Setema

Na tuuina atu e le Atua iā Iesu le mana e foʻia ai faafitauli uma o tagata. O vavega na faia e Iesu, ua faamaonia ai e mafai e lona mana ona foʻia faafitauli lea e lē mafai ona foʻia i so tatou lava malosi. O se faataʻitaʻiga, e mafai e lona mana ona tuusaʻoloto i tatou mai i le pogai o faafitauli: o le agasala tuufaasolo lea ua iʻu atu ai i maʻi ma le oti. (Mata. 9:​1-6; Roma 5:​12, 18, 19) O vavega na ia faia ua faamaonia ai e mafai ona ia faamālōlōina maʻi “eseese uma” ma faatutūina ē ua maliliu. (Mata. 4:23; Ioa. 11:​43, 44) Ua iā te ia foʻi le mana e faatoʻafilemu ai matagi malolosi ma tutuliesea ai agaga leaga. (Mare. 4:​37-39; Luka 8:2) Maʻeu le faamāfanafanaina o i tatou i le iloa na tuuina atu e Ieova i lona Alo lenā mana e faia ai vavega! E mafai ona tatou mautinoa atoatoa o le a aumaia e le Malo o le Atua faamanuiaga i le lumanaʻi. O vavega na faia e Iesu a o iai i le lalolagi, ua tatou iloa ai e sili atu mea o le a ia faia i le lumanaʻi pe a avea ma Tupu o le Malo o le Atua i le lagi. w23.04 3 ¶5-7

Pe afai o loo e iai i se faapotopotoga e toʻatele ma e seāseā ona tofia oe, atonu e faaosoosoina ai oe e aua le toe tali. Peitaʻi, aua le taofia ai oe mai i le tali. Ia saunia ni tali se tele. Afai e lē tofia oe i le taimi muamua, o loo tele pea isi avanoa e te tali ai a o faagasolo le sauniga. Pe a sauniuni mo le Suʻesuʻega o Le Olomatamata, ia mafaufau po o le ā le fesootaʻiga o palakalafa taʻitasi i le manatu autū o le mataupu. O le faia faapea, o le a e faia ai ni tali faalaeiau a o faagasolo le suʻesuʻega. Atonu e mafai foʻi ona e sauniuni e tali i palakalafa o loo talanoaina ai aʻoaʻoga loloto o le Tusi Paia, ia e faigatā ona faamatala. Aiseā? Atonu e lē toʻatele nisi e tali ai. Ae e faapefea pe afai e uma ane lava le tele o sauniga e lē maua se avanoa e fai ai sau tali? A o leʻi amata le sauniga, ia faailoa i le faisuʻesuʻega se palakalafa e te fia tali ai. w23.04 21-22 ¶9-10

Na vave ona faatatau e Iosefa faatonuga mai iā Ieova, ma na avea ai o ia o se tane e sili ona lelei. E pe ā ma le tolu taimi na ia maua ai faatonuga mai i le Atua na aafia ai lona aiga. I na taimi taʻitasi, na vave ona ia usiusitaʻi e ui lava na manaʻomia ai ona faia ni suiga tetele. (Mata. 1:20; 2:​13-15, 19-21) O le usitaʻia e Iosefa o faatonuga a le Atua, na ia puipuia, lagolagoina, ma tausia ai Maria. E lē taumatea o gaoioiga a Iosefa na atili ai ona alofa ma faaaloalo Maria iā te ia! Tane, e mafai ona outou faaaʻoaʻo iā Iosefa, e ala i le saʻili i fautuaga mai i le Tusi Paia i le auala e tausia ai o outou aiga. Pe a outou faatatauina na fautuaga e tusa lava pe e manaʻomia ai ona faia ni suiga, e faaalia atu ai e tou te alolofa i a outou avā ma e faamalosia ai a outou faaipoipoga. Ua faapea mai se tuafafine mai i Vanuatu, ua silia i le 20 tausaga talu ona faaipoipo: “Pe a saʻilia ma faatatauina e laʻu tane taʻiala a Ieova, e atili ai ona ou faaaloalo iā te ia. Ou te lagona le malupuipuia ma ou te maufaatuatuaina ana faaiʻuga.” w23.05 21 ¶5

Na tatau i tagata Iutaia na toe foʻi mai i Papelonia ona avea ma “nuu paia” i lo latou Atua. (Teu. 7:6) Peitaʻi, na manaʻomia lava ona latou faia ni suiga ina ia faafiafia ai Ieova. O le toʻatele o tagata Iutaia na fananau i Papelonia e foliga mai na masani i manatu ma tapulaa a tagata Papelonia. Ina ua mavae le 69 tausaga talu ona toe foʻi i Isaraelu le vaega muamua o tagata Iutaia, ae faateʻia le kovana o Neemia ina ua iloa ane e leʻi aʻoaʻoina e tamaiti na fananau i Isaraelu le gagana a tagata Iutaia. (Teu. 6:​6, 7; Nee. 13:​23, 24) O le a faapefea e na tamaiti ona aʻoaʻoina e alolofa ma tapuaʻi iā Ieova, pe afai e latou te lē malamalama i le gagana Eperu, o le gagana autū lea na tusia ai le Afioga a le Atua? (Esera 10:​3, 44) O lea, sa tatau i na tagata Iutaia ona faia suiga tetele. Ae o le a sili atu ona faigofie ona faia na suiga auā sa latou nonofo i Isaraelu, le nofoaga na toe faafoʻisia ai le tapuaʻiga mamā.—Nee. 8:​8, 9. w23.05 15 ¶6-7

