Bocaasa

Yihowa wole dooggannino irkisannonke. Soqqantanni heedhe xaadootto manni ayirrinye bainore coyiꞌrirono Yihowa wodanaaꞌmatto gede kaaꞌlinohe. Qoleno, hasatto noosi manchira malino qummeeshsha qaagge kulatto gedeno kaaꞌlinohe. Hakkiinni saeno, soqqanshote qoqqowiꞌnera noo manni macciishsha giwirono, soqqama agurattokki gede jawaante uyinohe. (Erm. 20:7-9) Yihowa soqqanshote qajeelsenkeno danchummasi leellishinonke. Kiristaanu Heeshshonna Soqqansho gambooshshiwa, manna danchu garinni hasaawisa dandiineemmo gara leellishshanno viidiyubba shiqqannonke; qoleno hakkiinni ronsoommore soqqanshote horoonsiꞌneemmo gede jawaachinshoonninke. Haaro coye woꞌnaala umi qara waajjinammora dandiineemmo; ikkollana, haarote ronsoommo doogonni sabbakate woꞌnaalleemmo woyite, qooxeessinkera noo manni macciishshannota wodanchineemmo. Qoleno, songotenna qoqqowu gambooshshiwa, miteekkine konni albaanni horo sabbanke egenninoommokki doogonni sabbankeemmo gede jawaachinshanninke. Hattee doogganni sabbakano umi qara waajjineemmoha ikkara dandaanno; ikkirono, hatto assate woꞌnaalleemmo woyite, Yihowa maassiꞌrannonke. w21.08 27 guf. 5-6

Soqqamaasinchu Phaawuloosi Qorontoosi Kiristaanira borreessino sokkara insa kaajjishe amaalino. Isi hatte sokka borreessihu gedensaanni Tiito insawa soyino. Isi soyinonsa sokka macciishshite adhitinota afiti lowo geeshsha hagiidhino! (2 Qor. 7:6, 7) Cimeeyye ammanate roduuwinsa ledo yanna sayisse Phaawuloosi lawishsha harunsa dandiitanno. Togo assa dandiitannoti mitte doogo ammanate roduuwinsa ledo dancha gede hasaawate gambooshshe yannantenni haꞌrate. Jawaante hasiissannonsa roduuwa jawaachishate duucha woyite hasiisannohu shiima daqiiqaatilla. (Rom. 1:12) Phaawuloosi lawishsha harunsanno cimeessi roduuwisi ammana kaajjishate Maganu Qaale horoonsiꞌre jawaachishannonsa; hattono Maganu baxannonsata buuxisannonsa. Isi afiꞌri faro baalate galatannonsa. Mittu cimeessi roduuwa amaala hasiissannosi woyite amaalesi Maganu Qaali aana xintantinota ikka hasiissannose. Isi roduuwu amaalesi macciishshitara hasiꞌranno daafira xawise kayinni shaqqillunni amaalannonsa.—Gal. 6:1. w22.03 28-29 guf. 11-12

Yihowa xaa yannara mannisi isira ammaname soqqamanni heeꞌranno gede “jawa wolqa” aannonsa. Yihowa ninke jawaachishate horoonsiꞌranno doogga giddo mitte huuccattote. Efesooni Sokka 6:18te soqqamaasinchu Phaawuloosi Magano ‘Woꞌmanka woyite huuccidhe’ yee amaalinonke. Maganuno jawaante aannonke. Mito woyite gurchaambammora woy mayine huucciꞌneemmoro afa hoongammora dandiineemmo. Kayinni Yihowa giddonketa isira fushshine kuꞌla qarra ikkitunkero nafa, huucciꞌneemmo gede koyisinonke. (Rom. 8:26, 27) Isi Qullaawu Maxaafi widoonnino jawaachishannonke. Phaawuloosi Qullaawa Borronni jawaantenna shesho afiꞌrinte gede ninkeno Maganu Qaalinni jawaantenna shesho afiꞌra dandiineemmo. (Rom. 15:4) Maganu Qaale nabbambeemmonna hiincineemmo woyite, Yihowa qullaawa ayyaanasi horoonsiꞌre Qaalisi kaaꞌlannonke gara leellishankera dandaanno.—Ibi. 4:12. w21.05 22 guf. 8-10

Manna rosaano assate looso hasiꞌnoommo geeshsha loonseemmokki gede guficho ikkannonkeri tuncu yiinkerono konne looso mulluri gede assine dilaꞌneemmo. Hasiꞌnoommo geeshsha soqqama dandiineemmokkiha ikkara dandaanno. Lawishshaho mito roduuwa geedhimma woy dhibbu waadannonsa. Ateno togoori waadannohe? Hatto ikkiro, elektirooniksete uduunnicho horoonsiꞌne Qullaawa Maxaafa danchu garinni xiinxallisa dandiineemmota ronsoommo! Hakko daafira minekki heedhenni Qullaawu Maxaafi xiinxallo hanafiisiisanna xiinxallisa dandaatto; hatto assa roore shota ikkitahera dandiitanno. Xiinxallisa dandiineemmoti wole farono noonke. Mitootu Qullaawa Maxaafa xiinxalla hasidhannoha ikkirono roduuwu sabbakkanno yannara insara diꞌꞌinjaannonsa. Insara soodo guto woy hashsha injaansara dandaanno. Togoo manna insara injiitannonsa yannara xiinxallisate mitore biddi assiꞌra dandaatto? Yesuusi Niqoodimoosi rosiisinohu hashshaati; isi rosa hasiꞌrinohu hatte yannaraati.—Yoh. 3:1, 2. w21.07 5 guf. 10-11

