Wocawaaro

Pheexiroosi qullaawu ayyaaninni Iyueeli masaalo qummi asse coyiꞌri woyite umo noota boode hedo agurino. (Soq. 2:16, 17) Pheexiroosi “kunni gedensaanni” yitanno hedo agure, “goofimarchu barra” yee hanafino; konni qummeeshshira goofimarchu barra yinihu Yerusaalamete kataminna qullaawu mini baꞌꞌara albaanni noo yannaati; hatte yannara Maganu ‘ayyaanasi mannu baalu aana dunanno.’ Tini, Iyueeli coyiꞌrino masaalo woꞌmitinohu lowo diri gedensaanni ikkinota leellishshanno. Maganu umi xibbi diri Kiristaanira ayyaanasi maalaletenni dunihu gedensaanni, insa hatte yannara noo alame woꞌmate sabbaka hanaffino. Soqqamaasinchu Phaawuloosi 61 M.D. balla Qolasiyaasi Kiristaanira sokka borreessi yannara dancha duduwo ‘kalqe baalate kulloonni’ yee coyiꞌrino. (Qol. 1:23) Phaawuloosi ‘kalqe baala’ yiiti hakkawaro isinna wolootu hadhe sabbakkino gobba baalate. Yihowahu wolqaataamu qullaawu ayyaani kaaꞌlonni xaa yannara sabbakate loosi hakkawarinni roore halaꞌlino; hattono “gobbate qacce” geeshsha sabbankoonni.—Soq. 13:47. w20.04 6-7 guf. 15-16

Yihowa hoshshasi giddonni ballekkino geꞌrechono ikko ninke mitto mittonka baxannonke. (Mat. 18:12-14) Maganu baino geꞌreewosi hasannotanna ayyaanaamittete hurre afiꞌranno gede kaaꞌlannonsata kule qaale eino. Yihowa mittu Israeelichu allaalaanchi geꞌrechosi baꞌuro assannore assannota coyiꞌrino. (Hiz. 34:12-16) Allaalaanchu balaxe baꞌino geꞌrecho hasanno; togo assate lowo yannanna wolqa hasiissanno. Hakkiinni baꞌino geꞌrecho afihu gedensaanni, hoshshanniwa abbanno. Qoleno geꞌrecho madidhinoha woy hudidhinoha ikkiro, allaalaanchu sununni asse irkise amade mada usurannose; hakkiinni hanqafe haaꞌre masse itisanno. ‘Maganu hoshsha allaaltanno’ cimeeyyeno songotewiinni xeertidhinore hakko garinni kaaꞌla hasiissannonsa. (1 Phe. 5:2, 3) Cimeeyye ballehinoha hasse hoshshanniwa higanno gede kaaꞌlitanno; hattono ayyaanaamittetenni huranno gede kaaꞌlite baxille leellishshanno. w20.06 20 guf. 10

Yesuusi sabbakanno manna midote iillino gidi gede asse lainohu batinyu manni rosaanoꞌya ikkanno yee hedeetini? Deeꞌni. Qullaawa Borro giddo Yesuusa ammanannohu boode manna calla ikkinota masaalloonni. (Yoh. 12:37, 38) Yesuusi maalaletenni mannu wodanita afa dandaanno. (Mat. 9:4) Yesuusi iso ammanannoha boode manna illachishinoha ikkirono, baalunku mannira diinaggaawe sabbakino. Mannu wodanita afa dandiineemmokkiri ninke isinni hakkiinni roorsine sabbakanna qoqqowinkera heeꞌranno mannira yoo yineemmokki gede qoropha hasiissannonke. Hatteentenni mannu albillitte Kiristoosi rosaano ikkara dandaanno yine heda hasiissannonke. Yesuusi rosaanosira yiinota qaagge. Gidu laalino; gamba assateno iillino. Mannu woyyaawe Kiristoosi rosaano ikkara dandaanno. Yihowa albillitte rosaano ikkara dandaanno manna muxxe “jiro” gede asse laꞌꞌanno. (Hag. 2:7) Manna Yihowanna Yesuusi laꞌanno garinni laꞌneemmoha ikkiro, lophino garanna hasattonsa afate woꞌnaalleemmo. Hatto assineemmoha ikkiro, insa anfoommokki manni gede assine dilaꞌneemmo; hatteentenni albillitte roduuwanke ikkitara dandiitanno yine hendeemmo. w20.04 13 guf. 18-19

Maganu Qaali Yihowa hagiirsiisa hasiꞌnummoro, Yesuusa baxanna baxillenke geedonniha assiꞌra hasiissannonketa kulanno. Hanni Yesuusi jaalla ikkate assa hasiissannonkeha mitto coye laꞌno. Yesuusi jaalla ikkate iso seekkitine affe. Maatewoosi, Maarqoosi, Luqaasinna Yohaannisi Wongeella nabbambe Yesuusa seekkine afa dandiineemmo. Qullaawu Maxaafi Yesuusi heeshsho daafira kulannore hiincinummoro, isi manna shaqqillunni kaaꞌlino gara huwanteemmo daafira albinni roore banxeemmosi. Lawishshaho, isi rosaanosira Mooticha ikkirono, insa borojju gede asse laꞌꞌa agure giddosita hasaawinonsa. Isi insa dadillitu yannara dadillino, wiꞌlitu yannara ledonsa wiꞌlino. (Yoh. 11:32-36) Diinnasi nafa sokkasi macciishshe adhino manni Yesuusi jaalla ikkinota ammantino. (Mat. 11:19) Ninkeno Yesuusi lawishsha harunsine wolootaho danchare assinummoro, mannu ledo dancha aante heedhannonke; hattono hagiirrinke bae ikkanno, Kiristoosira noonke baxillino lexxanno. w20.04 22 guf. 9-10

