Yaiqoobi Reyara Kae Heeꞌre Coyiꞌrino Masaalonni Ronseemmore—Gafa 1

1-2. Yaiqoobi reyara kae heeꞌre ma assino? Mayira? ( misileno lai.)

YIHOWAHU ammanamino soqqamaanchi Yaiqoobi maatesi adhe Kanaꞌꞌaani gobbanni Gibitse haꞌrinku 17 diro saꞌꞌanno. (Kal. 47:28) Hatte yannara isi lubbora baxanno beettisi Yooseefinni galagale xaadino daafira hattono baalanti maatesi mitteenni gamba yitinohura lowo geeshsha hagiidhino. Xa kayinni Yaiqoobi reyanno yanna iillitinota afino. Hakko daafira isi mitto lowo geeshsha hasiisanno coye kulansara oososi baala woshshino.—Kal. 49:28.

² Hatte yannara mittu maatete umi reyara kaꞌꞌanno woyite maatesi woshshe gamba asse jeefote biddishsha aa rosantinote. (Isa. 38:1) Isi hakko gambooshshiwa, isi reyihu gedensaanni maatete umo ikkannohu ayetiro kulannohano ikkara dandaanno.

3. Kalaqama 49:1, 2 kultanno garinni, Yaiqoobi oososira kulinori lowo tiro afiꞌrino yineemmohu mayiraati?

³ Kalaqama 49:1, 2 nabbawi. Kayinni kuni gambooshshi mulla maate gamba yaate geeshshira xaaddannoha diꞌꞌikkino. Yaiqoobi masaalaanchoho. Hakko gambooshshiwa Yihowa, soqqamaanchisi qullaawu ayyaani massageennasi sirchisira albillitte iillannoha lowo geeshsha hasiisanno coye kulannonsa gede assino. Hakko daafira Yaiqoobi reyara kae heeꞌre oososi daafira coyiꞌrinori masaalote.

4. Yaiqoobi reyara kae heeꞌre coyiꞌrino masaalo xiinxallineemmo woyite maa heda hasiissannonke? (“Yaiqoobi Maate” yitanno saaxineno lai.)

⁴ Konni birxichira Yaiqoobi shoole oososi yaano Roobeeli, Simiooni, Leewinna Yihuda daafira mayinoro xiinxallineemmo. Aananno birxichira Yaiqoobi wole sette oososi daafira yiinore xiinxallineemmo. Konni birxichira xiinxallineemmonte gede, Yaiqoobi oososi daafira calla ikkikkinni gedensoonni hundita Israeelete gaꞌre ikkino sirchinsa daafirano coyiꞌrino. Israeelete daga xagge xiinxalline Yaiqoobi coyiꞌrino masaalo woꞌmitino gara huwata dandiineemmo. Qoleno isi coyiꞌrino masaalo xiinxalline, iimi Annanke Yihowa hagiirsiisa dandiineemmo gede kaaꞌlannonke roso ronseemmo.

ROOBEELI

5. Roobeeli hiittenne qoosso afiꞌreemmo yee hedinoha ikkara dandaanno?

⁵ Yaiqoobi Roobeeli “Ati bayira beettoꞌyaati” yiino. (Kal. 49:3) Roobeeli bayira beetto ikkino daafira annisi jiro wolootunni roorse adheemmo yee hedinoha ikkara dandaanno. Qoleno isi annisi reyihu gedensaanni maatete umo ikkeemmo yee hattono tenne qoosso sirchiꞌyara sayiseemmo yee hexxinoha ikkara dandaanno.

6. Roobeeli bayiru beetti afiꞌranno qoosso afiꞌrikki gatinohu mayiraati? (Kalaqama 49:3, 4)

⁶ Ikkirono Roobeeli bayiru beetti afiꞌranno qoosso afiꞌrikki gatino. (1 Dud. 5:1) Mayira? Isi boodu diri albaanni Yaiqoobite irkote galte Biliha ledo foorino. Biliha Yaiqoobi minaama Raaheeli soqqamaanchooti; Yaiqoobi Raaheeli lubbora baxanno. (Kal. 35:19, 22) Roobeeli Yaiqoobiti wole galte Liya iltino beettooti. Roobeeli foorinohu yortosi qeeꞌla hooge ikkara dandaanno. Isi Biliha ledo foorinohu Yaiqoobi Liya agure Biliha baxanno yee hede ikkara dandaanno. Isi fooranno gede assinosiri ikkireno ikkiro assootisi Yihowano ilinosi annano lowo geeshsha dadillisino.—Kalaqama 49:3, 4 nabbawi.

