Dotteessa

Yesuusi heeshshosi ninke daafira sayise aate maahoyye yee bayira baxillesi leellishinonketa anfoommo. (Yoh. 15:13) Yihowanna Yesuusi leellishshinonke baxillira assine qoꞌlineemmori horo dinonke. Ikkirono barru baala heeꞌneemmo heeshshonni galanteemmonsata leellisha dandiineemmo. (Qol. 3:15) Buurantinori wodote kakkalo dhagge ikkitanno hexxo afidhanno faro fantinonsa daafira lowo geeshsha naaddanno. (Mat. 20:28) Insa Kiristoosita wodote kakkalo ammantanno daafira Yihowa insa keeraanote yiinonsa hattono oososi gede asse adhinonsa. (Rom. 5:1; 8:15-17, 23) Wolu geꞌreewi wido ikkitinorino wodo lowo geeshsha naaddanno. Insa Kiristoosita wodote kakkalo ammantanno daafira Maganu albaanni danchu suꞌmi noonsa; qoleno “lowo qarra” woy bayira qarra gatte saꞌꞌate hexxo noonsa. (Aju. 7:13-15) Buurantinorino wolu geꞌreewi wido ikkitinorino wodote kakkalora galatu noonsata leellishshannoti mitte doogo, diru kiiro Qaagooshshu Ayyaana ayirrisate gamba yaate. w22.01 23 guf. 14-15

Yesuusa roore yaachishshinositi sholle reyasi diꞌꞌikkitino. Kassansoonnisi kisse roore yaachishshinosi. Iso ‘Magano xonino’ yine yaano ‘Maganono suꞌmasino diayirrisannoho’ yine kassansoonnisi. (Mat. 26:64-66) Tini Yesuusa lowo geeshsha yaachishshinosi daafira, Annisi konni shollinyinni gatisasira hasiꞌrino. (Mat. 26:38, 39, 42) Yihudu manna rumote giddonni fushshate Yesuusi haqqaho sutama hasiissinosi. (Gal. 3:10) Tini rumo, insa Maganoho hajajammeemmo yite qaale eꞌinoha ikkirono hajajama gibbino daafira iillitinonsate. Konnira Addaamiwiinni ragidhino cubbono agurranna tinino wole barshe abbitinonsa. (Rom. 5:12) Maganu Israeelete uyino Seeri, reyote iillishanno cubbo loosino mancho shaa hasiissannota kulanno. Shinihu gedensaanni reeshshasi haqqu aana suntara dandiinanni. (Mar. 21:22, 23; 27:26) Konnira Yesuusi haqqu aana sutame, iso gibbannori nafa wodote kakkalonni horo afidhanno faro faninonsa. w21.04 16 guf. 5-6

Hanni Yesuusi reyi barra mayi ikkinoro hendo. Roomu olanto amadde gantanni beebba assidhannasi laꞌꞌanni heeꞌrenni sammi yiino. (Mat. 26:52-54; Yoh. 18:3; 19:1) Insa biso madiissitanno lichenni gantusi. Gedensoonni qole wonaa wonayi madidhino badhera dawe duhisiissusi. Yesuusi tenne dawe suntannisiwa duhe boode geya haꞌrihu gedensaanni, olanto dawe mittu doogaanchi duhanno gede hajajju. (Mat. 27:32) Yesuusi sunte shinannisiwa iillita, sutate qixxaabbe noori angasinna lekkasi dawete qolte misimaaretenni gantu. Dawe gotti assinanni woyite mannimmasi gudisante rarraꞌinohu gannoonni misimaare aanaati. Jaallasi lowo geya dadillitino, amasi wiꞌlitanni qurtitanni no; Yihudu gashshaasine kayinni Yesuusa buseessitanni no. (Luq. 23:32-38; Yoh. 19:25) Isi shete heeꞌreenna haammata saate saꞌu. Sutaminowa wodanunna shombu gawajjamino daafira, foola qarra ikkitusi. Foolu fulara kae heeꞌreenna jeefote huuccatto assiꞌri. Hakkiinni umo qulcu yee heeshshosi sayise uyi. (Maq. 15:37; Luq. 23:46; Yoh. 10:18; 19:30) Konni garinni Yesuusi qarramenna sholle reyino! w21.04 16 guf. 4

Yesuusi ammanantinote 11 soqqamaasinesira lamu gondoori daafira yaano haaru gondoori daafiranna Mangistete gondoori daafira kulinonsa. (Luq. 22:19, 20, 28-30) Kuni lamunku gondoori Yesuusi soqqamaasinenna wolu boodu manni iima mootoollanna kakkalaano ikkanno gede faro fanino. (Aju. 5:10; 14:1) Qaagooshshu Ayyaaniwa shiqanno timanna woyine qamasannohu konni gondoori wido ikkinoho uullate aana gate nooho buuramino Kiristaana callaho. Yihowa insara dhagge ikkitanno hexxo uyinonsa; insa iima reyitannokkitanna baꞌannokki heeshsho afidhanno; qoleno ayirrinye adhinohu Yesuusi Kiristoosi ledonna wolu 144,000 ledo soqqantanno. Baalunkunni roore Magano Yihowa laꞌanni isira soqqamate qoosso afidhanno! (1 Qor. 15:51-53; 1 Yoh. 3:2) Buuramino Kiristaani reyote geeshsha ammanaminore ikke heeꞌra hasiissannonsata afino.—2 Xim. 4:7, 8. w22.01 21 guf. 4-5

