Birra

Rosiinseemmorinna ammanneemmori Maganu Qaali aana xintaminoreeti. Ikkirono batinyu manni ‘Insa magansidhanno gari dibaꞌraasinoho’ yee hedanno daafiranna rosiinseemmo rosi insa macciishsha hasiꞌrannoha ikkinokki daafira gufiꞌranno woy kulleemmonsare dimacciishshanno. Gufiꞌneemmokki gede maa assa hasiissannonke? Soqqamaasinchu Phaawuloosi Roomaho heeꞌranno Kiristaana togo yino: “Ammaꞌna macciishshatenni dagganno; macciishshinannihuno Kiristoosi qaaleeti.” (Rom. 10:17) Ammananke kaajjishiꞌneemmohu Qullaawa Borro seekkine xiinxallineeti ikkinnina, Maganu Qaali ledo sumuu yaannokkiha ammaꞌnote bude agadhine diꞌꞌikkino; togoo budi baxisannoha lawara dandaanno. ‘Ammana nookkiha Magano hagiirsiisa’ dandiinannikki daafira, halaalaancho egenno aana xintantinota kaajjado ammana afiꞌrate sharrama hasiissannonke. (Ibi. 11:1, 6) Cuꞌmiꞌnoommohu halaale ikkinota buuxate, iiminni dhagge ikkanno malaate laꞌꞌa hasiissannonke yaa diꞌꞌikkino. Seekke ammanatenna huluullo hooꞌlate, ammana kaajjishannoha Qullaawu Maxaafi roso seekke xiinxalla calla ikkitanno. w21.05 4-5 guf. 11-12

Soqqamaasinchu Phaawuloosira lowo qarri iillinosi. Roorenkanni iso gannisi woyite, hattono kinnatenni awwaallisinna usurrisi woyite jawaante hasiissinosi. (2 Qor. 11:23-25) Phaawuloosi gara ikkitinokki hedo waaddinosi woyiti noota maaxikkinni coyiꞌrino. (Rom. 7:18, 19, 24) Qoleno ‘utu gede qasanno qarra’ cince saꞌꞌa hasiissinosi; isi konne qarra Maganu hoolasira halchino. (2 Qor. 12:7, 8) Yihowa, Phaawuloosira lowo qarri iillisirono soqqanshosi umo fushshanno gede wolqa uyinosi. Hanni Phaawuloosi loosinore laꞌno. Lawishshaho isi Roomaho usurame noo yannara Yihudu ammaꞌno murrooti albaanni danchu duduwira laalaate gaaramino; isi gashshaasinete albaannino gaaraminoha ikkara dandaanno. (Soq. 28:17; Fil. 4:21, 22) Qoleno isi batinye mootete mini agaraasineranna laꞌꞌasira daanno mannira baalaho farciꞌrino. (Soq. 28:30, 31; Fil. 1:13) Isi hatte yannankura xaa geeshsha Kiristaana kaaꞌlitanni noota addi addi sokka qullaawu ayyaaninni borreessino. w21.05 21 guf. 4-5

Naaxxa, Yihudu Moote Ooziya amaale macciishshannokki gedenna fajjinoonnikkire assanno gede assitinosi. Ooziya lowoha dancha coye assino. Isi lowo ola qeelino, lowo katamma minino hattono lowo baatto loosiꞌrino. “Maganuno maassiꞌrinosi.” (2 Dud. 26:3-7, 10) Ikkirono Qullaawu Maxaafi, “Ooziya jawaante afiꞌrihu gedensaanni hajajamannokkiha ikkino. Hajajama giwasino uwanno gede assitinosi” yaanno. Yihowa qullaawu mini giddo hixaana wiliishshitannori kakkalaasine calla ikkitinota balaxe kulino. Moote Ooziya kayinni qullaawa mine eꞌꞌe isira fajjinoonnikki hixaana wiliishshino. Yihowa dadillino daafira, kuni naaxxaleessu manchi dhiigu dhibbinni amadamanno gede assino. (2 Dud. 26:16-21) Ooziya gede ninkeno naaxxine cubbo loonsammora dandiineemmo? Quwa saꞌne meessaneetira calla hendeemmoha ikkiro, ee naaxxinammora dandiineemmo. Noonke dandoo baalanna songote giddo afiꞌnoommo qoosso Yihowa uyinonketa ikkitinota deꞌnoonke. (1 Qor. 4:7) Naaxxineemmoha ikkiro Yihowa dihoroonsiꞌrannonke. w21.06 16 guf. 7-8

Yesuusi rosaanosi dancha woꞌnaalsha afiꞌra hooggara dandiitanno woyiti noota afino. Isinni umo rosaano sabbakkanna macciishshi manni giddo ammanaasine ikkinohu mageeshshi mannaatiro dianfoonni. Yesuusi rosaano hagiidha hasiissannonsahu mannu sokkansa macciishshino daafira calla diꞌꞌikkino; roorenka hagiidha hasiissannonsahu Yihowa diinaggaabbe soqqantino soqqansho lae hagiidhannota affino daafiraati. Hexxo mudhinummokki sabbankeemmoha ikkiro, hegere heeshsho afiꞌneemmo. Maganu Mangiste halaale sabbakatenna rosiisate dandiinummore baala assineemmo woyite, ‘ayyaana hagiirsiisate wixiꞌnanni heeꞌnoommo’ yaate. Mitto mancho xiinxallinse cuuamanno gede kaaꞌla hoongummoro nafa, ‘hexxo mudha hoongummoronna’ ‘ceeꞌmine dancha looso loosa’ agura hoongummoro, Yihowa hegere heeshsho aankera qaale eino.—Gal. 6:7-9. w21.10 26 guf. 8-9

