Birra

Yesuusa anfummoro, isi hedonna assooti faale haꞌneemmo. Yesuusi hedanno gara anfummoronna ninkeno hakko garinni hedate woꞌnaallummoro jaaloominke kaajjado ikkanno. Ikkina, Yesuusi lawishsha harunsa dandiineemmohu hiittoonniiti? Hanni mitto lawishsha laꞌno. Yesuusi aneti bushshu yaa agure woloota kaaꞌlanno. (Mat. 20:28; Rom. 15:1-3) Konnira, isi umisi injo agurannoho hattono woloota gatona yaannoho. Yesuusi mannu suꞌmasi huniro nafa hanqoho dimuddamanno. (Yoh. 1:46, 47) Isi alba soꞌro loosino manni diwoyyaawanno yee dihedino. (1 Xim. 1:12-14) Yesuusi togo yiino: “Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.” (Yoh. 13:35) Konnira, ateneeto togo yite xaꞌmi: “Yesuusi lawishsha harunse roduuwu ledo keerunni heeꞌrate wolqaꞌya assitu geya sharramanni noommo?” w20.04 24 guf. 11

Heeꞌnoommohu Yihowa suꞌma hunannonna mishanno manni batiꞌrino alamera ikkirono, Yihowa suꞌmira halamanna isi qullaawa, keeraancho, shaqqadonna baxillaancho Magano ikkinota kula dandiineemmo. Yihowa Gashshaanchokki ikkara hasiꞌrattota leellisha dandaatto. Qoleno woꞌmunni woꞌma keeraanchunna baalunku kalaqamira salaamenna hagiirre abbannohu Maganu Gashshoote calla ikkinota wolootaho kula dandaatto. (Far. 37:9, 37; 146:5, 6, 10) Mannaho Qullaawu Maxaafi halaale rosiinseemmo yannara, duucha woyite Yihowa aliidimmare yaano isira kalqete alame gashshate qoosso noosita luphi assine kulleemmo; hatto assankeno garankolla. Maganu seera rosiisa hasiissannota ikkiturono, qara mixonke mannu Annanke Yihowa baxannonna isira ammanamanno gede kaaꞌlate. Konnira Yihowata baxissanno akattanna suꞌmisi afiꞌrino tiro seekkine rosiisa hasiissannonke. (Isa. 63:7) Hatto assineemmoha ikkiro, mannu Yihowa baxanno gede kaaꞌlineemmo, hattono baxillunni hajajamannosi gede assineemmo. w20.06 6 guf. 16; 7 guf. 19

Mannu ooso surre kalaqantinohu dhagge ikkanno garinniiti. Surrenke qinaawino garinni lophitinohu amanke godowira heeꞌneennaati; qoleno daqiiqu kiiro kumunni kiirranniti surrete seele kalaqantino! Xiinxallaano yitanno gara ikkiro, mittu gikki yiino manchi surre, 100 biliyoone meddi yitannota niyurooni yinannita baxxitino seele afidhino. Tini seella 1.5kg meddi yitanno surrenke giddo ofoltino. Surrenkete maalaꞌlissanno dandoo giddo mitte coyiꞌneemmo woyite ikkannoreeti. Surrenke mitto mittonka qaale coyiꞌneemmo woyite, arrawoho, kokkete, baqqaallahonna gagasoho nooti 100 meddi yitanno hirre milli yitanno gede assitanno. Qaale coyiꞌrate dandoo daafira 2019nni xiinxallinoonni xiinxallo, marqu qaaqqi mitto mittonka qaale badannota leellishshanno. Tini xiinxallono ikko wolu batinyu egennaammi yitanno garinni, ilammeemmo woyite qaale badatenna rosate dandoo noonke. Konnira, coyiꞌrate dandoonke Maganu uyinonke elto ikkitinota dihuluullammeemmo. w20.05 22-23 guf. 8-9

Abirihaami Uuri katamira noosita injiitino heeshsho umisi fajjonni agurino. Isi hatto assinohu mayiraati? ‘Jawaata safo afiꞌrino katama’ agadhino daafiraati. (Ibi. 11:8-10, 16) Abirihaami agadhe noo katami Maganu Mangisteeti. Hatte Mangiste gashshitannori Yesuusi Kiristoosaatinna 144,000 buuramino Kiristaanaati. Phaawuloosi tenne Mangiste “Heeshshote Magani katama gordu Yerusaalame” yee xawisino. (Ibi. 12:22; Aju. 5:8-10; 14:1) Yesuusi rosaanosi Mangistekki daggo yite huuccidhanno gede rosiisinonsa; tini Mangiste, Maganu hedinori gordoho ikkinonte gede baattote aanano ikkanno gede assitanno. (Mat. 6:10) Abirihaami Maganu Mangiste hiittoonni qinaabbinoro mitto mittonka coye seekke afinoni? Diafino. Lowo diro kuni coyi “dahaawe” keeshshino. (Efe. 1:8-10; Qol. 1:26, 27) Ikkirono Abirihaami sirchisi giddonni mitu mootoolla ikkitannota afino. Yihowa isira tenne bade kule qaale einosi.—Kal. 17:1, 2, 6. w20.08 2-3 guf. 2-4