Biritaaniyu 1870nni uullate aana halaꞌlado qoqqowonna wolqaataame olanto afiꞌrino gashshoote ikke no. Shiimu buudinni lawinsoonnihu kuni Biritaaniyu gashshooti wole sase buudda yaano Faransaye, Ispeenenna Neezerilaande qeelino. (Dan. 7:7, 8) Biritaaniyu 1917 geeshshano wodiidi moote ikke no. Hatte yannara Ameeriku jirotenni alamete umiho; hattono Biritaaniyu ledo buusama hanafe no. Umihu Alamete Oli yannara, Ameerikunna Biritaaniyu mitte garo ikkite olantino; hattono lowoti wolqaataame olanto noonsa. Hatte yannara Biritaaniyunna Ameeriku, Angilo-Ameerika yinannita alamete wolqaataame mangiste ikkitino. Daanieeli masaalinonte gede kuni moote ‘jawanna wolqaataame olanto qixxeessiꞌrino.’ Goofimarchu barruwara, Angilo-Ameerikunnihu buusamino gashshooti wodiidi moote ikke keeshshino. w20.05 4 guf. 7-8

Uullate aana waa afiꞌnoommohu, baattotenna arrishshote mereero noo xeertinyi batiꞌrinokkinna ajinokki daafiraati. Uulla xa noowiinni shiima geeshsha nafa arrishshonniwa shiqqi yitinoha ikkoommero, wayi baalu foorare goofanno daafira uulla ruqaꞌnitanno, hattono heeshsho afiꞌrinori diheeꞌranno. Qoleno uulla xa noowiinni shiima geeshsha nafa arrishshotewiinni xeertidhoommero, wayi baalu kaadete soorramanno daafira uulla kaade calla ikkitanno. Ikkollana Yihowa uulla gara ikkino bayicho worino daafira, heeshsho afiꞌrinori waa hoogikkinni heeꞌranno. Arrishshote iibbilli wuqiyaanosetenna uullate noo wayi fooraranno gede assanno; hakkiinni gomichu kalaqamanno. Arrishsho diru kiiro lowo miliyoone litire ikkanno wayi fooraranno gede assitanno. Kuni wayi xeena woy kaade ikke dirrara albaanni gordoho mito tonne barra keeshshanno. Gedensoonni kuni wayi wuqiyaanosenna wole wayi bissa eanno; konni garinni wayi doyicho uurritukkinni heedhanno. Tini dhagge ikkitannotinna uurritannokkiti wayi doyicho Yihowa hayyichanna wolqaataamo ikkinota leellishshanno.—Iyo. 36:27, 28. w20.05 22 guf. 6

Yesuusi, qullaawa ayyaana afiꞌrate huucciꞌneemmo gede amaalinonke. (Luq. 11:9, 13) Yihowa qullaawu ayyaanisi widoonni “wolqa” aannonke; wole agurina isi mannu wolqara aleenni ikkitino wolqa aankera dandaanno. (2 Qor. 4:7) Maganu ayyaani kaaꞌlonni, iillannonkeha aye geeshshi qarra cincine saꞌꞌa dandiineemmo. Qullaawu ayyaani Maganoho soqqammeemmo gedeno kaaꞌlannonke. Qoleno dandoonke lexxitanno gede assara dandaanno. Soqqanshonkenni dancha guma afiꞌra dandiineemmohu, uminke wolqanni ikkikkinni Maganu ayyaani kaaꞌlonni callaati. Wodaninkera noota gara ikkitinokki hedonna yorto anfeemmo gede kaaꞌlankera huucciꞌne, Maganunniha qullaawa ayyaana naandeemmota leellisha dandiineemmo. (Far. 139:23, 24) Hatto assinummoro, Yihowa ayyaanisi widoonni wodaninkera noota gara ikkitinokki hedonna yorto afiꞌneemmo gede kaaꞌlannonke. Hakkiinni, qullaawu ayyaani hattoo hedo fushshine hooꞌlineemmo gede kaaꞌlankera Magano huucciꞌra hasiissannonke. Hatto assanke, Yihowa qullaawu ayyaanisinni kaaꞌlannonkekki gede assara dandaannoha aye coyeno gargadhate murciꞌnoommota leellishshanno.—Efe. 4:30. w20.05 28-29 guf. 10-12