Mitte yannara Yesuusinna rosaanosi sabbakkanni hossinowiinni higganni lowo geya daafurte no. Insa fooliishshiꞌra hasidhinoha ikkirono lowo manni hoodensa dayi. Yesuusi konne manna mararino daafira “lowo coye rosiisinsa.” Yesuusi mannu qarra umisihu gede asse laino. Isi insa lowo geeshsha qarrantinotanna hexxo hasiissannonsata afino daafira insa kaaꞌla hasiꞌrino. Xaa yannarano mannu hatto ikke no. Insa laꞌnanni woyite hagiirraamma labbara dandiitanno. Kayinni insa baxxite baꞌinote allaalaanchu nookki geꞌrecho gede ikkitino. Phaawuloosi togoo manna, Magano affukkinni hexxo noonsakkiha heedhannori gede asse coyiꞌrino. (Efe. 2:12) Qoqqowinkera noo manni ayyaanaamittetenni gattaawe noota laꞌneemmo woyite, baxillunna mararro insa kaaꞌlineemmo gede assitannonke. Insa kaaꞌla dandiineemmoti baalantenni roortino doogo Qullaawa Maxaafa xiinxallitanno gede koyisate. w21.07 5 guf. 8

Haafa adawadhanno manchi naaxxannohonna umosi calla baxannoho. Hinaasanno manchi wolu manchira noosire afiꞌrate halchannoha calla ikkikkinni hakku manchi afiꞌrinore hooganno gede assa hasiꞌranno. Hinaasa manna gimbanni gede assitanno. Haafu adawarshinna hinaasa mine ittanno hoolo gedeeti. Minu aye geeshshano biifado lawiro gale hose toasi digattanno. Mittu manchino kuri akatta heedheennasinni Yihowara mite yanna geeshsha soqqamara dandaanno. Ikkollana haafa adawadhannohanna hinaasannoha ikkiro uwasi digattanno. (Law. 16:18) Isi Yihowara soqqama aguranno hattono isonootono ikko woloota gawajjanno. Soqqamaasinchu Phaawuloosi amaalino amaale harunsineemmoha ikkiro haafa adawarsha gargadha dandiineemmo; isi togo yiino: “Umoꞌne roorsidhine haafu adawarshinni mittore nafa assitinoonte. Hatteentenni wolu manni kiꞌnenni roorinohu gede assitine hedde.”—Fil. 2:3. w21.07 15-16 guf. 6-8

Mitootu addu ammaꞌno xaꞌmonke baalantera wole agurina Qullaawu Maxaafi giddo bande kulloonnikki coyira nafa dawaro qola hasiissannose yite heddanno. Hatto yee heda garaho? Hanni soqqamaasinchu Phaawuloosi lawishsha laꞌno. Isi ammanate roduuwasi, “Baalanka coye fonqoltine laꞌe” yee amaalino; ikkirono isi huwatinokkihu batinyu coyi noota xawise coyiꞌrino. (1 Tes. 5:21) Isi “Egennonke xeate” yee borreessino; qoleno togo yiino: “Xa coꞌo yee leellinkekkinni hincilaallote giddoonni qolle laꞌnanni heeꞌnoommo.” (1 Qor. 13:9, 12) Phaawuloosi woꞌmankare afino yaa diꞌꞌikkino; ninketino hattoontilla. Ikkollana Phaawuloosi Yihowa daafira xinta ikkino halaale afino. Noosi egenno, cuꞌmiꞌrinohu halaale ikkinota ammanate ikkitanno geeshshite! Cuꞌmiꞌnoommohu halaale ikkinota buuxiꞌra dandiineemmoti mitte doogo, Yesuusi Yihowa halaalunni magansiꞌre lawishsha ikkinonke gara xaa yannara Yihowa Farciꞌraasine assitanni noori ledo heewisiisate. w21.10 18-19 guf. 2-4

Geerra roduuwa, woꞌma yanna soqqansho giddo heedhinoonniha ikkirono ikka hoogirono, woloota kaaꞌlate lowore assa dandiitinanni. Hiittoonni? Haaro heeshshoꞌnenni hagiidha rosse, haaro mixo fushshidhe, hattono assa dandiitinannikkire agurtine assa dandiitinannire illachishshe. Moote Daawiti, Yihowara mine minate lowo geeshsha quqquxamino. Ikkollana, Yihowa mine minannosihu wedellicha Selemooni ikkinota kulisita, Daawiti Yihowa yiinore maahoyye yee adhino; hattono konne looso woꞌmu wodanisinni kaaꞌlino. (1 Dud. 17:4; 22:5) Selemooni ‘shiimanna togoo looso loose egenninokkiha’ ikkino daafira, Daawiti Yihowa mine minate ani woyyeemmo yee dihedino. (1 Dud. 29:1) Daawiti, Yihowa mine minne gundanni gede kaaꞌlannori albisa ikke looso loosiisanno manchi diro woy egenno ikkitukkinni Yihowa maasso ikkitinota afino. Yannankerano, geerru roduuwi Daawiti lawishsha harunsite loosinsa soorramiro nafa diinaggaabbe soqqantanno. Qoleno alba insa loossanno looso loossanni noo wedelloota Yihowa maassiꞌrannota affino. w21.09 9 guf. 4; 10 guf. 5, 8

