Novema

Pe afai o oe o se matua, ia fesoasoani i lau fanau lāiti ina ia sauniuni lelei ni tali e tusa ma lo latou matutua. E iai le taimi e talanoaina ai i se suʻesuʻega mataupu e pei o faafitauli tau i le faaipoipoga po o mataupu tau i amioga tatau, ae e ono iai lava se palakalafa e mafai ona tali ai le fanau lāiti. E mafai foʻi ona e fesoasoani i lau fanau, e malamalama i le māfuaaga e lē tofia ai i latou i taimi uma e sii ai o latou lima. O le faia faapea, o le a latou lē feita ai pe a tofi isi e tali nai lo o i latou. (1 Timo. 6:18) E mafai e i tatou uma ona sauniuni ni tali e faamamaluina ai Ieova ma faalaeiau ai o tatou uso Kerisiano. (Faata. 25:11) E ui e iai taimi e tatou te faamatala ai ni mea na tutupu iā i tatou, ae e lē tatau ona soona faia ni faamatalaga e faauaʻi mai ai isi iā i tatou. (Faata. 27:2; 2 Kori. 10:18) Nai lo o lea, ia tatou taumafai malosi e faauaʻi atu pea tagata iā Ieova, o lana Afioga, ma lana faalapotopotoga.—Faaa. 4:11. w23.04 24-25 ¶17-18

E tāua le alofa ina ia mataala ai pea ma faaauau ona mafaufau lelei. (Mata. 22:​37-39) O le alofa i le Atua, e fesoasoani iā i tatou e talaʻi ai pea e ui i luʻi e tatou te ono fesagaʻia. (2 Timo. 1:​7, 8) Talu ai e tatou te alolofa foʻi i ē e lē auauna iā Ieova, e faaauau pea ona tatou talaʻi ae faapea foʻi ma talaʻiga i le telefoni ma tusi. E tatou te faamoemoe e iai le taimi o le a faia ai e o tatou tuaoi ni suiga manaʻomia ma faia le mea tonu. (Eseki. 18:​27, 28) O le alofa i tuaoi e aofia ai le alofa i o tatou uso ma tuafāfine. E tatou te faaalia lenā alofa, e ala i le ʻfefaalaeiauaʻi ma atiaʻe e le tasi le isi.’ (1 Tesa. 5:11) E pei ona tutū faatasi o ni fitafita e tau se taua, e faapena foʻi ona tatou fefaalaeiauaʻi o le tasi i le isi. E tatou te lē faia ma le loto i ai se gaoioiga e faatigā ai i o tatou uso ma tuafāfine, pe taui atu le leaga i le leaga. (1 Tesa. 5:​13, 15) E tatou te faaalia foʻi le alofa e ala i le faaaloalo i uso o loo taʻimua i faapotopotoga.—1 Tesa. 5:12. w23.06 10 ¶6; 11 ¶10-11

O le auala muamua e faamalosia ai lo tatou faatuatua, o le manatunatu loloto i le togiola. O le togiola o se faamautinoaga lea o le a taunuu moni lava folafolaga a le Atua. Pe a tatou manatunatu loloto i le māfuaaga na saunia ai le togiola ma mea e aofia ai, e faamalosia ai lo tatou faatuatua o le a taunuu moni lava le folafolaga a le Atua, o le ola e faavavau i se lalolagi e sili ona lelei. Aiseā e tatou te mautinoa ai i lenā mea? O ā la mea na aofia ai i le togiola? Na auina mai e Ieova i le lalolagi lona Alo pele e toʻatasi o lē e sili ona vavalalata iā te ia, ina ia fanau mai o se tagata lelei atoatoa. A o iai Iesu i le lalolagi, na ia onosaia so o se faigatā ma na oo iā te ia mafatiaga ma maliu tigā ai. Seʻi mafaufau i le telē o le tau na totogi e Ieova! E leʻi foaʻi mai e lo tatou Atua alofa lona Alo ina ia mafatia ma maliu, e tau lava ina ia tatou maua ai se olaga e sili ona lelei ae e lē tumau. (Ioa. 3:16; 1 Pete. 1:​18, 19) O le telē o le tau na totogi e Ieova ua ia faamautinoa mai ai, e mafai ona tatou ola e faavavau i le lalolagi fou. w23.04 27 ¶8-9

