Maaja

Heeꞌnoommohu ‘qarrissannote goofimarchu yannaraati’; konnira barru fuleennanke uullate aana addu keeri woꞌma geeshsha heeshsho qarru woꞌminota ikkitanni hadhannoti egennantinote. (2 Xim. 3:1) Konni daafira ninkeneeto, ‘Kaaꞌlonna biddishsha afiꞌrate ayewa hige laeemmo?’ yine xaꞌma hasiissannonke. Lowo xibbi diri albaanni, faarsaasinchu Yihowa kaaꞌlo afiꞌrate Isiwa hinge laꞌꞌa hasiissannonketa xawisino. (Far. 123:1-4) Ninke Yihowawa hinge laꞌneemmo gara, soqqamaanchu mootichasi laꞌꞌanno gari ledo taashshino. Faarsaasinchu hatto yaasi mayyaate? Soqqamaanchu mootichisiwa hige laꞌꞌannohu itannorenna agarooshshe afiꞌrate calla diꞌꞌikkino; hatteentenni mootichisi maa hasiꞌrannoro wodanche isi hasiꞌrannore assateeti. Hatteente gede, ninkeno Yihowa maa assinammora hasiꞌrannoro afate, Qaalesi barru baala xiinxallanna, aannonke biddishsha harunsa hasiissannonke. Yihowa kaaꞌlo hasiissannonke yannara kaaꞌlannonkehu, hatto assinummoro callaati. w18.07 12 guf. 1-2

Yesuusi ‘cubbu borojjimmanni’ wolaphate daafira coyiꞌranni no; tini borojjimma xaa geeshsha mannu ooso amaddino borojjimma baalante giddo roore bushaati. (Yoh. 8:34) Cubbu bushare assineemmo gede xixxiiwannonkeha calla ikkikkinni, dancha ikkinota anfoommore assineemmokki gede guficho ikkannonke. Konnira ninke cubbu borojjeeti yaa dandiinanni; qoleno cubbu qarrammeemmo, shenteemmo, hattono jeefote reyineemmo gede assannonke. (Rom. 6:23) Addaaminna Heewani afidhe kaꞌe huꞌnitinota addu wolapho afiꞌra dandiineemmohu xaxxawe amadinonke cubbinni wolaphinummoro callaati. Yesuusi “rosiisoommoꞌne coye agadhitiniro” yaasi, isi wolassankera hasiꞌnummoro assa hasiissannonkeri noota leellishshanno. (Yoh. 8:31) Heeshshonke Yihowara sayinse uyinummo woyite, ninkeneeto kaandoommo, hattono Yesuusi rosaano ikkine isi rosi garinni heeꞌrate doodhinoommo. (Mat. 16:24, NW) Yesuusi qaale einonke garinni wodote kakkalosi woꞌmunni woꞌma loosu aana hossanno woyite addu wolapho afiꞌneemmo. w18.04 7 guf. 14-16

Yihowa soqqamaanosi sodhino woyiti nooha ikkirono mararinonsa. Hanni Yoonaasi lawishsha laꞌno. Yihowa kuni masaalaanchi Nennewete mannira yoote sokka duduwanno gede soyino. Nennewete manni maaro eita Maganu insa gatisate hedino. Yoonaasira kayinni tashshi diyiinosi. Isi Nennewe baꞌanno yee masaalino masaalo woꞌmitinokki daafira, ‘lowo geeshsha giiramino.’ Ikkollana Yihowa Yoonaasi cincino; hattono hedosi biddi assiꞌranno gede kaaꞌlinosi. (Yon. 3:10–4:11) Yannate gedensaanni Yoonaasi Yihowa rosiisinosire huwatino; wole agurina Yihowa ninkera kaaꞌlitannonke gede tenne dhagge iso horoonsiꞌre borreessiisino. (Rom. 15:4) Yihowa mannisira assinori, isi soqqamaasinesi mararannota addaxxineemmo gede assannonke. Isira ninke mittu mittunku xissonna qarri leellannosi. Isi wodaninkera noore, giddonke noo hedo baalanna dhukanke afino. Qoleno ‘wolqankera aleenni ikkitino jifama iillitankera wore dilaꞌꞌanno.’ (1 Qor. 10:13) Tini hexxo lowo geeshsha sheshifachishshannonke! w19.03 16 guf. 6-7

Muse Seeri hunda shoomantino cimeeyye ayyaanaamittete hajo calla ikkikkinni gibbotenna jaddote ledo xaadooshshe afidhino hajo laꞌanno. Hanni mite lawishshuwa laꞌno. Mittu Israeelaawichi lubbo shiiro bayichonko reyote yoo diyinannisi. Katamu cimeeyye hakko manchira reyote yoo hasiissannoronna teꞌee afate, coye seekkite buuxxanno. (Mar. 19:2-7, 11-13) Qoleno kuri cimeeyye barru baala tuncu yitanno hajo lainohunnino yoo yitanno; tini woxu hajonni kayise minaanninna minaama mereero kaꞌanno gibbo tira ikkitara dandiitanno. (Ful. 21:35; Mar. 22:13-19) Cimeeyye taalo yoo yitannohanna Israeelete daga seera agadhitannoha ikkiro baalunku horo afiꞌranno; hattono tini daga Yihowa ayirranno gede assitanno. (Lew. 20:7, 8; Isa. 48:17) Tini, Yihowa heeshshonke giddo assineemmoha mitto mittonka coye laꞌꞌannota leellishshanno. Wolootu ledo noonke aantenni baxillaanonna taashshineemmore ikkinammora hasiꞌranno. Hattono minenke callootinke heeꞌne coyiꞌneemmoreno ikko assineemmore seekke laꞌꞌanno. w19.02 23 guf. 16-18