Ayyaanaamittete mixo fushshiꞌranke heeshshonke qinaabbinotanna hagiirru noota ikkitanno gede assitanno. Ikkollana mixo fushshiꞌneemmohu uminke dandoonna heeshshonke gara laꞌneeti ikkinnina wole manna laꞌne diꞌꞌikkino. Wole manna laꞌne mixo fushshiꞌneemmoha ikkiro, hexxo mudhinammora dandiineemmo. (Luq. 14:28) Yihowa soqqamaancho ikkootto daafira, ati muxxe maatesi miilaati; qoleno ate lawannohu wolu dino. Yihowa isiwa abbinohehu ati wole manna roorootto daafira diꞌꞌikkino. Isi minisira abbinohehu ateneeto heeshshi assattoha, hattono rosatenna biddi yaate maahoyye yaattoha ikkoottota laino daafiraati. Yihowa isira soqqamate dandiittore baala assatto woyite tenne naadannota huluullantooti. Cincakkinna ammanamakki “danchu wodani” nooheta leellishshanno. (Luq. 8:15) Hakko daafira Yihowara woꞌma lubbokkinni soqqama agurtooti. Hatto assittoro, ‘umikkinni hagiidhattore’ afiꞌratto.—Gal. 6:4. w21.07 24 guf. 15; 25 guf. 20

Mannu miicannonke yannara duucha woyite taashsho afiꞌrate cincine agadha hasiissannonke. Cimeeyye songote giddo jawa cubbo loonsoonnita affuro, hakkonne coye Yihowa ma garinni laꞌꞌannoro huwata dandiitanno gede, “gordu egenno” afiꞌrate huuccatto assidhanno. (Yai. 3:17) Mixonsa dandaamannoha ikkiro cubbo loosino manchi “sorote doogonni” higanno gede kaaꞌlate. (Yai. 5:19, 20) Qoleno songo agaratenna loonsoonni cubbinni xissiisidhinore sheshifachishate dandiiture baala assa hasidhanno. (2 Qor. 1:3, 4) Cimeeyye mittu manchi jawa cubbo looseenna coye laꞌanno woyite, balaxxe coye seekkite buuxa hasiissannonsa; tennera hige yanna hasiissanno. Hakkiinni insa huuccatto assidhe, cubbo loosinoha Maganu Qaalinni amaaltanno, hattono “halaalunni” woy bikkunni seejjitanno. (Erm. 30:11) Cimeeyye yoo yaate dimuddantanno. Insa coye Yihowa biddishshi garinni amaddannoha ikkiro, songo woꞌma horo afidhanno. w21.08 11 guf. 12-13

Israeelete gobbara hude ubbino daafira Naoomi, minaannisenna lame labballi oosose Moaabi gobba haꞌrino. Insa hakkiicho heeꞌreenna Naoomi minaanni reyi. Lamunku labballu oosose seenne adhitinoha ikkirono gedensoonni insano reyitino. (Rut. 1:3-5) Tini, Naoomi lowo geeshsha manchittanno gede assitinose. Naoomi lowo geeshsha dadillitino daafira Yihowa shawwu yiinoe yite heddino. Ise giddoseta togo yite xawissino: “Anera Kaaliiqi alba shawwu yiinoe.” “Woꞌmanka Dandaanno Magani heeshshoꞌya qaraartannota [assino].” Ise ledde togo yitino: “Woꞌmanka Dandaannohu Kaaliiqi shollishe, tenne baala shetto [iillishinoe].” (Rut. 1:13, 20, 21) Yihowa, “beebba . . . egennaamo mancho [gowwissannota]” afino. (Ros. 7:7) Isi Ruuti Naoomira bagamannokki baxille leellishate kaꞌanno gede assino. Ruuti Naoomira bagamannokki baxille leellishshino; hattono hexxo mudhitannokki gedenna xaano Yihowa baxannoseta huwattanno gede shaqqillunni kaaꞌlitinose. w21.11 9 guf. 9; 10 guf. 10, 13

Xa noonke qoosso illachinsheemmo yaa, Yihowara soqqammeemmo soqqansho halashshiꞌneemmo faro dihasiꞌneemmo yaateni? Hatto yaa diꞌꞌikkino! Sabbakatenna rosiisate dandoonke woyyeessiꞌrate kaaꞌlitannonketanna roduuwanke albinni roore kaaꞌlineemmo gede assitannonke mixo fushshiꞌra dandiineemmo. Uminke hasatto agurre woloota kaaꞌlate illachinsheemmoha ikkiro, tini mixonke woꞌmitanno. (Law. 11:2; Soq. 20:35) Fushshiꞌrattora dandaattoti mite mixo hiitteeti? Wonshiꞌra dandaatto mixo hiitteetiro afatto gede kaaꞌlahera Yihowa huucciꞌri. (Law. 16:3) Kaaꞌlaancho suwisaancho woy woꞌma yanna suwisaancho ikka, Beeteelete soqqama, woy Maganu mine mina kaaꞌla dandaatto ikka? Woy dancha duduwo halashshate wole qaale rosa, wole agurina wole qooxeessa hadhe sabbaka nafa dandaattoha ikkara dandaanno. w21.08 23 guf. 14-15

