Onkoleessa

Yihowa Beettosi anfeemmo gede kaaꞌlate, Qaalisi giddo shoolu Wongeelli heeꞌranno gede assino. Kuni Wongeelli Yesuusi heeshshorenna soqqanshore kultanno xagge amadino. Tenne xaggenni Yesuusi coyiꞌrinore, assinorenna macciishshaminosiri maatiro ronseemmo. Kuni shoolunku maxaafi Yesuusi lawishsha seekkine hendeemmo gede kaaꞌlannonke. Tini maxaaffa Yesuusi haruma leellishshanno yaa dandiinanni. Hakko daafira kuri Wongeelluwa xiinxalline Yesuusa albinni roore afa dandiineemmo. Togo assanke isi faale harunsate kaaꞌlitannonke. Wongeelluwatenni woꞌma horo afiꞌrate nabbawatenni sainore assa hasiissannonke. Kuri Wongeelluwa seekkine xiinxallatenna hiincate yanna gaaꞌma hasiissannonke. (Iyyaasu 1:8 ledo heewisiisi.) Wongeelluwate giddo noo xagge xabbe leeltannohe gede assiꞌri. Hedate dandookki horoonsidhe ikkanni noore laꞌꞌate, macciishshatenna xaggete giddo kulloonni mannira macciishshaminonsare wodanchate woꞌnaali. Togo assate Yihowa dirijjite qixxeessitinota xiinxallate kaaꞌlitanno borro horoonsiꞌri. w21.04 4-5 guf. 11-13.

Yesuusi uullara daara lowo dirira albaanni Yihowa Qaalisi giddo Mesihicha 30 kinchu birrira sayinse hirrannita coyiꞌrino. (Zak. 11:12, 13) Sayise hirannohu qole Yesuusira muli jaalla ikkitinori giddo mittoho. (Far. 41:9) Masaalaanchu Zakkaariyaasino “Ledoꞌya nooha allaalaasinchoꞌya gani! Hakkawoyite, geꞌreewu billaallanno” yee borreessino. (Zak. 13:7) Suwashshu wodani noonsa manni tini masaalo Yesuusi aana woꞌmitanna laꞌꞌanno woyite gufiꞌrantenni jawaatanno. Yannankerano hattoori kalaqamara dandaanno? Ee. Yannankera boodu egennaminohu Yihowa Farciꞌraasine ikkino manni halaale agure kaadaasine ikkino; wolootano halaalu mininni fushshate woꞌnaalino. Insa xaadooshshu buusinna interneetete widoonni Yihowa Farciꞌraasine daafira gara ikkinokkire, gama wido calla halaale ikkinore hattono woꞌmunni woꞌma kapho ikkinore tareessitanno. Suwashshu wodani noonsari kayi tennenni digufidhanno. Hatteentenni insa togoo coyi ikkanno yine Qullaawu Maxaafi giddo balanxe masaalloonnita wodanchitanno.—Mat. 24:24; 2 Phe. 2:18-22. w21.05 11 guf. 12; 12-13 guf. 18-19

Qullaawa Borro, halaalu egenno lexxitannohu sunu sununni ikkinota xawisse kultanno. (Qol. 1:9, 10) Yihowa halaale xawisannohu sunu sununniiti; hakko daafira, halaalu xawaabbi roore waraꞌa yee xawa geeshsha cince agadha hasiissannonke. Aliidi Bisi mitto coye huwantoommo gara woy mitto looso loonseemmo gara biddi assa hasiissannota huwatiro, bayichonko biddi assanno. Batinye Suꞌmu Kiristinni ammaꞌno mito coye soorritannohu ammanaasinensa woy alame hagiirsiisateeti; Yihowa dirijjite mitto coye soorritannohu kayinni Yihowawa albinni roore shinqeemmo gedeetinna Magano Yesuusi magansiꞌrino garinni magansiꞌneemmo gedeeti. (Yai. 4:4) Mitto coye soorrineemmohu yanna soorrantino daafira woy batinyu manni hasatto wonshate yine ikkikkinni Qullaawa Borro yitannore albinni roore huwantoommo daafiraati. Addanko Qullaawu Maxaafi halaale banxeemmo!—1 Tes. 2:3, 4. w21.10 22 guf. 12

Callimma macciishshantannohe woyite maa assa dandaatto? Yihowa irkisanni noohehu hiittoonniitiro hedi. (Far. 55:22) Tini callakki ikkoottokkita huwatatto gede kaaꞌlitannohe. Yihowa callimma macciishshantannonsare ammanate roduuwakki kaaꞌlanni noonsa garano hedi. (1 Phe. 5:9, 10) Maatesi Yihowa Farciꞌraasine ikkitinokkihu lowo diro soqqaminohu Hirooshi yinanni rodii togo yiino: “Baalunku roduuwi Yihowara soqqamate dandaaminsare baala assitanni noota afanke, Yihowa Farciꞌraasine ikkitinokki maate noonkere jawaachishshannonke.” Ayyaanaamittete coye assate rosichino heeꞌrohe. Giddokkita Yihowara fante hasaaphi. Maganu Qaale ganye nabbawanna Yihowa baxannoheta leellishshanno xagge hiinca lowo geeshsha hasiissannote. Mitu roduuwi lowo geeshsha jawaachishshanno qummeeshshuwa lawishshaho, Faarso 27:10 nna Isayaasi 41:10 wodanaho wodhitanno. Wolootu kayi webisayitenke aana noota qoonqotenni qaddaꞌnoonni borro macciishshansa callimma macciishshantannonsakki gede kaaꞌlitinonsata coyidhino. w21.06 9-10 guf. 5-8

