XIINXALLOTE BIRXICHO 39
Suꞌmakki ‘Heeshshote Maxaafira’ Borreessinoonni?
“Kaaliiqa waajjitannori . . . hawantannokki gede suꞌmansa maxaafisira borreessi.”—MIL. 3:16.
FAARSO 61 Farciꞌraasine, Alba Higgine Qaaffe!
GUULCHOa
Yihowa hundinni kayise ‘heeshshote maxaafira’ mannu suꞌma borreessanni keeshshino (Gufo 1-2 lai)
1. Milkiyaasi 3:16 kultanno garinni, Yihowa hiikkoye maxaafa borreessanni keeshshino? Kuni maxaafi maa amadino?
YIHOWA lowo kume diro mittu baxxino maxaafira mannu suꞌma borreessanni keeshshino. Konni maxaafira umo borreessinoonnihu ammanamino manchi Aabeeli suꞌmaati.b (Luq. 11:50, 51) Yihowa hatte yannanni kayise konni maxaafira mannu suꞌma lede borreessanni keeshshino daafira, xaa yannara konni maxaafi giddo lowo miliyoone ikkanno manni suꞌmi no. (Milkiyaasi 3:16 nabbawi.) Qullaawu Maxaafi giddo konne maxaafa ‘heeshshote maxaafa’ yinoonni.—Aju. 3:5; 17:8.
2. Suꞌminsa heeshshote maxaafi giddo borreessaminori hiittoo mannaati? Ninkeno suꞌminke konni maxaafi giddo heeꞌranno gede assiꞌra dandiineemmohu hiittoonniiti?
2 Konni baxxino maxaafi giddo Yihowa magansiꞌrannohu, iso waajjannohunna suꞌmasi baxanno manni baalu suꞌma borreessinoonni. Insara hegere heeshsho afiꞌrate hexxo noonsa. Xaa yannara Beettisi Yesuusi Kiristoosite wodote kakkalo widoonni, Yihowa ledo muli jaaloomi heeꞌrannonke gede assiꞌne suꞌminke konni maxaafira borreessamanno gede assiꞌra dandiineemmo. (Yoh. 3:16, 36) Hexxonke iimira haꞌra woy uullate aana heeꞌrano ikkituro, ninke baalunku suꞌminke konni maxaafi giddo heeꞌrara hasiꞌneemmo.
3-4. (a) Suꞌminke xaa yannara heeshshote maxaafira borreessamino daafira hegere heeshsho afiꞌneemmo? Xawisi. (b) Konninna aananno birxichira maa ronseemmo?
3 Suꞌmansa konni maxaafi giddo borreessinoonni manni baalu hegere heeshsho afiꞌransa digattanno yaateni? Yihowa, Fulo 32:34 Musera kulinori tenne xaꞌmora dawaro afiꞌneemmo gede kaaꞌlannonke. Yihowa, “Maxaafiꞌya giddonni cubbo loossinori suꞌmalla huneemmo” yiino. Hakko daafira, konni maxaafi giddo borreessinoonni manni suꞌma hoola woy huna dandiinanni; Yihowa konni manni suꞌma umo irsaasetenni borreessinohu gedeeti. (Aju. 3:5) Suꞌminke baꞌꞌannokki garinni biiretenni borreessama geeshsha konni maxaafi giddo heeꞌranno gede assiꞌrate sharrama hasiissannonke.
4 Tini mite xaꞌmuwa xaꞌmineemmo gede assitankera dandiitanno. Lawishshaho, Qullaawu Maxaafi suꞌminsa heeshshote maxaafira borreessaminonna borreessaminokki manni daafira mayyaanno? Suꞌminsa konni maxaafira borreessame heeꞌranno manni hegere heeshsho afiꞌrannohu mamooteeti? Yihowa daafira rosate faro afiꞌrikki reyino manni hiikkannoyya? Insa suꞌmi konni maxaafi giddo borreessamanno gari no? Konninna aananno birxichira kuri xaꞌmuwara dawaro afiꞌneemmo.
HEESHSHOTE MAXAAFIRA SUꞌMANSA BORREESSINOONNIRI AYEOOTI?
5-6. (a) Filiphisiyusi Sokka 4:3 kultanno garinni, suꞌmansa heeshshote maxaafira borreessinoonniri ayeooti? (b) Insa suꞌma heeshshote maxaafira baꞌꞌannokki garinni borreessinannihu mamooteeti?