E tusa lava pe e iā i tatou se uunaʻiga pe e tatou te faaalia foʻi le amio pulea, ae e iai lava luʻi e ono taofia ai i tatou mai i le ausia o se sini. O se faataʻitaʻiga, e ono alu uma lo tatou taimi i mea e “tutupu faafuaseʻi,” ma leai ai se taimi e tatou te galulue ai ina ia ausia o tatou sini. (Fai. 9:11) Atonu e tatou te fesagaʻia se tulaga faigatā lea e tatou te lagona ai le lotovaivai ma leai ai se malosi. (Faata. 24:10) Ona o lo tatou tino lē lelei atoatoa, e tatou te ono gaoioi ai i se auala e faafaigatā ai ona ausia o tatou sini. (Roma 7:23) Pe atonu foʻi e tatou te lagona le lē lavā. (Mata. 26:43) O le ā e mafai ona fesoasoani iā i tatou e foʻia ai se luʻi lea e ono taofia ai i tatou mai i le ausia o o tatou sini? Ia manatua, pe a iai se mea e taofia oe mai i le ausia o lou sini, e lē faapea ai ua e lē taulau. Ua faapea mai le Tusi Paia, e tele taimi e tatou te feagai ai ma faafitauli. Peitaʻi ua faamautinoa mai ai foʻi, e mafai ona tatou toe tulaʻi. O lea, o lou taumafai pea e ausia lou sini e ui i mea e ono taofia ai oe, e faamaonia atu ai iā Ieova e te manaʻo e faafiafia o ia. Maʻeu le fiafia o Ieova pe a silasila mai, o loo e taumafai malosi pea e ausia lou sini! w23.05 30 ¶14-15

E fesoasoani le auaunaga paeonia i se uso talavou e iloa ai le auala e galulue ai ma tagata eseese. E mafai foʻi ona fesoasoani iā te ia e iloa ai le auala e faaaogā ai tupe ma tausisi i ai. (Fili. 4:​11-13) O le paeonia lagolago, o se auala lelei lea e amata ai i le auaunaga faataimi atoa, ma sauniunia ai se tasi e avea ma paeonia sauatoa. O le auaunaga paeonia e maua ai le avanoa mo isi vala o le auaunaga faataimi atoa, e aofia ai le galue i faugāfale po o le Peteli. E ao ona avea ma sini o se uso Kerisiano le agavaa e auauna o se toeaina i le faapotopotoga. Ua faapea mai le Tusi Paia o tane e aapa atu i lenei faaeaga, e ao ona ʻnaunau i galuega lelei.’ (1 Timo. 3:1) Muamua, e ao ona agavaa muamua se uso e avea o se auauna o le faiva. E tele auala aogā e mafai ona fesoasoani ai auauna o le faiva i toeaina. E auauna ma le lotomaulalo toeaina ma auauna o le faiva i o latou uso ma tuafāfine ma maelega i le faiva. w23.12 27-28 ¶14-16

Na amata ona saʻili le tupu o Iosia iā Ieova a o talavou. Na ia manaʻo e aʻoaʻo e faatatau iā Ieova ma faia Lona finagalo. Peitaʻi, e leʻi faigofie le olaga o lenei tupu talavou. Na tatau ona ia lagolagoina ma le lototele le tapuaʻiga mamā, a o taatele tapuaʻiga sesē. A o leʻi atoa le 20 tausaga o Iosia, na amata ona ia tafiesea tapuaʻiga sesē mai i le nuu. (2 No. 34:​1, 2) E tusa pe e te laʻitiiti, e mafai ona e faaaʻoaʻo iā Iosia e ala i le saʻili iā Ieova ma aʻoaʻoina oe ina ia talisapaia Ona uiga. O na taumafaiga lelei e uunaʻia ai oe e tuuina atu lou ola iā Ieova. E faapefea ona aafia lou olaga i aso taʻitasi pe a tuuina atu lou ola iā te ia? Ua faapea mai Luke o lē na papatiso i le 14 o ona tausaga, “E amata atu nei ona ou faamuamua Ieova i loʻu olaga ma taumafai e faafiafia o ia.” (Mare. 12:30) O le a faamanuiaina oe pe afai o lou faanaunauga foʻi lenā. w23.09 11 ¶12-13

