Ammajje

Roduuwaꞌne seekkitine affe. Gambooshshu hanafara albaanninna goofihu gedensaanni mimmitu ledo hasaabbe; ledo soqqamme; hattono dandiitinanniha ikkiro sagale wortine woshshensa. Hatto assitiniro, mitte mannunniwa gambo gibbannota labbinoꞌne rodoo waajjitannota ikkitinota, maalaamittete coye baxannoho yitine heddinanni rodii lowo geeshsha shaqqado ikkinota, hattono mitte gambooshshe barrisidhe dagganno maate gimbanninsata dandiite heedhannota huwattinara dandiitinanni. (Iyo. 6:29) “Manni coyi giddora” ea hasiissannonkekkiti egennantinote. (1 Xim. 5:13) Ikkirono, roduuwinke daafira afanna insa hattoore ikkitanno gede assinonsare huwatate woꞌnaala hasiissannonke. Mittu rodii ikkito giwissannoꞌneha ikkiro, albi heeshshosi huwattiniro, iso roore marartinara dandiitinanni. Roduuwanke seekke afa shota diꞌꞌikkitino. Ikkirono, Qullaawu Maxaafi wodaniꞌne halaꞌlo yee amaalannonke amaale harunsineemmoha ikkiro, baalunku gari manna baxannohu Yihowa lawishsha harunsineemmo.—1 Xim. 2:3, 4; 2 Qor. 6:11-13. w20.04 16-17 guf. 10-12

Yesuusi gaꞌa gede reyara hashsha rosaanosi mimmitu ledo baxantanno gede qaagiissinonsa. Isi rosaanosi mimmito uminsa gede assite baxansa mittimma heedhannonsa gedenna mannu giwannonsata dandiite saꞌanno gede kaaꞌlitannonsata afino. Hanni Teselonqe heedhanno songo lawishsha laꞌno. Hatti songo xintantu yannanni kayise hatte songo Kiristaani dartu iillannansa heeꞌrino. Ikkirono kuni Kiristaani ammaname heeꞌrenna baxille leellishe dancha lawishsha ikkino. (1 Tes. 1:3, 6, 7) Phaawuloosi insa mimmito ‘hakkiinni roorsite baxxanno gede’ jawaachishinonsa. (1 Tes. 4:9, 10) Baxillu yaaddinore sheshifachishshanno gedenna dhuku ajinonsare irkissanno gede assinonsa. (1 Tes. 5:14) Insa Phaawuloosi amaalinonsa amaale harunsitino; isi mittu diri gedensaanni borreessinote layinki sokkara, “Mimmitiꞌnera nooꞌne baxillino lexxanni no” yiinonsa. (2 Tes. 1:3-5) Baxillu qarranna mannu giwannonsata dandiite saꞌanno gede assinonsa. w21.03 22 guf. 11

Hegere heeshsho baꞌraaꞌra adha hasiꞌnummoro, Kiristaanu doogora doda yaano Kiristaanu heeꞌranno heeshsho heeꞌra hasiissannonke. (Soq. 20:24; 1 Phe. 2:21) Sheexaanunna isi lawishsha harunsitannori kayinni Kiristaanu doogora doda agurre insa ledo dondammora yaano “aalimalete heeshsho” heeꞌnammora hasidhanno. (1 Phe. 4:4) Insa ninke dondanni heeꞌnoommota heeshshote doogo arrassitanno; hattono insa heedhanno heeshsho woyyitinotenna wolapho afiꞌnannite yite coyidhanno. Kayinni tini kaphoho. (2 Phe. 2:19) Gara ikkitino doogora doda lowo geeshsha hasiissannote! Sheexaanu ninke baalunku ‘heeshshote widira massitannote’ ruukkashsho doogora doda agurre, batinyu alamete manni dodannote halaꞌlado doogora dondammora hasiꞌranno. Tini doogo lowo manni dodannotenna injiitannote. Kayinni “baote widira” massitannote. (Mat. 7:13, 14) Gara ikkitino doogora dodatenna hatte doogonni fullummokkinni heeꞌrate Yihowa addaxxanna isi yaannonkere macciishsha hasiissannonke. w20.04 26 guf. 1; 27 guf. 5, 7

Muli diri kawa, Ruusiyunna miillasino “biiffino gobba” eꞌino. (Dan. 11:41) Hiittoonni? Kuni aliyye moote 2017 Yihowa Farciꞌraasine looso hoolino; hattono mito roduuwanke usurino. Hakkiinnino sae, Haaro Alame Tironna wole borronke agawino. Qoleno, Ruusiyaho noota sinu biironke, Gambooshshu Addaraashuwanna Jajjabbu Gambooshshi Addaraashuwa wolqatenni adhino. Kuni ikkihu gedensaanni, yaano 2018 Aliidi Bisi, Ruusiyunna miillasi aliyye moote ikkitinota xawisino. Ikkollana, Yihowa manni buutote darti iillinsarono gashshooteho finqiltannorira dikaaꞌlantanno woy gashshoote soorrate assinannirira anga diwodhitanno. Hatteentenni insa Qullaawu Maxaafi, “Mootoollatenna gashshaano baalate huuccensa” yee amaalanno amaale harunsitanno; roorenkanni gashshaano Magano faajjetenni magansiꞌneemmota hooltanno woyite huuccineemmonsa. w20.05 14 guf. 9

