitara dandiitanno; hatteente gede, Maganu fajjo wonshanke jawaanteemmonna ammananke kaajjitanno gede assitanno. Yihowa biddishsha harunsa hayyote. (Yai. 3:13) Hayyo afiꞌrate sharrama kiissanno. Hayyote “ledo taashshinanniri mitturi nafa dino.” Hayyo “heeshsho uyitanno; ise cuꞌmirinohu baꞌraaꞌrinoho.” (Law. 3:13-18) Yesuusi togo yiino: “Konne coye affinoonni; affinoonniha assitiniro maassantinanni.” (Yoh. 13:17) Yesuusi rosaano, isi rosiisinonsare harunsa agura hooggu geeshsha hagiirrinsa geedonniha ikkanno. Insa Yesuusi rosonna lawishsha mitte higge calla ikkikkinni heeshshonsa diro woꞌma harunsa hasiissannonsa. w18.09 4 guf. 4-5

Maganu, Addaaminna Heewani wolootu daafira heda hasiissannonsata leellishanno biddishsha uyinonsahu insa Edenete kaashshu basera callootinsa heeꞌreennaati. Yihowa Addaaminna Heewani maassiꞌrinonsa; hattono ilte ilante uulla woꞌmitanno gedenna gashshitanno gede kulinonsa. (Kal. 1:28) Kalaqaanchinke kalaqamisi daafira hedannonte gede, Addaaminna Heewanino sirchinsa hagiirraamma ikkanno gede kaaꞌlannore assa hasiissannonsa. Maganu Addaaminna Heewani maate woꞌma uulla gannate assate buusante loossara hasiꞌranno. Kuni shaaꞌꞌa looso diꞌꞌikkino. Guuta ikkino manni uulla woꞌma Gannate assatenna Yihowa hedo wonshate isi ledo loosa hasiissannonsa; hatto assituro Maganu fooliishshowa ea dandiitanno. (Ibi. 4:11) Hanni kuni loosi mageeshshi geeshsha hagiirsiisannoha ikkinoro hedi! Uminsa horo agurte wolootaho hedansa, Maganu atoote afidhannonna hagiirraamma ikkitanno gede assitannonsa. w18.08 18 guf. 2; 19-20 guf. 8-9

Wolootu ate daafira gara ikkinokkire coyidhe suꞌmakkilla huntu? Yesuusiranna cuuaanchu Yohaannisira togoo fonqoli iillinonsa. (Mat. 11:18, 19) Yesuusi suꞌmasi hunni yannara maa assino? Isi suꞌmasi hunnoonnitera heewisamanni yannasinna wolqasi diguxxino. Hatteentenni mannu isi assinorenna rosiisinore lae isi daafira halaale ikkinore afanno gede jawaachishino. Yesuusi yiino garinni, “Egennote halaalaanchimma gumisenni leeltanno.” (Mat. 11:19.) Yesuusi lawishshinni kaajja roso ronseemmo. Mito woyite mannu ninke daafira gara ikkinokkire coyiꞌrara woy mishankera dandaanno. Tenne yannara iillitinonke miico biddi assate woy baino suꞌmanke seekkate sharrammeemmoha ikkara dandaanno. Ikkollana assa dandiineemmohu wolu woyyino coyi no. Mittu manchi ninke daafira kapho halashshiro, heeꞌneemmo heeshshonni wolootu isi coyiꞌrinori kapho ikkinota affanno gede assa dandiineemmo. Yesuusi lawishshi leellishanno garinni danchu akati heeꞌrinkero, tini mannu ninke daafira coyiꞌranno kapho hayishshite hooltara dandiitanno. w18.08 6 guf. 11-13

