Woxawaajje

Yesuusi angasinna lekkasi misimaaretenni haqqaho qolte gantinori Roomu olanto daafira coyiꞌranni nooha ikkikki digatino. Yesuusi beebba assiꞌnoonnisiha ikkirono dicaaccaawino, hattono koma diamaxxino. (1 Phe. 2:23) Yesuusi gede, ninkeno woloota gatona yaa hasiissannonke. (Qol. 3:13) Mitu manni wole agurina fiixinke nafa ammananke woy Kiristaanu heeꞌranno heeshsho huwata hoogino daafira giwankera dandaanno. Insa ninke daafira kapho coyidhara, mannu albaanni shollishshankera, borronke huntara wole agurina gawajjitannonketa kulte waajjishiishshankera dandiitanno. Gibbannonkerira koma amaxxantenni, Yihowa halaale huwattanno gede wodanansa fananno gede huuccatto assiꞌra dandiineemmo. (Mat. 5:44, 45) Hakko iso wolootu lowo geeshsha miiccinonkeha ikkiro, mito woyite insa gatona yaa qarra ikkitankera dandiitanno. Ikkollana aaraambeemmohanna koma amande keeshshineemmoha ikkiro, tini ninke umonke gawajjitannonke. (Far. 37:8) Mitto mancho gatona yineemmo woyite, isi assinonkehu gara ikkinokki coyi aaraambeemmo gede assannonketa hooꞌlinanni heeꞌnoommo.—Efe. 4:31, 32. w21.04 8-9 guf. 3-4

Baxxinanni manni songotenni bohaminoni? Kuni lowo geeshsha dadillisanno coyeeti! Yihowa maatesi giddo noori mite sokkaasine iso agurtu woyite mageeshshi geeshsha dadillinoro hanni hedi! (Yih. 6) Qoleno baxanno mannisi Israeele xaa xaa isira finqiltu yannara Yihowa mageeshshi geeshsha xissiisiꞌrinoro heda dandaatto. (Far. 78:41) Baxillaanchu iimi Anninke, baxxinanni manni isira soqqama aguranno woyiteno dadillannoti dihuluullissannote. Isira dadilliꞌnenna xissoꞌne leeltannosi. Mararanno Anna ikkino daafira, hasiissannoꞌne jawaante aannoꞌne, hattono irkisannoꞌne. Annunna ama baxxanno beettinsa woy beettonsa Yihowara soqqama agurtanno woyite, beettonsa kaaꞌlate assa hasiissannonsari gatinoha lawansara dandaanno. Mittu rodii togo yiino: “Bushu aneeti yee hedoommo. Qoleno goxoommowa bararraaqeemmo.” Hattonni beettise bohaminoti mitte rodoo togo yitino: “Ama assa hasiissannosere assoommaha dilawannoe. Qaaqqiꞌya wodanira halaalu qaꞌmanno gede assa didandoomma yaate yee hedoomma.” w21.09 26 guf. 1-2, 4

Mitu manni Yihowa Farciꞌraasine egennaminohu Qullaawu Maxaafi rosi mine eꞌe rossinokki daafira Maganu Qaale rosiisa didandiitanno yee hedanno. Insa kayinni halaale buuxa hasiissannonsa. Wongeellu borreessaanchi Luqaasino hatto assate sharramino. Isi ‘uminni kayise baalanke coye xiinxalle laino.’ Luqaasi Wongeellasi nabbawanno manni Yesuusi daafira macciishshinori ‘halaalaancho ikkinota seekke afara’ hasiꞌrino. (Luq. 1:1-4) Hunda Beeriyaho heeꞌrinohu Yihudu mannino Luqaasi gede seekke xiinxallino. Insa umo Yesuusi daafira kulannoha dancha duduwo macciishshitu woyite, rossinori halaale ikkinota buuxate Ibiraawootu Afiita Qullaawa Borro seekkite laꞌino. (Soq. 17:11) Ninkeno ronsoommore seekkine buuxa hasiissannonke. Maganu manniwiinni ronsoommore, Qullaawa Borro yitannori ledo taashshine laꞌꞌa hasiissannonke. Qoleno yannankera noohu Yihowa manni daafira kultanno xagge xiinxalla hasiissannonke. Coye kaimunni seekkine xiinxallineemmoha ikkiro, mitto coye mulla kaꞌne digimbeemmo woy mannu yiinotera hoode dihaꞌneemmo. w21.05 3 guf. 7-8

Songoꞌne giddo wosinsiꞌra dandaattohu no? Ammanate roduuwinke ledonsa yanna sayinsummoro roore hagiidhitanno yanna heedhara dandiitanno. Mitu roduuwinkera ayyaanu barra Yihowa Farciꞌraasine ikkinokki fiixinsa ledo hosa qarra ikkitansara dandiitanno. Mitootu shiidhino barri iillanno woyite lowo geya dadillitannoha ikkara dandaanno. Togoori iillinonsa roduuwi ledonke yanna sayissanno gede koyinseemmo woyite, insa daafira godowinta hendeemmota leellinsheemmo. (Fil. 2:20) Mittu Kiristaanchira callimma macciishshantannosi gede assannohu lowo coyi no. Ikkirono Yihowa togoo hedo macciishshantannonsa woyite tenne afannota mittoreno dihuluullammeemmo. Isi duucha woyite ammanate roduuwinke widoonni hasiisannonkere aannonke. (Mat. 12:48-50) Ninkeno dandaaminke deerrinni ayyaanaamittete maatenke kaaꞌlate sharrammeemmoha ikkiro, Yihowa assinonkerira galatu noonketa leellinsheemmo. Mito woyite macciishshantannonke hedo ikkitutano ikkituro, Yihowa ledonke noo daafira callootanke diꞌꞌikkinoommo! w21.06 13 guf. 18-20

