“Ayino Woshshaadannoꞌnekki Gede Agadhe”!

1. Qolasiyaasi Sokka 2:4, 8 yitanno garinni, Sheexaanu surrenke woshshaadate woꞌnaalannohu hiittoonniiti?

SHEEXAANU Yihowara badhe wodhinammora hasiꞌranno. Hakko daafira, isi hedonke daafate yaano surrenke woshshaade isira hajajammeemmo gede assate sharramanno. Sheexaanu baxisannonke coyira doogamme, isi hedo harunsineemmo gede assate woꞌnaalanno.—Qolasiyaasi Sokka 2:4, 8 nabbawi.

2-3. (a) Qolasiyaasi Sokka 2:8 noo qorowishsha lashshi assa hasiissannonkekkihu mayiraati? (b) Konni birxichira maa ronseemmo?

² Sheexaanu ninkeno soꞌrisiisara dandaanno? Ee dandaanno! Phaawuloosi Qolasiyaasi Sokka 2:8 noo qorowishsha borreessinohu ammaninokki mannira diꞌꞌikkino. Isi tenne sokka borreessinohu qullaawu ayyaaninni buuramino Kiristaaniraati. (Qol. 1:2, 5) Hakkawari Kiristaana Sheexaanu soꞌrisiisansara dandaanno; xaa yannara isi ninke hakkawarinni roore soꞌrisiisankera dandaanno. (1 Qor. 10:12) Togo yineemmohu mayiraati? Korkaatuno Sheexaane uullara tungoonni; hattono isi Maganunnita ammanantino soqqamaasine soꞌrisiisate qodhe kaino. (Aju. 12:9, 12, 17) Qoleno heeꞌnoommohu bushunna awaawuranno manni ‘bunshete aana bunshe ledanni’ noo yannaraati.—2 Xim. 3:1, 13.

³ Konni birxichira, Sheexaanu hedonke daafate ‘awaawursha’ horoonsiꞌrannohu hiittoonniitiro ronseemmo. Qoleno, isi horoonsiꞌranno “xagarro” woy gano giddo sase laꞌneemmo. (Efe. 6:11) Aananno birxichira kayinni, Sheexaanu xagarro hedonke daaffinoha ikkiro, tenne qeeꞌla dandiineemmohu hiittoonniitiro ronseemmo. Xa hanni balanxe Israeele Hexxote Gobba eꞌu gedensaanni Sheexaanu soꞌrisiisinonsa garanna tennenni ninke maa ronseemmoro laꞌno.

ISRAEELE DOOGANTE KAPHU MAGANNA MAGANSIDHINO

4-6. Marro 11:10-15 kultanno garinni, Israeele Hexxote Gobba eꞌu yannara, Gibirinnu looso lainohunni maa assa hasiissinonsa?

⁴ Sheexaanu Israeele kaphu maganna magansidhanno gede asse soꞌrisiisino. Isi togo assinohu hiittoonniiti? Sheexaanu Israeele sagale hasidhannota afino; konnira insa soꞌrisiisate tenne hasattonsa horoonsiꞌrino. Israeele Hexxote Gobba eꞌu yannara, irsha loosidhannota haaro doogo rosa hasiissinonsa. Insa Gibitsete noo yannara, Abbayi lagi waa darte gatira eessidhe loosidhanno. Hexxote Gobbara kayinni gaware irsha loosidhannohu lagu waa horoonsidhe ikkikkinni wogga agare gananno xeeninna lojunniiti. (Marro 11:10-15 nabbawi; Isa. 18:4, 5) Hakko daafira, Israeele haaro gibirinnu hayyo rosa hasiissinonsa. Gibirinnu daafira egenno noonsahu batinyu manni halalla reyino daafira, loosiꞌnanni gara rosa shota diꞌꞌikkitinonsa.

⁵ Yihowa Israeele Hexxote Gobba eꞌanno woyite coyi bashsho gede ikkannokkita balaxe kulinonsa. Hakkiinni, “Kaaliiqiwiinni faffine wole gobba maganna magansidhinannikki gedenna insara kumbuultinannikki gede agadhe” yee qorowisiisinonsa. (Mar. 11:16, 17) Tini hedo iimi adda laꞌniro gibirinnu loosi ledo xaadooshshe afidhinota lawa hooggara dandiitanno. Ikkina Yihowa haaro gibirinnu hayyo daafira kulanni heeꞌre, kaphu maganna magansidhannokki gede qorowisiisinohu mayiraati?