Yaachishannori iillannonke woyite jooguulle ikka qarrissankera dandiitanno. Kaajjinshe woy woloota koffi assanno garinni coyiꞌnammora dandiineemmo. Atera togoori iille egenninoheha ikkiro, Yesuusi lawishsha hedakki kaaꞌlitannohe. Yesuusi uullate aana heeꞌrinote jeefote agannara batinyu yaachishanno coyi tuncu yiinosi. Isi shiima yanna gedensaanni lowo qarri iillannositanna shinannisita afino. (Yoh. 3:14, 15; Gal. 3:13) Reyara shiima agannara albaanni, lowo geeshsha yaadinota coyiꞌrino. (Luq. 12:50) Qoleno reyara shiimu barri gate heeꞌreenna “Lubboꞌya shettino” yiino. Yesuusi hatto yee huucciꞌrasi, isi umosi heeshshi assannohanna hajajamannoha ikkinota leellishshanno. (Yoh. 12:27, 28) Yanna iillituta, Yesuusi waajjikkinni heeshshosi Maganu diinnara sayise uyino; hakkiinni insa shetissenna shollishshe shitinosi. Yesuusi yaaddotenna qarru giddo noo yannara nafa joongille leellishe Maganu fajjo wonshino. Addaho, Yesuusi lawishshi yaachishannori iillannonke yannarano jooguulle ikka dandiineemmota leellishanno!—Isa. 53: 10. w19.02 11 guf. 14-15

Ganyine gambooshshe haꞌrate, fonqolo ikkannori iillinkerono worbimma leellisha hasiissannonkeha ikkara dandaanno. Mitu roduuwinke dadillisannori, hexxo mudhitanno gede assannori woy fayyimmate qarri iillinsarono gambooshshe hadhanno. Woloota kayinni maatensa woy gashshaano darte iillishshunsarono gambooshshe haꞌratenni worbuulle ikkitinota leellishshanno. Ninke lawishshi ammanansanni kainohunni usurante noo roduuwanke mageeshsha jawaachishannonsaro hanni hedi. (Ibi. 13:3) Ninke fonqolo ikkannori iillanni heeꞌreennanke Yihowara soqqammanni heeꞌnoommota macciishshitanno woyite, ammanansa, worbimmansanna ammanamansa kaajjitanno. Phaawuloosi Roomaho usurame noo yanna baalantera, roduuwisi Maganoho ammanante soqqantanni noota afasi tashshi assitinosi. (Fil. 1:3-5, 12-14) Phaawuloosi usurunni tidhamara albaanni woy tidhamihu gedensaanni Ibiraawootu Kiristaanira sokka borreessino. Isi hatte sokka giddo, ammanamino Kiristaani mitteenni gamba yaa agurannokki gede jawaachishinonsa.—Ibi. 10:25. w19.01 28 guf. 9

Sheexaanu ninkeno isi gede Yihowa biddishshira hajajama gimbe finqillammoranna uminkera roorsiꞌnammora hasiꞌranno. Sheexaanu qooxeessinkera isi hedanno garinni hedanno manni woꞌmanno gede assino. Isi ‘bushu jaaloomi dancha amanyoote hunannota’ anfanni heeꞌne, insawa aannammora hasiꞌranno. (1 Qor. 15:33) Sheexaanu Yihowa hedo agurre mannu hayyo addaxxineemmo gede asse wodananke daafate woꞌnaalanno. (Qol. 2:8) Lawishshaho Sheexaanu halashshanno totai giddo mittu, heeshshonke giddo baalunkunni balaxa hasiissannoti jirote yaannoho. Togo yite heddannori jiro afidharano afiꞌra hooggarano dandiitanno. Ikkihano ikkiro insa qarru giddo no. Hatto yineemmohu mayiraati? Insa woxe gamba assiꞌrate aana illachishshanno daafira, ordinsa keeraanchimma, maatensanna Maganu ledo noonsa aante gawajjantara dandiitanno. (1 Xim. 6:10) Hayyicha ikkinohu iimi Anninke woxeho gara ikkitino lao heedhannonke gede kaaꞌlannonke daafira galanteemmosi.—Ros. 7:12; Luq. 12:15. w19.01 15 guf. 6; 17 guf. 9

