Soqqanshonke Isilanchimma Woyyeessiꞌra—Galagalle Marre Hasaawinseemmo Wotira Injeesse Haꞌra

Hasiissannohu Mayiraati? Hasatto noosi manchinni xaandummoro, winxoommohu halaalu gumira waa hayikkisate hakku manchi qaete heeꞌranno yannara galagalle mara hasiissannonke. (1 Qor. 3:6) Tennera roore wote agurre haꞌnammora albaanni, galagalle marre hasaawinseemmo wotira injeessa hasiissannonke. Qoleno tenne marreemmo wote hasaambeemmo xaꞌmo kayise haꞌra danchate. Hatto assanke qaete anni galagalle marreemmo barra quqquxame agaranno gede assitanno; qoleno kayinsoommo xaꞌmo uyineemmosi borro giddo noota ikkituro, borro roore nabbawara dandaanno. Galagalle marre hasaawinseemmo wotira injeesse haꞌra, xaandeemmo wote hasaambeemmore doorroommo daafiranna qaete annino hasaambeemmore hede agaranno daafira galagale mare hasaawisa shota ikkitanno gedeno assitanno. Galagalle xaandeemmo wote, wirro marroommohu albaanni kayinse haꞌnoommo xaꞌmora dawaro qolate ikkinota kulle hasaawa jammara dandiineemmo.

Tenne Assa Dandiinanni Gara:

Minunni mine hadhine soqqantinanni wote yitinannire qixxaabbinanni wote, galagaltine martine qoltinannita mitte xaꞌmono qixxeesse. Qixxeessitinanni xaꞌmo qaete annira eltinanni borro giddo xintantinota woy galagaltine martinanni wote egensiisate heddinoonnite xiinxallisate horoonsiꞌneemmo borro giddo dawarroonnita ikkitara dandiitanno.
Hasatto noosita leellishino manchi ledo hasaawa jeefissinanni wote, galagaltine martine isi ledo leddine hasaawa yortinoonnita kultinesi wirro xaaddinanni wote qolate qixxeessitinoonni xaꞌmo xaꞌme. Mitu qooxeessira mannu loosunni lowo geeshsha jaatanaawanno daafira galagalle xaande hasaawate dinye amadate lame wodana ikkanno. Hattoo manninni xaaddiniro, togo yitine xaꞌma dandiitinanni: “Roore wote qaete heeꞌrattohu tenne yannaraati? [Dawaro qola geeshsha agari.] Dagganno lamalara hirbu aana heeꞌrenni daye . . . yitanno xaꞌmora dawaro qoleemmohe. Miteekke loosu amade heeꞌreennahe dawummoro kulattoena.”
Qaete annira, tenne yannara dangeemmo yitinoonniha ikkiro dinyeꞌne garinni yanna sayissinikkinni marre. (Mat. 5:37) Galagaltine martine hasaabbine kaꞌinanni wote, tenne xaaddinanni wote hasaabbinannire injeessitine hadhe.

Konni Aganira Togo Assate Woꞌnaalle:

Soqqanshote qixxaabbinanni yannara, galagaltine martinanni wote qoltinanni xaꞌmono qixxeesse. Hatte xaꞌmo ledoꞌne soqqantanni noo halashshaanorano kullensa.