Shiidhe xissiisidhe nootto? Qullaawu Maxaafi giddo reyotenni kaino mannire kultanno xagge nabbabbe, kaote hexxo daafira noohe ammana kaajjishiꞌrate yanna gaaꞌmi. Maatekki miili songotenni bohamino daafira dadillite nootto? Maganu aanno seejjo woꞌmanka woyite dancha ikkitinota albinni roore ammanate xiinxalli. Tuncu yiinohe fonqoli ikkihano ikkiro, tenne faro ammanakki kaajjishiꞌrate horoonsiꞌri. Giddokkita gudisse Yihowara hasaaphi. Roduuwunniwa gambo gibbooti; roorenkanni insawa gamba yite heeꞌri. (Law. 18:1) Iillinoheri wiꞌlatto gede assanni nooheha ikkiro nafa dandiite saꞌꞌatto gede kaaꞌlannohere assa agurtooti. (Far. 126:5, 6) Ganyite gambooshshe haꞌra, soqqansho fulanna Qullaawa Maxaafa nabbawa agurtooti. Qoleno Yihowa aahera qaale einoha dhagge ikkanno atoote illachishi. Yihowa kaaꞌlanni nooheta huwatitto kiiro, ammanakki albinni roore kaajjitanni hadhanno. w21.11 23 guf. 11; 24 guf. 17

Yesuusi rosaano “shiimmaaddu” gede ikkitinohu hiitte doogonniiti? Alame hiittoo manna ayirrissanno? Dureeyye, maccare ikkitinorenna silxaane noonsare. Yesuusi rosaano kayinni mannu mishantinori, tidhitinokkirinna “shiimmaaddu” gede asse laꞌꞌanno. (1 Qor. 1:26-29) Yihowa laꞌꞌannonsahu kayi hakko garinni diꞌꞌikkino. Yesuusi “kuri shiimmaaddu” daafira coyiꞌranno gede assinosiri maati? Rosaanosi, “Gordu Gashshootira baalanka roorannohu ayeti?” yite xaꞌmitinosi. (Mat. 18:1) Hatte yannara batinyu Yihudu manni silxaanenna maarage lowori gede asse laꞌꞌanno. Mittu fullahaanchi togo yiino: “Hakkawaro labballu ayirrinye afiꞌratenna maccaha ikkate dirmitanno.” Yesuusi Yihudu budi giddo halaꞌlinoha mimmitu ledo heewisamate akata, rosaanosi wodaninsa giddonni buqqisse hooꞌlate sharrama hasiissannonsata afino. w21.06 20 guf. 2; 21 guf. 6, 8; 22 guf. 9

Soqqamaasinchu Phaawuloosi songote cimeeyyera dancha lawishsha ikkino. Lawishshaho Phaawuloosi Teselonqe heeꞌranno Kiristaanira amaale hasiissunsa yannara insa amaalate hobbi ruxxi diyiino. Ikkirono, Phaawuloosi insara borreessino sokkara, balaxe ammanate loosonsa, baxillu kakkayiseennansa daafurtino daafuronna kaajjite uurritinota kule galatinonsa. Qoleno isi heeshshonsa gara hedino; hattono qarru iillanni noonsatanna dartu iillinsarono dandiite heedhanni noota afinota coyiꞌrino. (1 Tes. 1:3; 2 Tes. 1:4) Isi wole agurina kuri roduuwi wolu Kiristaanira nafa lawishsha ikkitinota coyiꞌrino. (1 Tes. 1:8, 9) Phaawuloosi galatinonsa daafira insa lowo geeshsha hagiidhitinoti dihuluullissannote! Phaawuloosi kuri roduuwasi lowo geeshsha baxannoti dihuluullissannote. Isi Teselonqe heeꞌranno Kiristaanira borreessinote lamente sokka widoonni insa kaaꞌlanno garinni amaala dandiinohu iseraati.—1 Tes. 4:1, 3-5, 11; 2 Tes. 3:11, 12. w22.02 15 guf. 6

Sheexaanu, kaphu ammaꞌno murroota horoonsiꞌre, Yihowa kaajjadoho hattono mannu oosora iillanno qarrira xaꞌmamannohu isooti yaanno. Mitootu isinni qaaqquullu reyitanno woyite Maganu iima sokkaasincho lexxara adhino yitanno. Tini Magano shollishate! Ninke kayinni Yihowa baxillaancho Anna ikkinota anfoommo. Buutote dhibbi amadinkero woy shiiꞌnummoro tennera horo Magano dibushiinsheemmo. Hatteentenni isi baalanka coye biddi assannota addaxxineemmo. Macciishsha hasiꞌrannohura baalaho Yihowa baxillaancho Magano ikkinota kulleemmo. Tini Yihowa xonannosihura dawaro qolanno gede assitanno. (Law. 27:11) Yihowa shaqqado Maganooti. Hakko daafira dartu iilleennanke, buutote dhibbi amadeennanke woy guuntete xeꞌnenni kainohunni raarreemmo woyite lowo geya dadillanno. (Far. 22:23, 24) Yihowara xissonke leeltannosi; isi qarra hoola hasiꞌranno, qoleno hoolanno.—Fulo 3:7, 8; Isayaasi 63:9 ledo heewisiisi. w21.07 9-10 guf. 9-10