Yihowa Beetti uullara daye manna jawaachishara albaanni Maganunniti ammanantino soqqamaano woloota jawaachisha hasiissannota huwattino. Lawishshaho Hiziqiyaasi, Sooriyu manni waajjishiishinsa yannara olantote roorrootanna Yihudu manna gamba asse jawaachishinonsa. Qullaawu Maxaafi “Mannuno mootensa coyiꞌrino qaalinni jawaati” yaanno. (2 Dud. 32:6-8) Iyyoobi umisira shesho hasiissinosiha ikkirono, jawaachinsheemmohe yite marte roore ‘daafursitinosiri’ sasu jaallasira woloota jawaachisha dandiinanni gara kulinosa. Isi insara ‘Ani kiꞌne ikkoommoro jawaachisheemmoꞌne, hattono coyiꞌreemmorinni sheshifachisheemmoꞌne’ yiinonsa. (Iyo. 16:1-5) Gedensoonni, Yihowanna Eelihu Iyyoobi jawaachishshinosi.—Iyo. 33:24, 25; 36:1, 11; 42:7, 10. w18.04 16 guf. 6; 17 guf. 8-9

Isayaasi Yihowa mannasi jawaachishannonna sheshifachishanno gara xawisanni, “Kaaliiqi, jawa wolqasinni gashshara daanno” yee balaxe coyiꞌrino. (Isa. 40:10) Yihowa “wolqasinni gashshara daanno” yitanno yaatto, isi wolqaataamo Moote ikkinota qaangeemmo gede assitannonke. Yihowa taalle nookki wolqasinni hundi soqqamaanosi irkisinna agarinte gede, xaa yannarano addaxxitannosire jawaachishannonsa, hattono agarannonsa. (Mar. 1:30, 31; Isa. 43:10) Hakko iso gibbannonkeri darte iillishshannonke woyite Yihowa “Ani jawaachisheemmohe” yee eino qaale wonshanno. Xaa yannara mite gobbuwara, diinnanke sabbakate loosonke hoolate woy dirijjitenke agawate sharrantanni no. Ikkirono, ninke tenne daafira quwa saꞌne diyaandeemmo. Yihowa jawaachishannonna beꞌe yineemmokki gede assanno qaale einonke. Isi “Ate shinara seekkinanni bagadi shuffanno” yiinonke.—Isa. 54:17. w19.01 5-6 guf. 12-13

Mannu ooso ayyaanaamittete hasatto noonsare ikkitino daafira, saadatenni baxxitinoreeti; tenne hasatto wonshara dandaannohu Kalaqaanchonsa callaho. (Mat. 4:4) Isi yaannoꞌnere macciishshitinanniha ikkiro, wodancha, hayyonna hagiirre afidhinanni. Maganu Qaalisi, hattono “ammanaminohunna wodanaamu borojjichi” widoonni shiqishannonkete falakkinote ayyaanaamittete sagalenni hasattonke wonshanno. (Mat. 24:45, NW) Tini sagale dhaabbannotenna ceeꞌmishshannokkite! (Isa. 65:13, 14) Maganu aannoꞌneti ayyaanaamittete sagale albinni roore hayyootanna wodanchitinannire ikkitinanni gede kaaꞌlitannoꞌne; tini akatta qolte duucha doogonni agarooshshe ikkitannoꞌne. (Law. 2:10-14) Lawishshaho hayyonna wodancha ‘Kalaqaanchu dino’ yaannohanna wole kaphu roso baddine affinanni gede ille fantannoꞌne. Qoleno ‘Hagiirraamma assannohu qaru coyi woxehonna maalaamittete jirooti’ yinannite kaphu hedonni agartannoꞌne. Hattono hayyonna wodancha busha yortonna gawajjanno rosicho baddine affinanninna gargadhitinanni gede kaaꞌlitannoꞌne. Konni daafira, Maganu hayyonna wodancha afiꞌra, hattono kuri akatta muxxe jiro gede assitine laꞌꞌa agurtinoonte! w18.12 20 guf. 6-7

Dirinke ‘haqqunnihu gede seeda diro’ ikkanno. Mite haqqe kumunni kiirranni diro heedhanno. Mannu ooso kageeshshi diro heeꞌrate fayyimma afiꞌra hasiissannonsa. Isayaasi masaalo garinni mannu togoo heeshsho heeꞌrannoha ikkiro, tini dhagge ikkitanno gannateeti! Qoleno tini masaalo woꞌmase digattanno! Hanni tini masaalo albillitte woꞌmitanno gara hedi: Uullate aana Maganu maassiꞌrino manni woꞌmanno. Mittu manchino saada woy kaajjadu manni gawajjannoe yee diwaajjanno. Illiweelootu, macciweelootunna kottootu hurtanno. Mannu uminsa mine miꞌnanno, hattono itannore hagiirruni loosiꞌranno. Insa haqqetenni roore seeda diro heedhanno. Qullaawu Maxaafi giddo albillitte togoo heeshsho heeꞌneemmota leellishshanno taje no. Ikkollana mitu manni ‘Tini masaalo albillitte uulla gannate ikkitannota leellishshannota diꞌꞌikkitino’ yaara dandaanno. Albillitte uulla gannate ikkitannota leellishshannoti kaajja taje hiittenneeti? Uullate aana heeꞌrino manni baalunkura bayiriidi manchi yaano Yesuusi, uulla gannate ikkitannota leellishshannota kaajja taje kulinonke.—Luq. 23:43. w18.12 5 guf. 13-15

