Ino ty Raha Volanini-Bokini-Apokalypsy Mikasiky ty Hoavinao?

1. Ino ty fanapahan-kevitsy bevata tsy maintsy ataon’olo kiraidraiky?

MISY fanapahan-kevitsy bevata tsy maintsy ataon’olo kiraidraiky henanizao. Ia ty hotohanany? Jehovah Ndranahary, azy mana zo handay ty kila raha iaby iny va, sa Satana Devoly, azy fahavalony raty fanahy iny? Tsy misy ty anelanelani-zay, fa tsy maintsy mifily raiky amy reo ie. Mianky amy ze fanapahan-kevitsy ataony ro hahavy azy ho velo na tsy ho velo zisiky farany. (Mat. 25:31-33, 46) Hasia mariky amy zay ie lafa amy “fijalea bevata”, na ho anatini-azy tafaboaky velo rey, na ho anatini-azy haripaky rey.​—Apok. 7:14; 14:9-11; Ezek. 9:4, 6.

2. a) Mampirisiky antsika hanao ino ty Hebreo 10:35-39? b) Akory ty anampeani-bokini-Apokalypsy antsika?

² Vakio Hebreo 10:35-39. Laha nifily hanoha ty fandaisani-Jehovah iha, le hendry sady nahay nanapa-kevitsy. Ta hanampy ty hafa hanao safidy soa koa iha henanizao. Azonao ampiasà fanazavà amy bokini-Apokalypsy ao reo mba hanampea an-drozy. Tena soa boky io. Resahiny ao hoe ino ty raha hahazo ani-ze olo manohitsy ani-Jehovah, fe atorony ao koa ty fitahia ho azoni-ze olo tsy mivaliky fa manoha ty fandaisani-Jehovah avao. Tokony hianatsy ani-fahamarina bevata reo tsika. Laha manao ani-zay tsika, le vomaiky ho tapa-kevitsy hanompo ani-Jehovah avao. Tsy zay avao fa azontsika ampiasà koa raha nianarantsika rey mba hanampea ty olo hafa hanapa-kevitsy hanompo ani-Jehovah noho hivahatsy aminy avao.

3. Ino ty hodinihintsika amy lahatsoratsy toy ato?

³ Hanao akory ty olo manoha ty fandaisa-Ndranahary? Le hanao akory ze mifily hanoha ani-bibinala mena malangy resahy amy bokini-Apokalypsy ao iny? Handiniky ani-reo tsika amy lahatsoratsy toy ato.

HANAO AKORY ZE OLO TSY MIVALIKY AMY JEHOVAH?

4. Olo manao akory rey nihitani-Jaona niaraky amy Jesosy an-danitsy any io?

⁴ Nahita fahità apostoly Jaona. Nihitany hoe nisy olo maro nanoha ty fandaisani-Jehovah le nitahiny ka nahazo fiaina zisiky farany. Mizara roe olo reo. Misy olo 144 000 ty voalohany aminy. (Apok. 7:4) Nalà baka an-tany etoy olo reo mba hiaraky manjaka amy Jesosy. Hanjaka amy tany toy iaby rozy. (Apok. 5:9, 10; 14:3, 4) Nihitani-Jaona tamy fahità rozy nitsanga niaraky amy Jesosy amy Vohitsy Ziona an-danitsy any.​—Apok. 14:1.

5. Hatao akory voahosotsy mbo an-tany etoy rey tsy ho ela?

⁵ Nanomboky tamy androni-apostoly, le olo an’arivony ro nifilỳ mba ho anisani-144 000 io. (Lioka 12:32; Rom. 8:17) Fe nivolany tamy Jaona hoe mbo hiay an-tany eto ty sisany amin’olo reo, na ty vitsivitsy amin-drozy amy andro farany. Hasia tombo-kase farany olo “sisa” tavela reo alohani-hanombohani-fijalea bevata, mba hanaporofoa hoe mahazo hatò amy Jehovah rozy. (Apok. 7:2, 3; 12:17) Hampiakary an-danitsy any amy zay rozy lafa amy fijalea bevata, soa hiaraky amy 144 000 naman-drozy fa nimaty fe tsy nivaliky rey. Hiaraky manjaka amy Jesosy amy Fanjakà-Ndranahary ao rozy lafa any.​—Mat. 24:31; Apok. 5:9, 10.