Jaddo loossinori lamu mannooti Yesuusi mule sutante no. (Luq. 23:40, 41) Lamunku giddo mittu alba Yesuusiwa hige: “Gashshootikkinni daatto woyite qaagie” yiino. (Luq. 23:42) Yesuusi Annisi maarannoha ikkinota afino daafira, konni reyanni noohu jaddo loosino manchira hexxo uyino. (Far. 103:8; Ibi. 1:3) Alba loonsoommo cubbira addinta maaro eꞌnummoronna Yesuusi Kiristoosi mundeenni cubbinkera maaro afiꞌneemmota ammannummoro Yihowa ninke gatona yaatenna maarate quqquxamanno. (1 Yoh. 1:7) Mitootaho alba loossino soꞌrora Yihowa gatona yaannonsata ammana qarra ikkitansara dandiitanno. Mito woyite aterano hatto macciishshamannoheha ikkiro tenne hedi: Yesuusi reyara albaanni, jaddo loose sutamino mancho maarinosita leellishannore coyiꞌrinohu, ammana noosita leellishanni heeꞌreennanniiti. Hatto ikkiro, Yihowa ammanante magansidhannosire hakkiinni roorse maarannonsati dihuluullissannote!—Far. 51:1; 1 Yoh. 2:1, 2. w21.04 9 guf. 5-6

Yesuusi reyote geeshsha ammanaminoha ikke, lowo coye assino. Umihunni, Sheexaanu kaphaancho ikkinoti leeltanno gede assino. Yesuusi, Sheexaanu aye geeshshi fonqolo abbirono, guuta ikkino manchi ammaname heeꞌra dandaannota leellishino. Layinkihunni, Yesuusi heeshshosi wodo asse uyino. Isi wodote kakkalo ikke reyasi guuntete xeꞌne noonsa manni Maganu ledo jaalooma kalaqiꞌranno gedenna hegere heeshsho hexxo afiꞌranno gede assitino. Sayikkihunni Yesuusi, Yihowa aliidimma xabbe leeltanno gedenna Annisi suꞌmi ayirranno gede assino. Mitto mittonka barra ammanammoommota leellinsheemmohu jeefote barri gede assine laꞌno! Hatto ikkiro reyineemmo gede assannori tuncu yiinkero nafa togo yine coyiꞌra dandiineemmo: “Yihowa, ammanamoommoha ikke heeꞌrate, Sheexaanu kaphaancho ikkinoti leeltanno gede assate, hattono suꞌmikki ayirrannonna aliidimmakki xabbe leeltanno gede assate danduummore baala assoommo!” w21.04 12 guf. 13-14

Yesuusa kaphunni kassanse jaddo loosino yine beebbate yoo yinihu gedensaanni, qacifantenna beebba assiꞌne misimaaretenni ganne qarru haqqira sunte kaꞌnoonni. Misimaare angasinna lekkasi dadhite eꞌino. Foolannohunna mitto mittonka qaale coyiꞌrannohu lowo geeshsha qarrameeti. Kayinni coyiꞌrannori lowo geeshsha hasiisannore ikkino daafira coyiꞌra hasiissinosi. Addanko, Yesuusi reyara albaanni coyiꞌrinorinni lowore ronseemmo! Isi coyiꞌrinorinni, woloota gatona yaa hasiissannonketanna Yihowano gatona yaannonketa addaxxa dandiineemmota ronseemmo. Ninke kaaꞌlate qixxaabbinori ammanate roduuwi noonke daafira baꞌraaꞌnoommoreeti! Ikkollana, kaaꞌlo hasiissannonke yannara kaaꞌleꞌꞌe yaa fokkifata dihasiissannonke. Yihowa aye geeshshi qarri iillinkerono dandiine saꞌneemmo gede kaaꞌlannonketa anfoommo. Heeshshonke Yihowa anga noota addaxxine, mitto mittonka barra ammanammoommota leellinsheemmohu jeefote barri gede assine laꞌno. w21.04 8 guf. 1; 13 guf. 17-18