Yesuusi mitu manni sokkasi macciishsha giwirono, hexxo mudhe farciꞌra diagurino. Mayira? Isi mannu halaale macciishsha hasiissannonsata afino; qoleno dandaamisi deerrinni lowo manni Maganu Mangiste sokka macciishshanno gede kaaꞌla hasiꞌrino. Hakkiinnino sae, umi qara sokkasi macciishsha giwinohu mitu manni gedensoonni kayi macciishshannota afino. Hanni maatesi giddo ikkinore laꞌno. Yesuusi soqqaminohu sasu dirinna lewu agani giddo, roduuwisi giddo rosaanosi ikkinohu dino. (Yoh. 7:5) Ikkirono isi reyotenni kaihu gedensaanni insa rosaanosi ikkitino. (Soq. 1:14) Rosiinseemmoha Qullaawu Maxaafi halaale gedensoonni macciishshe adhannohu ayetiro dianfoommo. Mitu manni sokkanke macciishshe adhannohu lowo yanna gedensaanni ikkara dandaanno. Kulleemmonsa sokka macciishsha hasiꞌrannokki manni nafa, dancha amanyootenke lae gedensoonni ‘Magano galatara’ dandaanno. w21.05 18 guf.17-18

Yesuusi uullate aana noo yannara harunsaanosira lame gafa afiꞌrino looso uyinonsa. Isi Maganu Mangisteha dancha duduwo sabbakkanno gede kulinonsa hattono tenne assa dandiitanno gara leellishinonsa. (Luq. 8:1) Lawishshaho Yesuusi rosaanosi, mannu Maganu Mangiste sokka macciishshe adhanno woyite maa assa hasiissannonsaro hattono macciishsha giwanno woyite maa assitannoro kulinonsa. (Luq. 9:2-5) Qoleno Yesuusi harunsaanosi “gobbate qacce geeshsha” sabbakkannota kule, kuni loosi mageeshshi geeshsha halaꞌlannoro masaalino. (Mat. 24:14; Soq. 1:8) Harunsaanosi mannu isi hajajinore baala agadhanno gede rosiissarano kulinonsa. Yesuusi konne looso “gobbate goofimarchi geeshsha” yaano, yannanke geeshshano loonsannita coyiꞌrino. (Mat. 28:18-20) Qoleno isi ajuujatenni Yohaannisi hasaawisi woyite, baalanti rosaanosi mannu Yihowa daafira rosanno gede kaaꞌla hasiissannonsata coyiꞌrino.—Aju. 22:17. w21.07 2-3 guf. 3-4

Xaa yannara batinyu manni umonsa calla baxanno daafira wolootu ledo heewisamanno. Mittu daddalaanchi woloota roorate yee insa gawajjannore assara dandaanno. Ispoortete heewo heewisantannori qeelate yite ledonsa heewisamannoha affanni heedhenni gawajjitara dandiitanno. Fonqolo fonqolamanno rosaanchi egennantino yuniversite eate yee fonqolo moorara dandaanno. Ninke Kiristaana ikkinoommo daafira kuni assooti gara ikkinokkita anfoommo; togoo assooti ‘maalu loosooti.’ (Gal. 5:19-21) Ikkollana mite Yihowa soqqamaano affukki nafa songote giddo heewo kaꞌanno gede assitara dandiitanno? Heewo roduuwu mittimma daaffara dandiitannohura tenne daafira heda hasiissannote. Qoleno Qullaawu Maxaafi giddo kulloonnihu, heewote akatta giwinohu Yihowara ammaname soqqamino manni lawishsha laꞌneemmo. w21.07 14 guf. 1-2

Bagamannokki baxilli hexxo mudhitinore kaaꞌlineemmonsa gede assannonke. Xaa yannara noori shaqqaddu roduuwino dadillitinore woy hexxo mudhitino roduuwanke agurtukkinni kaaꞌlitannonsa. Insa roduuwansa baxxanno hattono insa kaaꞌlate dandiiture baala assa hasidhanno. (Law. 12:25; 24:10) Soqqamaasinchu Phaawuloosi togo yee jawaachishinonke: “Waajjaleeyye jawaachishshe, wolqiweeloota kaaꞌle, manna baala dandee.” (1 Tes. 5:14) Hexxo mudhitino roduuwanke duucha woyite kaaꞌla dandiineemmoti kaajja doogo, hasaaphitanno woyite seekkine macciishshatenna banxeemmonsata affanno gede assate. Yihowa, muxxe soqqamaanosi shaqqillunni kaaꞌlate assitinannire dihawanno. Lawishsha 19:17 togo yitanno: “Buxanete aannohu Kaaliiqira liqiissanno; Kaaliiqino assino danchummara aannosi.” w21.11 10 guf. 11-12