Cuuaanchu Yohaannisi rosaano, Yesuusi rosaano xoontannokki daafira gurchaabbino. Yesuusi, isi ledonsa noo geeshsha xooma hasiissannonsakkita xawisino. (Mat. 9:14-17) Farisootunna Yesuusa gibbannori kayinni isi budensanna wodhonsa harunsinokki daafira effidhe gibbinosi. Isi Sambatu barra dhiwantinore hursita lowo geeshsha hanqitino. (Maq. 3:1-6; Yoh. 9:16) Insa kaꞌaanni Sambata ayirrinseemmo yitanni kaꞌaanni kayi qullaawu mini giddo daddaꞌlitanno. Yesuusi tennera rufinsata hanqite giira kaxxitino. (Mat. 21:12, 13, 15) Yesuusi Naaziretete noohu xaadu mine sabbakanni heeꞌre, umonsa calla baxxannorenna ammana noonsakkire ikkitinota leellishate, insa hasatto ledo sumuu yaannokki lawishsha horoonsiꞌrita hanqite fooggaltino. (Luq. 4:16, 25-30) Batinyu manni Yesuusi insa heddino gede ikka hoogino daafira gufiꞌrino woy iso macciishsha giwino.—Mat. 11:16-19. w21.05 5-6 guf. 13-14

Yihowa naaxxanna hafuurre qorophineemmo gede jawaachishannonke doogga giddo mitte, wolootu lawishsha laꞌne ronseemmo gede asseeti. Hafuurrete daafira hendeemmo woyite Sheexaane Daawuloosi qaangeemmoha ikkara dandaanno. Sheexaanu alba Yihowa sokkaasincho ikkino daafira, lowoti dancha qoosso noosiha ikkikki digatino. Ikkirono isi tennenni kassi diyiino. Isi Yihowara calla hasiissanno magansiꞌra yorino. Sheexaanu isi gedeere ikkinammora hasiꞌranno daafira, noonkerinni kassi yineemmokki gede assate woꞌnaalanno. Isi tenne assa hanafinohu Heewani hasaawisi woyiteeti. Yihowa Heewaniranna minaannisera baxillunni, falakkinotanna kassi assitanno sagale uyinonsa; insa mitte haqqicho agurranna “Edeni Gennetete noo haqqe baalate laalo ita” dandiitanno. (Kal. 2:16) Ikkirono Sheexaanu, Heewani hoolloonni haqqicho laalo ita hasiissannosehu gede assite heddanno gede asse soꞌrisiisinose. Heewani nooserinni kassi yitinokki daafira wolere halchitino. Tini maa abbitinoro anfoommo. Ise cubbo loossino hattono gedensoonni reyitino.—Kal. 3:6, 19. w21.06 14 guf. 2-3; 17 guf. 9

Addaaminna Heewani ooso iltanno hattono qaensa ikkitino baatto towaattanno. Addaaminna Heewani Maganoho hajajante yiinonsare assitinoha ikkoommero, insano oosonsano hegerera Maganu maate wido ikkite heeꞌra dandiitanno. Addaamiranna Heewanira Yihowa maate giddo ayirradu qeechi noonsa. Daawiti Faarso 8:5 aana, Yihowa kalaqo ikkinohu manchi beetti daafira togo yiino: “Sokkaasinetewiinni shiimare ajishshe, ayirrinyunna galatu baꞌlatto woroottosi.” Hige mannu oosora sokkaasinennite geeshshi wolqa, egennonna dandoo diuyinoonninsa. (Far. 103:20) Ikkirono, mannu ooso kuri wolqaataamma ayyaanu kalaqonni ‘shiimarella ajjanno.’ Hige ma assinanni, Addaaminna Heewani Yihowa maate giddo noonsa qeecha huꞌnino. Insa assooti oosonsano baasa gawajjino. Ikkirono, Yihowa hedinore diagurino. Isi, hajajamanno manni hegerera oososi ikke heeꞌrara hasiꞌrino. w21.08 2-3 guf. 2-4