Yesuusi haꞌruma haꞌra hegere heeshsho afiꞌnanni gede assitanno. Mittu dureessu wedellichi hegere heeshsho afiꞌrate maa assa hasiissannosiro Yesuusa xaꞌmita isi, “Hoodeꞌya amo!” yiinosi. (Mat. 19:16-21) Yesuusi isi Kiristoosa ikkinota ammanannokkihu mitu Yihudu mannira togo yiino: “Geꞌreewiꞌya . . . hoodeꞌyano haꞌranno. Ani insara hegere heeshsho eemmo.” (Yoh. 10:24-29) Yesuusa ammanneemmota leellisha dandiineemmohu isi coyiꞌrenna lawishsha ikke rosiisinonkere harunsineeti. Hatto assineemmoha ikkiro, hegere heeshsho doogonni fullummokkinni heeꞌneemmo. (Mat. 7:14) Yesuusi haꞌruma haꞌnammora albaanni balanxe iso afa hasiissannonke. Yesuusa “afa” mitte hinge calla assine agurrannire diꞌꞌikkino. Iso albinni roore egennate yaano akattasi, hedosinna heeshshosi daafira afate sharrama hasiissannonke. Halaalu mine keeshshinoommo diri ikki geeshshihano ikkiro Yihowanna Beettosi roore afate agurrummokkinni sharrama hasiissannonke. w21.04 4 guf. 9-10

Soqqamaasinchu Phaawuloosi alba loosino soꞌro hedanno woyite lowo geeshsha xissiisiꞌrannoti dihuluullissannote. Isi “Cubbaataammu baalunni rooru cubbaataami aneeti” yee coyiꞌrasi dhagge diꞌꞌikkitannonke. (1 Xim. 1:15) Isi halaale rosara albaanni, addi addi katammara Kiristaana baasa waadino; mitu usurantanno gede assino; woloota kayinni shinanni gede mala malino. (Soq. 26:10, 11) Phaawuloosi annansanna amansa shiishiishino oosonni xaadanno woyite hiitto ikkannoha lawannohe? Isi loosino soꞌrora gaabbinoha ikkirono, sainore qola dandaannokkita afino. Kiristoosi reyinohu isira ikkinota ammanino daafira “Maganu eltonni xa noommo gedeeha ikkoommo” yee mitte giddonni coyiꞌrino. (1 Qor. 15:3, 10) Tennenni maa ronseemmo? Kiristoosi atera yee reyinotanna Yihowa ledo muli jaalooma kalaqiꞌratto gede doogo biddi assinoheta ammante adhi. (Soq. 3:19) Maganu, albaanni loonsoommota albi soꞌro ikkikkinni, xa assinanni heeꞌnoommorenna konni kaꞌa assineemmore illachishanno.—Isa. 1:18. w21.04 23 guf. 11

Yesuusi waro batinyu Yihudu manni Mesihichu reya hasiissannosita hedinokkiha ikkirono, Qullaawa Borro giddo kayinni togo yine masaalloonni: “Lubbosi reyote sayise uyino; bunshe assitannori ledo kiirroonnisi. Ikkeennano lowo manni cubbo duqqino; sao assitinori daafira araara eanno.” (Isa. 53:12) Hakko daafira, Yihudu manni Yesuusa cubbaataamu gede haqqaho sunte shinoonnitera gufiꞌranno gede assannonsari dino. Xaa yannara halaale ronse gufiꞌneemmokki gede qoropha dandiineemmo. Yesuusi ilaalaho sabbakanni heeꞌre, macciishshanni noosi mannira mitootu ‘kaphunni suꞌmansa huntannota’ coyiꞌrino. (Mat. 5:11) Konni kaphi buicho Sheexaaneho. Isi halaale baxanno manna gibbannori insa daafira kapho tareessitanno gede assanno. (Aju. 12:9, 10) Gibbannonkeri tareessitanno kapho macciishsha dihasiissannonke. Togoo kaphi waajjineemmo gede woy ammananke shoshshoggitanno gede assara wodha dihasiissannonke. w21.05 11 guf. 14; 12 guf. 16

Qullaawu Maxaafi rosaanchikki Yihowa addaxxanno gede kaaꞌlisi. Yesuusi rosaanosira Yihowa baxannonsa daafira kaaꞌlannonsata kulinonsa. (Mat. 10:19, 20, 29, 30) Rosaanchikkira Yihowa isono kaaꞌlannosita kulisi. Mixosi wonshiꞌranno gede Yihowa kaaꞌlasira isi ledo huuccatto assidhe, Yihowa addaxxanno gede kaaꞌla dandaatto. Poolaandete heeꞌrannohu Firaansiziiki togo yiino: “Rosiisaanchiꞌya huuccatto assanno yannara duucha woyite mixoꞌya daafirano qummi assanno. Yihowa rosiisaanchiꞌya huuccattora dawaro qolinota laummoti, anino bayichonko huuccatto assiꞌra hanafummo. Songotenna qoqqowu gambooshshe haꞌreemmo gede loosu basera fajjinannie gede xaꞌmiꞌrummo yannara Yihowa kaaꞌlinoeta huwatoommo.” Yihowa Qullaawu Maxaafi rosaanonkera lowo geya hedanno. Isi, ninke mannu isiwa shiqanno gede kaaꞌlate diinaggaambe assineemmore naadanno; qoleno tennera baxannonke. (Isa. 52:7) Xa Qullaawa Maxaafa xiinxallisatto manchi noohekkiha ikkiro, wolootu xiinxallissanno woyite ledonsa xiinxallisse rosaano cuuamate deerra iillitanno gede kaaꞌla dandaatto. w21.06 7 guf. 17-18