Albillitte dagganno yannara xaanni qixxaawate maa assa dandiineemmo? Noonkerinni kassi yaanna Yihowa ledo noonke jaaloominni lowo geeshsha hagiidha hasiissannonke. Magano roore anfummo kiiro, isi Maagoogi Googi siꞌꞌi yannara ninke gatisate dandoo noosita albinni roore ammanneemmo. Techohu barru qummeeshshira noo yaatto Daawiti Yihowa kaaꞌlannosita addaxxinohu mayiraatiro leellishshanno. Daawiti duucha woyite Yihowa addaxxanno; Maganisino horo irraawise diegenninosi. Daawiti wedellichu noo yannara jigeessunna wolqaataamu Filisxeemichi Goliyaadi ledo gaaramino; isi Gooliyaadi togo yiino: “Kaaliiqi techo ate angaꞌyara sayise aannohe.” (1 Sam. 17:46) Gedensoonni Daawiti Moote Saaoolira soqqamanni heeꞌreenna Saaooli iso duucha hige shaate woꞌnaalino. Yihowa kayinni “Daawiti ledo no.” (1 Sam. 18:12) Daawiti, Yihowa hakkuyira albaanni kaaꞌlinosi daafira, xa iillanni noosi qarrirano Yihowa addaxxa hasiissannosita afino. w22.01 6 guf. 14-15

Yihowa aye loosono loosanno woyite, loososi gudate hasiissanno yanna ikkitu geeshshitano ikkituro dimuddamanno. Isi hatto assannohu suꞌmisi ayirranno gedeetinna wolootano kaaꞌlateeti. Lawishshaho, hanni Yihowa baatto mannu oosora dirimu dirimunni qixxeessino gara laꞌno. Qullaawu Maxaafi tenne daafira kulanni, “ise aana bikkinanni siiwo” ganinota, ‘safo tuuqinota’ hattono “dhaawate kincho” kaasinota kulanno. (Iyo. 38:5, 6) Isinni Yihowa kalaqinore haja asse laino. (Kal. 1:10, 12) Sokkaasine Yihowa haaro coye kalaqanna laꞌu kiiro hiitto ikkitinoha lawannohe? Insa lowo geeshsha dhagge assidhinoti dihuluullissannote! Mitte higge isinni insa hagiidhite “ilillissino.” Tennenni maa ronseemmo? Yihowa baatto, beeddahenna heeshshote kalaqama baala kalaqe gudinohu lowo kumi diri giddooti; ikkirono, Yihowa kalaqinoha mitto mittonka coye hixamanye lai woyite, “lowo geeshsha dancha” ikkinota coyiꞌrino.—Kal. 1:31. w21.08 9 guf. 6-7

Yesuusi lawishshu giddo kuli manchi, doogo haꞌrara kae no. Isi haꞌrara albaanni borojjootasi woshshe, daddaltara taalaante uyinsa. Kuni manchi borojjootisi dandoo hede, mittoho onte taalaante, mittoho lame, mittoho kayinni mitte uyino. Umiri lamu borojjooti uyinoonninsa woxinni seekkite daddalte, mootichinsa woxi lexxanno gede assitino. Sayikki borojjichi kayinni uyinoonnisi woxinni mittoreno diassino; hakko daafira, mootichisi daye iso loosunni hoolino. Uminna layinki borojjichi uyinoonninsa looso lowo geeshsha ayirrissino; qoleno mootichinsara diinaggaabbe soqqantino. Hakko daafira, uyinoonninsa taalaantenni daddalte woxe ero assitino. Insa diinaggaabbe loossino daafira mootichinsa baꞌraasinonsa. Mootichinsa lowo geeshsha hagiidhino; qoleno wole looso nafa lede uyinonsa! w21.08 21 guf. 7; 22 guf. 9-10

Yihowa tenne goofimarchu barruwara cincasi lowota ikkitinota leellishino. Isi ayino baꞌꞌara dihasiꞌranno. (2 Phe. 3:9) Isi baalunku manni aagintaawe higanno gede yanna uyino. Ikkollana cincasi gooffanno yanna no. Maganu Mangistera halama gibbannorira Muse waro Ferioonira iillinori iillannonsa. Yihowa Feriooni togo yiino: “Atenna mannakki dhibbunni ganoommoro, baalunku baattote aaninni gooffinanni. Kayinnilla, reyattokki gede assoommohehu, wolqaꞌya afatto gedenna suꞌmiꞌya gobba baalate ayirranno gede assateeti.” (Ful. 9:15, 16) Daga baalanti halaalaanchu Magani Yihowa calla ikkinota affanno yanna dagganno. (Hiz. 38:23) Techohu barru qummeeshshira kulloonni shafama, Yihowara gashshate qoosso noosita Feriooni gede ammante adha gibbannori hegerera baꞌannota leellishshannote. w21.09 18-19 guf. 17-18

