Reyo Baalunku Coyira Goofimarcho Diꞌꞌikkitino!

Biꞌre Yerusaalametenni 3 kiilomeetire fafe Biitaaniya yinanni qachi no. (Yohaannisi 11:18) Yesuusi reyara boode lamala gatte heedheenna hakko qachira lowonta dadillisannori ikki. Alaazaari yinannihu mittu Yesuusira muli jaali hedeweelcho xiwame reyi.

Yesuusi tenne macciishshi wote, Alaazaari goxe nootanna haꞌre goxinowiinni kayisannosita rosaanosira kuli. (Yohaannisi 11:11) Yesuusi yiinori kayinni rosaanosira dileellino; hakko daafira isi xawise, “Alaazaari reyino” yee kulinsa.—Yohaannisi 11:14.

Alaazaari madaarrihunni shoolkita Yesuusi Biitaaniya mare Alaazaari rodoo Maarta sheshifachishi. Maarta iso togo yitu: “Wona ati koye heeꞌroottoro, rodiiꞌya direyanno.” (Yohaannisi 11:17, 21) Yesuusi togo yee qolise: “Ani kaotenna heeshshote. Ane ammanannota loosunni leellishannohu, reyiro nafa kaꞌꞌanno.”—Yohaannisi 11:25.

Yesuusi coyiꞌrino qaali mulla haaqete halcho ikkinokkita leellishate waammanniwa mari; hakkiinnino qoonqosi naffi asse, “Alaazaari amo fuli!” yii. (Yohaannisi 11:43) Hakkiinnino reyino manchi waammate giddonni fuli; laꞌꞌanni noo mannino lowonta dhagge assiꞌri.

Yesuusi hakkuyira albaanni ajayi ajeenna lame manna reyotenni kayisino. Mitte hige Iyyairoosi yinanni manchi qaaqqo reyotenni kayisino. Yesuusi tenne qaaqqono kayisara albaanni, goxxe no yiino.—Luqaasi 8:52.

Yesuusi Alaazaarino Iyyairoosi qaaqqono reyitinota kulate lamenka ‘goxino’ yiinota wodanchi. Reyo goxichu ledo heewisiisasi garankolla. Mayira? Mittu manchi goxe noo wote mittoreno diafanno, hattono xissotenni woy rakkotenni fooliishshiꞌranno. (Mekibibi 9:5; “Reyo Natare Goxate Gedeeti” yitanno saaxine lai.) Hunditi Yesuusi rosaano, reyino manni noo gara seekkite affino. Ammaꞌnotenna Amanyootu Insayikilopiidiya yinanni maxaafi togo yaanno: “Yesuusa harunsitannori, reyo goxichu gede ikkitinota hattono ammante reyitinorira waamma fooliishshote bayicho . . . ikkitinota ammantanno.”a

Reyino manni waammate giddo goxe nootanna qarramanni nookkita afanke sheshifachishshannonke. Konni daafira reyinummo gedensaanni ma ikkineemmoro anfoommohura reyo waajja dihasiissannonke.

“MITTU MANCHI REYIRO, GALAGALE LUBBOTE HEEꞌRANNO?”

Hashsha dancha goxicho gonxe hagiidha banxeemmoha ikkirono, hegerera goxe gata hasiꞌrannohu kayinni dino. Alaazaarinna Iyyairoosi qaaqqo gede waammate giddo noo manni reyotenni kaꞌꞌanno yine hexxineemmo gede assannonkeri no?

Ammanate manchi Iyyoobi reyara kainoha lawisi yannara togoo xaꞌmo xaꞌmino. Togo yiino: “Mittu manchi reyiro, galagale lubbote heeꞌranno?”—Iyyoobi 14:14.

Iyyoobi xaꞌmino xaꞌmo umisi qolanni Duuchanka Dandaanno Magano togo yiino: “Ati woshshattoe, ani qoleemmohe. Angakki loosono sinsinnaawatto.” (Iyyoobi 14:15) Iyyoobi, Yihowa ammanamino soqqamaanchosi reyotenni kayisanno yanna quqquxamannota horo dihuluullamino. Iyyoobi tenne hedasi mulla haaqete halchooti? Deeꞌni, hatto diꞌꞌikkino.

Yesuusi reyino manna kayisasi, Maganu isira reyo qeelanno gede wolqa uyinosita leellishshanno. Qullaawu Maxaafi isinni Yesuusi xa “reyote makifacha” adhe noota kulanno. (Ajuuja 1:18) Hakko daafira Yesuusi biꞌre Alaazaari waamma aaninni kincho hoolle yee hajajinte gede, albillitte waammate afoo fananno.

Qullaawu Maxaafi kao noota kulannohu duucha baseraati. Mittu sokkaanchi masaalaancho Daanieeli togo yiino: “Fooliishshiꞌratto, goofimarchu barra kayinni kaꞌe iillannohe qeecha adhatto.” (Daanieeli 12:13) Yesuusi, kao noota ammantannokkire Seduqaano yinannire Yihudootu ammaꞌno maroota togo yiino: “Kiꞌne Qullaawa Borrono Maganu wolqano affinoonnikki daafira sodhinanni.” (Maatewoosi 22:23, 29) Hawaariya Phaawuloosi togo yiino: “Keeraanono cubbaataammuno reyotenni kaꞌanno yee . . . Magano hexxeemmo.”—Hawaariyaatete Looso 24:15.

REYINO MANNI KAꞌꞌANNOHU MAMAROOTI?

Keeraanono cubbaataammuno reyotenni kaꞌannohu mamarooti? Sokkaanchu keeraanchu manchi Daanieeli “goofimarchu barra” kaꞌꞌannota kulinosi. Maartano hattonni rodiise Alaazaari “goofimarchu barra kaꞌꞌanno” yite ammantannota coyidhino.—Yohaannisi 11:24.

Qullaawu Maxaafi koye yinihu “goofimarchu barri” Kiristoosi gashshooti ledo xaado afiꞌrinota kulanno. Phaawuloosi togo yee borreessino: “[Kiristoosi,] Maganu diinna baalanta lekkasira woroo qolasi geeshsha nugusa ikke gashsha hasiissannosi. Jeefote diini reyo buko-buluulo ikkitanno.” (1 Qorontoosi 15:25, 26) Maganu Mangiste dagganno gedenna fajjosi uullate aana woꞌmitanno gede huucciꞌneemmo gede assannonkehu mittu korkaati konneeti.b

Iyyoobi seekke huwatinonte gede, Maganu fajjo reyino manni kaꞌꞌanno gedeeti. Hakku barri daanno wote, reyo addinta buko-buluulo ikkitanno. Hakkuyi gedensaanni, ‘Reyo baalunku coyira goofimarchoho?’ yee hedannohu diheeꞌranno.