Woxawaajje

Duucha woyite gambooshshunniwa Yihowanna Yesuusi assitinonkere ronseemmo. Insa leellishshinonke baxillira galata qoꞌlate, barru baala heeshshonkenni Yesuusi lawishsha harunsate sharrammeemmo. (2 Qor. 5:14, 15) Qoleno wodaninke Yihowa wodo uyinonke daafira iso guwisiꞌneemmo gede kakkayisannonke. Yihowa guwisiꞌra dandiineemmo doogga giddo mitte, gambooshshunniwa giddonkenni kaꞌne dawaro qolate. Yihowaranna Yesuusira yine mite coyibba facci asse aguratenni insa mageeshshi geeshsha banxeemmoro leellisha dandiineemmo. Gambooshshe haꞌrate yine duucha woyite babbaxxitino coyibba facci assine agurreemmo. Mite songuwa gambooshshe assidhannohu loosu saate gedensaanni hawarrooti; tenne yannara qole daafursankera dandaanno. Wole gambooshshe assiꞌneemmohu qole wolu manni fooliishshirannohu Qidaame woy Sambatu barraati. Yihowa daafurre heeꞌne nafa gambooshshe haꞌneemmo woyite laꞌꞌanno? Ee laꞌꞌanno! Isinni Yihowa fonqolo ikkannore qeelle gambooshshe haꞌrate sharrameemmo woyite, isira leellinsheemmo baxille roore naadanno.—Maq. 12:41-44. w19.01 29 guf. 12-13

Yesuusi umisira mannu oosora iillanno qarri giddo mitu iillinosi. Lawishshaho Yesuusi lophinohu anga ajjino maate giddo ikkara dandaanno. Isi lossinosi annisi Yooseefi ledo loosi yannara, wolqate loosi mageeshshi geeshsha daafursannoro afino. (Mat. 13:55; Maq. 6:3) Yooseefi reyinohu Yesuusi soqqanshosi gumulara albaanni ikkikki digatino. Konni daafira, shiiro mageeshshi geeshsha xissiissannoro afino. Qoleno babbaxxitino ammaꞌno noonsa maate giddo heeꞌra fonqolo ikkitanno gara afino. (Yoh. 7:5) Kurinna wole coyibba, Yesuusi mannu qarranna hedo huwatanno gede kaaꞌlitinosi. Yesuusi roorenkanni maalale loosi yannara manna mararannoha ikkinota leellishino. Isi maalale loosinohu hatto assa hasiissannoe yee hedino daafira calla diꞌꞌikkino. Hatteentenni isi maalale loosinohu qarramino manna ‘mararino’ daafiraati. (Mat. 20:29-34; Maq. 1:40-42) Yesuusi manna mararino daafira kaaꞌlinonsa.—Maq. 7:32-35; Luq. 7:12-15. w19.03 16 guf. 10-11

Yesuusi uullate aana heeꞌrinoho jeefote hashshaati. Yesuusi mageeshshi geeshsha yaadinoro hedi. Isi reyote geeshsha ammanama ikka? Isi doodhanno doorshi, lowo biliyoone ikkanno manni heeshsho afiꞌranno gede woy hooganno gede assannoho. (Rom. 5:18, 19) Duuchunkunni roore, isinni kainohunni Annisi suꞌmi ayirrara woy mishamara dandaanno. (Iyo. 2:4) Hakkiinni, isi soqqamaasinesi ledo jeefote hurbaate itanni heeꞌreenna, insa “Baalunkunni roorannohu ayeti?” yitanni “insa insanaawa yekkeerantu.” Ikkollana Yesuusi dihanqino; tini dhagge ikkitannote. Hatteentenni isi awu afiinni hasaawisinonsa. Isi shaqqillunni kayinni kaajjishe amaalinonsa. Hakkiinni jeefote geeshsha isiwiinni baxxitinokki daafira galatinonsa. (Luq. 22:24-28; Yoh. 13:1-5, 12-15) Woloota koffi assannore coyiꞌneemmonna assineemmo woyiti noota qaangeemmoha ikkiro, yaachishannori iillannonke yannara nafa joongille leellinshe, Yesuusi lawishsha harunsa dandiineemmo. (Law. 12:18; Yai. 3:2, 5) Qoleno wolootunnita dancha akatta qummi assine galatate sharrammo.—Efe. 4:29. w19.02 11-12 guf. 16-17

Muse Seeri mitto mancho beebba kassansannikki gede assanno. Mittu manchi kassansisiro ayi kassasinosiro afate qoosso noosi. (Mar. 19:16-19; 25:1) Hattono hunino yine yoo yinasira albaanni ajayi ajeenna lame naqaashe farciꞌra hasiissannonsa. (Mar. 17:6; 19:15) Mittu Israeelaawichi loosino jaddo mittu manchi calla lainoha ikkirona? Togoo manchi qorichunni gateemmo yee heda dihasiissannosi. Assinore Yihowa laino. Ee, Yihowa taashsho lainohunni baalunkunni roore lawishsha ikkinonke; isi taashsho xeꞌino coye horo diassanno. Yihowa biddishshasi ayirrissannore maassiꞌranno; silxaanensa garimale horoonsidhannore kayinni qorichishanno. (2 Sam. 22:21-23; Hiz. 9:9, 10) Mitu manni busha coye asse qorichishamikki gatinoha lawansara dandaanno; ikkollana Yihowa yannasira togoo mannira yoo yaanno. (Law. 28:13) Insa maaro ea hoogguro, “heeshshote Magani anga rabbannita” ikkitinota huwatansa digattanno.—Ibi. 10:30, 31. w19.02 23-24 guf. 20-21