6-7. a) Olo manao akory koa ty nihitani-Jaona, le ino ty raha haintsika mikasiky an-drozy? b) Manino ty raha resahini-​Apokalypsy toko faha-​7 ro tokony hahakinto ty sisa voahosotsy noho ty “vahoaky be”?

⁶ Nahita “vahoaky be” koa Jaona tafarani-nahitany ani-azy ho an-danitsy any rey. Tsy resahini-Baiboly ty isakin’olo reo, tsy manahaky azy 144 000 iny. (Apok. 7:9, 10) Ka ino ty raha haintsika mikasiky an-drozy? Zao ty nivolany tamy Jaona: “Reo ro baka amy fijalea bevata, le ty sikin-drozy nisasan-drozy noho nifotìn-drozy tamy lioni-Anak’aondry iny.” (Apok. 7:14) Hiay an-tany etoy “vahoaky be” reo lafa tafaboaky velo baka amy fijalea bevata. Hahazo fitahia miavaky rozy amy fotoa zay.​—Sal. 37:9-11, 27-29; Ohab. 2:21, 22; Apok. 7:16, 17.

⁷ Ndre voafily hiakatsy an-danitsy any tsika ndre hijano an-tany etoy, mino va tsika hoe hahita ty fahatanterahani-​Apokalypsy toko faha-​7 io? Tokony hino ani-zay tsika. Tena fotoa miavaky ho ahi-ty mpanompo-Ndranahary raha zay, ndre ho an-danitsy any ie ndre ho an-tany etoy! Ho falifaly biby tsika amy zay satria nifily hanoha ty fandaisani-Jehovah. Mbo misy raha hafa koa resahini-bokini-Apokalypsy amintsika mikasiky ty fijalea bevata. (Mat. 24:21) Ino zay?

HANAO AKORY ZE OLO MANOHITSY A NDRANAHARY?

8. Manao akory ty ho fanombohani-fijalea bevata, le ino ty hataoni-ankamaroan’olo?

⁸ Nihitantsika tamy lahatsoratsy taloha tao hoe tsy ho ela le hotafihini-fikambana ara-politiky amy tany toy Babylona Bevata, zany hoe ty fivavahan-diso iaby amy tany toy. (Apok. 17:16, 17) Zay ty ho fanombohani-fijalea bevata. Hanompo ani-Jehovah va ty ankamaroan’olo lafa mahita ani-zay? Aia koa. Mifanohitsy amy zay ty raha resahini-​Apokalypsy toko faha-​6. Vomaiky aza rozy, hoasany, hila fiarova am-bohitsy eny, zany hoe amy tontolo ara-politiky noho tontoloni-varotsy. Mpanohitsy ty ho fahitani-Jehvah an-drozy satria rozy tsy hanoha ty Fanjakà-Ndranahary.​—Lioka 11:23; Apok. 6:15-17.

9. Manino ro hiavaky ty vahoakini-Jehovah amy fijalea bevata, le ino ty ho vokany?

⁹ Tena ho hafa mihintsy ty fihetsikini-mpanomponi-Jehovah amy fotoa tena sarotsy io. Rozy avao sisa ro mbo hanompo ani-Jehovah Ndranahary an-tany etoy sady tsy haneky hanoha ani-“bibinala iny.” (Apok. 13:14-17) Tsy hivaliky amy Jehovah mihintsy rozy, farany ho romotsy olo manohitsy rey. Hiharo raiky amy zay firenena reo ka hanafiky ty mpanompo-Ndranahary iaby an-tany etoy. Kaihini-Baiboly hoe fanafihani-Goga baka a Magoga raha io.​—Ezek. 38:14-16.

10. Laha hentea ty Apokalypsy 19:19-21, hanao akory Jehovah lafa hisy hanafiky ty vahoakiny?

¹⁰ Hanao akory Jehovah lafa mahita ani-fanafiha zay? “Ho meloky biby aho”, hoasany. (Ezek. 38:18, 21-23) Resahini-​Apokalypsy toko faha-​19 hoe ino ty raha hiseho afarani-zay. Haniraky ani-Anakilahiny iny Jehovah mba hiaro ty vahoakiny noho hamono ani-fahavalon-drozy rey. Hiaraky amy “tafikini-lanitsy” rey Jesosy lafa hialy amy Goga baka a Magoga, zany hoe hiaraky amy anjely tsy mivaliky noho 144 000 miaraky manjaka aminy rey. (Apok. 17:14; 19:11-15) Hanao akory ty hiafarani-aly io? Ho ripaky tanteraky ze olo noho fikambana manohitsy ani-Jehovah!​—Vakio Apokalypsy 19:19-21.

