Badheessa

Mannu giwankera dihasiꞌneemmo. Ammanankera yine reyano dihalchineemmo. Ikkina gimbanninke woyite hagiirraamma ikkineemmohu mayiraati? Umihunni, cincine saꞌneemmo woyite Yihowa hagiirsiinseemmo. (1 Phe. 4:13, 14) Layinkihunni, ammananke fonqolante kaajjado ikkitanno. (1 Phe. 1:7) Sayikkihunni, taalle nookki baꞌraaꞌra yaano hegere heeshsho afiꞌneemmo. (Rom. 2:6, 7) Yesuusi reyotenni kaihunni shiima yanna gedensaanni soqqamaasine isi afidhinanni yiino hagiirre afidhino. Gashshaasine insa gante kaꞌe sabbaka agurtanno gede hajajjunsata hagiidhitanni fultino. Mayira? “Yesuusi suꞌmira yite shollinye adha hasiissannonsata egentino” daafiraati. (Soq. 5:40-42) Insa gibbannonsa diinna waajjantenni roore Mootichansa baxxino. ‘Dancha duduwo agurtukkinni kulte’ tenne leellishshino. Xaa yannara lowo roduuwinke qarra ikkannori heeꞌrirono agurtukkinni ammanante soqqantanni no. Insa Yihowa loosonsanna suꞌmisira leellishshino baxille hawannokkita affino. w21.03 25 guf. 18-19

Buuramino Kiristaani iimira haꞌrate hexxo adhe ilaminota diꞌꞌikkitino. Tenne hexxo wodaninsara worannohu Maganoho. Insa hexxonsa daafira heddanno, huuccidhanno, hattono iimi baꞌlattonsa adhate quqquxantanno. Insa ayyaanaamu bisinsa hiittooha ikkannoro diaffino. (Fil. 3:20, 21; 1 Yoh. 3:2) Ikkirono Iimi Mangistera heeꞌrate quqquxantanno. Wolu geꞌreewi wido ikkitinori uullate aana heeꞌrate hexxonsa lowo geeshsha naaddanno. Maganu manna kalaqinohuno uullate aana hegerera heeꞌraraati. Insa uulla woꞌma gannate assate kaaꞌlantanno yanna quqquxante agadhitanno. Insa mine miꞌnitannota, kaashsho kaasidhannotanna guuta ordu fayyimma noonsa ooso lossidhanno yanna quqquxantanno. (Isa. 65:21-23) Hattono addi addi base lawishshaho, ilaalla, dubbonna baara daaꞌꞌatate qoleno Yihowaha addi addi kalaqama xiinxallate quqquxantanno. Baalunkunni roore, Yihowa ledo noonsa jaaloomi lexxanninna kaajjanni haꞌrannota affino daafira hagiidhitanno. w21.01 18-19 guf. 17-18

Baabiloonete olanto Israeelete baatto horrite gudduhu gedensaanni laꞌꞌanno manni togo yaanno: “Baatto Baabiloonootu angara eꞌino daafira, mannunna saada heedhannokkita ona ikkitanno.” (Erm. 32:43) Iyueeli masaalo coyiꞌrihunni mitu 200 diri gedensaanni, Yihowa Ermiyaasi konni siꞌꞌi daafira wolere lede masaalanno gede assino. Yihowa olanto bunshe loosannoha Israeelete manna baala hasse qafaddannota coyiꞌrino. Isi togo yiino: “‘Qulxuꞌme woshshaandannihu gede woshshaaddannorenna moyicho ugaanxannihu gede assite ugaaxxannore soyeemmo. Insano ilaallatenna gaarrate, hattono kinnate giddo noo goddara ugaaxxe amaddannonsa. . . . [Assitino bunshera] qorichisheemmonsa.’” Busha loosonsa agurannokkihu Israeelete manni baaru giddono ikko dubbu giddo maaxame Baabiloonete olanto anganni gatara didandaanno.—Erm. 16:16, 18. w20.04 5 guf. 12-13

Looxi quuxxote giddo heeꞌre Yihowara rahe dihajajamino. Looxi Maganu yiinosire lashshi assino woy dihajajamino yine hendeemmoha ikkara dandaanno. Yihowa kayinni iso facci asse diagurino. Yihowa “mararinosi daafira” sokkaasine Looxi, galtesinna lamenta seennesi anga amadde katamu gobbaanni fushshitanno gede assino. (Kal. 19:15, 16) Yihowa Looxi mararanno gede assinosihu duuchu korkaati heeꞌrara dandaanno. Looxi katamu giddonni fulate hobbi ruxxi yiinohu katamu gobbaanni noo manna waajjino daafira ikkara dandaanno. Isi hobbi ruxxi yaanno gede assinosiri wolurino no. Looxi Soddoomu katami qooxeessira noohu mittu Lagichira noo bale giddo ubbinote lame mootoolla daafira macciishshikkinni digatino. (Kal. 14:8-12) Qoleno, isi anna ikkino daafira maatesira yaadinoha ikkara dandaanno. Hattono, Looxi dureessa ikkino daafira Soddoomu katami giddo dancha mine miꞌnikkinni digatino. (Kal. 13:5, 6) Ikkollana, kuri coyibba Looxi Yihowara hajajama giwate gari korkaata diꞌꞌikkitino. Yihowa kayinni Looxi soꞌro diꞌꞌillachishino; hatteentenni iso “keeraanchu manchi” gede asse lainosi.—2 Phe. 2:7, 8. w20.04 18 guf. 13-14