Muse biddishsha afiꞌrate Yihowawa hige laino. Isi “Illete leellannokki Magano afinohu gede asse hede noowa kaajje” heeꞌrino. (Ibi. 11:24-27) Israeele Gibitsetenni fultuhunni lamu agani gedensaanni, Siina Ilaala nafa iillitukki qarru kalaqamino. Israeelete manni waa hooge xiixamino. Hattono Musera gunguma hanafino; coyi bushanni haꞌrita Muse, “Kinchunni gante shitaeraatina konne manna hiisso?” yee Yihowawa hige raarino. (Ful. 17:4) Yihowa Musera biddishsha uyinosi. Siqqo haaꞌre Korebi yinanniwa noo kincho ganiro wayi dhoohe fulannota kulinosi. Qullaawu Maxaafi “Muse Israeelete geerri laꞌꞌanna Kaaliiqi yiinosi gede assi” yaanno. Israeele waa kassi yita geeshsha aggino; konni garinni kalaqamino qarra tirroonni.—Ful. 17:5, 6. w18.07 13 guf. 4-5

Yihowa baxillunni dhaawannonke doogga giddo mitte Kiristaanu songo widoonniiti. Roduuwinkera baxille leellinsheemmoha ikkiro, Yihowa banxeemmota leellinsheemmo. Roduuwanke ayyaanaamittensa kaajjitanno gedenna Yihowa baxannonsata huwattanno gede kaaꞌla dandiineemmo. (1 Yoh. 4:19-21) Soqqamaasinchu Phaawuloosi Kiristaana togo yee jawaachishino: “Xa assitinanni heedhinoonninte gede, mimmitoꞌne jawaachishshenna dhaabbe.” (1 Tes. 5:11) Ee, cimeeyye calla ikkikkinni songote giddo noohu baalu Yihowanna Yesuusi gede roduuwa sheshifachishanna dhaawa dandaanno. (Rom. 15:1, 2) Songote giddo quwa saꞌino yaaddo noonsarira hikkiminnu kaaꞌlo hasiissannonsaha ikkara dandaanno. (Luq. 5:31) Cimeeyyenna songote giddo noori wolu roduuwi insaneeto dokiteru gede assite dilaꞌanno. Ikkirono, songote giddo noori baalu yaaddinore ‘jawaachisha, wolqiweeloota kaaꞌlanna manna baala’ cinca dandiitanno.—1 Tes. 5:14. w18.09 14 guf. 10-11

Yihowara noonke ammana kaajjishiꞌra dandiineemmohu isi daafira roore afatenniiti. Maganu daafira rosa dandiineemmoti qara doogo, Qullaawa Maxaafa seekke nabbawatenna nabbamboommore hiincate. Qullaawu Maxaafi giddo Yihowa konni albaanni dagasi agarinohu ma garinniitiro kultannoti addaxxinanni dhagge no. Tini dhagge, yannankerano Yihowa agarannonketa addaxxineemmo gede assitannonke. Isayaasi, Yihowa agarannonkehu ma garinniitiro leellishannoha dancha lawishsha horoonsiꞌrino. Isi, Yihowa allaalaanchu gede, soqqamaasinesi kayinni wiliiꞌlu gede asse coyiꞌrino. Isayaasi Yihowa daafira coyiꞌranni togo yiino: “Allaalaanchu hoshshasi towaatanno; wiliiꞌle isiwa gamba asse hanqafanno.” (Isa. 40:11) Yihowa wolqaataame angasinni hanqafe noonketa hendeemmo woyite diwaajjineemmo, hattono wodanaaꞌmineemmo. Aye geeshshi qarri iilliherono masattokki gede kaaꞌlitannohe gede techohu barru qummeeshshira noota tenne sheshifachishshanno qaalla hiinci. Korkaatuno albillitte iillannohe qarra qeelatto gede jawaante ikkitannohe. w19.01 7 guf. 17-18

Wonshiꞌrate heddinoonni mixo nooꞌne? Barru baala mito Qullaawu Maxaafi gafa nabbawate mixo fushshidhinoonniha ikkara dandaanno. Woy qole coyiꞌratenna rosiisate dandooꞌne woyyeessiꞌrate sharrantinanni heedhinoonniha ikkara dandaanno. Mixoꞌne ikkitutano ikkituro, dancha guma afidhinanni woyite woy wolootu sharrantinanni sharro naaddanno woyite mayi macciishshamannoꞌne? Tenne yannara tashshi yaannoꞌneti egennantinote! Tennera hagiidhaꞌne garankolla; korkaatuno Yesuusi gede umiꞌne fajjo ikkikkinni Maganu fajjo balaxisiissinanni heedhinoonni. (Far. 40:8; Law. 27:11) Ayyaanaamittete mixoꞌne wonshiꞌrate sharramaꞌne harshammo afidhinanni gede assitannoꞌne; korkaatuno loossinanni loosi mullawa digatanno. Soqqamaasinchu Phaawuloosi togo yee borreessino: “Roduuwaꞌya, Mootichaho soqqantinanni daafurtinoonni daafuri mullawa gatannokkita affinoonnina, Mootichu looso woꞌmanka woyite agurtinikkinni kaajjitine loosate hixamanye!” (1 Qor. 15:58) Alamete mixo harunsanna lowo deerra iillate sharrama hagiirsiissannota labburono nafa, togoorira sharrammanni sharro galte hosse mullawa gattanno.—Luq. 9:25. w18.12 22 guf. 12-13