Yihowa suꞌmira halammeemmoha ikkiro, Yesuusi Kiristoosi lawishsha harunsinanni heeꞌnoommo. Yesuusi mannu Annisi suꞌma afanno gede assinohu, konne suꞌma gane calla ikkikkinni Yihowa ayimmare mannaho rosiiseeti. Coyi gedera, Farisootu mannu Yihowa kaajjadoho, wolqankera aleenni ikkinore asse yaannoho, ninkewiinni xeertiꞌrinohonna kakkachaho yee hedanno gede assituta, Yesuusi kayinni insa yitannori gara ikkinokkita coyiꞌrino. Yesuusi mannu Yihowa shaqqado, cinca, baxillaanchonna gatona yaannoha ikkinota huwatanno gede kaaꞌlino. Qoleno isi woꞌmunni woꞌma Annisi faale haꞌre, mannu Yihowa afanno gede assino. (Yoh. 14:9) Ninkeno Yesuusi gede, Yihowa baxillaanchonna shaqqado Magano ikkinota mannaho rosiisa dandiineemmo. Hatto assinummoro, beebbate bainoha Yihowa suꞌma keereensa dandiineemmo. Yihowa suꞌmi qullaawanno gedeno assineemmo, yaano mannu suꞌmisi qullaawa ikkinota huwatanno gede kaaꞌlineemmo. Assineemmorinninna coyiꞌneemmorinni mannu Yihowa afanno gede kaaꞌlineemmo. Mannu Maganu daafira garimale huwatinore garunni huwatanno gede kaaꞌlineemmoha ikkiro, suꞌmisi qullaawanno gede assinanni heeꞌnoommo. w20.06 6 guf. 17-18

Dagoomittete webisayite woꞌmunni woꞌma bushate yaa diꞌꞌikkino; lawishshaho, tenne webisayite widoonni maatenkenna jaallanke ledo xaada dandiineemmo. Ikkollana, maalu coye calla illachishanno manni webisayitete aana fotta woy viidiyo fushshannohu janjansara hasiꞌre ikkinota huwatootto? Insa hatto assitannohu leellama hasidhe ikkara dandaanno. Mitootu, insa woy wolu manni webisayitete aana fushshitino foto aana koffi assannorenna maaeelare borreessitanno. Kiristaanu kayinni, umonsa heeshshi assannorenna manna mararannore ikkanno gede amaalloonni. (1 Phe. 3:8) Dagoomittete webisayite horoonsiꞌrattoha ikkiro, ateneeto togo yite xaꞌmi: ‘Webisayitete aana borreesseemmore woy fushsheemmo fotonna viidiyo wolootu laꞌanno woyite ane naaxxaleessaho yite heddara dandiitanno? Woloota hinaasiisanni noommohalla ikka?’ Kiristaanu mannu jajansara dihasiꞌranno. Hatteentenni, techohu barru qummeeshshi aana noo amaale harunsanno. Umonke heeshshi assineemmore ikkinummoro, alamete noo naaxxaleeyye gede dileellammeemmo.—1 Yoh. 2:16. w20.07 6 guf. 14-15

Soqqamaasinchu Phaawuloosi Kiristoosi harunsaancho ikkara albaanni, Yesuusi harunsaano xiiwannohonna ayirrinye afiꞌrinokki beettooti. (Soq. 7:58) Phaawuloosi Kiristaanu songo waajjishiishannota hoolinohu Yesuusa umosiiti. Yesuusi iima heeꞌre Phaawuloosi hasaawisinosi, hattono illesi ballisino. Phaawuloosi illesi faꞌnantanno gede, alba xiiwanno manna mare kaaꞌlo xaꞌmiꞌra hasiissinosi. Isi, umosi heeshshi asse kaaꞌlo afiꞌrate Hanaaniya yinanni rosaanchiwa marino; Hanaaniyano illesi fanino. (Soq. 9:3-9, 17, 18) Phaawuloosi gedensoonni Kiristaanu songo giddo egennamino soqqamaancho ikkino; ikkollana, Yesuusi Demaasqote doogora rosiisinosi roso horo dihawino. Phaawuloosi woꞌmante yannara umosi heeshshi asse, roduuwisi kaaꞌlo maahoyye yee adhino. Isi, ammanate roduuwisi ‘jawaachishshinosita’ coyiꞌrino.—Qol. 4:10, 11. w20.07 18-19 guf. 16-17

Yihowa woꞌmanka dandaannoha ikkirono, wolootaho looso aanno. Lawishshaho, isi Yesuusa Mangistesira Moote asse shoomino; isi ledo gashshitannorira 144,000 buuramino Kiristaanirano silxaane aannonsa. Yihowa Yesuusi Mootenna Kakkalaanote Biilo ikkanno gede qajeelsinosi. (Ibi. 5:8, 9) Isi Yesuusi ledo gashshitannoreno qajeelsannonsa; isi insara silxaane uyinsahu gedensaanni kayinni loossanno gara diꞌꞌillaalisanno. Hatteentenni insa fajjosi wonshitannota addaxxanno. (Aju. 5:10) Kaaꞌlo hasiissannosikkihu iimi Anninke wolootaho looso aannoha ikkiro, kaaꞌlo hasiissannonkeri ninke roorenkanni hatto assa dihasiissannonke? Lawishshaho, ati maatete umooti? Woy songote cimeessaati? Yihowa lawishsha harunsite wolootaho looso uyi, hattono loossanno gara illaallissooti. Yihowa lawishsha harunsittoro loosu loosamanno gede assattoha calla ikkikkinni woloota qajeelsatto hattono dandoonsa lexxitanno gede kaaꞌlatto.—Isa. 41:10. w20.08 9 guf. 5-6