7. Roobeeliranna sirchisira iillinori maati? (“Yaiqoobi Reyara Kae Heeꞌre Coyiꞌrino Masaalo” yitanno saaxineno lai.)

⁷ Yaiqoobi Roobeeli “Atera gashshootu diꞌꞌikkanno” yiino. Yaiqoobi coyiꞌrinori woꞌmino. Roobeeli sirchi giddonni moote, masaalaancho woy kakkalaancho ikkino yine kulloonnihu dino. Ikkirono Yaiqoobi beettosi dikaadino; Roobeeli sirchi Israeelete gaꞌre giddo kiirama dandiino. (Iya. 12:6) Roobeeli wole yannara dancha akatta noosita leellishino; hattono isi galagale foorinota kultanno xagge dino.—Kal. 37:20-22; 42:37.

8. Roobeeli lawishshinni maa ronseemmo?

⁸ Maa ronseemmo? Ninkeneeto eemadhatenna foorretewiinni xooqate sharrama hasiissannonke. Cubbo loosate fonqolammeemmo woyite, taxxi yine assootinke Yihowa, maatenkenna woloota gawajjanno gara heda hasiissannonke. Qoleno “Mittu manchi wixiꞌrireno wixiꞌriro hakkonne wixiꞌrinore [mixxannota]” qaaga hasiissannonke. (Gal. 6:7) Wole widoonni kayinni, Roobeelira iillinori Yihowa maaro qaangeemmo gede assannonke. Yihowa loonsoommo soꞌronni kainohunni iillannonke qarra hoolannokkiha ikkirono, gara ikkinore assate sharrammeemmo woyite maassiꞌrannonke.

SIMIOONINNA LEEWI

9. Yaiqoobi Simiooninna Leewinni hagiidhinokkihu mayiraati? (Kalaqama 49:5-7)

⁹ Kalaqama 49:5-7 nabbawi. Hakkiinni aane Yaiqoobi Simiooninna Leewinni hagiidhinokkita leellishannore coyiꞌrino. Lowo diri albaanni Yaiqoobi beetto Diina Kanaꞌꞌaani gobba manchi Sekeemi seyatino. Diinara iillinose coyi Yaiqoobi ooso baalanta lowo geeshsha dadillisinoti dihuluullissannote; kayinni Simiooninna Leewi hanqonsa dieemadhitino. Insa dogge Sekeemi manni baalu barcimiro insa ledo keere kalaqqannota kulte qaale eꞌino. Mannootuno sumuu yitu. Hakkiinni barcintino labballi mada qoortukkinni Simiooninna Leewi “bise adhite mittuno afikkinni katama eꞌe, labballo baalanka shite guddu.”—Kal. 34:25-29.

10. Yaiqoobi Simiooninna Leewi daafira coyiꞌrino masaalo woꞌmitinohu hiittoonniiti? (“Yaiqoobi Reyara Kae Heeꞌre Coyiꞌrino Masaalo” yitanno saaxineno lai.)

¹⁰ Yaiqoobi lame oososi finqilte assitino coyinni lowo geeshsha dadillino. Yaiqoobi insa Israeelete giddo addi addi bayicho billaallite heedhannota masaalino. Israeelete daga 200 diro saꞌanno yanna gedensaanni Hexxote Gobba eꞌu yannara tini masaalo woꞌmitino. Simiooni gaꞌrera iqqa uyinoonnihu Yihudu gaꞌrera uyinoonni baatto giddooti. (Iya. 19:1) Leewi gaꞌrera iqqa uyinoonnihu kayinni Israeelete giddo addi addi bayicho billaalle noohu 48 katami giddooti.—Iya. 21:41.

