Sadaasa

Yesuusi harunsaanosi ledo noosi jaalooma allaalaanchunna geꞌreewisi ledo noo aante ledo heewisiisino. (Yoh. 10:14) Yesuusi konni garinni heewisiisasi garankolla. Geꞌreewu allaalaanchonsa afino hattono huurosi macciishshanno. Mittu gobba daaꞌꞌatanno manchi tenne seekke buuxino. Isi togo yiino: “Foto kayisa hasiꞌnoommo daafira mitu geꞌreewi ninkewa shiqanno gede assate woꞌnaalloommo. Kayinni geꞌreewu huuronke egenninokki daafira ninke hoode didayino. Hakkiinni allaale noohu shiinqu qaaqqi daye woshshita baalunku geꞌreewi isi hoode haꞌrino.” Kuni gobba daaꞌꞌatanno manchi coyiꞌrinori, Yesuusi geꞌreewisi yaano rosaanosi daafira yiinore qaangeemmo gede assannonke. Yesuusi, “Insa huuroꞌya macciishshitanno” yiino. Kayinni Yesuusi noohu iimaati. Isi yaannore macciishsha dandiineemmohu hiittoonniiti? Mootichinke huuro macciishshinanni heeꞌnoommota leellisha dandiineemmoti qara doogo, isi rosiisinore heeshshonke giddo loosu aana hosiisate.—Mat. 7:24, 25. w21.12 16 guf. 1-2

Soqqamaasinchu Phaawuloosi alba, Kiristaanu daramanno gede assannoho kakkacha manchooti. Kayinni isi gedensoonni, soꞌrosi ammane adhino hattono laosinna akattasi biddi assiꞌrate maahoyye yiino. (1 Xim. 1:12-16) Yihowa kaaꞌlonni Phaawuloosi baxillaancho, shaqqadonna umosi heeshshi assanno cimeessa ikkino. Isi Yihowa gatona yaannosita addaxxino. (Rom. 7:21-25) Isi guuta ikka hasiissannoe yee dihedino. Hatteentenni isi akattasi biddi assiꞌrate jawaate sharramino hattono uyinoonnisi looso umo fushshate isonooto heeshshi asse Yihowa kaaꞌlannosita addaxxino. (1 Qor. 9:27; 2 Qor. 4:7) Cimeeyye shoommoonnihu insa guuta ikkitino daafira diꞌꞌikkino. Ikkirono Yihowa insa soꞌronsa ammante adhitaranna akatansa biddi assidhara hasiꞌranno. (Efe. 4:23, 24) Mittu cimeessi Maganu Qaale horoonsiꞌre isonooto layiꞌranna biddi assiꞌra hasiissannosi coye biddi assiꞌra hasiissannosi. Hatto ikkiro Yihowa isi hagiirraamonna worba cimeessa ikkanno gede kaaꞌlannosi.—Yai. 1:25. w22.03 29-30 guf. 13-15

Ammanate rodiinkera yoo yinanni heeꞌnoommota wodanchinummoro maa assa hasiissannonke? Roduuwanke baxa hasiissannonketa deꞌnoonke. (Yai. 2:8) Qoleno wolootaho yoo yineemmokki gede kaaꞌlankera Yihowa eeggifante huucciꞌra hasiissannonke. Hattono yoo yinoommo rodiiwa aanne isi ledo yanna sayinse huuccattonke ledo sumuu yaannore assa dandiineemmo. Isi ledonke soqqamanno gede woy ledonke sagale itanno gede koyisa dandiineemmo. Rodoonke albinni roore egenninummo kiiro Yihowanna Yesuusi lawishsha harunsine dancha akatasi illachishate woꞌnaalleemmo. Konni garinni, danchu allaalaanchi yoo yitinoonte yee hajajinonke hajajo wonshinanni heeꞌnoommota leellinsheemmo. Geꞌreewu allaalaanchinsa huuro macciishshannonte gede, Yesuusi harunsaanono isi huuro macciishshitanno. “Shiima hoshsha” wido woy “wolu geꞌreewi” widono ikkino, danchu allaalaanchi huuro macciishshanna hajajama agurroonke.—Luq. 12:32; Yoh. 10:11, 14, 16. w21.12 19 guf. 11; 21 guf. 17-18

Roobiaami Israeelete moote ikkita gashshino manni isiwa daye mitte xaꞌmo xaꞌmino. Insa annisi Selemooni duhisiisinonsa duha shaashshansara xaꞌmidhino. Roobiaami mayyee dawara hasiissannosiro afate, Israeelete geerra amaaꞌlino; hatto assasi danchate. Israeelete geerri, moote mannu yiinore assannonsaha ikkiro, mannu maahoyye yee galannosita kultinosi. (1 Mot. 12:3-7) Roobiaami tini amaale diduushshitinosi; hakko daafira isi darawosi amaaꞌlino. Insa, isi mannaho duha ledanno gede amaaltinosi. (1 Mot. 12:9-11) Roobiaami hiittee amaale adha hasiissannosiro afate Yihowa xaꞌmiꞌra dandaanno. Isi kayinni darawosi amaaltinosi amaale adhino. Tini abbitino qarri isono Israeelete mannano gawajjino. Ninkeno mito woyite amaallanninke amaale baxa hoongammora dandiineemmo. Ikkirono Maganu Qaali aana xintantinota ikkitu geeshsha macciishshine adha hasiissannonke. w22.02 9 guf. 6