Pe e iai iā Ieova le faanaunauga e faatutū ai ē ua maliliu? E mautinoa o lona faanaunauga lenā. Na ia faagaeeina nisi o tusitala o le Tusi Paia e tusia lana folafolaga e faatatau i se toetū i le lumanaʻi. (Isa. 26:19; Faaa. 20:​11-13) Pe a faia e Ieova se folafolaga, e na te faataunuuina lava. (Iosua 23:14) O le mea moni, e naunau Ieova e faatutūina mai ē ua maliliu. Seʻi mafaufau i faamatalaga a le augātamā o Iopu. Na ia mautinoa e tusa lava pe e maliu o ia, ae e matuā naunau Ieova e faatūina mai o ia. (Iopu 14:​14, 15) O le faanaunauga foʻi lenā o Ieova mo ona tagata tapuaʻi uma ua maliliu. E matuā naunau o ia e faatutūina mai i latou i se olaga soifua mālōlōina ma fiafia. Ae e faapefea le faitau piliona ua maliliu ae e latou te leʻi maua se avanoa e aʻoaʻoina ai e faatatau iā Ieova? E finagalo foʻi lo tatou Atua alofa e faatutūina i latou. (Galu. 24:15) E finagalo o ia e latou te maua le avanoa e avea ai ma ana uō, ma ola e faavavau i le lalolagi.—Ioa. 3:16. w23.04 9 ¶5-6

E faapefea ona faamalosia lou faamoemoe? O se faataʻitaʻiga, pe afai o lou faamoemoe o le ola e faavavau i le lalolagi, ia faitau ma manatunatu loloto i faamatalaga a le Tusi Paia e uiga i le Parataiso. (Isa. 25:8; 32:​16-18) Ia faaata o loo e iai i le lalolagi fou, ma le ituaiga olaga o le a iai i lenā taimi. Pe a tāmau i o tatou mafaufau le faamoemoe i le lalolagi fou, o le a “puupuu ma māmā” o tatou faafitauli. (2 Kori. 4:17) O le a faamalosia oe e Ieova, e ala i le faamoemoe ua ia saunia mai. Ua ia saunia mea e te manaʻomia ina ia maua ai le malosi mai iā te ia. O lea, pe a e manaʻomia le fesoasoani e faataunuu se tofiga, onosaia se luʻi, pe faatumauina pea lou olioli, ia talosaga atu iā Ieova e ala i le tatalo, ma saʻili atu mo lana taʻitaʻiga e ala i au lava suʻesuʻega. Ia talia faalaeiauga mai i ou uso ma tuafāfine Kerisiano. Ia fai ma masani le faaalu o se taimi e faaata ai lou faamoemoe i le lumanaʻi. O le faia faapea, o le a ʻfaamalosia ai oe i le malosi uma e tusa ma le mana tele o le Atua, ina ia mafai ai ona e tumau atoatoa ma le onosaʻi atoa ma le olioli.’—Kolo. 1:11. w23.10 17 ¶19-20

E tele māfuaaga e tatou te faafetaia ai Ieova i le tatalo. E tatou te faafetai iā te ia mo mea lelei uma ua tatou maua, auā o meaalofa lelei uma e mai iā te ia. (Iako. 1:17) O se faataʻitaʻiga, e mafai ona faailoa atu lo tatou lototalisapaia mo le lalolagi matagofie ma mea ofoofogia ua ia faia. E mafai foʻi ona faailoa atu lo tatou lotofaafetai mo le ola, lo tatou aiga, a tatou uō, ma lo tatou faamoemoe. E tatou te faafetaia foʻi Ieova ona ua mafai ona tatou maua se faauōga māfana ma ia. Atonu e manaʻomia ona faia ni a tatou taumafaiga maumauaʻi, e manatunatu ai i māfuaaga e tatou te lotofaafetai ai iā Ieova. Ua tatou ola i se lalolagi ua leai se lotofaafetai. E masani ona taulaʻi tagata i mea e latou te mananaʻo ai, nai lo o le faaalia o le lotofaafetai mo mea ua latou maua. Pe a amata ona tatou aafia i lenā uiga, e pau lava mea o le a taulaʻi i ai a tatou tatalo o mea e tatou te mananaʻo ai. Ina ia ʻalofia lenā tulaga, e manaʻomia ona faaauau ona tatou atiaʻe ma faaalia pea le lotofaafetai, mo mea uma ua faia e Ieova mo i tatou.—Luka 6:45. w23.05 4 ¶8-9