Maganu Qaale ganyine nabbambe, tenne elto naandeemmota leellisha dandiineemmo. Qullaawa Maxaafa yanna afiꞌneemmo woyite calla nabbawantenni, hojju xiinxallora pirogiraame fushshiꞌra hasiissannonke. Pirogiraamenke garinni ganyine xiinxallineemmoha ikkiro, ammananke kaajjite heedhanno gede assiꞌra dandiineemmo. Tenne alame ‘hayyoolenna egennaammi’ gede ikkikkinni, ninkera Maganu Qaali aana xintantinoti kaajjado ammana noonke. (Mat. 11:25, 26) Maganu Qaale xiinxallinoommo daafira, alamete ikkito roore bushshanni hadhanni noohu mayiraatironna Yihowa maa assara hedinoro anfoommo. Konni daafira, ammananke kaajjishiꞌratenna dandaami deerrinni lowo manni Kalaqaanchonke ammananno gede kaaꞌlate murciꞌno. (1 Xim. 2:3, 4) Qoleno, uullate aana noo manni baalunku Yohaannisi Ajuuja 4:11 yitannore yee Yihowa guwisiꞌranno yanna quqquxamme agadhino; qummeeshshu togo yaanno: “Mootichankenna Maganonke! Baalanka kalaqoottona, . . . atera ayirrinyu . . . [ikkohe]!” w21.08 19 guf. 18-20

Songote cimeeyye allaalaasine ikkitino daafira, hasiisanno woyite roduuwa amaalate qeechi noonsa. Insa kaaꞌlannonna loosoho kakkayisanno garinni hattono amaaltanno manni, “wodana tashshi assanno” garinni amaalate sharrantanno. (Law. 27:9) Songote cimeeyye ammanate roduuwansa baxxanno. Mito woyite insa baxxannota leellishshannohu soꞌrote doogo haꞌranni noo mancho amaalteeti. (Gal. 6:1) Ikkirono, mittu cimeessi mitto mancho amaalara albaanni soqqamaasinchu Phaawuloosi baxillu daafira borreessinore hedasi danchate. Isi togo yee borreessino: “Baxillu cincanno; baxillu elanno. . . . Baxillu baalankare cincanno; baalanka addaxxanno; baalanka hexxanno; dargasi diaguranno.” (1 Qor. 13:4, 7) Songote cimeessi kuri qummeeshshuwa hiincasi amaalate kainohu mayiraatiro afanno gedenna amaalanno mancho danchu garinni hasaawisate kaaꞌlitannosi. Amaallanni manchi cimeessu isi daafira hedannota afiro, amaale macciishshe adha qarra diꞌꞌikkitannosi. w22.02 14 guf. 3; 15 guf. 5

Yihowa sokkaanonna mannu ooso kalaqinohu guutanna xeꞌne noonsakkire asseeti. Kayinni finqilino sokkaanchi yaano Sheexaanu (“Hettisamaancho” yaate) guuta ikkitinori Addaaminna Heewani Yihowara finqiltanno gede assino. Wole sokkaanonna mannu oosono insante gede finqiltino. (Yih. 6) Insa iso kaaddinosi. Ikkollana isi xaa geeshsha cince no hattono finqiltinore baala hunanno yanna dagga geeshsha cincanno. Isi finqiltinore hunasi, ammanantino soqqamaanosino fooliishsho afidhanno gede assitanno; insano tenne busha alame giddo cincite no! Sheexaanu Iyyoobinna wole ammanantinota Maganu soqqamaano baala Yihowara soqqantannohu uminsa horora yite ikkinohu gede asse kassasino. (Iyo. 1:8-11; 2:3-5) Sheexaanu xaa geeshsha hatto yee kassasanni no. (Aju. 12:10) Yihowa banxeemmo daafira qarru iillinkerono isira ammanamme heeꞌne Sheexaanu kaphi xawo fulanno gede assa dandiineemmo. w21.07 9 guf. 7-8

Soqqamaasinchu Phaawuloosi heeshshonke gara biddi assiꞌra lowo geeshsha hasiissannota ikkitinota rosiisate kaajja lawishsha horoonsiꞌrino. Isi ‘akkala mannimmanke suta’ hasiissannonketa coyiꞌrino. (Rom. 6:6) Wole yaattonni Kiristoosi lawishsha harunsa hasiissannonke yaate. Yihowa giwanno akattanna assoote shaa hasiissannonke. Keeraancho tiianna hegere heeshsho hexxo afiꞌra dandiineemmohu hatto assinummoro callaati. (Yoh. 17:3; 1 Phe. 3:21) Yihowa ninke hagiirsiisate yee biddishshasi disoorranno. Hatteentenni ninke soorramme biddi yine biddishshisira hajajama hasiissannonke. (Isa. 1:17, 18; 55:9) Cuuamittohu gedensaannino maalu yorto gargadha agura dihasiissannohe. Yihowa kaaꞌlannohe gede huucciꞌri hattono umikki jawaante ikkikkinni qullaawa ayyaanasi addaxxi. (Gal. 5:22; Fil. 4:6) Akkala mannimma mulqine tugatenna galagalle uddiꞌneemmokki gede sharrama hasiissannonke. w22.03 6 guf. 15-17