Kaadaasinete roso giwa hasiissannonke. Kiristaanu songo xintantu yannanni kayise, Daawuloosi ammanantinote Maganu soqqamaasine wodanira huluullo wixate lowo soꞌrisiisaano horoonsiꞌranni keeshshino. Konnira, halaalenna kapho bande afa hasiissannonke. Diinnanke, Yihowanna roduuwanke ammanneemmokki gede assate interneetenna dagoomittete webisayite horoonsidhara dandiitanno. Konne totao naqannohu Sheexaane ikkinota qaange giwa hasiissannonke! (1 Yoh. 4:1, 6; Aju. 12:9) Sheexaanu gawajjannonkekki gede gargadhate, Yesuusira noonke ammana kaajjishiꞌranna isi Maganu hedinore wonshannohu hiittoonniitiro huwata hasiissannonke. Qoleno, Yihowa xaa yannara loososi loosate horoonsiꞌranni noo dirijjite addaxxa hasiissannonke. (Mat. 24:45-47) Hatto assate Maganu Qaale ganyine xiinxalla hasiissannonke. Hatto assinummoro, ammananke giddo hige lixino rumushsho afidhino haqqicho gede ikkitanno. Soqqamaasinchu Phaawuloosi techohu barru qummeeshshira noo hedo borreessi woyite togoo lawishsha horoonsiꞌrino. w20.07 23-24 guf. 11-12

Ninke baalunku guuta ikkinoommokki daafira, manna aaniido laꞌne insa hattooreeti yaa rakkannonke. (Yoh. 7:24) Kayinni mitto mancho aaniido laꞌne isi daafira anfeemmori shiimareetilla. Lawishshaho, mittu lowo egennonna woꞌnaalshi noosi akimichi nafa dhiwamino mancho aana lae hakko manchi xisso daafira lowore afa didandaanno. Isi, manchu alba hiittoo dhibbi noosironna, hiitto asse dhiwannosiro kuꞌlanno woyite seekke macciishsha hasiissannosi. Akimichu dhiwamino manchita giddooyidi mannimma laꞌꞌate raaje kai yaasira nafa dandaanno. Hatto assa hoogiro, manchoho amadinosikki dhibba kulasira dandaanno. Hatteente gede, roduuwanke aaniido calla laꞌne insa daafira garire afa didandiineemmo. Hakko daafira, giddooyidi ayimmansa afate woꞌnaala hasiissannonke. Mannu wodanita afa didandiineemmo. Ikkirono, Yihowa lawishsha harunsa dandiineemmo. Yihowa magansidhannosiri huuccidhanno huuccatto macciishshanno. Qoleno isi insa ilante lophitino garanna qarransa afino. Hakkiinnino sae mararannonsa. w20.04 14-15 guf. 1-3

Naaxxa ‘fayyimma’ ikkitinokki daafira, umonke heeshshi assineemmore ikka hasiissannonke. Naaxxaaleeyye coye hasidhannoreetinna umonsa bokkeessitannoreeti. Hedonsanna assootinsa duucha woyite umonsano wole mannano gawajjanno. Insa tenne hedonsa biddi assiꞌra gibburo, Sheexaanu wodanansa beeshshara dandaanno. (2 Qor. 4:4; 11:3) Umosi heeshshi assanno manchira ‘fayyo hedo’ noosi. Isi wolootu duucha doogganni roortannosita afino daafira, umosi dibokkeessanno. (Fil. 2:3) Qoleno, ‘Maganu booꞌnaleeyye giwannotanna jooguulleho kayinni elto aannota’ afino. (1 Phe. 5:5) Fayyu manchi Maganu giwasira dihasiꞌranno. Woꞌmante yannara umonke heeshshi assate, Qullaawu Maxaafi ‘Akkala mannimma loosise ledo mulqitine tuggine haaro mannimma uddidhe’ yee amaalinonke amaale macciishsha hasiissannonke. Yesuusi lawishsha xiinxallanna dandaaminke deerrinni isi faale haꞌra hasiissannonke.—Qol. 3:9, 10; 1 Phe. 2:21. w20.07 7 guf. 16-17

Yihowa songo miilla ikka ninkera lowo ayirrinyeeti! Keere baxannohu hagiirraamu manni woꞌminote ayyaanaamittete gannatera heeꞌnoommo. Songote giddo ate qeechi maatiyya? Soqqamaasinchu Phaawuloosi Kiristaanu songo manninatu gede ikkitinota coyiꞌrino. Isi mittu mittunku songote miili bisu kifile gede ikkinota coyiꞌrino. (Rom. 12:4-8; 1 Qor. 12:12-27; Efe. 4:16) Umihunni Phaawuloosi coyiꞌrino lawishshinni mitti mittinke Yihowa songo giddo waagu noonkere ikkinoommota ronseemmo. Phaawuloosi togo yiino: “Mitte mannimmara duuchu bisi no. Mittu mittunku bisi addi addi looso afiꞌrino. Ninkeno haammante heeꞌnenni, Kiristoosinni mitto bisooti. Mitte mannimma aana heeꞌnoommo daafira, mitti mittinke kuꞌu koꞌonni bisooti.” (Rom. 12:4, 5) Phaawuloosi hatto yaasi mayyaate? Mitti mittinkera songote giddo addi addi loosi noonkeha ikkirono, baalunku waagu noonkereeti. w20.08 20 guf. 1-2; 21 guf. 4