Songotenni baxxinannihu bohameenna dadillitine heedhinoonni? Ikkina songote giddo mitu roduuwi roore dadillitinanni gede assannoꞌnere coyidhuro maa assa dandiitinanni? Baalunku manni gara ikkinore coyiꞌranno yine heda didandiineemmo. (Yai. 3:2) Ninke baalunku guuntete xeꞌne noonkereeti; hakko daafira, mitootu yitannore habbe gurchaabburo woy heddukkinni xissiisannoꞌnere coyidhuro dhagge assidhinoonte. Soqqamaasinchu Phaawuloosi togo yee amaalinonketa qaagge: “Kiꞌne kiꞌneneewa koffi yitinoonni coye baala cincatenni agurre.” (Qol. 3:13) Ammanantinore maatete miilla kaaꞌla agurtinoonte. Wolu woyitinni roore insara kiꞌne baxillinna jawaante hasiissannonsahu xaati. (Ibi. 10:24, 25) Mito woyite, bohamino manchi maate songote giddo mitootu insano bohantinohu gede assite kiirte gambo gibbannonsata wodanchitino. Togoori kalaqamanno gede assinoonke! Roorenkanni anninsa woy amansa bohamino wedelloota galatanna jawaachisha hasiissanno. w21.09 29 guf. 13-14; 30 guf. 16

Jawu rodiinna wedellichu rodii mitteenni hasaawansa lamunkura kaaꞌlitanno. (Rom. 1:12) Hatto assansa, wedellichu rodii Yihowa ammanantino soqqamaasinesi towaatannota albinni roore addaxxanno gede kaaꞌlitanno, jawu rodii kayinni banxannisita huwatanno gede assitanno. Qoleno jawu rodii Yihowa maassiꞌrinosi gara odeessanno woyite tashshi yaannosi. Duucha woyite, diru lexxanni haꞌri kiiro danu xumme ajjanni hadhanno; Yihowara ammanamino manni kayinni dirinsa lexxi kiiro isi albaanni roore xuꞌmanno. (1 Tes. 1:2, 3) Hatto yineemmohu mayiraati? Insa lowo diro Yihowa ayyaani quxannonsa gedenna akatansa biddi assannonsa gede assidhanni keeshshitino. Muxxe geerra roduuwanke albinni roore egennate, insa ayirrisatenna insawiinni rosate woꞌnaallummo kiiro, insa albinni roore muxxe jiro gede assine hendeemmo! Songo roore jawaattanno gede, wedellu roduuwi geerra roduuwa naada calla ikkikkinni geerru roduuwino wedella roduuwa naada hasiissannonsa. w21.09 7 guf. 15-18

Godowa kaajjadda ikka agurre, Maganinke gede ‘maarote dureeyye’ ikkate sharrama hasiissannonke. (Efe. 2:4) Maarote yaa mulla marara calla diꞌꞌikkitino. Isinni maarate yaa, “mararreemmota loosunni leellishate” yine tirroonni. Konni daafira ninke baalunku maatenke giddo, songonke giddonna heeꞌneemmo qooxeessira kaaꞌlo hasiissannonsari ayeootiro heda hasiissannonke. Hatto assinummoro, maaro leellisha dandiineemmota duucha faro afiꞌneemmo! Shesho hasiissinosi manchi heeꞌra ikka? Woy mitore assine, lawishshaho sagale uyine woy wolere danchare assine kaaꞌla dandiineemmohu nookka? Bohame higinohura mittu rodiira jawaachishannosi jaali hasiisannosikka? Sheshifachishannoha dancha duduwo wolootaho kula dandiineemmo? (Iyo. 29:12, 13; Rom. 10:14, 15; Yai. 1:27) Togoo kaaꞌlo hasiissannonsari ayeootiro ille worre laꞌneemmoha ikkiro, maaro leellisha dandiineemmoti batinye doogga noota wodanchineemmo. Maaro leellinsheemmo woyite, “maarote dureessa” ikkino Maganonke Yihowa tashshi assineemmo! w21.10 13 guf. 20-22

Daawiti Faarso 23te geedanno coye qummi assino; kunino isi Yihowa Allaalaanchosi asse adhino daafira afiꞌrinoho falahinoho ayyaanaamittete atooteeti. Yihowa iso “keeraanchimmate doogora” massaginosi; hattono qarrunna faffote yannara ammaname kaaꞌlinosi. Daawiti Yihowahu “daffino qanchira” nooha ikkirono qarru iillannosita afino. Isi “reyo lawanno tunsichi giddoonni hige” haꞌranni noohu gede asse hede hexxo mudhino woyiti no; hattono isira diinu noosi. Ikkollana Yihowa Allaalaanchosi ikkino daafira Daawiti ‘diwaajjanno.’ Ikkina Daawiti ‘danchare hooginokkihu’ ma garinniiti? Isira, Yihowawa gamba yee heeꞌranno gede kaaꞌlannosiri baalunkuri noosi. Isi hagiirraamo ikkannohu maalaamittete coye afiꞌranno daafira diꞌꞌikkino. Daawiti Yihowa uyinosi coyinni kassi yiino. Daawiti lowori gede asse laꞌꞌannohu Maganu aannosi atooteetinna isiwiinni afiꞌranno agarooshsheeti. Daawiti coyiꞌrinori maalaamittete coye roorsiꞌra hasiissannonkekkihu mayiraatiro huwanteemmo gede kaaꞌlannonke. w22.01 3-4 guf. 5-7