Umosi heeshshi assannohunna dhukasi afino manchi wedellootu woꞌnaalshu noonsakkire ikkansa ikkikkinni jawaantensa illachishanno. Togoo manchi wedelloota isi ledo heewisantannori gede ikkikkinni loosu miillasi gede asse hedanno. Geerru roduuwi wedella roduuwa Yihowa elto gede assite heddanno; qoleno tenne eltora Yihowa galattanno. Geerru roduuwi dhukinsa ajanni haꞌranno woyite, looso loosatenna songo kaaꞌlate jawaantenna hasatto noonsa wedellooti heeꞌransanni tashshi yaannonsa. Qullaawu Maxaafi giddo kulloonniti Naoomi, wedellitte beetto kaaꞌlitasera maahoyye yite kaajja lawishsha ikkitino. Naoomi umo beettise beetto Ruuti agurte mannisewa higganno gede amaaltinose. Ikkollana, Ruuti Naoomi ledo Beeteliheme hadhara murcidhino; hakko daafira Naoomi Ruuti ledose hadhino daafira hagiidhitino hattono kaaꞌlose maahoyye yite adhitino. (Rut. 1:7, 8, 18) Konni garinni lamenti lowo atoote afiꞌrino! (Rut. 4:13-16) Umonsa heeshshi assannohu geerru roduuwi Naoomi lawishsha harunsanno. w21.09 10-11 guf. 9-11

Iimi Anninke ninke mittu mittunku assa dandiineemmore afanno. Affinoonni manninna baxxinanni manni assa dandaannorinni roorinore assa dandiitinanniha ikkara dandaanno. Woy diru akkalle amaddinoꞌne daafira, dhiwanni waadannoꞌne daafira woy maatete qeechi nooꞌne daafira wolootu assitannohu geeshsha assa hoogginara dandiitinanni. Hatto ikkiro hexxo mudhitinoonte. (Gal. 6:4) Yihowa loossinoonni looso dihawanno. Dancha giddonni kaꞌine wolqaꞌne assitu geeshsha uyitinanniha ikkiro Yihowa hagiidhanno. Yihowa assate heddinoonniri maatiro nafa afanno. Isi, iso magansiꞌrate assineemmorinni hagiirraamma ikkinammoranna harshammi yinammora hasiꞌranno. Yihowa iso magansidhannorira qarru iillannonsa woyite kaaꞌlannonsata anfoommo daafira giddoyidi keeri noonke. (Isa. 41:9, 10) Kalaqamu baalu ‘ayirrisanna guweenya’ aa hasiissannoha baxillaancho iimi Annanke magansiꞌneemmo woyite hagiirraamma ikkineemmo gede assannonkehu ikkadu korkaati noonke!—Aju. 4:11. w22.03 24 guf. 16; 25 guf. 18

Yesuusi faale haꞌra hasiꞌneemmo. Kayinni woꞌmunni woꞌma Yesuusi faale haꞌra hoongummoro hexxo mudha dihasiissannonke. (Yai. 3:2) Mittu rosaanchi, rosiisaanchisi assannore woꞌmunni woꞌma assa didandaanno. Ikkirono soꞌrinore biddi assiꞌre rosiisaanchisi lawishsha seekke harunsate sharramannoha ikkiro dandoosi woyyeessiꞌranni haꞌranno. Hatteente gede ninkeno Qullaawu Maxaafinni ronsoommore loosu aana hosiinseemmohanna soꞌronke taashshiꞌrate dandiinummore baala assineemmoha ikkiro, Yesuusi faale haꞌra dandiineemmo. (Far. 119:59) Heeꞌnoommohu umonsa calla baxanno manni woꞌmino alameraati. Yihowa manni kayinni hattooha diꞌꞌikkino. Yesuusi umisi horo agure woloota kaaꞌlino gari dhagge ikkannonke; ninkeno isi lawishsha harunsate murciꞌnoommo. (1 Phe. 2:21) Yesuusi gede uminke horo agurre woloota kaaꞌlate dandiinummore baala assinummoro, Yihowa hagiirsiinseemmo daafira ninkeno hagiirraamma ikkineemmo. w22.02 24 guf. 16; 25 guf. 18

Yihowa xaa yannara mannisira biddishsha aanno doogga giddo mitte Qaalisi Qullaawu Maxaafi widooniiti. Yihowa rosiisannonke roso yanna gaaꞌmine hiincineemmoha ikkiro, biddishshasi harunsanna sabbakate looso umo fushsha dandiineemmo. (1 Xim. 4:15, 16) Yihowa biddishsha aannonketi wole doogo “ammanaminohunna wodanaamu borojjichi” widoonniiti. (Mat. 24:45, NW) Mito woyite, kuni borojjichi aannonke biddishsha woꞌmunni woꞌma huwata qarra ikkitankera dandiitanno. Lawishshaho kalaqamu dano kalaqantanno woyitira lubbonke gatisiꞌrate qixxaambeemmo gede kaaꞌlannonke biddishsha uyinankera dandiinanni; togoo woyite tini dano ninke qooxeessira dikalaqantanno yine hendeemmoha ikkara dandaanno. Uyinanninke biddishshi kaaꞌlannonkekkiha lawinkero maa assa hasiissannonke? Qullaawu Maxaafinni nabbamboommo xagge heda dandiineemmo. Maganu mannira, mannu hedonni laꞌniro kaaꞌlannokkiha lawanno biddishsha uyinoonninsa woyiti no; kayinni kuni biddishshi heeshshonsa gatisino.—Eje. 7:7; 8:10. w22.03 18-19 guf. 15-16