Annuwanna amuuwa, oosoꞌne halaale uminsaha assiꞌrate, Maganu ledo jaalooma kalaqiꞌranna Qullaawu Maxaafi rosiisannori halaale ikkinota buuxiꞌra hasiissannonsa. Oosoꞌnera Maganu daafira halaale rosiisate, balaxxine kiꞌne umiꞌne Qullaawa Maxaafa seekkitine xiinxallitine dancha lawishsha ikka hasiissannoꞌne. Qoleno rossinoonnire hiinca hasiissannoꞌne. Tenne assitinihu gedensaanni, oosoꞌneno hatto assitanno gede rosiisa dandiitinanni. Hattono Qullaawu Maxaafi rosaanoꞌnera assitinanninte gede, oosoꞌnerano Qullaawa Maxaafa xiinxallate kaaꞌlanno uduunne horoonsiꞌra dandiitanno gara rosiisa hasiissannoꞌne. Hatto assitinanniha ikkiro, oosoꞌne Yihowa baxxanno gedenna isi ayyaanaamittete sagale shiqishate horoonsiꞌrannoha ammanaminohanna wodanaamo borojjicho naaddanno gede kaaꞌlitinanni. (Mat. 24:45-47) Oosoꞌnera xinta ikkinoha Qullaawu Maxaafi halaale calla rosiisa dihasiissannoꞌne. Hatteentenni, dironsanna dandoonsa heddinanni Maganunniha hawa gede huwantannikki coye rosiissine ammanansa kaajjitanno gede kaaꞌla hasiissannoꞌne.—1 Qor. 2:10. w20.07 11 guf. 10, 12-13

Xaa yannara guuntete xeꞌne noonsaha ikkirono, Yihowa jaalla ikkinohu mageeshshi mannaati? Miliyoonetenni kiirranni manni isi jaalla ikkino. Insa isi ledo jaalooꞌma dandiitannohu, Yesuusita wodote kakkalo ammantannoha ikkirooti. Yihowa tenne wodo widoonni heeshshonke isira sayinse uyine cuuammeemmo gede fajjinonke. Hatto assineemmoha ikkiro, heeshshonsa Yihowara sayise oye cuuaminohu lowo miliyoone ikkanno Kiristaani widira kiirammeemmo; insa kalqete alame giddo baalunkunni roorino Maganira jaalla ikkitino. Maganu ledo noonke jaalooma naandeemmota leellisha dandiineemmohu hiittoonniiti? Abirahaaminna Iyyoobi Maganoho lowo diro ammanante heedhunte gede, ninkeno tenne goofimarchu yannara Yihowara soqqammoommo diri ikki geeshshihano ikkiro woꞌmante yannara isira ammanama hasiissannonke. Daanieeli gede ninkeno Maganu ledo noonke jaalooma heeshshonkenni nafa roorsine laꞌꞌa hasiissannonke. (Dan. 6:7, 10, 16, 22) Yihowa kaaꞌlonni ayi geeshshi qarrano dandiine saꞌne isi ledo noonke jaaloomi baikkinni heeꞌra dandiineemmo.—2 Qor. 4:7. w20.05 27 guf. 5-6

Moote Daawiti wolu manchi galte biso hayishshidhanna laino. Isi ‘Wolu manchi galte yortooti’ yaannoha Yihowa seera afino. (Ful. 20:17) Daawiti hatte mancho lae agura giwinoha ikkara dandaanno. Isi Bersaabehi ledo foore yortosi wonshiꞌratenna Yihowa hagiirsiisate giddo mitte doodha hasiissinosi. Daawiti lowo diro Yihowa baxanninna waajjanni heeꞌrinoha ikkirono, busha yortonni qeelamino. Konninni kainohunni isi lowo bunshe assino. Daawiti Yihowa suꞌma mishiishino. Qoleno isi beebbaataamu mannira wole agurina maatesira nafa buutote qarra abbino. (2 Sam. 11:1-5, 14-17; 12:7-12) Yihowa Daawiti qorichishino; Daawitino Yihowa ledo noosi jaalooma haaroonsiꞌrino. (2 Sam. 12:13; Far. 51:2-4, 17) Daawiti wodanisi beehamara wodhe agurasi abbitinoha buutote qarranna shetto qaagino. Isi Faarso 86:11te borreessinore, “Beehaminokki wodana uyie” yineno tira dandiinanni. Yihowa Daawiti wodanasi mitto assiꞌranno gede kaaꞌlinosi? Ee kaaꞌlinosi. Korkaatuno gedensoonni Maganu Qaali giddo Daawiti Yihowara “coꞌo yiino wodaninni” soqqaminota kulloonni.—1 Mot. 11:4; 15:3. w20.06 11 guf. 12-13

