Maaja

Boha Yihowa mitto mancho baxillunni seejjanno doogooti. Qoleno bohami manchirano ikko wolu baalunkura kaaꞌlitanno qixxaawooti. Songote giddo mitootu, ‘Ewela bohansa digaraho’ yitara dandiitanno; ikkollana, duucha woyite hatto yitannori cubbo loosino mancho bushiisha hasidhannokkire ikkitinota qaaga danchate. Anfoommokkihu lowo coyi heeꞌrara dandaanno. Konni daafira, yoote komite ikkite loossu cimeeyye addaxxanke hayyote; mayira yiniro, cimeeyye Qullaawa Borroha xintu seera harunsatenna ‘Kaaliiqa hagiirsiissanno yoo’ yaate dandiiture baala assitanno. (2 Dud. 19:6) Cimeeyye baxxinanni manchi bohamanno gede murteenna hatteera halamaꞌne, bohamino manchi Yihowawa higanno gede kaaꞌlitasira dandiitanno. Elizaabeeti togo yite noore coyidhino: “Beettinke ledo noonke aante facci asse agura lowo geeshsha qarra ikkitinonke.” Ise ledde togo yitino: “Ikkollana, isi Yihowawa higihu gedensaanni, bohama hasiissinoenkulla bohamoommo yiino.” w21.09 28-29 guf. 11-12

Tenne gunnitte mancho daafira hedi. Ise anga assitoommesero Yihowara hakkiinni roorsite aa hasidhannoti dihuluullissannote. Ikkirono ise dandiiture baala assitino; Yihowara aate wolqase assitu geeshsha sharrantino. Yesuusi ise uyitinore Annisi lowori gede asse laꞌꞌannota afino. Tennenni maa ronseemmo? Yihowa woꞌmu wodaninkenninna woꞌma lubbonkenni soqqammeemmosiha ikkiro hagiidhanno. (Mat. 22:37; Qol. 3:23) Isira soqqamate dandiinummore baala assineemmota laꞌꞌanno woyite Yihowara tashshi yaannosi! Tini yannankenna wolqanke dandiinummo deerrinni Yihowa magansiꞌrate lawishshaho soqqansho fulatenna gambooshshe haꞌrate horoonsiꞌneemmo gede assitannonke. Gunnitte mancho xaggenni rosoottore loosu aana hosiisa dandaattohu hiittoonniiti? Assitanni noori Yihowa hagiirsiisannota kulittonsaro jawaattara dandiitanno roduuwa hedi. Wolqate anjenni woy fayyimmate hoonginni kainohunni Yihowara albi geeshsha soqqama hooggino daafira ‘Waagu dinoe’ yite heddannoti mitte jawa rodoo heedhara dandiitanno. w21.04 6 guf. 17, 19-20

Yihowa tenne busha alame hunate maltino yanna hiittenneetiro afino. Yihowa cincasi iso magansiꞌrannohunna guwisiꞌrannosihu lowo miliyoone ikkanno manni gamba yaanno gede assitino. Insa baalunku ilante iso baxxanno gara rossa geeshshanna heeshshonsa isira sayisse uyita geeshsha cincino daafira hagiidhitanno. Yihowa jeefote geeshsha cincinoha lowo miliyoone ikkanno manna baꞌraasanno woyite isi cincasi gara ikkitinoti woꞌmunni woꞌma leeltanno! Sheexaanu lowoha dadillisanno qarra abbirono Yihowa “hagiirraamo Magano” ikke heeꞌranno. (1 Xim. 1:11, NW) Yihowa suꞌmisi qullaawanno gedenna aliidimmasi xabbe leeltanno gede assa geeshsha, hattono bunshenna xaa yannara iillanni noonke qarra baala hunanno yanna dagga geeshsha hagiirrinke baikkinni cincine heeꞌra dandiineemmo. Iimi Anninkeno cince noota afanke sheshifachishshannonke; ninkeno cincine heeꞌrate murciꞌno. w21.07 13 guf. 18-19

Umi xibbi diro batinyu manni Yesuusa ammana giwino. Insara Yesuusi mittu buxichu hanaaxichi beetto calla lawinonsa. Yesuusi lophinohu Naaziretete katamiraati; kuni mannu mishanno katama ikkara dandaanno. Gedensoonni Yesuusi rosaancho ikkinohu Naatinaeeli nafa umi qara “Naaziretetenni danchu coyi fulannoni?” yiino. Isi Mesihichu Naaziretete ikkikkinni Beetelihemete ilamannota kultannota Mikiyaasi 5:2te noo masaalo hedinoha ikkara dandaanno. Masaalaanchu Isayaasi Yesuusi diinna “[Mesihichu] ilama” woy heeshsho daafira haja assitannokkita masaalino. (Isa. 53:8) Insa Yesuusi daafira kultanno masaalo xiinxallitinoha ikkoommero, Yesuusi Beetelihemete ilamannotanna Moote Daawiti sircho ikkinota huwata dandiitanno. (Luq. 2:4-7) Yesuusi ilaminohu Mikiyaasi 5:2te masaalloonni katamiraati. Ikkina mannu soꞌro maati? Muddante togo togooti yite coyiꞌransaati. Insa woꞌmanka coye seekkite dibuuxxino. Gufidhinohuno iseraati. w21.05 2-3 guf. 4-6