Annuwunna amuuwu Yihowa lawishsha harunsite umonsa heeshshi assa dandiitannohu hiittoonniiti? Hasiisannoha ikkiro, oosoꞌne mitto looso ma garinni loonsiro woyyannoro mite hedo kultannoꞌne gede xaꞌme. Kultinoꞌne hedo maltinota ikkituro adhe. Qoleno, Yihowa soqqamaanosi isi mitto coye assannohu mayiraatiro huluullante ayirrinyunni xaꞌmitanno woyite cince dawarannonsa. Konnira cincatennino dancha lawishsha ikkinonke. Maganu Soddoomunna Gomooru katama hunara kai woyite, Abirihaami huluullisinosire kuꞌli yannara Yihowa macciishshinosi. (Kal. 18:22-33) Yihowa Abirihaami galte Saara ayirrisino garano heda dandiineemmo. Maganu Saara geedhimmase yannara godobbannota kuliseta osoꞌlitino; isi kayinni tennera koffi diyiino woy dihanqino. (Kal. 18:10-14) Hatteentenni Saara ayirrinyunni hasaawisinose. Annuwunna amuuwu hattono songote cimeeyye Yihowa lawishshinni maa rosa dandiitanno? Oosoꞌne woy songote giddo noori mitu roduuwi assitinoonniri gara ikkinokkita coyidhuro mayi macciishshamannoꞌne? Bayichonko insa sodhinota ammansiisate woꞌnaaltinanninso, mayitara hasidhinoro huwatate sharrantinanni? Qoosso noonsari Yihowa lawishsha harunsansa maatensanna songote miilla kaaꞌlitanno. w20.08 10 guf. 7-9

Umo Yihowa manni ledo gamba yaa hananfummo woyite, ayyaanaamittetenni marqu qaaqqi gedeere ikkinoommotanna lowori ronseemmori noota huwantoommo daafira, wolootu kaaꞌlitankera hasiꞌnoommoha ikkara dandaanno. (1 Qor. 3:1, 2) Ikkina xaano hattoo hasatto noonke? Yihowara lowo diro soqqamme lowo egenno afiꞌnoommoha ikkiro, wolootu hakko iso halaalu mine ninke geeshsha keeshshitinokki roduuwi kaaꞌlitannonketa fokkineemmoha ikkara dandaanno. Ikkollana, Yihowa ninke jawaachishate duucha woyite ammanate roduuwanke horoonsiꞌranno. (Rom. 1:11, 12) Yihowawiinni wolqa afiꞌra hasiꞌnummoro, tenne dea dihasiissannonke. Mittu manchi lowore loosa dandaannohu umisi jawaantenni, rosisi deerrinni, jirosinni woy budisinni ikkikkinni umosi heeshshi assasinninna Yihowa addaxxasinniiti. Konnira ninke baalunku (1) Yihowa addaxxino, (2) Qullaawu Maxaafi giddo kulloonni manni lawishshinni ronso, (3) ammanate roduuwinke uyitannonke kaaꞌlo maahoyye yine adhino. Hatto assinummoro, wolqiweelloommoha lawinkerono, Yihowa wolqaataamma assannonke! w20.07 14 guf. 2; 19 guf. 18-19

Yihowa Farciꞌraasine ikkinokki fiixinkera farciꞌneemmo woyiteno cinca qarra ikkitankera dandiitanno. Rosiisaancho 3:1, 7te noohu xintu seeri kaaꞌlankera dandaanno. Qummeeshshu, “Sammi yaate yanna no; hasaawate yanna no” yaanno. Danchu amanyootinke fiixinke ninke macciishshanno gede assara dandaanno; ikkollana afiꞌnummo faro horoonsiꞌne farciꞌra hasiissannonke. (1 Phe. 3:1, 2) Maatenkerano ikko wolu mannira diinaggaambe sabbankeemmonna rosiinseemmoha ikkirono cinca hasiissannonke. Qullaawu Maxaafi giddo kulloonnihunna yannankera noohu ammanamino manni lawishshinni cinca rosa dandiineemmo. Imbaaqoomi Yihowa bunshe hunanno yanna quqquxame agadhino; ikkirono isi “Shaete aana fule uurreemmo” yee cince agadhannota coyiꞌrino. (Imb. 2:1) Soqqamaasinchu Phaawuloosi soqqanshosi ‘gudate’ halchannota coyiꞌrino. Ikkollana “Maganu eltoha Dancha Duduwo” cince duduwino.—Soq. 20:24. w20.09 11-12 guf. 12-14

Kalqe alame giddo Yihowanni aane lowo silxaane noosihu Yesuusa ikkirono, isi hasiisannohunni aleenni umisira dihedino. Yesuusi gede umonsa heeshshi assitannoti Yihowa soqqamaano Maganu dirijjite giddo kuni baxilli woꞌmanno gede kaaꞌlitanno. (Luq. 9:48; Yoh. 13:35) Songote giddo qarru kalaqiminohanna cimeeyye konne qarra garunni tirtinokkiha lawihero maa assatto? Coyiꞌramattonte, cimeeyyete ledo kaaꞌlante umokki heeshshi assattota leellisha dandaatto. (Ibi. 13:17) Hatto assa dandaatto gede ateneeto togo yite xaꞌmi: ‘Isi kuni coyi hakkeeshsha muddinoreeti? Konne qarra tirate maltino yanna xaatini? Tini hajo ane laꞌannoe? Isi halaale coyiꞌniro, songote giddo mittimma heedhanno gede assa hasiꞌroommonso, aneneeto gotti gotti assanni noommo?’ Yihowa dandoontenni roore umo heeshshi assinannita, hattono chaachaarrentenni roore mittimma baxanno. Konnira, Yihowara umokki heeshshi assite soqqamate sharrami. Hatto assittoro, songote giddo mittimma heedhanno gede kaaꞌlatto.—Efe. 4:2, 3. w20.07 4-5 guf. 9-11