Yihowa ballehino geꞌreewosi ma garinni laꞌnammora hasiꞌranno? Yesuusi tennera dancha lawishsha ikkinonke. Isi baalunku geꞌreewi Maganu albaanni muxxe ikkinota afino daafira, “Israeelete giddonni geꞌreewu gede ikke ballehino manni” baalu Yihowawa higanno gede kaaꞌlate dandaamisire baala assino. (Mat. 15:24) Yesuusi dancha allaalaancho ikkino daafira, Yihowa geꞌreewi giddonni mitte nafa baꞌannokki gede assate sharramino. (Yoh. 6:39) Soqqamaasinchu Phaawuloosi Efesooni songo cimeeyye Yesuusi lawishsha harunsitanno gede amaalinonsa. Isi togo yiinonsa: “Mootichu Yesuusi, ‘Adhannonkunni aannohu baꞌraaꞌrinoho’ yiinonte gede, angankenni loonse wolqa hoogginore kaaꞌla hasiissannonke.” (Soq. 20:17, 35) Xaa yannara cimeeyyete Yihowa manna towaatate baxxino qeechi noonsa. Ispeenete heeꞌrannohu Salvaadoori yinanni cimeessi togo yiino: “Yihowara ballehino geꞌreewisiti mageeshshi geeshsha huluullitannosiro hedeemmo woyite, insa kaaꞌlate danduummore baala assate kaeemmo. Yihowa hoshshasi towaatammora hasiꞌrannota wodanchoommo.” w20.06 23 guf. 15-16

Yihowa Kumu Diri Gashshooti jeefora guuta ikkineemmo yanna cince agaranno. Hakka geeshsha kayinni isi cubbonke gatona yaannonke. Ninkeno Yihowa gede wolootaho noonsata dancha akatta laꞌꞌanna cinca hasiissannonke. Yesuusinna sokkaasine Maganu uulla kalaqi woyite hagiidhitino. Hanni insa albillitte uullate aana Yihowa baxannohunna isira soqqamannohu guutu manni woꞌmanno woyite mageeshsha hagiidhitannoro hedde. Iima Yesuusi ledo gashshitara uullanni hadhinori loosinsa mannu ooso kaaꞌlanni noota laꞌanno woyite mageeshshi geeshsha hagiidhitannoro hendo. (Aju. 4:4, 9-11; 5:9, 10) Hanni dadillu hagiirreho soorramannota hattono dhibbu, qarrunna reyo hegerera baꞌanno yanna hedi. Hakka geeshsha baxillaanchu, hayyichunna cincanno Annikki Yihowa faale haꞌrate murciꞌri. Hatto assittoro aye geeshshi fonqoli iilliherono hagiirrikki baikkinni heeꞌratto. (Yai. 1:2-4) Yihowa ‘cubbaataammanna keeraano reyotenni kayiseemmo’ yee qaale eino daafira galaxxineemmosi!—Soq. 24:15. w20.08 19 guf. 18-19

Qullaawu Maxaafi Maganu baxillunni uyinonke eltooti. Iimi Anninke, qullaawu ayyaaninni mannu konne Maxaafa borreessanno gede assinohu, uullate aana noo oososi lowo geeshsha baxanno daafiraati. Yihowa Qullaawu Maxaafi widoonni huluullitannonke xaꞌmuwara dawaro qolinonke; insano: Kalaqammoommohu hiittoonniiti? Heeshshonke hagiirru noota ikka dandiitannohu ma garinniiti? Albillitte mayi ikkanno? Yihowa baalanti oososi kuri xaꞌmuwara dawaro afidhara hasiꞌranno; hakko daafira Qullaawa Maxaafa lowo afiira qolle tirranni gede assino. Yannankera Qullaawa Maxaafa woꞌma woy gama 3,000 saꞌꞌanno afiinni tirroonni! Qullaawu Maxaafi geeshsha lowo afiinni tirre tuqinsoonnihu wolu maxaafi dino! Qullaawa Maxaafa barru baala nabbambeemmohanna hiincineemmoha, hattono ronsoommore loosu aana hosiisate sharrammeemmoha ikkiro, tenne eltora Maganoho galatu noonketa leellinsheemmo. Qoleno, dandaaminke deerrinni Qullaawu Maxaafi halaale mannaho kulate sharramanke Maganoho galatu noonketa leellishshanno.—Far. 1:1-3; Mat. 28:19, 20. w20.05 24-25 guf. 15-16

Masaalaanchu Ermiyaasi lowo geeshsha qarrisanno qooxeessira sabbakino. Konnira isi hexxo mudhe sabbaka agurate hedino woyiti no. Ikkirono isi sabbaka diagurino. Mayira? ‘Maganu Qaali’ giddosi giirate gede itinosi daafira sammi yaa didandiino! (Erm. 20:9) Ninkeno Maganu Qaali surrenkeranna wodaninkera woꞌmiro sammi yine dianfeemmo. Hatto assate Qullaawa Maxaafa barru barra nabbambe hiinca hasiissannonke. (Erm. 15:16) Konni daafira, hexxo mudhatto gede assannori iillihero kaaꞌlahera Yihowa eegami. Isi guuntete xeꞌne, laanfe woy dhibbu waaddannohe woyite cincite saꞌꞌatto gede kaaꞌlannohe. Soqqanshote qoossora gara ikkitino lao heedhannohe gede kaaꞌlannohe. Soqqanshoteno gara ikkitino lao heedhannohe gede kaaꞌlannohe. Baalunku coyinni roore yaachishinohere baala iimi Annikkira hasaaphi. Yihowa kaaꞌlonni hexxo mudhatto gede assannohere qeeꞌla dandaatto. w20.12 27 guf. 20-21