Qullaawu Maxaafi Yihowa baxillisinni isiwa gamba assannonketa kulanno. Isi hatto assannohu hiittoonniiti? Hanni qile balera uwootto yine hendo. Bale qile ikkitino daafira, umikkinni fula didandaatto. Tenne waajjishshanno balenni fula dandaattohu, mittu manchi siiwo tuge sununni asse goshooshe fushshihero callaati. Yihowa techohu barru qummeeshshi aana yiinonte gede, isiwiinni ballekkino Israeele baxillunni “gamba” assinonsa. Yannankerano Yihowa isira soqqama agurtinorenna qarrunna yaaddo jajjarsitinonsare hatto yaanni no. Isi, baxannonsatanna isiwa higgara halchannota affara hasiꞌranno. Yihowa ate kaxxe insa baxannonsata leellishara dandaanno. Ayyaanaamittetenni qiiddinore Yihowano ninkeno banxeemmonsata affanno gede assa hasiissannonke. w20.06 27 guf. 12-13

Rosaancho Isxifaanoosi shinita, batinyu Kiristaani Yerusaalametenni fule xooqe ‘Yihudunna Samaariyu gobbara billaallino’; gedensaanni insa Qophiroosinna Antsookiyu geeshsha iillitino. (Soq. 7:58–8:1; 11:19) Hatte yannara insara lowo qarri iillinonsati dihuluullissannote. Ikkirono insa martuwa baalawa quqquxante dancha duduwo kula diagurtino; konnira Roomu Gashshooti giddo duuchawa songuwa xintantino. (1 Phe. 1:1) Ikkirono hakkunni gedensaannino lowo qarri iillinonsa. Lawishshaho, 50 M.D. balla Roomu Gashshaanchi Qelawudewoosi baalunku Yihudooti Roomunni fultanno gede hajajino. Hakko daafira Kiristaana ikkitino Ayihudooti qaensa agurte wolewa haꞌra hasiissinonsa. (Soq. 18:1-3) Soqqamaasinchu Phaawuloosi 61 M.D. balla ammanate roduuwasi mannu albaanni xonnoonninsata, usurroonninsatanna jajjansa wolqatenni adhinoonnita borreessino. (Ibi. 10:32-34) Wolu manninte gede Kiristaanano buxima amaddinonsa hattono xibbu waadinonsa.—Rom. 15:26; Fil. 2:25-27. w21.02 26-27 guf. 2-4

Sheexaanuno ikko isi wido ikkitinori ammanasi kaajjishiꞌrino Kiristaancho halaalunni heeꞌrannokki gede assa didandiitanno. (2 Yoh. 8, 9) Alame gibbannonketa anfoommo. (1 Yoh. 3:13) Yohaannisi “Tini gobba [woy alame] gudisante bushunni amadantino” yiino. (1 Yoh. 5:19) Alamete goofimarchi gambisanno woyite, Sheexaanu hanqi roore buwanno. Sheexaanu amanyootu maaeellenna kaadaasine horoonsiꞌre ninke goꞌle gawajjatenni sainore assanno. Isi dartu iillannonke gedeno assanno. Sheexaanu gattinosi yanna shiima ikkitinota afino daafira, sabbankeemmota hoolatenna ammananke hunate haqqa reejje yaanno. Babbaxxitino gobbuwara loosonke agamboonnihu woy hoolloonnihu iseraati. Ikkollana, kuri gobbuwara heedhanno roduuwinke ammanatenni kaajjite no. Insa Sheexaanu aye geeshshi qarra abbinkerono iso qeela dandiineemmota leellishshino! w20.07 24 guf. 12-13

Yihowa mannu ooso biifado uulla aana hagiidhitanni hegerera heedhara hedino. Ikkollana Addaaminna Heewani baxillaanchu Anninsara finqiltuta cubbunna reyo tenne alame eꞌino. (Rom. 5:12) Ikkina Yihowa maa assino? Bayichonko isi mannu sircho gatisanno gara coyiꞌrino. (Kal. 3:15) Yihowa Addaaminna Heewani sirchi cubbunna reyotenni wolaphanno gede Beettisita wodote kakkalo qixxeessate hedino. Qoleno Yihowa baalunku manni isira soqqama doodhanno faro fanino; hattono isira soqqama doodhitannorira hegere heeshsho aannonsa. (Yoh. 3:16; 1 Qor. 15:21, 22) Yihowa Beettisi widoonni lowo miliyoone ikkanno manna reyotenni kayisanno woyite baalanka mitte hige kayisanno yine dihendeemmo. Mayira? Korkaatuno kageeshshi manni mitteenni kaꞌꞌannoha ikkiro luulu woy koocu batiꞌrara dandaanno. Yihowa kayinni mittoreno qinaawinokki garinni diloosanno. Isi mannu salaame afiꞌranno gede baalunku coyi qinaawinoha ikka hasiissannota afino.—1 Qor. 14:33. w20.08 14 guf. 3; 15 guf. 5