Qullaawu Maxaafi Qaaeeli, Selemooninna Siina Ilaalira noo Israeele hajajama hoogansanni mitto assannonsari noota kulanno. Sasente xaggera kulloonni manna, “Aagintaabbine Maganunniwa higge” yinoonninsa. (Soq. 3:19) Ee, Yihowa soqqamaasinesi gara ikkinokkire assituro rahe hexxo mudhe diagurannonsa. Yihowa Aaroonira gatona yiinosi. Yannankera Yihowa Qullaawu Maxaafi xagge, Qullaawu Maxaafi aana xintantino borronna ayyaanaamittete roduuwi widoonni qorowisiisankera dandaanno. Konne qorowishsha harunsineemmoha ikkiro, Yihowa gatona yaannonketa kule qaale einonke. Yihowa gatona yaannonkehu mulla diꞌꞌikkino. (2 Qor. 6:1) Tini elto “ammana giwanna maalu yorto” agurreemmo faro fantannonke. (Tit. 2:11-14) ‘Tenne alamera heeꞌnoommo’ geeshsha Yihowa woꞌmu wodaninni magansiꞌneemmokki gede guficho ikkannori tuncu yaannonketi egennantinote. Konni daafira ayewoteno Yihowa wido ikkate murciꞌno. w18.07 21 guf. 20-21

Alame naaddankera ikkikkinni Yihowa albaanni egennamate noonke hasatto kaajjitanno gede assiꞌra dandiineemmohu hiittoonniiti? Hatto assate, lame qara coye qaaga hasiissannonke. Umihunni, Yihowa isira ammanante soqqantannore woꞌmante yannara naadanno. (Ibi. 6:10; 11:6) Isi ‘halaalaancho yoo yaannoha’ ikkino daafira, ammanantino soqqamaanosi mitto mittonka naadikki disaꞌꞌanno. Yihowa “keeraanote doogo egennino”; hattono gatisannonsa gara afino. (Far. 1:6; 2 Phe. 2:9) Layinkihunni, Yihowa ninke hendoommokki garinni naadankera dandaanno. Leellamate calla yite mannaho dancha coye assitannori Yihowawiinni mittoreno afidhannokkita kulloonninsa. Mayira? Korkaatuno insa loosinsa guma adhite kaꞌino. (Mat. 6:1-5) Ikkollana Yesuusi wole manna kaaꞌlannore assitinoha ikkirono mannu lainonsakkire Annisi ‘loosinsa guma aannonsata’ coyiꞌrino. Yihowa togoo assoote laꞌꞌanno, hattono mittu mittunkura loosinsa garinni aannonsa. w18.07 9 guf. 8, 10

Ajuuja laihu gedensaanni, Pheexiroosi Yihowa maa kulasira hasiꞌrinoro afa hooge gurchaawino. Hakkiinni Qornelewoosi soyino manni Pheexiroosiwa dayi. Qullaawu ayyaani Pheexiroosi Qornelewoosiwa haꞌrano gede kulisita isi dayino manni ledo Qornelewoosi minira haꞌrino. Pheexiroosi aana calla lae yoo yaannoha ikkoommero, Qornelewoosi minira dieanno. Yihudu manni insa gaꞌre ikkinokki manni minira horonta dieanno. Ikkina Pheexiroosi manna mulla kae giwate hedo qeele Qornelewoosiwa haꞌrinohu mayiraati? Pheexiroosi haꞌranno gede assitinositi, laino ajuujaatinna qullaawu ayyaani uyinosi biddishshaati. Isi Qornelewoosi coyiꞌrinore macciishshihu gedensaanni qullaawu ayyaaninni togo yee coyiꞌrino: “Halaalinta Maganu manna mallaadannokkita xa buuxoommo. Aye gosano ikkiro Maganu waajjannosihanna dancha loosannoha baxanno.” (Soq. 10:34, 35) Pheexiroosi haarote huwatinori, lowo geeshsha hagiirsiisinosi!

Maganu giwannore assineemmokki gede qorophineemmoti egennantinote. Ikkollana Qullaawu Maxaafi giddo konne assi konne assitooti yine kulloonnikki coyi tuncu yaankera dandaanno. Togoo woyite, Magano hagiirsiisannohu maatiro afa dandiineemmohu hiittoonniiti? Qullaawu Maxaafinni tiianke qajeelsiꞌnummoro dancha doorsha doodha dandiineemmo. Yihowa baxannonke daafira, tiianke qajeelsiꞌneemmo gede xintu seera uyinonke. Isi togo yiino: “Woyyannoꞌnere rosiiseemmoꞌnehunna, hadhinanni doogo kuleemmoꞌnehu Maganiꞌne Kaaliiqi aneeti.” (Isa. 48:17, 18) Qullaawu Maxaafi giddo nooha xintu seera seekkine hiincineemmoha ikkiro, tiianke qajeelsiꞌranna biddi assiꞌra dandiineemmo. Tini qolte dancha doorsha doodhineemmo gede kaaꞌlitannonke. Xintu seeri gara ikkinore hendeemmo gedenna dancha doorsha doodhineemmo gede kaaꞌlannonke halaaleeti. Xintu seera huwata Yihowa hedo anfeemmo gedenna higge uyinonkehu mayiraatiro huwanteemmo gede kaaꞌlitannonke. w18.06 17 guf. 5; 18 guf. 8-10