Qullaawu Maxaafi giddo amaale macciishshino daafira atoote afiꞌrinoha dancha lawishsha ikkannonke mannano kulloonni. Hanni Iyyoobi lawishsha laꞌno. Isi Magano waajjannoha ikkirono guuta mancho diꞌꞌikkino. Iyyoobi qarru batiꞌrisi yannara gara ikkinokkire coyiꞌrino. Hakko daafira Eelihuno Yihowano xaaddote amaaltinosi. Iyyoobi maa assiyya? Togo yiino: ‘Buuxoommokkire coyiꞌroommo. . . . Kunnira, coyiꞌroommo coyi baalu, ane umoꞌya saalfachishinoe. Kunni daafira, buluulunna bukote aana ofolle aagintaaweemmo.’ (Iyo. 42:3-6, 12-17) Iyyoobi, diro Eelihu lowo geeshsha roorannoha ikkirono, Eelihu amaalinosi amaale macciishshe adhe umosi heeshshi assannoha ikkinota leellishino. (Iyo. 32:6, 7) Hatteente gede umonke heeshshi assanke, amaale hasiissannonkekkiha lawinkerono woy amaalinonke manchi diro ninkenni ajannoha ikkirono amaale macciishshine adhate kaaꞌlitannonke. Ninke baalunku albinni roore ayyaanu gumi laalo laalanna dancha duduwo sabbakatenna rosiisate dandoonke woyyeessiꞌra hasiissannonke. w22.02 11 guf. 8; 12 guf. 12

Mittu mittunku songote miili songo baxillunna keeru woꞌminota ikkitanno gede kaaꞌla hasiissannosi; hatto ikkiro songote giddo callatinohu gede asse hedannohu diheeꞌranno. Coyiꞌneemmorinna assineemmori woloota lowo geya jawaachishara dandaanno! Maatensa Yihowa Farciꞌraasine ikkitinokki roduuwi, songote miilla ikkitinota huwattanno gede kaaꞌlate maa assa dandaatto? Wolootaho jaala ikkate sharrami. Haaruuddu songo dagganno woyite anga fanne haaꞌne jaalooma hanafa dandiineemmo. (Rom. 15:7) Ikkirono faasiinqe keere haaꞌratenni sainore assa hasiissannonke. Yannate gedensaanni insa ledo lubbora jaalooꞌma dandiineemmo. Hakko daafira haaruuddeho danchumma assi, hattono insara hedattonsata leellishi. Saaltanno gede assitanno xaꞌmo xaꞌmittokki, iillanni noonsare afate woꞌnaali. Mitootaho giddonsata fushshite coyiꞌra qarra ikkitansara dandiitanno daafira, kultannohe gede xixxiiwattokki gede qorophi. Hatteentenni giddonsata coyidhanno gede assitanno xaꞌmo shaqqillunninna wodanchatenni xaꞌmi, hattono dawaro qoltanno woyite cincite macciishshi. Lawishshaho, halaale macciishshitinohu hiittoonniitiro xaꞌma dandaatto. w21.06 11 guf. 13-14

‘Mittu allaalaanchi’ allaalannanke “mitte hoshsha” ikkine Yihowara mittimmatenni soqqama ninkera loworeeti. Yihowa Fajjo Assate Feeffatino Manna yaanno maxaafira qoola 165te, “Tenne mittimmanni horo afidhanni nootto daafira, atino tini mittimma baꞌannokki gede kaaꞌla hasiissannohe” yitanno hedo no. Hakko daafira, roduuwanke “Yihowa laꞌꞌanno garinni laꞌꞌa rosa” hasiissannonke. ‘Shiimmaaddaho’ yinoonniri ninke baalunku Yihowara muxxete. Ati roduuwakki laꞌꞌattohu hakko garinniiti? Yihowa insa kaaꞌlatenna towaatate assattore baala laꞌꞌanno hattono naadanno. (Mat. 10:42) Ammanate roduuwanke lowo geya banxeemmo. Hakko daafira ammanate rodiinke, ‘gufiꞌre cubboho uwanno’ gede assineemmokki gede murciꞌnoommo. (Rom. 14:13) Roduuwinke ninke roortinohu gede assine hendeemmo; hattono wodaninni gatona yineemmonsa. Wolootunni kainohunni gufiꞌneemmokki gedeno qorophino. Hatteentenni, “keere heeꞌnanni garanna mimmito dhaambanni doogo” haꞌno.—Rom. 14:19. w21.06 24 guf. 16-17

Maganu Qaale seekkine xiinxallineemmohanna Yihowa Qaalisinna dirijjitesi widoonni aannonke amaale harunsineemmoha ikkiro, sunu sununni Kiristoosite gede akatta lossiꞌra dandiineemmo. Qoleno Magano albinni roore anfeemmo. Yesuusi dudumbeemmoti Maganu Mangiste sokka, suwashshu wodani noonsa manni giddo sunu sununni lophannohu shiimu wixi gede ikkitinota leellishanno lawishsha coyiꞌrino. Togo yiino: “[Manchu] wixino wixi hiitto ikkiro afikkinni muꞌre lophanno. Baatto umisenni sunu sununni guma laaltanno; umo muꞌra, tenne agashsho, hakkiinni agashshote aana iillino guma uyitanno.” (Maq. 4:27, 28, NW) Yesuusi muꞌru sunu sununni lophannonte gede Maganu Mangiste sokka macciishshe adhino manchino ayyaanaamittetenni lophannohu sunu sununni ikkinota rosiisino. Lawishshaho, Qullaawa Maxaafa xiinxallinseemmo manchi Yihowawa shiqanni haꞌri kiiro, heeshshosi giddo lowore biddi assiꞌrinota laꞌneemmo. (Efe. 4:22-24) Ikkirono hakku shiimu wixi lophanno gede assannohu Yihowa ikkinota dea dihasiissannonke. w21.08 8-9 guf. 4-5