HISY MARIAZY AFARANI-ALY INY

11. Ino ty raha tena miavaky resahini-bokini-Apokalypsy?

¹¹ Mba eritsereto hoe ino ty ho tsapan’olo tsy nivaliky tafaboaky velo an-tany etoy rey lafa ho ripaky iaby ty fahavalo-Ndranahary! Tena ho falifaly biby rozy amy fotoa zay! Hisy hafaleam-be ty an-danitsy any lafa ho rava Babylona Bevata. (Apok. 19:1-3) Fe tsy zay avao, fa mbo hisy raha hafa koa tena hahafalifaly an-drozy. Ino zay? “Ty mariazini-Anak’aondry iny.” (Apok. 19:6-9) Io ty raha tena miavaky resahini-bokini-Apokalypsy.

12. Laha hentea ty Apokalypsy 21:1, 2, ombia mariazini-Anak’aondry iny io?

¹² Ombia mariazy io? Fa ho vory an-danitsy any iaby 144 000 rey aloha kelikelini-hanombohani-aly Aramagedona. Fe mbo tsy amy fotoa zay mariazini-Anak’aondry iny. (Vakio Apokalypsy 21:1, 2.) Ka ombia zany? Hatao mariazini-Anak’aondry iny lafa tampitsy ty aly Aramagedona sady fa ripaky iaby ty fahavalo-Ndranahary.​—Sal. 45:3, 4, 13-17.

13. Ino ty raha hiseho amy mariazini-Anak’aondry iny?

¹³ Ino ty raha hiseho amy mariazini-Anak’aondry iny? Mampiharo raiky ty lahilahy noho ty ampela ty mariazy. Manahaky ani-zay koa mariazini-Anak’aondry iny, satria lasa ho tafiaraky amy Jesosy Kristy Mpanjaka azy 144 000 valiny an’ohatsy rey. Tena miavaky vatany fotoa io. Manomboky eo amy zay 144 000 rey le hiaraky amy Jesosy handay ani-tany toy anatini-1 000 tao.​—Apok. 20:6.

MISY VOKANY AMY TY HOAVINAO TANÀ BE VONINAHITSY INY

14-15. Ampitovizini-​Apokalypsy toko faha-​21 amin’ino 144 000 rey? (Henteo sary amy fononi-gazety toy.)

¹⁴ Bakeo, mivola ty Apokalypsy toko faha-​21 fa mitovy amy tanà raiky soasoa 144 000 rey. Kaihy hoe “Jerosalema Vaovao” tanà io. (Apok. 21:2, 9) Nisy vato fototsy 12 tanà io, le nipetaky tamy vato rey teo “ty anara folo roambini-apostoly 12, zany hoe ty apostolini-Anak’aondry iny.” Manino raha io ro nahakinto ani-Jaona? Satria nihitany nisoratsy tamy raiky amy vato rey teo ty anarany. Tombontsoa bevata raha zay!​—Apok. 21:10-14; Efes. 2:20.

¹⁵ Tsy misy manahaky azy tanà io. Vita tamy volamena tsy misy fangarony ty lalambeny, vita tamy perla ty vavahadiny 12, nasia vatosoa ty lakorony noho ty fototsiny, le mitovy soa ty refiny. (Apok. 21:15-21) Fe nihitani-Jaona hoe nisy raha manky tao! Nivola Jaona hoe: “Tsy nahita tempoly tao aho, fa Jehovah Ndranahary, azy Farani-Ze Mahery iny, noho Anak’aondry iny ro tempolini-tanà iny. Le tsy nila masoandro na vola hanazava azy tanà iny, fa ty voninahitsi-Ndranahary ro nanazava azy, le ty Anak’aondry ro jirony.” (Apok. 21:22, 23) Hiaraky amy Jehovah ze olo anatini-Jerosalema Vaovao io ao. (Heb. 7:27; Apok. 22:3, 4) Jehovah noho Jesosy zany ro tempoly amy tanà iny ao.