Xaa yannara batinye Yihowa magansiꞌranno manna gimbanninsa. Lawishshaho mite Yihowa Farciꞌraasine loosonke hoolloonni gobbuwara heedhanno. Insa usurransara hattono “gashshaanonniwanna mootoollanniwa” massinanninsaha ikkara dandaanno; hattono kuri roduuwi insara farcidhara dandiitanno. (Mat. 10:17, 18) Wolu roduuwinkera kayinni kowii baxxino qarri iillannonsa. Insa heedhannohu Yihowa faajjetenni magansiꞌra hoolloonnikki gobbara ikkirono Yihowara soqqantannota hoola hasidhannori maatensa miilla gibbannonsa. (Mat. 10:32-36) Duucha woyite, Yihowa Farciꞌraasine ikkino fiixinsa hexxo mudhanno gede assate woꞌnaaltannori tenne assansa mulla daafuro ikkitinota affuro insa giwa agurtanno. Alba Yihowa Farciꞌraasine effiꞌre giwannohu mitu manni xa Yihowara diinaggaawe soqqamannoha ikkino. Mannu giwannohe woyite hexxo mudhitooti! Worba ikki. Yihowanna wolqaataamu qullaawu ayyaanisi ledokki noo daafira waajjatto gede assannoheri mitturino dino! w22.03 16 guf. 8

Qullaawu Maxaafi, Yihowa ‘booꞌnaleette ille, kaphaancho arrawonna keeraancho manna shitanno anga’ giwannota kulanno. (Law. 6:16, 17) Qoleno isi ‘mararro nookkirenna xagaraamma hashakkiꞌre giwanno.’ (Far. 5:6) Yihowa togoo akattanna assoote lowo geeshsha giwanno daafira, Nohi waro uullate aana finqille batidhanno gede assino manna baala gudise hunino. (Kal. 6:13) Yihowa masaalaanchu Milkiyaasi widoonnino, adhamansa diigge xagarrotenni beebbaataame minaamansa fushshite haꞌrissannore giwannota coyiꞌrino. Yihowa togoo manni magansiꞌra diadhanno hattono assitinorira xaꞌmannonsa. (Mil. 2:13-16; Ibi. 13:4) Yihowa ‘busha coye effiꞌne gimbammora’ hasiꞌranno. (Rom. 12:9, NW) ‘Effiꞌre giwate’ yaa mitto coye horo giwate woy shagaggiꞌrate. Hakko daafira Yihowa bushaho yiino coye assa agurina heda nafa shagaggiꞌne giwa hasiissannonke. w22.03 4-5 guf. 11-12

Muli yannara iimi Anninke Mangistesi widoonni falahino atoote duushshannonke. Yihowa cincite agadhitannori xaano ikko dagganno alamera afidhanno atooti baete. Maganu manni haaro alame eanno woyite, xa yaachishanni noonsa qarrinna shetto baala higgeno diheedhanno. Miiconna xisso baꞌanno. (Aju. 21:4) Hasiisannonkeri baaluri woꞌmannonke daafira, mittu coyirano diyaandeemmo. (Far. 72:16; Isa. 54:13) Addanko kuni lowo atooteeti! Hakka geeshsha kayinni, Yihowa busha gadenke qeeꞌlineemmo gedenna iso hagiirsiissanno akatta lossiꞌneemmo gede kaaꞌle, gashshootisi giddo heeꞌnammora qixxeessanni noonke. Konni daafira, horonta hexxo mudhitinoonte. Dancha yanna mulenni dagganno! Kaajja hexxo albankeenni noo daafira, Yihowa loososi jeefo gana geeshsha iso cincine agadha agurroonke! w21.08 13 guf. 17-19

Soqqamaasinchu Phaawuloosi soyinoti tini sokka iillitunsahunni shiima yanna gedensaanni Yihudu Kiristaani minensa, daddaꞌlitanni noo daddalo, hattono Kiristaana ikkinokki fiixansa agurte ‘ilaallate widira higge xooqa’ hasiissinonsa. (Mat. 24:16) Hatte yannara insa mimmito rakke kaaꞌla hasiissinonsati dihuluullissannote. Isa hakkuyira albaanni, noonsare wolootu ledo beeqqite Phaawuloosi amaalino amaale loosu aana hosiissinoha ikkiro, martinowa haaro heeshsho rosa qarra diꞌꞌikkitannonsa. Roduuwinke mayi hasiisannonsaro duucha woyite kula hooggankera dandiitanno. Hakko daafira huxuxxi yinikkinni shinqannire ikke. Songoꞌne giddo, woꞌmanka woyite woloota kaaꞌlate qixxaabbino roduuwi noota affinoonniti dihuluullissannote. Kuri roduuwi qarrinsanni heeꞌnoommonsahu gede assine hendammora dihasidhanno. Kaaꞌlo hasiissannonke woyite kaaꞌlitannonketa anfoommo; ninkeno insa gedeere ikka hasiꞌneemmo! w22.02 23-24 guf. 13-15