Noonkerinni kassi yineemmoha ikkiro hagiirraamma ikka dandiineemmo. ‘Noosi coyinni hagiidhanno’ manchi, noosire naadanno. Afiꞌra dandaannokkire lexxate haafamanno manchi kayinni, hagiirre diafiꞌranno. Konni qummeeshshinni maa ronseemmo? Hagiirraamma ikkate, wonshiꞌra dandiineemmokki mixo agurre noonke coye illachisha hasiissannonke. Ikkina addinta noonkerinni hagiidha dandiineemmo? Woꞌmanka woyite haaro coye rosa hasiꞌneemmo daafira, duuchu mannira kuni dandiinannikkire lawannonsa. Ikkirono, noonkerinni hagiidhinanni heeꞌra dandiineemmo. Hiittoonni? Tenne afate, Yesuusi Maatewoosi 25:14-30 coyiꞌrinoha taalaantete lawishsha laꞌno. Konne lawishsha xiinxallineemmo woyite, hagiirre afiꞌra dandiineemmo garanna noonke coyinni roore hagiidha dandiineemmo gara ronseemmo. w21.08 21 guf. 5-6

Yihowa “gadadaammu daafira xissiisiꞌranno.” Songote cimeeyye calla ikkitukkinni ninke baalunku muxxe roduuwanke jawaachisha dandiineemmo. Insa jawaachisha dandiineemmo doogga giddo mitte, insa daafira godowinta hendeemmota leellishate. Yihowa, insa baxannonsata huwattanno gede assinammora hasiꞌranno. (Law. 19:17) Ninkeneeto heeshshi assineemmorenna dhukanke anfoommore ikkankeno roduuwanke kaaꞌlitannonsa. Wolootu hinaassanno gede assitara dandiitanno daafira, mannu ninke illachishanno gede assa dihasiissannonke. Hatteentenni, dandoonkenna egennonke mimmito jawaachishate horoonsiꞌneemmo. (1 Phe. 4:10, 11) Yesuusi harunsaanosi kaaꞌlino gara laꞌne, ninkeno woloota kaaꞌlate daafira lowore rosa dandiineemmo. Yesuusi uullate aana heeꞌrino manni baalunkunni rooreho. Ikkirono isi “joogahonna shaqqadoho.” (Mat. 11:28-30) Isi xawe leellanno garinni rosiise, hattono dancha lawishsha horoonsiꞌre rosiisannori mannu wodanira coanno gede assino.—Luq. 10:21. w21.07 23 guf. 11-12

Geerra roduuwa kiꞌne umiꞌne shiqqine hasaawisate woꞌnaalle. Hige xaate insa xunsite laꞌannokkiha, sunuutunni qaaffannoha, hattono coyidhanno woyite huuronsa ajjannoha ikkara dandaanno; ikkirono, giddonsa wedellu gedeeti. Qoleno Yihowa albaanni “danchu suꞌmi” noonsa. (Ros. 7:1) Insa Yihowa albaanni muxxe ikkitinohu mayiraatiro deꞌinoonte. Insa ayirrisa agurtinoonte. Elsai gedeere ikke. Isi jeefote Eeliyaasi ledo hosi barra isiwiinni baxxa dihasiꞌrino. Elsai sase hige “Ani atewiinni horonta baxxeemmokkita egensiiseemmohe” yiino. (2 Mot. 2:2, 4, 6) Geerra roduuwa shaqqillunni mite xaꞌmo xaꞌmitine insa daafira heddinannita leellishshe. (Law. 1:5; 20:5; 1 Xim. 5:1, 2) Togo yitine xaꞌma dandiitinanni: “Wedellu heedhinoonni waro, halaale afidhinoonnita ammantinanni gede assinoꞌneri maati?” “Heeshshoꞌne giddo tuncu yiinoꞌne coyi Yihowawa gamba yitinanni gede kaaꞌlinoꞌnehu hiittoonniiti?” “Yihowara hagiirrunni soqqantinanni heedhinanni gede kaaꞌlinoꞌne coyi maati?” (1 Xim. 6:6-8) Hakkiinni insa xaggensa kultannoꞌne woyite seekkitine macciishshe. w21.09 5 guf. 14; 7 guf. 15

Yesuusi sabbankeemmo gedenna manna rosaano assineemmo gede hajajinonke hajajo wonshate dandaaminkere baala assineemmoha ikkiro, Yihowa banxeemmota leellinshanni heeꞌnoommo. (1 Yoh. 5:3) Hanni tenne hedi: Yihowara noohe baxilli minunni mine hadhe sabbakatto gede assinohe. Ikkollana hatto assa shota ikkitinoheni? Hatto ikka hoogara dandaanno. Mite yite sabbakate fulitto woyite waajjootto? Waajjoottoti dihuluullissannote! Ikkirono kuni Yesuusi loosi yiinohe looso ikkinota afootto daafira hajajante loosootto. Sunu sununni sabbakate loosi waajjisha agurinoheha ikkara dandaanno. Qullaawa Maxaafa xiinxallisana? Tenne hedatto woyite waajjishannohe? Waajjishannoheha ikkara dandaanno. Ikkollana, waajja qeeꞌlite mannu Qullaawa Maxaafa xiinxallanno gede koyisa dandaatto gede kaaꞌlahera Yihowa huucciꞌrittoro, isi manna rosaano assate hasattokki lexxitanno gede asse kaaꞌlannohe. w21.07 3 guf. 7

