Wocawaaro

Yesuusi dhagge ikkanno roso rosiisinoha ikkirono, mitootu tennenni kassi diyitino. Insa hakkiinni sainore hasidhino. Kayinni insa leellishinke yitino malaate leellisha giwita gufidhino woy iso gibbino. (Mat. 16:4) Qullaawa Borro mayitanno? Masaalaanchu Isayaasi Mesihichu daafira togo yee borreessino: “Cance dicoyiꞌranno; dooggateno qoonqosi naggi diassanno.” (Isa. 42:1, 2) Yesuusi soqqami woyite diluulino woy leellamate diwoꞌnaalino. Yesuusi hoola yinoonniha qullaawa mine dimiꞌnino, ammaꞌnote murrooti gede badde leellishshanno uddano diuddiꞌrino, hattono baxxino suꞌminni woshshinasira dihasiꞌrino. Yesuusi yoo yinasira Moote Heeroodisi albira shiqe heeꞌre nafa iso maalaꞌlisate yee maalale diloosino. (Luq. 23:8-11) Yesuusi mite maalale loosinoha ikkirono, qaru loosisi dancha duduwo duduwate. Isi rosaanosira “Ani Dancha Duduwo lallawate dayommo” yiino.—Maq. 1:38. w21.05 4 guf. 9-10

“Hegere heeshsho afiꞌrate gara ikkitinoti wodanu dooꞌꞌo noonsare” hansanni heeꞌnoommo. (Soq. 13:48, NW) Insa Yesuusi rosaano ikkitanno gede kaaꞌlate, Qullaawu Maxaafinni rossannore (1) huwattanno gede, (2) ammante adhitanno gede hattono (3) loosu aana hosiissanno gede kaaꞌla hasiissannonke. (Qol. 2:6, 7; 1 Tes. 2:13) Songote giddo noo halashshaano baala Qullaawu Maxaafi rosaano kaaꞌla dandiitanno; insa tenne assate kuri haaruuddeho baxille leellishshannonsa hattono gambooshshe dagganno woyite anga fante haadhannonsa. (Yoh. 13:35) Qullaawa Maxaafa rosiisanno rodiino, rosaanchu gara ikkinokki rosonna bude aguranno gede lowo yanna diinaggaawe kaaꞌla hasiissannosiha ikkara dandaanno; ‘qiishote’ gede ikkinoha konne rosonna bude rosaanchu lowo diro cuꞌmiꞌre keeshshinoha ikkara dandaanno. (2 Qor. 10:4, 5) Isi konne coye biddi assiꞌre cuuamate deerra iillanno gede kaaꞌlate lowo aganna hasiissannoha ikkara dandaanno. Hatto assanno gede kaaꞌlate sharrama kayi gaabbissannota diꞌꞌikkitino. w21.07 3 guf. 6

Yihowa Farciꞌraasine rosiissanno rosi halaale ikkinotanna Magano hagiirsiisanno garinni magansidhanni noori insa calla ikkitinota buuxiꞌnoommo? Soqqamaasinchu Phaawuloosi cuꞌmiꞌrinohu halaale ikkinota seekke ammanino. (1 Tes. 1:5) Isi ammaninohu mulla baxisinosi daafira calla diꞌꞌikkino. Phaawuloosi Maganu Qaale diinaggaawe xiinxallanno manchooti. Isi “Qullaawa Borro baala Maganunnihu Qullaawu Ayyaani kulanna [borreessinoonnita]” ikkitinota ammanino. (2 Xim. 3:16) Phaawuloosi xiinxalle buuxino coyi maati? Isi Qullaawa Borro giddo, Yesuusi daanno yinoonni Mesihicha ikkinota buuxissannota ammansiissanno taje afiꞌrino. Ayihudenniri ammaꞌnote murrooti kayinni tenne taje lashshi assite agurtino. Kuri lawisiisaano ammaꞌnote murrooti halaale rosiinseemmoreeti yiturono, loosinsanni kayinni Magano kaaddino. (Tit. 1:16) Phaawuloosi kayinni insa gede Maganu Qaali giddo gama ammane gama agurannoha diꞌꞌikkino. Isi Maganu Qaali kulannore baalankare ammanatenna rosiisate qixxaawinoho.—Soq. 20:27. w21.10 18 guf. 1-2

Kaanseemmorinna waa hayikkinseemmori ninke ikkinummorono, lossannohu kayi Magano ikkinota dea dihasiissannonke. (1 Qor. 3:6, 7) Mannu baalunku heeshsho Yihowara muxxete. Isi tini alame baꞌara albaanni Beettisi ledo baalante daga giddonni manna gamba assate looso loonseemmo gede asse ayirrisinonke. (Hag. 2:7) Sabbakate loosinke taqu toe amadino manna hasate gedeeti. Ninke konne manna hasse fushshitannori gedeeti. Reyikkinni fushshinanni manni kiiro shiima ikkiturono, hassuri baalu loossino loosi shaaꞌꞌa diꞌꞌikkino. Sabbakate loosinkeno hattooti. Sheexaanu alamenni gatannohu mageeshshi manni nooro dianfoommo. Ikkollana, Yihowa insa gatisate ninke giddo ayeno horoonsiꞌrara dandaanno. Boliiviyaho heeꞌrannohu Andireyaasi yinanni rodii togo yiino: “Qullaawu Maxaafi halaale rose cuuamannoha mitto mittonka halashshaancho, lowo roduuwi kaaꞌliteenna dayinohu gede asse laeemmo.” Ninkeno soqqanshote togoo lao heedhannonke gede assiꞌno. Hatto assinummoro Yihowa maassiꞌrannonke, soqqanshonkennino addu hagiirre afiꞌneemmo. w21.05 19 guf. 19-20