Daawiti kowiicho mannu ooso Maganu seeri garinni heedhanno yanna daafira coyiꞌranni no. (2 Phe. 3:13) Isayaasi 65:22te “Manniꞌya haqqu gede seeda diro heeꞌranno” yine masaalloonni. Tini, albillitte mannu lowo kume diro heeꞌrannota leellishshanno. Korkaatuno Yohaannisi Ajuuja 21:1-4te garinni, Maganu mannu ooso maassiꞌranno; isi eino qaali giddo mittu ‘reyo diheedhanno’ yaannoho. Addaaminna Heewani Gannatete heeꞌrate qoossonsa huꞌnitinoha ikkirono, Gannate hegerera baꞌe digattanno. Maganu qaale eino garinni isi uullate aana heeꞌranno manna maassiꞌranno. Daawiti qullaawu ayyaaninni, keeraanonna shaqqaddu uulla ragidhannotanna hegerera heedhannota coyiꞌrino. (Far. 37:11) Isayaasi maxaafi giddo noo masaalo gannate ikkitino uullara heeꞌneemmo heeshsho quqquxamme agadhineemmo gede assitannonke. (Isa. 11:6-9; 35:5-10; 65:21-23) Kuni ikkannohu mamarooti? Yesuusi jaddo loosino manchira eino qaali woꞌmanno woyiteeti. (Luq. 23:43) Ee, atino Gannatete heeꞌra dandaatto! w18.12 7 guf. 22-23

Alamete hedowiinni woꞌmunni woꞌma xeertiꞌra dandiineemmoni? Alametenni baxxine heeꞌra didandiineemmo. Mite alamete hedo xoonqe gata dandiineemmokkite. (1 Qor. 5:9, 10) Sabbankeemmo woyite nafa kaphu rosonna ammana macciishshineemmo. Gara ikkitinokki hedowiinni woꞌmunni woma xeertiꞌra dandiineemmokkiha ikkirono, togoo hedo hiincineemmokki woy ammanne adhineemmokki gede qoropha hasiissannonke. Yesuusi gede, ninkeno Sheexaanu hedo ranke giwa hasiissannonke. Qoleno dandiinummo deerrinni alamete hedowiinni xeertiꞌra hasiissannonke. Lawishshaho, jaalla doodhineemmo woyite qoropha hasiissannonke. Qullaawu Maxaafi Magano magansiꞌrannokki manniwa aana agura hoongummoro, insa heddanno garinni heda hananfammora dandiineemmota kule qorowisiisannonke. (Law. 13:20; 1 Qor. 15:12, 32, 33) Hattono suutu soorro, finqille woy maaeelle jawaachishanno boohaarshiwiinni xeertiꞌneemmoha ikkiro, “Maganu egenno” ledo sumuu yitannokki hedo daaffannonkekki gede qorophineemmo.—2 Qor. 10:5. w18.11 21 guf. 16-17

Albinni roore ‘halaalunni heeꞌrate’ murciꞌra dandiineemmohu hiittoonniiti? Mitte doogo dandiitto deerrinni wolootaho Qullaawu Maxaafi halaale rosiisate. Hatto assakki ayyaanaamittete bise ikkinoha “Maganu qaale” seekkite cuꞌmirate kaaꞌlitannohe. (Efe. 6:17) Ninke baalunku “halaalu qaale taashshine coyiꞌrate” yaano rosiisate dandoonke woyyeessiꞌrate sharrama dandiineemmo. (2 Xim. 2:15) Qullaawa Maxaafa horoonsiꞌne wolootaho halaale rosiinseemmo woyite halaale albinni roore huwanteemmo hattono banxeemmo. Konni garinni halaalu giddo qaanfanni heeꞌra dandiineemmo. Halaalu Yihowa uyinonkete muxxe eltooti. Kuni halaali, iimi Anninke ledo jaalooma kalaqiꞌneemmo gede assinonke. Heeshshonke giddo kawiinni saꞌino jiro dino! Yihowa konni kaꞌa rosiisannonkehu lowo coyi no! Isi hegere geeshsha rosiiseemmoꞌne yee qaale eino. Konni daafira halaale fila culkanni roorsite lai. Halaale “afiꞌri ikkinnina huꞌnitooti.”—Law. 23:23. w18.11 8 guf. 2; 12 guf. 15-17

