Maganu Ayenni Roore Jaalaati

Heeꞌrahera dandaanno coyi baalunkunni rooru, Maganu jaala ikkate. Maganu rosiisannohehu hagiirraamenna geꞌino heeshsho heeꞌrattoraati; kaphu ammaꞌnanninna gawajjo abbanno rosinni keeraanchimma fushshannohe. Huuccattokkino macciishshannohe. Giddoyiidi keerinna geꞌne heedhannohe gede assanno. (Faarso 71:5; Ibiraawuyaani 10:22) Qarru yannarano irkisannohe. (Faarso 18:18) Hattono hegere heeshsho aannohe.—Roomu Sokka 6:23.

Maganunniwa shiqitto deerrinni, hattonni jaallasiwa shiqatto. Insano ate jaalla ikkitanno. Isinni, roduunna rodoote gede ikkitannohe. Maganu fajjo maatiro rosiisanna hakkii saeno ate jawaachisha hagiirsiissannonsa.

Maganu ledo taalleenyu dinonke. Maganu ledo jaalooꞌma hasiꞌrittoro, huwata hasiissannohehu mittu coyi no. Maganu ledo jaalooꞌma ninke gedee manni ledo jaalooꞌmatewiinni baxxitanno. Isi seeda diro heeꞌrinohonna hakkii saeno ninke aliidi xiinxallaatinna wolqaataamooti. Ninke gashshate mootumma noosiho. Konnira isi jaalla ikka hasiꞌnummoro, yaannore macciishshanna loosu aana hosiisa hasiissannonke. Togo assanke ayee woteno horo uyitannonke.—Isayyaasi 48:18.