Yesuusi mittoreno huluullamikkinni techohu barru qummeeshshira noo hedo coyiꞌrino. Yesuusi albillittete heeshshosi Yihowa anga noota afino; hattono Annisi hawannosikkita addaxxino. Yesuusi coyiꞌrinorinni maa ronseemmo? Heeshshoꞌne Yihowara eeggo uyidhe. Hatto assate Yihowa ‘woꞌmu wodaniꞌnenni addaxxa’ hasiissannoꞌne. (Law. 3:5) Hanni hurannokki dhibbi amadinosihu 15 dirihu Jooshuwa yinanni rodii lawishsha laꞌno. Isi Maganu seeri ledo sumuu yaannokki garinni xagisiꞌrate maahoyye diyiino. Isi reyara albaanni amasira togo yiino: “Ama, ani Yihowa anga noommo. . . . Mittoreno dihuluullameemmo; Yihowa reyotenni kayisannoeta afoommo. Isi giddoꞌyata afino; Iso lowo geeshsha baxeemmosi.” Mittu mittunku ninkeneeto togo yine xaꞌma dandiineemmo: ‘Reyemmo gede assaera dandaannohu ammanaꞌya fonqolanno coyi tuncu yiiero, heeshshoꞌya Yihowara eeggo uyiꞌre isi qaagannoeta addaxxeemmo?’ w21.04 12-13 guf. 15-16

Yihowa soqqanshote widoonni jawaachishannonke. Qullaawu Maxaafi halaale wolootaho kulleemmo woyite mannu macciishshirono macciishsha giwirono jawaante afiꞌneemmo. Heeshshonsa giddo iillannonsari, mitootu gari geeshsha soqqama didandiineemmo yite heddanno gede assansara dandaanno. Aterano hattoori macciishshamannoheha ikkiro, isira soqqamate dandiitto geeshshire assittoro Yihowa hagiidhannota deꞌooti. Mininni fula dandiineemmokkiha ikkiro nafa, Yihowa isira soqqama halchineemmota laꞌꞌanno, hattono tenne naadanno. Isi towaattannonkerira woy akimootaho farciꞌneemmo gede faro fanankera dandaanno. Xa assinanni heeꞌnoommore alba assinoommori ledo heewisiinseemmoha ikkiro, hexxo mudhinammora dandiineemmo. Ikkollana Yihowa xa kaaꞌlanni noonke gara huwantummoro, aye geeshshi qarrano hagiirrunni cincine saꞌꞌate jawaante afiꞌneemmo. Winxeemmohu halaalu wixi giddo hiikku rumuxxaranna lophara dandaannoro dianfoommo.—Ros. 11:6. w21.05 24-25 guf. 14-17

Hafuurre Moote Daawiti Yihowa uyinosire deanno gede assitinosi; Yihowa isira jiro, ayirrinyenna lowo qeelle uyinosi. Daawiti Yihowa uyinosire “Hasaawenna coyiꞌre gude diafeemmo!” yiino. (Far. 40:5) Ikkirono mitte yannara Daawiti Yihowa uyinosire deino. Isi noosirinni kassi yiinokki daafira wolere yorino. Daawiti lowo minaamuwi noosiha ikkirono, gara ikkitinokki yorto wolu manchi minaama yoranno gede assitasira wodhino. Tini mancho Bersaabehiiti; minaannise Hitichu Ooriyooti. Daawiti umosi calla baxe Bersaabehi ledo foorino; iseno godobbino. Daawiti ise ledo soorrinotano agurranna minaannase Ooriyo shiishiishe bunshete aana bunshe assino! (2 Sam. 11:2-15) Daawiti tenne assinohu maa hedeeti? Yihowa tenne dilaꞌꞌanno yee hedeeti ikka? Daawiti Yihowara lowo diro ammaname soqqaminoha ikkirono hafuurino; tini qolte lowo qarra abbitinosi. Ikkirono Daawiti soꞌrosi ammane gedensoonni maaro eino. Isi Yihowa maarinositera hagiidhinoti dihuluullissannote!—2 Sam. 12:7-13. w21.06 17 guf. 10

Qullaawa Maxaafa xiinxallisate dandoo dinoe yine hendeemmoha ikkara dandaanno. Manna Qullaawa Maxaafa xiinxallisate lowo egenno woy dandoo hasiissannonke yine hendeemmoha ikkara dandaanno. Ati hatto yite hedattoha ikkiro, hanni waajjattokki gede kaaꞌlannoheha sase coye laꞌno. Umihunni, Yihowa ati manna rosiisate ikkadoho yiinohe. Layinkihunni, ‘gordohonna baattote roorre uyinoonnisihu’ Yesuusi rosiisatto gede hajajinohe. (Mat. 28:18) Sayikkihunni, Yihowanna ammanate roduuwikki kaaꞌlitannohe. Yihowa, Yesuusi mayyee rosiisannoro afanno gede kaaꞌlisinte gede ateno kaaꞌlannohe. (Yoh. 8:28; 12:49) Qoleno, soqqanshote gaamokkihu aliidi laꞌꞌaanchi, dandoo noosi suwisaanchi woy woꞌnaalshu noosi halashshaanchi Qullaawu Maxaafi xiinxallo hanafisiisanna xiinxallisa dandaatto gede kaaꞌlahera xaꞌmiꞌra dandaatto. Qullaawa Maxaafa xiinxallisa waajjattokki gede kaaꞌlannohe coyi giddo mittu, togoo halashshaano xiinxallissanno woyite ledonsa xiinxallisate. w21.07 6 guf. 12