Talu ai o Ieova o se Tamā alofa, e lē fia silasila mai la o ia o loo tatou mafatia. (Isa. 63:9) Ae e na te lē taofia le oo mai o faafitauli iā i tatou, lea e pei o ni vaitafe po o le afi. (Isa. 43:2) Peitaʻi, ua ia folafola mai o le a ia fesoasoani mai ina ia mafai ona tatou “sopoʻia” na faafitauli. E na te lē faatagaina na faafitauli ina ia tatou mafatia ai e faavavau. E foaʻi mai foʻi e Ieova lona agaga paia iā i tatou ina ia tatou tumau ai. (Luka 11:13; Fili. 4:13) O lea, e tatou te mautinoa ai e foaʻi mai pea e Ieova mea tonu e tatou te manaʻomia, ina ia tatou tumau ma faamaoni ai pea iā te ia. E faatalitalia e Ieova i tatou ina ia maufaatuatuaina o ia. (Epe. 11:6) E iai taimi e lofitūina ai i tatou i faafitauli ogaoga. E tatou te ono masalosalo ai po o le a fesoasoani mai Ieova iā i tatou. Ae ua faamautinoa mai e le Tusi Paia, e mafai ona tatou “aʻea le pā” ona o le mana o le Atua. (Sala. 18:29) O lea, nai lo o le lolo atu i o tatou masalosaloga, e tatau ona tatou tatalo ma le faatuatua atoatoa o le a tali mai Ieova i a tatou tatalo.—Iako. 1:​6, 7. w23.11 22 ¶8-9

E matagofie le auala ua faamatalaina ai le alofa moni! Ua faamautinoa mai i lenā mau se upu moni tāua mo ulugalii faaipoipo: E mafai ona tumau le malosi o le alofa o le tasi mo le isi. Ina ia faatumauina pea le malosi o le alofa i le vā o se ulugalii, e manaʻomia ona la faia ni taumafaiga maumauaʻi. O se faataʻitaʻiga, ina ia mumū pea se afi e manaʻomia ona tuu pea i ai fafie. Ae pe a lē faia faapea, o le a iʻu ai ina pē. E faapena foʻi le alofa i le vā o le tane ma le avā, e mafai ona tumau pea pe afai e la te faamalosia lenā alofa. E iai taimi e lagona ai e se ulugalii ua tauau ina maalili lenā alofa, aemaise lava pe a lofitūina i laʻua i faigatā tau tamaoaiga, faalētonu le soifua mālōlōina, po o luʻi i le tausia aʻe o fanau. O lea, ina ia faaolaola pea “le afi mū saesae a Ioa,” e tatau i le tane ma le avā ona galulue e faamalosia la outou faiā ma Ieova. w23.05 20-21 ¶1-3

O le ā e manaʻomia ona tatou faia ina ia atiaʻe ai le lototele? Atonu e uunaʻia i tatou e o tatou mātua ia lototetele, ae e lē faapea ai e otometi ona iai iā i tatou lenā uiga ona e latou te lototetele. E tai pei le mauaina o le lototele o le aʻoaʻoina o se tomai fou. O se faataʻitaʻiga, o se tasi o auala e mafai ona faaleleia ai se tomai, o le mataʻitu o gaoioiga a se tasi o loo aumaia toleniga ma faataʻitaʻi i ai. I se tulaga talitutusa, e mafai ona avea i tatou o ni ē e lototetele e ala i le mātauina lelei o le auala e faaalia ai e isi lenā uiga, ma faaaʻoaʻo iā i latou. I le pei o Tanielu, e manaʻomia ona tatou sogasogā e suʻesuʻe le Afioga a le Atua. E tatau ona tatou atiaʻe se faiā māfana ma Ieova, e ala i le sasaa atu o o tatou faalogona iā te ia e lē aunoa. E manaʻomia foʻi ona tatou maufaatuatuaina Ieova, ma ia tatou mautinoa o loo ia lagolagoina i tatou. O lea, pe a tofotofoina lo tatou faatuatua, o le a tatou lototetele ai. O tagata lototetele e masani ona faaaloalogia e isi. E ono tosina mai ai foʻi tagata lotofaamaoni i le upu moni. O lea la, e tāua tele le atiaʻe o le lototele. w23.08 2 ¶2; 4 ¶8-9