Hundinni kayisse batinye Maganu soqqamaasine macciishsha baxannokki mannira sabbakkino. Lawishshaho, Nohi 40 woy 50 meddi yaanno diro “keeraanchimmannire kulino.” (2 Phe. 2:5) Isi sabbakanno sokka mannu macciishshe adhanno yee hexxinoti dihuluullissannote; Yihowa kayinni mannu macciishshe adhanno diyiino. Hatteentenni, Maganu Nohi markaawe seekkanno gede hajaji woyite togo yiinosi: “Atinna galtekki, oosokkinna oosokki seenni mitteenni markaawete giddora eꞌe.” (Kal. 6:18) Qoleno, Nohi seekki yinoonnisi markaawe jilba mageeshshitero hedi woyite, sabbakanno sokka gari manni macciishshe adhannokkita wodanchinoha ikkara dandaanno. (Kal. 6:15) Gedensoonni ikkinori leellishannonte gede, hattee finqila alame giddonni Nohi kulino sokka macciishshe adhinohu mittu manchino dino. (Kal. 7:7) Yihowa Nohi dancha gede asse disabbakino yee hedinoni? Dihedino! Nohi Maganu assi yiinosire ammaname assino daafira, Yihowa isinni hagiidhino.—Kal. 6:22. w21.10 26 guf. 10-11

Naoomi hatto yituta Ruutira mayi macciishshaminosero hanni hedi! Ise Naoomi kaaꞌlate dandiiture baala assitino. Ruuti ise ledo wiꞌlitino, sheshifachishshinose hattono lowo barra ledose hadhino. Ruuti tenne baala assitinoha ikkirono Naoomi, “Kaaliiqi mulla anganni qolinoe” yitino. Naoomi coyidhinori, ledose nooti Ruuti assitinosere wodanchitinokkita leellishanno. Tini, Ruuti lowo geeshsha xissiisidhanno gede assitinoseti dihuluullissannote! Ikkirono ise Naoomiwiinni dibaxxitino. (Rut. 1:3-18) Xaa yannarano yaaddino rodoo, ise kaaꞌlate dandiinummore baala assinummorono umi qara xissiisiꞌneemmo gede assannore coyidhara dandiitanno. Ikkirono koffi yaa dihasiissannonke. Hatteentenni, tenne kaaꞌlo hasiissannose rodoo agurrummokkinni kaaꞌlineemmo; hattono Yihowa ise sheshifachinsheemmo gara anfeemmo gede kaaꞌlankera huucciꞌneemmo. (Law. 17:17) Mitte kaaꞌlo hasiissannose rodoo umi qara kaaꞌlineemmoseta gibbara dandiitanno. Ikkirono bagamannokki baxilli agurrummokkinni ise kaaꞌlate dandiinummore baala assineemmo gede kakkayisannonke.—Gal. 6:2. w21.11 11 guf. 17-19

Qullaawu Maxaafi giddo ‘qullaawa ikka’ yitanno yaatto, amanyootunninna ammaꞌnotenni xuru nookkiha woy keeraancho ikka leellishshannote. Tini yaatto Maganoho soqqamate baxxinoonnire ikka yitanno tirono afidhino. Wole yaattonni, amanyootunni xuru nookkire ikkinummoro, Yihowa isi hasiꞌranno garinni magansiꞌnummoronna isi ledo muli jaaloomi heeꞌrinkero qullaawoota ikkinoommo yaa dandiinanni. Ninke guuntete xeꞌne noonkereeti; Yihowa kayinni qullaambete taalle noosikkiho; ikkirono isi jaallasi ikkinammora hasiꞌranno; tini dhagge ikkitannote. Yihowa baalante doogganni qullaawaho. Zuufaanesi mule soqqantannori Suraafeeli yinanni sokkaasine coyidhinorinni tenne huwanteemmo. Insa giddo gamu, “Qullaawu! Qullaawu! Qullaawu! Olantote Mootichi Kaaliiqi” yitino. (Isa. 6:3) Sokkaasine qullaawu Maganinsa ledo muli jaaloomi heeꞌrannonsa gede qullaawoota ikka hasiissannonsa; qoleno insa qullaawootaho. w21.12 3 guf. 4-5

Wedellu duucha woyite, ‘Hiittoo heeshsho heeꞌnummoro woyyanno ikka?’ yite heddanno. Qoleno wedella rosu mini rosiisaanonna Yihowa Farciꞌraasine ikkitinokkiri maatensa miilla, lowo woxe baantanni looso afidhanno gede yuniversite eꞌara xixxiibbannonsa. Togoo rosi lowo yanna gudannoho. Annuwinsanna amuuwinsa hattono songote giddo noo jaallansa kayinni wedellu Yihowara soqqantanni heedhanno gede jawaachishshannonsaha ikkara dandaanno. Yihowa baxanno wedellichi dancha doorsha doodhanno gede kaaꞌlasira dandaannori maati? Efesooni Sokka 5:15-17 geeshsha nabbawe hiinca kaaꞌlitannosi. Mittu wedellichi konne qummeeshsha nabbawihu gedensaanni isonooto togo yee xaꞌmannoha ikkara dandaanno: ‘Yihowa “hedo maati?” Iso hagiirsiiseemmohu hiittoo doorsha doodhummorooti? Yannaꞌya danchu garinni horoonsiꞌreemmo gede kaaꞌlannoehu hiittoo doorshaati?’ ‘Diru busha’ ikkinotanna tini Sheexaanu gashshe noo alame mulenni baꞌannota qaagge. w22.01 27 guf. 5