Yihowa balanxe Gashshootesi hasiꞌneemmoha ikkironna keeraanchu seerisi garinni heeꞌneemmoha ikkiro, sagale, uddanonna mine aankera qaale eino. (Mat. 6:33) Yihowa yiinore addaxxineemmoha ikkiro, tenne alamera afiꞌnannihu maalaamittete coyi agarooshshenna geedanno hagiirre aannonke yine dihexxineemmo. Giddiidi keere afiꞌneemmohu Yihowa fajjo wonshinummoro calla ikkinota anfoommo. (Fil. 4:6, 7) Anga assiteennanke lowore hidha dandiineemmoha ikkiro nafa, hidhineemmo uduunne horoonsiꞌneemmotinna towaaxxineemmo yanna noonkeronna teꞌee buuxiꞌra hasiissannonke. Noonke jajja woy uduunne quwa saꞌne banxeemmokka? Maganu maatesi giddo loonsammora uyinonke loosi noota dea dihasiissannonke. Hakko daafira, hedonke bebbeehannori heeꞌrannokki gede qoropha hasiissannonke. Noosi jajja lowo geeshsha baxino daafira Yesuusa harunsa giwi manchi gede ikka dihasiꞌneemmo. Konni manchira Yihowara soqqamatenna isi beetto ikkate qoosso gatte baꞌinosi!—Maq. 10:17-22. w21.08 6 guf. 17

Qullaawa Borro xiinxallatto woyite, Yihowa ayimmanna akattasi afatto; tini akattasi kalaqamu daafira xiinxallite afootto akattasi ledo mittete. Yihowa akattare rosakki, isi addinta noo Magano ikkinota ammanatto gede assitannohe. (Ful. 34:6, 7; Far. 145:8, 9) Yihowa seekkite affanni haꞌritto kiiro, isira noohe ammana lophitanni hadhanno, isira noohe baxilli lexxanno, hattono isi ledo noohe jaaloomi kaajjanno. Maganoho noohe ammana wolootaho kuli. Kayinni farciꞌrootto manchi Maganu noota huluullamironna mayite qolattoro afa hoogittoro, maa assa dandaatto? Borronke giddonni Qullaawu Maxaafi aana xintantino dawaro afiꞌrate woꞌnaali; hakkiinni hakkuyi manchira afiꞌrootto hedo kulisi. Qoleno ayyaanaamittetenni gikki yiino rodii kaaꞌlannohe gede kuꞌla dandaatto. Hasaawisootto manchi Qullaawu Maxaafinni qolattosi dawaro ammanirono ammana hoogirono, xiinxallakki atera kaaꞌlitannohe. Ammanakki albinni roore kaajjitanno. w21.08 18 guf. 14-15

Yihowara soqqamate banxeemmore baalankare agurreemmo yaa diꞌꞌikkino. (Ros. 5:19, 20) Ikkollana, mito banxeemmo coye agura gimboommo daafira calla Maganoho albinni roore soqqama hoongeemmoha ikkiro, Yesuusi lawishshunni kuli manchi loosino soꞌro loonsanni heeꞌnoommo; kuni manchi umisira lowoha dancha coye qixxeessiꞌrinoha ikkiro, Magano kayinni hawino. (Luq. 12:16-21) Qarrisanno coyi tuncu yaannonke woyite, kaaꞌlannonke gede Yihowa huucciꞌneemmo, hattono maa assa hasiissannonkero afate seekkine hendeemmo. (Law. 3:21) Yihowa duucha doogganni maassiꞌrannonke. Isi guweenya adhanno gede assate dandiinummore baala assine, aannonke atoote naandeemmota leellisha dandiineemmo. (Ibi. 13:15) Tenne assa dandiineemmo doogga giddo mitte, soqqanshonke halashshiꞌrate; hatto assankeno Yihowa lede maassiꞌrannonke gede assitanno. Konnira, barru barrunku Yihowa dancha ikkinota qamanse laꞌneemmo doogo hasiꞌno. (Far. 34:8) Hatto assinummoro, ninkeno Yesuusi gede, “Ane sagale soyinoehu haja wonshatenna loososi guutate” yaa dandiineemmo.—Yoh. 4:34. w21.08 30-31 guf. 16-19

Sheexaanu naaxxaleeyye ikkinammora hasiꞌranno. Isi naaxxaleeyye ikkinummoro isi gedeere ikkineemmotanna hegere heeshsho hoongeemmota afino. Konnira soqqamaasinchu Phaawuloosi mittu manchi “booꞌnatenni bedeedameenna Sheexaaneho iillitu yoo” yinasira dandiinannita kule qorowisiisino. (1 Xim. 3:6, 7) Halaale macciishshinoommohu muleno ikkiro woy Yihowara lowo diro soqqammoommoha ikkirono togoo coyi ninke giddo aye manchirano iillara dandaanno. Naaxxanno manni umonsa calla baxanno. Sheexaanu hakko iso qarru iillannonke woyite Yihowanni roorsine uminke daafira hendeemmo gede asse umonke calla baxeemmo gede assate woꞌnaalanno. Lawishshaho kaphunni suꞌmakki hunne egenninoonnihe? Woy miince egenninoonnihe? Sheexaanu Yihowa woy roduuwakki bushiishattora hasiꞌranno. Qoleno Daawuloosi, iillinonke qarra Yihowa Qaalisi giddo kulino biddishshi garinni ikkikkinni uminkenni tira woyyitanno yine hendammora hasiꞌranno.—Ros. 7:16, 20. w21.06 15 guf. 4-5