O le upu Eleni ua faaliliuina “ia faamautinoa,” e fesootaʻi atu i le auala na iloiloina ai uʻamea anagatā. O lea, e manaʻomia ona tatou iloilo mea e tatou te faalogo pe faitau i ai ina ia faamautinoa pe moni. O le a sili atu ona tāua lo tatou faia faapea a o latalata mai le puapuaga tele. Nai lo o le talitonu i mea uma e faalogo i ai, ae e tatou te faaaogā le mafaufau lelei e faatusatusa ai mea e tatou te faitau pe faalogo i ai, i mea e fai mai ai le Tusi Paia ma le faalapotopotoga a Ieova. O le faia faapea, o le a lē faasesēina ai i tatou i so o se faamatalaga taufaasesē mai i temoni. (Faata. 14:15; 1 Timo. 4:1) O le a faasaoina tagata o le Atua i le puapuaga tele. Ae mo i tatou taʻitoʻatasi, e tatou te lē iloa le mea o le a tupu a taeao. (Iako. 4:14) E tusa pe e tatou te sao atu i le puapuaga tele pe maliliu foʻi a o leʻi oo i lenā taimi, o le a tauia i tatou i le ola e faavavau pe afai e tatou te tumau ma le faamaoni. Tau ina ia tatou taulaʻi uma i lo tatou faamoemoe matagofie, ma nofosauni mo le aso o Ieova! w23.06 13 ¶15-16

E tatou te lē iloa po o le a faapefea ona faataunuuina nisi o valoaga o le Tusi Paia. (Tani. 12:​8, 9) Ae o lo tatou lē malamalama atoatoa i le auala e faataunuu ai se valoaga, e lē faapea ai o le a lē faataunuuina. E mautinoa e mafai ona tatou maufaatuatuaina Ieova, o le a ia faailoa mai mea e manaʻomia ona tatou iloa i le taimi tonu e pei ona ia faia i aso ua mavae. O le a faia se faalauiloaga “ua filemu ma saogalemu.” (1 Tesa. 5:3) Ona osofaʻia lea e malo faapolotiki o lotu sesē ma faaumatia. (Faaa. 17:​16, 17) Ona sosoo ai lea ma le osofaʻia o tagata o le Atua. (Eseki. 38:​18, 19) Ona faaiʻuina lea i le taua o Amaketo. (Faaa. 16:​14, 16) Ua tatou mautinoa ua toeitiiti ona faataunuuina lea o nei mea uma. O lea, ia faaauau ona tatou faaalia le lototalisapaia i lo tatou Tamā alofa i le lagi, e ala i le suʻesuʻeina o valoaga o le Tusi Paia ma fesoasoani i isi e faia foʻi faapea. w23.08 13 ¶19-20