Muli diri kawa batinye songuwa wole songuwa ledo karsantanno gede assinoonni; hakko daafira mite songuwa bashshonsa worada agurte wolu woradi wido ikkitino. Wole songo haꞌneemmo gede kullinkero, jaallankenna maatenke noo songo agurre haꞌra qarra ikkitankera dandiitanno. Songote cimeeyye mitto mittonka halashshaancho hiitte songora gaantannoro, Maganu biddishsha aannonsani? Diaannonsa. Hakko daafira togoo biddishsha uyinanninke woyite hajajama qarra ikkitankera dandiitanno. Songote cimeeyye togoo coye murtanno woyite Yihowa ammanannonsa; ninkeno insa ammana hasiissannonke. Songote cimeeyye murtino coyi ninke hasiꞌneemmo gedeeha ikka hoogiro nafa sumuu yaanna kaaꞌlama hasiissannonkehu mayiraati? Togo assinummoro Maganu manni mereero noo mittimma baꞌannokki gede kaaꞌlineemmo. Songote giddo noohu baalunku cimeeyye murtino coyira maahoyye yee galannoha ikkiro songo kaajjitanno. (Ibi. 13:17) Yihowa ninke towaattara shoominorira hajajammeemmoha ikkiro baalunkunni roore iso addaxxineemmota leellinsheemmo.—Soq. 20:28. w22.02 4-5 guf. 9-10

Ati cuuamootto rodootiro, coyiꞌratenna rosiisate dandookki woyyeessiꞌrate sharrama dandaatto. Mayira? Nabbawate, coyiꞌratenna rosiisate ‘diinaggaawattoha’ ikkiro, macciishshanno manni lowo horo afiꞌranno. (1 Xim. 4:15) Nabbawatenna Rosiisate Dandiittore Baala Assi yitanno birosherera noota mitte mittenta xiinxallote naxiwe nabbawatenna harunsate mixo fushshiꞌri. Mitte higge mitte naxiwe calla xiinxalli, hattenne hedo mine rosiisiꞌri, hattono kifile shiqishatto woyite hattee amaale harunsi. Kaaꞌlaancho amaalaancho woy “qaale kultanninna rosiissanni [daafurtannore wole] cimeeyye” amaale xaꞌmiꞌri. (1 Xim. 5:17) Birosherete giddo kulloonni hedo huwatate calla ikkikkinni, macciishshanno manni ammana kaajjitanno gede kaaꞌlatenna insa loosoho kakkayisate sharrami. Hatto assittoro, atehuno insa hagiirrino lexxanno gede assatto. w21.08 24 guf. 17

Wolootu ninkenni roortinohu gede assine hendeemmoha ikkiro, ninketenni roortino dandoo woy ogimma noonsari ledo dihettisammeemmo. Hatteentenni togoo dandoo noonsa daafira hagiidhineemmo. Hakko iso dandoonsa Yihowara soqqamate horoonsidhanni nooha ikkiro roore hagiidhineemmo. Hatto ikkiro baalunku songote giddo keerunna mittimma heedhanno gede assineemmo. Dhukanke anfoommoha yaano assa dandiineemmokkiri noota huwanteemmoha ikkiro hinaasate akata gargadha dandiineemmo. Dhukanke anfoommore ikkinummoro wolootunnitenni roortino dandoo noonketa mannaho leellishate disharrammeemmo. Hatteentenni ninketenni roortino dandoo noonsariwiinni rosate woꞌnaalleemmo. Lawishshaho hanni mittu rodii songote giddo lallawo dancha gede shiqishanno yine hendo. Isi lallawo qixxaawannohu hiittoonniitiro xaꞌma dandiineemmo. Mitte rodoo sagale coommishshe qishidhannoha ikkiro coomishidhinohu hiitto assiteetiro xaꞌma dandiineemmo. w21.07 16 guf. 8-9

Kiirote maxaafira, Yihowa mittu Israeelichi Sambatunni haqqe hiiqqiꞌrino daafira shinanni gede hajajinota kulloonni. Lowo diri gedensaanni layinki Saamueeli maxaafira, Yihowa Moote Daawiti foorinohanna lubbo shiinoha ikkirono maarinosita kulloonni. (Kir. 15:32, 35; 2 Sam. 12:9, 13) ‘Yihowa shiima lawanno cubbo loosino mancho shinanni gede hajaje, foorinohanna lubbo shiinoha Daawiti maarinohu mayiraati?’ yine hendeemmoha ikkara dandaanno. Qullaawu Maxaafi mitte xagge daafira woꞌmankare tittire kulannokki woyiti no. Lawishshaho, Daawiti loosino cubbira addinta maaro einota anfoommo. (Far. 51:2-4) Kayinni Sambatu seera diigi manchina? Isi assinorira gaabbino? Hakkuyira albaanni Yihowa seera diigino? Kuni manchi hakkuyira albaanni qorowisiinseennasi lashshi assino woy giwino? Qullaawu Maxaafi tenne daafira kulannori dino. Ikkirono, Yihowa “assanno coyi baalunku halaalaancho” ikkinota seekkine anfoommo.—Far. 145:17. w22.02 2-3 guf. 3-4