Biꞌree waro borojjootaho insa ayireetiro leellishanno malaate bisinsa aana malaatinsanni. Hatteente gede, yannankera dagoomu mittu mittunku manchi aye widootiro leellishanno malaate angasira woy albaho wodhara hasiꞌranno. Qoleno insa mannu baalu hedonsanninna assootinsanni poletiku gashshootira halamara hasidhanno. Ninke konne malaate wodhine poletiku gashshootira halammeemmo? Konne malaate adha gibbannore qarru amadannonsati egennantinote. Ajuujate maxaafi togo yaanno: “Moyichu suꞌma ikkino malaati woy suꞌmisi kiiro noosikki manchi ayino hirano hidhano didandaanno.” (Aju. 13:17) Ikkollana, Maganu Yohaannisi Ajuuja 14:9, 10 kulloonni malaate adhitinore ma assannoro Maganu manni afino. Maganu manni konne malaate adhantenni, lawishshu yaattonni angansara “Ninke Maganu mannaati” yee borreessiꞌranno. (Isa. 44:5) Maganoho addinta ammanammoommore ikkinoommota buuxiꞌra hasiissannonkehu xaati. Hatto ikkiro, Yihowa hagiidhe ‘Kiꞌne ane mannaati’ yaannonke! w21.09 18 guf. 15-16

Soqqanshonke umo fushshate wolootu kaaꞌlo hasiissannonke. Soqqamaasinchu Phaawuloosi isi sabbakatenna rosiisate horoonsiꞌranno hayyo Ximootewoosira kulinosi; Ximootewoosi woloota kaaꞌlate tenne hayyo horoonsiꞌranno gede jawaachishinosi. (1 Qor. 4:17, NW) Ximootewoosi gede ninkeno songote giddo woꞌnaalshu noonsa roduuwiwiinni rosa dandiineemmo. Yihowa kaaꞌlannonke gede huuccattono hasiissannonke. Soqqansho fulatto yanna baalantera Yihowa kaaꞌlannohe gede huucciꞌri. Wolqaataamu qullaawu ayyaanisi kaaꞌlinkekkinni ninke giddonni mittuno aye coyeno assa didandiineemmo. (Far. 127:1; Luq. 11:13) Yihowa kaaꞌlannohe gede huucciꞌratto woyite hasiisannohere badde kuꞌli. Lawishshaho suwashshu wodani noonsarinna macciishsha hasiꞌranno manninni xaadatto gede kaaꞌlahera huucciꞌri. Yanna gaaꞌme hojju xiinxallo assiꞌra hasiissannonke. Qullaawu Maxaafi, “Maganu hedo dancha, hagiirsiissannotanna guuta ikkitinota [affe]” yaanno. (Rom. 12:2) Maganu daafira ronsoommori halaale ikkinota seekkine buunxummoro, soqqammeemmo woyite mannaho mittoreno huluullammummokkinni farciꞌneemmo. w21.05 18 guf. 14-16

Mittu xiinxallisatto manchi dancha gede assite rosiissanni heedheenna hattono isi daafira huuccatto assitanni heedheenna ayyaanaamittetenni lopha hoogeenna xiinxallisa agura hasiissinohehalla ikki? Woy ati xiinxallisseenna cuuamate deerra iillinohu mittu manchino nookkihalla ikki? Yihowa soqqanshoꞌya dimaassiꞌrino yite ateneeto bushiisha hasiissannohe? Yihowa soqqanshonke seekkino yaannohu maa laeetiro wodanchi. Yihowa hexxo mudhinummokki diinaggaambe soqqammeemmota laꞌꞌanno. Mannu sokkanke macciishsha giwiro nafa, Yihowa banxeemmo daafira diinaggaambe sabbankeemmoha ikkiro, soqqanshonke isi albaanni seekkino yaate. Phaawuloosi togo yee borreessino: “Maganu halaalaancho yoo yaannoho; loosoꞌnenna albano ikko xaano qullaawa manna kaaꞌlatenni leellishshinoonnisi baxille dihawanno.” (Ibi. 6:10) Xiinxallinsoommo manchi ayyaanaamittetenni lophe cuuama hoogiro nafa, Yihowa loosonkenna baxillenke dihawanno. Konnira Phaawuloosi techohu barru qummeeshshira kulinori aterano kaaꞌlannoreeti. w21.10 25 guf. 4-6