16. Ino ty raha soa ho azon’olo amy Fanjakà Arivo Taoni-Mesia?

¹⁶ Tena teani-voahosotsy reo ty mandiniky ani-tanà io. Fe tsy rozy avao. Ndre azy mitamà hiay an-tany etoy reo koa aza tokony ho kinto amy raha io. Ino ty antony? Satria handay raha soa maro biby an-tany etoy Jerosalema Vaovao, amy Fanjakà Arivo Taoni-Mesia. Nivary manahaky “vavaranoni-ranon’ay” io ty fahitani-Jaona ani-fitahia reo. Le nisy “hazon’ay” tamy sisiny roe amy vavarano iny ka ty ravini-hazo rey “natao hitahà ty firenena.” (Apok. 22:1, 2) Handramby soa baka amy raha reo ty olo iaby. Hihalavorary tsikelikely ze olo manoriky ty safàni-Jehovah. Tsy hisy sasy ty arety, noho ty fijalea, sady tsy hisy sasy ty alahelo.​—Apok. 21:3-5.

17. Laha hentea ty Apokalypsy 20:11-13, ia ty handramby soa baka amy Fanjakà Arivo Tao?

¹⁷ Ia ty tena handramby soa baka amy raha hataoni-Fanjakà-Ndranahary reo? Voalohany, ty vahoaky be ho tafaboaky velo amy Aramagedona noho ze ajà mety hateraky amy tontolo vaovao ao. Fe mampitamà koa ty Apokalypsy toko faha-​20 fa hovelomy ty maty. (Vakio Apokalypsy 20:11-13.) Samby ho velo an-tany etoy iaby ty olo “marina” tsy nivaliky tamy Jehovah, noho ty olo “tsy marina”, zany hoe ze olo tsy afaky nianatsy mikasiky ani-Jehovah. (Asa. 24:15; Jaona 5:28, 29) Midika va raha zay fa hovelomy iaby ze kila olo nimaty lafa avy ty Fanjakà Arivo Tao? Aha. Tsy hovelomy mihintsy ze olo tsy naneky hanompo ani-Jehovah talohani-hahafatesany. Nana fahafaha hianatsy mikasiky azy ie fe tsy nanao ani-zay. Fa natorony hoe tsy maeva hiay amy Paradisa an-tany etoy ie.​—Mat. 25:46; 2 Tes. 1:9; Apok. 17:8; 20:15.

FITSAPÀ FARANY

18. Hanao akory ty an-tany etoy lafa tampitsy ty 1 000 tao?

¹⁸ Ho lavorary ty olo iaby an-tany etoy lafa tampitsy ty 1 000 tao. Fa tsy hisy vokany amin-drozy sasy ty fahotà nilovà baka amy Adama. (Rom. 5:12) Ho afaky tanteraky ty raha raty vokatsini-fahotàni-Adama. Midika raha zay fa ‘ho velo’ ze olo an-tany etoy satria ho lasa lavorary rozy lafa tampitsy ty 1 000 tao.​—Apok. 20:5.

19. Manino ro ilà fitsapà farany io?

¹⁹ Haintsika fa tsy nivaliky tamy Ndranahary mihintsy Jesosy ndre teo aza ty fitsapà nataoni-Satana. Fe parè hanao ani-zay va lafa atao olombelo lavorary? Tsy hivaliky amy Jehovah iaby va rozy lafa miezaky mitsapa an-drozy Satana? Afaky hanaporofo ani-zay ty olo kiraidraiky lafa habototsy baka amy lavaky mangoakoaky ao Satana, amy farani-1 000 tao. (Apok. 20:7) Ho velo zisiky farany ze olo tsy mivaliky amy Jehovah mihintsy amy fitsapà farany io sady hahazo tena fahafaha. (Rom. 8:21) Fa ze manohitsy ani-Jehovah, le haripaky miaraky amy Devoly noho ty demoniany.​—Apok. 20:8-10.

20. Manao akory ty fahitanao ani-faminania miavaky amy bokini-Apokalypsy ao rey?

²⁰ Ino ty tsapanao lafa baka nandiniky ty ampahany tamy bokini-Apokalypsy? Tsy mahafalifaly anao va ty mieritseritsy hoe mahakasiky anao faminania miavaky rey? Azo antoky fa teanao ty hitao olo hafa hiaraky amintsika hanompo ani-Ndranaharintsika iny. (Apok. 22:17) Lafa baka nandiniky ani-raha hiseho amy hoavy rey tsika, le tena falifaly ka ta hivola manahaky ani-apostoly Jaona hoe: “Amena! Avia lahy Jesosy Tompo!”​—Apok. 22:20.