Wolu Manni Loosanno Soꞌro Guficho Ikkitahera Wodhitooti

1, 2. Qullaawu Maxaafi Maganu manni lexxanni haꞌrannota kulinohu hiittoonniiti?

UULLATE aana nooti Yihowati ammanantino soqqamaano, addinta baxxitino dirijjiteeti. Ikkollana, tini dirijjite guuntete xeꞌnenna laanfe noonsa manni gamba yiinote. Ikkirono, Maganunnihu qullaawu ayyaani alamete doyichora noo songo lophitannonna harditanno gede assanni no. Yihowa guuntete xeꞌne noonsaha ikkirono umonsa shiqishino manna horoonsiꞌre dhaggete looso loosanni keeshshino; hanni konni loosi giddo boode laꞌno.

² Tenne alame goofimarchi 1914nni hanafi yannara, uullate aana nooti Yihowa soqqamaano kiiro shiimatella. Ikkollana, Yihowa insa loossinoha sabbakate looso maassiꞌrino. Hatte yanna gedensaanni, lowo miliyoone ikkanno manni Qullaawa Maxaafa xiinxalle Yihowa Farciꞌraasine ikkino. Yihowa tenne lopho daafira balaxe togo yee coyiꞌrino: “Insa giddonni ajjino ilama kume, woꞌmunkura maaꞌne ikkitinori, wolqaataame gosa ikkitanno; ani Kaaliiqi kuni coyi yannasinni rahe woꞌmanno gede asseemmo.” (Isa. 60:22) Ee, tini masaalo tenne heeꞌnoommote goofimarchu yannara woꞌmitanni no. Xaa yannara uullate aana noori Maganu soqqamaano kiiro, mite mite gobbata mannu kiiro roortanno.

3. Yihowa soqqamaano baxille leellishshinohu hiittoonniiti?

³ Qoleno, Yihowa mannisi isiha qara akata yaano baxille lossiꞌranno gede kaaꞌlino. (1 Yoh. 4:8) Maganu baxilli faale haꞌrinohu Yesuusi, harunsaanosira togo yiino: “Kiꞌne kiꞌneneewa baxantinanni gede, haaro hajajo eemmoꞌne; . . . kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.” (Yoh. 13:34, 35) Muli diri albaanni hakko iso, daga insa insanaawa ola kayissu yannara baxille leellisha lowo geeshsha hasiissannoti xabbe leeltino. Lawishshaho, Layinkihu Alamete Oli yannara calla 55 miliyoone meddi yaanno manni reyino. Ikkollana, Yihowa Farciꞌraasine daga raafo ganinohu konni olira anga diwodhitino. (Mikiyaasi 4:1, 3 nabbawi.) Tini qolte mannu mundeera ‘xaꞌmantannokki’ gede kaaꞌlitinonsa.—Soq. 20:26.

4. Yihowa soqqamaano lexxitanni haꞌransa dhagge ikkitannote yineemmohu mayiraati?

⁴ Maganu manni, “tenne gobba magani” Sheexaanu moohinoti busha alame gibbannonsaha ikkirono lexxanni no. (2 Qor. 4:4) Sheexaanu, xaadooshshu buusa assannonte gede alamete poletikano hasiꞌri gede asse horoonsiꞌranno. Ikkollana, isi danchu duduwi duduwamannota hoola didandaanno. Sheexaanu gattinosi yanna shiima ikkitinota afinohura, mannu addu magansiꞌra giddonni agure fulanno gede assate addi addi doogga horoonsiꞌranno.—Aju. 12:12.

AMMANAMATTOKKI GEDE ASSANNORI TUNCU YAANNOHE WOTE

5. Wolu manni koffi assannonke woti heeꞌrara dandaannohu mayiraati? (Hanafote noo misile lai.)

⁵ Maganu soqqamaano Yihowanna manna baxa lowo geeshsha hasiissannota huwattino. Yesuusino tenne assa hasiissannota xawise kulino. Isi baalanta roortanno hajajo hiittenneeti yee xaꞌmino manchira togo yee dawarino: “‘Mooticha Maganokki woꞌmu wodanikkinni, woꞌma lubbokkinni, woꞌma hedokkinni baxi!’ yitannote. Baalanta roortannotinna umi hajajo tenneeti. Tenne labbannoti layinki hajajo, ‘Olliichokki umikki gede assite baxi!’ yitannote.” (Mat. 22:35-39) Ikkollana, Qullaawu Maxaafi Addaami loosino cubbinni kainohunni ninke baalunku guuntete xeꞌne ragiꞌnoommota kulannonke. (Roomu Sokka 5:12, 19 nabbawi.) Hakko daafira songote giddo mitu manni koffi assannonkere loosanno woy coyiꞌranno woti heeꞌrara dandaanno. Tini Maganohonna mannisira baxille leellisha qarra ikkitannonke gede assitara dandiitanno. Togoori tuncu yaannonke yannara maa assineemmo? Hunda heedhinoti ammanantinoti Maganu soqqamaano nafa, wole manna koffi assannore loossino woy coyidhino woti no; hakko daafira, Qullaawu Maxaafi giddo konni manni daafira kultanno dhagge nabbawanke kaaꞌlitankera dandiitanno.