5 Heeshshote maxaafira suꞌmansa borreessinoonniri ayeooti? Tenne xaꞌmora dawaro afiꞌrate, onte addi addi gaamo daafira ronseemmo. Insa giddo mitu suꞌma heeshshote maxaafira borreessinoonni; wolootunniha kayinni diborreessinoonni.
6 Umi gaamo iima Yesuusi ledo gashshitara doorantinoreeti. Insa suꞌma xaa yannara heeshshote maxaafira borreessinoonni? Ee borreessinoonni. Soqqamaasinchu Phaawuloosi Filiphisiyusi heedhannorira ‘soqqanshote miillasira’ kulino garinni, Yesuusi ledo gashshara dooraminohu buuramino Kiristaani suꞌmi xaa yannara heeshshote maxaafi giddo no. (Filiphisiyusi Sokka 4:3 nabbawi.) Ikkollana suꞌminsa konni maxaafi giddonni baikkinni heeꞌranno gede, insa ammanantinore ikkite heeꞌra hasiissannonsa. Hakkiinni insa reyitara albaanni woy bayiru qarri hanafara albaanni jeefote sumuda sumundanninsa woyite, suꞌmansa heeshshote maxaafira baꞌꞌannokki garinni borreessinanni.—Aju. 7:3.
7. Yohaannisi Ajuuja 7:16, 17 wolu geꞌreewi wido ikkinohu lowo manni suꞌma heeshshote maxaafira baꞌꞌannokki garinni borreessinanni yanna daafira maa kultannonke?
7 Layinki gaamo wolu geꞌreewi wido ikkitinote lowo dagaati. Insa suꞌmi xaa yannara heeshshote maxaafi giddo borreessamino? Ee borreessamino. Insa Armagedooni gatte saꞌuhu gedensaannino suꞌminsa heeshshote maxaafi giddo heeꞌranno? Ee heeꞌranno. (Aju. 7:14) Yesuusi, geꞌreewoho yinoonnihu kuni manni “hegere heeshshowa” haꞌrannota coyiꞌrino. (Mat. 25:46) Kayinni Armagedooni gatte saꞌannori hegere heeshsho bayichonkonni diafidhanno. Suꞌminsa heeshshote maxaafira irsaasetenni borreessamino gedeenni heeꞌranno. Kumu Diri Gashshooti yannara Yesuusi insara “allaalaanchonsa ikkanno”; hattono “heeshshote buichowa haaꞌre massannonsa.” Kiristoosi biddishshira hajajantannorinna Yihowara ammanantinoreeti yine jeefote yoo yinanninsari suꞌma heeshshote maxaafira baꞌꞌannokki garinni borreessinanni.—Yohaannisi Ajuuja 7:16, 17 nabbawi.
8. Heeshshote maxaafira suꞌminsa borreessaminokkiri ayeooti? Insa ma ikkitanno?
8 Sayikki gaamo meꞌꞌeho yinoonni mannaati; insa Armagedooni yannara baꞌanno. Insa suꞌma heeshshote maxaafira diborreessinoonni. Yesuusi insa “hegere [qorichiwa]” hadhannota coyiꞌrino. (Mat. 25:46) Soqqamaasinchu Phaawuloosi qullaawu ayyaani massageennasi, “Insa . . . hegere qoricha adhitanno” yee coyiꞌrino. (2 Tes. 1:9; 2 Phe. 2:9) Affanni heedhenni qullaawu ayyaani aana cubbo loossanni keeshshitinorirano hattoo bao iillitannonsa. Insano hegerera baꞌanno. Insa reyotenni kaꞌannokkiti egennantinote. (Mat. 12:32; Maq. 3:28, 29; Ibi. 6:4-6) Hanni uullate aana reyotenni kaꞌannori lame gaamo daafira lende laꞌno.
REYOTENNI KAꞌꞌANNO MANNA
9. Soqqamaasinete Looso 24:15 kultanno garinni, uullate aana heeꞌrate kaꞌannoti lame gaamo hiitteeti? Lamente gaamo mereero noo badooshshi maati?
