Culkunni Roore Muxxe Ikkinoha Maganu Baxanno Akata

Armeeniyaho heedhannoti Higanashi yinanniti cuuantinokki halashshaancho minise mule baꞌino paaspoorte affino. Paaspoortete giddo baankete mini kaardenna lowo woxi no. Ise tenne isente gede cuuaminokki halashshaancho ikkino minaannisera kultu.

Kuri minaanninna minaama angate anjenna lowo asali noonsaha ikkirono, woxu anni teesso paaspoortete aana laꞌꞌe annaho qolate murciꞌri. Woxe huꞌni manchinna maatesi tenne lowo geeshsha dhagge assiꞌri. Higanashinna minaannise ammanaminore ikkinohu Qullaawa Maxaafa xiinxallannohura ikkinota kulinsa. Hakkiinni konne tunceenya horoonsiꞌre Yihowa Farciꞌraasine daafira kulinonsa, hattono hattenne maatera mite borruwa uyinonsa.

Woxu bainosi manchi maate, Higanashi kiisate yite woxe uyitasera hasidhinoha ikkirono, ise kayinni adha gibbino. Layinki barra, woxu bainosi manchi minaama Higanashinna minaannisewa dagge maatese naaddinonsata leellishate Higanashira almaazete cuue uyitinose.

Hattenne maatente gede, mannu Higanashinna minaannise ammanaminotera dhagge assiꞌrara dandaanno. Ikkollana, tini Yihowara dhagge ikkitannosiyyani? Yihowa insa ammanantinota ma garinni laino? Ammanamansa kiissinonsa?

MAALAAMITTETE COYE ROORTINO AKATTA

Aleenni noo xaꞌmuwa dawaro qarrissannota diꞌꞌikkitino. Korkaatuno, Maganu soqqamaano Yihowa baxanno akatta leellisha isi illera culka, woy wole maalaamittete coye roortannota affino. Ee, Yihowa roorse laꞌꞌanno coyi mannu ooso roorsite laꞌanno coyinni baxxinoho. (Isa. 55:8, 9) Qoleno, Yihowa soqqamaano ikkinoommohura, isi akatta lossiꞌrate sharrammeemmo sharro ninkera loworeeti.

Qullaawu Maxaafi, egenno woy hayyotenna buunxete daafira kulannori tenne leellishanno. Lawishsha 3:13-15 togo yitanno: “Egenno afiꞌrannohuna buuxa lexxannohu baꞌraaꞌrinoho. Woxe egenno roortino; culka lexxantenni, egenno lexxa woyyitanno. Egenno dilqu kinchinni roortanno; egennote ledo taashshinanniri mitturino dino.” Ee, Yihowa tenne akatta baalante maalaamittete coyibbanni roorse laꞌꞌanno.

Ikkina, Yihowa ammanama ma garinni laꞌꞌanno?

Yihowa umisi ammanaminoho; isi horo “kaphannokki” Maganooti. (Tit. 1:2) Qoleno isi soqqamaasinchu Phaawuloosi umi xibbi dirihu Ibiraawuyaani Kiristaanira togo yee sokka borreessanno gede assino: “Ninkera Magano huuccenke; fayyaaleessu tiiꞌꞌi noonketa dihuluullammeemmo; woꞌmante yannara dancha coye assate [‘ammanammoommore ikkate’, NW] halchinoommo.”—Ibi. 13:18.

Yesuusi Kiristoosi ammaname dancha lawishsha ikkinonke. Lawishshaho, kakkalaanote roorrichi Qeyaafa togo yiinosi: “Heeshshote Magani suꞌminni xaꞌmeemmohena Ati Maganu Beetto, Kiristoosa ikkoottoro kulie.” Yesuusi halaale coyiꞌrasi Sanihediriini shongo Magano xoninohu gede assite kiirtannonna reyanno gede assitannosiha ikkirono mittoreno maaxikkinni Mesihicha ikkinota coyiꞌrino.—Mat. 26:63-67.

Ninkena? Shiima geeshsha calla coye wirre woy kaphine woxe afiꞌneemmo gedeeri tuncu yaannonke yannara ammanammoommore ikkineemmo?

AMMANAMA SHOTA IKKITANNONKEKKI WOTE

Tenne heeꞌnoommote batinyu manni ‘umonsa baxannonna woxe baxanno’ yannara ammanama shota ikkitannokkiti egennantinote. (2 Xim. 3:2) Angate anje woy dancha looso hooga ammanama shota ikkitannonkekki gede assitara dandiitanno. Batinyu manni moora, yawaawula, woy wole ammanama xeꞌino coye assa qarra afiꞌrinokkiri gede asse hedanno. Lowo manni woxe afiꞌrate ammanama xeꞌinore assa hasiissannonsahu gede asse hedanno daafira, togoo hedo base baalate woꞌmitino. Wole agurina mitu Kiristaani nafa, gara ikkitinokki doogonni woxe afiꞌrate yee busha doorsha doodhe songote giddo noonsahu danchu suꞌmi baꞌꞌanno gede assiꞌrino.—1 Xim. 3:8; Tit. 1:7.