6. Eeli oososi maa assitanna seejjikki wore agurino?

⁶ Lawishshaho, kakkalaanote biilo ikkinohu Eelira, Yihowa higge ayirrissannokkiri lame ooso noosi. Qullaawu Maxaafi togo yaanno: “Eeli ooso yawaawulootaho; Kaaliiqano diwaajjitannoreeti.” (1 Sam. 2:12) Eeli addu magansiꞌra halashshate lowore assinoha ikkirono, lamenti oososi kayinni kabbaade cubbo loossino. Eeli tenne afino, qoleno insa seejja hasiissinosi; isi kayinni hayi yiikkinni wore agurino. Hakko daafira, Maganu Eeli maate qorichishino. (1 Sam. 3:10-14) Qoleno, yannate gedensaanni, sirchisi kakkalaanote biilo ikke soqqamannokki gede assinoonni. Ati Eeli yannara heeꞌroottoha ikkoommero, isi oososi cubbo loossanna hayi yiikkinni wore agurinohura mayi macciishshamannohe? Tini Maganoho soqqama aguratto geeshsha iillishshahera wodhatto?

7. Daawiti kabbaade cubbo loosinohu hiittoonniiti? Maganu tennera maa assino?

⁷ Yihowa Daawiti lubbora baxanno; qoleno iso Maganu “hedinore wonshanno mancho” yinoonnisi. (1 Sam. 13:13, 14; Soq. 13:22) Ikkollana Daawiti gedensoonni Bersaabehi ledo foorino; hakkiinni ise godobbu. Kuni ikkinohu minaannise Ooriyo olu bayicho heeꞌreennaati. Daawiti, Ooriyo shiima yanna keeshshara minira daanno wote Bersaabehi ledo goxanno gede assate woꞌnaalino; isi tenne assinohu qaaqqu Ooriyooho yine hendanni gedeeti. Ooriyo kayinni nugusu hedinore diassino; hakko daafira Daawiti Ooriyo olu bayicho reyanno gede gano ganino. Daawiti tenne jaddo loose isinna minisi mannira qarra abbiꞌrino. (2 Sam. 12:9-12) Ikkollana Maganu Daawitira maarinosi; korkaatuno isi heeshshosi giddo Yihowara ‘ammaname’ soqqamate sharramino. (1 Mot. 9:4) Ati hattenne Daawiti heeꞌrino yannara heeꞌroottoha ikkoommero maa assatto? Daawiti loosinohu gara ikkinokki coyi guficho ikkahera wodhatto?

8. (a) Pheexiroosi eino qaale wonshikkinni gatinohu hiittoonniiti? (b) Pheexiroosi soꞌro loosihu gedensaannino Yihowa iso horoonsiꞌra agurinokkihu mayiraati?

⁸ Hanni soqqamaasinchu Pheexiroosi lawishsha laꞌno. Yesuusi iso soqqamaasinchosi asse doodhino; ikkirono Pheexiroosi gedensoonni gaabbisannosire coyiꞌrino woy assino woti no. Lawishshaho, isi Yesuusi qarru giddo heeꞌreenna iso hune haꞌrino. Pheexiroosi hakkuyira albaanni wolootu Yesuusa hunte hadhuro nafa isi kayinni hune haꞌrannosikkita coyiꞌrino. (Maq. 14:27-31, 50) Ikkollana, Yesuusa amande haaꞌne haꞌni yannara Pheexiroosinna wole baala soqqamaasinesi hunte hadhinosi. Pheexiroosi Yesuusa egenninoha ikkirono, iso diegennoommo yee hige hige moromino. (Maq. 14:53, 54, 66-72) Ikkollana Pheexiroosi gaabbino; konnira Yihowa iso horoonsiꞌra diagurino. Ati hatte yannara Yesuusi rosaancho ikkoottoro, Pheexiroosi loosino soꞌro Yihowara ammanamattokki gede assitahera wodhatto?