Mitu meya roduuwi ammanate roduuwi ledo xaadannohu gambooshshunniwaati. Konnira togoo yannara anga fanne haaꞌnonsa, hasaawinsonsa hattono hendeemmonsata affanno gede assino. Yesuusi gede yanna gaaꞌmine meya roduuwi ledo yanna sayisa dandiineemmo. (Luq. 10:38-42) Insara sagale koyisa woy ledonke boohaartanno gede koyisa dandiineemmo. Hatto assineemmo woyite, jawaachishannore hasaawa hasiissannonke. (Rom. 1:11, 12) Songote cimeeyyera Yesuusite gedee lao heeꞌra hasiissannonsa. Yesuusi adhammikkinni heeꞌra mitootaho qarra ikkitannota afino; ikkirono isi geedino hagiirre afiꞌrate qaru coyi adhama woy ooso ila ikkitinokkita xawisino. (Luq. 11:27, 28) Geedanno hagiirre afiꞌnannihu Yihowa soqqansho balaxisiinsirooti. (Mat. 19:12) Roorenkanni songote cimeeyye meya roduuwa ayyaanaamittete roduuwinna amuuwi gede assite laꞌꞌa hasiissannonsa. Cimeeyye gambooshshu hanafara albaanninna goofihu gedensaanni noo yanna insa ledo hasaawate sharrantanno. w20.09 21-22 guf. 7-9

Hunda Israeelete gobbara, baatto loosiꞌre galino manchi gedensiise wixiriro gedensiise mixxanno. (Maq. 4:28) Ninkeno baatto loosiꞌre galino manni gede cincineemmore ikka hasiissannonke. Ikkirono hatto assa shota coye diꞌꞌikkitino. Guuntete xeꞌne noonkere ikkinoommo daafira, daafurinke guma mulenni afiꞌra hasiꞌneemmo. Ikkirono, guma afiꞌra hasiꞌnummoro seekkine loosa yaano, qottisa, kaasa, shuqunanna waa hayikkisa hasiissannonke. Manna rosaano assate loosino hattooti. Rosiinseemmo manni wodanira noota manna mulla kaꞌne giwate hedo buqqise hoolatenna shaqqadda ikkitanno gede assate yanna hasiissanno. Cinca mannu macciishsha giwinkerono hexxo mudhineemmokki gede kaaꞌlitannonke. Mitu manni kulleemmonsare macciishshirono cincineemmore ikka hasiissannonke. Qullaawu Maxaafi rosaano ayyaanaamittetenni lophitanno gede xixxiiwa didandiineemmo. Yesuusi rosaano nafa isi kulinonsare rakke huwattinokki woyiti no. (Yoh. 14:9) Kaanseemmorinna waa hayikkinseemmori ninke ikkinummorono, lossannohu kayinni Magano ikkinota qaango.—1 Qor. 3:6. w20.09 11 guf. 10-11

Ninke baalunku rosaanonke ayyaanaamittetenni lophite cuuantara hasiꞌneemmo. Insa kaaꞌla dandiineemmo doogga giddo mitte songote gambooshshe dagganno gede koyisate. Mittu woꞌnaalshu noosi rodii duucha woyite gambooshshe daggannori Qullaawu Maxaafi rosaano ayyaanaamittetenni mulenni lophitannota coyiꞌrino. Mitu roduuwi Qullaawu Maxaafi rosaanonsa gambooshshe hadhuro, hakkiichono lowore rossannota kultannonsa. Rosaanchikki ledo Ibiraawoota 10:24, 25 nabbabbe; hakkiinni gambooshshe haꞌriro mayi horo afiꞌrannoro xawisisi. Muli yannara gambooshshunniwa rosoottore faasiiqqe kulisi. Tini rosaanchikki gambooshshe daanno gede roore kakkayissasira dandiitanno. Isi gambooshshe dayiro laꞌꞌannorinna macciishshannori, konni albaanni haꞌrinohu wole ammaꞌno gambooshshinni baxxinoha ikkinota huwatasi digattanno. (1 Qor. 14:24, 25) Isi gambooshshunniwa dancha lawishsha ikkitannosiri ledo xaadanno; insa ayyaanaamittetenni lophe cuuamanno gede kaaꞌlitasira dandiitanno. w20.10 10-11 guf. 14-15

Qullaawu ayyaani Maganu Qaalinni nabbawoottorenna xiinxallootore loosu aana hosiisatto gede kaaꞌlannohe. Faarsaasinchu gede atino togo yite huucciꞌri: “[Yihowa] ballo, halaalikkinni qaafeemmo gede doogokki rosiisie; ate ayirrisate beehaminokki wodana uyie.” (Far. 86:11) Konnira Yihowa Qaalisinna dirijjitesi widoonni shiqishannota ayyaanaamittete sagale sagaꞌla agurtooti. Hatto assattohu egenno afiꞌrate calla diꞌꞌikkino. Halaalu wodanikkira coanno gede assiꞌranna nabbawoottore loosu aana hosiisa hasiissannohe. Yihowa ayyaani hatto assatto gede kaaꞌlannohe. Roduuwakkino jawaachisha dandaatto. (Ibi. 10:24, 25) Mayira? Korkaatuno insa ayyaanaamittete maatekkiiti. Kiristaanu gambooshshiwa dancha dawaro qolatto gedenna kifile heedhuhero kifilekki danchu garinni shiqishatto gede qullaawu ayyaani kaaꞌlo afiꞌrate huucciꞌri. Konni garinni Yihowanna Beettisira muxxe ‘geꞌreewonsa’ baxattota leellishatto. (Yoh. 21:15-17) Konnira Bayiru Rosiisaanchikki kulannohere macciishshate, isi shiqishannota ayyaanaamittete sagale seekkite sagaꞌli. w20.10 24-25 guf. 15-17