Tenne alame goofimarchi gambise dayi kiiro, Yihowa assannori gara ikkinota albinni roore addaxxa hasiissannonke. Mayira? Bayiru qarri yannara rosaminokkiha woy kaaꞌlannokkiha lawanno biddishsha uyinankera dandiinanni. Yihowa annu annu deerrinni hasaawisannonkekkiti egennantinote. Isi biddishsha aannonkehu shoominori widoonni ikkara dandaanno. Hatti yanna ‘Kuni biddishshi Yihowahonso albisa ikkite soqqantanno roduuwi uminsanni fushshitinoho?’ yinanni huluullammeemmo yanna diꞌꞌikkitino. Hattee quuxxote yannara Yihowanna dirijjitesi addaxxatto? Xaa yannara uyinannihe biddishshira noohe lao hatte yannara Yihowanna dirijjitesi addaxxattoronna teꞌee leellishshannota ikkitara dandiitanno. Xaa yannara uyinanninke biddishsha addaxxattohanna bayichonkonni hajajamattoha ikkiro, bayiru qarri yannarano hatto assa diqarrissannohe. w22.02 6 guf. 15

Yihowa kaaꞌlonni Gedewooninna 300 mannisi lowo qeelle afidhino; tini qeelle woleteemmero naaxxitanno gede assitansara dandiitannote. Efireemi manni Gedewooniwa dayinohu iso galatate ikkikkinni isi ledo yekkeeramateeti. Insa tenne assitinohu Gedewooni olaho fuli woyite ledosi fultara xaꞌminonsakki daafiraati. (Eje. 8:1) Hakkiinni isi Maganu maassiꞌrinonsata leellishanno lawishsha kulinonsa. Hatto yiita ‘hanqinsa qiidino.’ (Eje. 8:3) Gedewooni isonooto heeshshi asse Maganu manni mereero noo keeri baꞌꞌannokki gede assino. Efireemi manni lawishshinni, uminkera ayirrinye hasiꞌrantenni Yihowa ayirranno gede assa hasiissannonketa ronseemmo. Maatete umo ikkitinorinna songote cimeeyye Gedewooni lawishshinni lowore rosa dandiitanno. Mittu manchi assinoommorinni koffi yiiro, hanqanno gede assinosiri maatiro heda hasiissannonke. Qoleno assinohu danchu coyira galantammosira dandiineemmo. Tenne assate ninkeneeto heeshshi assa hasiissannonke. Uminke ayirrinyinni roore salaame roortannota dea dihasiissannonke. w21.07 16-17 guf. 10-12

Yihowa danisinni kalaqe ayirrisinonke. Maganu daninni kalaqammoommore ikkinoommo daafira, batinye kaajja akattasi lawishshaho baxille, mararro, ammanamanna keeraanchimma lossiꞌranna leellisha dandiineemmo. (Far. 86:15; 145:17) Togoo akatta heedhannonke gede sharrammeemmo woyite, Yihowa ayirrinsanni heeꞌnoommo, hattono isira galatu noonketa leellinshanni heeꞌnoommo. (1 Phe. 1:14-16) Iimi Annanke hagiirsiisanno amanyooti heeꞌrinkero, hagiirru noo heeshsho heeꞌneemmo. Qoleno Yihowa daninni kalaqammoommo daafira, isi maatesi wido ikkara hasiꞌranno manni gedee manna ikka dandiineemmo. Yihowa kaajja qae qixxeessinonke. Yihowa umi mancho kalaqara lowo diri albaanni, mannu ooso heedhara baatto kalaqino. (Iyo. 38:4-6; Erm. 10:12) Yihowa shaqqadonna dancha Magano ikkino daafira, hagiidhineemmo gede assannonkeha batinye dancha coye qixxeessino. (Far. 104:14, 15, 24) Isi kalaqino coye lae, “dancha ikkinota” afino.—Kal. 1:10, 12, 31. w21.08 3 guf. 5-6

Ninke baalunkura sabbakatenna manna rosaano assate looso uyinoonninke. (Mat. 28:19, 20; Rom. 10:14) Konni lowo geeshsha hasiisanno loosira dandookki woyyeessiꞌra hasiꞌratto? Nabbawanna Rosiisa yitanno biroshere xiinxallatto woyite, rosoottore harunsate kaaꞌlitannohe mixo fushshiꞌri. Fushshiꞌra hasiissannohete lowo geeshsha hasiissanno mixo giddo mitte, Magano hagiirsiissanno akatta lossiꞌra ikkitinota habbooti. (Qol. 3:12; 2 Phe. 1:5-8) Ninke baalunku Yihowara xa soqqammanni heeꞌnoommohunni roore soqqama halchineemmoti dihuluullissannote. Maganu abbannote haaro alamera, isira hasiꞌnoommo deerrinni soqqama dandiineemmo. Hakka geeshsha kayinni, dandiineemmore assate wolqanke assitu geeshsha sharrammeemmoha ikkiro, hagiirrinke lexxanno gede assiꞌranna dadillisannonkere ajisha dandiineemmo. Roorenka kayinni, ‘hagiirraamu Maganinke’ Yihowa ayirranno gedenna guweenya adhanno gede assineemmo. (1 Xim. 1:11, NW) Konni daafira, noonke qoossonni hagiidhino! w21.08 25 guf. 18-20