Yesuusi rosaanosi kaaꞌlino gari, isi shaqqadonna baxillaancho ikkinota leellishanno. Isi insara noonsa dandoo addi addita ikkitinotanna heeshshonsa garino addi addiha ikkinota afino. Hakko daafira baalunku mittu gari looso loosa woy soqqanshonsanni mittu gari guma afiꞌra didandiitanno. Ikkirono isi, insa mittu mittunku woꞌma lubbonsanni assitinore naadino. Yesuusi taalaantete daafira coyiꞌrino lawishshi, isi dhukansanna dandoonsa afinota leellishanno. Yesuusi lawishshu giddo kulino mootichi, mittu mittunku borojjichira looso uyinohu ‘dandoosi deerrinniiti.’ Jawaatte loossinori lamu borojjooti giddo mittu roore loosino. Mootichu kayinni lamenka “Danchaho! Ati ammanamoottohonna dancha soqqamaanchooti” yee taalo galatinonsa. (Mat. 25:14-23) Yesuusi ninkeno shaqqillunninna baxillunni kaaꞌlannonke. Isi dandoonkeno heeshshonke garino addi addiha ikkinota afino; hattono woꞌma lubbonkenni soqqamate sharrammeemmo woyite hagiidhanno. Ninkeno roduuwanke jawaachishate Yesuusi lawishsha harunsineemmo. w21.07 23 guf. 12-14

Moote Daawiti woꞌmanka woyite maaro leellishino yaa diꞌꞌikkino. Lawishshaho, Naabaali yinannihu kakkachu manchi, Daawitiranna mannisira sagale hoꞌli woyitenna xonisi woyite, Daawiti baasa hanqe Naabaalinna minesi noo labballo baala shaate kaino. Naabaali galte Abigiya kayinni shaqqadotenna cincate; ise bayichonko Daawitiranna mannisira sagale uyitino. Konni garinni Daawiti mundeete shedinni gatissino. (1 Sam. 25:9-22, 32-35) Daawiti lowo geeshsha hanqe noo yannara, Naabaalinna minisi labballira baalaho reyote yoo yiino. Qoleno gedensoonni, Daawiti Naataani lawishshunni kuli manchira reyo hasiissannosi yiino. Tenne layinki xagge hendeemmo woyite, ‘Daawiti shaqqado manchootina togoota kaajjado yoo mayira yii?’ yine hendeemmoha ikkara dandaanno. Hanni hakkawoyite Daawiti hiitto ikke nooro hedi. Hakkawoyite Daawiti tiiꞌꞌisi bushiishanni noosi. Mittu manchi kaajjado yoo yiiro, hatti Yihowa ledo noosi jaaloomi dancha ikkinokkita leellishshanno. w21.10 12 guf. 17-18; 13 guf. 20

Techohu barru qummeeshshinni Yihowa faale haꞌra dandiineemmota ronseemmo; isi qullaambete taalle nookki lawishshaati. Heeshshonke baalatenni qullaawoota ikka hasiissannonke. Guuntete xeꞌne noonkere ikkinoommo daafira kuni ikkaakkire lawankera dandaanno. Soqqamaasinchu Pheexiroosi umisi duucha soꞌro loosino; ikkirono isi lawishshi qullaawoota ikka dandiineemmota leellishanno. Mitu qooxeessira mannaho qullaawaho yinanni manchi, hagiirraamo ikkinokkiha, ammaꞌnote uddano uddiꞌrannoha hattono woꞌmanka woyite albisi faꞌnamannokki mancho lawannonsa. Tini kayinni digaraho. Yihowa qullaawaho; Qullaawu Maxaafi iso ‘hagiirraamo Maganooti’ yaanno. (1 Xim. 1:11, NW) Iso magansidhannoreno ‘baraadhinoreeti’ woy hagiirraammaho yinoonni. (Far. 144:15) Yesuusi baxxitinota ammaꞌnote uddano uddidhannorenna mannu albaanni keeraano lawate woꞌnaaltannore rufino. (Mat. 6:1; Maq. 12:38) Ninke kayinni Qullaawu Maxaafinni ronsoommo daafira qullaambete yaa mayyaatero anfoommo. Baxillaanchu Maganinke assa dandiineemmokkire horo asse yaannonkekkita anfoommo. w21.12 2 guf. 1, 3

Maganu shaqqillunni lowo elto uyinonke; uyinonkete jajjabba elto giddo mitte, iso magansiꞌrate dandoonkeeti. Yihowa ‘hajajo agadhine’ iso banxeemmota leellinsheemmo. (1 Yoh. 5:3) Yihowa agadhinammora hasiꞌranno hajajo giddo mitte, Yesuusi manna rosaano assinammora uyinonke hajajooti. (Mat. 28:19) Isi mimmito banxeemmo gedeno hajajinonke. (Yoh. 13:35) Yihowa isira hajajantannore alamete doyichora noo maatesi wido ikkitanno gede assanno. (Far. 15:1, 2) Mannaho baxille leellishi. Yihowahu qaru akati baxilleho. (1 Yoh. 4:8) Yihowa baxille leellishinonkehu iso afa nafa anfummosikkinniiti. (1 Yoh. 4:9, 10) Mannaho baxille leellinsheemmoha ikkiro, isi faale haꞌnanni heeꞌnoommo. (Efe. 5:1) Mannaho baxille leellinsheemmote qara doogga giddo mitte, yanna gooffukki mannu Yihowa afanno gede kaaꞌlate. (Mat. 9:36-38) Hatto assineemmo woyite, insano Maganu maate wido ikkate assa hasiissannonsare affanno gede kaaꞌlinanni heeꞌnoommo. w21.08 5-6 guf. 13-14