Mittu ugaaxaanchi ugaaxannohu woshshaade amadateeti woy shaateeti. Ugaaxannohu addi addi woshshaado horoonsiꞌrara dandaanno; Qullaawu Maxaafino tenne kulanno. (Far. 140:5) Ugaaxaanchu gaxigalu woshshaadote giddora eanno gede assannohu hiittoonniiti? Isi gaxigalu akata seekke hedanno. Gaxigalu mama heeꞌrannoro, maa baxannoro, hattono gaxigala hiisse amadannoro hedanno. Sheexaanuno togoo ugaaxaanchi gedeeti. Isi ninke seekke laꞌꞌanno. Mamira haꞌneemmoronna maa banxeemmoro laꞌꞌanno. Hakkiinni hendummokki amaddankera dandiitanno woshshaado qixxeessanno. Ikkirono Qullaawu Maxaafi, woshshaado amaddunkero nafa gante fula dandiineemmota kulanno. Hattono woshshaado amaddannonkekki gede hooꞌla dandiineemmo gara rosiisannonke. Sheexaanu manna woshshaadate horoonsiꞌrannoti lame qara woshshaado naaxxatenna hafuurrete. Isi lowo kume diro, kuri busha akatta horoonsiꞌre lowo manna woshshaadino. Sheexaanu ittannore wore woy woshshaado wore cea amadanno ugaaxaanchi gedeeti. (Erm. 5:26) Ninke kayi Sheexaanu woshshaadankera diwodhineemmo. Mayira yiniro, Yihowa isi ninke woshshaadate horoonsiꞌranno xagarro kulinonke.—2 Qor. 2:11. w21.06 14 guf. 1-2

Ammanaminohu geerru roduuwinke muxxe jirooti. Maganu Qaali togoohu jajjabbu roduuwi awuuwe baꞌlattote gede ikkitinota kulanno. (Law. 20:29) Kuri roduuwi muxxe jiro ikkinota kayi wodancha hoongammora dandiineemmo. Geerru roduuwi muxxe jiro ikkinota wodanchitino wedellooti maalaamittete jironni roorinore afidhanno. Ammanaminohu geerru roduuwi Maganu Yihowa albaanni muxxete. Isi giddoyidi ayimmansa egennino; qoleno kaajja akattansa lowo geeshsha naadanno. Geerru roduuwi Yihowara lowo diro ammanante soqqante afidhino hayyo wedellu roduuwira kultanno woyite isi hagiidhanno. (Iyo. 12:12; Law. 1:1-4) Yihowa kuri roduuwi cincite heedhino garano naadanno. (Mil. 3:16) Kore roduuwa mittu qarrino amade diegenninonsa yaa diꞌꞌikkino; ikkirono Yihowara noonsa ammana horo dishoshshoggitino. Insa halaale macciishshitu yannanni roore xa hexxonsa xabbe leeltannonsa. Qoleno insa, “geedhimmate yannara nafa” suꞌmasi dudubbanno daafira Yihowa baxannonsa.—Far. 92:12-15. w21.09 2 guf. 2-3

Yannate kiiro ninkeneeto layiꞌra danchate. Ninkeneeto togo yine xaꞌma dandiineemmo: ‘Aneneeto wolootu ledo hewisiise insa rooroommoha lawiero hagiidheemmo? Songote giddo mito looso diinaggaawe looseemmohu baalanka roduuwa woy mito roduuwa roorateetinso Yihowa hagiirsiisateeti?’ Qullaawu Maxaafi ninkeneeto wolootu ledo heewisiinseemmokki gede amaalannonke. Mayira? Ninkeneeto wolootu ledo heewisiinseenna roorroommoha lawinkero naaxxinammora dandiineemmo. Qoleno ninkeneeto wolootu ledo heewisiinseenna wolootu roortinonkeha lawinkero hexxo mudhinammora dandiineemmo. (Rom. 12:3) Yihowa minisira abbinonkehu xumuulle, coyiꞌrate dandoo noonkere woy mannu baxannonkere ikkinoommohura ikkikkinni, iso baxatenna Beettosi macciishshate hasatto noonkehura ikkinota qaaga hasiissannonke.—Yoh. 6:44; 1 Qor. 1:26-31. w21.07 14-15 guf. 3-4