Muli yanna giddo owaatu manni ayirrinye baala roorino ayirrinye afiꞌranno; hakkuno, hegerera Yihowa baxatenna iso magansiꞌrate qoossooti! Addaaminna Heewani Maganu maate giddonni fule daafinore baala Yesuusi dhaawanno. Yihowa lowo miliyoone ikkanno manna reyotenni kayise, gannate ikkitanno baattora guuta ordu fayyimma afidhe hegerera heedhanno faro fanannonsa. (Luq. 23:42, 43) Uullate aana heedhannori Yihowa maate miilla guuta ikkitanno woyite, mittu mittunku manchi Daawiti yii ‘ayirrinye’ afiꞌranno. Ati ‘lowo daga’ widootiro, dhagge ikkitanno hexxo noohe. (Aju. 7:9) Maganu baxannohe; hattono maatesi wido ikkattora hasiꞌranno. Hakko daafira, iso hagiirsiisate dandiittore baala assi. Barru barrunku Maganu uyinohe hexxo hiinci. Shaqqado iimi Annanke magansiꞌrate qoossokkinna hegerera iso guwisiꞌrate hexxokki godowinta naadi! w21.08 7 guf. 18-19

Masaalaanchu Ermiyaasi macciishsha hasiꞌrannokki manniranna gibbannosirira 40 saꞌꞌanno diro sabbakino. Isi gibbannosiri ‘xontannosinna diqattannosi’ daafira hexxo mudhe loososi agurate nafa hedino. (Erm. 20:8, 9) Ikkirono Ermiyaasi hexxo mudhe baalankare facci asse diagurino! Isi agurikki sabbakanno gedenna soqqanshosinni hagiirraamo ikkanno gede kaaꞌlinosiri maati? Isi lame qara coye illachishino. Umihunni, Ermiyaasi mannaho duduwannoti Maganu sokka “hexxo” uyitannote. (Erm. 29:11) Layinkihunni, Yihowa Ermiyaasi afoosi ikke sokkasi mannisira kulanno gede doodhinosi. (Erm. 15:16) Ninkeno dudumbeemmoti hexxo uyitanno sokkaati; qoleno Farciꞌraasinesi ikkinoommo daafira Yihowa suꞌminni woshshammeemmoreeti. Konne coye illachinsheemmoha ikkiro, mannu macciishshirono giwirono, soqqanshonkenni hagiirre afiꞌra dandiineemmo. Qullaawa Maxaafa xiinxallissinanni manni ayyaanaamittetenni lophate kiꞌne heddinoonni yannanni sae keeshshiro, hexxo mudhitinoonte. Manna rosaano assate cinca hasiissanno.—Yai. 5:7, 8. w21.10 27 guf. 12-13

Yihowara soqqammanni keeshshinoommo diri ikki geeshshihano ikkiro, isira noonke ammana lossiꞌranna kaajjishiꞌra agura dihasiissannonke. Mayira? Qoropha hoongummoro, ammananke shoshshoggitara dandiitanno. Ammana illete leellannokki coye hawaqiꞌra ikkitinota qaango. Illete leellannokki coye mulenni hambammora dandiineemmo. Phaawuloosi ammana hooga “mulenni xaxxawe amadannonke cubbooti” yiinohu iseraati. Tenne woshshaadonni gata dandiineemmohu hiittoonniitiyya? (2 Tes. 1:3) Umihunni, Yihowa qullaawa ayyaanasi aannohe gede, ganyite eeggifatte huucciꞌri. Mayira yiniro, ammana qullaawu ayyaani laalo widooti. (Gal. 5:22, 23) Qullaawu ayyaanisi kaaꞌlo hooggunkero, Kalaqaanchinkera ammana lossiꞌranna kaajjite heedhanno gede assiꞌra didandiineemmo. Yihowa ayyaanasi aannonke gede agurrummokki huucciꞌneemmoha ikkiro, isi aannonke. (Luq. 11:13) ‘Ammana ledinke!’ yine nafa huucciꞌra dandiineemmo. (Luq. 17:5) Qoleno Maganu Qaale ganyite xiinxalli.—Far. 1:2, 3. w21.08 18-19 guf. 16-18

Geerru roduuwi wolootaho aa dandiitannori lowori noonsa. Kuri roduuwira alba noonsate geeshshi jawaante xa noonsakkiha ikkara dandaanno; ikkirono seeda diro heedhe afidhinohu lowo woꞌnaalshi noonsa. Xaano ikkiro Yihowa insara dirijjitesi giddo addi addi looso aansara dandaanno. Qullaawu Maxaafi geedhimmate yannara Yihowara diinaggaawe soqqaminohu ammanamino manni lawishsha kulanno. Lawishshaho Muse, Yihowa masaalaanchonna Israeelete albisa ikke soqqama hanafi woyite 80 diri balla ikkannosi. Daanieelira 90 diri ale ikke noosi yannarano Yihowa iso masaalaancho asse soqqa diagurino. Soqqamaasinchu Yohaannisino qullaawu ayyaaninni Ajuujate maxaafa borreessi woyite 90 diro ale ikkisikki digatino. Qullaawu Maxaafi, ‘Maganoho galinohu keeraanchu’ manchi Simiooni daafira shiimarella kulanno; Yihowa kayinni isi hiittoo manchootiro seekke egennino; qoleno qaaqqo Yesuusa laꞌꞌatenna qaaqqunna amate daafira masaalo coyiꞌrate qoosso uyinosi.—Luq. 2:22, 25-35. w21.09 3-4 guf. 5-7