Yesuusi soqqamaanosi hexxo mudhitu yannara maa assino? Reyotenni kaihunni shiima yanna gedensaanni isi mite harunsaanosi, “Waajjitinoonte! Hadhine . . . [reyotenni kaoommota] roduuwiꞌyara kulle” yiino. (Mat. 28:10) Yesuusi soqqamaanosi facci asse diagurino. Insa agurte xooqqinosiha ikkirono, ‘roduuwaꞌya’ yiinonsa. Yihowa gede Yesuusino maarannohonna gatona yaannoho. (2 Mot. 13:23) Ninkeno soqqansho fula agurtino roduuwinkeri lowo geeshsha yaachishannonke. Insa roduuwankeeti; lowo geeshsha banxeemmonsa! Kuri roduuwi alba leellishshino baxille dihambeemmo; insa giddo mitu lowo diro soqqantinore ikkitara dandiitanno. (Ibi. 6:10) Insa qalli assitannonke! (Luq. 15:4-7) Konni daafira, ayyaanaamittetenni qiiddinori songote gambooshshe dagganno gede jawaachishshensa. Insa Gambooshshu Addaraashe dagganno woyite anga fanne haaꞌra hasiissannonke. w20.11 6 guf. 14-17

Yaiqoobinna Yohaannisi amansa ledo Yesuusiwa marte isi wolqara aleenni ikkinore assannonsa gede xaꞌmitusi woyite Yesuusi maa assinoro laꞌno. Yesuusi bayichonko Maganu Mangistera Yesuusira guraanna qiniiteenni ayi ofollannoro murannohu Yihowa ikkinota coyiꞌrino. (Mat. 20:20-23) Yesuusi silxaanesira dannu noota huwatino. Isi dhukasi afinoho. Yesuusi Yihowa assi yiinosikkire horo asse diegennino. (Yoh. 12:49) Isi lawishsha harunsa dandiineemmohu hiittoonniiti? Techohu barru qummeeshshira noo amaale harunsineemmoha ikkiro Yesuusi gede dhukanke anfe heeꞌneemmo. Konnira mittu manchi amaale xaꞌmiꞌrinkero ninkera lawinonkere coyiꞌneemmokki gede qoropha hasiissannonke. Hatteentenni Qullaawu Maxaafinna borronke giddo noo hedo horoonsiꞌne kaaꞌla hasiissannonke. Konni garinni dhukanke anfoommota ammanne adhineemmo. Dhukanke anfoommore ikkinummoro, Woꞌmanka Dandaanno Maganita ‘halaalu yoo’ naandeemmota leellinsheemmo.—Aju. 15:3, 4. w20.08 11-12 guf. 14-15

Jaalakki amaala hasiissannoheta hedittoro, balaxxe maa heda hasiissannohe? Jaalakki amaalattora albaanni ateneeto togo yite xaꞌmi: ‘Quwa sae “keeraancho” ikkanni noommo ikka?’ Quwa sae keeraancho ikkanno manchi, Yihowa biddishshi garinni ikkikkinni umisi biddishshi garinni wolootaho yoo yaanno; qoleno wolootaho gatona yaa qarra ikkitasira dandiitanno. Ateneeto layiꞌrittohu gedensaannino jaalakki amaala hasiissannoheha ikkiro, soꞌrosi badde kulisi; hattono soꞌrosi wodanchanno gede assitanno xaꞌmo xaꞌmi. Jaalikkira yoo yaannohu Yihowaati ikkinnina ate ikkoottokkita qaagi; konnira coyiꞌrattori Qullaawa Borro aana xintaminoha ikka hasiissannosi. (Rom. 14:10) Maganu Qaali giddo noo hayyo horoonsidhe mitto mancho amaalatto woyite, Yesuusi gede mararattoha ikki. (Law. 3:5; Mat. 12:20) Mayira? Korkaatuno Yihowa ninke laꞌꞌannonkehu ninke woloota laꞌneemmo garinniiti.—Yai. 2:13. w20.11 21 guf. 13