⁶ Yihowa, Israeele qooxeessinsara heeꞌrannohu iso magansiꞌrannokki mannita gibirinnu hayyo rosate doogantannota afino. Qoleno qooxeessinsara heeꞌranno manni Gibirinnu loosinni Israeele roorannotinna Maganu manni insawiinni rosa dandaannoti egennantinote; ikkirono tini lamenta afidhino. Kanaani gobba gaware Baꞌꞌaali magansidhannore ikkansa hedonsa daaffino. Insa gordu anninna xeena ganannohu Baꞌꞌaaliiti yite ammantanno. Yihowa, mannisi tenne kaphu ammananni dogamara dihasiꞌrino. Israeele kayinni duucha higge Baꞌꞌaali magansiꞌra doodhitino. (Kir. 25:3, 5; Eje. 2:13; 1 Mot. 18:18) Hanni Sheexaanu Israeele woshshaadinohu hiittoonniitiro laꞌno.

SHEEXAANU ISRAEELE WOSHSHAADATE HOROONSIꞌRINOTA SASE XAGARRO

7. Israeele Hexxote Gobba eꞌu yannara ammanansa fonqolantinohu hiittoonniiti?

⁷ Umihunni Sheexaanu, Israeele xeena hasidhannota afino daafira, tenne kalaqamu hasattonsa horoonsiꞌre soꞌrisiisinonsa. Diru kiiro Hexxote Gobbara Dotteessu agani jeefonni kayise Wocawaaru agani geeshsha xeena digananno yaa didandaanno. Israeele heeshshote hasiissannonsa sagalenna lowo laalcho afiꞌra dandiitannohu Birru aganinni hanafe gananno xeeninniiti. Sheexaanu, Israeele lowo laalcho afiꞌrate qooxeessinsara heedhannoti Yihowa magansidhannokki daga harunsitanno bude harunsa hasiissannonke yite heddanno gede asse soꞌrisiisinonsa. Tini Yihowa magansidhannokki daga, magannansa xeena gantannonsa gede mito ammaꞌnote bude harunsa hasiissannonke yite heddanno. Mitu Yihowa ammanannokkihu Israeelete manni moollete yanna seeddannokki gede assa dandiinannihu kaphu magannara mitore assiniro callaati yite heddino; hakko daafira insa kaphu magano ikkinoha Baꞌꞌaali magansiꞌra hanaffino.

8. Sheexaanu horoonsiꞌrinoti layinki hayyo hiittenneeti? Xawisi.

⁸ Layinkihunni Sheexaanu, Israeele amanyoote bainore assitanno gede fonqolinonsa. Yihowa magansidhannokki daga, magansidhanno woyite maaeela coye assitanno. Tenne mancaꞌꞌa magansiꞌra magansiꞌnanni woyite, labballuno meentuno qullaawu mini fotaano ledo fooranno. Yihowa magansidhannokki daga, labbaahu labbaahu woy meyati meyate ledo assannoha siimu xaadooshshenna wolu gari foorre lashshi assite agurtino; hattono togoo assooti qarra afiꞌrinokkihu gede assite laꞌanno. (Mar. 23:17, 18; 1 Mot. 14:24) Tini daga, magansidhanno woyite togoo coye assituro, magannansa uulla shaqqado ikkitanno gede assitanno yite ammantanno. Lowohu Israeelete manni tini daga harunsitannohu foorre woꞌmitinohu magansiꞌrate budinni doogamino daafira, kaphu maganna magansiꞌra hanafino. Konni garinni, Sheexaanu woshshaadinonsa.

9. Hoosei 2:16, 17 kultanno garinni, Sheexaanu Israeele Yihowa habbanno gede assinohu hiittoonniiti?

⁹ Sayikkihunni Sheexaanu, Israeelete Yihowa ayimma dahaabbannonsa gede asse soꞌrisiisinonsa. Masaalaanchu Ermiyaasi waro, Yihowa kaphaano masaalaano Baꞌꞌaalinni kainohunni mannisi Isi suꞌma hawanno gede assate woꞌnaaltinota coyiꞌrino. (Erm. 23:27) Maganu daga Yihowa suꞌma woshsha agurte, suꞌmasi Baꞌꞌaali (“Anna” woy “Mooticha” yaate) yaanno suꞌminni riqibbukki digattino. Konninni kainohunni Israeelete Yihowanna Baꞌꞌaali mereero noo badooshshi dahaawinonsa daafira, Baꞌꞌaali magansiꞌra Yihowa magansiꞌra ledo karsiissino.—Hoosei 2:16, 17 nabbawi.