Ina ua taʻua e le aposetolo o Paulo le faatuatua, faamoemoe, ma le alofa, na faaiʻu ana upu i le faapea mai “o le aupito sili o nei [uiga], o le alofa lea.” (1 Kori. 13:13) Aiseā na faia ai e Paulo lenā faamatalaga? Talu ai o le a faataunuuina uma folafolaga a le Atua i le lumanaʻi, o le a lē toe manaʻomia ai la ona tatou faaalia le faatuatua i Ana folafolaga e faatatau i le lalolagi fou, pe faamoemoe foʻi o le a faataunuuina na folafolaga. Peitaʻi, e tatou te faaalia pea le alofa mo Ieova ma tagata. O le mea moni, o le a faaauau pea ona tuputupu aʻe lo tatou alofa mo i latou. O le alofa foʻi ua mātaulia ai i tatou o ni Kerisiano moni. Na fetalai Iesu i ona aposetolo: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioa. 13:35) O le faaalia foʻi o le alofa o le tasi i le isi, e faatumauina ai pea lo tatou autasi. Na taʻua e Paulo le alofa, ʻo le fusi e atoatoa ona autasi ai.’ (Kolo. 3:14) Na tusi le aposetolo o Ioane i ona uso talitonu: “O lē e alofa i le Atua e tatau foʻi ona alofa i lona uso.” (1 Ioa. 4:21) Pe a faaalia e le tasi le alofa i le isi, e faaalia ai foʻi e tatou te alolofa i le Atua. w23.11 8 ¶1, 3

Ua faatusaina e le Tusi Paia o tatou olaga o ni Kerisiano i se tuuga. O tagata tamomoʻe e taunuu i le tini, e tauia i le ola e faavavau. (2 Timo. 4:​7, 8) E manaʻomia ona tatou faia taumafaiga uma ina ia tumau ai pea i lenei tuuga, aemaise lava ua lata ina faaiʻuina. Na faailoa mai e le aposetolo o Paulo mea e fesoasoani iā i tatou ina ia manumalo ai i le tuuga. Na ia apoapoaʻi mai ina ia ʻtuu ese mea mamafa uma, ae ia taufetuli ma le onosaʻi i le tuuga o loo i o tatou luma.’ Pe na uiga atu Paulo e leai se avega e tatau ona tauave e se Kerisiano? E leai. E lē o le uiga lenā o lana faamatalaga. Nai lo o lea, na ia uiga atu e manaʻomia ona tuu ese so o se mea mamafa e lē manaʻomia. O na mea mamafa e mafai ona faalavelavea ai i tatou, ma iʻu ai ina tatou faavaivai. Ina ia tatou tumau, ia vave ona mātau ma lafoaʻia mea mamafa e lē manaʻomia e ono faalavelave iā i tatou. Ae i le taimi e tasi, e tatou te lē mananaʻo e tuu ese ai ma avega e tatau ona tatou tauaveina ina neʻi o tatou lē agavaa ai i le tuuga.—2 Timo. 2:5. w23.08 26 ¶1-2

O le magafagafa, e fesoasoani iā i tatou e faaaloalo ai i manatu o isi. O se faataʻitaʻiga, e fiafia nisi tuafāfine e faaaogā vali e faaaulelei ai, ae o isi e lē fiafia ai. E fiafia nisi Kerisiano e inu le ʻava malosi ae fuafua lelei, ae o isi e filifili e lē inu. E naunau Kerisiano uma ina ia maua le soifua mālōlōina, ae e eseese auala e latou te filifilia e faatumauina ai lo latou soifua mālōlōina. Pe afai e tatou te maumaututū i a tatou lava filifiliga ma taumafai e faamalosia isi e talia, e mafai ona tausuai ai isi ma faatupu ai fevaevaeaʻiga. (1 Kori. 8:9; 10:​23, 24) O se faataʻitaʻiga, nai lo o le aumaia e Ieova o ni tulafono maʻoti i le auala e tatou te laʻei ai, ae ua ia aumaia mataupu silisili e tatou te mulimuli i ai. E manaʻomia ona tatou laʻei i se auala talafeagai mo se auauna a le Atua, e faailoa atu ai e tatou te magafagafa, onomea, ma “mafaufau lelei.” (1 Timo. 2:​9, 10) O lea, e tatou te lē mananaʻo e soona faauaʻi mai tagata iā i tatou ona o le auala e tatou te laʻei ai. E fesoasoani foʻi mataupu silisili o le Tusi Paia i toeaina, e ʻalofia ai le faia o ni tulafono i ofu ma le auala e teu ai ulu. w23.07 23 ¶13-14