Ina ua tusia e le aposetolo o Paulo lenei tusi, e leʻi atoa se tausaga talu ona faavaeina le faapotopotoga i Tesalonia. Atonu e leʻi lava le poto masani o toeaina o le faapotopotoga, ma atonu na iai ni o latou sesē. Peitaʻi, na manaʻomia ona faaalia pea le faaaloalo iā i latou. A o lata mai le puapuaga tele, o le taimi lenā e sili atu ona manaʻomia ona tatou faalagolago ai i toeaina mo taʻiala. Atonu e tatou te lē toe maua se fesootaʻiga ma le ofisa ulu ma ofisa o lālā. O lea, e tāua ai ona faaalia le alofa ma le faaaloalo i toeaina i le taimi lenei. Po o le ā lava e tupu, ia faaauau ona tatou mafaufau lelei ma aua le uaʻi atu i o latou vaivaiga, ae ia uaʻi atu i le mea moni, o loo taʻitaʻia e Ieova nei tane faamaoni e ala iā Keriso. E pei lava ona puipuia e se puloutau le ulu o se fitafita, e faapena foʻi ona puipuia e le faamoemoe o le faaolataga o tatou mafaufau. Ua tatou iloa o so o se mea e ofoina mai e lenei lalolagi e leai se aogā. (Fili. 3:8) E fesoasoani foʻi lo tatou faamoemoe e maua ai pea le toʻafilemu. w23.06 11-12 ¶11-12

O i latou e faalogo i le “fafine valea,” e latou te filifili pe e talia lana valaaulia pe leai. E iai māfuaaga tāua e tatau ai ona tatou ʻalofia amioga lē mamā taufeusuaʻiga. O le faamatalaga lenei a le “fafine valea”: “E suamalie vai ua gaoia.” (Faata. 9:17) O le ā e faasino i ai “vai ua gaoia”? E faatusaina e le Tusi Paia feusuaʻiga i le vā o se ulugalii faaipoipo i vai e faafouina ai. (Faata. 5:​15-18) E mafai ona faamalieina le tane ma le avā i feusuaʻiga talafeagai i totonu o le liʻo o le faaipoipoga. E tuufaafeagai lea ma “vai ua gaoia,” lea atonu e faasino atu i feusuaʻiga e lē talafeagai pe e lē mamā. O nei amioga e masani ona faia faalilolilo, e pei o se gaoi e faia faalilolilo ana gaoioiga. Atonu e suamalie “vai ua gaoia” iā i latou o loo faia le agasala, ona e latou te manatu e leai se tasi e na te iloaina. Pagā le sesē o lenā manatu! E silafia e Ieova mea uma. E leai se mea e sili atu ona tigā nai lo o le lē mauaina o le finagalo malie o Ieova. E mautinoa e lē o se mea e “suamalie” pe e tatou te olioli ai.—1 Kori. 6:​9, 10. w23.06 22 ¶7-9

Ae e faapefea pe a e manatu i nisi taimi i au tatalo ua na o se mea e tau ina fai, po ua mou atu foʻi lou olioli i lau faiva? Aua e te manatu ua lē toe iai le agaga o Ieova iā te oe. E mafai ona femoumouaʻi o tatou faalogona ona o lo tatou tulaga lē lelei atoatoa. Pe afai ua amata ona mou atu lou maelega, ia manatunatu i le faaaʻoaʻoga a le aposetolo o Paulo. E ui na ia taumafai e faaaʻoaʻo iā Iesu, ae e iai taimi na leai ai sona faanaunauga malosi e faia mea e ao ona ia fai. Sa maumauaʻi Paulo e faataunuu lana faiva e ui i ona faalogona lē mautonu i nisi taimi. I se tulaga talitutusa, aua neʻi o tatou faia ni filifiliga e fua i o tatou faalogona. Ia maumauaʻi e faia le mea saʻo e tusa pe e te lē manaʻo i ai. Pe afai e te faia pea le mea saʻo, atonu o le a suia ai ou faalogona a o faagasolo taimi.—1 Kori. 9:16. w24.03 11-12 ¶12-13

E tatou te faaalia le alofa i o tatou uso ma tuafāfine, e ala i le talia o i latou e avea ma a tatou uō. (2 Kori. 6:​11-13) O le toʻatele o i tatou e auai i faapotopotoga e iai uso ma tuafāfine e eseese talaaga ma uiga. E mafai ona faamalosia lo tatou alofa mo i latou uma, e ala i le taulaʻi atu i o latou uiga lelei. Pe a tatou vaai i isi e pei o le silasila a Ieova, e faamaonia atu ai e tatou te alolofa iā i latou. E matuā tāua ona faaalia le alofa i le taimi o le puapuaga tele. O fea e tatou te maua ai le puipuiga pe a amata le puapuaga tele? Mātau le faatonuga a Ieova i ona tagata i le mea e fai ina ua osofaʻia Papelonia anamua: “Loʻu nuu e, ia ulu atu i o outou potu i totonu, ma tapuni o outou faitotoʻa. Ia outou lalafi mo se taimi puupuu seʻia mavae atu le toʻasā.” (Isa. 26:20) Atonu e mafai foʻi ona tatou faatatauina na upu, pe a gāpā le puapuaga tele. w23.07 6-7 ¶14-16