Wedelloota, qaaqquullu heedhineenna affinoꞌneri qaaqqimma guddinoonnita huwatate yanna hasiissannonsaha ikkara dandaanno. Yihowa kayinni aana calla laꞌꞌannokkita addaxxa dandiitinanni. Isi ayimmaꞌnenna maa assate dandoo nooꞌnero afanno. (1 Sam. 16:7) Maganu ledo nooꞌne jaalooma kaajjishidhe. Daawiti Yihowa kalaqinore seekke lae isi ledo noosi jaalooma kaajjishiꞌrino. Isi kalaqamu Yihowa daafira rosiisannosihu hiittoonniitiro seekke hedino. (Far. 8:3, 4; 139:14; Rom. 1:20) Wolu assa dandiitinanni coyi jawaante aannoꞌne gede Yihowa huucciꞌrate. Lawishshaho rosu mine ooso Yihowa Farciꞌraasine ikkitinoonnihura mishshannoꞌne woy qacifattannoꞌne? Hatto ikkiro konne fonqolo qeeltine saꞌinanni gede kaaꞌlaꞌnera Yihowa huuccidhe. Hattono Qaalisi Qullaawu Maxaafi aana xintantino borronninna viidiyotenni afidhinannita kaajja amaale harunse. Yihowa konne fonqolo qeeltine saꞌinanni gede kaaꞌlannaꞌne laꞌini kiiro iso albinni roore addaxxitinanni. Qoleno wolootu Yihowa addaxxitinannita laꞌanno woyite ammantannoꞌne. w21.03 4 guf. 7

Baxantanno jaalla mimmitoho giddonsata hasaapha baxxanno. Yihowa ledo noonke jaaloomino hattooti. Yihowa Qaalisi widoonni hasaawisannonke, qoleno Qaalisi hedosinna macciishshamannosire anfeemmo gede kaaꞌlannonke. Ninkeno huuccattotenni Yihowa hasaawisanna giddonketa isira kuꞌla dandiineemmo. Yihowa baxannonke Jaala ikkino daafira, huuccattonke macciishshe agurannoha calla ikkikkinni dawaro qolannonke. Mito woyite isi huuccattonkera dawaro rahe qolara dandaanno. Mite hajo daafira kayinni marro marro hinge huucciꞌra hasiissannonke woyiti heeꞌrara dandaanno. Ikkirono Yihowa gara ikkitino yannara, ninkera maltino dawaro qolannota dihuluullammeemmo. Mito woyite Yihowa huuccattonkera dawaro ninke hendoommokki doogonni qolara dandaanno. Lawishshaho isi iillinonke qarra hoolikkinni, hakko qarra ‘cincine saꞌꞌa dandiineemmo gede’ hayyonna jawaante aankera dandaanno. (1 Qor. 10:13) Ikkina muxxe ikkitinota huuccattote qoosso naandeemmota leellisha dandiineemmohu hiittoonniiti? Hatto assa dandiineemmo doogga giddo mitte, Yihowa “Agurtinikkinni huuccidhe!” yee amaalinonke amaale macciishshate.—1 Tes. 5:17. w20.05 27-28 guf. 7-8

Seeda doogo qolchantannori gufidhannokki gede albansaanni noo doogo illachishshanno. Kayinni, insa ubburo nafa rakke kaꞌe doddanno. Insa gufidhanno gede assinonsare ikkikkinni qeelte adhitanno baꞌraaꞌra illachishshanno. Coyiꞌneemmorinni woy assineemmorinni soꞌro loonseemmo daafira dondanni heeꞌne duucha woyite gufiꞌnammora dandiineemmo. Woy ledonke doddannori loossino soꞌro gawajjitankera dandiitanno. Togoori nooreentilla. Korkaatuno, ninke baalunku guuntete xeꞌne noonkereeti; hattono dondanni heeꞌnoommohu heeshshoniwa massitannote ruukkashsho doogoraati. Hakko daafira, mimmitinke ledo “kiphi kiphi” yinammora dandiineemmo. Tini, “kuꞌu koꞌoye koffi” assiꞌneemmo gede assitannonke. (Qol. 3:13) Ikkirono, gufiꞌneemmo gede assinonkere illachisha agurre afiꞌneemmo baꞌraaꞌra illachinsho; qoleno doda agurroonke. Gufisinonke manchira hanqine, umboommowiinni kaꞌne doda gimbummoro baꞌraaꞌra adha didandiineemmo. Qoleno, hegere heeshsho afiꞌrate ruukkashsho doogora doddanni noorira guficho ikkinammora nafa dandiineemmo. w20.04 26 guf. 1; 28 guf. 8-9