Halaalu mine lophoottoha ikkiro, Yihowa daafira anjekkinni kayisse rosoottoha ikkara dandaanno. Hatto ikkiro, Yihowa Kalaqaancho ikkinota, baxissanno akatta noositanna mannu oosora kaajjare hedinota rosiinsoonnihe. (Kal. 1:1; Soq. 17:24-27) Ikkollana, batinyu manni Maganu Kalaqaancho ikkinota agurina noota nafa diammananno. Hatteentenni, kuni manni heeshsho umisenni daggino, hattono sunu sununni soorrante jajjabba ikkitino yee ammananno. Konni manni giddo mitu lowo roso rosinoho. Insa Qullaawu Maxaafi yaannori soꞌro ikkinota sayinse buuxissino yitanno; qoleno, Kalaqaanchu no yee ammananno manni egenno xeꞌinoho, gowwahonna shiimurinni dogamannoho yitanno. Yihowa Farciꞌraasine ikkine keeshshinoommo diri ikki geeshshihano ikkiro, ninke baalunku ammananke kaajjishiꞌrate sharrama agura dihasiissannonke. Hatto assineemmoha ikkiro, Maganu Qaale ammanannokki manni coyiꞌrannoti ‘mannu hayyonna awaawurshi’ didogannonke.—Qol. 2:8. w21.08 14 guf. 1-3

Aabeeli, Nohi, Abirihaaminna Iyyoobi Yihowa ayirrissannotanna baxxannota leellishshino. Hajajante, ammana noonsata leellishshenna kakkalo shiqishshe iso ayirrissannotanna baxxannota leellishshino. Insa Yihowa ayirrissannota leellishate dandiiture baala assitino; Yihowano magansiꞌransa adhino. Gedensoonni Yihowa Abirihaami sirchira Muse widoonni Seera uyino. Kuni seeri, Yihowa hasiꞌranno garinni iso magansiꞌra dandiinanni dooggano kulanno. Yesuusi reyihunna reyotenni kaihu gedensaanni, mannu Yihowa magansiꞌrate Muse Seera harunsa dihasiissannonsa. (Rom. 10:4) Kiristaanu haaro seera yaano “Kiristoosi Seera” harunsanno. (Gal. 6:2) Insa konni ‘seerira’ hajajantannohu konne asse konne assitinoonte yitannota batinye wodho agadhite ikkikkinni Yesuusi lawishshanna isi rosiisino roso harunsiteeti. Xaa yannarano Kiristaanu Kiristoosi lawishsha harunse, Yihowa hagiirsiisatenna lubbonsara ‘fooliishsho afiꞌrate’ dandaaminsare baala assanno.—Mat. 11:29. w22.03 20-21 guf. 4-5

Yihowa oososi hasaawissannosi woyite macciishshanno. Yihowa, Beettisi uullate aana noo waro huucciꞌrinota batinye huuccatto macciishshinoti dihuluullissannote. Yesuusi jajjabba coye assara kae heeꞌre assiꞌrino huuccatto, lawishshaho 12 soqqamaasinesi doori woyite huucciꞌrino huuccatto Yihowa macciishshino. (Luq. 6:12, 13) Yesuusi lowo geeshsha dadille heeꞌre huucciꞌrino huuccattono Yihowa macciishshino. Yesuusi, Yihudi sayise hirasira albaanni, albasiinni noo fonqolo qeele saꞌꞌanno gede kaaꞌlasira Annasi eeggifate huucciꞌrino. Yihowa muxxe Beettisi huuccatto macciishshinoha calla ikkikkinni, jawaachishannosi gede sokkaasincho soyino. (Luq. 22:41-44) Yannankerano Yihowa soqqamaasinesi assidhanno huuccatto macciishshanno; qoleno maltino yannara woyyitino doogonni huuccattonkera dawaro qolanno. (Far. 116:1, 2) Hanni Hindete gobbara heedhannoti mitte rodoo tenne heeshshosenni laꞌino gara laꞌno. Ise quwa saꞌino yaaddo waaddannose; hakko daafira Yihowa kaaꞌlasera eeggifatte huuccidhino. Ise togo yite borreessitino: “Onkoleessa 2019 Biroodikaastera fulinohu yaaddo gargadha dandiinanni gara kulanno rosi, hasiise nooe yannara fulinoho. Kuni rosi Yihowa huuccattoꞌyara qolino dawarooti.” w21.09 21-22 guf. 6-7