Dhukasi afino manchi, wolqasira aleenni ikkinore assate dihedanno. Konninni kainohunni, hagiirraamo ikke heeꞌranno, hattono loosisinni dancha guma afiꞌranno. Dhukasi afino mancho, biskilliite gulufe haꞌranni heeꞌre buusu noowa iillino manchi ledo heewisiisa dandiineemmo. Kuni manchi hakkoye laga fulate biskilliitete aaninni dirra hasiissannosi. Isi hakkawoyite umi gede rahe rahe haꞌrannokkiti egennantinote; ikkirono alba hige haꞌra diaguranno. Hatteente gede, dhukasi afino manchi Yihowara soqqamanninna woloota kaaꞌlanni heeꞌrate mitore biddi assiꞌra hasiissannosihu mamooteetiro afino. (Fil. 4:5) Hanni Barzilayi lawishsha laꞌno; Moote Daawiti iso mootete mine amaalaanchosi ikkara koyisisi woyite 80 diro ikkannosi. Barzilayi kayinni dhukasi afinoha ikkino daafira, maahoyye diyiino. Garire asse afannokkita afino daafira, isi bayicho aju beetti Kimihaami haꞌriro woyyannota coyiꞌrino. (2 Sam. 19:35-37) Barzilayi gede, geerru roduuwino looso wedellu labballi loossanno gede hagiirrunni uyitanno. w21.09 10 guf. 6-7

Yihowa shaqqadu Anni gede assite heda qarrissannohe? Ninke giddo mitootaho tini qarrissannonke. Ilinonke anni baxille leellishikki lossinonkeha ikkiro, baxillaancho anna yinanniri leella giwankera dandaanno. Yihowara kayinni qarrinke leellannosita afanke lowo geeshsha sheshifachishshannonke! Yihowa, isiwa shinqammora hasiꞌranno. Qaalisi “Maganunniwa shiqqi yiiyye; isino kiꞌnewa shiqqi yaanno” yee jawaachishannonkehu iseraati. (Yai. 4:8) Yihowa lubbora baxannonke; qoleno taalle nookki Anna ikkannonketa coyiꞌrino. Yesuusi, Yihowawa albinni roore shinqeemmo gede kaaꞌlannonke. Yesuusi Yihowa seekke egennino; qoleno akattasi woꞌmunni woꞌma leellishino. Hakko daafira, “Ane afinohu annaꞌyano afino” yiino. (Yoh. 14:9) Yesuusi bayiru rodii gede ikke, Annanke ayirrisanna isira hajajama dandiineemmo gara, Annanke dadillisanno coyiwiinni xeertiꞌra dandiineemmo gara, hattono Iso hagiirsiisa dandiineemmo gara rosiisannonke. Roorenkanni kayinni, Yesuusi uullate aana heeꞌrino heeshsho Yihowa mageeshshi geeshsha shaqqadohoronna baxillaanchohoro leellishshanno. w21.09 21 guf. 4-5

Yihowa manni mitto ikke mitto halaalaancho Magano magansiꞌranni no. Cimeeyye songote keeraanchimma agartanno gede Yihowa jawa qeecha uyinonsa. Mittu Kiristaanchi jawa cubbo loosiro, Yihowa cimeeyye kuni manchi songotenni bohama hasiissannosironna teꞌee murtara hasiꞌranno. Cimeeyye assitanno coyi giddo mittu, cubbo loosino manchi addinta maaro einoronna teꞌee buuxate. Isi maaro eoommo yaara dandaanno; kayinni loosinoha busha coye addinta giwino? Konne cubbo wirro loosannokki gede murciꞌrino? Isi cubbo loosanno gede assitinositi busha hoshsha ikkitinoha ikkiro, togoo hoshsha agurate maahoyye yiino? Songote cimeeyye huuccatto assidhe Qullaawa Borro tenne hajo daafira yitannore buuxxanno; hattono cubbo loosino manchi loosino soꞌrora noosi lao huwatate woꞌnaaltanno. Hakkiinni kuni manchi songote miila ikke heeꞌrannoronna teꞌee murtanno. Mito woyite insa togoo manchi songotenni bohamanno gede assitara dandiitanno.—1 Qor. 5:11-13. w22.02 5 guf. 11-12

Muli barri giddono ikko lowo diri albaanni cuuammoommori, ninke baalunku Yihowa baxanno gedee akati heeꞌrankera hasiꞌneemmo. Hattoo akati heeꞌrannonke gede, hendeemmo gara qoropha hasiissannonke. Mayira? Korkaatuno roore anga ayimmanke seekkannohu woy hunannohu hendeemmo garaati. Duucha woyite ninkeneeto hagiirsiisate daafira hendeemmoha ikkiro bushare coyiꞌnammoranna assinammora dandiineemmo. (Efe. 4:17-19) Surrenke giddo danchuri woꞌmanno gede assiꞌnummoro kayinni Annanke Yihowa hagiirsiisannore coyiꞌranna assa dandiineemmo. (Gal. 5:16) Ikkollana, mitteno busha hedo surrenke giddora eꞌannokki gede assiꞌra didandiineemmo. Kayinni tini hedo bushare assineemmo gede assitannonketa hooꞌla dandiineemmo. Cuuammammora albaanni Yihowa giwannore coyiꞌranna assa agura hasiissannonke. Akkala mannimma mulqe tugate tini hanafotenna lowo geeshsha hasiissannote. Woꞌmunni woꞌma Yihowa hagiirsiisate haaro mannimmano uddiꞌra hasiissannonke. w22.03 8 guf. 1-2