SHEEXAANU XAA YANNARA HOROONSIꞌRANNO HAYYO

10. Sheexaanu xaa yannara hiittenne woshshaado horoonsiꞌranno?

¹⁰ Sheexaanu hunda horoonsiꞌri hayyo xaa yannarano horoonsiꞌranno. Isi mannu oosota kalaqamu hasatto horoonsiꞌre, foorre batise, hattono Yihowa ayimma dahaabbannonsa gede asse manna woshshaadate woꞌnaalanno. Hanni balanxe Sheexaanu mannu Magano deanno gede assate woꞌnaalannohu hiittoonniitiro laꞌno.

11. Sheexaanu mannaho Yihowa ayimma dahaabbanno gede assinohu hiittoonniiti?

¹¹ Sheexaanu Yihowa ayimma dahaabbanno gede assanno. Yesuusi soqqamaasine reyitu gedensaanni, ninke Kiristaanaho yaannohu batinyu manni kaphu roso tuqisa hanafino. (Soq. 20:29, 30; 2 Tes. 2:3) Kuri kaadaasine halaalaanchu Magani ayimma dahaabbanno gede assitino. Lawishshaho, insa Qullaawu Maxaafi tironsa giddonni Maganu suꞌma fushshite hunte “Mooticha” yaanno suꞌminni riqibbino. Maganu suꞌmi bayicho Mooticha yaannoha riqiwansa, Qullaawa Maxaafa nabbawanno mannira Yihowanna Qullaawa Borro giddo kulloonniri wole “mootoolla” mereero noo badooshshi dahaawannonsa gede assitino. (1 Qor. 8:5) Insa Yihowarano Yesuusirano “Mooticha” yaanno suꞌma horoonsidhino; tini Yihowanna Beettisi babbaxxitinore ikkitinoti dahaabbanno gede assitino. (Yoh. 17:3) Qoleno kuni halaali dahaawasi, Sillaase yinannihu Maganu Qaali giddo nookki rosi xintamanno gede assitino. Konninni kainohunni batinyu manni Maganu fojo ikkino daafira iso afa didandiinanni yee ammananno. Ikkollana kuni waajjo kaphooti!—Soq. 17:27.

12. Kaphu ammaꞌno mayi halaꞌlanno gede assitino? Roomu Sokka 1:28-31 kultanno garinni tini ikkito mayi qarra abbitino?

¹² Sheexaanu mannu amanyoote bainore assanno gede fonqolanno. Hundi Israeele waro Sheexaanu kaphu ammaꞌno horoonsiꞌre amanyoote bainori halaꞌlanno gede assino. Xaa yannarano isi hatto assanno. Kaphu ammaꞌno mancaꞌꞌa amanyoote laꞌanni sammi yitino; hattono mannu togoo assooti qarra diafiꞌrino yee hedanno gede assitino. Konninni kainohunni, Magano magansiꞌnanni heeꞌnoommo yaannohu batinyu manni dahaawinokkiha Maganunniha amanyootu seera harunsa agurino. Soqqamaasinchu Phaawuloosi Roomu Kiristaanira borreessino sokkara, tini ikkito mayi qarra abbitannoro xawisino. (Roomu Sokka 1:28-31 nabbawi.) “Saalsiisanno coye” yiniri giddo mittu, labbaahu labbaahu ledo woy meyati meyate ledo assannoho siimu xaadooshsheetinna woꞌmunku gari foorreeti. (Rom. 1:24-27, 32; Aju. 2:20) Ninke kayinni Qullaawu Maxaafi roso seekkine cuꞌmira hasiissannonke!

13. Sheexaanu horoonsiꞌrannoti wole hayyo hiittenneeti?

¹³ Sheexaanu kalaqamu hasattonke horoonsiꞌre woshshaadankera woꞌnaalanno. Ninkerano ikko maatenkera hasiisannore wonshiꞌrate kaaꞌlannonke roso rosate hasiꞌranke bunshe diafidhino. (1 Xim. 5:8) Loosoho kaaꞌlitanno egenno afiꞌrate, rosu minira eꞌne diinaggaambe rosa hasiissannonkeha ikkara dandaanno. Ikkollana qoropha hasiissannonke. Duucha gobbara rosaano rossannohu kaaꞌlitanno ogimma calla ikkikkinni alamete hayyooti. Rosaanote Maganu noota huluullantanno gedenna Maganu Qaale ayirrissannokki gede assanno roso rosiinsanninsa. Qoleno egennaammu baalu heeshsho dagginohu suutu soorronniiti yite ammantanno yine kullanninsa. (Rom. 1:21-23) Togoo rosi, Maganu hayyo ledo sumuu diyaanno.—1 Qor. 1:19-21; 3:18-20.