Umi xibbi diro Yihudaho heeꞌranno Kiristaanira noonsare baalankare agure haꞌranna marinowa heeshsho haaro ikke hanafa mageeshshi qarra ikkitinonsaro heda dandiineemmo. Insara Yihowa heeshshote hasiisannonsare aannonsata addaxxate, ammana hasiissinonsa. Ikkollana insa hasiissannonsa kaaꞌlo afidhino. Roomu olanto Yerusaalame doyissitara ontu diri albaanni soqqamaasinchu Phaawuloosi Ibiraawootu Kiristaanira mite kaaꞌlitanno amaale kulinonsa. Isi togo yiino: “Woxu baxille qorophe; nooꞌnehu ikkoꞌne! Maganu, ‘Horo diagureemmohe; dicallachisheemmohe’ yiino. Kunnira hawaqiꞌne, ‘Kaaliiqi kaaꞌlaanchoꞌyaatina diwaajjeemmo. Mannu ma assannoe?’ yineemmo.” (Ibi. 13:5, 6) Roomu olanto dagge horritara albaanni Phaawuloosi amaalinota tenne amaale harunsino Kiristaana, haarote marinowa bikku heeshsho heeꞌra qarrissinonsakkiti dihuluullissannote. Insa Yihowa heeshshote hasiisannonsare aannonsata horo dihuluullantino. w22.01 4 guf. 7, 9

Maaranno mancho hendeemmo woyite danchummasi, faasiiqa ikkasi, mararrosinna shaqqillesi qaangeemmoha ikkara dandaanno. Qoleno Yesuusi coyiꞌrinota danchu Samaarichire kultanno xagge qaangeemmohano ikkara dandaanno. Wole daga wido ikkinohu kuni manchi, mooraano gante mulqidhino Ayihudicha “lae mararinosi.” Kuni Samaarichu manchi Ayihudicha mararino daafira, baxillunni towaatinosi. (Luq. 10:29-37) Kuni lawishshi, Maganinkeha mitto baxisanno akata yaano maaro luphi asse leellishanno. Maganu maarannonkehu baxannonke daafiraati; qoleno isi barru barrunku addi addi doogganni maarosi leellishannonke. Maaro leellinshanniti wole doogono no. Maaranno manchi qorichu hasiisinosi manchira maaranno gede assanno korkaati heeꞌriro gatona yaanno. Yihowano konni garinni maarosi leellishinonke. Faarsaanchu yiino garinni, Yihowa “cubbinke deerrinni diqorichishannonke.” (Far. 103:10) Mito woyite kayinni Yihowa cubbo loosino mancho kaajjishe seejjara dandaanno. w21.10 8 guf. 1-2

Yihowa bagamannokki baxille leellishannohu isi ledo muli jaaloomi noonsa soqqamaanosira callaati. Moote Daawitinna masaalaanchu Daanieeli coyidhinori tenne leellishanno. Lawishshaho Daawiti togo yiino: “Bagamannokkiha baxillekki egentinoherira, . . . dirrisinsa. Kaaliiqi . . . waajjitannosirira baalaho, hegere geeshsha bagamannokkiha baxillesi leellishannonsa.” Daanieelino togo yiino: “Halaalaancho Magano Yihowa, ati baxxannoheriranna hajajokki agadhitannorira bagamannokki baxillekki leellishattonsa.” (Far. 36:10; 103:17; Dan. 9:4, NW) Tini qummeeshshuwa leellishshannonte gede, Yihowa soqqamaanosi iso egentinosinna waajjitannosi daafira hattono baxxannosinna hajajosi agadhitanno daafira bagamannokki baxillesi leellishannonsa. Yihowa bagamannokki baxillesi leellishannohu iso halaalunni magansidhannosirira callaati. Yihowa isira soqqama hananfammora albaanni baalunku mannira leellishanno baxille ninkerano leellishinonke. (Far. 104:14) Ikkirono iso magansiꞌneemmore ikkinoommo daafira bagamannokki baxillesino leellishannonke. w21.11 4 guf. 8-9

Yesuusi techohu barru qummeeshshira hajajinonke hajajo ayirrisate murciꞌnoommo. Xaa yannara batinyu manni maccare ikkitinori ammaꞌnote murrooti hoode haꞌranno. Insa kore murroota quwa saꞌe jajjanno daafira, magansiꞌrate ledo taalo ayirrinye uyitannonsa. Batinyu manni beetekiristaanensa timanno, maxaaffansa hidhanno, hattono beetekiristaanensa kaaꞌlate lowo woxe fushshanno. Mitootu kuri ammaꞌnote murrooti yitannore baalankare ammantanno. Kuni manni ammaꞌnote murrootansa laꞌꞌanno woyite Yesuusa umosi lainohu gede ikke hagiidhanno! Yihowa halaalunni magansidhannorira kayinni qeese dinonsa. Mereeronke albisa ikkite soqqantannore ayirrinseemmoha ikkirono, Yesuusi ‘Kiꞌne [baalunku] roduuwaho’ yee rosiisinonke roso harunsineemmo. (Mat. 23:8-10) Ammaꞌnote murrichano ikko poletiku gashshaanchono ikko, manna dimagansiꞌneemmo. Qoleno togoo manni loosira dieꞌneemmo. Hatteentenni, alametewiinni baxxinoommore ikkine heeꞌneemmo. Tenne doogganni, ninke Kiristaanaho yitannote batinye ammaꞌnowiinni baxxinoommoreeti.—Yoh. 18:36. w21.10 20 guf. 6-7