Tenne hajo kayisinohu “Heeroodiisi manni” Yesuusi giwire baata dihasiissanno yiiro, mannu Roomu gashshootira finqilanno gede assino yee kassasate hedinoha ikkara dandaanno. Hattono Yesuusi giwire baata hasiissanno yiiro, mannu iso harunsa agurara dandaanno. Yesuusi qaraxu hajora anga wodha dihasiꞌrino. Yesuusi batinye qaraxaasine mannuwiinni lowo woxe hanaaqqe adhitannota afino. Ikkirono, isi tenne aana diꞌꞌillachishino. Hatteentenni mannu ooso qarra baala huntannote Maganu Mangiste aana illachishino. Konni garinni isi harunsaanosi baalate dancha lawishsha ikkino. Yesuusi harunsaano mite poletiku gaamo assitannori dancha lawinsaro nafa, poletikaho karsama dihasiissannonsa. Kiristaanu Maganu Mangistenna keeraanchimmasi balaxisiisanno. Konni daafira, poletiku gashshooti taashsho xeꞌinore assino yine insa daafira gara ikkinokkire dicoyiꞌneemmo. (Mat. 6:33) Batinye Yihowa Farciꞌraasine alba poletikaho noonsata gara ikkitinokki lao qeela dandiitino. w18.06 6 guf. 9-11

Sheexaanu Yihowara ammanantinokki sokkaasine woshshaadinohu siimu xaadooshshi widoonni calla ikka hoogara dandaanno; isi uullate aana silxaane eemmoꞌne yee qaale einonsaha ikkara dandaanno. Sheexaanu tenne assinohu, daanno yinoonnihu ‘manchote sirchi’ daannokki gede assate hede ikkara dandaanno. (Kal. 3:15) Ikkihano ikkiro, Yihowa Baote Waa abbe Sheexaanunna finqila sokkaasine gantino gano shuffitanno gede assino. Foorrenna naaxxa woshshaado ikkitinota dea dihasiissannonke. Sheexaanu wido ikkitino sokkaasine kiirre tunqannikki diro Yihowara soqqantinoreeti. Insa giddonsa busha yorto rumuxxitara wodhite agurtino. Hatteente gede, Maganu dirijjitete uullaayidi kifile giddo lowo diro soqqammanni keeshshinoommoha ikkara dandaanno. Heeꞌnoommohu ayyaanaamittetenni qullaawa bayicho ikkirono, giddonke busha hedo kalaqantara dandiitanno. (1 Qor. 10:12) Konni daafira, wodananke ganyine layiꞌra, hattono amanyootu maaeellewiinninna gara ikkitinokki naaxxawiinni xeertiꞌra hasiissannonke!—Gal. 5:26; Qol. 3:5. w18.05 25 guf. 11-12

Phaawuloosi Ayihudete manni Maganu Mangiste sokka adha giwino daafira dadillino. Ikkirono isi hexxo mudhe insara farciꞌra diagurino. Hanni isi Roomaho heeꞌranno Kiristaanira borreessino sokka laꞌno; togo yiinonsa: “Wodaniꞌyara nooti lowo halchonna Maganoho shiqishiꞌreemmo huuccatto manniꞌya Israeele gattanno gedeeti. Halaalu egennota ikka hoogginota ikkinnina, insara Maganu laala noonsata aninni farciꞌreemmo.” (Rom. 10:1, 2) Phaawuloosi Ayihudete mannira farciꞌranno gede assitinositi ‘wodanisi giddo noo halcho’ ikkitinota coyiꞌrino. Isi Ayihudete manni gato afiꞌrara halchino. (Rom. 11:13, 14) Isi mittu mittunku Yihudu wido ikkino manchi Maganu Mangiste sokka macciishshe adhanno gede Yihowa huucciꞌrino. Phaawuloosi insara ‘Maganoho laala’ noonsata coyiꞌrino. Phaawuloosi suwashshu wodani noonsa mannira noonsa laala garu egenno aana xintantinota ikkitanno gede assiꞌriro, Kiristoosi harunsaano ikka dandaannota huwatino; isi umisi lawishshi tenne leellishanno. w18.05 13 guf. 4; 15-16 guf. 13-14