Yaiqoobi Yesuusiha ammanamino harunsaancho ikkinohu mamooteeti? Yesuusi reyotenni kaihu gedensaanni, “Yaiqoobira leellino; hakkiinni aanche soqqamaasine baalantera leellino.” (1 Qor. 15:7) Yaiqoobi konni garinni Yesuusi ledo xaadihu gedensaanni rosaanchosi ikkino. Soqqamaasine Yerusaalamete minu aana minnoonni minira heedhe ayyaana adhate agadhite noo yannara Yaiqoobino ledonsa no. (Soq. 1:13, 14) Gedensoonni Yaiqoobi umi xibbi diro aliidi bisi miila ikke soqqamate qoosso afiꞌrino. (Soq. 15:6, 13-22; Gal. 2:9) Qoleno isi 62 M.D. dirira albaanni, qullaawu ayyaani massageennasi buuramino Kiristaanira sokka borreessino. Hexxonke iimira haꞌrano ikkito uullate aana heeꞌra isi borreessino sokka xaa yannara ninkerano kaaꞌlitannonkete. (Yai. 1:1) Umi xibbi diro heeꞌrinohu xaggete borreessaanchi Joosefeesi yiino gede ikkiro, Yaiqoobi shiishiishinohu Ayihudenniha Kakkalaanote Biilo ikkinoho Haanna beetto Hanaaniyaati. Yaiqoobi uulla heeshshosi jeefisa geeshsha Yihowara ammanaminoha ikke heeꞌrino. w22.01 8 guf. 3; 9 guf. 5

Techohu barru qummeeshshinni ronseemmohu mittu coyi Yihowa ammananke fonqolannori iillannonketa hoolannonke yine heda hasiissannonkekkitaati. Yesuusi jeefote geeshsha fonqolaminonte gede, ninkeno reyote geeshsha nafa ikkiro ammanammeemmota leellishate qixxaawa hasiissannonke. (Mat. 16:24, 25) Ikkollana Yihowa wolqankera aleenni ikkino fonqoli iillankera fajjannokkita addaxxa dandiineemmo. (1 Qor. 10:13) Layinkihunni, Yesuusi gede ninkeno miincankera dandiinanni. (1 Phe. 2:19, 20) Mannu giwannonkehu gara ikkinokkire assinoommo daafira ikkikkinni, alamete wido ikkinoommokkihuraatinna halaale farciꞌneemmo daafiraati. (Yoh. 17:14; 1 Phe. 4:15, 16) Yesuusi, Yihowa qarru iillasira fajjinohu mayiraatiro wodanchino. Mite ammanantino soqqamaano kayinni, ‘Yihowa qarru iillankera fajjinohu mayiraati?’ yite heddanno woyiti heeꞌrara dandaanno. (Imb. 1:3) Maarannohunna cincanno Maganinke, insa hatto yite heddannohu ammana ajjinonsahura ikkinokkita afino; insara shesho baalate Buicho ikkinohu Yihowa aanno shesho hasiissannonsa.—2 Qor. 1:3, 4. w21.04 11 guf. 9-10

Yihowa fajjosi ledo sumuu yaanno garinni baxillunninna ayirrinyunni magansiꞌnummoro, magansiꞌranke adhanno. Magansiꞌra hasiissannonkehu Yihowa ikkinota anfoommo hattono dandaaminke deerrinni iso danchu garinni magansiꞌra hasiꞌneemmo. Yihowa magansiꞌneemmo doogga giddo mitte huuccattote. Qullaawu Maxaafi, huuccattonke umo xaadooshshu dunkaani giddo gedensoonni kayinni qullaawu mini giddo shiqinshannihu dancha gede qixxeessinoonni hixaani gede ikkitinota kulanno. Kuni hixaani Magano lowo geeshsha hagiirsiisanno. Hatteente gede giddonkenni kaꞌne huucciꞌneemmoti harancho huuccatto nafa “tashshi assitannosi.” (Law. 15:8; Mar. 33:10) Yihowa banxeemmositanna galatu noonketa kulleemmosi woyite macciishsha hagiirsiissannosi. Isi huluullinonkere, hexxineemmo coyenna halchonke kullammosira hasiꞌranno. Huuccatto assiꞌnammora albaanni mayine huucciꞌneemmoro seekkine heda hasiissannonke. Hatto assanke iimi Anninkera dancha ‘hixaana’ shiqishiꞌneemmo gede kaaꞌlitannonke. w22.03 20 guf. 2; 21 guf. 7