Ua fesoasoani mai Ieova iā i tatou ina ia maua se lumanaʻi fiafia. O ē e talia le valaaulia a le “fafine valea” ma malomaloā, e latou te taulaʻi atu i le “suamalie” o amioga lē mamā. O lo latou iʻuga o loo “i mea maulalo o le Tuugamau.” (Faata. 9:​13, 17, 18) Peitaʻi, e ese le iʻuga e oo iā i latou e talia le valaaulia mai le “atamai moni.” (Faata. 9:1) Ua aʻoaʻoina i tatou e naunau i mea e fiafia i ai Ieova, ae ʻinoʻino i mea e na te inosia. (Sala. 97:10) E tatou te maua le faamalieina i le valaaulia o isi ina ia maua aogā mai i le “atamai moni.” E peiseaʻī o loo tatou “valaau atu mai i mea maualuluga i luga aʻe o le aai: ʻO se tasi e leai se poto masani, ia afe mai i inei.’” O aogā e tatou te maua faapea foʻi ma isi e talia le valaaulia, e tumau e faavavau. O le a mafai ai ona tatou “ola” e faavavau a o tatou “savavali saʻo i le ala o le malamalama.”—Faata. 9:​3, 4, 6. w23.06 24 ¶17-18

O ā ni ou faalogona pe a fesiligia oe e se tasi e lua te faigaluega pe aʻoʻoga faatasi e faatatau i ou talitonuga? Pe e te lagona le popole? O le toʻatele o i tatou e oo i ai lenā faalogona. Ae atonu o lenā fesili e ono fesoasoani iā i tatou e malamalama ai i manatu po o talitonuga o lenā tagata, ma tatou maua le avanoa e talaʻi atu ai. Peitaʻi, i nisi taimi atonu e fai mai ai e se tasi se fesili e ono amata ai se finauga. E masani ona tupu lenā mea, ona o faamatalaga sesē na latou faalogo i ai e faatatau i o tatou talitonuga. (Galu. 28:22) E lē gata i lea, o loo tatou ola i “aso e gata ai,” lea e toʻatele i latou “e mumusu i maliega” ma “sauā.” (2 Timo. 3:​1, 3) E te ono fesili ifo, ʻE faapefea ona ou tali atu ma le filemu pe a luʻia e se tasi oʻu talitonuga?’ O le ā e fesoasoani iā te oe? O le agamalu. O se tagata e agamalu e lē itaitagofie, ae e mafai ona pulea o ia lava pe a faatigā mai se tasi pe lagona foʻi le lē mautonu. w23.09 14 ¶1-2

E iai taimi e tatou te maua ai fautuaga e puipuia ai i tatou mai i le manaʻo tele i meafaitino, ma isi mea e iʻu atu ai i le solia o tulafono a le Atua. Ua tatou maua foʻi aogā i le mulimuli i taʻiala ua saunia mai e Ieova. (Isa. 48:​17, 18; 1 Timo. 6:​9, 10) E mautinoa e faaauau ona faaaogā e Ieova tagata, e saunia mai taʻitaʻiga i le taimi o le puapuaga tele ma le Pulega i le Afe Tausaga. Po o le a faaauau ona tatou mulimuli i na taʻiala? E faalagolago lenā vala i le auala e tatou te tali atu ai i le taʻitaʻiga ua saunia mai e Ieova i le taimi lenei. O lea, ia tatou mulimuli pea i le taʻitaʻiga a Ieova, e aofia ai taʻiala ua saunia mai e tane ua tofia e leoleoina i tatou. (Isa. 32:​1, 2; Epe. 13:17) A o tatou faia faapea, ua tatou maufaatuatuaina atoatoa Ieova o Lē e taʻitaʻia ese i tatou mai i lamatiaga faaleagaga, ae taʻitaʻia atu i le ola e faavavau i le lalolagi fou. w24.02 25 ¶17-18