Mitti mittinke woloota “hasiisinonsa garinni” jawaachisha dandiineemmo gara heda hasiissannonke. Isayaasi togo yee borreessino: “Daafurtino anguwa jawaachishshe! Leqe leqe yitino gulubba kaajjishshe!” (Isa. 35:3; Ibi. 12:12, 13) Wedelluno ikko ninke baalunku woloota jawaachishannore coyiꞌne mimmito dhaawa dandiineemmo. Phaawuloosi togo yee amaalino: “Mitte hedonni, baxillunni, ayyaanunninna gawalotenni sumuu yitine hagiirreꞌya wonshe. Umoꞌne roorsidhine haafu adawarshinni mittore nafa assitinoonte. Hatteentenni wolu manni kiꞌnenni roorinohu gede assitine hedde. Mittu mittunku woleho woyyannore hedo ikkinnina, umisira woyyannore calla laoonke.”—Fil. 2:2-4. w18.04 22 guf. 10; 23 guf. 12

Yihowa Beettisi Yesuusi widoonni cubbunna reyote borojjimmanni fushshinonkehu heeshshonke woꞌmantenni isira ‘soqqammeemmo’ gedeeti. Maganu uyinonke wolapho garimale horoonsiꞌneemmokkinna galagalle alamete yortora borojje ikkineemmokki gede kaaꞌlannonkehu qaru coyi ayyaanaamittete coye illachishate. (Gal. 5:16) Hanni Nohinna maatesi lawishsha hendo. Insa bushanna maaeela alamera heedhino. Ikkirono qooxeessinsara heeꞌranno manni assannore diassitino. Tennera kaaꞌlinonsari maati? Insa Yihowa uyinonsa looso diinaggaabbe loossino, yaano markaawe seekkitino, uminsaranna saadate sagale gamba assitino, hattono manna qorowisiissino. ‘Nohi Maganu hajajinore baala assino.’ (Kal. 6:22) Togo assansa kaaꞌlitinonsayya? Ee, hatti alame baꞌu yannara Nohinna maatesi gatte saꞌino.—Ibi. 11:7. w18.04 10 guf. 8; 11 guf. 11-12

Sheexaanunna agaaninte “kalqe baala” sorisiisate, poletiku gashshoote calla ikkikkinni, kaphu ammaꞌnonna daddalu dirijjittano horoonsidhanno. (Aju. 12:9) Sheexaanu kaphu ammaꞌno horoonsiꞌre Yihowa daafira kaphu roso halashshanno. Qoleno Daawuloosi dandaamisi deerrinni batinyu manni Maganu suꞌma hawanno gede assate qodhe kaino. (Erm. 23:26, 27) Konninni kainohunni mitu beebbaataamu manni Magano magansiꞌranni nooha lawannansa, agaaninte magansiꞌranni no. (1 Qor. 10:20; 2 Qor. 11:13-15) Sheexaanu kaphosi halashshate daddalu dirijjittano horoonsiꞌranno. Lawishshaho, tini dirijjitta mannaho hagiirraamo ikkate kaaꞌlannohu qaru coyi jiro shorratenna lowo woxe gamba assiꞌrate yite rosiissanno. (Law. 18:11) Mitu manni konne kapho adda assiꞌre Magano agure “woxe” magansiꞌranni no. (Mat. 6:24) Gale hose woxeho noonsa baxilli, Maganoho noonsa baxille qalxe amadanno.—Mat. 13:22; 1 Yoh. 2:15, 16. w18.05 23 guf. 6-7