Annuwunna amuuwu mitto qaaqqonsa wolu qaaqqinsa ledo heewisiissannokki gede woy qaaqquullensa wolqansara aleenni ikkinore asse yitannokki gede qoropha hasiissannonsa. Qaaqquulle mimmitu ledo garimale heewisiisanna wolqansara aleenni ikkinore asse yaa qaaqquullu caaccaabbanno gede assitara dandiitanno. (Efe. 6:4) Sashiko yinanni rodoo togo yitino: “Amaꞌya fonqoloho xibbunni xibbe afiꞌrammara hasidhanno; ani kayinni hatto assa didandoomma. Roso gudummanku lowo dirooti; ikkirono mito woyite, ani Yihowara soqqamate danduumma geeshsha sharramummarono Yihowa hagiidhannoha dilawannoe.” Moote Daawiti, ‘jawurira woy wolqaꞌsira aleenni ikkinorira, shembeephannokkita’ coyiꞌrino. Isonooto heeshshi assannohanna dhukasi afinoha ikkasi “harshammonna keere” afiꞌranno gede assitinosi. (Far. 131:2) Annuwunna amuuwu Daawiti coyiꞌrinorinni maa rossanno? Annuwunna amuuwu uminsa assitannorira calla ikkikkinni, oosonsa assitara hasidhanno coyirano quwa saꞌannokkire ikkite, insaneeto heeshshi assitannorenna dhukansa affinore ikkansa leellisha dandiitanno. Insa qaaqqinsa wonshiꞌra dandaanno mixo fushshiꞌranno gede kaaꞌlitanno woyite, assa dandaannorenna dandaannokkire huwattinota afanno gede assite jawaachishshasira dandiitanno. w21.07 21-22 guf. 5-6

Yihowa ninke mittu mittunkura doodhate dandoo uyinonke. Hatto yaa Yihowara hajajama woy hajajama hooga doodha dandiineemmo yaate. Mite ooso anninsa woy amansa dancha lawishsha ikka hooggunsarono, Yihowara soqqamanna isira ammaname heeꞌra doodhitino. Mite ooso kayinni anninsanna amansa insa Qullaawu Maxaafihu xintu seeri garinni lossate sharranturono, lophituhu gedensaanni Yihowara soqqama agura doodhitino. Konni daafira, mittu mittunku Yihowara soqqama woy soqqama hooga doodha dandiineemmo. (Iya. 24:15) Konnira, oosoꞌne Yihowara soqqama agurtino daafira dadillitinoonni annuwanna amuuwa, bushu aneeti yitine heddinoonte! Mito woyite, annu woy ama halaalu mininni fularanna maatensa nafa agure haꞌrannoha ikkara dandaanno. (Far. 27:10) Kuni annansanna amansa danchu lawishshi gede assite layidhanno oosora lowo geeshsha xissiisanno coyeeti. Wedelloota, anniꞌne woy amaꞌne bohantinoha ikkiro, Yihowara xissoꞌne leeltannosita horo huluullantinoonte. Isi lowo geeshsha baxannoꞌne; qoleno ammanantine soqqantinannisi daafira tashshi yaannosi. Anniꞌne woy amaꞌne assitannorira xaꞌmantinanniri kiꞌne ikkitinoonnikkitano qaagge. w21.09 27 guf. 5-7

Songotenni bohamino Kiristaanchi wole hoshsha daaffannote dhiwantino geꞌrecho gedeeti yaa dandiineemmo. Kuni Kiristaanchi ayyaanaamittetenni dhiwamino. (Yai. 5:14) Mitu dhiwaninte gede, ayyaanaamittete dhiwanino woleho saꞌꞌara dandaanno. Konni daafira, ayyaanaamittetenni dhiwamino mancho songotenni bada hasiissanno woyiti no. Tini seejjo Yihowa ammanantino hoshshasi baxannota leellishshanno; qoleno cubbo loosinohu cubbisi leelleennasi aagintaawe maaro eanno gede kakkayissasira dandiitanno. Bohamino manchi, ayyaanaamittete sagale afiꞌranno gedenna ammanasi wirro kaajjishiꞌranno gede songote gambooshshe haꞌra dandaanno. Qoleno umisira horoonsiꞌrate borro adhanna JW Biroodikaaste macciishsha dandaanno. Hakkiinni saeno, cimeeyye kuni manchi heeshshosi biddi assiꞌranni noota laꞌuro, Yihowa ledo noosi jaalooma wirro kaajjishiꞌre galagale Yihowa Farciꞌraasincho ikkanno gede saꞌe saꞌe amaaltannosi. w21.10 10 guf. 9, 11