Ia fesili ifo: ʻPe e manatu tagata iā te aʻu o sē e magafagafa, gauaʻigofie, ma faapalepale? Pe e latou te vaai iā te aʻu o sē e pulepuletutū, ʻinaʻinā, pe faaulumalō? Pe ou te faalogo i isi ma gauaʻi i mea e latou te mananaʻo ai, pe afai e talafeagai?’ O le tele e tatou te faaalia ai le magafagafa, o le tele foʻi lenā e tatou te faaaʻoaʻo ai iā Ieova ma Iesu. O le magafagafa e aofia ai le fetuutuunaʻi pe a suia o tatou tulaga. O na suiga e ono tulaʻi mai ai ni faigatā e tatou te leʻi faatalitalia. O se faataʻitaʻiga, atonu e faafuaseʻi ona tatou aafia i se gasegase tugā. Pe e faafuaseʻi foʻi ona suia le tulaga tau tamaoaiga, pe suia faigāmalo ma atili ai ona faigatā o tatou olaga. (Fai. 9:11) E mafai foʻi ona avea o se luʻi pe a suia o tatou faaeaga i le auaunaga. E mafai ona tatou fetuutuunaʻi i suiga i o tatou tulaga pe a faia auala nei e fā: (1) ia talia le tulaga ua iai, (2) ia taulaʻi i le lumanaʻi, (3) ia uaʻi atu i mea lelei, ma le (4) ia faia mea lelei mo isi. w23.07 22 ¶7-8

A o talavou le perofeta o Tanielu, na ave faapagota o ia i Papelonia lea e mamao mai i Ierusalema. Peitaʻi na mataʻituina o ia e fitafita, ona na latou ʻvāai i lona tino’ ʻe leai se faalētonu, ma e aulelei’ o ia. Na ola aʻe foʻi o ia i se aiga taualoa. (1 Samu. 16:7) O lea na toleniina ai o ia e tagata Papelonia e avea o se tagata aloaʻia o le malo. (Tani. 1:​3, 4, 6) Na alofa Ieova iā Tanielu ona na ia filifili e auauna iā te ia. Pe atonu o le 20 o tausaga o Tanielu, na taʻua faatasi ai e Ieova o ia ma Noa ma Iopu, o ni tane ua tele tausaga o atiaʻe ni talaaga lelei ma le Atua. (Kene. 5:32; 6:​9, 10; Iopu 42:​16, 17; Eseki. 14:14) E tele mea mataʻina na tutupu i le olaga o Tanielu, ma i lenā taimi atoa na alofa Ieova iā te ia.—Tani. 10:​11, 19. w23.08 2 ¶1-2

Pe a e manaʻo e faatau se fale, e mautinoa e te manaʻo e iloilo vaega uma o le fale o le a e faatauina. E tai faapena foʻi le mea e manaʻomia ona tatou faia pe a faitau ma suʻesuʻe le Tusi Paia. Pe afai e faatopelau ona tatou faitauina, atonu o le a tatou aʻoaʻoina ai na o mea e masani ai po o “mataupu faavae o afioga paia a le Atua.” (Epe. 5:12) Peitaʻi, e pei o le faataʻitaʻiga i le fale, e manaʻomia ona tatou ō i totonu i se uiga faafaatusa ina ia iloilo vala uma o le Tusi Paia. O le auala sili e suʻesuʻe ai le Tusi Paia, o le iloa lea pe e faapefea ona fesootaʻi vaega uma o le feʻau o loo tusia ai. Ia maumauaʻi e malamalama po o ā upu moni e te talitonu i ai ma le māfuaaga e te talitonu ai i na upu moni. Ina ia malamalama lelei i le Afioga a le Atua, e tatau ona tatou malamalama i upu moni loloto o loo iai. Na faalaeiau e le aposetolo o Paulo ona uso ma tuafāfine Kerisiano e suʻesuʻe ma le filigā le Tusi Paia, ina ia “malamalama lelei i le lautele, ma le umi, ma le maualuga, ma le loloto” o le upu moni. O le faia faapea, o le a atili “mauaa ma faatumauina” ai lo latou faatuatua. (Efe. 3:​14-19) O le mea foʻi lenā e manaʻomia ona tatou faia. w23.10 18 ¶1-3

O loo iai i le Tusi Paia le tele o faaaʻoaʻoga o i latou na faaalia le onosaʻi. Atonu o se mea lelei le suʻesuʻe atili e faatatau i na faaaʻoaʻoga. O se faataʻitaʻiga, e ui lava na faauuina Tavita a o talavou e avea ma tupu o Isaraelu, ae na manaʻomia ona ia faatalitali mo le tele o tausaga a o ia leʻi mauaina le tulaga tautupu. Na tapuaʻi ma le faamaoni Simeona ma Ana iā Ieova a o la faatalitali i le Mesia na folafolaina mai. (Luka 2:​25, 36-38) A o e suʻesuʻeina na tala, ia taumafai e saʻili tali o fesili nei: O le ā atonu na fesoasoani i lenei tagata ina ia faaalia le onosaʻi? O ā aogā na ia maua ona o lona onosaʻi? E faapefea ona ou faaaʻoaʻo iā te ia? Atonu e te aʻoaʻoina foʻi ni lesona mai iā i latou e leʻi faaalia le onosaʻi. (1 Samu. 13:​8-14) E te ono fesili ifo: ʻAiseā e leʻi lava ai lo latou onosaʻi? O ā iʻuga na oo iā i latou?’ w23.08 25 ¶15