Na fiafia le aposetolo o Paulo i lana auaunaga iā Ieova, ae na ia feagai foʻi ma le tele o luʻi. Na masani ona ia faimalaga i nuu mamao, ma e leʻi faigofie faigāmalaga i na aso. O se faaaʻoaʻoga, sa “lamatia [o ia] i vaitafe” ma “lamatia i tagata faomea.” Na iai foʻi taimi na sauāina ai o ia e tagata tetee. (2 Kori. 11:​23-27) E lē o taimi uma foʻi na talisapaia ai e ona uso Kerisiano ana taumafaiga maumauaʻi e fesoasoani iā i latou. (2 Kori. 10:10; Fili. 4:15) O le ā na fesoasoani iā Paulo ina ia auauna ai pea iā Ieova? E tele mea na ia aʻoaʻoina e faatatau i uiga o Ieova mai i Tusitusiga Paia, ma mea na tutupu i lona olaga. Na mautinoa e Paulo e alofa Ieova le Atua iā te ia. (Roma 8:​38, 39; Efe. 2:​4, 5) Na matuā alofa foʻi Paulo iā Ieova. Na ia faaalia lenā alofa e ala i le ʻauauna i le ʻaupaia, ma auauna pea i ai.’—Epe. 6:10. w23.07 9 ¶5-6

E toʻatele i latou e faapea mai e manaʻomia e tagata pulega a malo, ma e tatau ona usitaʻia nisi o tulafono e faia e nei “faipule silisili.” Ae atonu e faatalatū na tagata e usitaʻia se tulafono e lē fiafia i ai pe e manatu e lē talafeagai. O loo taʻua i le Tusi Paia, o loo pulea e Satani faigāmalo a tagata lea e māfua ai mafatiaga, ma ua toeitiiti ona faaumatia lea. (Sala. 110:​5, 6; Fai. 8:9; Luka 4:​5, 6) O loo taʻua foʻi i le Tusi Paia “o so o se tasi e tetee i le pule, ua tetee o ia i le faatulagaga a le Atua.” O lo tatou usiusitaʻi i faipule silisili, o se vaega lea o le faatulagaga lē tumau a Ieova e puipuia ai i tatou. O lea la, e tatau ona tatou “avatu i [faipule silisili] uma mea e tatau iā i latou,” e aofia ai le totogiina o lafoga, faaalia o le faaaloalo, ma le usiusitaʻi. (Roma 13:​1-7) Atonu e faigatā ona tatou usiusitaʻi i se tulafono e tatou te manatu e lē talafeagai, e faasāsā naʻuā, ma e tele tupe e alu ai. Ae e tatou te usiusitaʻi iā Ieova, ma ua ia faatonuina i tatou e usiusitaʻi i na faipule silisili seʻi vaganā ua latou faatonuina i tatou e solia ana poloaʻiga.—Galu. 5:29. w23.10 8 ¶9-10

E fanau mai Samasoni o loo pule ma le sauā tagata Filisitia i le nuu o Isaraelu. (Faama. 13:1) O la latou pulega sauā, na matuā mafatia ai tagata Isaraelu. Na filifilia e Ieova Samasoni “e taʻimua i le faaolaina o Isaraelu mai i lima o tagata Filisitia.” (Faama. 13:5) Ina ia faataunuu lenā tofiga, e manaʻomia ona faalagolago Samasoni iā Ieova. I se tasi taimi, na sauni ai se ʻautau a Filisitia e puʻe Samasoni i le vaipanoa o Leʻi i Iuta. O le fefefe o tane o Iuta na latou filifili ai e tuuina atu Samasoni i tagata Filisitia. O lea, na latou saisaia ai Samasoni i maea fou e lua ma tuuina atu o ia i o latou fili. (Faama. 15:​9-13) Peitaʻi, na ʻosofia Samasoni e le agaga o Ieova’ ma matala ese ai maea na saisai ai ona lima. Ona ia “maua lea o le ivi auvae fou o le asini poʻa,” ma fasiotia ai tagata e toʻa 1,000 o Filisitia.—Faama. 15:​14-16. w23.09 2-3 ¶3-4