Wodaninke haarooꞌmanno gede, huuccatto assiꞌra, Maganu Qaale nabbawanna hiinca hasiissannonke. Kuri coyibba assa agurtooti, hattono Yihowa jawaante aannohe gede huucciꞌri. Qullaawu ayyaanisi ateneeto wolootu ledo heewisiisate hedo qeeꞌlatto gede kaaꞌlannohe. Naaxxatenna hinaasate akati giddokki muꞌranni nooha ikkiro, Yihowa tini gara ikkitinokki akatta nooheta huwatatto gedenna bayichonko buqqisse hooꞌlatto gede kaaꞌlannohe. (2 Dud. 6:29, 30) Yihowa wodaninketa afino. Qoleno isi, tenne busha alamenna guuntete xeꞌnenke ledo gaarammanni heeꞌnoommota afino. Yihowa kuri busha coyibba ledo lowo geeshsha gaarammanni heeꞌnoommota laꞌꞌanno woyite, albinni roore baxannonke. Yihowa mageeshshi geeshsha baxannonkero leellishate, amatenna qaaqqise mereero noo baxille lawishsha asse horoonsiꞌrino. (Isa. 49:15) Yihowano isira woꞌma lubbonkenni soqqamate sharrammeemmota laꞌꞌanno woyite, konni garinni baxannonketa afanke lowo geya jawaachishshannonke! w21.07 24-25 guf. 17-19

Yihowara soqqammammora uyinanninke loosi ikkihano ikkiro, wolqanke assitu deerrinni diinaggaambe loonsummoro, hagiirrinke lexxanno. Sabbakate looso laalaatte loosi; hattono songoꞌne ledo gamba yite loosi. (Soq. 18:5; Ibi. 10:24, 25) Songote gambooshshiwa jawaachishshanno dawaro qola dandaatto gede, seekkite qixxaabbe haꞌri. Kiristaanu Heeshshonna Soqqansho gambooshshira uyinanniheta aye kifileno shiimuri gede assite laꞌooti. Songote giddo mito looso kaaꞌli yinihero, yannante marte kaaꞌli; hattono ammaꞌninanniha ikki. Uyinanniheha aye loosono loosatto woyite, mulla yannakki guxxitanni noottohu gede assite heddooti. Dandookki woyyeessiꞌrate sharrami. (Law. 22:29) Yihowa loosira diinaggaawitto deerrinni, ayyaanaamittetenni rakke lophatto, hattono hagiirrikki lexxanno. (Gal. 6:4) Qoleno, ati halchootto qoosso wolootu afidhanno woyite, insa ledo hagiidha qarra diꞌꞌikkitannohe.—Gal. 5:26. w21.08 22 guf. 11

Naaxxa qorophe hattono Yihowawiinni rosse. Wodanu dhibbi wodanu garunni loosannokki gede assannonte gede, naaxxano Yihowa biddishshira hajajama qarra ikkitannonke gede assitanno. Farisootu wodaninsa dillaawanno gede assidhino daafira, Yesuusira Maganu ayyaani noositanna isi Maganu Beetto ikkinota leellishshannota xabbe leeltanno taje ammana gibbino. (Yoh. 12:37-40) Tini ikkitonsa hegere heeshsho hoogganno gede assitinonsa daafira lowo geeshsha gawajjitinonsa. (Mat. 23:13, 33) Maganu Qaalinna ayyaanisi quxannonke gede hattono hedonkenna assootenke biddi assanno gede assiꞌra lowo geeshsha hasiissannote! Yaiqoobi umosi heeshshi assannoha ikkino daafira Yihowawiinni rosate maahoyye yiino. Qoleno isi worba rosiisaancho ikkinohu umosi heeshshi assannoha ikkino daafiraati. w22.01 10 guf. 7

Jaante huucciꞌnummoro iimi Anninke Yihowa macciishshannonketa addaxxa dandiineemmo. (Qol. 4:2) Yihowa dawaro qolikki keeshshinoha lawinkero nafa, isi “hasiissanno yannara” dawaro qolankera qaale eino. (Ibi. 4:16) Hakko daafira, mittu coyi ninke hendoommo yannara ikka hoogiro, horonta Yihowa busha assa dihasiissannonke. Lawishshaho, batinyu manni Maganu Mangiste tenne busha alame huntanno gede lowo diro huucciꞌranni keeshshino. Yesuusino hatto yine huucciꞌneemmo gede rosiisino. (Mat. 6:10) Kayinni mittu manchi goofimarchu mannu hedino yannara daa hoogino daafira hexxo mudhe ammanasi shoshshoggitara wodhiro, hatti lowo gowwimmaati! (Imb. 2:3; Mat. 24:44) Yihowa cincine agadhanna ammanatenni iso huucciꞌra hayyote. Yihowa goofimarchu daanno ‘barranna saate’ mure kaino daafira, goofimarchu yannasira daanno. Hatti Yihowa murino yanna baalunkura dancha ikkitanno.—Mat. 24:36; 2 Phe. 3:15. w21.08 10 guf. 10-11