9. Yihowa ayewoteno taashshote Magano ikkinota ammanattohu mayiraati?

⁹ Aleenni kulli lawishshuwa wole manna koffi assannore coyiꞌrino woy assino manni dhagge giddo gamatella. Hunda woy muli diro heedhinota gara ikkinokkirenna wole manna koffi assannore loossinota woy coyidhinota wole Yihowa soqqamaanono qummi assa dandiinanni. Ati togoori tuncu yiihero maa assatto? Insa loossino soꞌro Yihowanna songotewiinni agurte haꞌratto gede assitahera wodhattonso, Yihowa soꞌro loosino manchi maaro eanno gede yanna aannositanna isi gara ikkinokki coye taashshotenni biddi assannota ammanatto? Mitu kabbaade cubbo loosino manni Yihowa maaro xaꞌmira giwanno. Togoori ikkanno yannara, Yihowa kuni manni songotenni bohamanno gede asse yoo yaannota ammanatto?

AMMANANTE HEEꞌRI

10. Yesuusi Asqorootu Yihudinna Pheexiroosi loossino soꞌro daafira maa huwatino?

¹⁰ Qullaawu Maxaafi giddo wolootu kabbaade soꞌro loosse heedheenna Yihowaranna dagasira ammaname heeꞌrino manni dhagge no. Lawishshaho, Yesuusi hashsha woꞌma huuccatto assiꞌranni gali gedensaanni 12 soqqamaasinesi doorino. Kuri soqqamaasine giddo mittu Asqorootu Yihudaati. Yannate gedensaanni Yihudanna Pheexiroosi Yesuusa kaaddino; ikkollana isi tini Yihowa ledo noosi jaalooma huntasira diwodhino. (Luq. 6:12-16; 22:2-6, 31, 32) Yihowa woy baalunku Maganu manni tenne soꞌro loosinokkita Yesuusi afino. Yesuusi harunsaanosi giddo mite dadillisannore assitinosiha ikkirono isi kaajja loososi loosa diagurino. Yihowa iso reyotenni kayise kiisinosi; hattono iimi Gashshooti Moote ikkanno gede assinosi.—Mat. 28:7, 18-20.

11. Qullaawu Maxaafi giddo Maganu soqqamaano daafira mayine masaalloonni?

¹¹ Yesuusi albano xaano Yihowaranna mannisira ammanaminoho. Ee, Yihowa tenne goofimarchu yannara soqqamaanosi horoonsiꞌre loosanni noo loosi dhaggenniho! Yihowa manna agurranna alame woꞌmate halaale sabbakanni noohu wolu manni dino; korkaatuno xaa yannara Yihowa Kiristaanu songo agurranna massaganni nooti uullate aana wole dirijjite dino. Isayaasi 65:14 Maganu manni mereero heeꞌrannohu ayyaanaamittete atootire togo yite kultannonke: “Soqqaamaanoꞌya wodanunni hagiidhite faarsitanno.”

12. Wolu manni loosanno soꞌro ma garinni laꞌꞌa hasiissannonke?

¹² Yihowa soqqamaano, isi massagannonsahuranna dancha looso loossanno gede kaaꞌlannonsahura tashshi yaannonsa. Sheexaanu moohino alame kayinni coyi bushanni haꞌranno wote roore dadillitanni hadhanno. Shiima Maganu soqqamaano loossino soꞌrora Yihowa woy dagasi bushiisha hayyo diꞌꞌikkitino. Konnira, Yihowaranna dirijjitesira ammaname heeꞌra, hattono wolu manni soꞌro loosanno yannara maa assa dandiineemmoro afa hasiissannonke.

WOLU MANNI SOꞌRO LOOSANNO YANNARA MAA ASSATTO?

13, 14. (a) Wolu manni koffi assannonke yannara dandiine saꞌꞌa hasiissannonkehu mayiraati? (b) Maganu einoha hiikkonne qaale qaaga hasiissannonke?

¹³ Ikkina, mittu Maganu soqqamaanchi koffi assannore coyiꞌranno woy loosanno yannara maa assa hasiissannonke? Qullaawu Maxaafi togo yee amaalannonke: “Koma amada gowwimma ikkitino daafira, ati hanqoho muddantooti.” (Ros. 7:9) Mannu ooso biꞌre Edenete Kaashshu basera noowaro noonsa guunte huꞌnitunku mitu 6,000 diri sainota qaaga hasiissannonke. Guuntete xeꞌne noonsate mannu oosora soꞌro loosa rakkannonsa. Hakko daafira, ayyaanaamittete roduuwinke hoꞌro soꞌro loosa dihasiissannonsa yine hedanna insa loossanno soꞌro konni jeefote diri giddo Yihowara soqqamme afiꞌnanni hagiirre huntankera wodha dihasiissannonke. Wolootu loossino soꞌronni gufiꞌne Yihowa dirijjite aggurre fullummoro insa loossino soꞌro roore soꞌro loonsanni heeꞌnoommo yaate. Hatto ikka hoogiro, Maganu fajjo assa calla hoongeemmoha ikkikkinni, isi qixxeessinote haaro alame giddo heeꞌrate qoossono gatte baꞌannonke.