Yesuusi “woxinsanni” kaaꞌlinosiha ammanamino meento naadino. (Luq. 8:1-3) Isi lowo geeshsha hasiisanno halaaleno kulinonsa. Lawishshaho isi reyannotanna reyotenni kaꞌꞌannota kulinonsa. (Luq. 24:5-8) Isi soqqamaasinesira assinonte gede kuri meentino iillannonsa fonqolira qixxaawanno gede kaaꞌlinonsa. (Maq. 9:30-32; 10:32-34) Yesuusa kaaꞌlino meenti giddo mitu iso haqqaho sunti woyite ledosi noota qaango; soqqamaasinesi kayinni amandisi woyite agurte xooqqino. (Mat. 26:56; Maq. 15:40, 41) Yesuusi reyotenni kainota balaxe afinohu ammanamino meentooti. Yesuusi kuri meenti isi reyotenni kainota soqqamaasinesira kulanno gede soyinonsa. (Mat. 28:5, 9, 10) Qoleno 33 M.D. Phenxeqosxete ayyaanira qullaawu ayyaani dirri woyite meentuno nooha ikkara dandaanno. Hakko noori baalunku maalaletenni wole qaale coyiꞌrate dandoo afidhino, hattono mannaho “Maganunniha jawa looso” kultino.—Soq. 1:14; 2:2-4, 11. w20.09 23 guf. 11-12

Manna rosaano assate loosi heeshsho gatisanno loosooti! Tenne mayinni anfeemmo? Yesuusi Maatewoosi 28:19, 20te togo yee hajajino: “Hadhine gosa baala . . . cuuꞌinanni rosaanoꞌya assensa.” Cuuama lowo geeshsha hasiissannote yineemmohu mayiraati? Gato afiꞌra hasidhannori cuuama hasiissannonsa. Cuuamate qixxaabbinori gato afiꞌra dandiitannohu Yesuusi ninkera yee wodote kakkalo ikke reyinotanna reyotenni kainota ammanturo callaati. Soqqamaasinchu Pheexiroosi ammanate roduuwisira, “Cuuama . . . [gatissannoꞌnehu] Yesuusi Kiristoosi kao widoonniiti” yiinohu iseraati. (1 Phe. 3:21) Konnira Qullaawu Maxaafi rosaanchi cuuamanno woyite hegerera heeꞌrate hexxo afiꞌranno. Manna rosaano assate “rosiisate” dandoonke woyyeessiꞌra hasiissannonke. (2 Xim. 4:1, 2) Mayira? Korkaatuno Yesuusi, “Hadhine gosa baala . . . rosaanoꞌya assensa. . . . [hattono] rosiissensa!” yee hajajinonke. Soqqamaasinchu Phaawuloosi “Konne coye jaatte assi. Hatto assittoro, ateneenna macciishshitannohere gatisatto” yiino. w20.10 14 guf. 1-2

Rosaanchu Pheexiroosi gedensoonni manna woshshaadate looso baxino. Yihowa kaaꞌlonni isi konni loosira worba ikkino. (Soq. 2:14, 41) Sabbankeemmohu Yihowa banxeemmo daafiraati; konne looso loonseemmo gede kakkayisinonkehu qaru coyi isooti. Ikkadda diꞌꞌikkinoommoreeti yine hendummorono Yihowara noonke baxilli tenne qeelate kaaꞌlannonke. Yesuusi Pheexiroosi manna woshshaadannoha ikkara koyisisi woyite “Waajjitooti” yiinosi. (Luq. 5:8-11) Pheexiroosi Yesuusi rosaancho ikkummoro mayi iillannoe ikka yee waajje badhera dihigino. Yesuusi isinna ledosi loossannori maalaletenni lowo qulxuꞌme amaddanno gede kaaꞌlinsa woyite, Pheexiroosi dhagge assiꞌrino; isi Yesuusi koyisisi woyite konni loosira ikkado diꞌꞌikkoommoho yee hedino. Yesuusi rosaancho ikkittoro maa assa hasiissannohero huwatatto woyite yaadattoha ikkara dandaanno. Hatto ikkiro Yihowara, Yesuusiranna mannaho noohe baxilli lexxanno gede assiꞌri; hatto assittoro, Yesuusi manna woshshaadatto gede koyisino koyishsha adhate kaꞌꞌatto.—Mat. 22:37, 39; Yoh. 14:15. w20.09 3 guf. 4-5