Surrenke haaro coye rosanna yannate kiiro soorrama diagurtanno. Roore anga surrenke giddora eanno gede assiꞌneemmori surrenke soorranno. Konnira Yihowa hedo hiincineemmoha ikkiro, isi hedo gara ikkitinota buuxa dandiineemmo. Hakkiinni mito coye isi laꞌꞌanno garinni laꞌꞌate rosichi heeꞌrannonke. Ikkollana hedonke Yihowa hedo ledo sumuu yitanno gede assiꞌrate, ‘tenne alame mannita busha doogo haꞌneemmokki’ gede qoropha hasiissannonke. Maganu hedo ledo sumuu yitannokki hedo surrenke giddora eꞌara wodha dihasiissannonke. Tenne daafira seekke huwatate hanni mitto lawishsha laꞌino. Mittu manchi una ikkitanno sagale ite fayyimmasi woyyeessiꞌra hasiꞌranno. Ikkollana kuni manchi amadooshshe baꞌino sagale afiꞌri gede itannoha ikkiro, una ikkitano sagale itasi tirtannori dino! Hatteente gede, alamete hedo wodaninke giddora eꞌanno gede assiꞌneemmoha ikkiro, Yihowa hedo daafira rosanke tirtannori dino. w18.11 21 guf. 14-15

Barru baala rosootto halaali ledo sumuu yite heeꞌrate murciꞌri. Hallikkira halaale sinnaaru woy qawattote gede assite qodhi. Hunda olamaasine qodhitanno qawatto diinu hallonsanna wole giddoyidita bisinsa kifilla gawajjannokki gede kaaꞌlitannonsa. Ikkollana mittu olamaanchi qawatto agarooshshe ikkitasira hasiꞌriro duure usudha hasiissannosi. Shabbi calla assinoonni qawatto kaaꞌlitannori dino. Halaalu qawattote gede agarooshshe ikkannonkehu hiittoonniiti? Qullaawu Maxaafi halaale woꞌmante yannara mulinkenni fafisiꞌneemmokkiha ikkiro, gara ikkitinokki hedowiinni xeertiꞌneemmonna dancha doorsha doodhineemmo gede kaaꞌlannonke. Fonqolu iillannonke woyite, Qullaawu Maxaafi halaali gara ikkinore assineemmo gede xixxiiwannonke. Mittu olamaanchi qawatto qodhikki olaho haꞌrannokkinte gede, ninkeno woꞌmante yannara Qullaawu Maxaafi halaale heeshshonke giddo harunsa hasiissannonke. w18.11 12 guf. 15

Maganu Qaalinni halaale afiꞌrate sharrama hasiissannonke. Konne halaale afiꞌrate facci assine agura hasiissannonkere agurreemmo. Lawishshu maxaafa borreessino egennami coyiꞌrinonte gede mitte hinge hidhinoommo woy ‘afiꞌnoommo’ halaale hirreemmokki woy ‘huꞌnineemmokki’ gede qoropha hasiissannonke. Mitto coye mulla afiꞌnanni yaa hakko coyiꞌra mittoreno dibaantanni yaa diꞌꞌikkino. Lawishsha 23:23te “afiꞌra” yine tirroonnihu Ibiraawootu Afii qaali mitto coye “meessiha assiꞌrate.” Hatto yaa mitto shotinse laꞌnannikki coye afiꞌrate sharrama woy hakko coyiꞌra yine mito coye agurate. Hanni halaale afiꞌrate woy hidhate yaa mayyaatero lawishshunni laꞌno. Dikkote muuze mulla beenkanni heeꞌnoonni yine hendo. Hatto yaa muuze mininkera maalaletenni dagganno yaateni? Hatto yaa diꞌꞌikkino. Tenne muuze minira adhe daate dikko haꞌra hasiissanno. Muuze mulla uyinanniha ikkirono, dikkotenni mare abbate yanna hasiissannonketi egennantinote. Hatteente gede halaale rosate woxe dibaanteemmo. Ikkollana halaale afiꞌrate assa hasiissannonkeri no. w18.11 4 guf. 4-5

Yesuusi, Pheexiroosi, Yaiqoobinna Yohaannisi ledo mitto jawa ilaala haꞌrino. Hakkiicho, insa mitte dhagge ikkitanno ajuuja laꞌino. Yesuusi albi arrishshote gede ikke xawino, hattono uddanosi waajjo qoffe ikkite caabbichimma xabbino. Musenna Eeliyaasi riqiwannohu lamu manni, Yesuusi reyannotanna reyotenni kaꞌꞌannota coyiꞌra hanaffino. (Luq. 9:29-32) Hakkiinni waraꞌa yee xawanno gomichi golinonsa, hattono gomichu giddonni Maganu huuro macciishshitino! Tini ajuuja Yesuusi Maganu Mangiste Moote ikkanno woyite afiꞌranno ayirrinyenna wolqa leellishshannote. Tini, Yesuusi qarranna shetto adhanno woyitira jawaantenna wolqa ikkitinositi dihuluullissannote. Qoleno tini ajuuja, Yesuusi rosaanora ammanansa kaajjishshino; hattono ammanamansa fonqolannoriranna albillitte loossannohu lowo loosira jawaante ikkitinonsa. Mitu 30 diri gedensaanni, soqqamaasinchu Pheexiroosi Yesuusi dani soorramino yannare coyiꞌrino; tini isi hatte ajuuja hawinokkita leellishshanno.—2 Phe. 1:16-18. w19.03 10 guf. 7-8