Armagedooni oli yannara Yihowa maaro afiꞌrannohunna afiꞌrannokkihu ayetiro doorreemmori ninke diꞌꞌikkinoommo. (Mat. 25:34, 41, 46) Ikkina hatte yannara Yihowa yoo gara ikkitinota addaxxineemmonso tini guficho ikkitannonke? Albillitte Yihowa woꞌmunni woꞌma addaxxa dandiineemmo gede, xaanni isira noonke ammana albinni roore kaajjishiꞌra hasiissannonketi egennantinote. Hanni Maganu abbannota haaro alame laꞌneemmo woyite hiitto ikkineemmoro hendo. Kaphu ammaꞌno baꞌanno hattono lowo diro mannu ooso buuto qarrantanno gede assitanni keeshshitinoti hafuuraame daddalu dirijjittanna poletiku gashshooti diheeꞌranno. Hatte yannara, xa barru baala yaandeemmo gede assannonkeri, yaano dhibbu, geedhimmanna reyo diheedhanno. Sheexaanunna agaaninte kume diro usurantanno. Insa finqilte abbitino qarri baꞌꞌanno. (Aju. 20:2, 3) Yihowa assannori gara ikkinota addaxxankenni hatte yannara lowo geeshsha hagiidhineemmo! w22.02 6-7 guf. 16-17

Yesuusi keeru heeꞌranno gede assino hattono wolootu kawa kaꞌaanni higinonsa coye taashshidhanno gede jawaachishino. Insa Yihowa magansiꞌransa adhara hasidhuro rodiinsa ledo kawa kaꞌaa higinore taashshiꞌra hasiissannonsata rosiisinonsa. (Mat. 5:23, 24) Qoleno soqqamaasinesi insa giddo roorannohu ayetiro heewisantu yannara kawa kaꞌaa higino coye taashshidhanno gede duucha hige kaaꞌlinonsa. (Luq. 9:46-48; 22:24-27) Keere kalanqeemmore ikkate, gibbo kalaqannore qorophatenni sainore assa hasiissannonke. Uminkenni kaꞌne keere kalaqanna roduuwinke kawa kaꞌaanni higinonsa coye taashshidhanno gede jawaachisha hasiissannonke. (Fil. 4:2, 3; Yai. 3:17, 18) Ninkeneeto togo yine xaꞌma dandiineemmo: ‘Umiꞌya horo agure wolootu ledo keere kalaqate maahoyye yeemmo? Mittu rodii woy rodoo koffi assitannoe woyite koma amaxxeemmo? Qarru kalaqamanno gede assinohu wole mancho lawiero nafa umiꞌyanni kae keere kalaqate woꞌnaaleemmonso hakku manchi keere kalaqa geeshsha agareemmo?’ w22.03 10 guf. 10-11

Lowo diri albaanni Maganu manni Yesuusi aanno biddishsha harunse, Yihowara ‘baxe’ soqqamannota masaalloonni. (Far. 110:3) Tini masaalo yannankera woꞌmitanni no. Diru kiiro, diinaggaabbe soqqantannoti Yihowa soqqamaano sabbakate looso loossanni lowo xibbe miliyoone ikkitanno saate sayissanno. Insa tenne assitannohu uminsa fajjonni woxe baantinsakkinniiti. Qoleno insa yanna gaaꞌmite, ammanate roduuwinsara hasiisannore assite kaaꞌlitannonsa, sheshifachishshannonsa hattono ayyaanaamittetenni jawaachishshannonsa. Shoomantino roduuwi gambooshshunniwa shiqishshanno kifilla qixxaabbanninna roduuwa towaattanni lowo yanna guddanno. Yihowa manni tenne baala assanno gede kakkayisannonsari maati? Yihowaranna mannaho noonsa baxilleeti. (Mat. 22:37-39) Yesuusi umisi hasattonni roore wolootu hasatto balaxisiise kaajja lawishsha ikkinonke. Ninkeno isi faale haꞌrate dandiinummore baala assinanni heeꞌnoommo. (Rom. 15:1-3) Yesuusi faale hadhannori lowo atoote afidhanno. w22.02 20 guf. 1-2

Hundi Israeele waro baatto loosiisiꞌranno manni, loosinonsa mannira woxensa baatannohu hakko barranniinti. Loosiisiꞌrino manchi woxe hakko barranni baata hoogisiro, loosino manchi maatesira hakko barrira hasiissanno sagale hidha didandaanno. Yihowa togo yiino: “Buxane ikkitinohura quqquxamatenni agadhitannona, hunkeensa hakko barranni, . . . uuyyensa.” (Mar. 24:14, 15; Mat. 20:8) Xaa yannara qaxarame loosannohu batinyu mannira woxe baantannihu, barru baala ikkikkinni aganuyi lame hinge woy mitte hingeeti. Ikkirono Leewaawoota 19:13 noohu xintu seeri xaa yannarano kaaꞌlannoho. Manna qaxare loosiisiꞌrannohu mitu manni loosannonsa mannira hunkiinsara ikkannokki geeshshi woxe baatanno. Insa hatto assitannohu, loosanno manni wole looso afiꞌrannokkitanna baantanninsa woxi shiima ikkirono loosa agurannokkita affino daafiraati. Togoo manni, ‘loosino manchi hunkee baatikkinni hashsha gashshiꞌrinohu’ gedeeti. Manna qaxadhe loosiisiꞌranno Kiristaanchi mannaho hunkiinsara ikkanno geeshshi woxe baatanni nooronna teꞌee buuxiꞌra hasiissannosi. w21.12 10 guf. 9-10