O le aposetolo o Peteru o se soo faamaoni. E leʻi faavaivai o ia i le mulimuli atu pea iā Iesu. I se tasi taimi, na faaalia ai e Peteru lona faamaoni ina ua faia e Iesu se faamatalaga e leʻi malamalama i ai ona soo. (Ioa. 6:68) Nai lo o le faatalitali iā Iesu mo se faamalamalamaga, e leʻi toe mulimuli le toʻatele o ona soo iā te ia. Ae e leʻi faia faapea e Peteru. Na ia iloa e na o Iesu e iai “upu o le ola e faavavau.” I le pō mulimuli o le soifuaga o Iesu i le lalolagi, na silafia e Iesu o le a tuulafoaʻia o ia e Peteru ma isi aposetolo. Ae na faailoa atu e Iesu lona mautinoa o le a toe foʻi mai Peteru, ma o le a tumau ona faamaoni iā te ia. (Luka 22:​31, 32) Na malamalama Iesu i lenei mea moni: “Ua naunau i ai le loto, ae ua vaivai le tino.” (Mare. 14:38) O lea e ui ina faafitia e Peteru o ia, ae e leʻi tuulafoaʻia ai e Iesu lona aposetolo. Ina ua toetū Iesu, na faaali atu o ia iā Peteru a o iai na o ia. (Mare. 16:7; Luka 24:34; 1 Kori. 15:5) O lenā mea e mautinoa na matuā faalaeiauina ai le aposetolo ua lotovaivai. w23.09 22 ¶9-10

E faamagaloina pe ufitia e le Atua agasala a i latou e faatuatua iā te ia. E na te faamagaloina atoatoa i latou ma lē toe faitaulia a latou agasala. (Sala. 32:​1, 2) E silasila o ia iā i latou taʻitoʻatasi o ni ē e amiotonu ma lē ponā ona o lo latou faatuatua. E ui ina taʻua Aperaamo, Tavita ma isi auauna faamaoni a le Atua o ni ē e amiotonu, ae na avea pea i latou ma tagata agasala. Peitaʻi, o lo latou faatuatua na silasila ai le Atua iā i latou o ni ē e lē ponā, aemaise pe a faatusatusa i ē e lē tapuaʻi iā te ia. (Efe. 2:12) E pei ona faamanino mai e le aposetolo o Paulo i lana tusi i Roma, o le faatuatua o le vaega autū i le mauaina o se faiā lelei ma le Atua. Sa moni lenā manatu i le tulaga o Aperaamo ma Tavita, ma e faapena foʻi i tatou. w23.12 3 ¶6-7

I aso nei, ua maua e Kerisiano uma le faaeaga e ofoina atu ai taulaga iā Ieova, e ala i le faaaogā o lo latou taimi, malosi, ma meafaitino e faaauiluma ai manaʻoga o le Malo o le Atua. E faaalia lo tatou matuā talisapaia o lo tatou faaeaga e tapuaʻi ai iā Ieova, e ala i le faia o le mea sili e auauna atu ai iā te ia. Na otooto mai e le aposetolo o Paulo vala eseese o la tatou tapuaʻiga e lē tatau ona tatou faatalalē i ai. (Epe. 10:​22-25) E aofia ai le faalatalata atu iā Ieova i le tatalo, taʻutaʻu atu i le lautele lo tatou faamoemoe, faapotopoto faatasi o se faapotopotoga, ma fefaalaeiauaʻi, ma “ia sili foʻi ona faia faapea auā ua [tatou] iloa ua matuā latalata mai lava le aso [o Ieova].” I mataupu faaiʻu o le tusi o Faaaliga, na faapea atu ai le agelu a Ieova: “Ia tapuaʻi i le Atua!” E lua taimi na ia faia ai lenā faamatalaga, e faamatilatila ai le tāua o lo tatou faia o lenā gaoioiga. (Faaa. 19:10; 22:9) Ia aua lava neʻi galo iā i tatou lenei upu moni loloto faaleagaga e faatatau i le malumalu sili faaleagaga o Ieova, ma le faaeaga tautele ua tatou maua e tapuaʻi ai i lo tatou Atua sili! w23.10 29 ¶17-18