Yannanke, wolqankenna woxenke mararrummokkinni horoonsiꞌne “gara ikkitinoti wodanu dooꞌꞌo noonsa” manna hanseemmo. (Soq. 13:48, NW) Hatto assineemmoha ikkiro Yesuusi lawishsha harunsinanni heeꞌnoommo. Yesuusi, “Ane sagale soyinoehu haja wonshatenna loososi guutate” yiino. (Yoh. 4:34; 17:4) Ninkeno hatto assa hasiꞌneemmo. Yesuusi uyinonke looso umo fushsha hasiꞌneemmo. (Yoh. 20:21) Ayyaanaamittetenni qiiddinorinna wolootuno konne looso ninke ledo goofimarchu geeshsha loossara hasiꞌneemmo. (Mat. 24:13) Yesuusi uyinonke looso umo fushsha shota ikkitinokkiti egennantinote. Ikkirono, konne looso loonseemmohu callootinke diꞌꞌikkino. Yesuusi kiꞌne ledo noommo yee qaale eino. Manna rosaano assineemmo woyite ‘Maganu ledo loonsanni’ heeꞌnoommo. (1 Qor. 3:9) Hakko daafira, konne looso umo fushsha dandiineemmo. Konne looso loosanna wolootuno hatto assitanno gede kaaꞌla ninkera lowo ayirrinyeeti; qoleno lowo hagiirre afiꞌneemmo!—2 Qor. 4:7. w20.11 7 guf. 19-20

Duucha woyite annuwunna amuuwu doodhitanno doorshi qaaqquullinsa gedenso seekkara woy hunara dandaanno. Annuwunna amuuwu busha doorsha doodhiro, qaaqquullinsara qarru iillara dandaanno. Dancha doorsha doodhiro kayinni, qaaqquullinsa hagiirrunna harshammo noo heeshsho heedhanno gede kaaꞌlitansara dandiitanno. Ikkollana oosono dancha doorsha doodha hasiissannonsa. Baxillaanchu iimi Anninke Yihowara soqqamate doodhineemmo doorshi wolu baalunku doorshinni lowo geeshsha roorinoho. (Far. 73:28) Yesuusi anninna ama qaaqquullinsa Yihowara soqqantanno gede kaaꞌlate murcidhino; insa doodhitino doorshi qara mixonsa tenne ikkitinota leellishanno. (Luq. 2:40, 41, 52) Yesuusino Yihowa loosara uyinosi looso loosate kaaꞌlannosiha dancha doorsha doodhino. (Mat. 4:1-10) Yesuusi lophe shaqqado, ammanaminohanna worba mancho ikkino; Magano waajjanno anninna ama togoo beetti heeꞌrinsaro hagiidhanno. w20.10 26 guf. 1-2

Hanni aane noo lawishsha hendo. Mitte jawa rodoo alba heedhinota dancha heeshsho heddanni no. Xaa heeshshose qarraataame ikkiturono, ise Yihowara soqqamate dandiiture baala assitanni no. (1 Qor. 15:58) Ise barru baala albillitte Gannatete maatesenna jaallase ledo heedhannota heddanno. Wole rodoo ammanate rodoose xissiisinoseta qaaggannoha ikkirono, koma diamaxxitino. (Qol. 3:13) Mittu rodii alba loosino soꞌro qaaggannoha ikkirono, xa Yihowara ammaname heeꞌrate murciꞌrino. (Far. 51:10) Kuri sasenka Kiristaana mitto assannonsari maati? Insa baalunku albi heeshshonsare qaaggannoha ikkirono, barru tuqa hakkawarire calla diheddanno. Hatteentenni insa albillittete yanna ‘dhaabbe laꞌanno.’ Albillittete yanna ‘dhaawe laꞌꞌa’ hasiissannonkehu mayiraati? Mittu manchi sammi yee badhe hige laꞌꞌanni caaqulamannoha ikkiro, alba hige haꞌre afannokkinte gede quwa saꞌne albi heeshshonke calla qangeemmoha ikkiro, Yihowara woꞌma giddonni soqqammanni heeꞌra didandiineemmo.—Luq. 9:62. w20.11 24 guf. 1-3

Wolqaataamo olamaancho Gooliyaadi hendiro Daawiti wolqiweeloho. Qoleno Gooliyaadi jigeessaho, olu uduunne qodhinohonna fullahino olamaanchooti. Daawiti kayinni Yihowa addaxxino daafira, Yihowa diinasi Gooliyaadi qeelanno gede wolqa uyinosi. (1 Sam. 17:41-45, 50) Daawiti wolqa baꞌꞌanno gede assasira dandaannohu wolu qarrino iillinosi. Isi Yihowa shoominohu Israeelete Moote Saaoolira ammaname soqqamino. Moote Saaooli umi qara Daawiti ayirrisinosi. Gedensoonni kayinni, isi naaxxino daafira Daawiti hinaasa hanafino. Isi Daawiti beebba assiꞌrino; wole agurina shaasira nafa woꞌnaalino. (1 Sam. 18:6-9, 29; 19:9-11) Moote Saaooli Daawiti beebba assiꞌrinoha ikkirono, Daawiti Yihowa shoomino moote ayirrisa diagurino. (1 Sam. 24:6) Iillinosi qarra cince saꞌꞌanno gede jawaante aasira Yihowa huucciꞌrino.—Far. 18:1, umoonni noo hedo. w20.07 17 guf. 11-13