Yesuusi Yihowa lowo geeshsha baxanno daafira Annisiranna ninke daafira yee umisi horo agurino. (Yoh. 14:31) Yesuusi uullate aana heeꞌrino heeshsho manna lowo geeshsha baxannota leellishshanno. Isi barru baala baalunku mannira wole agurina giwannosi mannira nafa baxillenna shaqqille leellishino. Isi manna baxannota leellishinoti qara doogo Maganu Mangiste daafira mannaho rosiisate. (Luq. 4:43, 44) Qoleno Yesuusi cubbaataammu anga qarrame reyate maahoyye yee Maganonna manna baxannota leellishino. Isi konni garinni ninke baalunku hegere heeshsho afiꞌneemmo faro faninonke. Ninkeneeto Yihowara sayinse uyinoommohunna cuuammoommohu iimi Annanke banxeemmo daafiraati. Hakko daafira Yesuusi gede ninkeno mannu ledo noonke aantenni Yihowa banxeemmota leellisha hasiissannonke. Soqqamaasinchu Yohaannisi togo yee borreessino: “Laꞌꞌanni nooha rodoosi baxinokkihu illetenni afinokkiha Magano hiitto asse baxa dandaanno?”—1 Yoh. 4:20. w22.03 10 guf. 8-9

Yihowa ledo yanna sayisa hagiirsiissannonkeha ikkirono, qarra ikkannori tuncu yaannonke. Loosu batiꞌrannonke daafira ayyaanaamittete coyira yanna gaaꞌma qarra ikkitankera dandiitanno. Maalaamittete loosi, maatete hasiisannore wonsha hattono wolu hasiisanno coyi yannanke gudanno daafira huuccatto assiꞌrate, xiinxallate woy hiincate yanna hoongoommohu gede assine hendammora dandiineemmo. Qoleno hendummokki yannanke gudannohu wolu coyino no. Assineemmo coyi soꞌro ikka hoogiro nafa, qoropha hoongummoro albinni roore Yihowawa shiqate horoonsiꞌneemmo yanna gudankera dandaanno. Hanni lawishshaho boohaarsha hendo. Saꞌne saꞌne boohaara baalanka kaaꞌlitannonke. Ikkollana boohaarranni lowo yanna sayinseemmoha ikkiro, danchu boohaarshi nafa ayyaanaamittete coye assineemmo yanna gudankera dandaanno. Hakko daafira boohaarshaho quwa saꞌꞌa dihasiissannonke.—Law. 25:27; 1 Xim. 4:8. w22.01 26 guf. 2-3

Yihowa Israeele olliichonsa baxxanno gede hajajinohu, insa wido ikkino manna calla baxxara diꞌꞌikkino. Insa giddonsa heeꞌrannoha wole gobba manna baxxanno gedeno kulinonsa. Leewaawoota 19:33, 34 tenne xawisse kultanno. Israeele wole gobba manna ‘fiixinsa’ gede assite laꞌꞌanna uminsa gede assite ‘baxa’ hasiissannonsa. Lawishshaho Seeru, Israeele wole gobba manninna buxane fishsha xinqidhanno gede fajja hasiissannonsata kulanno. (Lew. 19:9, 10) Wole gobba manna baxa hasiissannota kulanno seeri xaa yannara Kiristaanuno harunsannoho. (Luq. 10:30-37) Hiittoonni? Xaa yannara lowo miliyoone ikkanno manni gobbansanni darame wole gobba haꞌranno; mitu togoo manni qooxeessiꞌnera nooha ikkara dandaanno. Konne wole gobbanni darame dayino labballo, meentonna qaaqquulle ayirrinseemmota leellisha hasiissannonke. w21.12 12 guf. 16

Xaa yannara Yihowa biddishsha addaxxineemmoha ikkiro, isi albillitte dagganno yannara gatisannonketa albinni roore addaxxineemmo. Qoqqowunna woradu gambooshshe haꞌneemmo gede loosiisaanchonke fajjo xaꞌmiꞌrate woy baalanka gambooshshe haꞌratenna albinni roore soqqamate injaanno garinni loosiisaanchinke ledo hasaambe pirogiraamenke biddi assiꞌrate, Yihowa addaxxanna ammana hasiissannonke. Hanni loosiisaanchinke fajja giwinonkehunna loosunni fushshe huninonkehu gede assine hendo. Yihowa horo tuge agurannonkekkitanna woꞌmanka woyite heeshshote hasiisannonkere aannonketa addaxxineemmo? (Ibi. 13:5) Batinye woꞌma yanna soqqamaano woꞌnaalshi, Yihowa kaaꞌlo roore hasiissannonsa yannara isi kaaꞌlinonsata leellishanno. Yihowa ammanaminoho. Yihowa ledonke noo daafira albillitte dagganno yanna waajjineemmo gede assannonkeri dino. Gashshootesi balaxisiinsummo geeshsha Maganinke horo tuge diagurannonke. w22.01 7 guf. 16-17

Songote cimeeyye addaxxa qarra ikkitannonke gede assara dandaannori maati? Hanni mittu muli jaalinke Songotenni bohamino yine hendo. Hatto ikkiro cimeeyye baalanka coye buuxxinota huluullammammora woy insa addanka yoo Yihowa yaanno garinni yitinota huluullammammora dandiineemmo. Ikkina songote cimeeyye murtino coyira gara ikkitino lao heedhannonke gede assiꞌrate kaaꞌlannonkeri maati? Boha Yihowa qixxaawo ikkitinotanna songo kaaꞌlitannota qaaga hasiissannonke; tini qixxaawo bohamino manchono kaaꞌlitara dandiitanno. Cubbo loose kae maaro ea giwino mancho songotenni boha hoongiro songo daafara dandaanno. (Gal. 5:9) Qoleno, loosino cubbi mageeshshi geeshsha jawa ikkinoro huwata hoogara dandaanno; hattono hedosinna assootesi biddi assire Yihowa hagiirsiisate gari hasatto hooggasira dandiitanno. (Ros. 8:11) Cimeeyye mittu Kiristaanchi bohamanno gede murtanno woyite coye seekkite buuxxannota addaxxa dandiineemmo. w22.02 5-6 guf. 13-14