Xaa yannara ninke hundi Kiristaani faale haꞌneemmo. Lawishshaho, dirijjitenke qinaabbinohu hundi Kiristaani qinaawino garinniiti. Hakkawari Kiristaaninte gede ninkerano songotenni songo hadhanni roduuwa towaattannori, cimeeyyenna songote soqqamaano noonke. (Fil. 1:1; Tit. 1:5) Qoleno insante gede ninkeno Maganu siimu xaadooshshinna adhamate daafira, hattono mundeete qullaambe daafira fushshino seera ayirrinseemmo; qoleno cubbo loosse maaro eꞌannokkiri songo gawajjitannokki gede agarreemmo. (Soq. 15:28, 29; 1 Qor. 5:11-13; 6:9, 10; Ibi. 13:4) Maganu Qaali Magano hagiirsiissannoti “mitte ammaꞌna” calla ikkitinota xawise kulanno. (Efe. 4:4-6) Maganu manna ikkanke, hattono Yihowa halaalenna isi albillitte assannore afanke ninkera lowo ayirrinyeeti! Konnira halaalu giddo heeꞌnoommota huluullammummokki konne halaale cuꞌmiꞌne heeꞌno. w21.10 22-23 guf. 15-17

Moote Iyosaafiixira lowo qarri tuncu yiinosi. Amoonootunna Moaabootu hattono ilaalaame gobbara Seiiri heeꞌranno manniti batinye olanto Iyosaafiixi, maatesinna mannasi waajjishiishino. (2 Dud. 20:1, 2) Iyosaafiixi ma assiyya? Isi kaaꞌlonna jawaante afiꞌrate Yihowa huucciꞌrino. Layinki Duduwo 20:5-12 nooti Iyosaafiixi isonooto heeshshi asse huucciꞌrino huuccatto, isi baxillaancho iimi Annasi lowo geeshsha addaxxannota leellishshanno. Yihowa Leewaawichu Yahazieeli widoonni Iyosaafiixi hasaawise, techohu barru qummeeshshira noore coyiꞌrino. Iyosaafiixi woꞌmunni woꞌma Yihowa addaxxe yinoonnisire assino. Isinna mannisi diinu ledo olamara fuli yannara, olaho albaanni worinohu, qajeeltino olanto ikkikkinni massaara qodhinokkiho Yihowa faarsotenni guwisanno labballooti. Yihowa Iyosaafiixi diꞌꞌirraawisinosi; isi diinu olanto qeelino.—2 Dud. 20:18-23. w21.11 15-16 guf. 6-7

Qarru iillannonke woyite Yihowa isi ledo noonke jaaloomi baꞌꞌannonkekki gede kaaꞌlannonketa addaxxa dandiineemmo. (2 Qor. 4:7-9) Yihowa woꞌmanka woyite bagamannokki baxillesi leellishannonketa addaxxa dandiineemmo. Korkaatuno Qullaawu Maxaafi, “Kaaliiqi ille waajjitannosirenna, bagamannokkiha baxillesi addaxxitannore laꞌanno” yaanno. (Far. 33:18-22) Yihowara soqqama hananfammora albaanni isi baalunku mannira leellishanno baxille leellishinonke. Ikkirono iso magansiꞌneemmore ikkinoommo daafira bagamannokki baxillesino leellishinonke. Kuni baxilli Yihowa hegere cigilesinni irkisannonke gede assinosi. Yihowa woꞌmanka woyite isiwa gamba yine heeꞌneemmo gede assannonke hattono uyinonke hexxo wonshannonke. Isi hegerera jaallasi ikkine heeꞌnammora hasiꞌranno! (Far. 46:1, 2, 7) Hakko daafira, Yihowa iillannonke qarri ikkihano ikkiro isira ammanamme heeꞌneemmo gede hasiissannonke jawaante aannonke. w21.11 7 guf. 17-18

Ninke giddo rooru, ledonsa loossannorira, ledonsa rossannorira, fiixinsara woy mininsa mannira seeda yanna koma amadino manna anfe egenninoommo. Mitu isinni lowo diro koma amadanno! Tonnu Yooseefi roduuwi isira koma amaddinota qaango; tini insa gedensoonni Yooseefira gara ikkinokkire assitanno gede assitinonsa. (Kal. 37:2-8, 25-28) Yooseefi kayinni insara gara ikkinokkire diassino! Yooseefi silxaane afiꞌri yannara insa rabbisiꞌra dandaannoha ikkirono isi hatto diassino; hatteentenni maarinonsa. Yooseefi koma diamadino. Hatteentenni isi gedensoonni Leewaawoota 19:18 borreessinoonniri ledo sumuu yaannore assino. (Kal. 50:19-21) Magano hagiirsiisa hasiꞌranno Kiristaani Yooseefi lawishsha harunse koma amada woy rabbisiꞌra agure gatona yaanno. Yesuusi wolootu sao agurreemmo gede jawaachishinonke. (Mat. 6:9, 12) Soqqamaasinchu Phaawuloosino ammanate roduuwasi “Jaallaꞌya, . . . kiꞌne rabbisidhinoonte” yee amaalino.—Rom. 12:19. w21.12 11 guf. 13-14