Lame mangistuwa yaano aliyye mootenna wodiidi mootere kultanno masaalohu rooriidi gafi woꞌmino; konnira, gatinohuno woꞌmannota horo dihuluullammeemmo. Daanieeli fooliishsho 11te noo masaalo huwatate, tini masaalo kultannohu batinyu Maganu manni heeꞌrannowa gashshitinota woy Maganu manna miiccino mangistubba daafira calla ikkinota wodancha hasiissannonke. Alamete noo manni giddo Maganu soqqamaano kiiro shiima ikkiturono, duucha woyite mangistubba insa illachishshanno. Mayira? Korkaatuno Sheexaanunna isi gashshe noo alameti qara mixo Yihowaranna Yesuusira soqqantannore hunate. (Kal. 3:15; Aju. 11:7; 12:17) Qoleno Daanieeli masaalo xiinxallineemmo woyite, tini masaalo wole Maganu Qaali giddo noo masaalo ledo sumuu yaa hasiissannoseta qaango. Isinni Daanieeli masaalo garunni huwata dandiineemmohu, wolu Qullaawu Maxaafi gafi ledo xaadinse laꞌneemmoha ikkiro callaati. w20.05 2 guf. 1-2

Xaa yannara lowo mannira ‘Mannu reyihu gedensaanni hiitto ikkanno?’ yitanno xaꞌmora addi addi lao noonsa. Tenne daafira Qullaawu Maxaafi mayyaanno? Mittu manchi reyihu gedensaanni bisisi bushsha ikkanno. Ikkirono kalqe alame kalaqinohu hakko manchira hasiisanno biso oye kayisasira dandaanno. (Kal. 1:1; 2:7) Soqqamaasinchu Phaawuloosi, Maganu reyino manchira hakkawari biso oye kayisannokkita leellishanno lawishsha horoonsiꞌrino. Hanni “qamade [sinde] woy wole gide” hendo. Winxoonni gidi hoqihu gedensaanni haaro ikke muꞌranno. Hakku muꞌrino gidi winxihuwiinni baxxanno. Phaawuloosi konne lawishsha horoonsiꞌrinohu, Kalaqaanchinke reyinohura “hasiꞌrino biso aanno[ta]” kulateeti. Phaawuloosi lede “gordu widi bisinna baattote widi bisi” noota coyiꞌrino. Hatto yaasi mayyaate? Baattote aana maalu bisi no; iima kayinni sokkaanote gede ayyaanu bisi no.—1 Qor. 15:36-41. w20.12 9-10 guf. 7-9

Ninke baalunku beꞌe yinummokkinni keerunni heeꞌra hasiꞌneemmo. Yaaddo baxissannohu dino. Ikkirono mito woyite yaaddo waaddankera dandiitanno. Qoleno Moote Daawiti techohu barru qummeeshshira xaꞌmi gedee xaꞌmo xaꞌmineemmoha ikkara dandaanno. Yaandeemmo gede assannonkehu batinyu coyi no; kuri giddo mitu hooꞌla dandiineemmokki coyeeti. Lawishshaho, sagalete, uddanotenna minu waagi diru kiiro lexxannota hoola didandiineemmo; ledonke loossannori woy rossannori ammanammeemmokki gede woy amanyoote bainore assineemmo gede xixxiibbannonketa hoola didandiineemmo. Qooxeessinkera mannu jaddo loosannokki gede hoola didandiineemmo. Heeꞌnoommohu rooru manni Qullaawu Maxaafiha xintu seera harunsannokki alamera ikkino daafira togoo qarri iillannonke. Tenne alame magano ikkinohu Sheexaanu, “tenne gobba hedo [“yaaddo,” NW]” mito manna Yihowara soqqamannokki gede assitannota afino. (Mat. 13:22; 1 Yoh. 5:19) Alamete aana yaachishanno coyi woꞌminohu iseraati. w21.01 2 guf. 1, 3

Soqqamaasinchu Yohaannisi roduuwanke gimbeemmokki gedeno jawaachishinonke. Tenne amaale harunsineemmokkiha ikkiro, Sheexaanu gawajjankera wodhinanni heeꞌnoommo. (1 Yoh. 2:11) Umi xibbi diri jeefora mitu Kiristaanira togoori iillinonsa. Sheexaanu Maganu manni mereero gibbonna babbadooshshu heeꞌranno gede assate dandiire baala assino. Yohaannisi sokka borreessi woyite Sheexaaneho noosi gedee akati noonsa manni songo sure eino. Lawishshaho, Diyoxiraafiisi mitte songo giddo babbadooshshu kalaqamanno gede assino. (3 Yoh. 9, 10) Isi aliidi bisi soyanno roduuwa diayirrisino. Isi baxannokki manna wosinsiꞌranno Kiristaana songote giddonni fushshe hoolate woꞌnaalino. Isi lowo bunshe assino. Sheexaanu xaano Maganu manna babbadaranna baxantannokki gede assara sharramanni no. Ninke kayinni Sheexaanu hatto assankera horo wodhinoonke. w21.01 11 guf. 14

