ʻEA

Māfuaaga o le Faaleagaina o le ʻEa

E tugā aafiaga o le faapolusioneina o le ʻea, i ola o tagata i le lalolagi. E tusa ai ma se faamatalaga a le Faalapotopotoga o le Soifua Mālōlōina i le Lalolagi, e na o le tasi pasene o tagata i le lalolagi aoao o loo mānavaina le ʻea lelei.

O le ʻea ua faapolusioneina, e mafai ona faapogaia ai maʻi e aafia ai le māmā ma le alāʻea, le kanesa o le māmā, ma le maʻi fatu. O le faapolusioneina o le ʻea, o le faapogai lea o le vave maliliu o le pe ā o le 7,000,000 tagata i tausaga taʻitasi.

Foafoaina le Lalolagi ia Tumau

Na foafoaina lo tatou paneta, ina ia saunia le ʻea mamā e manaʻomia e meaola uma i lo tatou lalolagi. Peitaʻi, e faatoʻā mafai ona tupu lenā mea pe afai e lē toe faapolusioneina e tagata le ʻea. Mātau nisi o faataʻitaʻiga nei:

• E masani ona tatou faalogo i le malosiaga o le vaomatua e mitiia ai le kaponi mai i le ʻea. Ae e sili atu ona tele le kaponi e mafai ona mitiia e togātogo o loo i nofoaga faataufusi. E faalima taimi e sili atu ai le kaponi o loo mitiia e togātogo, nai lo o vaomatua.

• Ua iloa i suʻesuʻega talu ai nei, e mafai e limulimu lapopoʻa e pei o le kelp ona aveesea le kaponi mai i le ʻea. E iai i mea e pei o ni lau o le kelp ni tama’i taga e mafai ona faatumu i le ʻea, lea e mafai ai ona faaopeopea ma tafea atu i se mea mamao. E mamao ese loa ma le matafaga, ona pāpā loa lea o nei taga ma goto ifo ai le kaponi i le ilititai, lea e tanumia ai mo le tele o tausaga.

• A o faagasolo vavao o le KOVITI-19, na mātauina ai le mafai e le ʻea o loo siʻomia ai le lalolagi ona toe faamamāina o ia lava mai i le faapolusioneina. I le 2020, na vave ona iai se faaleleiga i le ʻea ina ua toetoe tapunia falegaosimea uma i le lalolagi, ma taofia feoaʻiga a taavale. E tusa ai o le “2020 World Air Quality Report,” e silia i le 80 pasene o atunuu na faatautaia ai se suʻesuʻega, na lipotia mai e faapea, e leʻi leva lava ona iai vavao o le faamaʻi ae faaleleia le tulaga o le ʻea i o latou atunuu.

Taumafaiga a Tagata

O loo faaauau ona faatonuina e malo pisinisi ina ia faaitiitia le faapolusioneina o le ʻea. E lē gata i lea, o loo faaauau ona maua e saienitisi nisi auala e faaitiitia ai aafiaga o le faapolusioneina o le ʻea. O se tasi o na auala, o le faaaogā lea o manu matuā ninii e latou te suia mea ia e faaleagaina ai le ʻea, ina ia avea ma mea e lē oona. Ua fautuaina foʻi e tagata atamamai le faaaogā o uila vilivae po o le savavali nai lo o taavale, faapea le faaitiitia o le faaaogāina o malosiaga faaeletise i fale o aiga.

Ae o loo tele pea taumafaiga e manaʻomia ona fai, pe a fua i se lipoti i le 2022 na tuufaatasia e faalapotopotoga faavaomalo, e aofia ai le Faalapotopotoga o le Soifua Mālōlōina i le Lalolagi, ma le Faletupe o le Lalolagi.

O loo taʻua i lenā lipoti, i le 2020, e pe ā ma le tasi vaetolu o tagata i le lalolagi e faaaogāina auala e faapolusioneina ai le ʻea, pe a kuka a latou meaʻai. I le tele o atunuu, e lē gafatia e tagata le faatauina o se ogaumu fou, po o isi auala saogalemu mo le kukaina o meaʻai.

O le ā ua Folafola Mai i le Tusi Paia?

“O le mea lenei ua fetalai mai ai le Atua moni o Ieova, o Lē na faia le lagi, . . . o Lē na folasia le lalolagi ma mea uma o loo tutupu ai, o Lē foʻi na te avatua le mānava i tagata o iai.”—Isaia 42:5.

Na foafoaina e le Atua le ʻea lea e tatou te mānavaina, faapea faataamilosaga o le natura e faamamāina le ʻea. E alofa foʻi o ia i tagata, ma e iai lona mana e lē gata mai e fesoasoani ai iā i latou. E mafai la ona tatou faapea atu, o le a ia faamamāina mea uma o loo faapolusioneina ai le ʻea. Tagaʻi i le mataupu “Folafola Mai e le Atua o le a Tumau lo Tatou Paneta.”