Yihowa bagamannokki baxille lowo geeshsha naadanno. (Hos. 6:6) Maganinke bagamannokki baxille naandeemmo gede jawaachishinonke. (Mik. 6:8) Kayinni hatto assinammora albaanni bagamannokki baxilli maatiro afa hasiissannonke. Bagamannokki baxilli maati? “Bagamannokki baxille” yitanno yaatto Qullaawa Borrote Haaro Alame Tiro giddo mite 230 basera no. Kuni baxilli maati? Mittu manchi bagamannokki baxilli noosiha ikkiro wole mancho lowo geeshsha baxanno hattono iso baxa diaguranno. Yihowa bagamannokki baxille leellishate taalle nookki lawishshankeeti. Yihowa mannaho bagamannokki baxille leellishino. Moote Daawiti togo yiino: “Kaaliiqa! Bagamannokkihu baxillikki gordoho qasiꞌrino; . . . bagamannokkihu baxillikki maalaꞌlinanniho.” (Far. 36:5, 7) Daawiti gede ninkeno Maganunniha bagamannokki baxille naandeemmo? w21.11 2 guf. 1-2; 3 guf. 4

‘Kalaqamu baalunkura umiidiha’ ikkinohu Yesuusinna kiirre tunqannikki sokkaasine Yihowa maate widooti. (Qol. 1:15; Far. 103:20) Yesuusi uullate aana noo waro, ammanamino manni Yihowa Annankeeti yaa dandaannota rosiisino. Yesuusi rosaanosira coyiꞌranni, Yihowa ‘Anniꞌyanna Anniꞌne’ yiino. (Yoh. 20:17) Heeshshonke Yihowara sayinse uyine cuuammeemmo woyite, mimmito baxxanno roduuwi noo maate wido ikkineemmo. (Maq. 10:29, 30) Yihowa baxillaancho Annaati. Yesuusi Yihowa hajaja calla egenninohu kaajjadu gashshaanchi gede ikkikkinni shaqqadu Anni gede asse laꞌꞌanno; qoleno, ninkeno iso hakko garinni laꞌnammora hasiꞌranno. Isi huuccatto hanafi woyite, “Annanke” yiino. Yesuusi Yihowa ‘Woꞌmanka Dandaatto Magano,’ “Kalaqaancho” woy “hegere Moote” yitine huuccidhe yee rosiisoommerono soꞌro diꞌꞌikkanno; mayira yiniro, Qullaawu Maxaafi Yihowa hatto yaanno. (Kal. 49:25; Isa. 51:13; 1 Xim. 1:17) Isi kayinni Yihowa “Annanke” yitine huuccidhe yiino. w21.09 20 guf. 1, 3

Moote Minaase, bunshesi aguranno gede Yihowa masaalaanosi widoonni kulinosiha ikkirono, mokkookke macciishsha giwino. Gedensoonni Yihowa “Asoori olanto Yihuda horritanno gede assi. Olantono Minaase qafadde sanosira qoroora gante camote cagaagenni usurte Baabilooni haadhe hadhu.” Minaase Baabiloonete gobbara usuru mine heeꞌre, loosino cubbi daafira seekke hedikki digatino. Isi Maganu albaanni ‘lowo geeshsha umosi shollishino.’ Isi hakkiinnino sainore assino. Minaase “Maganisi Kaaliiqiwa hige kaaꞌlannosi gede [huucciꞌrino].” Isinni Yihowawa hige ‘woxarate’ huucciꞌrino. (2 Dud. 33:10-12) Gedensoonni Yihowa Minaase huuccattora dawaro qolino. Huuccattosi leellishshannonte gede, konni manchi wodani raga higinota Yihowa huwatino. Yihowa Minaase huuccatto macciishshe wirro mootimmasiwa higanno gede assino. Minaase addinta maaro einota leellishate dandaamisire baala assino. w21.10 4 guf. 10-11

Aqiilanna Phirisqilla egentino qooxeessa agurte haꞌra, haaro qae kalaqiꞌranna dunkaana gowate loosonsa haaru qooxeessira hanafa hasiissinonsa. Insa Qorontoosi hadhinowa, hakko noo songo kaaꞌla hanaffino; hattono soqqamaasinchu Phaawuloosi ledo roduuwa jawaachishshino. Gedensoonni insa sabbakkannori roore hasiissannowa wole katama hadhino. (Soq. 18:18-21; Rom. 16:3-5) Insa hagiirrunna harshammo noo heeshsho heedhinoti dihuluullissannote! Xaa yannara noo minaannuwinna minaamuwi, Maganu Mangiste balaxisiise Aqiilanna Phirisqilla lawishsha harunsa dandaanno. Minaanninna minaama mixonsa daafira hasaawate maltino yanna adhamara albaanni noote. Insa Yihowara soqqamate mixo fushshiꞌre mixonsa wonshiꞌrate mitteenni sharramannoha ikkiro, tini Yihowa kaaꞌlannonsata albinni roore huwattanno faro fantannonsa.—Ros. 4:12. w21.11 17 guf. 11-12