Umihu Alamete Oli yannara Jarmanetenna Biritaaniyu gashshooti olama giwinoha Maganu manna farritto assiꞌrino. Ameeriku gashshootino sabbakate looso albisa ikkite loossanno roduuwa usursiisino. Konni garinni, Yohaannisi Ajuuja 11:7-10 noo masaalo woꞌmitino. Hakkiinni 1930 taaera, roorenkanni Layinkihu Alamete Oli yannara aliyye moote Maganu manna assiꞌnannikkita assiꞌrino. Hitilerinna miillasi hatte gobbara Maganu manni loosanno looso hooltino. Insa 1,500 meddi yitanno roduuwa shitino, hattono kumunni kiirranni roduuwa usuranyu kaampe eessitino. Aliyye moote, Maganu manni Yihowa suꞌma faajjetenni guwisiꞌrannokki gede agawe, ‘qullaawa mine batteessino,’ hattono ‘barru baala shiqinshanni kakkalo hoolino.’ (Dan. 11:30b, 31a) Jarmanete gashshaanchi Hitileri ‘Maganu manna tenne gobbanni feye huneemmo’ yee boolaqiꞌrino. w20.05 6 guf. 12-13

Mimmito lubbora banxeemmota leellinsheemmoha ikkiro, songote giddo heewo heedhannokki gede assineemmo. Yoonaataani ‘Moote ikka hasiissannoehu aneeti’ yee Daawiti ledo heewisaminokkita qaango. (1 Sam. 20:42) Ninke baalunku Yoonaataani lawishsha harunsa dandiineemmo. Ledoꞌne loossannorira dandoo noonsa daafira hinaassinoonte; “hatteentenni wolu manni kiꞌnenni roorinohu gede assitine hedde.” (Fil. 2:3) Songote giddo noohu mittu mittunku halashshaanchi kaaꞌlannori noota deꞌinoonte. Ninkeneeto heeshshi assineemmore ikkinummoro, roduuwinketa dancha akatta illachinsheemmo; hattono danchu lawishshinsanni horo afiꞌneemmo. (1 Qor. 12:21-25) Mimmito lubbora banxeemmota leellinshummoro afiꞌneemmo atoote hendo. Maganu manni mereero noo mittimma kaajjitanno gede assineemmo. Yesuusi rosaano ikkinoommota leellinsheemmo; tini suwashshu wodani noonsari halaalu minira dagganno gede assitanno. Baalunkunni roore “maarote Anni, jawaante baalate Magani” Yihowa ayirranno gede assineemmo.—2 Qor. 1:3. w21.01 24 guf. 14; 25 guf. 16

Xaa yannara Maganu soqqamaasine mannu mito woyite gowwuullunna wolqiweelootu gede asse laꞌꞌannonsa, hattono qacifatannonsa. Mayira? Korkaatuno alamete manni ikkaata diꞌꞌikkineemmo. Umonke heeshshi assineemmore, jooguullenna owaata ikkate sharrammeemmo. Tini alame kayinni, naaxxaleeyye, booꞌnaleeyyenna finqila manna naaddanno. Qoleno, poletikaho dikarsammeemmo, hattono aye gobbarano ola diolammeemmo. Alame lambe galleemmokki daafira, mannu woffi asse laꞌꞌannonke. (Rom. 12:2) Mannu wolqiweelootaho yiinkerono, Yihowa ninke horoonsiꞌre hoola yinoonnire assanni no. Isi sabbakate looso konni albaanni loonse egenninoonnikki garinni loosiisanni no. Xaa yannara soqqamaanosi metseettansa alamete aana qixxeessinannite wole baalante metseettanni roore lowo afiinni tirte mannaho iillishshanni no; qoleno, Qullaawa Maxaafa horoonsidhe lowo miliyoone ikkanno manni heeshsho woyyaabbanno gede kaaꞌlitanni no. Konni dhagge ikkanno loosi baalaho galatu hasiisannosihu Yihowaati. w20.07 15 guf. 5-6

Yesuusi Yihowara maahoyye yee galanno; hatto assannohu egenno woy dandoo ajjeennasi diꞌꞌikkino. Yesuusi huwatate qarrisannokki garinni xawise rosiisinohu egenno noosi daafiraati. (Yoh. 7:45, 46) Yihowa kalqe alame kalaqi woyite ledosi loosanno gede assinohu, Yesuusira lowo dandoo noosita afino daafiraati. (Law. 8:30; Ibi. 1:2-4) Qoleno Yesuusi reyotenni kaihu gedensaanni Yihowa “roorre baala gordohonna baattote” uyinosi. (Mat. 28:18) Yesuusira lowo dandoo noosiha ikkirono Yihowa biddishsha hasiꞌranno. Isi hatto assannohu Annasi baxanno daafiraati. Minaannuwuno tenne huwata hasiissannonsa. Yihowa minaamuwu minaannuwaho maahoyye yee galanno gede assinohu meento labballoho woriidire asse laꞌꞌanno daafira diꞌꞌikkino. Yihowa Yesuusi ledo gashshitanno gede labballo calla ikkikkinni meentono doorasi tenne leellishshanno. (Gal. 3:26-29) Yihowa Beettisira silxaane oye ammanannosita leellishino. Hatteente gede hayyichu minaannino minaamasira mite silxaane aanno. w21.02 11 guf. 13-14