Mittu jawa cubbo loosino manchi addinta maaro einotanna teꞌee bade afa songote cimeeyyera shota looso diꞌꞌikkitino. Mayira? Cimeeyye mannu wodanira noore afa didandiitanno; hakko daafira, insa cubbo loosino rodii loosino cubbo addinta giwa rosinota leellishshanno taje afiꞌrate woꞌnaaltanno. Cimeeyye konni manchi lao, hedosinna amanyootisi addinta soorraminota leellishshanno taje afiꞌra hasiissannonsa. Kuni manchi addinta maaro einota leellishannore assate seeda yanna hasiissannosiha ikkara dandaanno. Bohamino manchi addinta maaro einota leellishate, songote gambooshshe ganye daa, hattono woꞌmanka woyite huuccatto assiꞌranno gedenna Maganu Qaale ganye xiinxallanno gede cimeeyye uyitinosi amaale harunsa hasiissannosi. Qoleno cubbu widira massannosi coyiwiinni xeertiꞌrate sharrama hasiissannosi. Yihowa ledo noosi jaalooma qoꞌlate dandaamisire baala assiro, Yihowa cubbosi gudise maarannositanna cimeeyyeno songo higanno gede kaaꞌlitannosita addaxxa dandaanno. w21.10 6 guf. 16-18

Yesuusi Yihowa lubbora baxanno daafira, iima noo warono ikko uullate aana daye heeꞌri yannara iso calla magansiꞌrino. (Luq. 4:8) Rosaanosino Yihowa calla magansidhanno gede rosiisino. Yesuusino ikko ammanantino rosaanosi magansiꞌrate misilla horoonsidhe horo diegentino. Maganu Ayyaana ikkino daafira, mannu ooso loossannohu aye coyino Maganu ayirrinye leellishara horo didandaanno! (Isa. 46:5) Ikkina mannu qullaawootaho yee hedanno manni misile kayisanna insa huucciꞌrate daafira mayyaa dandiinanni? Yihowa Tonne Hajajo giddo layinkitera techohu barru qummeeshshira noo hedo coyiꞌrino. Magano hagiirsiisa hasidhannori, isi misile magansiꞌnammora hasiꞌrannokkita affino. Xaggete xiinxallaano, hundi Kiristaani Magano calla magansiꞌrannota buuxxino. Yannankera Yihowa Farciꞌraasineno umi xibbi diri Kiristaani lawishsha harunsitanno. w21.10 19-20 guf. 5-6

Yesuusi umi xibbi diro Yihudaho heeꞌranno Kiristaana, “Yerusaalame diinu gaaddo doyissite” amaddanno yanna daggannota kule qorowisiisinonsa. (Luq. 21:20-24) Kuni coyi ikkanno woyite insa ‘ilaallate widira higge xooqa’ hasiissannonsa. Insa xooqquro heeshshonsa gatisidhanno; kayinni lowo coye agurte xooqa hasiissannonsa. Boodu diri albaanni fultinoti mitte Agarooshshu Shae togo yitino: “Insa gatensanna minensa agurte xooqqino; wole agurina minensa noo uduunne nafa diadhitino. Insa Yihowa agarannonsatanna kaaꞌlannonsata addaxxite, lowo geeshsha hasiisannonsaha lawanno coyinni roore Yihowa balaxisiissino.” Aleenni kulliti Agarooshshu Shae ledde togo yitino: “Albillitte maalaamittete coyira noonke lao hiittootero leeltanno gede assanno fonqoli iillankera dandaanno; maalaamittete coye roorsiꞌneemmonso Maganoho ammanamme heeshsho afiꞌra roorsiꞌneemmo? Goofimarchu daanno woyite, iillannonke qarra dandiine saꞌꞌanna mito coye facci assine agura hasiissannonkeha ikkara dandaanno. Hakko daafira dandiinummore baala assate qixxaawa hasiissannonke.” w22.01 4 guf. 7-8

Israeele Gibitsetenni fultuhunni shiima yanna gedensaanni, Yihowa Musera suꞌmasinna akattasi kule ayimmasi xawisinosi. Togo yiinosi: “Ani Kaaliiqi [Yihowa, NW] maareemmohonna hanqoho muddameemmokkiho; mararaancho Maganooti; ammanamaꞌyanna bagamannokkihu baxilliꞌya batiꞌraho.” (Ful. 34:6, 7) Yihowa tenne jawaachishshanno hedo coyiꞌre, Musera bagamannokki baxillisi baxxinoha ikkinota kulinosi. Kuni baxilli maati? Yihowa bagamannokki baxilli noosita calla ikkikkinni, ‘bagamannokki baxillisi batiꞌra’ ikkinota xawisino. Tenne yaatto Qullaawu Maxaafi giddo wolewa lee bayichono qummi assinoonni. (Kir. 14:18; Neh. 9:17; Far. 86:15; 103:8; Iyu. 2:13; Yon. 4:2) Baalante basera tenne yaatto horoonsiꞌnoonnihu Yihowara callaati; mannaho tenne yaatto horo dihoroonsiꞌnoonni. Yihowa bagamannokki baxillesi konni garinni luphi asse kulasi dhagge diꞌꞌikkitanno? w21.11 2-3 guf. 3-4