Yesuusi Niisaani 14, 33 M.D. hashsha Geetesemaane yinanniwa kaashshu base haꞌrino. Isi hakkiicho huuccattotenni Yihowara giddosita fushshe hasaaphino. (Luq. 22:39-44) Yesuusi hattenne qarru yannara, “qoonqosi naggi asse wiꞌle lowo hindiiddonni [huucciꞌrino].” (Ibi. 5:7) Yesuusi hakkuyi reyara albaanni noohu jeefote hashsha huucciꞌrinohu mayi daafiraati? Isi huucciꞌrinohu Yihowara ammaname heeꞌratenna fajjosi assate jawaante aannosi gede gedeeti. Yihowa Beettisi qarrame heeꞌre huucciꞌrino huuccatto macciishshe sokkaasincho soye jawaachishinosi. Yesuusi Yihowa suꞌmi qullaawanno gede assa mageeshshi geeshsha hasiissannota ikkitinoro afino. Yihowa Yesuusi eeggifate huucciꞌrino huuccatto macciishshino. Mayira? Korkaatuno, Yesuusiti qara hasatto Annisira ammaname heeꞌratenna suꞌmisi qullaawanno gede assate. Ninketino qara hasatto tenne ikkituro Yihowa kaaꞌlankera huucciꞌneemmo huuccatto macciishshanno.—Far. 145:18. w22.01 18 guf. 15-17

Xaa yannara batinyu manni poletikaho anga wodhineemmokki daafira giwannonke. Insa mirca tungammora hasidhanno. Ikkollana mannu gashshoote doodhineemmoha ikkiro, tini Yihowa giwa ikkitinota anfoommo. (1 Sam. 8:4-7) Qoleno mannu ‘Insa rosu minnanna hospitaale dimintannoreeti, hattono dagooma kaaꞌlanno looso diloossannoreeti’ yee hedara dandaanno. Insa xaa yannara mannu oosora iillanni noo qarra tirate ikkikkinni dancha duduwo duduwate illachinsheemmo daafira gufidhanno woy sokkanke dimacciishshitanno. Gufiꞌneemmokki gede maa assa hasiissannonke? (Mat. 7:21-23) Yesuusi loonsammora hajajinonke looso illachisha hasiissannonke. Tenne alamehu poletikunna dagoomittete coyi hedonke billaallitanno gede assankera wodha dihasiissannonke. Manna banxeemmo, iillannonsa qarrino dadillisannonke; ikkirono insa kaaꞌla dandiineemmoti baalanta roore doogo Maganu Mangiste daafira rosiisanna Yihowa ledo jaalooma kalaqidhanno gede kaaꞌla ikkitinota anfoommo. w21.05 7 guf. 19-20

Addi addi gobbuwara heedhannoti batinye gashshaasine Magano magansiꞌneemmoreeti yiturono, silxaanensa sayisse aa dihasidhannoreeti. Konnira Yesuusi waro noo gashshaasine assitinonte gede, yannankera noo gashshaasineno ammanantinore Yesuusi rosaano gawajjite Yihowa buurinoha konne Moote gibbannota leellishshino. (Soq. 4:25-28) Yihowa maa assino? Faarso 2:10-12 togo yitanno: “Xaano kiꞌne mootoolla, wodana asse; kiꞌne gobba gashshitinoonniri qorophe. Kaaliiqira waajjatenni soqqamme; isono huxidhine waajje. Hanqisi rahe daye hunannoꞌnekki gedenna, kiꞌneno hedeweelcho baꞌinannikki gede isira kumbuulle. Iso golo assidhannori baraadhinoreeti.” Yihowa, tini daga gara ikkinore doodhitanno gede shaqqillunni yanna uyino. Insa hedonsa biddi assidhe Yihowa Mangiste doodha dandiitanno faro noonsa. Ikkollana, uyinoonni yanna gooffe daggino. (Isa. 61:2) Mannu halaale macciishshe Yihowara soqqama doodha dandaanno yanna xaati. w21.09 15-16 guf. 8-9

Phaawuloosi noonkehu maalaamittete coyinni kassi yaa hasiissannonketa kulanni no. (Fil. 4:12) Noonkehu muxxe coyi Maganinke ledo noonke jaaloomaati ikkinnina maalaamittete coye diꞌꞌikkino. (Imb. 3:17, 18) Hanni Israeele halalla 40 diro heedhuhu gedensaanni Muse mayinonsaro laꞌno. Isi togo yiino: “Angaꞌnenni assitinoonni coyi baalunkura Maganiꞌne Kaaliiqi lowo atoote uyinoꞌne. . . . Kunni shoyilluu diri woꞌmu giddo Kaaliiqi kiꞌne ledo noo daafira, xeinoꞌneri mitturino dino.” (Mar. 2:7) Hakkuyi 40 diri giddo Yihowa Israeelete menna yinanni sagale uyinonsa. Insa Gibitsete gobbanni fultu woyite noonsa uddano digooffino. (Mar. 8:3, 4) Yihowa noonke coyinni kassi yaa ronsummoro lowo geeshsha hagiidhanno; isi, noonke coyi shiima ikkiro nafa galanteemmore ikkinammoranna isi uyinonke elto gede assine laꞌnammora hasiꞌranno. w22.01 5 guf. 10-11