11. Simiooninna Leewi gaꞌre assitinohu danchu coyi maati?

¹¹ Simiooninna Leewi gaꞌre annuwansa loossino soꞌro diloossino. Leewi gaꞌre xalala magansiꞌrara ammanantinota leellishshino. Yihowa Siina Ilaalira Musera Seera uyi yannara batinyu Israeelete manni siitu magano seekkiꞌre kaphu magano magansiꞌrino; Leewaawootu kayinni Muse wido ikkitino; hattono kaphu maganna hunate isira kaaꞌlantino. (Ful. 32:26-29) Yihowa Leewi gaꞌre doore ayirrado qoosso uyinonsa; isi kakkalaano ikkite soqqantanno gede assinonsa. (Ful. 40:12-15; Kir. 3:11, 12) Gedensoonni Israeele horrite Hexxote Gobba adhitu yannara, Simiooni gaꞌre Yihowa hedinori woꞌmanno gede assate Yihudu gaꞌrera haꞌlite olantino.—Eje. 1:3, 17.

12. Simiooninna Leewi lawishshinni maa ronseemmo?

¹² Maa ronseemmo? Hanqootto daafira muddante mitto coye doodhitooti woy assitooti. Ate woy baxatto mancho miinciro hanqa nooreentilla. (Far. 4:4) Ikkirono Yihowa aaraamboonni daafira coyiꞌnannire woy assinannire giwannota qaaga hasiissannonke. (Yai. 1:20) Ammanate roduuwinke woy wolu manni miicannonke woyite kalaqamino qarra Qullaawu Maxaafihu xintu seeri ledo sumuu yaanno garinni tirate woꞌnaalleemmo; togo assanke hanqine woloota gawajjannore coyiꞌneemmokki woy assineemmokki gede kaaꞌlitannonke. (Rom. 12:17, 19; 1 Phe. 3:9) Annikkinna amakki nafa Yihowa hagiirsiisannore assannokkiha ikkiro insa lawishsha haꞌrunsate giddeeti noohekkita qaagi. Yihowa hagiirsiisa dandaattokkihu gede assite heddooti. Yihowa gara ikkinore assate sharramatto sharro maassiꞌranno.

YIHUDA

13. Yihuda annisi isi daafira coyiꞌranno yanna iillituta yaadinoha ikkara dandaannohu mayiraati?

¹³ Yaiqoobi hakkiinni aane beettisi Yihuda daafira coyiꞌrino. Yihuda, Yaiqoobi Simiooninna Leewi daafira coyiꞌrinore macciishshihu gedensaanni yaadinoha ikkara dandaanno. Isino jawa soꞌro loosino woyiti no. Isi roduuwisi ledo Sekeemi katama saamate einoha ikkara dandaanno. (Kal. 34:27) Roduuwisi ledo Yooseefi borojjimmate hiꞌrino hattono annansa dogino. (Kal. 37:31-33) Gedensoonni isi foortanno mancho labbeennasi beettisi galte Taamaari ledo foorino.—Kal. 38:15-18.

14. Yihuda assinohu danchu coyi maati? (Kalaqama 49:8, 9)

¹⁴ Ikkirono Yaiqoobi Maganu ayyaani massageennasi Yihuda maassiꞌrenna galatella agurino. (Kalaqama 49:8, 9 nabbawi.) Yihuda geedhino annisira lowo geeshsha hedannota leellishino. Qoleno maaꞌne rodoosi Biiniyaami mararannota leellishino.—Kal. 44:18, 30-34.

15. Yaiqoobi Yihuda daafira coyiꞌrinori woꞌminohu hiittoonniiti?

¹⁵ Yaiqoobi, Yihuda roduuwisi giddonni albisa ikkannota masaalino. Ikkirono tini masaalo woꞌmitinohu lowo yanna gedensaanniiti. Mitu 200 diri gedensaanni Israeele Gibitsetenni fulte Hexxote Gobba hadhu yannara Yihuda albisa ikke massaginota qummi assinoonni. (Kir. 10:14) Lowo diri gedensaanni Hexxote Gobba horritu yannara Kanaꞌꞌaani manna qasate Yihuda albisa ikke fulino. (Eje. 1:1, 2) Yihuda gaꞌre giddonni fultinote lowo mootoolla giddo mittu Daawitiiti. Yihuda daafira masaalloonni masaalo wolu garinnino woꞌmitino.