E tatou te mananaʻo ina ia “faaauau ona alofa le tasi i le isi.” Peitaʻi, e tāua ona tatou manatua le lapataʻiga a Iesu, “o le a maalili le alofa o le toʻatele.” (Mata. 24:12) E leʻi uiga atu Iesu e toʻatele ona soo o le a oo i ai lenā tulaga. E ui i lea, e manaʻomia ona tatou mataala pea ina ia aua neʻi taaʻina i tatou i uiga lē alofa o tagata o le lalolagi. O lea, seʻi o tatou iloiloina le fesili tāua lenei: E faapefea ona iloa po o malosi lo tatou alofa mo o tatou uso? O se tasi o auala e iloa ai le malosi o lo tatou alofa, o le mātauina lea o le auala e tatou te taulimaina ai mea e tutupu i le olaga. (2 Kori. 8:8) O se faataʻitaʻiga, o vaivaiga ma mea sesē a isi e mafai ona tofotofoina ai le malosi o lo tatou alofa mo i latou. O lea, e iloa le malosi o lo tatou alofa pe a faatatau le fautuaga a le aposetolo o Peteru: “Ae e sili i nei mea uma, ia tele le alofa o le tasi i le isi, auā o le alofa e ufiufi ai le anoanoaʻi o agasala.”—1 Pete. 4:8. w23.11 10 ¶12-13

E lē mafai ona tatou usiusitaʻi i le poloaʻiga a Iesu e faatatau i le alofa, pe afai e tatou te alolofa e na o isi i le faapotopotoga ae e lē o le faapotopotoga atoa. E moni e iai isi e tatou te matuā māfana i ai e pei foʻi o Iesu. (Ioa. 13:23; 20:2) Peitaʻi, ua faamanatu mai e le aposetolo o Peteru e tatau ona tatou taumafai malosi e ʻalolofa faamaoni’ i o tatou uso ma tuafāfine uma, auā o i latou o lo tatou aiga. (1 Pete. 2:17) Na apoapoaʻi mai Peteru ina “ia matuā alofa le tasi i le isi mai i le loto.” (1 Pete. 1:22) O se tasi o uiga o lenei faaupuga “ia matuā alofa,” e aofia ai lo tatou alofa i se tasi e tusa pe faigatā ona faaalia i ai le alofa. O se faataʻitaʻiga, seʻi faapea ua faatigā mai se uso iā i tatou. Atonu e tatou te mananaʻo e tauimasui atu nai lo o le faaalia i ai o le alofa. Ae na aʻoaʻoina e Peteru mai iā Iesu, e lē fiafia le Atua i le tauimasui. (Ioa. 18:​10, 11) Na tusi Peteru: “Aua le taui atu le leaga i le leaga, po o le upuleaga atu i ē e upuleaga mai. Nai lo o lea, ia outou faamanuia atu.” (1 Pete. 3:9) Pe afai e te matuā alofa i isi, o le a e agalelei la iā i latou. w23.09 28-29 ¶9-11

E tatou te maofa i le vave o le tuputupu aʻe o se tamaitiiti e avea ma tagata matua, ma e pei o se mea e otometi ona tupu. Peitaʻi, e lē otometi ona avea se tasi ma Kerisiano taʻumatuaina, e manaʻomia ai ni taumafaiga. (1 Kori. 13:11; Epe. 6:1) Ina ia ausia lenā sini, e manaʻomia ona iai sa tatou faiā vavalalata ma Ieova. E tatou te manaʻomia foʻi le fesoasoani a le agaga paia a o atiaʻe uiga lelei, aʻoaʻoina ni tomai aogā, ma sauniuni mo isi tiute tauave i le lumanaʻi. (Faata. 1:5) Na foafoaina e Ieova le tane ma le fafine. (Kene. 1:27) O lea, e iloagofie le eseesega o le tane ma le fafine i le itu i le tino, ae e iai foʻi isi vala e eseese ai. O se faaaʻoaʻoga, na faatulaga e Ieova tiute tauave patino mo tane ma fafine, ma e iai uiga ma tomai e latou te manaʻomia e faataunuu ai na tiute tauave.—Kene. 2:18. w23.12 18 ¶1-2

E mautinoa na finagalo Iesu e faaaogā e isi le suafa o lona Tamā. Na manatu nisi o taʻitaʻi lotu i lenā taimi, o se faiga lē faaaloalo le taʻua o le suafa o le Atua. Peitaʻi, e leʻi mafai e na talitonuga e lē faale-Tusi Paia ona taofia ai Iesu mai i le faamamaluina o le suafa o lona Tamā. Seʻi manatu i le taimi na ia faamālōlōina ai se tamāloa na uluitino e temoni i le vaipanoa o Kerekese. Na matataʻu tagata ma ʻaiʻoi atu iā Iesu ina ia alu ese. O lea, na ia tuua ai lenā vaipanoa. (Mare. 5:​16, 17) E ui i lea, na manaʻo Iesu ina ia faailoa atu le suafa o Ieova i inā. O lea, na faatonu ai e Iesu le tamāloa na ia faamālōlōina ina ia taʻu atu i tagata mea na faia e Ieova, ae e lē o mea na ia faia. (Mare. 5:19) E finagalo foʻi Iesu ina ia tatou faailoa atu le suafa o lona Tamā i le lalolagi atoa. (Mata. 24:14; 28:20) O le faia faapea, e faafiafiaina ai lo tatou Tupu o Iesu. w24.02 10 ¶10