Qullaawu Maxaafi rosaanchi, Qullaawa Maxaafa xiinxallinsoommosihu Yihowa Farciꞌraasincho ikke isira soqqamara kaaꞌlate ikkinota huwata hasiissannosi. Suwashshu wodani noosihu Qullaawu Maxaafi rosaanchi cuuamate dirimu dirimunni assa hasiissannosiri no. Umihunni, rosaanchu Yihowa afanna iso baxa, hattono ammana hasiissannosi. (Yoh. 3:16; 17:3) Hakkiinni rosaanchu Yihowa ledonna songote roduuwi ledo jaalooma kalaqiꞌra hasiissannosi. (Ibi. 10:24, 25; Yai. 4:8) Jeefoteno isi busha rosicho facci asse aguranna cubbisira maaro adha hasiissannosi. (Soq. 3:19) Hattono ammanannore wolootaho kula hasiissannosi. (2 Qor. 4:13) Hakkiinni heeshshosi Yihowara sayise oye mannu albaanni cuuamanno. (1 Phe. 3:21; 4:2) Hakko barra roduuwu baalu lowo geeshsha hagiidhitanno! Rosaanchu cuuamate dirimu dirimunni assannorira galatisi; hattono tenne assa agurannokki gede jawaachishisi. w20.10 17-18 guf. 12-13

Ateneeto wolootu ledo heewisiisattoha ikkiro, songote giddo waagu dinoe yite hedattora dandaatto. Mitu roduuwira rosiisate, qineessate woy roduuwa towaatate baxxitino dandoo noonsaha ikkara dandaanno. Ati ‘anera insate geeshshi dandoo dinoe’ yite hedattoha ikkara dandaanno. Tini umokki heeshshi assattohanna dhukakki afoottoha ikkoottota leellishshanno. (Fil. 2:3) Kayi qoropha hasiissannohe. Duucha woyite ateneeto lowo dandoo noonsari ledo heewisiisattoha ikkiro ditidhoommoho yite hedattora dandaatto. Qoleno songote giddo waagu dinoe yite hedattora dandaatto. Yihowa umi xibbi diro mitu Kiristaanira maalale loossanno gede qullaawu ayyaani elto uyinonsa; kayinnilla baalunku Kiristaani mittu gari elto diadhino. (1 Qor. 12:4-11) Ikkirono, mittu mittunku Kiristaanchi waaga afiꞌrinoho. Xaa yannara Yihowa ninkera maalale loosate elto diuyinonke. Xaano ikkiro addi addi dandoo heedhunkerono ninke baalunku Yihowa albaanni muxxete. w20.08 23 guf. 13-15

Worbanna waajjattokkiha ikkatto gede kaaꞌlahera Yihowa huucciꞌrittoro, Yihowa huuccattokki macciishshe dawaro qolanno; hattono tuge diagurannohe. (Soq. 4:29, 31) Isi woꞌmanka woyite ledokki ikke kaaꞌlannohe. Yihowa iillinohe qarra cincite saꞌꞌatto gede kaaꞌlinohehunna heeshshokki biddi assiꞌratto gede jawaante uyinohehu hiittoonniitiro hedi. Mannasi Duumu Baari giddoonni qole sayisino Magani, ati Kiristoosi rosaancho ikkatto gede kaaꞌlannohe. (Ful. 14:13) Aterano techohu barru qummeeshshira noo hedo coyiꞌri faarsaasinchite gedee ammana heedhohe. Yihowa haaruudde halashshaanono worbuulle ikkitanno gede kaaꞌlannonsa. Hanni Tomoyo yinanni rodoo lawishsha laꞌno. Ise mite yite sabbakate fultu barra minunni mine hadhanni heedheenna umo xaaddinoti qaete ama, “Yihowa Farciꞌraasine ledo horo hasaawa dihasiꞌreemma” yite hanqite saanqa aanaho cuffinose. Tomoyo beꞌe yitukkinni ledose soqqantanno rodoora “Mittore nafa coyiꞌrummakkinni, Yihowa Farciꞌraasincho ikkoommota affinota laitta? Konnira tashshi yiinoe!” yitino. Tomoyo xa woꞌma yanna suwisaancho ikkite soqqantanni no. w20.09 6 guf. 13-14