Umonsa heeshshi assitannori jajjabbu roduuwi, dirinsa lexxanni haꞌranno woyite albi geeshsha loosa dandiitannokkita huwattanno. Hanni woradu aliidi laꞌꞌaanonke lawishsha laꞌno. Insara 70 diro ikkannonsa woyite, wole looso loossara koyinsanninsa. Tini shota ikka hooggansara dandiitanno. Mayira yiniro, roduuwansa towaata lowo geeshsha hagiirsiissannonsa. Ikkirono insa konne looso aju roduuwi loossuro woyyannota affino. Konni garinni insa hunda Israeelete manni mereero noo Leewaawooti faale hadhanno; hakkawaro Leewaawootu 50 diro woꞌmannonsa woyite xaadooshshu dunkaani soqqanshonsa uurrissanno gede kullanninsa. Kuri jajjabbu Leewaawooti uyinanninsa loosi ikkihano ikkiro hagiirrunni loossanno. Insa wolqansa assitu deerrinni diinaggaabbe loosse, wedella Leewaawoota kaaꞌlitanno. (Kir. 8:25, 26) Alba woradu aliidi laꞌꞌaano ikkite soqqantino roduuwinke, albi gede batinye songuwa towaattannoha ikka hoogirono, xa noo songonsa lowo geeshsha kaaꞌlitanninna jawaachishshanni no. w21.09 8-9 guf. 3-4

Yesuusi Luqaasi 15:11-32 qaetenni fule baino beettire kultannota jawaachishshanno xagge coyiꞌrino. Kuni beetti annisira finqile, qaetenni fule “xeerto gobba” haꞌrino. Isi marinowa maaeela heeshsho heeꞌrino. Qarru amadisita kayinni, assino bunshe heda hanafi. Annisi qaera noo waro dancha heeshsho heeꞌrinota wodanchi. Yesuusi yiino garinni konni beettira wodanisi raga higino. Hakko daafira, qaera hige annasi maaro xaꞌmiꞌrara kai. Kuni beetti lowo geeshsha soꞌrinota wodanchasi danchate. Isi amanyootesi biddi assiꞌra hasiissannosi! Qaetenni fule baino beetti addinta maaro einota leellishannore assino. Kuni lawishshi jawaachishshanno xagge calla diꞌꞌikkino. Tini xagge songote cimeeyyera lowo geeshsha kaaꞌlitannote. Konni lawishshira noohu xintu seeri, cimeeyye mittu jawa cubbo loosino manchi addinta maaro einotanna teꞌee buuxate woꞌnaaltanno woyite kaaꞌlannonsaho. w21.10 5 guf. 14-15

Shafamikki woy baikki gatannori maatiyya? Soqqamaasinchu Phaawuloosi togo yee borreessino: “Ninke shafamannokki gashshoote ragiꞌneemmo daafira Magano galaxxineemmo. Hagiidhanno garinni ayirrinyunninna waajjatenni magansiꞌnosi.” (Ibi. 12:28) Tenne jeefote shafama gedensaanni, gattannoti Maganu Mangiste callate. (Far. 110:5, 6; Dan. 2:44) Gattino yanna lowo geeshsha shiimate! Mannu tenne alamera halama doodhannoha ikkiro, baꞌꞌanno; Yihowara soqqamanna fajjosi wonshate heeshshonsa biddi assiꞌra doodhannoha ikkiro kayinni hegere heeshsho afiꞌranno. Konni daafira tenne lamente giddo mitte doodha hasiissannonsa. (Ibi. 12:25) Sabbakate loosonke loonseemmo woyite, tenne hasiissanno hajo lainohunni mannu mitte doodhanno gede kaaꞌlineemmo. Qoleno Mootichinke Yesuusi coyiꞌrino qaale woꞌmanka woyite qaango; isi togo yiino: “Gosa baalate naqaashshe ikkanno gede kuni Maganu Gashshootihu Danchu Duduwi gobba baalate kulamanno; hatte yannara goofimarchu daanno.”—Mat. 24:14. w21.09 19 guf. 19-20

Cimeeyye, baxxanno manni Yihowara soqqama agureenna dadillitino roduuwa sheshifachishate baxxino hadari nooꞌne. (1 Tes. 5:14) Gambooshshu hanafara albaanninna gambooshshu gedensaanni insa jawaachishate faro hasidhe. Qaensa martine hasaawissensa, hattono huuccatto assensa. Ledonsa soqqamme; woy mito woyite maatete magansiꞌrara koyissensa. Cimeeyye dadillinoha Yihowa geꞌreewo towaata, hattono insara baxillenna shaqqille leellisha hasiissannonsa. (1 Tes. 2:7, 8) Yihowa “baalunku aagintaawe higara” ikkinnina ‘ayino baꞌꞌara dihasiꞌranno.’ (2 Phe. 3:9) Mittu manchi jawa cubbo loosinoha ikkirono, heeshshosi Maganu albaanni muxxete. Yihowa ninke cubbaataammu daafira yee lowo waaga yaano Beettisi wodo baatinota qaagge. Yihowa iso agurtinori wirro isiwa higganno gede baxillunni kaaꞌla hasiꞌranno. Isi insa higganno yee hexxanno; Yesuusi qaetenni fule baino beetti daafira coyiꞌrino lawishshi tenne leellishanno.—Luq. 15:11-32. w21.09 30-31 guf. 17-19