Qullaawa ikka hasiꞌrannohu aye Kiristaanchino, aye coyino woy ayino Maganisi ledo noosi jaalooma roorara wodha dihasiissannosi. Yihowa Farciꞌraasine ikkinoommo daafira qullaawu suꞌmisi mishamanno woy xonamanno gede assannoha aye coyeno assineemmokki gede murciꞌnoommo. (Lew. 19:12; Isa. 57:15) Israeele Yihowa Maganonsa ikkinota leellishshannohu uyinoonninsaha batinye seera agadhiteeti. Leewaawoota 18:4 togo yitanno: “Seeraꞌyanna wogaꞌya seekkitine agadhe. Ani Kaaliiqi Maganoꞌneeti.” Fooliishsho 19 mite Israeelete uyinoonni ‘wogano’ kultanno. Lawishshaho kiiro 5-8, hattono 21 nna 22 saadate kakkalo daafira kultanno. Tenne kakkalo shiqisha hasiissannohu ‘Yihowaha qullaawa coye batteessannokki’ garinniiti. Kuri qummeeshshuwa nabbawanke Yihowa hagiirsiisate kaꞌneemmo gedenna Ibiraawoota 13:15 kultannonke garinni, iso hagiirsiissannota galatu kakkalo shiqishiꞌneemmo gede kakkayissannonke. w21.12 5-6 guf. 14-15

Xaa yannara noori wedellu minaannuwinna minaamuwi, Yihowa addaxxa rosinohu wolu roduuwi woꞌnaalshinni horo afiꞌra dandaanno. Mitu minaannuwinna minaamuwi woꞌma yanna soqqansho lowo diro soqqaminore ikkara dandaanno. Fushshidhinoonni mixo daafira heddinanni heedhinoonniha ikkiro insa amaaꞌla dandiitinanni. Konni garinni Yihowa addaxxitinannita leellisha dandiitinanni. (Law. 22:17, 19) Adhama Yihowa elto ikkitinota qaagge. (Mat. 19:5, 6) Isi adhantinori tenne eltonni hagiidhitara hasiꞌranno. Wedella minaannuwanna minaamuwa, heeshshoꞌne giddo maa assitinanni heedhinoonniro hedde. Yihowa uyinoꞌne elto mageeshshi geeshsha naaddinanniro leellishate dandiitinire baala assitinanni heedhinoonni? Giddoꞌneta huuccattotenni Yihowara hasaaphe. Kaaꞌlannoꞌneha xintu seera afiꞌrate Qaalesi xiinxalle. Hakkiinni Yihowa aannoꞌne amaale harunse. Yihowara soqqamate illachishshinanniha ikkiro, hagiirrunna harshammo noo heeshsho heedhinanni! w21.11 19 guf. 16, 18

Yaiqoobira umisi daafira gara ikkitino lao noosi. Yaiqoobi Yesuusi rodoo ikkino daafira woy lowo qoosso noosi daafira wolootunni roorinohu gede asse dihedino. Isi ammanate roduuwasi, “Baxantinoonni roduuwaꞌya!” yiino. (Yai. 1:16, 19; 2:5) Yaiqoobi mannu iso guutaho yee hedanno gede diassiꞌrino. Maa ronseemmo? Ninke baalunku soꞌneemmore ikkinoommota qaango. Rosiinseemmo manna roorreemmohu gede assine heda dihasiissannonke. Mayira? Qullaawa Maxaafa xiinxallinseemmo manchi, soꞌneemmokkiri gede asse hedanno gede assineemmoha ikkiro, isi Maganu biddishsha harunsa didandeemmo yee hedara dandaanno. Ikkollana ninkerano Qullaawu Maxaafiha xintu seera harunsa qarra ikkitannonke woyiti nootanna, Yihowa qarra ikkinonkere qeelle saꞌneemmo gede kaaꞌlinonke gara kullummosiro isino Yihowara soqqama dandaannota huwatanno gede kaaꞌlineemmosi. w22.01 11-12 guf. 13-14

Yesuusi hedanno garinni hendummo kiiro assootinkennino isi lawishsha harunsineemmo hattono albinni roore isite gedee akatta heedhannonke. (Ibi. 1:3) ‘Yesuusi guutaho. Woꞌmunni woꞌma isi gedeeha ikka didandeemmo!’ yite hedattoha ikkara dandaanno. Hatto yite hedattoha ikkiro aante noo coyibba qaagi. Umihunni, kalaqamoottohu Yihowanna Yesuusi akatta leellisha dandaatto garinniiti. Hakko daafira insa lawishsha harunsa doodha dandaatto hattono mito geeshsha ikkirono qinaannohe. (Kal. 1:26) Layinkihunni, Maganunnihu qullaawu ayyaani kalqete alame giddo taalle nookki wolqa afiꞌrinoho. Qullaawu ayyaani kaaꞌlonni umikkinni horo dandaattokkire assa dandaatto. Sayikkihunni, Yihowa xaa yannara qullaawu ayyaani laalo woꞌmunni woꞌma leellishattora hasiꞌranno yaa diꞌꞌikkino. Isinni baxillaanchu iimi Anninke uullate aana heeꞌrate hexxo noonsari guuta ikkitannoha 1,000 diro qixxeessino. (Aju. 20:1-3) Yihowa xaa yannara dandiinummo geeshsha sharrammammoranna kaaꞌlo afiꞌrate iso addaxxinammora hasiꞌranno. w22.03 9 guf. 5-6