Aasa ‘raga baala keere assinohu’ Yihowa ikkinota coyiꞌrino. (2 Dud. 14:6, 7) Aasa tini keeru yanna deseꞌe yine ofollinannite yee dihedino. Hatteentenni isi tenne yanna katama minate, huxxa huxxate, shae seekkatenna waalchuwa qasate horoonsiꞌrino. Isi Yihudu mannira “Baatto anganke no” yiino. Aasa hatto yaasi mayyaate? Isi mannu Maganu uyinonsa gobbara diinu daye gawajjannonke yiikkinni heeꞌrannotanna katama mina hoolannonsakkita kulanni no. Isi mannu keeru yanna hayyotenni horoonsiꞌranno gede jawaachishino. Aasa keeru yanna olanto kaajjishateno horoonsiꞌrino. (2 Dud. 14:8) Hatto yaa isi Yihowa diaddaxxino yaateni? Deeꞌni. Aasa moote ikkino daafira mannu albillitte iillansara dandaanno qarrira qixxaawanno gede assa hasiissannosita afino. Aasa Yihudu manni afiꞌrinoti keeru yanna geeddannokkita afino; qoleno digeeddino. w20.09 15 guf. 4-5

Mittu songote cimeessi Maganu geꞌreewira hedanno daafira, insara kaaꞌlanno yee hedanno seera fushshannoha ikkara dandaanno. Ikkirono songote cimeessiranna maatete umo ikkino manchira noonsa silxaane lowo geya babbaxxitanno. Lawishshaho Yihowa cimeeyye daanyoota asse shoomino; isi insara cubbo loose maaro eannokki mancho songote giddonni bohate qeecha uyinonsa. (1 Qor. 5:11-13) Yihowa maatete umo ikkitinorira kayinni songote cimeeyyera uyinokki silxaane uyinonsa. Coyi gedera, maatete umo ikkino manchi maatesira seera fushshatenna hakkonne seera wonshitanno gede assate silxaane noosi. (Rom. 7:2) Lawishshaho maatete umo ikkino manchi oososi hashsha qaera higa hasiissannonsahu hiitte saateraatiro murate qoosso noosi. Qoleno konni seerira hajajama hoogguro seejjate silxaane noosi. (Efe. 6:1) Ikkirono baxillu noosihu maatete umo ikkino manchi minaamasi ledo “mitto biso” ikkino daafira, maatesira mitto coye murara albaanni ise ledo amaalamanno.—Mat. 19:6. w21.02 16-18 guf. 10-13

Maganu Qaali giddo noo halaali muxxete yineemmo gede assannonkehu wolu coyi, Yihowa konne halaale xawisannohu suwashshu wodani noonsahu umo heeshshi assanno mannira calla ikkinohuraati. (Soq. 13:48) Togoo manni Yihowa xaa yannara Qullaawu Maxaafi halaale rosiisannohu ammanaminohunna wodanaamu borojjichi widoonni ikkinota ammananno. (Mat. 11:25; 24:45) Konne halaale uminkenni afa didandiineemmo; qoleno konni halaali geeshsha muxxe ikkinohu wolu coyi horo dino. (Law. 3:13) Yihowa isi daafiranna isi mannaho hedinore wolootaho rosiisate looso eeggo uyinonke. (Mat. 24:14) Mannaho kulleemmo sokka lowo geeshsha muxxete; korkaatuno tini sokka mannu Yihowa maate miilla ikkannonna hegerera heeꞌrate hexxo afiꞌranno faro fantanno. (1 Xim. 4:16) Soqqammeemmo geeshshi ikki geeshshihano ikkiro, xaa yannara loonsanni heeꞌnoonniha konne taalle nookki looso kaaꞌlinanni heeꞌnoommo. (1 Xim. 2:3, 4) Maganu ledo loosa ninkera lowo ayirrinyeeti!—1 Qor. 3:9. w20.09 26-27 guf. 4-5

Soqqamaasinchu Phaawuloosi Rooma haꞌri woyite, Yihowa ammanate roduuwisi widoonni duucha hige kaaꞌlinosi. Lawishshaho, lame ammanantinoti Phaawuloosi jaalla Arisxirokoosinna Luqaasi isi ledo Rooma haꞌrate murcidhino. Yesuusi insa lamunkura Rooma keerunni iillitinanni yee qaale einonsakkiha ikkara dandaanno; ikkirono insa heeshshonsa qarru giddo tugge Phaawuloosi ledo Rooma haꞌrate kaꞌino. Insa gattannota affinohu tenne waajjishshanno doogo haꞌra hanaffuhu gedensaanniiti. Insa Sidoona iillitu woyite Yuliyoosi, Phaawuloosi ‘jaallasiwa haꞌreenna hasiisannosire kaaꞌlitannosi gede’ fajjino. (Soq. 27:1-3) Gedensaanni, Putiyoluusi yinanni katama iillituta, Phaawuloosinna jaallasi hakkiicho heedhanno roduuwi ledo xaaddino; kuri roduuwi Phaawuloosinna jaallasi ‘lamala barra insawa keeshshitanno gede huuccidhino.’ Hakko heeꞌranno Kiristaani Phaawuloosiranna jaallasira hasiisannonsare oye kaaꞌlinonsa; Phaawuloosino lowo geeshsha hagiidhe roduuwaho jawaachishanno woꞌnaalsha kulinonsati dihuluullissannote.—Soqqamaasinete Looso 15:2, 3 ledo heewisiisi. w20.11 15-16 guf. 15-17