Addu Kiristaani kaphu ammaꞌno miilla ikkinokkita leellisha dandaannoti mitte doogo hiittenneeti? “Halaale” coyiꞌneemmo. (Zak. 8:16, 17) Shiimuno ikko jawu coyira, wosinaho, ledonke loossannorira, jaallankera, hattono maatenkera halaale coyiꞌneemmo. Ati wedellichahoro, darawokki ikkituta ikka baxattoha ikkara dandaanno. Lamu gari heeshsho, lawishshaho maatekkiwanna songonniwa arsho labbe, alamete wedelli ledo xaadattonna dagoomittete webisayite horoonsiꞌratto woyite kayinni ikkinannikkita ikkattokki gede qorophi. Togoo heeshsho heeꞌra maatekki, ammanate roduuwakkinna Yihowa dogate. (Far. 26:4, 5) Yihowa ‘afiinkenni calla ayirrinseemmohanna wodaninke kayinni isiwiinni xeertiꞌrinoha’ ikkiro, isi tenne afanno. (Maq. 7:6) Qullaawu Maxaafi togo yee amaalannonke: “Wodanikki cubbaataamma hinaasoonke; barra baala Kaaliiqa waajjatenni heeꞌri.”—Law. 23:17. w18.10 9 guf. 14-15

Maganu manni mitte ayyaanaamitte maateeti; qoleno insa insanaawa baxamanno. (1 Yoh. 4:21) Mite yannara insa roduuwinsara lowore assitara dandiitanno; ikkollana insa duucha woyite baxillensa leellishshannohu shiimmaadda coyibbanniiti. Lawishshaho mimmito jawaachishannore coyidhe woy assite baxillensa leellishshara dandiitanno. Wolootaho shaqqille leellinsheemmohanna hendeemmonsata leellinsheemmoha ikkiro, ‘Maganu baxanno ooso ikkinoommohura iso lambeemmo.’ (Efe. 5:1) Baalunkunni roore Annisi lawishsha harunsinohu Yesuusaati. Isi togo yiino: “Duhu ayirrinoꞌneri baalu anewa amme! Ani fooliishshiisheemmoꞌne. . . . ani joogahonna shaqqadoho.” (Mat. 11:28, 29) Yesuusi lawishsha harunsine ‘gadadaammaho’ hendeemmota leellinsheemmoha ikkiro, iimi Annanke hagiirsiinseemmo, hattono lowo harshammo afiꞌneemmo. (Far. 41:1) Hakko daafira maatenkera, roduuwinkeranna qanchu soqqanshowa xaandeemmo mannira hendeemmota leellisha agurroonke. w18.09 28 guf. 1-2

Dano kalaqantanno yannara Maganu manni roduuwanke kaaꞌle Maganu ledo loosanno tunceenya afiꞌranno. Lawishshaho insa dano iillitinonsare woxunni kaaꞌlitanno. (Yoh. 13:34, 35; Soq. 11:27-30) Roduuwanke kaaꞌla dandiineemmoti wole doogo minensa gatamarate woy wole mine minate looso kaaꞌlatenniiti. Gabireela yinannite mitte Poolaandete heedhanno rodoora lolahu minese gawajjino; ise qooxeessaho noo songuwara heedhanno roduuwi kaaꞌlitasera dagguta lowo geeshsha hagiidhitino. Ise togo yitino: “Bainohu maalaamittete coye ikkino daafira, isi aana diꞌꞌillachishoomma. Kuni tunceenyi Kiristaanu songo miila ikkaꞌya lowo qoossonna hagiirsiissannota ikkitinota wodancheemma gede assinoe.” Kalaqamu dano iilliteennansa kaaꞌlinoonninsa roduuwi hoogginorinni roorinore afidhinota coyidhino. Togoo roduuwa kaaꞌlite Yihowa ledo loossannorino hatto assansanni tashshi yaannonsa.—Soq. 20:35; 2 Qor. 9:6, 7. w18.08 26 guf. 12

Wodananke agadhate, gawajjanno coye bade afanna hakko coye ranke gargadha hasiissannonke. “agadhi” yaanno qaali agaraasine loossanno looso qaangeemmo gede assannonke. Moote Selemooni waro, agaraasine shaete ofolte diinu daanno woyite katamu giddo noo manna qorowisiissanno. Kuni lawishshi, Sheexaanu hedonke daafannokki gede maa assa hasiissannonkero huwatate kaaꞌlannonke. Hunda shaete aana heedhe agartannori xullichu agaraasine ledo buusante loossanno. (2 Sam. 18:24-26) Insa diinu gambisanno woyite, xullicho cuffe kaaꞌlante katama danotenni agartanno. (Neh. 7:1-3) Qullaawu Maxaafinni qajeelino tiiꞌꞌinkeno, Sheexaanu wodananke yaano hedonkenna hasattonke daafate woꞌnaalanno woyite shaete aana agartanno agaraasine gede qorowisiisannonke. Tiiꞌꞌinke qorowisiisannonke woyite macciishshanna lawishshu yaattonni xullicho cufa hasiissannonke. w19.01 17 guf. 10-11