Minaannuwunna minaamuwu soqqamaasinchu Pheexiroosinna minaamasi lawishshinni rosa dandaanno. Pheexiroosi umo Yesuusinni xaadinkunni lewu aganinni kayisse mittu diri geeshsha ikkitanno yanna gedensaanni, lowo geeshsha hasiisanno doorsha doodha hasiissinosi. Pheexiroosi qulxuꞌme woshshaaxxe galinoho. Isi, Yesuusi woꞌma yanna iso harunsanno gede koyisisita maatesi daafira heda hasiissinosi. (Luq. 5:1-11) Minaamasino isi doodhino doorshira sumuu yitinoti dihuluullissannote. Qullaawu Maxaafi, Yesuusi reyotenni kaihu gedensoonni, Pheexiroosi minaama, Pheexiroosi ledo mitowa hadhinota qummi assanno. (1 Qor. 9:5) Pheexiroosi Kiristaana ikkino minaannuwanna minaamuwa amaali woyite afoo wonshe coyiꞌrinohu minaamasi dancha lawishsha ikkitinohuraati. (1 Phe. 3:1-7) Pheexiroosinna minaamasi, insa Maganu Mangiste balaxisiisi geeshsha Yihowa hasiisannonsare wonshannonsata addaxxannota leellishino.—Mat. 6:31-34. w21.11 18 guf. 14

Soqqamaasinchu Phaawuloosi ammanate roduuwasi lowo geeshsha baxanno. Isi insa towaatate diinaggaawe loosino. (Soq. 20:31) Ammanate roduuwisi Phaawuloosi lowo geeshsha baxxannohu iseraati. Mitte yannara, Efesooni songora heedhanno cimeeyye galagalte isinni xaaddannokkita affuti iso “cuꞌmidhe wiꞌlitino.” (Soq. 20:37) Diinaggaabbe loossanno cimeeyyeno ammanate roduuwansa lowo geeshsha baxxanno hattono insa kaaꞌlate dandiiture baala assitanno. (Fil. 2:16, 17) Ikkirono mito woyite cimeeyyete qarra ikkanno coyi tuncu yaannonsa. Insa konne qarra dandiite saꞌanno gede kaaꞌlannonsari maati? Diinaggaabbe loossannori songonke cimeeyye Phaawuloosi lawishsha xiinxalla dandiitanno. Phaawuloosino ninke gedee manchootilla. Isino guuntete xeꞌne noosi mancho ikkino daafira gara ikkinore assate mito woyite sharrama hasiissinosi. (Rom. 7:18-20) Isira addi addi qarri iillinosi. Kayinni Phaawuloosi hexxo dimudhino hattono hagiirrisi dibaino. Songote cimeeyye Yihowara soqqantanno woyite, Phaawuloosi lawishsha harunsite iillannonsa qarra dandiite saꞌꞌanna hagiirrinsa baꞌꞌannokki gede assiꞌra dandiitanno. w22.03 26 guf. 1-2

Leewaawoota 19:3 Sambata ayirrisate daafira kultanno. Ninke Kiristaanu Muse Seerinni galleemmokki daafira Sambata ayirrisa dihasiissannonke. Ikkirono Israeele Sambata ayirrissannohu hiittoonniitironna togo assansanni mayi horo afidhinoro xiinxalline lowore ronseemmo. Sambatu Israeele loosonsa agurte fooliishshidhannohonna ayyaanaamittete coye illachishshanno barraati. Yesuusi Sambatu barra, lophino katamira noohu xaadu minira haꞌre Maganu qaale nabbawinohu iseraati. (Ful. 31:12-15; Luq. 4:16-18) Maganu Leewaawoota 19:3te “Fooliishshote Barra agadhe” yee hajajino hajajo, barru dilgonke giddonni yanna gaaꞌmine, albinni roore ayyaanaamittete coye illachinsheemmo gede kakkayissannonke. Tenne daafira mito coye biddi assiꞌra hasiissannoheha lawannohe? Ayyaanaamittete coye assate woꞌmanka woyite yanna gaaꞌmattoha ikkiro, Yihowa ledo noohe jaaloomi lexxanno; tini qolte qullaawa ikkate hasiissannote. w21.12 5 guf. 13