Maganu annankenna amanke ayirrinsammora uyinonke hajajo agadha hasiissannonketi egennantinote. Leewaawoota 19:3 nooti ‘Annakkinna amakki ayirrisi’ yitanno hajajo “Ani Kaaliiqi Maganiꞌne Qullaawahona, kiꞌneno Qullaawoota ikke” yitanno hedonni aantinota ikkitinota qaagi. (Lew. 19:2) Yihowa annankenna amanke ayirrisate daafira uyinke hajajo lainohunni ninkeneeto togo yine xaꞌma hasiissannonke: ‘Annaꞌyanna amaꞌya ayirrisanni noommo?’ Albinni roore annakkinna amakki ayirrisa hasiissannoheti leeltuhero, biddi assiꞌra hasiissannohere xaanni biddi assiꞌra dandaatto. Alba sainore qola didandaatto; kayinni xa albinni roore insa kaaꞌlate murciꞌra dandaatto. Albinni roore insa ledo yanna sayisate pirogiraamekki biddi assiꞌra dandaatto. Maalaamittete hasiisannonsare assite kaaꞌla, Yihowara soqqama agurtannokki gede jawaachisha hattono yaaddanno woy dadillitanno woyite sheshifachisha dandaatto. Togo assa Leewaawoota 19:3 yitannori ledo sumuu yitannote. w21.12 4-5 guf. 10-12

Moote Daawiti jawa cubbo loosino. Lawishshaho Daawiti, Bersaabehi ledo foorino hattono minaannase shiishiishino. (2 Sam. 11:2-4, 14, 15, 24) Daawiti assinori isonooto calla ikkikkinni maatesi hattono wole minaamuwasi gawajjino. (2 Sam. 12:10, 11) Wole yannara qole, Yihowa fajjisikkinni Israeelete olanto kiirranni gede asse woꞌmunni woꞌma Yihowa addaxxannokkita leellishino. Tini mayi qarra abbituyya? Mito 70,000 ikkanno manni qoomamunni goofino! (2 Sam. 24:2-4, 10-15) Daawiti Yihowa maaro dihasiissannoho yite yoo yaatto? Yihowa kayinni hatto yee dihedino. Isi Daawiti hakkuyira albaanni ammaname heeꞌrino garanna addu maaro eino gara hedino. Hakko daafira Yihowa Daawiti loosinoha jawa cubbo gatona yiinosi. Yihowa, Daawiti iso lowo geeshsha baxannotanna gara ikkinore assa hasiꞌrannota afino. Maganinke dancha akatanke illachishannota afanke iso galaxxineemmo gede diassitannonke?—1 Mot. 9:4; 1 Dud. 29:10, 17. w21.12 19 guf. 11-13

Yesuusi bisu xeꞌne noonsare mararannota leellishino. Isi Cuuaanchu Yohaannisira togo yee sokka soyinota qaango: “Ballootu laꞌanno; naafootu uurrite hadhanno; dhiigaammu keeraabbanno; macciweelootu macciishshitanno; reyitinori kaꞌanno; buxanete Dancha Duduwo kullanni.” Yesuusi loosino maalale lae ‘mannu baalu Magano galatino.’ (Luq. 7:20-22) Kiristaanu bisu xeꞌne noonsare mararannota leellishe Yesuusi lawishsha harunsa hasiꞌranno. Hakko daafira togoo manna mararreemmo hattono cincine kaaꞌlineemmonsa. Hige Yihowa ninkera maalale loosate wolqa diuyinonke. Ikkirono maalaamittetennino ikko ayyaanaamittetenni ballitinorira, dancha duduwo kulate qoosso noonke; kuni danchu duduwi mannu ooso bisunnino ikko ayyaanaamittetenni fayyo ikkite gannatete heedhannota kulannoho. (Luq. 4:18) Konne dancha duduwo macciishshe lowo manni Magano galatanni no. w21.12 9 guf. 5

Yaiqoobi rosiisate Qullaawa Borro horoonsiꞌrinota wodanche. Isi borreessino sokka nabbawanno manni, Yihowa Iyyoobi gede ammanantinosire baꞌraasannota huwatanno gede kaaꞌlate Maganu Qaale horoonsiꞌrino. Konni garinni Yaiqoobi huwatate qarrissannokki qaallanna yaatto horoonsiꞌre rosiisino. Yaiqoobi togo asse mannu iso ikkikkinni Yihowa illachishanno gede assino. Maa ronseemmo? Huwatate qarrisannokki garinni rosiisse hattono Maganu Qaale horoonsidhe. Rosiinseemmo woyite wolootu ninke egenno dhagge assidhanno gede assa dihasiissannonke; hatteentenni Yihowa egenno dhagge assidhanno gedenna isi insa daafira mageeshshi geeshsha hedannoro huwattanno gede kaaꞌla hasiissannonke. (Rom. 11:33) Rosiinseemmo woyite woꞌmanka woyite Qullaawa Borro horoonsiꞌne tenne mixonke wonshiꞌra dandiineemmo. Lawishshaho Qullaawu Maxaafi rosaanonkera ninke insa ikkinoommoro maa assineemmoro kulantenni, insa Qullaawu Maxaafi giddo noo lawishshuwa heeshshi gotti assite heddanno gedenna Yihowara mayi macciishshamannosiro huwattanno gede kaaꞌla hasiissannonke. Hatto assinummoro insa ninke ikkikkinni Yihowa hagiirsiisate kaꞌanno. w22.01 11 guf. 9-10