Masaalaanchu Daanieeli, Maganu manna kissannota aante aantete kaꞌanno mangistubba kulino. Kuri mangistubba jawa siwiilu misilera noohu addi addi bisinni lawinsoonni. Jeefonniha mannu gashshoote, siwiilunna dorunni seekkinoonni lekkanni lawinsoonni. Misilete lekka, Alamennita Wolqaataame Mangiste Angilo-Ameerika riqibbanno. Daanieeli masaalo, Maganu Mangiste mannu gashshoote baala huntannohu, kuni gashshooti gashshe heeꞌreenna ikkinota leellishshanno. Soqqamaasinchu Yohaannisino, aante aantete kaꞌinotanna Maganu manna kissannota alamennita wolqaataamma mangistubba kulino. Isi kuri mangistubba lamalu umi noosi moyichinni lawisino. Moyichunnihu lamalki umi, Alamennita Wolqaataame Mangiste Angilo-Ameerika riqiwanno. Tenne afanke lowo geeshsha hasiissannote; korkaatuno kuni moyichi lamalki umi gedensaanni wole umo fushshannota dikulloonni. Kiristoosi iimi olantosi ledo lamalki umono moyichono hunannohu, lamalki umi gashshe heeꞌreennaati.—Aju. 13:1, 2; 17:13, 14. w20.05 14 guf. 11-12

Tini harancho yaatto Maganu Kalaqaancho calla ikkikkinni baxillu Buichono ikkinota qaangeemmo gede assitannonke. Yihowa baxannonke! Baxillisi beꞌe yineemmokki gede, hagiidhineemmonna harshammi yineemmo gede assannonke. Kiristaanu baxille leellisha hasiissannonsa. Tini hajajote. (Mat. 22:37-40) Yihowa seekkine anfummoro umi hajajo agadha qarrisa hoogankera dandiitanno. Korkaatuno, Yihowa guutaho; isi ninkera hedannonke hattono shaqqillunni towaatannonke. Layinki hajajo agadha kayinni qarra ikkitankera dandiitanno. Mayira? Korkaatuno ammanate roduuwinke guuntete xeꞌne noonsareeti. Insa mito woyite coyidhannorinni woy assitannorinni koffi assitankera dandiitanno. Yihowa tenne hajajo agadha qarrissannonketa afino daafira, mite Qullaawu Maxaafi borreessaano baxille leellisha hasiissannonkehu mayiraatironna hatto assa dandiineemmohu hiittoonniitiro kaaꞌlitannonke amaale borreessitanno gede assino. Kuri borreessaano giddo mittu soqqamaasinchu Yohaannisiiti.—1 Yoh. 3:11, 12. w21.01 8 guf. 1-2

Yihowara soqqammoommo diri ikki geeshshihano ikkiro, ‘Sheexaanu wodanaꞌya beehannokki gede gargadhanni noommo?’ yine umonke xaꞌma hasiissannonke. Lawishshaho, televizhiinete woy interneetete aana gariweelo misile dagguro maa assatto? Tini teeda baꞌino misile woy mancaꞌꞌare leellishshanno filme diꞌꞌikkitino yite hedattoha ikkara dandaanno. Kayinni kuni Sheexaanu wodanakki beehate horoonsiꞌranni noorella ikka? Tini misile mittu manchi xarra dadhate horoonsiꞌrannohu shiimu bili gedeeti. Isi balaxe bila afooho woranno. Hakkiinni meenchunni gananno woyite bilu giddo hige eꞌꞌe daranno. Televizhiinete woy interneetete leellinshanniti gariweelo misile, hakkonni shiimu bili gede ikkitara dandiitanno. Umi qara hakkeeshsha gawajjannoha lawannokkiri, gedensoonni Yihowa baddallanni gede assara dandaanno. Konnira bushu coyi wodanikki giddora eannokki gede feexidhe giwi! Yihowa suꞌma waajjate woꞌmanka woyite wodanakki mitto assiꞌri! w20.06 11-12 guf. 14-15

Ayyaanaamittetenni qiiddinore ceeꞌminummokki kaaꞌla hasiissannonke. Yesuusi lawishshunni kulinohu ballehino beetti gede, insarano boosaallu boono ikkinonsaha ikkara dandaanno. (Luq. 15:17-24) Qoleno Sheexaanu alame assidhinonsa farritto, ayyaanaamittensa albinni roore gawajjitinoha ikkara dandaanno. Konnira, Yihowara noonsa ammana wirro kaajjishidhanno gede kaaꞌla hasiissannonke. Baꞌino geꞌrecho daafira kulanno lawishshira, Yesuusi allaalaanchu baꞌino geꞌrecho qotisira duqqe hoshshanniwa qolino gara xawisino. Allaalaanchu baꞌino geꞌrecho hase afate lowo yannanna wolqa gudino. Ikkollana, geꞌrecho lekkatenni hoshshanniwa higate wolqa hoogginota huwatino daafira qoteho duqqe massino. (Luq. 15:4, 5) Ayyaanaamittetenni qiiddinori Yihowawa higgannokki gede ataawe ikkinonsare qeeltanno gede kaaꞌlate, lowo yannanna wolqa hasiissannonkeha ikkara dandaanno. Ikkollana Yihowa ayyaani kaaꞌlonni, hattono Qaalesinna dirijjitesi qixxeessitino borro horoonsiꞌne, ayyaanaamittetenni qiiddinori wirro jawaattanno gede kaaꞌla dandiineemmo. Konnira ayyaanaamittetenni qiidino rodoo Qullaawa Maxaafa xiinxallisi yinihero, hagiirrunni xiinxallisi ballo. w20.06 28 guf. 14-15