9 Qullaawu Maxaafi reyotenni kaꞌe uullate aana hegerera heeꞌrate hexxo noonsari lame gaamo noota kulanno; insano ‘cubbaataammahonna keeraanote.’ (Soqqamaasinete Looso 24:15 nabbawi.) ‘Keeraanote’ yiniri lubbote noo waro Yihowara ammanante soqqantinoreeti. ‘Cubbaataammaho’ yiniri kayinni Yihowara ammanante soqqantinokkireeti. Isinni insa giddo batinyeho amanyootinsa keeraanchimmatewiinni xeertiꞌrinoho. Lamenti gaamo reyotenni kaꞌanno daafira, insa suꞌmi heeshshote maxaafira borreessamino yaa dandiineemmo? Tenne xaꞌmora dawaro afiꞌrate, hanni lamente gaamo daafira anna anna laꞌno.
10. “Keeraano” reyotenni kaꞌannohu mayiraati? Insa giddo gamu hiittee qoosso afidhanno? (Tenne metseetera nooha uullate kao daafira kulannoha “Nabbawaano Xaꞌmitanno Xaꞌmo” yaanno birxichono lai.)
10 ‘Keeraanote’ yiniri shoolki gaamooti. Insa reyitara albaanni suꞌminsa heeshshote maxaafira borreessamino. Ikkina insa reyituta suꞌmansa konni maxaafi giddonni hoolloonnini? Dihoolloonni; mayira yiniro, insa xaano Yihowa albaanni lubbotenni noohu gedeeti. Yihowa “heedhannori Maganooti ikkinnina reyitinoriha diꞌꞌikkino.” (Luq. 20:38) Hatto yaa keeraano uullate aana reyotenni kaꞌanno woyite, suꞌminsa umo “irsaasetenni” borreessaminoha ikkirono heeshshote maxaafi giddo heeꞌranno. (Luq. 14:14) Kuri reyotenni kaꞌannori giddo gamu, “baatto baalate [aana] gashshaasine” ikkite soqqamate qoosso afidhannoti dihuluullissannote.—Far. 45:16.
11. ‘Cubbaataammu’ suꞌminsa heeshshote maxaafira borreessamara albaanni maa rosa hasiissannonsa?
11 Hanni jeefote ontikki gaamo yaano ‘cubbaataammu’ daafira laꞌno. Insa reyitara albaanni Yihowa seera affinokkiha ikkara dandaanno; hakko daafira Yihowa hagiirsiisannore diassitino. Konnira suꞌminsa heeshshote maxaafira diborreessamino. Ikkollana Maganu insa reyotenni kayise, suꞌminsa heeshshote maxaafira borreessamanno gede assiꞌrate faro afidhanno gede assanno. Kuri ‘cubbaataammira’ lowo kaaꞌlo hasiissannonsa. Insa giddo mitootu alba horo shagaggiꞌnanni coye assitannoreeti. Hakko daafira insa Yihowahu keeraanchu biddishshi garinni heeꞌra dandiinannihu hiittoonniitiro rosa hasiissannonsa. Insa tenne assitanno gede kaaꞌlate Maganu Gashshootisi widoonni, uullate aana taalle nookkiha halaꞌlado rosiisate looso qixxeessanno.
12. (a) Cubbaataamma rosiissannori ayeooti? (b) Rossinore loosu aana hosiisa gibbannori ma ikkitanno?
12 Cubbaataamma rosiissannori ayeooti? Lowo dagaatinna reyotenni kaꞌanno keeraanooti. Cubbaataammu suꞌminsa heeshshote maxaafira borreessamanno gede Yihowa ledo muli jaalooma kalaqiꞌranna heeshshonsa isira sayisse aa hasiissannonsa. Yesuusi Kiristoosinna buurantinori iima heedhe cubbaataammu rosiinsanninsa roso macciishshite adhitannoronna teꞌee seekkite laꞌanno. (Aju. 20:4) Konni garinni kaaꞌlineennansa macciishshe adha giwanno manni 100 diro ikkinonsare ikkiro nafa baꞌꞌanno. (Isa. 65:20) Yihowanna Yesuusi mannu wodanita afa dandiitanno; hattono insa haaro alamera aye manchino qarra kalaqara difajjitanno.—Isa. 11:9; 60:18; 65:25; Yoh. 2:25.
HEESHSHOTE KAONNA YOOTE KAO
13-14. (a) Yesuusi Yohaannisi 5:29 coyiꞌrinore alba ma garinni huwantoommo? (b) Isi coyiꞌrinori daafira wodancha hasiissannonkeri maati?