Maganu manna gawajjineemmokki gede kule calla diagurino. Mittu Kiristaanchi Magano hagiirsiisa hasiꞌrannoha ikkiro manna umisi gede asse baxa hasiissannosi. Hanni Yesuusi Leewaawoota 19:18 noo hajajo lowo geeshsha hasiissannota ikkitinota luphi assino gara laꞌno. Mitte yannara mittu Farisichi Yesuusa, “Baalanta roortino hajajo hiittenneeti?” yee xaꞌmino. Yesuusi, “Baalanta roortannotinna umi hajajo” Mooticha Maganokki woꞌmu wodanikkinni, woꞌma lubbokkinninna woꞌma hedokkinni baxi! yitannote yee qolino. Hakkiinni Yesuusi Leewaawoota 19:18 qummi asse togo yiino: “Tenne labbannoti layinki hajajo, ‘Olliichokki umikki gede assite baxi!’ yitannote.” (Mat. 22:35-40) Manna banxeemmota leellisha dandiineemmoti duucha doogga no. Tenne leellinsheemmoti mitte doogo Leewaawoota 19:18 noo amaale harunsate. Qummeeshshu togo yaanno: “Ayeno rabbissinoonte; woy koma amaddinoonte.” w21.12 10-11 guf. 11-13

Yesuusi angasi diriirse amade Pheexiroosi gatisinosi. Pheexiroosi Yesuusi aaninni illesi hoolinokki yannara hembeelamanni noo wayi aana haꞌra dandiinota qaango. Kayinni Pheexiroosi dambala laiti lowo geeshsha waajjino daafira lixa hanafino. (Mat. 14:24-31) Pheexiroosi lawishshinni rosa dandiineemmo. Pheexiroosi yowolotenni dirre wayi aana haꞌra hanafi woyite ‘Dambala lae waajje itameemmo’ yee dihedino. Isi Mootichisiwa iilla geeshsha wayi aana haꞌra hasiꞌrino. Kayinni isi Yesuusa illachisha agure dambala lae waajjino. Pheexiroosira wayi aana haꞌrate ammana hasiissinosinte gede, xaa yannara ninkerano iillannonke fonqolo dandiine saꞌꞌate ammana hasiissannonke. Yihowanna isi uyino hexxo illachisha hoongummoro ayyaanaamittenke shoshshoggitara dandiitanno. Iillannonkehu dambalu gedee qarri ikkihano ikkiro, woꞌmanka woyite Yihowanna isira ninke kaaꞌlate dandoo noosita dea dihasiissannonke. w21.12 17-18 guf. 6-7

Huuccatto, xiinxallonna hiinca Yihowa magansiꞌrate widooti. Huuccatto assiꞌneemmo woyite, lowo geeshsha baxannonkehu iimi Anninke ledo hasaambanni heeꞌnoommo. Qullaawa Maxaafa xiinxallineemmo woyite, hayyote Buicho ikkino ‘Magani coye’ ronsanni heeꞌnoommo. (Law. 2:1-5) Yihowa daafira rosoommore hiincineemmo woyite, baxissannota isi akattanna albillitte ninkerano ikko mannu ooso baalate uyinota dhagge ikkitanno hexxo hendanni heeꞌnoommo. Yannanke danchu garinni horoonsiꞌneemmoti tenne roortino doogo dino. Yihowa ledo sayinseemmo yanna danchu garinni horoonsiꞌneemmo gede kaaꞌlannonkeri maati? Dandaamannoha ikkiro cancu nookki bayicho doodhe. Hanni Yesuusi lawishsha laꞌno. Isi uullate aana soqqanshosi hanafara albaanni, halallaho 40 barra keeshshino. (Luq. 4:1, 2) Isi hakkiicho cancu nookkiwa Yihowa huucciꞌranna Annisi isi daafira hedinori maatiro hiinca dandaanno. Hatto assasi Yesuusi muli yannara iillannosi fonqolira qixxaawanno gede kaaꞌlitinositi dihuluullissannote. w22.01 27-28 guf. 7-8