Ninke mittu mittunku addu Kiristaana bande anfanni gede assanno baxille leellisha hasiissannonke. Ikkollana, “halaalu egennonna woꞌma [wodanchano]” afiꞌra hasiissannonke. (Fil. 1:9) Hatto assa hoongummoro, ‘mannu awaawurshinna soꞌrote bubbe,’ lawishshaho kaadaasinete rosi gatantarsankera dandaanno. (Efe. 4:14) Umi xibbi diro lowo rosaano Yesuusa harunsa agurtuta, soqqamaasinchu Pheexiroosi kayinni Yesuusira “hegere heeshsho qaali” noosita ammanannota coyiꞌrino. (Yoh. 6:67, 68) Hatte yannara Pheexiroosi Yesuusi coyiꞌrinore woꞌmunni woꞌma huwatinokkiha ikkirono, Kiristoosi daafira halaale buuxinohura ammaname heeꞌrino. Atino Qullaawu Maxaafi halaalira noohe ammana kaajjishiꞌra dandaatto. Hatto assittoro, aye geeshshi qarri iilliherono ammanakki kaajjite heedhanno; hattono wolootu ammana jawaattanno gede kaaꞌla dandaatto.—2 Yoh. 1, 2. w20.07 8 guf. 2; 13 guf. 18

Roduuwinke halaalunni heedhanno gede kaaꞌlate mararreemmore ikka hasiissannonke. (1 Yoh. 3:10, 11, 16, 17) Roduuwinke ledo faffote yannara calla ikkikkinni qarru barrano baxama hasiissannonke. Lawishshaho, sheshifachishanna mitore assite kaaꞌla dandaattohu shiiro amaddinosihu no? Woy kalaqamu danonni Gambooshshu Addaraashensa woy mininsa diigameenna qarrantino roduuwi no? Roduuwanke lubbora banxeemmotanna mararreemmonsata leellisha dandiineemmohu coyiꞌneemmorinni roore assineemmorinniiti. Mimmito banxeemmoha ikkiro, baxillaanchu Anninke Yihowa faale haꞌnanni heeꞌnoommo. (1 Yoh. 4:7, 8) Baxille leellisha dandiineemmo doogga giddo mitte, mimmitoho gatona yaate. Lawishshaho, mittu manchi koffi assinonke daafira gatona yiie yaara dandaanno. Iso gatona yineemmohanna hakko coye agurreemmoha ikkiro baxille leellinshanni heeꞌnoommo.—Qol. 3:13. w20.07 24 guf. 14-15

Xaa yannara assinannihu gede reyotenni kainohu mittu mittunku manchira Qullaawa Maxaafa xiinxallisanno rodoo worranni ikka? Woy haaruudde songuwate gaammanni ikka? Hattono reyotenni kaꞌannore rosiissanno gede qajeelsinanni ikka? Tini hakkawote anfeemmota ikkitanno. Ikkirono, Kiristoosihu Kumu Diri Gashshooti jeefora ‘Kaaliiqa egennino manni baatto’ woꞌmannota anfoommo. (Isa. 11:9) Hattee yannara hagiirsiisanno looso diinaggaambe loonseemmo! Kiristoosihu Kumu Diri Gashshooti yannara baalanti Yihowa soqqamaano iso hagiirsiisate biddi assiꞌra hasiissannonsare biddi assidhanno. Konnira insa reyotenni kaꞌinori cubbo loosa agurate sharrantannonna Yihowa biddishshi garinni heedhanno gede kaaꞌlitannonsa woyite qarrinsa leellannonsa. (1 Phe. 3:8) Reyotenni kaꞌꞌanno manni Yihowa soqqamaano umonsa heeshshi assitannorenna iso hagiirsiisate sharrantannore ikkitinota laꞌꞌanno woyite ledonsa Yihowa magansiꞌrate kakkaꞌꞌannoti dihuluullissannote.—Fil. 2:12. w20.08 16 guf. 6-7

Soqqamaasinchu Phaawuloosi amaale macciishshine uminke looso fonqolle laꞌneemmoha ikkiro, ninkerano baxxitino dandoo noonketa wodanchineemmo. Lawishshaho mittu songote cimeessira madirakete fule dancha gede rosiisate dandoo noosikkiha ikkara dandaanno; kayinnilla manna rosaano assate worba ikkara dandaanno. Woy isi songosi giddo noote wole cimeeyye geeshsha mito coye qineessate dandoo noosikkiha ikkara dandaanno; kayinnilla shaqqadonna baxillaancho ikkino daafira roduuwu ruxxi yitukkinni Qullaawu Maxaafi amaale xaꞌmidhannosiha ikkara dandaanno. (Ibi. 13:2, 16) Dandoo noonketa huwantummoro, songo kaaꞌlinanni heeꞌnoommota anfeemmo daafira hagiidhineemmo. Hattono ninketenni baxxitino dandoo noonsa roduuwa dihinaanseemmo. Songote giddo noonke qeechi ikkihano ikkiro, baalunku soqqanshote dandoonke woyyeessiꞌra hasiissannonke. w20.08 24 guf. 16-18