Wolu batinyu Kiristaani kayinni Yesuusi faale haꞌranno. Insa Maganu baxanno akatta, jiro woy wole coye roortannota huwatino. Konni daafira, Kiristaanu wedelli dancha guma afiꞌrate yee rosu mine fonqolo dimooranno. (Law. 20:23) Ammanama Higanashi kiissunte gede duuchanka wote kiissanno yaa diꞌꞌikkino. Ikkirono, ammanama Maganu albaanni gara ikkino coyeeti; qoleno woxe roorinoha xuru nookki tiia afiꞌne heeꞌneemmo gede kaaꞌlitannonke.

Gakisi woꞌnaalshi tenne xawisanno. Isi togo yiino: “Kiristaancho ikkammora albaanni, mitte jawa dirijjite giddo looseemmo; hatte dirijjite anni afiꞌranno tirfe roore maaxe shiima qaraxo calla baatanno. Ani loosiisaancho ikkoommo daafira, qaraxo mursiisannohu dirijjite assitannoha konne gara ikkinokki assoote lashshi asse saꞌꞌanno gede mitore gubbise ‘sheemaate’ eꞌꞌeemmo gede xixxiimbannie. Tini suꞌmiꞌya baꞌꞌanno gede assitino. Halaale macciishshummoti lowo woxe baantannieha ikkirono, hattoore assa giwummo. Hatteentenni umiꞌyata daddalu dirijjite faꞌnummo. Dirijjite faꞌnanni heeꞌrenni, dirijjiteꞌya higge affinota assummo, qoleno qaraxo gudise baatummo.”—2 Qor. 8:21.

Gakisi lede togo yiino: “Afiꞌreemmo woxi alba baantannie woxinni bocunni ajanno daafira maateꞌyara hasiisannore shiqisha qarra ikkitinoe. Ikkirono, ani albinni roore hagiirraamoho. Yihowa albaanni xuru nookki tiiꞌꞌi nooe. Lame oosoꞌyara dancha lawishsha ikkoommo, qoleno songote giddo qoosso afiꞌrate ikkado ikkoommo. Hattono, qaraxo mursiissannorinna loosunni xaandeemmohu wolu manni albaanni ammanaminoho yinanni suꞌma afiꞌroommo.”

YIHOWA KAAꞌLANNONKE

Yihowa ammanante hattono wole lowo waaga afidhino akatta leellishshe isi roso gaamaarsitannore baxanno. (Tit. 2:10) Isi tenne buuxisanni Nugusu Daawiti togo yee borreessanno gede assino: “Anjeꞌyanni kayise techo geedhimmaꞌya geeshsha, keeraanchu tugamanna, sirchisino hudiꞌre huucciꞌranna afe diegennoommo.”—Far. 37:25.

Maganoho ammanantinote Ruuti xagge tini halaale ikkitinota leellishshanno. Ise geedhimma amaddino ballose Naaoomiwiinni baxxa gibbino. Ruuti addu Magano magansiꞌra dandiitannowa Israeele hadhino. (Rut. 1:16, 17) Ruuti Israeelete noo waro higgete giddo kulloonni garinni fishsha jawaatte xinqidhe worba loosaasincho ikkitinota leellishshino. Yihowa Daawitira assinonte gede, Ruutiranna Naaoomira hasiisannonsare uyinonsa. (Rut. 2:2-18) Qoleno, Yihowa Ruutira maalaamittete coye roorinore assinose. Yihowa Nugusu Daawiti, wole agurina Mesihichu nafa ise sirchi widoonni ilamanno gede assino!—Rut. 4:13-17; Mat. 1:5, 16.

Mite Yihowa soqqamaanora heeshshonsara hasiisannonsare afidhannoha gari looso afiꞌra qarra ikkitansara dandiitanno. Ikkollana, ammanama bainore assite shotunni woxe afiꞌrate heda agurte jawaatte loosate sharrantanno. Hakko garinni ammanamansa wole Maganu akatta baalunku coyinni roorsite laꞌannota leellishshanno.—Law. 12:24; Efe. 4:28.

Ruutinte gede, alamete doyichora noo Kiristaani Yihowara manna kaaꞌlate wolqa noosita ammananno. Insa Qullaawu Maxaafi giddo togo yee qaale eino Magano addaxxanno: “Horo diagureemmohe; dicallachisheemmohe.” (Ibi. 13:5) Yihowa ammaname heeꞌranno manna kaaꞌlannota duucha hige leellishino; qoleno isira tenne assate dandoo noosi. Isi heeshshote hasiisannore aate eino qaale ayewoteno wonshanno.—Mat. 6:33.

Ee, mannu culkanna wole coye lowori gede assa laꞌꞌara dandaanno. Ikkollana, iimi Anninke ammanammoommore ikkankenna wole isi akatta leellishanke muxxe coye baala roorse laꞌꞌanno!