¹⁴ Hagiirrinke baikkinna hexxo mudhinummokkinni heeꞌneemmo gede ayewoteno Yihowa einoha aane noo qaale qaaga hasiissannonke: “Kune ani haaro gurduwanna haaro baatto kalaqeemmo; sainore baala hambanni; horonta diqaanganni.” (Isa. 65:17; 2 Phe. 3:13) Wolu manni loosino soꞌro konne atoote afiꞌrattokki gede guficho ikkitahera wodhitooti.

15. Yesuusi wolu manni soꞌro loosanno yannara maa assa hasiissannonketa coyiꞌrino?

¹⁵ Xaa yannara haaro alame eꞌnoommokkihura, wolu manni koffi assannonkere coyiꞌranno woy loosanno yannara Maganu ma assinammora hasiꞌrannoro afa hasiissannonke. Lawishshaho, Yesuusi uyinoha aane noo biddishsha qaaga hasiissannonke: “Mannu sao agurtiniro, gordu Anniꞌne kiꞌne saono agurannoꞌne. Mannu sao agura hoogginiro kayinni Anniꞌne kiꞌne saono diagurannoꞌne.” Qoleno Pheexiroosi Yesuusa “lamala hige” gatona yooni yee xaꞌmisi yannara, isi togo yee dawarinosi: “Lamala higge lamalawo ikkinninna lamala higge calla aguri diyeemmohe.” Yesuusi tenne coyiꞌrinohu ayewoteno manna gatona yineemmo gedeeti; konnira ninke ayewoteno tenne assate sharrama hasiissannonke.—Mat. 6:14, 15; 18:21, 22.

16. Yooseefi dancha lawishsha ikkinonkehu hiittoonniiti?

¹⁶ Mannu koffi assannonke yannara maa assa hasiissannonkero afate Yaiqoobi beetti Yooseefi lawishshino kaaꞌlannonke. Yooseefi annisi lubbora baxannosihura, annisi ilinori tonnu roduuwisi hinaassinosi. Konnira, insa Yooseefi borojjimmate hirtino. Lowo diri gedensaanni Yooseefi Gibitsete heeꞌre loosinohu danchu loosi, hatte gobbahu qaru gashshaanchinni aantino silxaane afiꞌranno gede assinosi. Yooseefi roduuwi heedhanno gobba hude gantuta, insa sagale hidhitara Gibitsete gobba hadhino; ikkollana insa isi ewelumma diaffino. Yooseefi hasiꞌroommero silxaanesi horoonsiꞌre roduuwisi allaggissinositera rabbisiꞌra dandaanno. Hatteentenni, isi roduuwisi hedonsa biddi assidhinoronna teꞌee afate fonqolinonsa. Roduuwisi hedonsa biddi assidhinota afiti ewelummasi kulinonsa. Togo yiinonsa: “‘Waajjitinoonte; ani kiꞌnenna oosoꞌne itiseemmo.’” Qullaawu Maxaafi lede isi “owaatu qaalinni coyiꞌre wodana diggi” assinonsata kulannonke.—Kal. 50:21.

17. Wolu manni soꞌro loosanno yannara maa assa hasiissannohe?

¹⁷ Qoleno, ninkeno soꞌro loonseemmore ikkinoommohura wole manna koffi assineemmo woti heeꞌrara dandaannota qaaga hasiissannonke. Qullaawu Maxaafi wole manna koffi assinoommoti leeltunkero hakkonne koffi assinoommo manchiwa marre kawa kaꞌaa higinonke coye tira hasiissannonketa kulannonke. (Maatewoosi 5:23, 24 nabbawi.) Wolu manni loonsoommo soꞌrora koma ammaxxannokkiha ikkiro, ninkera tashshi yaannonkente gede ninkeno hatto assa hasiissannonke. Qullaawu Maxaafi togo yaanno: “Kuꞌu koꞌoye koffi assitinoonniha ikkiro nafa, mimmito dandaaꞌnenna mimmito mulla gatona yaaꞌne agurtinoonte. Yihowa mulla gatona yiinoꞌnente gede, kiꞌneno hatto asse.” (Qol. 3:13, NW) Umi Qorontoosi 13:5 Kiristaanu baxilli ‘koma kiirannokkita’ kultannonke. Ninke wole manna duuchanka wote gatona yineemmoha ikkiro, Yihowano gatona yaannonke. Ee, Yihowa soꞌro loonseemmo yannara maarannonkente gede, ninkeno wolu manni koffi assannonke yannara gatona yine, maaranno Anninke Yihowa faale haꞌno.—Faarso 103:12-14 nabbawi.