Mittu songote cimeessi woy ayyaanaamittetenni gikki yiino rodii biddi assiꞌra hasiissannonkere kulankera dandaanno. Mittu manchi baxannonke daafira Qullaawu Maxaafi aana xintantino amaale amaalannonke woyite, amaale macciishshine adhine galanteemmosita leellisha hasiissannonke. Noore coyiꞌniro xaaddote amaallanninke amaale macciishshe adha qarra ikkitankera dandiitanno. Wole agurina koffi nafa yinammora dandiineemmo. Mayira? Guuntete xeꞌne noonkere ikkinoommota anfoommoha ikkirono, mittu manchi soꞌronke bade kule amaalannonke woyite macciishshe adha qarra ikkitankera dandiitanno. (Ros. 7:9) Soꞌronke gara lawisate nafa woꞌnaallammora dandiineemmo. Mitto mancho amaalannonke gede assinosire huluullammammora woy amaalinonke gari koffi assankera dandaanno. ‘Isi ane amaalannoehu maa ikkeeti? Isi umisi disoꞌro loosanni no?’ yinanni amaalinke manchi soꞌro xinqisiisiꞌneemmoha ikkara dandaanno. Amaalloonninke amaale baxisa hooggunkero lashshi assinammora woy macciishsha banxeemmo amaale hasiꞌnanni wolewa haꞌneemmoha ikkara dandaanno. w22.02 8-9 guf. 2-4

Haaro alamera Yihowa assannori gara ikkinota addaxxa qarra ikkitannonke gede assannori heeꞌra ikka? Hanni lawishshaho, Israeele Gibitsete borojjimmanni fultuhunni shiima yanna gedensaanni ikkinore laꞌno. Insa giddo mitu alba Gibitsete noo yannara ittanno sagale halchitino daafira gunguma hanaffino; hattono Yihowa uyinonsata menna yinanni sagale mishshino. (Kir. 11:4-6; 21:5) Ninkeno bayiru qarri gedensaanni insa gede ikkinammo ikka? Baatto haaroonsatenna sunu sununni gannate ikkitanno gede assate loosi mageeshshiha ikkannoro dianfoommo. Loonsannihu lowo loosi heeꞌrannotinna umi qara mitu qarra ikkanno coyi heeꞌrannoti dihuluullissannote. Hatte yannara Yihowa aannonkere minshe gungummammo ikka? Huluullammeemmokkihu mittu coyi no: Xaa yannara Yihowa qixxaawo naandeemmoha ikkiro, hatte yannarano roore naandeemmoti dihuluullissannote. w22.02 7 guf. 18-19

Zakkaariyaasi 8:23 aana ‘Yihudichanna’ “kiꞌne” yinoonnihu buurantinore uullate aana gatte noore kulateeti. (Rom. 2:28, 29) “Tonnu wole gobba manni” yiniri wolu geꞌreewi wido ikkitinoreeti. Insa buuramino Kiristaana seekkite ‘amaddanno,’ yaano ammanante insa ledo quraanyante Yihowa mitteenni magansidhanno. Hatteente gede, Yihowa buuramino Kiristaaninna wolu geꞌreewi mereero kaajjado mittimma heedhanno gede asse Hiziqeeli 37:15-19, 24, 25 noo masaalo wonshino. Tini masaalo lame siqqo daafira kultanno. Iima ragiꞌrate hexxo noonsari ‘Yihuda’ siqqicho (Israeelete mootoolla doorantanno gaꞌreeti) gedeeti; hattono uulla ragiꞌrate hexxo noonsari [“Efireemi siqqicho,” NW] gedeeti. Yihowa lamenta gaamo mitte assanno daafira “mitte siqqo” ikkitanno. Hatto yaa insa mittu Mootensa Yesuusi Kiristoosi gashshooti hunda mitto ikkite soqqantanno yaate.—Yoh. 10:16. w22.01 22 guf. 9-10

Yesuusi mannu laꞌꞌansara yite buxanete mitore uyitanno mannooti daafira coyiꞌrino. Insa assitinori danchare ikkirono Yihowa kayinni dihagiidhino. (Mat. 6:1-4) Danchumma leellinsheemmore ikka dandiineemmohu dancha giddonni kaꞌne gara ikkinore assineemmoha ikkiro callaati. Hakko daafira ateneeto togo yite xaꞌmi: ‘Assa hasiissannoeha gara ikkino coye afa calla ikkikkinni hakkonne coye asseemmo? Dancha coye asseemmo gede kakkayisinoeri maati?’ Yihowa ayyaani mittore assate kaꞌneemmo gede wolqa aannonke. (Kal. 1:2) Hakko daafira mittu mittunku Maganu ayyaani laalo wido ikkino akati loosoho kaꞌneemmo gede assannonke. Lawishshaho rosaanchu Yaiqoobi, “Loosu ledo nookki ammanano reyitinote” yee borreessino. (Yai. 2:26) Wole Maganu ayyaani laalo wido ikkitino akatta baalano hattooti yaa dandiinanni. Woꞌmanka woyite kuri akatta noonketa leellisheemmoha ikkiro, Maganu ayyaani giddonke loosanni nooti leeltanno. w22.03 11-12 guf. 14-16