Yesuusi uullate aana noo yannara baalunku gari manniwa aanino. Isi dureeyyetenna silxaane noonsari ledo sagale itinoha ikkirono, roore yanna sayisinohu kayinni buxanetenna hawaaxaammu ledooti. Qoleno isi mannu “cubbaataammu” gede asse laꞌꞌannore mararino. Insaneeto keeraanote gede asse laꞌꞌannohu mitu manni Yesuusi assinorinni gufiꞌrino. Insa Yesuusi rosaano “Qaraxaasinetenna cubbaataammu ledo ittinannihunna agginannihu mayiraati?” yite xaꞌmitino. Tennera Yesuusi techohu barru qummeeshshira noo dawaro qolino. (Luq. 5:29-31) Mesihichu daara lowo dirira albaanni masaalaanchu Isayaasi iso alame gibbannota masaalino. Isi togo yee masaalino: “Mannu mishinosihonna giwinosiho; . . . Mannu mishe alba shawwu yiinosi; ninkeno diayirrinsoommosi.” (Isa. 53:3) Mannu Mesihicha ‘giwannota’ masaalotenni kulloonni daafira, umi xibbi diro heeꞌrinohu Yihudu manni Yesuusa gimbannita heda hasiissannonsa. w21.05 8-9 guf. 3-4

Hundi waro heeꞌrinohu mitu Kiristaani amaalloonninsa amaale rahe diharunsannoho. (Yai. 1:22) Wolootu kayinni dureeyyete roorsidhannoreeti. (Yai. 2:1-3) Mitootaho kayinni arrawo eemadha qarra ikkitinonsa. (Yai. 3:8-10) Kuri Kiristaanira lowo qarri noonsaha ikkirono, Yaiqoobi kayinni hexxo mudhe insa kaaꞌla diagurino. Isi shaqqillunni kayinni xaaddotenni amaalinonsa; hattono ayyaanaamittete jawaante hasiissannonsari, cimeeyye kaaꞌlo xaꞌmidhanno gede jawaachishinonsa. (Yai. 5:13-14) Maa ronseemmo? Wolootu qarri leelloꞌne hattono insa daafira dancha danchare hedde. Qullaawa Maxaafa xiinxallinseemmohu batinyu mannira Qullaawu Maxaafi amaale harunsa qarra ikkitansara dandiitanno. (Yai. 4:1-4) Insa busha rosicho agurte Kiristoosite gedee akatta leellishate yanna hasiissannonsaha ikkara dandaanno. Rosaanonke maa biddi assiꞌra hasiissannonsaro kulate worbuulle ikka hasiissannonke. Yihowa umonsa heeshshi assanno manni isiwa daanno gede assannotanna biddi assiꞌra hasiissannonsare biddi assidhanno gede jawaante aannonsata addaxxine dancha danchare heda hasiissannonke.—Yai. 4:10. w22.01 11 guf. 11-12

Baalunku Kiristaani Yihowa gede maaro leellishate sharrama hasiissannonsa. Mayira? Tennera korkaata ikkannori giddo mittu, Yihowa maaro leellisha gibbannori huuccatto dimacciishshanno. Ninke giddo Yihowa huuccattosi macciishsha giwara hasiꞌranno manchi dino; hakko daafira godowa kaajjadda ikkineemmokki gede qorophineemmo. Mittu ammanate rodiinke xissosi hasaaphanno woyite macca cuꞌmiꞌne giwantenni, ayewoteno “qarramino manchi raare” macciishshate qixxaamboommore ikka hasiissannonke. Qoleno, tenne qullaawu ayyaaninni amaalloonni amaaleno macciishsha hasiissannonke: “Maganu yoo, sao agurannokkihura saosi diagurtanno.” (Yai. 2:13) Umonke heeshshi assine maaro mageeshshi geeshsha hasiissannonkero qaangeemmoha ikkiro, albinni roore maaro leellinsheemmo. Roorenkanni, mittu manchi maaro eꞌꞌe songo higanno woyite maaro leellisha hasiissannonke. Qullaawu Maxaafi giddo kulloonnihu shaqqadunna maaranno manni xagge, maaro leellinsheemmo gedenna godowa kaajjineemmokki gede kaaꞌlitannonke. w21.10 12 guf. 16-17

Yesuusi uullate aana heeꞌrinohu jeefote hashsha yaano soqqanshosi jeefisara kae heeꞌre, hiincatenna huuccatto assiꞌrate kashshi yaannori nookki bayicho hasiꞌrino. Isi Geetesemaane yinanniwa togoo bayicho afiꞌrino. Yesuusi hatte yannara rosaanosira huuccattote daafira lowo geeshsha hasiisse noonsa amaale amaalinonsa. Insa Geetesemaane yinanniwa kaashshu base iillitu yannara, yanna hashshu taaloote ikkitukki digattino. Yesuusi soqqamaasinesi, “goxxinikkinni konniicho agarre!” yee isi huuccatto assiꞌrara haꞌri. (Mat. 26:37-39) Isi huuccatto assiꞌranni heeꞌreenna insa kayinni goxxino. Insa goxxe noota afiti Yesuusi galagale “jaattine huuccidhe!” yee jawaachishinonsa. (Mat. 26:40, 41) Isi insa lowo geeshsha dadillitinotanna daafurtinota wodanchino. Yesuusi shaqqillunni, “maalu . . . daafuraamoho” yiino. Hakkiinni Yesuusi huucciꞌrara lame hige haꞌrino; isi higanno woyite insa huucciꞌra agurte goxxe no.—Mat. 26:42-45. w22.01 28 guf. 10-11