Nohi Baote Wayi daara albaanni sabbakino sokka manna dagganni noo bao daafira kule qorowisiisa ikkitukki digattino. Yesuusi togo yiino: “Hakka waro baote wayi daara albaanni Nohi markaawe ei barri geeshsha, mannu itanninna aganni, adhanninna adhamanni no. Baote wayi daye baalanka fee haaꞌre haꞌra geeshsha diaffino. Manchi Beetti daanno yannano hattoota ikkitanno.” (Mat. 24:38, 39) Mannu adha giwirono, Nohi uyinoonnisita qorowishshu sokka ammaname duduwino. Yannankera, Maganu Mangiste sokka dudumbeemmohu wolootu Yihowa mannu oosora hedinore affanno gedeeti. Ninkeno Yihowa gede mannu kulleemmonsa sokka macciishshe “lubbote heeꞌrara” hasiꞌneemmo. (Hiz. 18:23) Minunni mine haꞌne, hattono lowo manni noowa sabbankeemmo woyite, mulenni Maganu Mangiste dagge tenne busha alame huntannota kulle manna qorowisiinseemmo.—Hiz. 3:18, 19; Dan. 2:44; Aju. 14:6, 7. w18.05 19 guf. 8-9

Heeꞌratto gobbara Maganu Mangiste looso agamboonniha ikkiro, silxaane noonsari roduuwikki daafira xaꞌmo xaꞌmituhero maa assatto? Afoottore baala kula hasiissannoheni? Yesuusi Roomu gashshaanchi qorisi yannara maa assino? Isi “Sammi yaate yanna no; hasaawate yanna no” yaannoha Qullaawu Maxaafiha xintu seera harunsino daafira, sammi yiino yanna no. (Ros. 3:1, 7; Mat. 27:11-14) Ninkerano hattoo coyi iillinkero, roduuwinke gawajjantannokki gede qorophanna hayyoota ikka hasiisannonke. (Law. 10:19; 11:12) Mittu jaalikki woy fiixikki shota ikkinokki cubbo loosinota afoottoha ikkiro ma assatto? ‘Halaale coyiꞌri’ Mittoreno maaxittokkinni cimeeyyete halaale kuli; afoottore shokkishshe kultooti. Cubbo loosino manchi Yihowa ledo noosi jaalooma wirro kaajjishiꞌranno gede kaaꞌlate, insa halaale ikkinore affa hasiissannonsa.—Yai. 5:14, 15. w18.10 10 guf. 17-18

Baxillunni woloota jawaachisha dandiineemmohu hiittoonniiti? Mitte doogo seekkite macciishshineeti. (Yai. 1:19) Hexxo mudhinohura baxille leellisha dandiineemmo doogga giddo mitte, mararrotenni macciishshate. Qarru iillinosi rodii hedo wodanchate shaqqado xaꞌmo xaꞌma dandaatto. Albikki mararattositanna baxattosita leellishannoha ikko. Isi qarrasi lowo yanna hasaaphannoha ikkiro, cincatenni macciishshi; hattono coyiꞌranna mereero eꞌooti. Cincatenni macciishshattoha ikkiro, iillinosi qarra seekkite wodanchatto. Tini qolte qarru iillinosi rodii, ammaꞌnannohe gedenna iso kaaꞌlate coyiꞌrattore macciishshanno gede assitara dandiitanno. Giddokkinni hedattosita leellishattoha ikkiro, baxillu assootikki lowo geeshsha sheshifachishasira dandaanno. w18.09 14 guf. 10; 15 guf. 13

Maganu Mangiste sokka macciishshate, Qullaawa Maxaafanna Qullaawu Maxaafi aana xintantino borro nabbawate, Yihowa Farciꞌraasine ledo Qullaawa Maxaafa xiinxallate, gambooshsheho qixxaawatenna haꞌrate yanna hasiissanno. Kuri coyibba assate hakkeeshshi geeshsha hasiisannokki coye agura hasiissannonke. (Efe. 5:15, 16) Xinta ikkitinota Qullaawu Maxaafita egenno afiꞌrate mageeshshi yanna hasiissannonke? Kuni mannu mannu garinni babbaxxara dandaanno. Yihowa hayyo, doogosinna loosisi daafira ronse guda didandiineemmo. (Rom. 11:33) Umiti Agarooshshu Shae ittime halaale “shiimu awawi” ledo heewisiissanni togo yitino: “Mitto awawa calla afidhine kassi yitinoonte. Mittunni calla kassi yitiniro wolu gate baꞌꞌannoꞌne. Roore gamba assiꞌrate hasiꞌra agurtinoonte.” Hegere geeshsha heeꞌnummoro nafa, Yihowa daafira rosa diagurreemmo. Xaa yannara dhukinke assi geeshsha roore hasiisanno coyiꞌra yaano halaale afiꞌrate yannanke hayyotenni horoonsiꞌneemmo. w18.11 4 guf. 7

Qullaawu Maxaafi minaanni minaamasi ledo ‘wodanchatenni heeꞌra’ yaano minaamasira hedanna shaqqille leellisha hasiissannosita kulanno. (1 Phe. 3:7) Minaamasira hedanno minaanni, duucha doogonni minaamasiwiinni baxxinoha ikkinota afino; ikkirono, isi minaamasi woffi asse dilaꞌꞌanno. (Kal. 2:18) Konni daafira isera hedannota leellishanno, hattono ayirrisannose. Minaamasira hedanno minaanni, wole meyatera gara ikkinokki baxille dileellishanno. Qoleno dagoomittete webisayite widoonni gara ikkinokkire diassanno. (Iyo. 31:1) Minaamasira ammanamannohu baxannose daafira calla ikkikkinni Magano baxannonna bushare giwanno daafiraati.—Far. 19:14; Amo. 5:15. w18.09 29 guf. 3-4