O se matuā faaeaga le avea o i tatou ma vaega o le faalapotopotoga a Ieova i nei aso e sili ona faigatā. A o faateteleina le leaga o le tulaga o mea i le lalolagi, ua saunia mai e Ieova se aiga faaleagaga e autasi o uso ma tuafāfine. (Sala. 133:1) Ua ia fesoasoani mai ina ia tatou maua ni aiga fiafia. (Efe. 5:33–6:1) Ua ia foaʻi mai foʻi le tofā mamao ma le atamai e tatou te manaʻomia, ina ia maua ai le filemu o le loto ma le mafaufau. Peitaʻi, e ao ona tatou galulue mamafa ina ia auauna pea ma le faamaoni iā Ieova. Aiseā? Talu ai e iai taimi atonu e tatou te lē fiafia ai i faamatalaga po o gaoioiga a isi. E tatou te ono lagona foʻi le lotovaivai ona o a tatou mea sesē, aemaise pe a tatou faia na mea sesē mai i lea taimi i lea taimi. E manaʻomia ona tatou tumau i le auaunaga iā Ieova (1) pe a faatigā mai se uso po o se tuafafine, (2) pe a iai tulaga faigatā i le faaipoipoga, ma le (3) pe a tatou lotovaivai ona o a tatou mea sesē. w24.03 14 ¶1-2

E mai i lea taimi i lea taimi, o le a e faalogo ai i tala o uso ma tuafāfine na filifili e faalautele atu la latou auaunaga paia. Atonu na latou auai i le Aʻoga mo Tagata Talaʻi o le Malo, pe siitia atu i vaipanoa o loo telē ai le manaʻoga. Pe a talafeagai ma lou tulaga, o ni sini lelei na mo oe. E naunau tagata o Ieova e faalautele la latou faiva. (Galu. 16:9) Ae e faapefea pe afai e lē o mafai ona e faia lenā mea i le taimi lenei? Aua e te manatu e sili atu i latou o loo mafai ona faia faapea. O le mea e sili ona tāua o lou tumau. (Mata. 10:22) Ia e manatua e tautele iā Ieova lau auaunaga, pe a e faia le mea sili e tusa ai ma ou tomai ma lou tulaga. O se auala tāua lenā e fesoasoani iā te oe e mulimuli ai pea iā Iesu, pe a uma ona e papatiso.—Sala. 26:1. w24.03 10 ¶11

Ua folafola mai e lo tatou Tamā i le lagi, e na te faamagaloina i tatou pe afai e tatou te salamō. (Sala. 86:5) O lea, pe afai e tatou te salamō moni mai i a tatou agasala, e mautinoa o le a faamagaloina i tatou e Ieova. Ia manatua, e magafagafa Ieova ma e lē pulepuletutū. E na te lē faamalosia i tatou e faia se mea e sili atu nai lo o le mea e tatou te mafaia. E na te talisapaia so o se mea e mafai ona tatou faia. Ia manatunatu foʻi i faaaʻoaʻoga faale-Tusi Paia o i latou na auauna ma le lotoatoa iā Ieova. O se faataʻitaʻiga o le aposetolo o Paulo. Na galue mamafa mo le tele o tausaga, faimalaga i le faitau afe o maila, ma faavaeina le tele o faapotopotoga. Peitaʻi, ina ua itiiti mea e mafai ona ia faia i le galuega talaʻi ona o suiga i lona tulaga, na ia maua pea le finagalo malie o le Atua. Na faaauau ona ia faia le mea e na te mafaia, ma na faamanuia o ia e Ieova. (Galu. 28:​30, 31) I se tulaga talitutusa, e lē tutusa mea e mafai ona tatou faia mo Ieova i taimi uma. Ae o le mea e tāua iā te ia, o le uunaʻiga e tatou te faia ai. w24.03 27 ¶7, 9

O tatalo a Iesu iā Ieova, na ia faataatia ai se faaaʻoaʻoga e mulimuli i ai ona soo. A o faagasolo lana faiva, na ia tatalo e lē aunoa. E ui i lona pisi ma le toʻatele o tagata e ō atu pea iā te ia, ae na ia sema se taimi e tatalo ai. (Mare. 6:​31, 45, 46) E ala o ia i le taeaopō ina ia maua se taimi e tatalo ai na o ia. I se tasi taimi, na ia tatalo ai i le pō atoa a o leʻi faia se filifiliga tāua. (Luka 6:​12, 13) I le pō a o lumanaʻi le maliu o Iesu, na tatalo faatolu ai o ia, ma taulaʻi atu pea i le faamāeʻaina o le vala pito sili ona faigatā o lana faiva i le lalolagi. (Mata. 26:​39, 42, 44) Ua tatou aʻoaʻoina mai i le faaaʻoaʻoga a Iesu, po o le ā lava lo tatou pisi ae e manaʻomia ona sema se taimi e tatalo ai. I le pei o Iesu, atonu e manaʻomia ona faatulaga se taimi e tatalo ai, e pei o le vave ala i le taeao po o le tatalo i se taimi o le afiafi. O le faia faapea, ua faailoa atu ai iā Ieova lo tatou lotofaafetai mo lenei meaalofa tautele. w23.05 3 ¶4-5