Yihowa Hagera mitto lowo geeshsha hasiisanno looso uyinosi. Gamu Ayihudete manni 537 K.A., Baabiloonete qafadonni fule Yerusaalame higino; Hageno insa ledo higikki digatino. Kuni ammanamino manni Yerusaalame iillihunni shiima yanna gedensaanni, Yihowa mine wirro minate safo safino. (Izi. 3:8, 10) Ikkollana, mulenni dadillisanno coyi tuncu yiinonsa. Insa qooxeessaho noo manni waadinonsa daafira, hexxo mudhite qullaawa mine mina agurtino. (Izi. 4:4; Hag. 1:1, 2) Konni daafira 520 K.A., insa wirro diinaggaabbe loosse qullaawa mine minte guddanno gede jawaachishansara Yihowa Hage soyino. (Izi. 6:14, 15) Yihowa Hage tenne sokka kulanno gede assinohu Ayihudete manni ammana kaajjishateeti. “Olantote Mootichi Kaaliiqi” yitanno yaatto, jawaachishshinonsati dihuluullissannote. Yihowa lowota sokkaasinete olanto hajajanno Mootichaati; hakko daafira, Ayihudete manni qinaannonsa gede iso addaxxa hasiissannonsa. w21.09 15 guf. 4-5

Xaa yannara alame woꞌmate noorira Yihowa Farciꞌraasinera addu baxillinna mittimma noonsa. Addi addi gobbanninna budinni dangoommore ikkinummorono, ninke mitte maate gedeeti; konni garinni wole baalante ammaꞌnowiinni baxxinoommoreeti. Songote gambooshshinkewa, woradu gambooshshinkewanna qoqqowu gambooshshinkewa baxillinke xawe leellanno. Tinino Yihowa hagiirsiisanno garinni magansiꞌnanni heeꞌnoommori ninke ikkinoommota albinni roore ammanneemmo gede assitannonke tajeeti. (Yoh. 13:34) Qullaawu Maxaafi “Mimmitiꞌne ledo seekkitine baxamme” yee amaalannonke. (1 Phe. 4:8) Togoo baxille leellisha dandiineemmo doogga giddo mitte, koffi assitinonkere gatona yaatenna kuꞌu koꞌoye cince heeꞌrate. Qoleno songote giddo noorira baalaho, wole agurina koffi assitinonkerira nafa shaqqille leellinsheemmo faro hasiꞌneemmo; hattono baalanka wosinimma adhineemmo. (Efe. 4:32) Mimmitoho togoo baxille leellinsheemmoha ikkiro, addu Kiristaana ikkinoommota mannu afanno gede assineemmo. w21.10 22 guf. 13-14

Mittu manchi bohamasi maaro eanno gedenna heeshshosi biddi assiꞌranno gede kaaꞌlitara dandiitanno? Ee dandiitanno. Jawa cubbo loossinori batinyu roduuwi cubbinsa jawa ikkinota huwattanno gede, maaro eꞌe amanyootensa biddi assidhanno gedenna Yihowawa higganno gede kaaꞌlitinonsati bohama ikkitinota coyidhino. (Ibi. 12:5, 6) Hanni tenne huwatate kaaꞌlannonkeha mitto lawishsha laꞌno. Mittu allaalaanchi geꞌreewisi giddo mitte xiwantinota afi. Allaalaanchu geꞌrechosi amadinoha konne baxxino dhiwana xagisate ise hoshshatewiinni bada hasiissannosita afino. Ikkollana, geꞌreewu callimma baxannokki kalaqamaati. Hakko daafira, hoshshatewiinni bandanni woyite godoodara dandaanno. Ikkina allaalaanchu geꞌrecho xagisara yee hoshshatewiinni badasi mararannokkiha ikkinota leellishshanno? Dileellishshanno. Korkaatuno isi xiwantino geꞌrecho hoshshate ledo karsanturo dhiwanu wolu geꞌreewirano saꞌꞌannota afino. Konni daafira, dhiwantinota badasi hoshsha woꞌma dhiwana gattanno gede assitanno. w21.10 10 guf. 9-10