Minaannuwa, maateꞌne towaatate qeechi nooꞌne daafira, insa agaratenna hasiisannonsare shiqishate diinaggaabbine loossinanni. Qarru tuncu yaannoꞌne woyite qarra umiꞌnenni tirate heddinanniha ikkara dandaanno. Kayinni umiꞌne jawaante addaxxitinannikki gede qorophe. Hatteentenni calluwiꞌne heedhinoonni woyite, kaaꞌlannoꞌne gede Yihowa huuccidhe. Qoleno minaamaꞌne ledo heedhinoonni woyiteno Yihowara giddoꞌneta kultine huuccidhe. Yihowa biddishsha afiꞌrate Qullaawa Maxaafanna Yihowa dirijjite qixxeessitino borro xiinxalle hattono rossinoonnire loosu aana hosiisse. Mitu manni Qullaawu Maxaafiha xintu seera harunsitine doodhitinoonnire mishara dandaanno. Insa woxunna woxunni hirranni coyi maateꞌnera dancha agarooshshe ikkannoꞌne yitara dandiitanno. Kayinni Moote Iyosaafiixi lawishsha qaagge. (2 Dud. 20:1-30) Isi Yihowa addaxxino hattono tenne loosunni leellishino. Yihowa konne ammanamino mancho tuge diagurinosi; kiꞌneno tuge diagurannoꞌne.—Far. 37:28; Ibi. 13:5. w21.11 15 guf. 6; 16 guf. 8

Maganu danisinni kalaqinonkere ikkinoommo daafira, mannu taalo yoo afiꞌrara halchineemmo. (Kal. 1:26) Ikkollana guuntete xeꞌne noonkere ikkinoommo daafira, baalanka coye buunxoommoha lawinkero nafa taalo yoo yaa hoongammora dandiineemmo. Lawishshaho Yihowa Nennewete manna maarino daafira Yoonaasi lowo geeshsha hanqinota qaango. (Yon. 3:10–4:1) Hanni Yihowa maaro abbitino guma hedde. Tini 120,000 saꞌꞌannohu maaro einohu Nennewete manni baotenni gatanno gede assitino! Wonanni hedosi biddi assiꞌra hasiissinosihu Yoonaasiiti ikkinnina Yihowa diꞌꞌikkino. Yihowa mitto coye assinohu mayiraatiro mannaho kulate giddeeti dinosi. Ikkirono Yihowa hundi waro soqqamaanosi, assinori woy assara hedinori daafira huluullinonsare coyidhara fajjinonsa woyiti no. (Kal. 18:25; Yon. 4:2, 3) Yihowa assara hedinore kulino woyitino no. (Yon. 4:10, 11) Ikkirono Yihowa mitto coye assara albaanni woy assihu gedensaanni, ninke fajjo xaꞌmiꞌra dihasiissannosi.—Isa. 40:13, 14; 55:9. w22.02 3-4 guf. 5-6

‘Wolu manni ninkenni roorinohu gede assine hendeemmoha’ ikkiro, ninkeneeto ‘shiimiidihu’ gede assine laꞌnanni heeꞌnoommo. (Fil. 2:3) Togoo akati heeꞌrannonke gede assiꞌnummo kiiro, woloota gufinseemmokki gede albinni roore qorophineemmo. Baalunku roduuwinke mite doogonni roortannonke. Insara noonsata dancha akatta illachinsheemmoha ikkiro, tenne huwata diqarrissannonke. Soqqamaasinchu Phaawuloosi Qorontoosi Kiristaana amaalino amaale dea dihasiissannonke; isi togo yiinonsa: “[Ate] wolu mannira aliidiha assinohehu ayeti? Noohere baala uyinohehu Magano diꞌꞌikkino? Uyinoonnisikkihu gede ikkite umokki mayira bokkeessattoyya?” (1 Qor. 4:7) Leellamate woꞌnaalleemmokki gede woy woloota roorroommohu gede assine hendeemmokki gede qoropha hasiissannonke. Mittu rodii dancha lallawo shiqishannoha ikkiro woy mitte rodoo manna Qullaawu Maxaafi xiinxallo hanafisiisate dandoo heedhusero tennera ayirrinye Yihowara aa hasiissannonsa. w21.06 22 guf. 9-10

Batinye halashshaanora manna mine marte xaada albinni roore qarra ikkitanni noonsa. Mite halashshaano heedhannohu seekkine agarranni hintsuwanna huxxinoonni qoqqowi qooxeessiraati. Qoleno kuri hintsuwa agartino agaraasine heedhara dandiitanno; insa kuri hintsuwa woy qoqqowi giddo heeꞌranno manchi woshshikkinni ayino eannota hooltannoha ikkara dandaanno. Wole halashshaano kayi gari manninni dixaaddanno. Mite halashshaano sabbakkannohu shiimu manni calla heeꞌranno qooxeessiraati. Insa mittu manchinni nafa xaadate lowo doogo haꞌra hasiissannonsaha ikkara dandaanno; hakku manchino mine nookkiha ikkara dandaanno! Togoori tuncu yiinkero hexxo mudha dihasiissannonke. Mannu minira maratto yanna soorrate woꞌnaali. Soqqansho mannu minensa heeꞌrara dandaanno yannara fullummoro, lowo manninni xaandammora dandiineemmo. Qoleno mannu mininsara higansa digattanno! Batinye halashshaano barri widoonni woy hawarro lowo manninni xaaddanno daafira tenne yannara soqqama dancha ikkitinota wodanchitino. Qoleno mannu tenne yannara anga mitiiꞌma hoogaranna hasaawa hasiꞌrara dandaanno. w21.05 15 guf. 5, 7