Mannu danakki, albakki woy geeshshakki lae isi togooho yaahera hasiꞌratto? Hasiꞌrattokkiti egennantinote! Yihowa aananke lae yoo yaannokkita afanke lowo geeshsha jawaachishshannonke! Lawishshaho, Saamueeli Isseyi ooso Yihowa laino garinni dilaino. Yihowa Saamueelira Isseyi ooso giddo mittu Israeelete moote ikkannota kulinosi. Ikkina, Yihowa doorinohu ayeti? Saamueeli Isseyiha bayira beetto Eeliyaabi lai woyite “Addinta Kaaliiqi doorino manchi kune albasiinni uurre no” yiino. Eeliyaabi moote ikkate malinoha lawanno. Yihowa “kayinni Saamueeli, ‘Ani iso dihasiꞌroommona, danasinna uurrinshasi laꞌooti’” yiino. Tennenni ninke maa ronseemmo? Yihowa togo yiino: “Ani mannu laꞌꞌanno garinni dilaeemmo; mannu aaniido laꞌꞌanno, ani kayinni wodana laeemmo.” (1 Sam. 16:1, 6, 7) Roduuwinke ledo noonke aantera Yihowa faale haꞌrate dandiinummore baala assineemmo. w20.04 14 guf. 1; 15 guf. 3

Yesuusi gidu irshi giddoonni hige saꞌꞌanni no; kuni gidi xaalla mure noo hayixe ikkikkinni digatino. (Yoh. 4:3-6) Gidu shoolu agani gedensaanni midote iillanno. Yesuusi “Illeꞌnenni laꞌe! gidu laalino; gamba assateno iillino” yiita rosaanosi dhagge assidhinoha ikkara dandaanno. (Yoh. 4:35, 36) Yesuusi hatto yaasi mayyaate? Isi lawishshu yaattonni manna gamba assate daafira coyiꞌranni nooha ikkikkinni digatino. Hanni hakkuyira albaanni ikkinore laꞌno. Yihudu manni Samaariyu manna giwannoha ikkirono, Yesuusi kayinni Samaariyu manchora farciꞌrino; iseno ammante adhitino. Isinni Yesuusi ‘gidu gamba assate iillino’ yii yannara batinyu Samaariyu manni isiwa daanni no; kuni manni Samaariyu manchowiinni Yesuusire macciishshe isiwiinni lede rosa hasiꞌrino. (Yoh. 4:9, 39-42) Mittu Qullaawu Maxaafi egennaami kuni “rosate quqquxamino manni midote iillino gidi gedeeti” yiino. w20.04 8 guf. 1-2

Gambooshshunniwa dancha gede sabbankeemmonna rosiinseemmo gara qajeelleemmo. Lawishshaho, Rosiisate Horoonsiꞌneemmo Borro dancha gede horoonsiꞌra dandiineemmo gara ronseemmo. Hakko daafira gambooshsheho dancha gede qixxaabbe. Gambooshshu yannara seekkitine macciishshe. Gambooshshunniwa rossinoonnire loosu aana hosiisse. Hatto assitiniro ‘Yesuusita dancha olanto ikkitinanni.’ (2 Xim. 2:3) Kiirre gundannikkiri wolqaataamma sokkaanono kaaꞌlitannonke. Mittu sokkaanchi calla mageeshshi wolqa afiꞌrinoro heda dandiineemmo! (Isa. 37:36) Hatto ikkiro wolqaataammu batinye sokkaano mageeshshire assa dandiitannoro hanni hendo. Yihowate wolqaataame olanto ledo taalamanno manchi woy agaaninte dino. Mittu ammanamino Kiristaanchi Yihowa ledosi heeꞌriro diinnasi baxxu geeshshitano ikkituro qeela dandaanno. (Eje. 6:16) Tini halaaleho! Ledoꞌne loossannori, ledoꞌne rossannori woy Yihowa Farciꞌraasine ikkinokki fiixiꞌne kiꞌne waajjishiishate woꞌnaalanno woyite tenne qaagge. Konne ola calluwiꞌne olantinanni heedhinoonnikkita qaagge. Yihowa biddishsha harunsitinanni heedhinoonni daafira isi kaaꞌlannoꞌne. w21.03 29 guf. 13-14

Soqqamaasinchu Phaawuloosi Isayaasi 22:13te noota Israeelete mannira noonsa hedo qummi assinoha ikkara dandaanno. Insa Maganoho noonsa baxilli lexxanno gede assiꞌra agurte insaneeto hagiirsiisate aana illachishshino. Israeelete manni “Teyo inte, gaꞌa reyino” yee hedanno; tini yaatto xaa yannarano egennantinote. Yihowa reyitinore kayisannota afanke dancha jaalla doodhineemmo gede kaaꞌlitannonke. Qorontoosira noo Kiristaani kao ammantannokkiri ledo jaalooꞌmitannokki gede qoropha hasiissinonsa. Tennenni ninke maa ronseemmo? ‘Techora calla heeꞌno’ yite heddannori ledo jaalooꞌma gawajjitanno. Mittu Kiristaanchi togoo manni ledo jaalooꞌmannoha ikkiro, dancha amanyootesi huꞌnara dandaanno. Hattono kuni Kiristaanchi Maganu giwannore nafa assara dandaanno. Konnira Phaawuloosi, “Wodana assidhe; cubbono loossinoonte” yee kaajjishe amaalino.—1 Qor. 15:33, 34. w20.12 9 guf. 3, 5-6