Hakko iso mittu manchi Qullaawu Maxaafi aana xintantino amaale macciishsha giwanno woyite cincineemmorenna shaqqadda ikka hasiissannonke. Songote cimeessi isi amaalino amaale mittu manchi bayichonko macciishshe adhe loosu aana hosiisa hoogiro caaccaawannokki gede qoropha hasiissannosi. Hakko daafira, mittu songote cimeessi huuccatto assiꞌranno woyite, amaalino rodoo Yihowa maassiꞌrannosi gede, amaalloonnisihu mayiraatiro huwatanno gedenna amaale macciishshe adhanno gede kaaꞌlasira huucca dandaanno. Amaalloonni rodii amaalloonnisi coye seekke hedate yanna hasiissannosiha ikkara dandaanno. Cimeessu cincanna shaqqado ikkiro, amaallanni rodii amaallannisi gara ikkikkinni amaale illachishara dandaanno. Amaallanni amaale woꞌmanka woyite Qullaawu Maxaafi aana xintantinota ikka hasiissannoseti dihuluullissannote. Mixonke kaaꞌlanno garinni calla ikkikkinni “wodana tashshi assanno” garinni amaala ikkitinota deꞌnoonke.—Law. 27:9. w22.02 18 guf. 17; 19 guf. 19

Qarranke dandee saꞌꞌate woy laanfenke qeeꞌlate jawaante aankera Yihowa huucciꞌnummohu gedensaanni, Yihowa huuccattonkera dawaro qola keeshshinoha lawankera dandaanno. Ikkina Yihowa huuccattonke baalantera bayichonko dawaro qolannokkihu mayiraati? Isi giddonkenni huucciꞌneemmo huuccatto, ammana noonketa leellishshanno taje gede asse laꞌꞌanno. (Ibi. 11:6) Qoleno Yihowa huuccattonke ledo sumuu yaannore assatenna fajjosi wonshate mageeshshi hasatto noonkero laꞌꞌa hasiꞌranno. (1 Yoh. 3:22) Konni daafira, busha gade woy laanfenke qeeꞌlate kaaꞌlannonke gede Yihowa huucciꞌneemmo woyite, cincineemmore ikkanna huuccattonke ledo sumuu yaannore assa hasiissannonke. Yesuusi mite huuccattora dawaro bayichonko afiꞌra hoongammora dandiineemmota qummi assino. Isi togo yiino: “Agurtinikki huuccidhe, uyinanniꞌnena; agurtinikki hasidhe, afidhinannina; agurtinikki waalcho ganganne, fannanniꞌnena; huucciꞌrannohura baalaho uyinanni; hasiꞌrannohu baalu afiꞌranno; waalcho ganganannohura baalaho fannannisi.”—Mat. 7:7, 8, NW. w21.08 8 guf. 1; 10 guf. 9-10

Kalaqaanchikkira noohe ammana kaajjitanno gede, Maganu Qaale agurittokki xiinxalla hasiissannohe. (Iya. 1:8) Qoleno, Qullaawu Maxaafi giddo masaalleenna woꞌmitinota addi addi masaalonna Qullaawu Maxaafi isi isiniiwa sumuu yaanno gara wodanchate woꞌnaali. Hatto assittoro, baxillaanchunna hayyichu Kalaqaanchi kalaqinonketanna Qullaawa Maxaafa borreessiisinohu iso ikkinota albinni roore ammanatto. (2 Xim. 3:14; 2 Phe. 1:21) Maganu Qaale xiinxallatto woyite, aanno amaale mageeshshi geeshsha kaaꞌlitannotero wodanchate woꞌnaali. Lawishshaho, Qullaawu Maxaafi lowo diri albaanni, woxe baxa gawajjitannotanna ‘huntannota’ kule qorowisiisino. (1 Xim. 6:9, 10; Law. 28:20; Mat. 6:24) Konni daafira, Qullaawu Maxaafi woxu baxille qorophineemmo gede aannonke amaale lowo geeshsha kaaꞌlitannote! Heeshshokkira kaaꞌlinoheha wole Qullaawu Maxaafiha xintu seera qaagatto? Qullaawu Maxaafi amaale mageeshshi geeshsha kaaꞌlitannoro huwantummo kiiro, baxillaanchu Kalaqaanchinke aannonketa woꞌmanka woyite kaaꞌlitanno amaale albinni roore addaxxineemmo. (Yai. 1:5) Hatto ikkiro, heeshshonke albinni roore hagiirru woꞌminota ikkitanno.—Isa. 48:17, 18. w21.08 17-18 guf. 12-13