Cimeeyye wedella uminsa laonni woy budinsa garinni ikkikkinni Qullaawu Maxaafinni bikka hasiissannonsa. (2 Xim. 3:16, 17) Qullaawu Maxaafi hedo ledo sumuu yaannokki budi ikkadda ikkitinori songote giddo qoosso afidhannokki gede assara dandaanno. Hanni mitto lawishsha laꞌno. Mitte gobbara ikkado ikkinohu songote soqqamaanchira lowoha loosu qeecha uyinoonnisi. Cimeeyye kuni rodii Qullaawu Maxaafi kulanno garinni ikkado ikkinota affinoha ikkirono, cimeessa ikkanno gede dishiqishshino. Mite jajjabba cimeeyye kuni rodii wedellicha ikkino daafira cimeessa ikkate diꞌꞌiillino yite heddino. Wedellichu rodii aja ikkasinni calla cimeessa ikke shoomama hoogasi dadillissannote. Togoo budi batinye gobbara egennaminoha ikkinota addi addi rippoorte leellishshanno. Meessi laonni heda agurre Qullaawu Maxaafinni massagama lowo geeshsha hasiissannote! Yesuusi manna aana laꞌne yoo yineemmokki gede uyinonke hajajo agadha dandiineemmohu hatto assinummoro callaati.—Yoh. 7:24. w18.08 12 guf. 16-17

Muddamme sokka woleho sayisa qarrano abbitanno. Mite gobbuwara, Yihowa Farciꞌraasine hasidhu gede soqqama didandiitanno; mitowa isinni loosonke agamboonni. Hatte gobbara heeꞌrannohu giwannonke manni roduuwinke waajjanno woy mimmito ammanannokki gede assitannota kaphu odoo tuqisara dandaanno. Hanni alba Sooviyeti Yuneenete ikkinore laꞌno. KGB yinanni polise mitu Yihowa dirijjite giddo egennantino roduuwi kaadaasine ikkitino yite kapho halashshitino. Batinyu konne kapho ammante Yihowa dirijjite giddonni fultino. Tini dadillissannote! Yannate gedensaanni insa giddo batinyu higgino; mitootu kayinni dihiggino. Baaru aana dano iilliteenna hiiqqaqqantino markaawe gede, insa ammanano hatto ikkitino. (1 Xim. 1:19) Ninkera togoo gawajjo iillitannonkekki gede qoropha dandiineemmohu hiittoonniiti? Gara ikkitinokkita woy buunxoonnikki odoo tuqinseemmokki gede qoropha hasiissannonke. Dogammeemmokki gede qorophanna macciishshinoommori adda ikkinotanna teꞌee buuxa hasiissannonke. w18.08 4 guf. 8

Angate galchinoonnite hundite Giriikete borrora duucha woyite borrote malaatta dihoroonsiꞌnanni. Konnira Yesuusi “Halaale kuleemmohena, techo ane ledo Gannate eatto” yiinonso, “Halaale kuleemmohena techo, ane ledo Gannate eatto” yiino? yine hendammora dandiineemmo. Yesuusi hakkuyira albaanni rosaanosira “Manchi beetti waammate giddo sase barranna sase hashsha keeshshanno” yiinota qaagi. (Mat. 12:40; 16:21; 17:22, 23; Maq. 10:34; Soq. 10:39, 40) Konni daafira Yesuusi reyi barranni Gannate dieino. Yesuusi Maganu kayisasi geeshsha boode barra “Waammate” giddo keeshshino. (Soq. 2:31, 32, NW) Yesuusi ledo sutaminohu jaddo loosino manchi, Yesuusi ammanantino soqqamaasine isi ledo iima gashshitannota kule qaale einota diafino. (Luq. 22:29) Qoleno hakku manchi dicuuamino, woy qullaawu ayyaaninni dibuuramino. (Yoh. 3:3-6, 12) Konni daafira Yesuusi jaddo loosino manchira qaale ei woyite coyiꞌrinohu gedensaanni ikkitannote uulla gannate daafiraati. w18.12 6 guf. 17-18, 20-21

Israeele bayichonko culkunni seekkinoonni siito magansidhino! Israeele konni garinni Yihowa hajajo diigge heedhe, isi wido ikkitinohu gede assite hedde insaneeto doggino. Isinni Aarooni siito magansiꞌransa “Kaaliiqi ayyaanaati” yiino. Yihowa maa assiyya? Israeele kaaddinosihu gede asse kiirino. Yihowa Musera, mannu “cubbo loosino” hattono “hajajoommonsa doogowiinni agure fulino” yiinosi. Yihowa ‘lowo geeshsha aaramino daafira’ haarote xintantinota Israeelete daga feye hunara hedino. (Ful. 32:5-10) Ikkirono Yihowa Israeelete daga huna hoogate doodhino. (Ful. 32:14) Aarooni umo dagate ledo buusame kaphu magano seekkinoha ikkirono, maaro eꞌꞌe Yihowa wido ikkitino Leewaawooti wido ikkino. Kaphu maganna magansiꞌransanni lowo kume ikkanno manni goofino. Ikkollana, Yihowa wido ikkitinorira atoote afidhinanni yine qaale eꞌnoonninsa.—Ful. 32:26-29. w18.07 20 guf. 13-16