Maganu Qaalinni ronsoommore harunsa shota ikkitinokkihu mayiraati? Gara ikkinore assate, ninkeneeto heeshshi assa hasiissanno daafiraati. Heeꞌnoommohu “goofimarchu barra” ikkino daafira ninkeneeto heeshshi assa shota ikka hooggankera dandiitanno; korkaatuno batinyu manni ‘umonsa baxannoho, woxe baxannoho, naaxxaleessaho, booꞌnaleessaho, hattono umonsa qeeꞌlannokkiho.’ (2 Xim. 3:1-3) Maganu soqqamaano ikkinoommo daafira, togoo akatta busha ikkitinota anfoommo; ikkirono mito woyite togoo akatta noonsa mannira qiniinonsaha lawankera dandaanno. (Far. 37:1; 73:3) Mittu manchi togo yee hedara dandaanno: ‘Umiꞌya hasatto agure wolootunnita balaxisiisa hasiissannoe? Aneneeto “woꞌmunkura woriidihu” gede asse laummoro ayirrinye hoogammo ikka?’ Alamete aana noo manni gede umonke calla banxeemmoha ikkiro, songote giddo roduuwinke ledo noonke aante baꞌaranna Kiristaana ikkinoommoti wolootaho leella hooggara dandiitanno. Qullaawu Maxaafi giddo noohu dancha lawishsha ikkanno manni xagge xiinxallankenna insa faale haꞌranke kiissannonke. w18.09 3 guf. 1

Yihowa kalaqa hanafara albaanni callisi heeꞌrinoha ikkirono, isi wolootaho heeshsho aa hasiꞌrino daafira iimanna uulla hedate dandoo noonsare kalaqino. “Hagiirraamu Magani” Yihowa, wolootaho dancha coye aa baxanno. (1 Xim. 1:11, NW; Yai. 1:17) Qoleno isi hagiirraamma ikkinammora hasiꞌranno daafira, wolootaho shaqqille leellinsheemmo gede rosiisannonke (Rom. 1:20) Maganu manna danisinni kalaqino. (Kal. 1:27) Hatto yaa, kalaqammoommohu isi akatta leellisha dandiineemmo garinniiti yaate. Konni daafira, hagiirrunna harshammo noo heeshsho heeꞌrate, Yihowa gede wolootaho danchummanna shaqqille leellisha hasiissannonke. (Fil. 2:3, 4; Yai. 1:5) Hatto yineemmohu mayiraati? Korkaatuno, baxillaanchu Magani Yihowa mannu ooso kalaqinohu hakko garinniiti. Guuntete xeꞌne noonkere ikkinummorono, wolootaho shaqqille leellinshe isi lawishsha harunsa dandiineemmo. Yihowa mannu ooso isi lawishsha harunsitara hasiꞌranno; konni daafira ninke wolootaho shaqqille leellinsheemmo woyite isi hagiidhanno.—Efe. 5:1. w18.08 18 guf. 1-2; 19 guf. 4

Yesuusi harunsaano isi huuro macciishshitannohu isi rosiisinore wodanaho wodhite calla ikkikkinni isi rosiisinore harunsiteeti. Isi harunsaano ‘tenne alame heeshshora yaaddanni’ hedonsa billaallitanno gede diassidhanno. (Luq. 21:34) Hatteentenni, insa qarru iillannonsa yannara nafa, heeshshonsa giddo Yesuusi hajajo balaxisiissanno. Iillannonsa fonqoli ikki geeshshiha ikkirono, roduuwinke Yihowara ammanantino. Yesuusa macciishsha dandiineemmoti wole doogo, Maganu manni mereero albisa ikkite soqqantanno gede shoommoonni roduuwi ledo buusame loosate. (Ibi. 13:7, 17) Maganu dirijjite muli diri kawa lowo coye woyyeessitino; lawishshaho, soqqanshote horoonsiꞌneemmo hayyonna uduunnicho, lamalate gambooshshe, Gambooshshu Addaraashuwa minaanninna gatamarranni gara woyyeessinoonni. Yihowa dirijjite baxillunninna seekkite hedde uyitannonke biddishsha lowo geeshsha naandeemmo! Yihowa dirijjitesi uyitannonke biddishsha harunsate sharrammeemmo sharro maassiꞌrannota dihuluullammeemmo. w19.03 10-11 guf. 11-12