Kuni qummeeshshi Yihowa kalqete alamera noo maatesi ma garinni qineessinoro kulanno. Isi baalunkura umo ikkino daafira taalle nookki silxaane noosi. Isi wolootaho mito geeshshita umimmate silxaane uyino; qoleno insa silxaanensa horoonsidhanno gari isi albaanni xaꞌmantanno gede assannonsa. (Rom. 14:10; Efe. 3:14, 15) Yihowa Yesuusa songote umo asse shoomino; qoleno Yesuusi ninke amadanno gari Yihowa albaanni xaꞌmamanno gede assannosi. (1 Qor. 15:27) Yihowa minaanni galtesiranna oososira umo ikkanno gede silxaane uyino. Minaanni dancha maatete umo ikka dandaannohu hiittoonniiti? Isi balaxe Yihowa ma assi yiinosiro afa hasiissannosi. Qoleno Yihowa umimmate silxaane qixxeessinohu mayiraatiro, roorenkanni Yihowanna Yesuusi lawishsha harunsa dandaannohu hiittoonniitiro rosa hasiissannosi. Mittu manchi tenne afa hasiissannosihu mayiraati? Yihowa maatete umo ikkitinorira mito geeshshi silxaane uyinonsa daafiraatinna tenne silxaanensa garunni horoonsidhara hasiꞌrannohuraati.—Luq. 12:48b. w21.02 2 guf. 1-3

Yihowa lawishsha harunsine mito coye hawa hasiissannonke. Lawishshaho, Yihowara guuta qaagate dandoo noosiha ikkirono, cubbinkera maaro eꞌnummoro ninke gatona yaanno, hattono cubbonke hawa doodhanno. (Far. 25:7; 130:3, 4) Ninkeno, baddalinonke manchi maaro xaꞌmiꞌriro, Maganu lawishsha harunsine hakko coye hawa hasiissannonke. (Mat. 6:14; Luq. 17:3, 4) Dhagge ikkitanno surrenkera Magano galatate, tenne elto horoonsiꞌne iso ayirrisa hasiissannonke. Mitu manni surrensa horoonsiꞌrannohu, danchunna bushu coyi daafira uminsara biddishsha fushshiꞌrateeti. Ikkollana, kalaqinonkehu Yihowa ikkino daafira, isi fushshanno biddishshi ninke fushshiꞌneemmo biddishshi baalunkunni roorannoti egennantinote. (Rom. 12:1, 2) Isi biddishshi garinni heeꞌneemmoha ikkiro, heeshshonke salaame noota ikkitanno. (Isa. 48:18) Qoleno Kalaqaanchinke biddishsha harunsineemmoha ikkiro, isi ayirrannonna hagiidhanno gede assanno garinni heeꞌneemmo daafira heeshshonke hagiirru noota ikkitanno.—Law. 27:11. w20.05 23-24 guf. 13-14

Xaa yannara roduuwanke albinni roore lubbora baxate kaaꞌlannonkere maa assa dandiineemmo? Roduuwanke seekkine anfummo kiiro, qarransa huwatanna insara noonke baxilli lexxanno gede assiꞌra qarrisa hooggankera dandiitanno. Dirinsanna lophitino gari insara jaalla ikkineemmota hoolankera diwodhineemmo. Yoonaataani Daawiti mito 30 diro bayirannota qaango; ikkirono isi Daawiti ledo lubbora jaaloomino. Songoꞌne giddo jaala ikkitinara dandiitinannihu kiꞌnera diro bayirannohu woy maaꞌnannohu no? Insa ledo jaalooꞌmitine roduuwu maamara baala ‘baxxinannita’ leellisha dandiitinanni. (1 Phe. 2:17) Ammanate roduuwanke lubbora banxeemmo yaa songote giddo noohu baalunkuwa taalo aanneemmo yaateni? Deeꞌni, hatto yaa diꞌꞌikkino. Ninkete gedee hasatto noonsariwa roore aana soꞌro diꞌꞌikkitino. Yesuusi soqqamaasinesi baalanta “jaallaꞌya” yiinoha ikkirono, Yohaannisi ledo kayinni roore aananno. (Yoh. 13:23; 15:15; 20:2) Ikkirono Yesuusi Yohaannisira baxxinore diassino.—Maq. 10:35-40. w21.01 23 guf. 12-13

Soqqamaasinchu Phaawuloosi Ateensi xaadinohu Yihudu wido ikkinokki mannira sabbakinohu xaadu mine Yihudu mannira sabbakino garinni diꞌꞌikkino. Isi qooxeessaho noo coyenna ammaꞌnote bude seekke wodanchino. (Soq. 17:23) Hakkiinni insa ammantannoha Qullaawo Borro ledo sumuu yaannore afiꞌrate woꞌnaalino. Phaawuloosi baalunku mannira hasattonsa kakkayisanno garinni sabbakanno. Isi Ateensi mannira sabbakanno sokka insa “Anfoonnikki Magano” yite magansidhannohunnita ikkitinota kulinonsa. Ayihudete wido ikkinokki mannira Qullaawa Borroti gari egenno noonsakkiha ikkirono, Phaawuloosi hexxo mudhe insara sabbaka diagurino. Hatteentenni isi insa midote iillino gidi gede asse laino daafira, insara dancha duduwo hasattonsa kakkayisanno garinni kulate woꞌnaalino. Phaawuloosi gede xiinxalloota ikke. Qoqqowiꞌnera heeꞌranno manni maa ammanannoro leellishannore seekkitine laꞌe. Qaete anni mineho suxxinori woy gaꞌninori maati? Manchu suꞌmi, uddanosi, seesino gari, wole agurina coyiꞌranno gari nafa ammanannore leellishara dandaanno. w20.04 9-10 guf. 7-8