Diru akkalle amaddinoꞌneha ikkiro, Yihowa konni albaanni loossinoonni looso hawannokkita deꞌinoonte. Sabbakate looso diinaggaabbine loossinoonni. Addi addi qarri amadiꞌnerono, mito woyite isinni lowo geeshsha dadillisanno coyi tuncu yiiꞌnerono cincitine saꞌinoonni; Qullaawu Maxaafihu xalalu seerira halantinoonni; Yihowa dirijjite uyitinoꞌneha lowo geeshsha hasiisanno looso loossinoonni hattono woloota qajeelsitinoonni. Rakke rakke albillitte hadhanni noote Yihowa dirijjite ledo taalo qaafate dandiitinire baala assitinoonni. Woꞌma yanna soqqansho giddo noore woloota roduuwa irkissinoonni hattono jawaachishshinoonni. Ammanantinoonnire ikkitinoonni daafira Maganu Yihowa lowo geeshsha baxannoꞌne. Isi ‘Keeraano dihuneemmo’ yee qaale eino! (Far. 37:28) Qoleno togo yee hexxo uyinoꞌne: “Geedhitine awuubbina geeshsha, duheemmoꞌnehu aneeti.” (Isa. 46:4) Diriꞌne akkalino daafira xaate Yihowa dirijjitera kaaꞌleemmori dino yitine heddinoonte. Kaaꞌlitinanniri lowori no! w21.09 3 guf. 4

Yihowa maaro leellishannohu taalle nookki hayyo noosi daafiraati. Qullaawu Maxaafi, “gordu hayyo” “maaronna danchu gumi woꞌminota” ikkitinota kulanno. (Yai. 3:17, NW) Shaqqadu anni gede, Yihowa maarosi soqqamaasinesira lowo geeshsha hasiissannonsata afino. (Isa. 49:15) Insa guuta ikka hooggurono, Maganu maaro konni kaꞌira hexxo heedhannonsa gede assitinonsa. Konnira Yihowa taalle nookki hayyo noosiha ikkino daafira, maaranno gede assannosi korkaati heeꞌriro woꞌmanka woyite maaranno. Ikkollana Yihowa maaro leellisha hasiissannokki woyiti nootano afino. Isi hayyicha ikkino daafira, maaro leellishate yee bunshe lashshi asse diaguranno. Hanni mittu Maganu soqqamaasinchi maaeela heeshsho heeꞌrate murciꞌrino yine hendo. Hatto ikkiro ma assa hasiissanno? Soqqamaasinchu Phaawuloosi qullaawu ayyaaninni, togoo manchi ledo “sumuu yitinoonte” yee borreessino. (1 Qor. 5:11) Cubbo loosse maaro eꞌannokkire songotenni bonkanni. Ammanante noo roduuwanke gawajjotenni agaratenna Yihowa seerinni galloommore ikkinoommota leellishate tenne assa hasiissanno. w21.10 9-10 guf. 7-8

Maganu Mangiste looso kaaꞌlate woxe fushshineemmo woyite Yihowa magansiꞌnanni heeꞌnoommo. Israeele Yihowa albira mulla anganni shiqqannokki gede kulloonninsa. (Mar. 16:16) Insa angansa assitu deerrinni mito coye aa hasiissannonsa. Insa konni garinni, ayyaanaamittetenni insa kaaꞌlate assinoonni qixxaawo naaddannota leellishshanno. Ninkeno Yihowa banxeemmotanna qixxeessinoonninketa ayyaanaamittete qixxaawo naandeemmota leellisha dandiineemmohu hiittoonniiti? Tenne assa dandiineemmoti mitte doogo anganke assitu deerrinni songonkeranna alamete doyicho loosira woxe fushshate. Tenne hajo daafira soqqamaasinchu Phaawuloosi togo yiino: “Aate halchiniro, nookkihu aaninni ikkikkinni afiꞌnoonnihu bikkinni aa danchate.” (2 Qor. 8:4, 12) Fushshineemmo woxi gariha ikka hoogiro nafa giddonkenni kaꞌne uyineemmo woxe Yihowa lowo geeshsha naadanno.—Maq. 12:42-44. w22.03 24 guf. 13

Cimeeyye Yihowa mannira iillannonsa fonqolo baala hoola dandiitannokkiti egennantinote. Ikkirono Yihowa, cimeeyye geꞌreewosi jawaachishatenna agarate dandiiture baala assitara hasiꞌranno. Ikkina loosu batiꞌrinonsa cimeeyye kaaꞌlo hasiissannonsare kaaꞌlate yanna afiꞌra dandiitannohu ma garinniiti? Soqqamaasinchu Phaawuloosi lawishsha harunse. Phaawuloosi afiꞌri faro baalate ammanate roduuwasi galatanna jawaachisha hasiꞌranno. Songote cimeeyyeno Yihowa manna shaqqillunninna baxillunni towaatte Phaawuloosi lawishsha harunsate sharrantanno. (1 Tes. 2:7) Phaawuloosi ammanate roduuwasi baxannonsatanna Yihowano baxannonsata buuxisinonsa. (2 Qor. 2:4; Efe. 2:4, 5) Isi songote giddo noo roduuwa jaallasi gede asse laino hattono insa ledo yanna sayisino. Phaawuloosi insara waajjishinosirenna laanfesi faajjete kule insa ammanannonsata leellishino. (2 Qor. 7:5; 1 Xim. 1:15) Ikkirono Phaawuloosi umisi qarra diꞌꞌillachishino. Hatteentenni ammanate roduuwasi kaaꞌla hasiꞌrino. w22.03 28 guf. 9-10