Fayyimmate hoonginni kainohunni sabbakatenna rosiisate looso albi geeshsha loosa dandoottokkihalla ikki? Assa dandoottorinni hagiidha dandaatto. Hanni Moote Daawitinna mannisi maatensanna jajjansa Amaaleqootu anganni gatissu yannara ikkinore laꞌno. Hakkawoyite lamu xibbi labballi lowo geeshsha daafurte olama hooggino daafira, uduunne agarte gattino. Daawitinna mannisi ola qeeltuhu gedensaanni, isi qafadde abbitinore baalunku taalo beeqqitanno gede hajajino. (1 Sam. 30:21-25) Alamete doyichohu manna rosaano assate loosinkeno hattooti. Konne looso loosate dandaaminsare baala assitannori baalunku, mittu manchi Yihowa afe cuuami kiiro taalo hagiidha dandiitanno. Yihowa isira noonke baxillenna diinaggaambe soqqammeemmosi gara laꞌꞌanno. Qoleno isi sabbakate loosira dandiinummore assine hagiidhineemmo gara rosiisannonke. (Yoh. 14:12) Hexxo mudhine agura hoongummo geeshsha Yihowa ninkenni hagiidhannota addaxxa dandiineemmo! w21.10 28 guf. 15-17

Diru akkalle amaddannonke woyite, xaate albi geeshsha Yihowara kaaꞌleemmori dino yine yaandeemmoha ikkara dandaanno. Dhukinke albihu geeshsha ikka hoogara dandaanno; ikkirono afiꞌnoommo hayyonna woꞌnaalsha horoonsiꞌne wedellootu Yihowara woꞌma wolqansanni soqqantanno gedenna wole soqqanshote qoossora ikkadda ikkitanno gede kaaꞌla dandiineemmo. Geerru roduuwi wedella roduuwa kaaꞌla hasidhuro umonsa heeshshi assa hasiissannonsa. Umosi heeshshi assanno manchi wolootu iso roortinohu gede asse hedanno. (Fil. 2:3, 4) Togoo akati noonsari geerru roduuwi, mitto looso Qullaawu Maxaafi ledo sumuu yaanno garinninna danchu garinni loosa dandiinanniti duucha doogga noota huwattanno. Hakko daafira insa, ‘Baalunku manni alba ninke loonseemmo garinni loosa hasiissannonsa’ diyitanno. (Ros. 7:10) Insa wedellu roduuwira kultannoti lowo geeshsha kaaꞌlitanno hayyo noonsaha ikkirono, ‘tenne gobba (alame) dani saꞌꞌanni’ woy soorramanni nootanna haarore rosa hasiissannonsaha ikkara dandaannota huwattanno.—1 Qor. 7:31. w21.09 8 guf. 1, 3

Yihowa tenne maganna gedeeha diꞌꞌikkino; isi magansidhannosire amanyoote bainore asse horo diyaannonsa. Isi woꞌmunni woꞌma qullaawaho. Kakkalaanote biili umoho wodhannohu xaanxoonni koffiyyira albaanni culku migirara noo borro tenne leellishshanno. Tini borro “Kaaliiqira baxxinoho” yitanno. (Ful. 28:36-38) Tenne culku migirira noo borro laꞌꞌanno manni baalu Yihowa addinta qullaawa ikkinota huwatanno. Kayinni kakkalaanote biiliwa shiqe tenne borro laꞌꞌa dandaannokki Israeelichina? Isira tini kaajja sokka gatte baꞌannosi? Gatte dibaꞌannosi! Seera nabbambanni woyite baalanti Israeele yaano labballuno meentuno hattono qaaqquulluno tenne macciishshanno. (Mar. 31:9-12) Atino hakko seera nabbambanniwa heeꞌroottoha ikkoommero, togo yine nabbambanna macciishshatto: “Ani Kaaliiqi Maganiꞌne qullaawahona, kiꞌneno qullaawoota ikke.” “Kiꞌne anera baxxitine qullaawoota ikkitinannie. Ani Kaaliiqi qullaawahona.”—Lew. 11:44, 45; 20:7, 26. w21.12 3 guf. 6-7

Mitootu maalaamittete coyira, yaaddara dandiitanno. Insa heedhannohu miinju qarri noo gobbara ikkara dandaanno. Insara maatensara hasiisannore hidhate ikkanno geeshshi woxe afiꞌra qarra ikkitansara dandiitanno. Woy maatensara loose woxe abbannohu reyinoha ikkara dandaanno; tini qolte maate woxe hoogge qarrantanno gede assitanno. Yaada agurre Yihowa addaxxanke kaaꞌlitannonke. Baxillaanchu Anninke Yihowa ayyaanaamittete coye balaxisiinseemmoha ikkiro maalaamittete hasiisannonkere wonshate qaale einota qaango. (Mat. 6:32, 33) Isi woꞌmanka woyite eino qaale wonshanno. (Mar. 8:4, 15, 16; Far. 37:25) Yihowa ceatenna daraarote nafa hasiisannonsare wonshannonsaha ikkiro, ninkerano hasiisannonkere wonshannonke daafira maa inteemmo woy maa uddiꞌneemmo yine yaada dihasiissannonke! (Mat. 6:26-30; Fil. 4:6, 7) Annuwunna amuuwu qaaqquullensa baxxanno daafira maalaamittete hasiisannonsare shiqishshannonte gede, iimi Anninkeno mannasi baxanno daafira maalaamittete hasiisannore wonshannonsa. w21.12 17 guf. 4-5; 18 guf. 8