Maganu Qaali hincilaallote gede biddi assiꞌra hasiissannonkere bande anfe biddi assiꞌneemmo gede kaaꞌlannonke. (Yai. 1:23-25) Lawishshaho, Maganu Qaale xiinxallinummohu gedensaanni hanqonke eemadha hasiissannonketa huwantammora dandiineemmo. Hanqisannori tuncu yaannonke woyite Yihowa kaaꞌlonni jooguulle ikka dandiineemmo gara ronseemmo. Qoleno coye heeshshi gotti assine hedanna woyyinore doodha dandiineemmo. (Yai. 3:13) Qullaawu Maxaafi yaannore seekke afa lowore kaaꞌlitannonke! Mito woyite maa biddi assiꞌra hasiissannonkero anfeemmohu soꞌnummo gedensaanniiti. Hayyo afiꞌrate qarramme rosantenni wolootu assitino danchummanninna bunshenni rosa woyyitanno. Yaiqoobi Qullaawu Maxaafi giddo kulloonniri lawishshaho, Abirihaami, Reaabi, Iyyoobinna Eeliyaasi lawishshinni ronseemmo gede jawaachishinonkehu iseraati. (Yai. 2:21-26; 5:10, 11, 17, 18) Kuri ammanantinori Yihowa soqqamaano, hagiirrensa hunara dandaanno fonqolo qeelte saꞌino. Tini ninkeno Yihowa kaaꞌlonni fonqolo qeelle saꞌꞌa dandiineemmota leellishshanno. w21.02 29-30 guf. 12-13

Qullaawu Maxaafi xiinxallo yannara, rosaanchu Maganu Qaale wodanchanno gede roore kaaꞌlannohu rosiisaanchosiiti. Mittu rodii ledosi xiinxallisatto gede koyisihero, ati isi kaaꞌlaancho ikkoottota deꞌooti. (Ros. 4:9, 10) Xiinxallote yannara dancha gede kaaꞌlate maa assa dandaatto? Xiinxallisate qixxaawi. Rosiisaanchu rosaanchu daafira mitore kulannohe gede balaxxe xaꞌma dandaatto. Togo yite xaꞌma dandaatto: “Hanni Qullaawu Maxaafi rosaanchikki daafira kulattoe? Xiinxallitinannihu hiikkonne birxichooti? Konni birxichinni isira rosiisattora hasiꞌroottori maati? Xiinxallote yannara assa hasiissannoeri woy assa hasiissannoekkiri maati? Rosaancho jawaachishate assa dandeemmori maati?” Rosiisaanchu rosaanchisi fojo kulannohekkiti egennantinote; kayinni kulannoheri kaaꞌlahera dandaanno. Joyi yinanniti misiyoone ikkite soqqantanno rodoo togo yitino: “Ledoꞌya xiinxallissannorira kuleemmansari insa rosaancho kaaꞌlate kaꞌanno gedenna xiinxallote yannara mayitannoro heddanno gede kaaꞌlannonsa.” w21.03 9 guf. 5-6

Maganunniha keeraancho seera harunsineemmo daafira mito woyite mannu giwannonke. Kuni seeri alamennite mancaꞌꞌa ikkito ledo horo dixaadannoho. Lawishshaho, xaa yannara batinyu manni lowo geeshsha mancaꞌꞌa coye gara ikkinori gede asse laꞌꞌanno; Maganu Soddoomunna Gomooru manna huninohu hattoore assino daafiraati. (Yih. 7) Ninke tenne lainohunni Qullaawu Maxaafi biddishsha harunsineemmo daafira batinyu manni qacifatannonke hattono quwa saꞌnoommohu gede asse laꞌꞌannonke. (1 Phe. 4:3, 4) Mannu giwannonketanna xonannonketa dandiine saꞌneemmo gede kaaꞌlannonkeri maati? Yihowa kaaꞌlannonketa seekkine ammana hasiissannonke. Wonqote gede ammananke, “giirate gede wala yaannoha bushu koottalo baala hunate” kaaꞌlitannonke. (Efe. 6:16) Ikkirono ammanatenni roore hasiisannonkeri no. Baxillu hasiisannonke. Mayira? Korkaatuno “baxillu dicaaccaawanno.” Hattono xissiisannore baala cince saꞌꞌanno. (1 Qor. 13:4-7, 13) Yihowa, ammanate roduuwankenna giwannonke manna nafa baxa gimbanninketa dandiine saꞌneemmo gede kaaꞌlitannonke. w21.03 20-21 guf. 3-4

Mito coye assa qorophine roduuwanke banxeemmota leellisha dandiineemmo. Lawishshaho, insa coyidhannorira hanqate dimuddammeemmo. Hanni Yesuusi reyara shiimu barri gate heeꞌreenna ikkinore laꞌno. Isi rosaanosi heeshsho afiꞌrate maalasi itanna mundeesi aga hasiissannonsata kulinonsa. (Yoh. 6:53-57) Isi coyiꞌrinorinni shagaggidhe lowo rosaanosi iso agurte hadhino; ikkirono wole addu jaallasi agurte dihadhinosi. Insa isira ammanante heedhino. Insa Yesuusi coyiꞌrinore dihuwattino hattono coyiꞌrinorinni gurchaabbinoha ikkara dandaanno. Ikkirono Yesuusiti ammanantino jaalla coyiꞌrinori soꞌrote yite diheddino hattono tennera dihanqitino. Hatteentenni insa Yesuusi halaale coyiꞌrannota affino daafira iso ammantino. (Yoh. 6:60, 66-69) Roduuwinke coyidhannorinni muddamme hanqa horonta dihasiissannonke. Hatteentenni yitara hasidhinore xawisse kultanno gede assineemmo.—Law. 18:13. w21.01 11 guf. 13