Mitte hambannikkita “Lowo Daga” yitanno cuꞌmo afidhino lallawo, 1935nni Ameerikaho Waashingiteni Diisi katamira assinoonnihu mittu jawu gambooshshiwa Roduu Raazerfordi shiqishino. Roduu Raazerfordi lallawo shiqishi woyite, Yohaannisi Ajuuja 7:9te “lowo daga” (Kingi Jeemsi Vershiini) yiniri ayeootiro xawisino. Hakka geeshsha, tini gaamo hakkeeshsha ammanama hooggurono iimira hadheenna layinki deerra uyinanninsareeti yine hendanni. Roduu Raazerfordi Qullaawa Borro horoonsiꞌre lowo daga yiniri iimira haꞌrate doorantinokkita xawisino; ikkirono, tini daga “bayira qarra” gatte saꞌe uullate aana hegerera heedhannore Kiristoosire wole geꞌreewo ikkitinota kulino. (Aju. 7:14) Yesuusi togo yee qaale eino: “Tenne hoowe giddo nookkihu wolu geꞌreewino nooe; insano abba hasiissannoe. Insano huuroꞌya macciishshitanno. Mitte hoshsha ikkitanno; allaalaanchuno mitto ikkanno.” (Yoh. 10:16) Wole geꞌreewo yiniri Gannate ikkitanno uullara hegerera heeꞌrate hexxo noonsare ammanantinote Yihowa Farciꞌraasineeti.—Mat. 25:31-33, 46. w21.01 14 guf. 1-2

Cincine sabbakate loosonke umo fushsha hasiꞌneemmoha ikkiro, ninkeneeto qeeꞌla hasiissannonke. (Mat. 28:19, 20) Meessanaa qeeꞌlate akati kalaqamunni afiꞌnanniha diꞌꞌikkino. Isinni duucha woyite mitto looso ninkera injiinonke garinni loosa rakkannonke. Ikkollana mito woyite lowo geeshsha hasiisanno coyi loosate shota diꞌꞌikkanno. Konnira ninkeneeto qeeꞌline loosa hasiissannonke. Shota ikkinokki looso loosa dandiineemmo gede ninkeneeto qajeelsiꞌrate kaaꞌlo hasiissannonke. Konnira Yihowa qullaawu ayyaanisi widoonni kaaꞌlannonke. (Gal. 5:22, 23) Soqqamaasinchu Phaawuloosi isonooto qeeꞌlannoho. Ikkollana isi, gara ikkinore assate manninatesi “gadadisa” hasiissinosita coyiꞌrino. (1 Qor. 9:25-27) Isi ninkeno umonke qeeꞌlineemmo gedenna baalanka coye “seerunninna amanyootunni” assineemmo gede jawaachishinonke. (1 Qor. 14:40) Woꞌmanka woyite ayyaanaamittete coye assate ninkeneeto qeeꞌla hasiissannonke; kuri coyi giddo mittu, sabbakate looso ganyine loosate.—Soq. 2:46. w20.09 6-7 guf. 15-17

Xaa yannara batinye gobbara faajjetenni sabbankanni heeꞌnoommo. Heeꞌrattohu magansiꞌrattota hoollannikki gobbaraati? Hatto ikkiro, ‘Tenne keeru yanna ma garinni horoonsiꞌranni noommo?’ yite ateneeto xaꞌmi. Tenne goofimarchu yannara Yihowa dirijjite alamete doyichora sabbakatenna rosiisate looso, konni albaanni loonse egenninoonnikki garinni loossanni no; tini lowo geeshsha hagiirsiissannote. Konnira Yihowa mannira isira soqqantannoti duucha faro noonsa. Keeru yanna hayyotenni horoonsiꞌra dandaattohu hiittoonniiti? (2 Xim. 4:2) Nootto gara layidhe, ati woy maatekki miili dancha duduwo albinni roore duduwa dandiitinannironna teꞌee heda dandaatto. Suwisaano ikkitine soqqama dandiitinanniha lawannohe? Tini yanna maalaamittete jiro duuꞌninannita diꞌꞌikkitino; maalaamittete jiro bayiru qarri yannara kaaꞌlitannori dino. (Law. 11:4; Mat. 6:31-33; 1 Yoh. 2:15-17) Batinye halashshaano sabbakatenna rosiisate yite wole qaale rossino. Yihowa dirijjite 1,000 saꞌꞌanno afiinni Qullaawu Maxaafi aana xintantino borro qixxeessite insa kaaꞌlitanni no. w20.09 16 guf. 9-11

Danchu olamaanchi ammanaminoho. Isi baxanno mancho woy naadanno coye agarate jawaate olamanno. Phaawuloosi Ximootewoosi Maganoho ammanamanno gede yaano iso cuꞌmiꞌre heeꞌranno gede jawaachishinosi. (1 Xim. 4:7) Magano albinni roore banxummoronna isira ammanammummoro, halaale cuꞌmiꞌre heeꞌrate hasattonke lexxitanno. (1 Xim. 4:8-10; 6:6) Worbu olamaanchi woꞌmanka woyite olaho qixxaawe heeꞌrate isonooto eemadhano hasiissannosi. Ximootewoosi ayyaanaamittetenni jawaate heeꞌrino; tennera kaaꞌlitinositi Phaawuloosi busha yortowiinni xeertiꞌranno gede, Maganu baxanno akatta heedhannosi gede, hattono ammanate roduuwisiwa aananno gede qullaawu ayyaaninni amaalinosi amaale macciishshasiiti. (2 Xim. 2:22) Isi tenne assate isonoo eemadha hasiissinosi. Ninkeno maalu yortonke ledo olamme qeelate ninkeneeto eemadha hasiissannonke. (Rom. 7:21-25) Qoleno akkala mannimma fushshine hoolle, haaro mannimma uddiꞌre heeꞌrate ninkeneeto eemadha hasiissannonke. (Efe. 4:22, 24) Daafurrummorono gambooshshe haꞌrate ninkeneeto giddeessa hasiissannonkeha ikkara dandaanno.—Ibi. 10:24, 25. w20.09 28 guf. 9-11