Mimmito baxxanno roduuwi noote alamete doyicho maate miila ikka ninkera lowo ayirrinyeeti. Dandaami deerrinni batinyu manni daye ninke ledo Maganonke magansiꞌrara hasiꞌneemmo. Konni daafira, mannu Yihowanna mannisi daafira gara ikkinokkire hedanno gede assannore mittoreno assa dihasiissannonke. Amanyootinke mannu dancha duduwo macciishshe adhanno gede assannoha ikkanno gede sharrammeemmo. Iimi Anninkera hajajammeemmo daafira mito woyite mannu qacifatankera woy xiiwankera dandaanno. Ammananke daafira farciꞌneemmo woyite waajjineemmoha ikkirona? Yihowanna Beettisi kaaꞌlitannonketa addaxxa dandiineemmo. Yesuusi rosaanosi mayite coyidhannoronna ma garinni coyidhannoro yaada hasiissannonsakkita kulinonsa. Mayira? Yesuusi togo yiino: “Hatte yannara coyidhinanniri kiꞌne ikkitinikkinni, giddoꞌne heeꞌre coyiꞌrannohu gordu Anniꞌnehu Qullaawa Ayyaanaati.”—Mat. 10:19, 20. w21.09 24 guf. 17-18

Museno Yihowa golo ikkinota xawissanno hedo coyiꞌrino. (Far. 90: 1) Muse reyara shiima yannara albaanni lowo geeshsha jawaachishshanno hedo lede coyiꞌrino. Togo yiino: “Hegere Magani godankeeti; hegereti cigilesino irkissannonke.” (Mar. 33:27) “Hegereti cigilesino irkissannonke” yitanno yaatto Yihowa daafira maa kultannonke? Yihowa golonke ikkiro beꞌe diyineemmo. Mito woyite kayi hexxo mudhinammoranna shesho hoongammora dandiineemmo. Togoo woyite Yihowa kaaꞌlannonkehu hiittoonniiti? (Far. 136:23) Isi cigilesinni irkise kaaꞌlannonke hattono sheshifachishannonke. (Far. 28:9; 94:18) Yihowa woꞌmanka woyite irkisannonketa afanke isi lame doogganni kaaꞌlannonketa qaangeemmo gede assitannonke. Umihunni, isi heeꞌnummowano heeꞌnummoro golo ikkannonke. Layinkihunni, baxillaanchu iimi Anninke ninke daafira lowo geeshsha hedanno. w21.11 6 guf. 15-16

Yesuusi taashshote xeꞌne rosaanosi ammana fonqolantanno gede assitannota afino. Isi taashshote xeꞌne dandiite saꞌanno gede insa kaaꞌlate mitto lawishsha kulinonsa; kuni lawishshi noohu Luqaasi maxaafi giddooti. Yesuusi rosaanosira, taalo yoo yaannose gede mitto kaajjado daanya wiꞌlitanni agurtukkinni huuccidhino mancho xagge kulinonsa. Ise agurtukkinni huucciꞌrase kaaꞌlitannoseta affino. Gedensoonni daanyu eeggifatase macciishshe qolinose. Ninke tennenni maa ronseemmo? Yihowa taashsho baxannoho. Hakko daafira Yesuusi togo yiino: “Maganu hashsha barra Isiwa higge raartannorira roorse halaalu yoo diyaannonsa?” (Luq. 18:1-8) Yesuusi lede togo yiino: “Manchi Beetti daanno woyite uullate aana [“togoo,” NW] ammaꞌna afiꞌra ikka?” Taashsho xeꞌinore assinanninke woyite, cincinenna hexxo mudha agurre gunnitte manchote gedeeti kaajjado ammana noonketa leellisha hasiissannonke. Togoo ammana heedhunkero, bayichonko woy gale hose Yihowa kaaꞌlannonketa addaxxa dandiineemmo. Qoleno huuccatto afidhino wolqa ammana hasiissannonke. w21.11 23 guf. 12; 24 guf. 14

Wedella, mito woyite Yihowa biddishshi furro fuuqqo hoꞌlinoꞌnehu gede assitine heddinanni? Sheexaanu hatto yitine heddinara hasiꞌranno. Isi halaꞌlado doogora haꞌranno manni assannore illachishshinaranna insa hagiirraamma ikkitinohu gede assitine heddinara hasiꞌranno. Isi ledoꞌne rossannori woy interneetete widoonni laꞌinanni manni assannore heddine ‘lowori gate bainonke’ yitine heddinanni gede assate woꞌnaalanno. Sheexaanu, Yihowa biddishshi ‘woꞌmunni woꞌma hagiirraamma ikkineemmokki gede assinonke’ yitine heddinara hasiꞌranno. Kayinni tenne qaagge: Sheexaanu isi doogo hadhannori jeefote mayi iillannonsaro affara dihasiꞌranno. (Mat. 7:13, 14) Yihowa kayinni heeshshote doogonni fultukki heedhannorira qixxeessinore xawise kulinoꞌne.—Far. 37:29; Isa. 35:5, 6; 65:21-23. w21.12 23 guf. 6-7