Shiima halaale calla amaddino odoo woꞌmunni woꞌma soꞌrisiissara dandiitanno. Hanni Iyyaasu waro Yordaanoosi Lagira galchimaanni heedhanno Israeelera iillinonsare laꞌno. (Iya. 22:9-34) Insa soojjaatoonni heedhanno Israeele jawa kakkallanni bayicho seekkidhinota macciishshitino. Tini odoo soꞌro diafidhino. Yordaanoosi Lagira galchimaanni heedhanno Israeele tenne xea mashalaqqe adhite roduuwinsa Yihowara finqiltinohu gede assite heddino. (Iya. 22:9-12) Ikkollana insa ola hanaffara albaanni, coye buuxxanno gede ammanamino labballo sokkino. Ikkina halaalu xawo fuliyya? Kakkallanni bayicho qixxeessitinohu qaagooshshehooti ikkinnina kakkalo kakkalate diꞌꞌikkino. Insa konne bayicho seekkitinohu Yihowara ammanante soqqantinota dagganno ilama affanno gedeeti. Galchimaanni noo Israeele woꞌmunni woꞌma adda ikkitinokki odoo macciishshite roduuwansa digawajjitino; hatteentenni insa taxxi yite macciishshitino odoo addahoronna teꞌee buuxxino; hatto assansanni lowo geeshsha hagiidhitinoti dihuluullissannote! w18.08 5 guf. 9-10

Phaawuloosi xawisino garinni, halaalaancho Magano magansidhannori nafa gara ikkinokkire assitara dandiitanno. Fonqolunni qeelante gara ikkinokkire assitinori, xaano Yihowa jaalla ikkite nooha lawansara dandaanno. Ikkollana, mittu manchi Yihowa jaala ikka hasiꞌrino woy ‘Isira ammanamoommo’ yee coyiꞌrino daafira calla Yihowa hagiirsiisa dandaanno yaa diꞌꞌikkino. (1 Qor. 10:1-5) Israeele Muse Siina Ilaala haꞌre keeshsheenna yaaddunte gede, yannankera noo Kiristaanino Yihowahu yoote barrinna haaro alame keeshshitino yee yaadara dandaanno. Qoleno tini hexxo woꞌmitukki keeshshitannohu gede assine hendeemmoha woy woꞌmitannota huluullammeemmoha ikkara dandaanno. Togoo hedo biddi assiꞌra hoongummoro, Yihowa fajjo agurre maalu hasattonke balaxisiinsammora dandiineemmo. Tini qolte sunu sununni Yihowawiinni xeertiꞌneemmo gedenna ammananke kaajjite noo yannara assate nafa hendeemmokkire assineemmo gede assitankera dandiitanno. w18.07 21 guf. 17-18

Yihowa mitto mittonka egenninonke; tini qolte lowo atoote afiꞌneemmo gede assitannonke. Ikkollana Yihowa egennannonke gede maa assa hasiissannonke? Iso baxanna heeshshonke isira sayinse aa hasiissannonke. (1 Qor. 8:3) Ikkollana, iimi Anninke ledo noonke jaaloomi baꞌꞌannokki gede assiꞌrate sharrama hasiissannonke. Phaawuloosi sokka borreessinonsahu Galaatiyaho heeꞌranno Kiristaani gede ‘wolqiweelunna tidhinokkihu’ alamete coyiꞌra borojje ikkineemmokki gede qoropha hasiissannonke; kuri giddo mitte mannu naadankera hasiꞌrate. (Gal. 4:9) Kuri umi xibbi diri Kiristaani Maganu albaanni egennama dandiino. Ikkollana Phaawuloosi coyiꞌrino garinni kuri roduuwi giddo mitu alba agurtino coyiwa ‘galagalte higgino.’ Phaawuloosi ‘Lophitine kageeshsha iillitini gedensaanni, agurtine dagginoonnihu tidhinokki coyiwa mayira higginanni?’ yiinonsahu gedeeti. w18.07 8 guf. 5-6

Maganu higge diingummoro iillannonke qarra afate uminke qarramme rosa dihasiissannonke. Maganu Qaali giddo kulloonni manni loosino cubbinni rosa dandiineemmo. Baalunkunni rooranno biddishsha afiꞌneemmohu Maganuwiinniiti; konni daafira Qullaawu Maxaafi giddo noo manni xagge nabbawanna hiinca hasiissannonke. Lawishshaho, Moote Daawiti Bersaabehi ledo foore Maganu higge diigi woyite iillinosi qarra hedi. (2 Sam. 12:7-14) Tenne xagge nabbambeemmonna hiincineemmo woyite ninkeneeto togo yine xaꞌma dandiineemmo: ‘Moote Daawiti togoo qarri giddo uwannokki gede maa assannohu baino? Anerano togoo fonqoli iillannoe woyite maa asseemmo? Togoo fonqoli iillannoe woyite Yooseefi gede xooqeemmonso Daawiti gede fonqolu giddo uweemmo?’ (Kal. 39:11-15) Cubbo loonsummoro daanno qarra hiincanke ‘busha coye giwate’ murciꞌneemmo gede kaaꞌlitannonke.—Amo. 5:15. w18.06 17 guf. 5, 7

Duucha woyite mannu qooxeessinsara taashshote xeꞌne laꞌꞌanno woyite, poletiku gashshootira finqilanno. Yesuusi uullate noo yannara, giwiru hajo mannu gashshooteho finqilanno gede assitino. Yesuusi qaraxu daafira kulinonsare macciishshino manni jajjaho, baattotenna mineho giwire baatanno. Qaraxaasine lowo woxe hanaaqqe adhitanni manna gadadissino. Hatte yannara qaraxaasine, silxaane noonsarira woxe uyite mannuwiinni lowo woxe gamba assidhanno. Iyyaarkote heeꞌrannohu Zekkiyoosi yinannihu qaraxaasinete roorrichi, mannuwiinni woxe hanaaqe adhe durooꞌmino. (Luq. 19:2, 8) Hatte yannara isi gedeehu batinyu manni nooha ikkara dandaanno. Yesuusi diinna isi qaraxu hajora anga wodhanno gede assate woꞌnaaltino. Insa iso ‘giwiru’ daafira xaꞌmitino; giwiru Roomu gashshootira baantanniho mitte diinaare ikkanno woxeeti. (Mat. 22:16-18) Yihudu manni, Roomu kade gashshinonsata qaaganno gede assannonsa daafira, giwire baata dibaxanno. w18.06 5-6 guf. 8-10