Rosaanchinke heeshshosi Yihowara sayise oye cuuamanno gede kaaꞌlineemmo woyite cincineemmore ikka hasiissannonke. Ikkirono Yihowara soqqama hasiꞌrannotanna teꞌee afa hasiissannonke. Rosaanchikki Yesuusi hajajo agadhate sharramannonso, Qullaawa Maxaafa rosannohu egenno afiꞌrate callaati? Rosaanchiꞌne ayyaanaamittetenni lophanni nooronna teꞌee ganyitine buuxxe. Lawishshaho, isi Yihowa baxannota leellishanno? Yihowa huucciꞌranno? (Far. 116:1, 2) Qullaawa Maxaafa nabbawanno? (Far. 119:97) Gambooshshe ganye daanno? (Far. 22:22) Heeshshosi giddo biddi assiꞌra hasiissannosire biddi assiꞌrino? Rosinore maatesiranna jaallasiꞌra kulanno? (Far. 9:1) Baalunkunni roore Yihowa Farciꞌraasincho ikka hasiꞌranno? (Far. 40:8) Rosaanchikki aleenni kulliri giddo mitto nafa assannokkiha ikkiro, hatto assannokkihu mayiraatiro hayyotenni afate woꞌnaali, hattono hatte hajo daafira shaqqillunni xawissine hasaabbe. w20.10 18 guf. 14-15

Yesuusi Anni Yihowa woꞌmanka woyite dancha doorsha doodhanno; lossiꞌrinosi anninna ama yaano Yooseefinna Maariyaamino dancha doorsha doodhino. Yesuusino lophiti dancha doorsha doodhino. (Gal. 6:5) Ninke baalunku gede isirano doodhate dandoo noosi. Isi hasiꞌriro umisi hasatto balaxisiisa dandaanno. Ikkirono isi Yihowa ledo jaala ikke heeꞌra doodhino. Yesuusi Yihowa fajjo afiti, uyinoonnisi looso maahoyye yee adhino. (Yoh. 6:38) Yesuusi lowo manni giwannosita afino daafira, uyinoonnisi looso loosa shota ikkitannosikkita hedikki digatino. Ikkirono isi Yihowara maahoyye yee gala doodhino. Yesuusi 29 M.D. cuuamiti woꞌmunni woꞌma Yihowa fajjo assate illachishino. (Ibi. 10:5-7) Isi haqqu aana sutame reyara kae noo yannara nafa Annisi fajjo assate horonta badhera dihigino.—Yoh. 19:30. w20.10 29 guf. 12; 30 guf. 15

Songoꞌne giddo dhibbu woy wolu qarrinni kainohunni yaaddino roduuwi no? Insa shiidhinoha ikkara dandaanno. Kaaꞌlo hasiissannonsari noota anfummoro, insa banxeemmota leellishannore coyiꞌneemmo woy assineemmo gede kaaꞌlankera Yihowa huucciꞌra dandiineemmo. Coyiꞌneemmorinna assiꞌneemmori roduuwanke jawaachishara dandaanno. (1 Phe. 4:10) Yihowa ledonke noota anfoommo daafira horo diwaajjineemmo. Isi Yesuusinna sokkaasinesi widoonni kaaꞌlannonke. Qoleno, fajjosi ledo sumuu yaanno garinni gashshaanote widoonnino kaaꞌlannonke. Ninke giddo rooru heeshshonkenni laꞌnoommonte gede, Yihowa qullaawu ayyaanisinni soqqamaanosi ammanate roduuwansa kaaꞌlitanno gede kakkayisanno. Konnira soqqamaasinchu Phaawuloosi gede, ninkeno beꞌe yinummokkinni, “Kaaliiqi kaaꞌlaanchoꞌyaatina diwaajjeemmo. Mannu ma assannoe?” yine coyiꞌra dandiineemmo.—Ibi. 13:6. w20.11 17 guf. 19-20

Soqqamaasine assitinori Yihowa insa ledo noota leellishanno. Yihowa insara maalale loossanno wolqa uyinonsa. (Soq. 5:12-16; 6:8) Xaa yannara Yihowa ninke maalale loonseemmo gede wolqa diaannonke. Ikkirono keeraanchimmate yineenna mannu xiiwannonke woyite, isi assineemmorinni hagiidhannotanna ayyaanasi aannonketa Qaalisi widoonni kulinonke. (1 Phe. 3:14; 4:14) Konnira albillitte buutote darti iillinkero ma ikkineemmo yine yaadantenni, Yihowara ninke kaaꞌlatenna gatisate dandoo noosita albinni roore addaxxate xa assa dandiineemmore illachisha hasiissannonke. Yesuusi eino qaale addaxxa hasiissannonke. Isi togo yiino: “Ani, baarigaarraꞌne gartaꞌnera dandiitannokki hayyonna egenno eemmoꞌne.” Qoleno “Cincitiniro, lubboꞌne gatisidhinanni” yiino. (Luq. 21:12-19) Yihowa isira ammanante heedhe reyitino soqqamaasinesiha mitto mittonka coye hawannokkita deꞌooti. Konnira isi reyotenni kayisannonsa. w21.01 4 guf. 12