Annuwanna amuuwa, coyidhinannirinninna assitinannirinni oosoꞌnera Yihowa lubbora baxxinannita leellishshe. Oosoꞌnera uyitinannihu baalunkunni roorino coyi Yihowa baxxanno gede kaaꞌla ikkitinota deꞌinoonte. Insara rosiisa dandiitinannihu kaajju rosi giddo mittu, Qullaawa Borro ganyite xiinxalla, gambooshshe haꞌranna soqqansho fula roso assidhanno gede kaaꞌlate. (1 Xim. 6:6) Oosoꞌnera maalaamittete hasiisannoreno wonsha hasiissannoꞌneti egennantinote. (1 Xim. 5:8) Kayinni tini busha alame baꞌanno woyite gatte saꞌe Maganu abbannota haaro alame eate kaaꞌlitannonsati, Yihowa ledo muli jaalooma kalaqiꞌransaati ikkinnina maalaamittete jiro ikkitinokkita deꞌinoonte. (Hiz. 7:19) Kiristaana ikkinohu batinyu annuwinna amuuwi qaaqquullinsa Yihowa ledo jaaloontanno gede kaaꞌlate dancha doorsha doodhitino; tini lowo geeshsha hagiirsiissannote. Togoo maate giddo lophitino ooso duucha woyite rossinoha dancha coye assa diagurtanno; hatto assansannino digaabbitanno.—Law. 10:22. w20.10 28-29 guf. 10-11

Soqqamaasinchu Pheexiroosi gedensaanni gaabbannore coyiꞌrino woy assino woyiti no. Lawishshaho, Yesuusi soqqamaasinesira qarrinse shinannisita kulinsa woyite, Pheexiroosi techohu barru qummeeshshira noo hedo coyiꞌre hayi yaate woꞌnaalino. (Mat. 16:21-23) Hakkiinni Yesuusi Pheexiroosi seejjinosi. Mannu Yesuusa amadasira dayita Pheexiroosi muddame kakkalaanote roorrichi borojjichira macca murino. (Yoh. 18:10, 11) Xaano Yesuusi Pheexiroosi lede seejjino. Qoleno Pheexiroosi Kiristoosa wolootu soqqamaasine kaaddusiro nafa isi horo kaadannosikkita coyiꞌrino. (Mat. 26:33) Ikkirono Pheexiroosi coyiꞌrino gede diꞌꞌikkino; isi manna waajjino daafira Mootichasi sase hige kaadino. Pheexiroosi hexxo mudhino daafira “gobbara fule hururame wiꞌli.” (Mat. 26:69-75) Isi Yesuusi horonta gatona diyaannoe yee hedikkinni digatino. Ikkirono Pheexiroosi hexxo mudhe badhera dihigino. Pheexiroosi soꞌro loosirono Yihowara soqqama diagurino.—Yoh. 21:1-3; Soq. 1:15, 16. w20.12 20 guf. 17-18

Maatete umo ikkinohu isonooto heeshshi assannota duucha doogonni leellisha dandaanno. Lawishshaho, minaamasinna oososi guuntete xeꞌne noonsare ikkitinota dideanno. Maatesi miilla coyidhinori isi yaannori ledo sumuu yaannokkiha ikkiro nafa, yitannore macciishshe seekke hedanno. Hattono isonooto heeshshi assanno minaanni, mini giddo loonsanniha mannu meyate loosooti yee hedanno loosono loosanno. Tini shota ikka hooggasira dandiitanno. Mayira? Riicheeli yinanni rodoo togo yitino: “Ani ilamoomma qooxeessira mannu, mittu minaanni sayinna hayishshe woy mine fee minaamasi kaaꞌliro, olliichisinna fiixisi, ‘Isi labbaanko?’ yee hedanno. Kuni manni, ‘Iso minaamasi qeeltino’ yee hedanno.” Kiꞌne heedhinanni qooxeessirano mannu hatto yee hedannoha ikkiro, Yesuusi rosaanosi lekka hayishshe, mannu borojjootu loosi gede asse hedanno looso loosinota qaagge. Dancha maatete umo ikkino manchi mannu danchaho woy worbaho yaannosi gede assiꞌrate daafira ikkikkinni, minaamasinna oososi hagiirsiisate daafira hedanno. w21.02 2 guf. 3; 4 guf. 11