Sharrama hasiissannonkehu ayi naadannonke gedeeti? Mannu rosunni, daddalunni, woy boohaarshu ledo xaado afiꞌrinorinni egennama hasiꞌranno; ikkollana ninke hasiꞌneemmohu konni garinni egennama diꞌꞌikkino. Soqqamaasinchu Phaawuloosi togo yiinonke: “Xa Magano affini woyitenna, hakkiinnino roore, Maganu egenniꞌne yannara, wolqiweelonna tidhitinokki golfawa higa mayira baxxini? Galagaltine hakkurira borojje ikka hasidhini?” (Gal. 4:9) Kalqete alame Mooticha ikkino ‘Magani egenninonke!’ Tini kaajja qoossooti! Yihowa ayimmanke seekke afino, hattono isi baxannonke. Isi jaallasi ikkinammora hasiꞌranno. Qoleno Yihowa kalaqinonkehu jaallasi ikkineemmo gedeeti.—Ros. 12:13, 14. w18.07 8 guf. 3-4

Maganu higgenni tiianke qajeelsiꞌrate, Maganu higge lowo geeshsha baxanna ayirrisa hasiissannonke. (Amo. 5:15) Ikkollana togo assa dandiineemmohu hiittoonniiti? Qaru coyi Yihowa mitto coye laꞌꞌanno gara rosate. Hanni goxichu giweennahe akimete minira haꞌroottohu gede assite hedi. Akimichu dancha sagale itatto gede, ispoorte loosatto gedenna heeshshokki giddo mito coye biddi assiꞌratto gede kulihe. Isi yiinohere assite goxicho afiꞌritto. Akimichu kaaꞌlinohe daafira lowo geeshsha galatattositi egennantinote. Hatteente gede, Kalaqaanchinke uyinonke higge cubbo loonse qarru giddo umbeemmokki gedenna heeshshonke woyyaabbanno gede assitanno. Qullaawu Maxaafi giddo noo higge kaphu, hanaaqu, mooru, foora, finqillenna agaanintete loosi daafira kultannore harunsa kaaꞌlitanno gara hedi. (Law. 6:16-19; Aju. 21:8) Yihowa higgera hajajammummoro afiꞌneemmo atoote laꞌneemmo woyite, Yihowaranna higgesira noonke baxilli lexxanno. w18.06 17 guf. 5-6

Philaaxoosi, Yesuusi Yihudu manni Roomu gashshootira finqilanno gede kakkayisanno yee waajjinoha ikkara dandaanno. Yesuusi kayinni “Ane gashshooti tenne gobbaha diꞌꞌikkino” yee qolino. (Yoh. 18:36) Mangistesi iimita ikkitino daafira, Yesuusi poletiku coyira anga diwodhino. Isi Philaaxoosira, uullara dayinohu ‘halaale farciꞌrate’ ikkinota kulinosi. (Yoh. 18:37) Ninkeno Yesuusi gede loosinke maatiro huwantummoro, hedonkenni nafa mitteno poletiku gaamo dikaaꞌlineemmo. Poletiku gaamo kaaꞌla hoogate sharrama shota ikka hooggara dandiitanno. Mittu woradu aliidi laꞌꞌaanchi togo yiino: “Ninke qooxeessira mannu albinni roore poletika soorrate sharramannoha ikkino. Insa sirchinsa wole baala roorinohu gede assite heddanno, hattono insa giddo batinyeho poletiku soorramiro heeshshonsa woyyaabbannoha lawannonsa. Roduuwu kayinni Maganu Mangisteha dancha duduwo duduwate looso illachishshe, Kiristaanu mittimmansa baꞌannokki gede agadhitino; tini hagiirsiissannote. Insa Maganu iillitannonke miiconna qarra hunannota hexxitanno.” w18.06 4-5 guf. 6-7

“Hettisamaanchoho” yitanno tiro afiꞌrinohu Sheexaane yaanno suꞌmi, Ibiraawootu Afiite Qullaawa Borro giddo sase maxaaffara yaano, 1 Duduwi, Iyyoobinna Zekkaariyaasi maxaafi giddo calla no. Mesihichu woy Kiristoosi daa geeshsha diininke daafira garire kulloonnikkihu mayiraati? Yihowa Ibiraawootu Afiite Qullaawa Borro giddo Sheexanunna loosisi daafira lowore xawise, kuni bushu diini egennaminoha ikkanno gede assa dihasiꞌrino. Yihowa Ibiraawootu Afiita Qullaawa Borro borreessinanni gede assinohu qaru korkaati mannu Mesihicha afannonna iso harunsanno gedeeti. (Luq. 24:44; Gal. 3:24) Mesihichu dayita, Yihowa Yesuusinna rosaanosi widoonni Sheexaanunna agaanintete ayimma daafira lowore xawisino. Yihowa hatto assasi garankolla; korkaatuno Isi Sheexaanenna isi ledo finqiltinore cancanannohu Yesuusanna buuramaasine horoonsiꞌreeti. (Rom. 16:20; Aju. 17:14; 20:10) Daawuloosira noosi wolqa dannu noota ikkitinota qaagge. Yihowa, Yesuusinna ammanantino sokkaasine kaaꞌlitannonke. Insa kaaꞌlonni diinanke qeela dandiineemmo. w18.05 22-23 guf. 2-4