Mittu manchi woy ammanate rodiikki lowo geeshsha miice egenninohe? Hanni Yooseefi lawishsha wodanchi; iso roduuwisi baasa gawajjitinosi. Isi Yihowara soqqamate dandiire baala assino; Yihowano iso cince kaajjino daafira lowo geeshsha maassiꞌrinosi. Gedensoonni Yooseefi roduuwisira gatona yee saꞌꞌa dandiino; Yihowa maassiꞌrinositano laino. (Kal. 45:5) Yooseefi gede ninkeno, Yihowawa shinqeemmoha ikkironna coyenke isi taashshara agurreemmoha ikkiro, shesho afiꞌneemmo. (Far. 7:17; 73:28) Mannu miicannahe cincite noottoha woy wolu coyinni xissiisidhanni noottoha ikkiro, Yihowa “dadillunni hiiqqantinorira” mule noota deꞌooti. (Far. 34:18) Cincakkiranna duhakki isi aana tuqqatto daafira, Yihowa baxannohe. (Far. 55:22) Isi uulla woꞌmate Daanyaati. Isira goꞌlinori mitturino dino. (1 Phe. 3:12) Tira dandaattokki qarri giddo noottoha ikkiro, cincite Yihowa agadhatto? w21.08 11 guf. 14; 12 guf. 16

Heeshshonkenni Yihowa hagiirsiisannore assa hayyote. Balaxisiisa hasiissannore balaxisiisa hasiissannonke. Yannanke danchu garinni horoonsiꞌrate, mito woyite soꞌro afiꞌrinokkihu lamu coyi giddonni mitto doodha hasiissannonke. Yesuusi Maariyaaminna Maarta minira haꞌrinota kultannoti lowo manni afino xagge tenne hedo luphi assite leellishshanno. Wosincho adha baxxannoti Maarta, Yesuusi minisera marita lowo geeshsha hagiidhitinoti dihuluullissannote; ise iso wosinsiꞌrate lowo sagale worate kaꞌino. Maariyaami kayinni Mootichise rosiisannore macciishshate mulesi ofoltu. Maarta assitino coyi soꞌro ikka hoogirono, Yesuusi Maariyaami “dancha coye doodhitino” yiino. (Luq. 10:38-42) Yannate gedensoonni Maariyaami hatte yannara shiqqino sagale habbinoha ikkara dandaanno; Yesuusi rosiisino roso kayinni horo habbinokkiti dihuluullissannote. Maariyaami hattee Yesuusi ledo sayissinota shiima yanna lowori gede assite laꞌinonte gede, ninkeno Yihowa ledo sayinseemmo yanna lowori gede assine laꞌneemmo. w22.01 27 guf. 5-6

Akiaabi Yihowa albaanni umosi shollishinoha ikkirono, hakkuyi gedensaanni assinori addinta maaro einokkita leellishanno. Isi gashshootisi giddonni Baꞌꞌaali ammaꞌno hunate diwoꞌnaalino. Mannu Yihowa magansiꞌranno gedeno dijawaachishino. Akiaabi reyihu gedensaanni, Yihowa hakkonne mancho ma garinni laꞌꞌannoro coyiꞌrino. Maganu masaalaanchi Iyu, Akiaabi ‘bushu’ yiino. (2 Dud. 19:1, 2) Hanni tenne hedi: Akiaabi godowinta maaro einoha ikkoommero, masaalaanchu iso Yihowa giwannoho busha manchooti yaannoni? Addanko, Akiaabi mito geeshsha gaabbinoha ikkirono, addinta maaro dieino. Akiaabi assinorinni maa ronseemmo? Akiaabi, Eeliyaasi Yihowa maatesi qorichishara kainota kulisi woyite, mito geeshsha umosi shollishino. Hatto assasi danchate. Ikkollana isi gedensoonni assinori godowinta maaro einokkita leellishanno. Konni daafira, maaro eate yaa shiima yanna dadilla calla diꞌꞌikkitino. w21.10 3 guf. 4-5, 7-8