Qaagate dandoonke Yihowa uyinonke eltooti; albi heeshshonke aye geeshshano dancha ikkituro, haaro alamera kayinni hakkiinni saꞌinota dancha heeshsho heeꞌneemmo. Wolootu xissiissannonkeha ikkara dandaanno, gatona yinummoro kayinni, Yihowara soqqamate illachisha dandiineemmo. Ninkeneeto quwa saꞌne bushiisha Yihowara hagiirrunni soqqammeemmokki gede assitankera dandiitanno. Ikkollana, soqqamaasinchu Phaawuloosi gede ninkeno, Yihowa gatona yiinonketa addaxxa hasiissannonke. (1 Xim. 1:12-15) Hegere heeshsho heeꞌrate hexxo noonke. Maganu abbannote haaro alamera alba assinoommore hendanni diqurtineemmo. Qullaawu Maxaafi hatte yanna daafira kulanni, “Sainore baala hambanni” yaanno. (Isa. 65:17) Hanni hedi: Ninke giddo Yihowara lowo diro soqqantinori mitu roduuwi xa geedhitino; ikkirono, ninke baalunku haaro alamera wirro wedella ikkineemmo. (Iyo. 33:25) Konnira, ninke baalunku albi heeshshonke quwa saꞌne heda hoogate murciꞌno. Hatteentenni albillittete yannanna Yihowara soqqamate illachinsho. w20.11 24 guf. 4; 29 guf. 18-19

Albillitte mayi ikkanno? Bayiru qarri yannara Yihowa lame dhagge ikkitanno doogonni gatisannonke. Umihunni, isi uullate mootoolla Bayira Baabiloone yaano kaphu ammaꞌno huntanno gede assanno woyite ammanantino soqqamaanosi gatisanno. (Aju. 17:16-18; 18:2, 4) Hakkiinni, isi gattinota Sheexaanu alame Armagedooni oli yannara hunanno woyiteno mannasi gatisanno. (Aju. 16:14, 16) Yihowawa gamba yine heeꞌnummoro Sheexaanu hegerera gawajjannonkere assa didandaanno. Isinni hegerera baꞌꞌannohu iso umosiiti. (Rom. 16:20) Hakko daafira olunniha woꞌma uduunne uddiꞌno hattono fushshine hoolloonke! Konne ola callikki olamate woꞌnaaltooti. Ammanate roduuwakki kaaꞌli. Yihowa biddishshano harunsi. Hatto assittoro, baxillaanchu iimi Annikki jawaachishannohetanna agarannoheta addaxxa dandaatto.—Isa. 41:10. w21.03 30 guf. 16-17

Yihowa addaxxineemmota leellisha dandiineemmohu hiittoonniiti? Isi aannonke biddishsha harunsineeti. Qullaawu Maxaafi giddo wodanaaꞌmanna Yihowa addaxxa kaaꞌlitannota leellishshannoti lowo xagge no. Kuri xagge xiinxallatto woyite, Maganu soqqamaano mannu giwinsa woyite wodanaaꞌmitanno gede mayi kaaꞌlinonsaro wodanchi. Lawishshaho, Yihudunnihu aliidi yoo mini soqqamaasine sabbaka agurtanno gede kulinsa woyite, insa diwaajjitino. Hatteentenni, “Mannaho hajajamantenni Maganoho hajajama hasiissannonke” yitino. (Soq. 5:29) Soqqamaasine ganninsahu gedensaanni nafa masse qece diyitino. Mayira? Korkaatuno insa Yihowa ledonsa noota affino. Insa iso lowo geeshsha hagiirsiissino. Konnira dancha duduwo duduwa diagurtino. (Soq. 5:40-42) Rosaanchu Isxifaanoosino shinasira kaꞌni woyite, wodanaaꞌmino; konnira albisi ‘sokkaasinenniha lawino.’ (Soq. 6:12-15) Mayira? Korkaatuno isi Yihowa hagiirsiisinota afino. w21.01 4 guf. 10-11