Qoleno Yesuusira lowo qarri iillinosi daafira lowo geya gooꞌrinoti dihuluullissannote. Konnira gooꞌro fulanno gede kaaꞌlo hasiissinosi. Yesuusi giddosita woleho kuꞌla saalsiisannoreeti yee dihedino; ninkeno hatto yine heda dihasiissannonke. Mito woyite hasiisannonkere wolootaho kuꞌla hasiꞌneemmokkiha ikkara dandaanno. Ikkollana kaaꞌlo hasiissannonke woyite woloota kaaꞌleꞌꞌe yaa fokkifata dihasiissannonke. Lawishshaho, geedhimma woy dhuku anje amaddinonkeha ikkiro, woloota dikko soqqa woy akimete minira haadhe hadhannonke gede xaꞌmiꞌra hasiissannonkeha ikkara dandaanno. Hexxo mudhinoommoha woy baasa yaandoommoha ikkiro, songote cimeessi woy wolu ayyaanaamittetenni gikki yiino Kiristaanchi hasaaphinanna macciishshannonke gede woy ‘danchu hasaawinni’ jawaachishannonke gede xaꞌmiꞌra dandiineemmo. (Law. 12:25) Ammanate roduuwinke baxxannonketanna “qarru barra” kaaꞌlitankera hasidhannota deꞌnoonke. (Law. 17:17) Ikkirono insa giddonketa afa didandiitanno. Ninke hasaapha hoongummoro, insa kaaꞌlo hasiissannonketa afa hooggara dandiitanno. w21.04 11-12 guf. 11-12

Ninke giddo batinyeho heeꞌnoommo gari soorramiro tenne rosa qarra ikkitannonke. Lowo diro baxxitinota woꞌma yanna soqqansho soqqantinore mito roduuwa wolu gari soqqansho soqqantanno gede assinoonni. Wolootu qolte diru akkalle amaddinonsa daafira lowo geeshsha baxxannota soqqanshote qoosso agura hasiissinonsa. Togoo coyi iillinkero dadilla nooreentilla. Yihowate gedee lao heedhannonke gede assiꞌnummoro heeꞌnoommo gari soorramanno woyite tenne rosa qarra diꞌꞌikkitannonke. Isi xaa yannara hoola yinoonni looso loosanni no; ninkeno baxxitinota isi ledo loosate qoosso afiꞌnoommo. (1 Qor. 3:9) Yihowahu ninkera noosi baxilli disoorramanno. Yihowa dirijjite biddi assitinohu mitu coyi soqqanshote qoossokki soorrantanno gede assinoha ikkiro, tenne assinoonnihu mayiraatiro heddanni lowo yanna guddooti. ‘Albi diro’ halchantenni, biddi assinoonni coyi abbinoha dancha guma wodanchatto gede kaaꞌlahera Yihowa huucciꞌri. (Ros. 7:10) Woꞌmanka woyite dancha danchare hedde. Hatto assineemmoha ikkiro heeꞌnoommo gari soorramiro nafa hagiirrinke baikkinninna ammanamme heeꞌra dandiineemmo. w22.03 17 guf. 11-12

Yihowa bagamannokki baxille leellishannohu ayeooraati? Qullaawu Maxaafi banxeemmohu lowo coyi noota lawishshaho, “baatto loosiꞌra,” “woyinenna buuro,” “seejjo” hattono “egenno” banxeemmota kulanno. (2 Dud. 26:10; Law. 12:1; 21:17; 29:3) Ikkirono bagamannokki baxille leellinshannihu wole coyibbara ikkikkinni mannaho callaati. Yihowa bagamannokki baxille leellishannohu kayinni baalunku mannira diꞌꞌikkino. Isi konne baxille leellishannohu isi ledo muli jaaloomi noonsariraati. Maganinke jaallasira ammanaminoho. Isi insara dhagge ikkitanno hexxo uyinonsa hattono baxa diagurannonsa. Yihowa baalanka manna baxannota leellishino. Yesuusi Niqoodimoosi yinanni manchira togo yiino: “Maganu baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede, Maganu mitto Beettosi uyino.”—Yoh. 3:1, 16; Mat. 5:44, 45. w21.11 2 guf. 3; 3 guf. 6-7

Tenne heeꞌnoommo alamera qarru batiꞌrino; albillitte isinni kowiinni saino qarri iillankera dandaanno. (Mat. 24:21) Kuni qarri baalu baeenna qarranke hambeemmo yanna quqquxamme agadhineemmo! (Isa. 65:16, 17) Hakko daafira albinni roore cincineemmore ikka hasiissannonke. Mayira? Korkaatuno Yesuusi, “Cincitiniro, lubboꞌne gatisidhinanni” yiino. (Luq. 21:19) Wolootu ninkera iillinonke gedee qarra cincite noo gara hedanke ninkeno cincine heeꞌneemmo gede jawaachishshankera dandiitanno. Baalunkunni roore cincate dancha lawishsha ikkannonkehu ayeti? Magano Yihowaati. Togo yaa umi qara wosiꞌnitahera dandiitanno. Kayinni taxxi yite hedittoro tini halaale ikkitinota huwatatto. Tenne alame gashshe noohu Daawuloosi ikkino daafira, alamete aana qarru batiꞌrino. Yihowa konne qarra hasiꞌri yannara hunate wolqa noosiha ikkirono hunanno yanna dagga geeshsha agare no. (Rom. 9:22) Murino yanna iillita geeshsha kayinni Maganu cince agaranno. w21.07 8 guf. 2-4