Yihowa soqqamaanosi gede asse kiirannonkehu guma laalleemmoha ikkiro callaati. (Mat. 13:23; 21:43) Konni daafira, Yohaannisi 15:1-5 aana kulloonni lawishshi garinni mittu mittunku Kiristaanchi laala hasiissannosi gumi, haaro rosaano halaalu minira dagganno gede assa diꞌꞌikkino. (Mat. 28:19) Hatto ikkiro, mannu sabbankeemmo sokka macciishsha hasiꞌrannokki qooxeessira soqqamannohu ammanamino Kiristaani Yesuusi lawishshu giddo kulite guma laaltannokki sinna gedeeti. Hatto yee heda kayinni gara diꞌꞌikkitino! Mayira? Korkaatuno mannu Yesuusi rosaano ikkanno gede giddeessa didandiineemmo. Kuni wolqankera aleenni ikkino coyeeti; baxillaanchu Anninke Yihowa wolqankera aleenni ikkino coye assa hoongoommo daafira soqqamaasinesi gede asse dikiirannonke yine heda sorote. Yihowa wolqankera aleenni ikkino coye asse diyaannonke. (Mar. 30:11-14) Ikkina ninke laala hasiissannonke gumi maatiyya? Kuni gumi, ninke baalunku laala dandiineemmoha ikka hasiissannosi. Ikkina kuni loosi hiikkonneeti? Kuni loosi Maganu Mangisteha dancha duduwo duduwate loosooti.—Mat. 24:14. w18.05 14 guf. 8-9

Xaa yannara alamete aana paasteri, qeesichanna wole suꞌmuwanni woshshantannori kaphu ammaꞌno massagaano bushsha koteeti. Umi xibbi dirira noo Faarisooti gede insano Maganu qaali ‘halaali leellannokki gede’ assitino; hattono “Maganu halaale kaphunni” soorritino. (Rom. 1:18, 25) Insa, “ammaninohu gatinoho, mannu lubbo direyitanno, maaeela heeshsho heeꞌnirono Maganu dihanqanno hattono meyaati meyaate ledonna labbaahu labbaahu ledo adhamiro qarru dino” yite kaphu rosonsa tareessitanno. Poletiku kaphino, manna soꞌrisiisanno. Poletiku massagaano muli yanna giddo alame woꞌmate “keereho; qarru dino!” yite waajjo kapho kaphitanno. Ikkollana “bao hedeweelcho daggannonsa.” Konnira poletiku massagaano coyidhannore ammana dihasiissannonke. Insa tini alame baꞌara noota leellishanno halaale kaphitanni no yaate! Ninke kayinni, Yihowa barri “hedeweelcho mooraanchimma” daannota anfoommo.—1 Tes. 5:1-4. w18.10 7-8 guf. 6-8

Yesuusi Kiristoosi buurantinonna wolootu geꞌreewi wido ikkitino cimeeyye yaano ‘gashshaanote’ widoonni jawaachishannonke, hattono biddishsha aannonke. Kuri cimeeyye ‘duha leddannonkere’ ikkitukki ‘hagiidhineemmo gede ledonke loossannore’ ikkitino daafira jawaachishshannonke. (Isa. 32:1, 2; 2 Qor. 1:24) Soqqamaasinchu Phaawuloosi dancha lawishsha ikkinonke. Isi Teselonqe heeꞌrannohu dartu iillinonsa roduuwira togo yee borreessino: “Lowo geeshsha banxeemmoꞌne daafira, Maganunniha Dancha Duduwo kula calla ikkikkinni, kiꞌnera lubbonke nafa aate qixxaambe heeꞌnoommo.” (1 Tes. 2:8) Jawaachishannore coyira calla ikkitannokkita xawisate, Phaawuloosi Efesooni heedhanno cimeeyyera techo qummeeshshira noo hedo kulinonsa. w18.04 21-22 guf. 6-8

Tenne wolapho afiꞌrate, Yihowawa “higa” yaano, isi ledo jaalooma kalaqira hasiissannonke. (2 Qor. 3:16) Israeele halalla noo yannara coye Yihowa laꞌꞌanno garinni laꞌꞌa agurte mannu laꞌꞌanno garinni laꞌino. Insara wodaninsa dillaawinohuranna surrensa diwantinohura Gibitsete gobbanni fulte afidhino wolapho maalu hasattonsa wonshiꞌrate horoonsidhino. (Ibi. 3:8-10) Yihowa ayyaani aanno wolapho borojjimmatenni wolaphatenni roortanno. Yihowa ayyaani cubbohonna reyote, hattono kaphu magannaranna kaphu ammaꞌno rosichira borojje ikkineemmokki gede kaaꞌlannonke; mannu ooso qolte tenne assite diaffanno. (Rom. 6:23; 8:2) Tini taalle nookki wolaphooti! Mittu manchi usuru mine heeꞌre woy borojjicho ikke noowa nafa togoo wolapho afiꞌra dandaanno.—Kal. 39:20-23. w18.04 9 guf. 3-5