Tini Yihowa albaanni keeraanchu tiiꞌꞌi noonsatanna minshe noonsakkire ikkitinota leellishshannote. (Isa. 1:18) Insa heeshshonsa Yihowara sayisse uyite cuuantino Kiristaanaatinna Yesuusita wodote kakkalo ammantannoreeti; hattono Yihowa ledo jaalooꞌmitinoreeti. (Yoh. 3:36; 1 Phe. 3:21) Konnira insa Maganu zuufaanera albaanni uurrite, ayyaanaamittennihu qullaawu mini giddo uullayidi hoowera “hashshanna barra” qullaawa soqqansho soqqamate ikkadda ikkitinoreeti. (Aju. 7:15) Insa Maganu Mangiste balaxisiissanno daafira, xaa yannara nafa sabbakatenna manna rosaano assate looso diinaggaabbe loossanno. (Mat. 6:33; 24:14; 28:19, 20) Bayira qarra gatte saꞌinoti lowo daga “ayirradu barcimira ofollino” Magani “dukkana guggushshannonsa” daafira towaatannonsata dihuluullantanno. Wolu geꞌreewi wido ikkitinori quqquxantanni keeshshitinoti togo yitanno hexxo woꞌmitinota wodanchitanno: “[Maganu] hindiiddo baala illensanni feyanno.”—Aju. 21:3, 4. w21.01 16 guf. 9-10

Yihowa maate miilla ikkanke lowo geeshsha hagiirsiissannonke. Hattono Yihowa qixxeessinota umimmate silxaane ayirrinseemmo. Qullaawu Maxaafi Yihowa meentono labballono taashshe laꞌꞌannota kulanno. Lawishshaho umi xibbi diro, Yihowa qullaawa ayyaana labballoho calla ikkikkinni meentohono uyino; kuni ayyaani maalale loossanno gede lawishshaho, addi addi afoo coyidhanno gede assinonsa. (Soq. 2:1-4, 15-18) Meentuno labballuno iima Kiristoosi ledo gashshate qullaawu ayyaaninni buurantino. (Gal. 3:26-29) Qoleno meentuno labballuno uullate aana hegere heeshsho afidhanno. (Aju. 7:9, 10, 13-15) Hattono meentohono labballohono dancha duduwo duduwatenna rosiisate looso uyinoonni. (Mat. 28:19, 20) Isinni Soqqamaasinete Loosi maxaafi, Phirisqilla yinanni rodoo minaannise Aqiila ledo, lowo roso rosinohu Aphiloosi yinanni manchi halaale seekke huwatanno gede kaaꞌlitinota kulanno.—Soq. 18:24-26. w21.02 14 guf. 1; 15 guf. 4

Cimeeyye, halashshaano dancha gede sabbakkannorenna rosiissannore ikkitanno gede kaaꞌlate qeechi nooꞌne. Mittu rodii ate ledo heeꞌre Qullaawa Maxaafa xiinxallisa waajjiro, ati xiinxallisattora dandaattota kulisi. Cimeeyye Qullaawu Maxaafi rosiisaano jawaachishatenna kaaꞌlate lowore assa dandiitanno. (1 Tes. 5:11) Xaa yannara Qullaawu Maxaafi xiinxallo hooggunkero nafa, wolootu roduuwi xiinxallissannore ayyaanaamittetenni lophitanno gede kaaꞌla dandiineemmo. Xiinxallinseemmo woyite lowore coyiꞌnummokkinni dancha gede qixxaamboommo hedo coyiꞌne rosiisaancho kaaꞌla dandiineemmo. Rosaano gambooshshe dagganno woyite jaallansa ikka dandiineemmo; hattono dancha lawishsha ikkineemmonsa. Songote cimeeyyeno rosaano kaaꞌlate yanna gaaꞌmite insa jawaachisha dandiitanno; qoleno rosiisaano qajeelsitannonsa, hattono galattannonsa. Assineemmori shiimare ikkiro nafa, mittu manchi iimi Annanke Yihowa baxannonna isira soqqamanno gede kaaꞌlanke lowo geeshsha hagiirsiissannonke! w21.03 13 guf. 18-19

Daawiti ammaꞌninanniha ikkinota leellishino. Lawishshaho, isi wedellichu heeꞌre annisi geꞌreewo diinaggaawe towaatanno. Isira hatte yannara gawajjara dandaannori iillinosi. Daawiti iillinosire gedensoonni Moote Saaoolira togo yee xawisino: “Ani anniꞌya geꞌreewo allaale heeꞌreenna, doobbiichu woy wolu moyichi geꞌreewo amade adhe haꞌranno woyite, faana gane mare afiinni kareemmo.” (1 Sam. 17:34, 35) Daawiti geꞌreewu mite ikkannokki gede seekke agara hasiissannosita afino. Wedellu roduuwino uyinanninsa looso baala diinaggaabbe loosse Daawiti lawishsha harunsa dandiitanno. Daawiti wedellichu heeꞌre Yihowa ledo lubbora jaalooꞌmino. Kuni jaaloomi Daawitira noosi worbimmanninna muuziiqa godoꞌlate dandoosinni rooranno. Yihowa Daawitira Maganosi calla ikkikkinni lubbote Jaalasiiti. Wedella, assa dandiitinannihu baalunkunni roorino coyi, iimi Anniꞌne ledo nooꞌne jaalooma kaajjishiꞌrate. w21.03 3 guf. 4-5