Umo kaote hexxo daafira coyiꞌrinohu soqqamaasincho Phaawuloosi diꞌꞌikkino. Iyyoobino coyiꞌrino. Isi Maganu qaagannositanna wirro heeshsho aannosita addaxxino. (Iyo. 14:7-10, 12-15) “Reyotenni kaꞌꞌa” Kiristaanu rosi baalaho ‘xintu’ woy ‘umi rosi’ widooti. (Ibi. 6:1, 2) Phaawuloosi 1 Qorontoosi fooliishsho 15te kaote daafira borreessino. Isi borreessinori umi xibbi diri Kiristaana jawaachishinoti dihuluullissannote. Tini fooliishsho ninkeno jawaachishshannonke; hattono hexxonke kaajjishshanno. Yesuusi Kiristoosi kao, shiiꞌnoommori reyotenni kaꞌannota addaxxineemmo gede assitannonke. Kiristoosi kao Phaawuloosi Qorontoosi mannira kulinohu ‘danchu duduwi’ widooti. (1 Qor. 15:1, 2) Isi Kiristaanu kao noota ammanannokkiha ikkiro, ammanansa waagu nookkita ikkitinota coyiꞌrino.—1 Qor. 15:17. w20.12 2 guf. 2-4

Soqqamaasinchu Pheexiroosi hexxo mudhe Yihowara soqqama agurannokki gede kaaꞌlinosiri maati? Hakkuyira albaanni Yesuusi Pheexiroosi ammana baꞌannokki gede huuccino; Yihowa tenne huuccattora dawaro qolino. Gedensaanni Yesuusi Pheexiroosira leelle jawaachishinositi dihuluullissannote. (Luq. 22:32; 24:33, 34; 1 Qor. 15:5) Soqqamaasine hashsha qulxuꞌme woshshaaxxite amaxxa hooggino daafira yaadde heedheenna Yesuusi leellinonsa. Tenne yannara Yesuusi, Pheexiroosi iso baxannosironna teꞌee xaꞌmino. Yesuusi lubbote jaalasi gatona yiinosi; hattono lowo looso uyinosi. (Yoh. 21:15-17) Yesuusi Pheexiroosira assinori isi maarannohanna Annisi lawishsha guutu garinni harunsannoha ikkinota leellishanno. Konnira, soꞌro loonsummoro Yihowa horo gatona diyaannonke yine hexxo mudha dihasiissannonke. Sheexaanu hatto yine hendammora hasiꞌrannota qaango. Hatteentenni Yihowa baxannonketa, laanfenke afinotanna gatona yaankera hasiꞌrannota dea dihasiissannonke; ninkeno isi lawishsha harunsine koffi assitinonkere hakko garinni laꞌꞌa hasiissannonke.—Far. 103:13, 14. w20.12 20-21 guf. 17-19

Wodanaaꞌmitinokkinna Yihowa addaxxitinokki mannire kultanno xaggenni lowore ronseemmo. Insa xagge xiinxallanke ninkeno hattoo soꞌro loonseemmokki gede kaaꞌlitannonke. Lawishshaho, Moote Aasa qarru iillisi woyite umi qara Yihowa addaxxino. Gedensaanni kayinni Yihowa kaaꞌlo xaꞌmiꞌra agure iillinosire umisi tirate woꞌnaalino. (2 Dud. 16:1-3, 12) Iimi adda laꞌnanni woyite, Aasa Israeele qasate Sooriyu kaaꞌlannosi gede xaꞌmiꞌrasi kaaꞌlitinosiha labbanno. Ikkirono assinori qiniinosihu shiima yanna geeshshaatilla. Yihowa masaalaanchu widoonni togo yiinosi: “Maganokki Kaaliiqa addaxxa agurte Sooriyu moote hexxootto daafira, . . . [“Sooriyu,” NW] olanto angakkinni fulte hadhino.” (2 Dud. 16:7) Iillannonke coye Yihowa Qaalisi widoonni aannonke biddishshi garinni agurre uminkenni tirreemmokki gede qoropha hasiissannonke. Coyi mudde noonke woyite nafa wodanaaꞌmine Yihowa addaxxineemmoha ikkiro, isi qinaannonke gede kaaꞌlannonke. w21.01 6 guf. 13-15

Xaa yannara mite Yihowa soqqamaano woxu qarrinni woy dagate gaancenninna olunni kainohunni hudidhanno. Woloota ammanansanni kainohunni usurroonninsa. Ikkirono, tini lowo daga busha alame baꞌanno woyite gatte saꞌannotanna albillitte woꞌmanka woyite falakkinota maalaamittetenna ayyaanaamittete sagale afidhannota affino daafira hagiidhitanno. Yihowa Sheexaanu alame hunanno woyite lowo daga ‘iibbillunni’ lawinsoonnihu Maganu hanqinni gattanno. Bayiru qarri gumulamihu gedensaanni Yesuusi gatte saꞌinore “heeshshote buichowa haaꞌre massannonsa.” (Aju. 7:17) Lowo dagara noonsata dhagge ikkitanno hexxo hanni hedi. Lowo biliyoone ikkanno manni hegerera heeꞌranno. (Yoh. 11:26) Wolu geꞌreewi wido ikkitinori dhagge ikkitanno hexxo noonsa daafira, Yihowanna Yesuusa galaxxitanno. w21.01 16-17 guf. 11-12