Yannankerano hattoori kalaqamara dandaanno? Ee. Yihowa Farciꞌraasine Qullaawa Borro ledo sumuu yitannokki ayyaanna lawishshaho ilamate barranna Ganna diayirrinseemmo yitanno woyite batinyu manni giiramanno. Wolootu kayinni Yihowa Farciꞌraasine addi addiha gobbate ayyaana ayirrissannokki daafira woy Qullaawu Maxaafi ledo sumuu yaannokkiha madaarshu seera harunsitannokki daafira hanqitanno. Konni garinni Yihowa Farciꞌraasinera hanqitannori Magano halaalunni magansiꞌnanni heeꞌnoommo yite ammantannoha ikkara dandaanno. Ikkollana insa teeꞌlinokkiha Qullaawu Maxaafi roso agurte alamete wodho roorsidhannoha ikkiro Magano hagiirsiisa didandiitanno. (Maq. 7:8, 9) Gufiꞌneemmokki gede maa assa hasiissannonke? Yihowa seeranna biddishsha albinni roore baxa hasiissannonke. (Far. 119:97, 113, 163-165) Yihowa banxeemmoha ikkiro, iso hagiirsiisannokki bude baala gimbeemmo. Aye coyino Yihowa banxeemmota hoolankera diwodhineemmo. w21.05 6 guf. 15-16

Soqqamaasinchu Phaawuloosi amaale loosu aanna hosiisa dandiineemmohu hiittoonniiti? Qullaawa Maxaafa ganyine xiinxalline, woꞌmanka woyite huuccatto assiꞌne, hattono Yihowa uyinonke looso diinaggaambe loonse ammananke kaajjite heedhanno gede assiꞌra hasiissannonke. (2 Xim. 4:4) Kaajjado ammana heedhunkero, Yihowa Farciꞌraasine daafira gara ikkinokkire coyiꞌnanna macciishshineemmo woyite dimanseemmo. (Isa. 28:16) Yihowa, Qaalesinna ammanate roduuwanke banxeemmo daafira, halaale agure fulino manni assannorinni digufiꞌneemmo. Umi xibbi diro batinyu manni gufiꞌrino hattono Yesuusa giwino. Wolootu kayinni iso ammantino. Sanihediriini shongo giddonni ajayi ajeenna mittu manchi iso ammanino; wole agurina ‘lowo geeshsha batinye’ kakkalaasine nafa iso ammante adhitino. (Soq. 6:7; Mat. 27:57-60; Maq. 15:43) Xaa yannarano lowo miliyoone ikkanno manni digufiꞌrino. Mayira yiniro, insa Qullaawa Borro giddo noo halaale affino, hattono konne halaale baxxanno. Maganu Qaali togo yaanno: “Seerakki baxxannorira coꞌo yiino keeri noonsa; horontanni mittu coyino sarraaqansara didandaanno.”—Far. 119:165. w21.05 13 guf. 20-21

Soqqamaasinchu Phaawuloosi Yihowara soqqama dandiinohu Maganu uyinosi jawaantenni ikkinnina umisi wolqanni ikkinokkita afino. Phaawuloosira dartu iillinosiha, usurroonnisiha hattono wolu addi addi qarri iillinosiha ikkirono, Yihowa soqqanshosi umo fushshanno gede qullaawu ayyaanisi widoonni wolqa uyinosi. Phaawuloosi jaala ikkinohu wedellichu Ximootewosino soqqanshosi umo fushshate Maganu aannosi wolqa addaxxino. Phaawuloosi misiyoone ikke seeda doogo haꞌri yannara Ximootewosino ledosi haꞌre soqqamino. Qoleno Phaawuloosi isi songuwa towaatannonna jawaachishanno gede soyinosi. (1 Qor. 4:17) Ximootewoosi, ‘Ani tennera ikkado diꞌꞌikkoommo’ yee hedinoha ikkara dandaanno. Phaawuloosi “Anjekki ayino mishoonkehe” yee amaalinosihu isera ikkara dandaanno. (1 Xim. 4:12) Qoleno hatte yannara Ximootewoosi umisira utu gede qasanno qarri yaano ‘godowu gajaajjo’ noosi. (1 Xim. 5:23) Ikkollana Ximootewoosi, Yihowahu qullaawu ayyaani dancha duduwo duduwatenna roduuwisira soqqamate jawaante aannosita afino.—2 Xim. 1:7. w21.05 21 guf. 6-7

Yaiqoobi 1:19 noohu xintu seeri woloota amaaltannori harunsa hasiissannonsaho. Yaiqoobi togo yee borreessino: “Mannu baalu macciishshate rahinoha, coyiꞌratenna hanqoho muddamannokkiha ikko.” Mittu cimeessi amaalanno manchi daafira baalankare afinohu gede asse hedara dandaanno; kayinni isi baalankare seekke buuxino? Lawishsha 18:13, “Macciishshinikkinni tumo qola, gowwimmatenna shollinyeho” yitanno. Mittu manchi noo gara seekkine afate iso umosi xaꞌma woyyitanno. Hatto assate coyiꞌnara albaanni balanxe macciishsha hasiissanno. Cimeessu “Hiitto nootta?” “Kaaꞌleemmoheri no?” yee xaꞌma dandaanno. Cimeeyye yanna gaaꞌmite coye seekkite buuxxannoha ikkiro roduuwansa roore jawaachishanna kaaꞌla dandiitanno. Danchu garinni amaalate yaa mite qummeeshshuwa nabbawa woy mite hedo kula calla diꞌꞌikkitino. Roduuwinke insa daafira hendeemmota, qarrinsa leellannonketanna kaaꞌlinammonsara hasiꞌneemmota affanno gede assa hasiissannonke. w22.02 17 guf. 14-15