Aʻoaʻo Atu e Faatatau i le Lotomaulalo i le Paseka Mulimuli

O le faatonuga a Iesu na ō atu ai Peteru ma Ioane i Ierusalema e faia sauniuniga mo le Paseka. Ua oo nei i le afiafi, ma ua amata ona goto le lā. Ua ō ifo nei Iesu ma ona aposetolo e toʻasefulu mai i le mauga o Olive, ma agaʻi atu i Ierusalema. O le taimi mulimuli lea e vaai ai Iesu i lenei vaaiga a o malamalama pea le aso, seʻia oo ina mavae lona toetū.

E leʻi umi ae taunuu Iesu ma ona soo i le aai, ma agaʻi atu loa i le fale lea o le a faia ai le taumafataga o le Paseka. Ua latou savavali atu nei i le faasitepu ma ō atu i le potu tele i luga. O i inā o loo iai sauniuniga ua uma ona faia mo le taumafataga. Ua leva ona tulimataʻia e Iesu lenei sauniga faapitoa, auā ua fetalai atu o ia: “Ua ou matuā naunau lava e ʻai lenei paseka ma outou, a o leʻi oo i oʻu puapuaga.”—Luka 22:15.

I le tele o tausaga ua mavae, sa faavaeina ai le tū masani o le faasolo atu lea o ipu uaina i tagata uma o loo auai i le Paseka. O lea, ua tago ai Iesu i le ipu, ua faafetai ona fetalai atu lea: “Inā fetagofi ia i le ipu ma faasolo ane iā te outou. Ae ou te fai atu iā te outou, E amata atu nei ona ou lē toe inu i lenei uaina, seʻia oo mai le malo o le Atua.” (Luka 22:17, 18) Ua manino mai la i inei, ua latalata i le maliu o Iesu.

A o faagasolo le Paseka, e iai se mea uigaese ua tupu. Ua tulaʻi Iesu, ua tuu ese lona ofu tele, ma ua tago i le solo. Ona ia tuu lea o ni vai i le tanoa o loo lata ane. E masani lava e faamautinoa e lē o loo talimālō, ua mulumuluina vae o mālō. Atonu e faia e se auauna lea gaoioiga. (Luka 7:44) Peitaʻi e lē o iai sē e talimālō i lenei taumafataga, o lea, ua faia ai e Iesu lenei gaoioiga. Sa mafai lava e so o se tasi o le ʻauaposetolo ona faia lea gaoioiga, ae e latou te leʻi faia faapea. Faamata ona o ni uiga faatautavā o loo iai pea iā i latou? O lea, ua latou māsiasi ai e mulumuluina e Iesu o latou vae.

Ua alu atu nei Iesu iā Peteru, ae ua tetee ane Peteru iā te ia e faapea: “E te lē mulumulu lava i oʻu vae.” Ua tali atu Iesu: “Afai ou te lē mulumulu iā te oe, e leai sou tofi faatasi ma aʻu.” Ua faapea mai Peteru: “Le Alii e, e lē na o oʻu vae, ae o oʻu lima foʻi ma loʻu ulu.” E mautinoa le faateʻia o Peteru ina ua fetalai atu Iesu: “O lē ua uma ona tāʻele, e manaʻomia ona mulumulu tau o ona vae, auā o loo mamā le tino atoa. Ua mamā outou, ae lē o outou uma.”—Ioane 13:8-10.

Ua mulumuluina e Iesu vae o aposetolo uma e toʻa 12 e aofia ai ma Iuta le Sekara. Ina ua māeʻa ona faamaulu le ofu tele o Iesu, ona toe taoto lea o ia e taumafa. Ua fesili atu o ia: “Po ua outou iloa le mea ua ou faia iā te outou? Ua outou taʻua aʻu o le, ʻAʻoaʻo,’ ma o le ʻAlii,’ ua saʻo foʻi outou auā o aʻu lava lenā. O le mea lea, e ui o aʻu o le Alii, ma o le Aʻoaʻo, a ua ou mulumulu i o outou vae, e tatau foʻi la ona outou femulumuluaʻi i o outou vae. Auā ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea. E moni, e moni, ou te fai atu iā te outou, E lē sili le pologa i lona matai, e lē sili foʻi lē ua auina atu, i lo o lē na te auina atu o ia. Afai ua outou iloa nei mea, e fiafia outou pe a outou faia.”—Ioane 13:12-17.

Maʻeu se lesona matagofie o le auauna atu ma le lotomaulalo! E lē tatau i soo o Iesu ona iai ni uiga fiasili, ma manatu e sili atu ona tāua i latou ma e tatau ona auauna atu isi iā i latou. Nai lo o lea, e tatau ona latou mulimuli i le faaaʻoaʻoga a Iesu, e ala i le lotomalilie e auauna atu i isi ma le lotomaulalo ma le lē faailogatagata, ae lē o le faia o se tū masani o le mulumuluina o vae.