Sheexaanu wido ikka ayewoteno gawajjitannote; isiwiinni afiꞌnanniti addu horo dino. (Iyo. 21:7-17; Gal. 6:8) Sheexaanu wolqa mageeshshitero afanke maaho kaaꞌlitannonke? Tenne afanke, uullate gashshaanora gara ikkitino lao heedhannonkenna sabbakate looso loonseemmo gede kakkayissannonke. Yihowa, silxaane noonsare ayirrinsammora hasiꞌranno. (1 Phe. 2:17) Qoleno, Maganu seera diingeemmo gede assannonkeha ikka hoogi geeshsha, mannu ooso fushshitino seerira hajajammammora hasiꞌranno. (Rom. 13:1-4) Ikkollana, poletiku coyira anga wodha, yaano mitte poletiku paarte woy gashshaancho woluwiinni roorsine laꞌꞌa hasiissannonkekkita deꞌnoonke. (Yoh. 17:15, 16; 18:36) Qoleno Sheexaanu mannu Maganu suꞌma afannokkinna suꞌmisi mishamanno gede assate sharramannota anfoommo daafira, mannaho Maganu daafira halaale ikkinore rosiinseemmo. Yihowa Farciꞌraasine ikkankenninna suꞌmasi woshshankenni tashshi yaannonke; korkaatuno Yihowa baxatenni afiꞌnanni atooti woxe baxatenni afiꞌnannirinni roorinoha ikkinota anfoommo.—Isa. 43:10; 1 Xim. 6:6-10. w18.05 24 guf. 8-9

Minaanninna minaama galtensa mereero qarru kalaqamanno woyite insa babbaxxe heeꞌra dandaanno? Qullaawu Maxaafi babbaxxinanni gede assannore tittire dikulanno. Phaawuloosi togo yiino: “Ammanaanchote ammaninokki minaanni heeꞌrisero, isi ledose heeꞌra baxiro, iseno iso agurtoonke.” (1 Qor. 7:12, 13) Kuni biddishshi yannankerano loosanno. Ikkollana mito woyite “ammaninokki minaanni” “ledose heeꞌra” hasiꞌra hoogara dandaanno. Ise lubbosera waajjitanno deerra gane gawajjannoseha ikkara dandaanno. Woy qole minaannise maatete hasiisannore shiqisha giwannoha woy ayyaanaamittese gawajjannore assannoha ikkara dandaanno. Hattoo yannara, mitte Kiristaancho ikkitino minaama minaannise baxire yiirono ‘ledose heeꞌra baxinokki’ daafira babbaxxe heeꞌra doodhitara dandiitanno. Mitu Kiristaani kayinni togoori iillinonsaha ikkirono galtensawiinni baxxa hoogate doodhino; insa kaajje heeꞌratenna galtensa kaajjishiꞌrate sharramanno. w18.12 13 guf. 14, 16; 14 guf. 17

Wixa wixara fulino manchi daafira kulannohu Luqaasi 8:5-8, 11-15 noo lawishshira kulloonni wixi “Maganu Qaaleeti” woy Maganu Mangiste sokkaati. Bushshu mannu oosoha lawishshu wodana riqiwanno. Shaqqadu bushshira uwino wixi, rumuxxe murino, hattono “lophe xibbe ero laalino.” Yesuusi lawishshu giddo kulinohu shaqqadu bushshi wixaho injiinte gede, ninkeno Maganu Mangiste sokka macciishshine wodaninkera wodhinoommo. Kuni Maganu Mangiste wixi wodaninke giddo rumuxxe, lawishshu yaattonni muro ikkino; tini muro galte hosse guma laalate iillitino. Sindete muro guma amaddanno ikkinnina, wole shiimmaadda muro dimudhanno; hatteente gede mittu Kiristaanchi guma laalino yinannihu haaru manni halaalu minira daanno gede assanno woyite ikkikkinni haaro Maganu Mangiste guma laalanno woyiteeti. Haaro Maganu Mangiste guma laala dandiineemmohu hiittoonniitiyya? Wolu mannira Maganu Mangiste sokka kullummo kiiro, wodaninke giddo winxoonni wixa fushshine winxanni woy halashshinanni heeꞌnoommo yaa dandiinanni. (Luq. 6:45; 8:1) Konni daafira, kuni lawishshi leellishanno garinni, Maganu Mangiste sokka duduwa agura hoongummo geeshsha ‘kaajjine guma laallanni’ heeꞌnoommo. w18.05 14 guf. 10-11