Isayaasi masaalaanchoho; minaamasino ‘himanaanchote’ yinoonni daafira iseno masaalo coyidhannota ikkitukkinni digattino. (Isa. 8:1-4) Isayaasinna minaamasi heeshshonsa giddo Yihowa magansiꞌra balaxisiisino. Xaa yannara noo minaannuwinna minaamuwino Yihowara soqqamate dandiire baala asse heeshshonsa giddo Yihowara soqqama balaxisiisa dandaanno. Insa Qullaawu Maxaafi masaalo mitteenni xiinxalle hattono tini masaalo woꞌmanka woyite woꞌmitanno gara wodanche Yihowara noonsa ammana kaajjishiꞌra dandaanno. (Tit. 1:2) Qoleno insa mite Qullaawu Maxaafi masaalo woꞌmitanno gede kaaꞌla dandaanno gara hiinca dandaanno. Lawishshaho insa, Yesuusi goofimarchu daara albaanni dancha duduwo gobba baalate dudumbanni yee masaalino masaalo woꞌmitanno gede kaaꞌla dandiitanno. Minaanninna minaama Qullaawu Maxaafi masaalo woꞌmitanni noota buuxi kiiro, dandii deerrinni Yihowara albinni roore soqqamate murciꞌranno. w21.11 16 guf. 9-10

Yesuusa amasiri yaachishinosi; ise hatte yannara gunnitte ikkitukki digattino. Yesuusi Maariyaami baxannonna mararannose daafira, ayyaanaamittetenni towaatannose gede Yohaannisira eeggo uyiꞌrino. Hakko barrinni kayise Yohaannisi Maariyaamira beettise gede ikke, amasi gede asse towaatinose. Yesuusi anje heeꞌreenna towaaxxitinositanna reyi woyite mulesi noota tenne ayirrado mancho lowo geya baxannoseta leellishino! Yesuusi coyiꞌrinorinni maa ronseemmo? Ammanate roduuwinke ledo noonke aante, muli fiixinke ledo noonke aantenni roortara dandiitanno. Fiixinke giwankera woy kaadankera nafa dandaanno; kayinni Yesuusi yiino garinni, Yihowawanna dirijjitesiwa gamba yine heeꞌnummoro “xibbe ero” afiꞌneemmo. Lowo roduuwi oosote, amatenna annu gede ikkitannonke. (Maq. 10:29, 30) Ammanatenni hattono Yihowaranna mimmitoho noonsa baxillinni mittooꞌmitinote ayyaanaamittete maate miila ikkakkinni mayi macciishshamannohe?—Qol. 3:14; 1 Phe. 2:17. w21.04 9-11 guf. 7-8

Bagamannokki baxilli woloota kaaꞌlate dandiinummore baala assineemmo gede assannonke. Hundi warite Maganu soqqamaano gede xaa yannara noori batinyu roduuwino ammanate roduuwinsara wole agurina affe egentinokkirira nafa bagamannokki baxille leellishshanno. Lawishshaho, kalaqamu dano iillitanno woyite insa bayichonkonni roduuwa kaaꞌlitanno gara afa hasidhanno. Songote giddo mitto rodoo angate anje qarrissinosita affuro konne rodoo ma garinni kaaꞌla dandiitannoro afate woꞌnaaltanno. Insa umi xibbi diro Meqedooniyaho heeꞌrino manni gede roduuwansa kaaꞌlate assa dandiitannohunni saꞌe assitino. Insa uminsa horo agurte angate anje noonsa roduuwa kaaꞌlate “wolqansara aleenni” uyitino. (2 Qor. 8:3) Xiinxallootu songote cimeeyye, roduuwu woloota kaaꞌlate shaqqillunni assitannore laꞌanno woyite insa galattannonsa. Konni garinni maltino yannara galata, roduuwu jawaattanno gedenna woloota kaaꞌla agurtannokki gede assitannonsa.—Isa. 32:1, 2. w21.11 11 guf. 14; 12 guf. 21

Ninke baalunkura amaale hasiissannonke woyiti no. Mito woyite uminkenni kaꞌne mitto ayirrinseemmo mancho amaale xaꞌmiꞌnammora dandiineemmo. Wole woyite kayinni mittu ninkeri huluullisinosi rodii ganaanni gaabbineemmo gede assitannonke ‘soꞌro loonsammora’ kaꞌnoommota kulankera dandaanno. (Gal. 6:1) Woy jawa cubbo loonsummohu gedensaanni seejjinankera dandiinanni. Amaallanninke gari ikkihano ikkiro amaale macciishsha hasiissannonke. Togo assanke kaaꞌlitannonke hattono heeshshonke gatissanno! (Law. 6:23) Techohu barru qummeeshshi, ‘egennaamu coyiꞌrannore macciishshineemmo’ gede jawaachishannonke. Baalankare afino manchi dino; ikkirono ninketenni roortino egenno woy woꞌnaalshi noosi manchi nooti dihuluullissannote. (Law. 12:15) Hakko daafira, amaale macciishsha umonke heeshshi assineemmore ikkinoommota leellishshanno. Qoleno assa dandiineemmokkiri nootanna mixonke wonshiꞌrate kaaꞌlo hasiissannonketa huwantoommota leellishshanno. Hayyichu manchi Moote Selemooni, “Malu seyiro . . . halchinoonniri woꞌmanno” yee borreessino.—Law. 15:22. w22.02 8 guf. 1-2