Gatona yaa hasiissannonketa anfoommo; qoleno hatto assa hasiissannote. Ikkirono gatona yaa shota ikka hooggankera dandiitanno. Soqqamaasinchu Pheexiroosirano gatona yaa qarra ikkitinosi woyiti nooha ikkara dandaanno. (Mat. 18:21, 22) Ikkina kaaꞌlankera dandaannori maati? Umihunni, Yihowa mageeshsha gatona yiinohero hiinci. (Mat. 18:32, 33) Isi, maarosi afiꞌneemmo gedeere ikka hoongummorono, mulla gatona yaannonke. (Far. 103:8-10) Ninkeno “mimmitonke baxa hasiissannonke.” Hakko daafira gatona yaa, hasiꞌnummoro calla assineemmore diꞌꞌikkitino. Ammanate roduuwanke gatona yaate giddeeti noonke. (1 Yoh. 4:11) Layinkihunni, gatona yaa mayi horo afidhinoro hiinci. Hatto assanke koffi assinonke rodoo kaaꞌlitara, songote mittimma kaajjitanno gede assitara, hattono Yihowa ledo noonke jaaloomi baꞌꞌannokki gedenna aaninkenni duhu hoꞌlanno gede assitara dandiitanno. (2 Qor. 2:7; Qol. 3:14) Jeefoteno, woloota gatona yineemmo gede kulinonkeha Magano huucciꞌri. Sheexaanu ammanate roduuwikki ledo noohe salaame hunahera wodhitooti. (Efe. 4:26, 27) Sheexaanu woshshaado amaddannonkekki gede qorophate Yihowa kaaꞌlo hasiissannonke. w21.06 22 guf. 11; 23 guf. 14

Daawiti lubbosi gatisiꞌrate xooqanni no. Wolqaataamu Israeelete moote Saaooli iso shaate murciꞌrino. Daawiti sagale hasiissusita, Noobi yinanni katama mare onte tima uyinannisi gede xaꞌmiꞌrino. (1 Sam. 21:1, 3) Gedensoonni isinna mannisi maaxamannoha mitto goda afiꞌrino. (1 Sam. 22:1) Daawitira togoo qarri iillinosihu hiittoonniiti? Daawiti mannu baxannosi daafiranna olaho duucha hige qeelinohura Saaooli lowo geeshsha hinaasino. Qoleno Saaooli Yihowa moote ikkara Daawiti doorinota afino. (1 Sam. 23:16, 17) Saaooli Israeelete moote ikkino daafira lowo olantonna kaaꞌlanno manni noosi; hakko daafira Daawiti lubbosi gatisiꞌrate xooqa hasiissinosi. Addanka Saaooli, Maganu Daawiti moote assannota hooleemmo yee hedino ikka? (Isa. 55:11) Qullaawu Maxaafi tenne daafira kulannori dino; ikkollana huluullammeemmokkihu mittu coyi no: Saaooli qarru giddo tugannosire assanni no. Maganu ledo gaarantannori qeelamansa digattanno! w22.01 2 guf. 1-2

Yesuusi diinaggaawe sabbakino. Isi afiꞌri faro baala horoonsiꞌre sabbake manna baxannota leellishino. (Luq. 19:47, 48) Yesuusi tenne assanno gede kakkayisinosiri maati? Isi manna mararanno daafiraati. Mito woyite batinyu manni Yesuusi rosiisannore macciishsha hasiꞌre daanno daafira, isinna rosaanosi “sagale ita nafa didandiitino.” (Maq. 3:20) Qoleno Yesuusi macciishshannosi manni giddo mittoho injaannosihu hashsha ikkino daafira, hashsha nafa rosiisate maahoyye yiino. Umi qara Yesuusi rosiisinore macciishshinohu rooru manni isi rosaano diꞌꞌikkino. Kayinni Yesuusi macciishshinosi mannira baalaho seekke farciꞌrino. Ninkeno xaa yannara afiꞌnummo faro baala horoonsiꞌne mannu baalu dancha duduwo macciishshanno gede assa hasiꞌneemmo. (Soq. 10:42) Ninkera injiitanno yannara calla sabbakantenni, mannunni roore xaada dandiineemmo yannara sabbakate pirogiraamenke biddi assiꞌra hasiissannonke. Hatto assinummoro Yihowa hagiidhannoti dihuluullissannote. w22.01 17 guf. 13-14

Xaa Yannara batinyu mannira silxaane noonsare addaxxa qarra ikkitannonsa. Kuni manni silxaane noonsari dureeyyetenna wolqaataammaho roorsidhe buxane miiccanna laꞌꞌanno. Qoleno kuni manni mite ammaꞌnote massagaano lowoha busha coye assitanna laꞌꞌanno. Tini mitu mannira Magano addaxxa qarra ikkitannonsa gede assitino. Hakko daafira mittu manchira Qullaawa Maxaafa xiinxallinseemmo woyite, isi Yihowanna uullate aana Yihowa shoominore addaxxa rosanno gede kaaꞌla shaaꞌꞌa looso diꞌꞌikkitannonke. Hige Yihowanna dirijjitesi addaxxa rosa hasiissannonsari Qullaawu Maxaafi rosaano calla diꞌꞌikkitino. Halaalu mine lowo diro keeshshinoommorino Yihowa woꞌmanka woyite gara ikkinore assannota dea dihasiissannonke. Ikkirono mito woyite, Yihowa addaxxa qarra ikkitannonke gede assannori kalaqamara dandaanno. w22.02 2 guf. 1-2