Yihowara Hagiirrunni Soqqamaꞌne Agurtinoonte

HANNI heeshshokki giddo lowo geeshsha hagiidhootto barra hedi. Hakku barri seenne adhitto barra woy umi qaaqqiꞌne ilami barra ikkara dandaanno. Woy heeshshokki Yihowara sayisse uyite cuuamitto barra ikkara dandaanno. Hakku barri heeshshokki giddo lowo geeshsha hagiidhoottohanna wolu barri baalunkunni roorsite laꞌꞌattoha ikkinoti egennantinote. Qoleno Yihowa woꞌmu wodanikkinni, lubbokkinni, surrekkinninna wolqakkinni baxattota hakko barra mannu albaanni leellishshanna lainohu ammanate roduuwikki lowo geeshsha hagiidhino!—Marq. 12:30.

Cuuamitto yannanni kayise Yihowara soqqante lowo hagiirre afiꞌroottota heda dandiineemmo. Ikkollana, mite halashshaano bashshonsa gede ikkite hagiidha didandiitino. Kuni ikkinohu mayiraati? Yihowara hagiirrunni soqqamanke agurreemmokki gede assitannonke korkaatuwa hiikkuriiti?

MITOOTAHO HAGIIRRINSA BAINOHU MAYIRAATI?

Maganu Mangiste sokka Yihowa muli yanna giddo tenne busha alame hune haaro alame eessankera qaale einota kultanno; konnira tini sokka lowo geeshsha hagiirsiissannonketi dihuluullissannote. Qoleno Sofooniyaasi 1:14 togo yite buuxisannonke: “Bayiru Yihowa barri mule no! Gambise dayino; qoleno lowo geeshsha rahe daanni no!” Ikkollana, konne barra hendoommohunni aleenni agadhine keeshshanke, albi hagiirrinke baꞌꞌanno gedenna Yihowara albi gede ikkine diinaggaambe soqqammeemmokki gede assitara dandiitanno.—Law. 13:12.

Maganu manni ledo amanyoote afidhino aante aananke Yihowara hagiirrunni soqqammanni heeꞌneemmo gede jawaante ikkitannonke. Isinni, halaalu magansiꞌrawa dangoommohunna Maganoho hagiirrunni soqqama hananfoommohu Yihowa soqqamaanoha dancha amanyoote laꞌne ikkara dandaanno. (1 Phe. 2:12) Ikkollana mittu Kiristaanchi Maganu seera harunsa hoogeenna seejjinannisi yannara mayi ikkara dandaanno? Togoori ikkanno wote, Yihowa manniha dancha amanyoote lae halaalu minira dayino manni hexxo mudharanna hagiirrinsa baꞌꞌara dandaanno.

Sheexaanunniti busha alame naqqannohu daddalu totaino hagiirrenke hunara dandaanno. Daawuloosi hasiisannonkekki coye hasiisannonke yine hendeemmo gede assate alamesi horoonsiꞌranno. Ikkollana, Yesuusi coyiꞌrinota aante noo hedo dea dihasiissannonke: “Lamu mootichira borojjicho ikka dandaannohu dino; mitto giwe layinkiha baxanno; woy mitto seekke cuꞌmire, koꞌee mishanno. Maganohono Jiroteno mitteenni borojjoota ikka didandiitinanni.” (Mat. 6:24) Tenne alamera noore baalankare dandiinummo geeshsha afiꞌrate woꞌnaallanni Yihowara hagiirrunni soqqama didandiineemmo.

‘GATISANNONKE MAGANINNI HAGIIDHE’

Yihowa baxxannorira isira soqqama duha diꞌꞌikkitannonsa. (1 Yoh. 5:3) Yesuusi togo yiinota qaagi: “Daafurtinoonnirinna duhu batiꞌrinoꞌneri baalu anewa amme, ani fooliishshiisheemmoꞌnena. Qambaraꞌya duqqe, anewiinnino rosse; ani joogahonna wodaniꞌyanni shooshaqahona; qoleno lubboꞌnera fooliishsho afidhinanni. Korkaatuno qambariꞌya haxo diꞌꞌitannoho, duhiꞌyano shotaho.” (Mat. 11:28-30) Kiristoosi rosaano ikkine duqqinanni qambari fooliishsho aannohonna hagiirsiisannoho. Qoleno Yihowara soqqamme lowo geeshsha hagiidhineemmo gede assannonkehu gari korkaati noonke. Hanni ‘gatisannonke Maganinni hagiidhineemmo’ gede assitannonke korkaatta giddo sase laꞌno.—Imb. 3:18.

Soqqammeemmohu heeshsho uyinonkehunna hagiirraamu Maganiraati. (Looso 17:28; 1 Xim. 1:11) Heeshshote heeꞌneemmo gede assinonkehu Kalaqaanchonke ikkinota anfoommo. Hakko daafira, cuuammummonku saino diri ikki geeshshihano ikkiro, isira hagiirrunni soqqama diagurreemmo.