14. Alamete hayyo maa jawaachishshanno?

¹⁴ Alamete hayyo Maganunniha xalala seera lashshi assinanni gede jawaachishshanno, hattono konni seeri ledo sumuu diyitanno. Alamete hayyo Maganu ayyaani guma laala agurre ‘maalu looso’ harunsineemmo gede jawaachishshanno. (Gal. 5:19-23) Tini hayyo mannu naaxxaleessanna booꞌnaleessa ikkanno gede assitanno; tinino, ‘umonsa calla baxanno’ manni batiꞌranno gede assitino. (2 Xim. 3:2-4) Maganu soqqamaasinesi jooguullenna umonsa heeshshi assitannore ikkitara hasiꞌranno; naaxxa, booꞌnanna meessaneeto calla baxa kayinni tenne akatta ledo sumuu diyitanno. (2 Sam. 22:28) Mitu yuniversite eꞌꞌe rosino Kiristaani, Maganu hedanno garinni heda agure alame heddanno garinni heda hanafino. Hanni tini abbitanno qarra leellishannoha mitto lawishsha laꞌno.

15-16. Mitte rodoo woꞌnaalshinni maa rosootto?

¹⁵ Mitte 15 saꞌꞌanno diro woꞌma yanna soqqansho soqqantino rodoo togo yitino: “Yihowa Farciꞌraasincho ikkoommahura, yuniversite eꞌꞌe rosa gawajjitanno gara nabbawoomma, hattono macciishshoomma; ikkirono tenne amaale lashshi asse aguroomma. Tini amaale anera kaaꞌlitannota diꞌꞌikkitino yee hedoomma.” Ikkina isera mayi qarri iillinose? Ise togo yite xawisse coyidhino: “Rosoho lowo yanna hasiissanno daafira, albi gede seeda yanna gaaꞌme huuccatto assiꞌra didandoomma; hattono lowo geeshsha daafursannoe daafira soqqameemma woyite manna danchu garinni hasaawisanna gambooshsheho seekke qixxaawa qarra ikkitinoe. Ikkollana, yuniversitete roso illachishaꞌya Yihowa ledo nooe jaalooma huntanni noota huwatummati, agure fulate murciꞌrumma. Qoleno hatto assoomma.”

¹⁶ Tini rodoo yuniversite ease hedose gawajjitinohu hiittoonniiti? Ise togo yitino: “Yuniversitete rosoomma rosi, wole manna hakko iso ammanate roduuwaꞌya misheemma gede, dhukinsara aleenni ikkinore assaera hasiꞌreemma gede, hattono insawa gambo giweemma gede assinoeta hedeemma woyite saaleemma. Tenne hedo qeeꞌlate lowo yanna hasiissinoe. Tini, Maganu dirijjite qorowisiissannonkere lashshi assa, mageeshshi geeshsha gawajjitannoro huwateemma gede assitinoe. Yihowa ani umoꞌya afoommahunni roore afinoe. Uyinoe amaale macciishshoommaro ma danchi baino!”

17. (a) Maa assate murciꞌra hasiissannonke? (b) Aananno birxichira maa ronseemmo?

¹⁷ Ninkeno Sheexaanu alame tuqissannoti ‘mannu hayyonna awaawurshi woshshaadannonkekki gede agadhino.’ Sheexaanu soꞌrisiisannonkekki gede woꞌmante yannara qorophino. (1 Qor. 3:18; 2 Qor. 2:11) Isi, Yihowa dahaawannonke gede assankera wodhinoonke. Taalle nookkiha Yihowaha amanyootu seera harunsino. Sheexaanu dogeennanke, Yihowa amaale lashshi assineemmokki gede qorophino. Ikkollana alamete hedo gawajjitanni noonketa huwantummoro maa assa hasiissannonke? Aananno birxichira, Maganu Qaali ‘qiishote’ gede ikkitino hedonna rosicho qeelleemmo gede kaaꞌlannonke gara ronseemmo.—2 Qor. 10:4, 5.