16. Kalaqama 49:10 noo masaalo woꞌmitinohu hiittoonniiti? (“Yaiqoobi Reyara Kae Heeꞌre Coyiꞌrino Masaalo” yitanno saaxineno lai.)

¹⁶ Yaiqoobi mannu sircho hegerera gashshanno Moote Yihuda gaꞌrenni daannota xawisino. (Kalaqama 49:10 nabbawi.) Hakku Moote Yesuusi Kiristoosiiti; Yaiqoobi iso gashshate malinoho yiino. Sokkaasinchu Yesuusi daafira coyiꞌranni “Maganu Yihowa annisi Daawiti Zuufaane aannosi” yiino. (Luq. 1:32, 33) Qoleno iso “Yihudu gaꞌre ikkino Doobbiichi” yinoonni.—Aju. 5:5.

17. Wolootaho Yihowate gedee lao heedhannonke gede assiꞌra dandiineemmohu hiittoonniiti?

¹⁷ Maa ronseemmo? Yihuda jawa soꞌro loosinoha ikkirono Yihowa maassiꞌrinosi. Kayinni Yihuda roduuwi, ‘Yihowa iso maassiꞌrinohu hiittenne danchummasi laeeti?’ yite heddino ikka? Hatto yite heddinoha ikkirono ikkano hoogiro, Yihowa Yihuda assinoha dancha coye laino hattono maassiꞌrinosi. Yihowa lawishsha haꞌrunsa dandiineemmohu hiittoonniiti? Mittu ammanate rodiinkera baxxitino qoosso uyinannisi woyite umi qara laanfesi illachisha rakkankera dandiitanno. Kayinni Yihowa konni rodiite dancha akattanni hagiidhinota qaaga hasiissannonke. Yihowa soqqamaanosita dancha akatta laꞌꞌanno. Ninkeno hatto assate sharrammo.

18. Cincineemmore ikka hasiissannonkehu mayiraati?

¹⁸ Yihuda lawishshinni cincineemmore ikka hasiissannonketano ronseemmo. Yihowa coyiꞌrinore woꞌmanka woyite wonshanno; kayinni tenne assannohu duuchanka woyite ninke hendoommo garinni woy ninke hendoommo yannara diꞌꞌikkino. Yihuda sirchi Maganu manna massaga hanafinohu bayichonkonni diꞌꞌikkino. Ikkirono insa Yihowa albisa ikkite massagganno gede shoominore lawishshaho Leewi gaꞌre ikkinoha Muse, Efireemi gaꞌre ikkinoha Iyyaasu hattono Biiniyaami gaꞌre ikkinoha Moote Saaooli ammanante kaaꞌlitino. Xaa yannara ninkeno Yihowa albisa ikke soqqamanno gede doorannohu ayeno ikkiro ammanamme kaaꞌlino.—Ibi. 6:12.

19. Konni birxichira xiinxallinummote Yaiqoobi reyara kae heeꞌre coyiꞌrino masaalonni Yihowa daafira maa ronseemmo?

¹⁹ Konni birxichira xiinxallinummote Yaiqoobi reyara kae heeꞌre coyiꞌrino masaalonni maa ronseemmo? Maganu ‘mannu laꞌꞌanno garinni laꞌꞌannokkiti’ egennantinote. (1 Sam. 16:7) Yihowa lowo geeshsha cincannoho hattono gatona yaannoho. Isi gara ikkinokkire lashshi asse agurannokkiha ikkirono soqqamaanosi guuta ikka hasiissannonsa diyaanno. Isi alba lowo cubbo loossinori nafa godowinta maaro eꞌuronna gara ikkinore assa hanaffuro maassiꞌrannonsa. Aananno birxichira Yaiqoobi gattinote sette oososi daafira mayinoro xiinxallineemmo.