13 Yesuusi uullate aana kaꞌꞌanno manni daafirano coyiꞌrino. Lawishshaho isi togo yiino: “Kunnira, waammate giddo noori huurosi macciishshitanno yanna daggannona, maalaꞌlitinoonte. Dancha loossinori reyotenni kaꞌe lubbotenni heedhanno; busha loossinori kayinni reyotenni kaꞌeenna, . . yoo yinanninsa.” (Yoh. 5:28, 29) Yesuusi hatto yaasi mayyaate?
14 Alba, Yesuusi coyiꞌrino hedo reyotenni kaꞌannori, reyotenni kaꞌuhu gedensaanni loossanno looso leellishshannote yine huwantoommo; hatto yaa mitootu reyotenni kaꞌe dancha looso loossanno, mitootu kayinni reyotenni kaꞌe busha looso loossanno yaate. Ikkollana, Yesuusi reyotenni kaꞌannori dancha looso loossanno woy busha looso loossanno yiinokkita wodanche. Isi saino coye kulanni no. Isi “dancha loossinori” daafiranna “busha loossinori” daafira coyiꞌrino. Hatto yaa dancha woy busha loossinohu reyitara albaanniiti yaate. Tini digarankolla? Mayira yiniro, haaro alamera busha assanno manni heeꞌrara difajjinanni. Cubbaataammaho yiniri bunshe loossinohu reyitara albaanniiti. Ikkina Yesuusi ‘reyotenni kaꞌe lubbotenni heedhannori’ daafiranna ‘reyotenni kaꞌeenna yoo yinanninsari’ daafira coyiꞌrinore huwata hasiissannonkehu ma garinniiti?
15. ‘Lubbotenni heeꞌrate kaꞌannori’ ayeooti? Mayira?
15 Reyitara albaanni dancha loossino keeraano, suꞌminsa heeshshote maxaafira borreessamino daafira ‘lubbotenni heedhara kaꞌanno.’ Hatto yaa Yohaannisi 5:29 “dancha loossinori” yinirinna Soqqamaasinete Looso 24:15 ‘keeraanote’ yiniri afidhanno kao mittete. Tini biddi assinoonni hedo, Roomu Sokka 6:7 noote ‘Reyino manchi cubbu anganni fulino’ yitanno hedo ledo sumuu yitannote. Hakko daafira keeraanote yiniri reyitu woyite Yihowa cubbonsa gatona yiinonsa; reyitara albaanni isira ammanante assitinoha dancha coye kayinni isi dihawanno. (Ibi. 6:10) Ikkirono kuri reyotenni kaꞌanno keeraano suꞌminsa heeshshote maxaafira borreessame heeꞌranno gede ammanante heeꞌra hasiissannonsa.
16. ‘Reyotenni kaꞌeenna yoo yinanninsa’ yaa mayyaate?
16 Reyitara albaanni bunshe loossinorina? Reyitu woyite cubbinsa aguraminoha ikkirono, insa reyitara albaanni Yihowara ammanantinore ikkansa dileellishshino. Insa suꞌmi heeshshote maxaafira diborreessamino. Hakko daafira “busha loossinori” yinirinna Soqqamaasinete Looso 24:15 ‘cubbaataammaho’ yiniri afidhanno kao mittete. Insa ‘yoote kaꞌanno.’c Hatto yaa kuri cubbaataammaho yiniri loossanno looso Yesuusi seekke lae keenanno yaate. (Luq. 22:30) Insa suꞌminsa heeshshote maxaafira borreessamate ikkadda ikkitannoronna teꞌee afate yanna hasiissanno. Kuri cubbaataammaho yiniri suꞌma heeshshote maxaafira borreessinannihu insa albiha busha amanyootensa agurte heeshshonsa Yihowara sayisse uyituro callaati.
17-18. Uullate aana heeꞌrate kaꞌannori baalu maa assa hasiissannonsa? Yohaannisi Ajuuja 20:12, 13te ‘loosinsa garinni’ yinoonnihu maa kulateeti?