Addinta maaro eate yaa loonsoommo cubbira soꞌroommo yaa calla diꞌꞌikkitino. Cubbo loosino manchi wodanasinna hedosi biddi assiꞌra hasiissannosi. Tenne assate cubbo loosa aguranna Yihowa seerinni gala hasiissannosi. (Hiz. 33:14-16) Cubbo loosino manchi roore mitiiꞌma hasiissannosihu alba Yihowa ledo noosi jaalooma qoꞌlateeti. Mittu muli jaalinke jawa cubbo loosinota anfummoro maa assa hasiissannonke? Loosino cubbo maaxate woꞌnaalleemmoha ikkiro, jaalanke gawajjinannilla heeꞌnoommo. Qoleno Yihowa baalankare laꞌꞌanni noo daafira, cubbo maaxa didandiinanni. (Law. 5:21, 22) Songote cimeeyye kaaꞌlitasira hasidhannota qaagiissite jaalakki kaaꞌla dandaatto. Jaalikki loosino cubbo cimeeyyete kula giwiro, cimeeyyete ati kula hasiissannohe; hatto assakki jaalakki addinta kaaꞌla hasiꞌrattota leellishshanno. w21.10 7 guf. 19-21

Ninke baalunku, Yesuusi gede uminke hasattonni roore wolootu hasatto balaxisiisa rosa hasiissannonke. Qullaawu Maxaafi Yesuusi, “borojjichu daniha” ikkinota kulanno. (Fil. 2:7) Mittu borojjichi woy soqqamaanchi mootichasi hagiirsiisanno faro hasiꞌranno. Yihowa borojjoota ikkinoommohuranna roduuwanke kaaꞌlineemmo daafira, albinni roore Yihowa hagiirsiisannorenna roduuwanke kaaꞌlannore assa hasiꞌneemmoti dihuluullissannote. Kiꞌneneeto togo yitine xaꞌme: ‘Umiꞌya horo agure woloota kaaꞌlate maahoyye yeemmo? Qoqqowu gambooshshi bayicho woy Gambooshshu Addaraashe feyanno manni hasiisiro feyate maahoyye yeemmo?’ Hanni woyyeessiꞌra hasiissannoheri nooheta wodanchoottoha ikkirono hatto assate hasatto hoogootto yine hendo. Hatto ikkiro Yihowa eeggifatte huucciꞌri. Macciishshamannohere Yihowara hasaaphi; hattono isi, ‘hasattonna wolqa’ aannohe gede huucciꞌri.—Fil. 2:13, NW. w22.02 22-23 guf. 9-11

Yesuusi qarrisanno coyi giddo noo yannara nafa jooganna quwa saꞌꞌannokkiha ikke shaqqado ikkasi leellishino. (Mat. 11:29, 30) Lawishshaho mitte Kanaꞌꞌaanitte mancho qaaqqose hursanno gede huuccidhuta, isi umi qara giwino; kayinni ise kaajja ammana nooseta leellishshuta qaaqqose shaqqillunni hursino. (Mat. 15:22-28) Yesuusi shaqqado ikkirono amaale hasiissanno yannara amaalikkinni diagurino. Isi mito woyite shaqqille leellishinohu baxanno manna kaajjishe amaaleeti. Lawishshaho, Yesuusi Yihowa fajjo assannokki gede Pheexiroosi ataawe ikkasira woꞌnaalita isi Pheexiroosi wolootu rosaano albaanni seejjino. (Maq. 8:32, 33) Yesuusi hatto assinohu Pheexiroosi saalsiisate ikkikkinni iso qajeelsateetinna wole rosaanono eessannonsakkirira eꞌannokki gede qorowisiisateeti. Pheexiroosi mito geeshsha saalinoti dihuluullissannote; ikkirono uyinoonnisi seejjo kaaꞌlitinosi. Baxattorira shaqqille leellishate mito woyite insa kaajjishshe amaala hasiissannoheha ikkara dandaanno. Hatto assatto woyite amaalatto amaale Maganu Qaali aana xintantinota ikkitanno gede assite Yesuusi lawishsha harunsi. w22.03 11 guf. 12-13

Yihowa galaxxineemmo woyite iso magansiꞌnanni heeꞌnoommo. (Far. 34:1) Yihowata dhagge ikkitanno akattanna loosino loosi daafira wolootaho kulle iso galaxxa dandiineemmo. Galanteemmore ikkinummoro Yihowa guwinseemmo gede assannonkehu batinyu coyi noonke. Yanna gaaꞌmine Yihowa danchumma yaano assinonke coye baala hiincineemmoha ikkiro iso galaxxineemmo gede assannonkere dihoongeemmo. Sabbakate loosi ‘Maganoho suumenkenni galatu kakkalo’ shiqishiꞌneemmota kaajja faro fanannonke. Yihowa huucciꞌnammora albaanni mayine huucciꞌneemmoro seekkine hendeemmonte gede, soqqanshonniwa xaandeemmo manna mayine hasaawinseemmorono seekkine heda hasiissannonke. Shiqishiꞌneemmoti “galatu kakkalo” lowo geeshsha dancha ikkitara hasiꞌneemmo. Wolootaho halaale kulleemmo woyite woꞌma giddonkenni kulleemmohu iseraati. w22.03 21 guf. 8