Hanni Yihowara 40 diro woradu aliidi laꞌꞌaancho ikke soqqaminohu Ekiteri lawishsha laꞌno. Isi ‘geedhimmate diri giddo nooha’ ikkirono xaano Yihowara soqqamanni no. (Far. 92:12-14) Minaamasi xiwani Ekiteri Yihowara bashshosi gede soqqamannokki gede assinosiha ikkirono hagiirrisi dibaino. Isi togo yiino: “Minaamaꞌya xiwani lexxanni haꞌranna laꞌꞌaꞌya dadillissannoehanna ise xiwansiisa qarra ikkitinoeha ikkirono, tini halaalaanchu Maganira soqqame afiꞌreemmo hagiirre huntaera diwodhoommo. Heeshsho uyinoehu manna alaamu heeꞌreennasi kalaqinoha Yihowa ikkinota afaꞌya calla iso woꞌmu wodaniꞌyanni baxeemmonna soqqameemmo gede assitannoe. Sabbakate loosira diinaggaawate sharrameemmo; hattono hagiirriꞌya baꞌꞌannokki gede Maganu Mangiste hexxo ayewoteno qaagate woꞌnaaleemmo.”

Yihowa wodote kakkalo qixxeesse hagiirru noo heeshsho heeꞌneemmo faro faninonke. Ee, “Maganu alame lowo geeshsha baxino daafira, Beettosi ammanannota loosunni leellishannohu baalunku hegere heeshsho afiꞌranno gede ikkinnina baꞌꞌannokki gede, mitto Beettosi uyino.” (Yoh. 3:16) Maganu baxillisinni Yesuusi widoonni qixxeessinote wodote kakkalora ammana heedhunkero, cubbinkera maaro, hattono hegere heeshsho afiꞌneemmo. Kuni galanteemmo gede assannonkeha gari korkaata diꞌꞌikkino? Wodote kakkalora noonke galati Yihowara hagiirrunni soqqammeemmo gede diassannonke?

Meksikote heeꞌrannohu Hesuusi yinanni rodii togo yiino: “Ani alba looseemmo loosira borojjichoho; barru barrunku seeda saate looseemmo; konne asseemmohu giddeessinoeri heeꞌreenna ikkikkinni woxe lexxate yeeti. Gedensaanni kayinni Yihowa daafira rosummo; hattono isi muxxe Beettosi mannu oosora uyinota huwatummo. Hakkiinni isira soqqama lowo geeshsha hasiꞌrummo. Hakko daafira heeshshoꞌya Yihowara sayise uummo; hattono 28 diro loosoommo dirijjitenni agure fule woꞌma yanna soqqansho giddora eummo.” Hakko garinni kuni rodii Yihowara hagiirrunni soqqama hanafino.

Afiꞌneemmo gumi dadillisannoha ikkikkinni lowo geeshsha hagiirsiisannoho. Yihowa afattora albanni heeshshokki hiittootero qaagatto? Hawaariya Phaawuloosi Roomaho noo Kiristaani ‘alba cubbu borojje ikkinotanna’ xa kayinni “keeraanchimmate borojje” ikkinota qaagiissinonsa. Insa Kiristaana ikkitu gedensaanni, ‘qullaawa doogonni’ guma laala hanaffino; kuni gumi jeefote hegere heeshshowa massanno. (Rom. 6:17-22) Ninke heeꞌneemmo heeshshono qullaawate; konnira maaeelu amanyooti woy finqille abbitanno dadilli dinonke. Tini lowo geeshsha hagiirsiissannote!

Hanni Keyimi lawishsha laꞌno. Isi alba Maganu noota diammanannoho, heeshshote kaimi suutu soorrooti yee hedannoho, hattono tuntuꞌmote heewo heewisamannoho. Keyimi Kiristaanu gambooshshe haꞌra hanafi; hakkiicho roduuwu mimmito baxanno gari dhagge ikkisi. Keyimi heeshshosi biddi assiꞌrate, Yihowa Isi noota ammananno gede kaaꞌlasira huucciꞌri. Isi togo yiino: “Yanna saꞌanni hadhuta baxillaanchu Anninna maaranno Magani noota wodanchummo. Yihowaha xalala seera agadhaꞌya agarooshshe ikkitinoe. Heeshshoꞌya biddi assiꞌra hoogoommoro, anino albite tuntuꞌmote heewo heewisantanno jaallaꞌya gede kawoote reyoommoha ikkara dandaanno. Heeshshoꞌya giddo hagiidhoommo dirra Yihowara soqqamanni sayisoommote.”

HEXXO MUDHITINOONTE!

Tenne busha alame bao agadhine heeꞌnoommo yannara hiittoo lao hasiissannonke? ‘Ayyaana hagiirsiisate wixiꞌnanni heeꞌnoommotanna’ ‘hegere heeshsho mixxineemmota’ deꞌnoonke. Konni daafira, “ceeꞌma hoongummoro yanna iillitanno wote mixxineemmo daafira hexxo mudhine danchare assa agurroonke.” (Gal. 6:8, 9) Yihowa kaaꞌlonni kaajjine uurrino, “bayira qarra” lulluqqine saꞌꞌate hasiissanno akatta lossiꞌrate jawaante loonso, hattono qarrisannori heeꞌrirono Yihowara hagiirrunni soqqama agurroonke.—Aju. 7:9, 13, 14; Yaq. 1:2-4.

Maganu loonseemmo loosonna isiranna suꞌmisira noonke baxille seekke afino daafira, kaajjine uurranke kiissannonketa addaxxa dandiineemmo. Yihowara hagiirrunni soqqama agura hoongummoro, faarsaanchu Daawiti gede ikkineemmo; isi togo yiino: “Ayewoteno albaꞌyaanni Yihowa wodhoommo. Isi qiniiteꞌyaanni noo daafira, digaggaweemmo. Hakko daafira wodaniꞌyara tashshi yaannosi; woꞌma mannimmaꞌyano hagiidhitanno. Qoleno beꞌe yuummokki heeꞌreemmo.”—Far. 16:8, 9.