Addi addiha ayyaanaamittete coyenna lowoha dancha coye assineemmoha ikkara dandaanno; ikkirono Pheexiroosi assa hasiissannonkeha mitto lowo geeshsha hasiisanno coye luphi asse kulino. Pheexiroosi heeshshonke baalatenni qullaawoota ikka hasiissannonketa kulara albaanni, ‘Wodanaꞌne feeffachishidhe’ yee jawaachishinonke. (1 Phe. 1:13) Isi wodanaꞌne feeffachishidhe yiinohu maahooti? Pheexiroosi buurantinori Kiristoosi roduuwi ‘woshshinonsa Maganiha dhaggete looso kultannota’ coyiꞌrino. (1 Phe. 2:9) Isinni xaa yannara noo Kiristaani baalunkura konne lowo geeshsha hasiisanno looso loosate qoosso noonsa; konni loosi geeshsha manna kaaꞌlannohu wolu loosi dino. Qullaawu Maganu mannira woꞌmanka woyite diinaggaawe mannaho sabbakanna rosiisa lowo ayirrinyeeti! (Maq. 13:10) Diinaggaambe konne assineemmoha ikkiro, Maganonkenna manna banxeemmota leellinsheemmo. Qoleno heeshshonke baalatenni ‘qullaawoota ikka’ hasiꞌneemmota leellinsheemmo. w21.12 13 guf. 18

Phaawuloosi ammanate roduuwisi daafira woꞌmanka woyite danchare hedanno. Isi mittu manchi soꞌro loosi yaa hakku manchi bushaho yaa ikkinokkita afino. Isi ammanate roduuwasi baxanno hattono dancha akattansa illachishanno. Phaawuloosi ammanate roduuwisira gara ikkinore assa qarra ikkitannonsa woyite, insa gara ikkinore assa hasidhannotanna kaaꞌlo hasiissannonsata hedanno. Hanni lawishshaho Phaawuloosi Filiphisiyusi songora heeꞌrannore lame meya roduuwa kaaꞌlino gara laꞌno. (Fil. 4:1-3) Ewoodiyanna Siinxikira coyi kawa kaꞌaanni higeennansa jaaloominsa bainoha ikkara dandaanno. Phaawuloosi insara kaajjishe dicoyiꞌrino woy garimale insa togooreeti diyiino; isi dancha akattansa illachishino. Kuri roduuwi ammanaminoreetinna danchu suꞌmi noonsareeti. Phaawuloosi Yihowa insa baxannonsata afino. Phaawuloosi insata dancha akatta illachishino daafira kawa kaꞌaanni higinonsa coye tidhanno gede jawaachishinonsa. Qoleno Phaawuloosi insaha dancha akata illachishasi hagiirrisi baꞌꞌannokki gedenna hatte songora heedhanno roduuwi ledo noosi jaaloomi kaajjanno gede kaaꞌlitinosi. w22.03 30 guf. 16-18

Yihowa aannonke keeri wodanaaꞌmineemmonna garunni hendeemmo gede assannonke. Hanni Luuzi yinanni rodoo lawishshi tini halaale ikkase leellishanno gara laꞌno. Ise togo yitino: “Duucha woyite callimma macciishshantanni waaddannoe. Tini mito woyite, Yihowa dibaxannoe yee hedeemma gede assitannoe. Hakka woyite bayichonkonni, Yihowara mayi macciishshaminoero kuꞌleemma. Huuccatto hedoꞌya biddi assiꞌreemma gede kaaꞌlitinoe.” Tenne rodoo woꞌnaalshi leellishannonte gede, huuccatto giddoyidi keere afiꞌneemmo gede kaaꞌlitannonke. (Fil. 4:6, 7) Shiiꞌneemmo woyite Yihowanna Yesuusi kaaꞌlitannonketa addaxxa dandiineemmota anfoommo. Yihowanna Yesuusi manna marartannore ikkitinota leellishshino; tini ninkeno shaqqillunni sabbankeemmonna rosiinseemmo gede kakkayissannonke. Yihowaranna muxxe Beettisira qarrinke leellannonsata, wolqa hoongeemmo woyite marartannonketanna dandiine heeꞌneemmo gede kaaꞌlitankera hasidhannota afanke sheshifachishshannonke. Yihowa, ‘hindiiddo baala illensanni feyemmo’ yee uyinota hagiirsiissanno hexxo wonshanno yanna quqquxamme agadhineemmo!—Aju. 21:4. w22.01 15 guf. 7; 19 guf. 9-20

Yesuusi lame addi addi doogowa massannohu lamu waalchi noota kulino; mittu “ruukkashshoho” mittu “halaꞌladoho.” (Mat. 7:14) Wole sayikki doogo dino. Hiittenne doogora haꞌneemmoro doodha hasiissannonke. Hegere heeshsho afiꞌneemmo woy hoongeemmo gede assannoha ikkino daafira kuni doorshi doodhineemmo doorsha baala rooreho. “Halaꞌlado” doogo haꞌrate qarrissannokkita ikkitino daafira lowo manni haꞌra doodhannote. Batinyu manni tenne doogora haꞌranna lowo manni assannore assa doodhino; tini dadillissannote! Insa mannu tenne doogora haꞌranno gede kakkayisannohu Sheexaane Daawuloosi ikkinotanna tini doogo baonniwa massitannota ikkitinota dihuwattino. (1 Qor. 6:9, 10; 1 Yoh. 5:19) Layinki doogo kayinni ‘ruukkashshote;’ Yesuusi tenne doogora haꞌranno manni shiima ikkinota kulino. Mayira? Yesuusi aante noo kiirora harunsaanosi kaphaano himanaano qorophitanno gede kulinonsa.—Mat. 7:15. w21.12 22-23 guf. 3-5