Seʻi mātau le faaupuga “ua liligi mai” e pei ona taʻua i le mau o le asō. Ua faamatalaina i se lomifefiloi e faapea, “ua tafe mai iā i tatou e pei o se vaitafe.” Maʻeu le talafeagai o lenā faaupuga e faamatilatila ai le tele o le alofa o Ieova mo le ʻaufaauuina! E talitonu le ʻaufaauuina e “alofagia e le Atua” i latou. (Iuta 1) Na faailoa mai e le aposetolo o Ioane o latou faalogona ina ua ia tusi: “Seʻi manatu i le silisili o le alofa o le Tamā ua faaalia mai iā i tatou, ina ia taʻua i tatou o fanau a le Atua.” (1 Ioa. 3:1) Ae pe e na o le ʻaufaauuina e alofa i ai Ieova? E leai. Ua faamaonia mai e Ieova lona alofa iā i tatou uma. O le ā le faamaoniga silisili o le alofa o Ieova? O le togiola, ma e na o Ieova ua faia lenei gaoioiga silisili e faaalia ai le alofa.—Ioa. 3:16; Roma 5:8. w24.01 28 ¶9-10

O loo faailoa mai i le mau o le asō se auala na foʻia ai le fefe o Tavita. E ui na lamatia lona ola, ae na ia manatunatu i mea o le a faia e Ieova mo ia. Na iloa e Tavita o le a laveaʻia o ia e Ieova i le taimi talafeagai. O le mea moni, na faailoa mai e Ieova o le a avea Tavita ma tupu e sosoo ai o Isaraelu. (1 Samu. 16:​1, 13) Na mautinoa e Tavita e taunuu so o se mea e folafola mai e Ieova. O le ā ua folafola mai e Ieova e na te faia mo oe? E tatou te lē faatalitalia e na te puipuia i tatou mai i faafitauli uma. Peitaʻi, e tusa po o ā faafitauli e tatou te fesagaʻia i lenei faiga o mea, o le a tafiesea e Ieova i le lalolagi fou. (Isa. 25:​7-9) E iai i Lē na foafoaina i tatou le mana e toe faatutūina ai ē ua maliliu, faamālōlōina i tatou, ma faaumatia ē uma e tetee.—1 Ioa. 4:4. w24.01 6 ¶12-13

Ia manatunatu i lou tuuina atu ma le papatisoga. Na e uia na laasaga ona na e manaʻo e lagolagoina le itu a Ieova. Seʻi toe mafaufau po o le ā na faatalitonuina ai oe ua e maua le upu moni. Na e aʻoaʻoina le poto saʻo e faatatau iā Ieova, ma faalolotoina lou faaaloalo ma lou alofa mo ia. Na e atiaʻe le faatuatua ma uunaʻia ai oe e faaalia le salamō. Ua e tuua masaniga leaga ma ola e tusa ma le finagalo o Ieova. Ua e maua se lotofuatiaifo mamā ona o le faamagaloga a le Atua. (Sala. 32:2) Ua e auai i sauniga ma faasoa atu i isi mea matagofie ua e aʻoaʻoina. I le avea ai o oe o se Kerisiano ua tuuina atu ma papatisoina, ua e savalia nei le ala i le ola ma ua e maumauaʻi ina ia faaauau ona e savali ai. (Mata. 7:​13, 14) Tau ina ia e tumau ma mausalī i lau auaunaga iā Ieova, ma ia maumauaʻi e usitaʻia ana poloaʻiga. w23.07 17 ¶14; 19 ¶19

O le manatunatu loloto i lau tatalo o le tuuina atu iā Ieova, o le a e maua ai le malosi e teena ai so o se faaosoosoga. O se faaaʻoaʻoga, o le a e lē faatafai ai i le paaga a se isi tagata, auā o le mea lenā ua uma ona e filifili e fai. Peitaʻi, o le a faigatā ona e liaʻiese na faalogona lē talafeagai, pe afai e te faataga e tuputupu aʻe pea ma mauaa i lou loto. O le mea moni, e mafai ona e “liliuese” mai i “le ala o ē e amioleaga.” (Faata. 4:​14, 15) O le manatunatu i le maumauaʻi o Iesu e faafiafia lona Tamā, o le a vave ai ona e gaoioi ma le maumauaʻi e teena so o se mea e faatigā ai i le Atua, o lē ua e tuuina atu i ai. (Mata. 4:10; Ioa. 8:29) O tofotofoga ma faaosoosoga, o se avanoa lea e faailoa atu ai lou maumauaʻi e ʻmulimuli pea’ iā Iesu. Pe a e faia faapea, e mautinoa o le a fesoasoani mai Ieova iā te oe. w24.03 9-10 ¶8-10