Yesuusi gaꞌa gede reyara hashsha rosaanosira iillannonsa qarra hedino. Isi jaallasi baxanno daafira, ‘bushuwiinni gatisannonsa gede’ Annasi huucciꞌrino. (Yoh. 17:14, 15) Yesuusi iimira haꞌrihu gedensaanni Sheexaanu Daawuloosi Yihowara soqqama hasidhannorira baalaho ola kayisannota afino. Konnira Yihowa mannira agarooshshu hasiisannonsa. Xaa yannara albinni roore Yihowa agarooshshi hasiisannonke. Sheexaanu “lowo hanqinni” iiminni dirrino. (Aju. 12:12) Isi mitootu ninke miiccanno woyite ‘Maganoho soqqantanni nooha lawannonsa’ gede assino. (Yoh. 16:2) Magano ammanannokkihu wolu manni kayinni tenne alame manni gede ikkineemmokki daafira darammeemmo gede assannonke. Ikkihano ikkiro waajja dihasiissannonke. Mayira? Techohu barru qummeeshshi waajja hasiissannonkekkihu mayiraatiro kulanno. w21.03 26 guf. 1, 3

Yihowa baalankare assannohu baxillunniiti. Isi hasiisannonkere baalankare baxillunni wonshannonke. Yihowa baxillunni wodo qixxeessinonke. Yesuusino lowo geeshsha baxannonke daafira heeshshosi sayise uyinonke. (Yoh. 3:16; 15:13) Yihowanna Yesuusi insara ammanantinorira noonsa baxille hunara dandaannori mitturino dino. (Yoh. 13:1; Rom. 8:35) Hatteente gede, maatete umo ikkino manchi baalankare baxillunni assa hasiissannosi. Hatto assa lowo geya hasiissannohu mayiraati? Soqqamaasinchu Yohaannisi togo yee borreessino: “Laꞌꞌanni nooha rodoosi [woy maatesi] baxinokkihu illetenni afinokkiha Magano hiitto asse baxa dandaanno?” (1 Yoh. 4:11, 20) Roorenkanni maatesi baxannohunna Yihowanna Yesuusi lawishsha harunsa hasiꞌranno manchi, maatesira ayyaanaamittetenna maalaamittete hasiisannonsare wonshanno; hattono baxannonsata affanno gede assanno. (1 Xim. 5:8) Isi oososi qajeelsanno hattono seejjanno. Yihowa ayirranno gede assannorenna maatesira kaaꞌlannore assano diaguranno. w21.02 5 guf. 12-13

Baxillaanchu iimi Anninke alba iillinonkeri gara ikkitinokki lao heedhannonke gede assannota afino. Qoleno Yihowa ninke noonke yine hende nafa egenninoommokkihu danchu akati noonketa laꞌꞌanno. (1 Yoh. 3:19, 20) Mittu busha rosicho agurate sharramanni noo manchi wirro hakkonne coye assaranna hexxo mudhara dandaanno. Cubbo loonsummoro dadilla nooreentilla. (2 Qor. 7:10) Ikkirono loonsoommo soꞌrora quwa saꞌne yaande, ‘Waagu dinoe. Yihowano horonta gatona diyaannoe’ yine heda dihasiissannonke. Togo yee heda gara diꞌꞌikkitino; qoleno Yihowara soqqammeemmokki gede assitankera dandiitanno. Hatteentenni Yihowa huucciꞌranna maarosi afiꞌrate sharrama hasiissannonke. (Isa. 1:18) Isi loossinoonni soꞌrora addinta gaabbitine maaro eꞌiniro gatona yaannoꞌne. Songote cimeeyyerano hasaapha dandiitinanni. Insa ayyaanaamittetenni wirro jawaattinanni gede shaqqillunni kaaꞌlitannoꞌne.—Yai. 5:14, 15. w20.12 23 guf. 5-6

Yesuusi meento ayirrisino. Isi Farisootu gede meento woffi asse dilaino; insa meentu ledo Qullaawa Borrore hasaabbannota agurina meentu ledo hasaabbanna mannu laꞌꞌansara nafa dihasidhanno. Yesuusi kayinni lowo geeshsha hasiisannoha ayyaanaamittete coye rosaanosi ledo hasaawi woyite meentuno no. (Luq. 10:38, 39, 42) Qoleno isi meentu ledosi haꞌre sabbakanno gede assino. (Luq. 8:1-3) Hattono Yesuusi reyotenni kainota soqqamaasinesira kultanno gede meento soyino. (Yoh. 20:16-18) Soqqamaasinchu Phaawuloosi Ximootewoosi meento ayirrisanno gede amaalinosi. Phaawuloosi, Ximootewoosira umo “Qullaawa Borro” rosiisinosiri amasinna ahaahesi ikkinota kulino. (2 Xim. 1:5; 3:14, 15) Phaawuloosi Roomu Sokka borreessi woyite meya roduuwa suꞌmansa gane keere soyinonsa. Isi insa loosanno looso huwatinoha calla ikkikkinni Kiristaana ikke soqqamanno soqqanshora galatinonsa.—Rom. 16:1-4, 6, 12; Fil. 4:3. w21.02 15 guf. 5-6