Phaawuloosi roduuwasi jawaachishate calla ikkikkinni, insara ‘woxesi aa agurina isonooto nafa sayise aate’ sumuu yiino. (2 Qor. 12:15) Konni daafira cimeeyye roduuwansa coyidhannorinni calla jawaachishanna sheshifachisha agurte, insara heddannota leellishannore assiteno kaaꞌla hasiissannonsa. (1 Qor. 14:3) Woloota jawaachishate amaale aa hasiissanno woti heeꞌrara dandaanno; tenne yannarano cimeeyye woloota jawaachishanno garinni amaala dandiinanni gara afate Qullaawu Maxaafi biddishsha harunsa hasiissannonsa. Yesuusi Kiristoosi reyotenni kai gedensaanni uyino amaale tennera kaaꞌlitannonsa. Hanni isi Shiimiidi Iisiyira noo songuwara kaajjado amaale uyi yannara assinore hedi. Isi, Efesooni, Phergamooninna Tiyaxiroosi noo songuwa amaalansara albaanni balaxe galatinonsa. (Aju. 2:1-5, 12, 13, 18, 19) Cimeeyyeno woloota amaaltanno yannara Kiristoosi lawishsha harunsa hasiissannonsa. w18.04 22 guf. 8-9

Annuwanna amuuwa, Oosoꞌnera ordu fayyimma agarate dandaamiꞌnere baala assitinanniti egennantinote. Lawishshaho, qae fiidhinanni, oosoꞌneno ikko kiꞌne umoꞌne gawajjara dandaannore mininni fushshitine huntinanni. Hatteente gede, Sheexaanu hedo halashshitanno filme, televizhiinete pirogiraame, elekitiroonikisete godoꞌlenna webisayite oosoꞌne wodana daaffannokki gede agara hasiissannoꞌne. Yihowa oosoꞌne ayyaanaamittete gawajjonni agartinanni gede silxaane uyinoꞌne. (Law. 1:8) Konni daafira, maateꞌne harunsitannoha Qullaawu Maxaafi aana xintamino biddishsha fushsha waajjitinoonte. Qaaqquulliꞌne laꞌꞌa dandiitannorenna dandiitannokkire kullensa; hattono hakko coye hooltinoonninsahu mayiraatiro huwattanno gede kaaꞌlensa. (Mat. 5:37) Qaaqquulliꞌne lophitanni hadhanno woyite, Yihowa biddishsha harunsite danchanna busha uminsanni bada dandiitanno gede qajeelsensa. (Ibi. 5:14) Qoleno oosoꞌne assitinannirinnino lowore rossannota deꞌinoonte.—Mar. 6:6, 7; Rom. 2:21. w19.01 16 guf. 8

Ati wedellicha Kiristaanchootiro geedhino roduuwa kaaꞌlate mayira mixo difushshiꞌratto? Halaalu mine keeshshitino yanna giddo afidhino woꞌnaalsha ayirrinyunni xaꞌma dandaatto. Togo assa jawaachishshannohe, hattono atino geedhino roduuwino halaalu xawaabba xawisate bashshonni roore murcidhinanni gede assitanno. Qoleno ninke baalunku Gambooshshu Addaraashe daanno manna baala faasiinqe keere haaꞌrate sharrama dandiineemmo. Qanchu soqqansho gambooshshe massagatto gede worrihero geerra kaaꞌlate lowore assa dandaatto. Geerraho injaannohu soqqanshote qoqqowi hiikkonneetiro buuxi. Mito woyite, fayyimmate woy wolu qarri noonsa roduuwa wedellu roduuwi ledo soqqantanno gede assa dandaatto. Hattono togoo roduuwira hedattota leellisha hasiissannohe. Ee, wodanchattohanna mannaho hedattoha ikkakki wedelluno, geerruno, halaalu mine keeshshitinorino, hattono mule halaalu minira dagginori dancha duduwo diinaggaabbe dudubbanno gede kaaꞌlitannonsa.—Lew. 19:32. w18.06 23-24 guf. 10-12

Yihowa cubbunna reyote borojjimmanni keere fushshinonke daafira Iso galaxxa hasiissannonke. Wodote kakkalo Maganinkera keeraanchu tiiꞌꞌinni hagiirrunni soqqama dandiineemmo faro fantinonke. (Far. 40:8) Yihowa galaxxano agurranna, isi uyinonke wolapho garimale horoonsiꞌneemmokki gedeno qoropha hasiissannonke. Soqqamaasinchu Pheexiroosi afiꞌnoommo wolapho maalaamittete hasattonke wonshiꞌrate horoonsiꞌra hasiissannonkekkita kule qorowisiisino. Pheexiroosi coyiꞌrinori Israeele halalla heedheenna iillinonsare qaangeemmo gede assannonke. Kuni qorowishshi xaa yannara noo Kiristaanirano kaaꞌlanno; korkaatuno hakkawarinni roore fonqolu batiꞌrinohu yannankeraati. Sheexaanunna alamesi uddiꞌnannirinna seensannirinni, intannirinna angannirinni, hattono boohaarrannirinni doggankera woꞌnaaltanno. Egensiishsha qixxeessitannori duucha yannara xuma manna horoonsidhe lowoha hasiisannonkekki coye hasiisannonkeri gede assite shiqishshanno. Qoropha hoongummoro kuri coyibba doggankeranna wolaphonke garimale horoonsiꞌneemmo gede assitankera dandiitanno! w18.04 10 guf. 7-8