17 Reyotenni kaꞌannori reyitara albaanni keeraanono ikkito cubbaataammano ikkito, 1,000 diri yannara haarote faꞌnamanno maxaafi giddo noo seerira hajajama hasiissannonsa. Soqqamaasinchu Yohaannisi ajuujatenni lainore togo yee xawisino: “Reyinohu shiimmaaddunna jajjabbu manni ayirradu barcimira albaanni uurre nooha afummo. Maxaaffano faꞌnantu; heeshshonnihu wolu maxaafino faꞌnami. Reyino mannirano maxaaffate giddo borreessinoonni garinni loosinsara yoo yini.”—Aju. 20:12, 13.
18 Reyotenni kaꞌannorira yoo yinannihu hiikkuyi ‘loosinsa’ garinniiti? Reyitara albaanni loossino loosi garinniiti? Deeꞌni! Insa reyitu woyite cubbinsa aguraminota qaagi. Hakko daafira kowiicho ‘loosinsa’ yinoonnihu reyitara albaanni assitinore kulate diꞌꞌikkino. Hatteentenni, loosinsa yinihu insa haaro alamera qajeeltuhu gedensaanni assitannore kulateeti. Ammanamino manni lawishshaho Nohi, Saamueeli, Daawitinna Daanieeli nafa Yesuusi Kiristoosi daafira rosanna isita wodote kakkalo ammanannota leellisha hasiissannonsa. Hatto ikkiro, cubbaataammaho yiniri isinni lowore rosa hasiissannonsa!
19. Tenne dhagge ikkitanno qoosso adha gibbannori jeefote ma ikkitanno?
19 Tenne dhagge ikkitanno qoosso adha gibbannori jeefote ma ikkitanno? Yohaannisi Ajuuja 20:15 togo yitanno: “Suꞌmansa heeshshote maxaafira borreessinoonnikkire baala giirate baari giddo tungi.” Ee, insa hegerera baꞌanno. Hakko daafira suꞌminke heeshshote maxaafira borreessamanno gede assiꞌranna baikkinni heeꞌranno gede assiꞌra lowo geeshsha hasiissannote!
Mittu rodii, Kumi Diri Gashshooti Yannara loonsanniha halaꞌlado rosiisate looso loosanni no (Gufo 20 lai)
20. Kumi Diri Gashshooti yannara loonsannihu hagiirsiisanno loosi hiikkoyeti? (Aaniidi qoolira noo misile lai.)
20 Kumi Diri Gashshooti yanna lowo geeshsha hagiirsiissannota ikkitanno! Hatte yannara xaa geeshsha uullate aana loonse egenninoonnikkiha halaꞌlado rosiisate looso loonsanni. Qoleno hatte yannara keeraanotenna cubbaataamu manni amanyoote keennanni. (Isa. 26:9; Soq. 17:31) Konne rosiisate looso loonsannihu hiittoonniiti? Aananno birxichi konne looso ma garinni loonsanniro huwanteemmo gedenna tenne dhagge ikkitanno qixxaawo naandeemmo gede kaaꞌlannonke.
FAARSO 147 Hegere Heeshsho Hexxo
a Konni birxichira Yohaannisi 5:28, 29 ‘reyotenni kaꞌe lubbotenni heedhannori’ daafiranna ‘reyotenni kaꞌeenna yoo yinanninsari’ daafira konni albaanni huwantoommo gara biddi assinoonni. Qoleno tini lamenti kao maa leellishshannoronna tenne lamenta kao kaꞌannori ayeootiro ronseemmo.
b Konne maxaafa borreessa hananfoonnihu, “alame kalaqantuhunni kayise” yaano Yesuusite wodote kakkalonni horo afiꞌranno manni heeꞌra hanafi yannanni kayinseeti. (Mat. 25:34; Aju. 17:8) Hakko daafira, konni heeshshote maxaafira umo suꞌmasi borreessinoonnihu keeraancho mancho Aabeeliiti yaa dandiineemmo.
c Kowiicho kulloonniha “yoo” yaanno qaale konni albaanni baote yoo woy busha yoo kulannoho yine xawinsoonni. Hige kuni qaali tenne tirono afiꞌrinoha ikkara dandaanno. Ikkollana Yesuusi kowiicho “yoo” yaanno qaale horoonsiꞌrinohu, mittu manchi ikkito seekke laꞌꞌa woy keena kulate ikkikki digatino; woy mittu Giriikete afiite Qullaawu Maxaafi qaalla tiro kulanno maxaafi yaanno garinni “mittu manchi amanyoote qonqolchine woy fonqolle laꞌꞌa” kulate ikkikki digatino.