Yihowa ledo noonke jaalooma kaajjishiꞌneemmo gede kaaꞌlitannonketi huuccatto calla diꞌꞌikkitino. Maganu Qaale xiinxallanna songote gambooshshe haꞌrano albinni roore Maganunniwa shinqeemmo gede kaaꞌlitannonke. Xiinxallatto yannaranna songote gambooshshiwa nootto yannara, yannakki danchu garinni horoonsiꞌrate maa assa dandaatto? Ateneeto togo yite xaꞌmi: ‘Songote gambooshshiwa woy xiinxalleemmo woyite hedoꞌya bebbeehantanno gede assara dandaannori maati?’ Silketenni woy wolu elektiroonikisete uduunnichinni mannu dowwolannohe woyite, iimeele soyannohe woyite woy borrote sokka soyannohe woyite tini hedokki bebbeehantanno gede assitanno? Xiinxallatto yannara woy gambooshshunniwa nootto yannara wodanikki wolewa haꞌrannoha ikkiro illachisha dandaatto gede kaaꞌlahera Yihowa huucciꞌri. Ayyaanaamittete coye illachisha shota ikka hooggahera dandiitanno; ikkirono hatto assa lowo geeshsha hasiissannote. Maganu keeri wodanakki calla ikkikkinni ‘hedokkino’ agarannohe gede huuccatto assiꞌri.—Fil. 4:6, 7. w22.01 29-30 guf. 12-14

Moote Ooziya amaale macciishsha giwino. Isi kakkalaasine calla eꞌara fajjinoonniwa qullaawu mini kifile eꞌꞌe hixaana giirate woꞌnaalino. Yihowa kakkalaasine iso togo yitino: “Ooziya! Kaaliiqira hixaana giira ate looso diꞌꞌikkitino. Konne coye assitara baxxitinore qeesoota . . . calla worroonni.” Ooziya maa assiyya? Isi umosi heeshshi asse amaale macciishshe qullaawu mininni bayichonko agure fuloommero Yihowa gatona yaasira dandaanno. Ooziya kayinni ‘hanqino.’ Isi amaale macciishshe adha giwinohu mayiraati? Ooziya moote ikkino daafira hasiꞌrire baala assa dandaannoha lawinosi. Yihowa kayinni isi assinore dibaxino. Ooziya booꞌnannota leellishannore assino daafira gogu dhibbinni amadamino; isi “reya geeshsha taraawannohu gogu dhibbi aanisinni dihoꞌlino.” (2 Dud. 26:16-21) Ooziya xaggenni, ayeno ikkinummoro Qullaawu Maxaafi aana xintantino amaale macciishshine adha gimbeemmoha ikkiro Yihowa hagiirsiisa dandiineemmokkita ronseemmo. w22.02 9 guf. 7

“Akkala mannimma” noosi manchi hedannohunna assannohu maalu loosooti. (Qol. 3:9) Togoo manchi umosi calla baxannoha, hanqoho muddamannoha, galatannokkihanna naaxxannoha ikkara dandaanno. Qoleno teeda baꞌino misilla hattono amanyoote baꞌino woy finqille batidhino filme laꞌꞌa baxannoha ikkara dandaanno. Isira mite dancha akatta heedhannositi dihuluullissannote; qoleno coyiꞌrinohu woy assinohu bushu coyira gaabbannoha ikkara dandaanno. Kayinni isira hedosinna assootesi biddi assiꞌrate hasatto dinosi. (Gal. 5:19-21; 2 Xim. 3:2-5) Guuntete xeꞌne noonkere ikkinoommo daafira busha hedonna halcho baala wodaninkenna surrenke giddonni woꞌmunni woꞌma hooꞌla didandiineemmo. Mito woyite, gedensoonni gaabbisannonkere assinammora woy coyiꞌnammora dandiineemmo. (Erm. 17:9; Yai. 3:2) Kayinni akkala mannimma mulqine tungummoro maalu hasattonna assooti diwaadannonke. Hakkuyi gedensaanni ayimmanke soorrantanno.—Isa. 55:7. w22.03 3 guf. 4-5

Cimeeyye ammanate roduuwikkira noonsata dancha akatta illachishate sharrantanno. Baalunku ammanate roduuwinke guuntete xeꞌne noonsareeti; kayinni mittu mittunkura naandeemmonsa gede assitanno akatta noonsa. Songote cimeeyye mito woyite ammanate roduuwansa amaala hasiissannonsa. Ikkirono cimeeyye soqqamaasinchu Phaawuloosi gede, roduuwu coyidhinohanna assitinoha hanqisanno coye illachishshannokki gede sharrama hasiissannonsa. Hatteentenni insa mittu mittunku rodii Yihowa baxanno gara, Maganoho cince soqqamanni noo garanna assannoha dancha coye illachishshanno. Ammanate roduuwinsaha dancha akata illachishshanno cimeeyye songote giddo hagiirrunna baxillu woꞌmanno gede assitanno. Yihowa guuta ikka hasiissannoꞌne yiinokkita qaagge; isi ammanantinoonnire ikkitinara hasiꞌranno. (1 Qor. 4:2) Maganoho soqqamate assitinanniri iso hagiirsiisannota addaxxa dandiitinanni. Yihowa “loosoꞌnenna albano ikko xaano qullaawa manna kaaꞌlatenni leellishshinoonnisi baxille dihawanno.”—Ibi. 6:10. w22.03 31 guf. 19, 21