O loo faasolosolo ona faailoa mai e Ieova lona “finagalo e faavavau” i le Tusi Paia! Po o le ā lava le tulaga, ae e taulau pea Ieova ona ua ia ʻsaunia mea uma ina ia faataunuu ai lona finagalo.’ (Faata. 16:4) E tumau e faavavau mea e faia e Ieova. O le ā le finagalo o Ieova ma o ā fetuunaʻiga ua ia faia ina ia faataunuu ai? Na faailoa atu e le Atua i le uluaʻi ulugalii lona finagalo mo i laʻua. Na ia fetalai atu ina “ia fanafanau ma ia faatoʻateleina, ia tumu ai le lalolagi ma ia galueaʻiina, ia pule i . . . meaola uma” i le laueleele. (Kene. 1:28) Ina ua fouvale Atamu ma Eva ona oo mai ai lea o le agasala i tagata uma lava, ae e leʻi taofia ai le faataunuuina o le finagalo o Ieova. Na ia faia fetuunaʻiga ina ia faataunuu ai lona finagalo. E leʻi umi ae saunia e Ieova le Malo i le lagi e faataunuu lona finagalo mo tagata ma le lalolagi.—Mata. 25:34. w23.10 20 ¶6-7

E mafai ona fesoasoani Ieova iā i tatou ina ia finafinau pea. Atonu e faigatā ona tatou faia faapea, aemaise pe afai ua umi ona tatou tauivi ma se vaivaiga. Atonu e iai taimi e tatou te manatu ai e faigatā atu o tatou vaivaiga nai lo o vaivaiga na tauivi ma le aposetolo o Peteru. Ae e mafai ona foaʻi mai e Ieova le malosi e tatou te faaauau ai pea. (Sala. 94:​18, 19) O se faataʻitaʻiga, na ola se tasi o uso i se olaga faatauatane mo le tele o tausaga a o leʻi aʻoaʻoina le upu moni. Ae na maumauaʻi o ia e tuulafoaʻia lenā olaga lē mamā. E ui i lea, e iai taimi na tauivi ai lenā uso ma tuʻinanauga sesē. O le ā na fesoasoani iā te ia ina ia finafinau ai pea? Na ia faapea mai: “E fesoasoani mai Ieova iā te aʻu.” Na ia faapea atili mai: “O le agaga o Ieova . . . , ua mafai ai ona ou ola pea i le upu moni . . . Ua mafai ona faaaogā aʻu e Ieova ma e faaauau ona ia faamalosia aʻu e ui i oʻu vaivaiga.” w23.09 23 ¶12

Uso talavou, e lē otometi ona avea outou ma Kerisiano taʻumatuaina. E manaʻomia ona outou mātauina ni faaaʻoaʻoga lelei e mulimuli i ai, atiaʻe le mafaufau lelei, ia maufaatuatuaina, aʻoaʻoina tomai aogā, ma sauniuni mo tiute tauave i le lumanaʻi. E iai taimi atonu e te lagona ai le lotovaivai, pe a mafaufau i le tele o mea e manaʻomia ona e faia i le lumanaʻi. Peitaʻi, e mafai ona e taulau. Ia manatua, e matuā naunau Ieova e fesoasoani mai iā te oe. (Isa. 41:​10, 13) E mafai foʻi ona fesoasoani atu iā te oe uso ma tuafāfine o le faapotopotoga. Pe a oo ina avea oe ma Kerisiano taʻumatuaina, o le a e maua se olaga fiafia ma faamalieina. E matou te alolofa tele iā te outou uso talavou. Tau ina ia faamanuia Ieova iā te outou a o outou galulue e avea o ni Kerisiano taʻumatuaina! w23.12 29 ¶19-20

Seʻi faapea o loo outou olioli faatasi ma uso ma tuafāfine i se faatasiga, ma na e puʻeina se tou ata ina ua uma le faatasiga. Peitaʻi, na e puʻeina isi ata e lua ina neʻi lē lelei le ata na puʻe muamua. O lea, e tolu ata ua e puʻeina. Ae ua e mātauina i se tasi o na ata, e iai se uso e lē o ʻata. E mautinoa e te tapēina ese, auā e iai isi ata e lua o loo ʻata ai le uso. E faatusaina na ata i mea lelei, e tatou te manatua ai o tatou uso ma tuafāfine i taimi na tatou faatasitasi ai. Sei faapea o se tasi ona faatasiga, na fai ai e se uso po o se tuafafine se tala po o se gaoioiga na e lē fiafia ai. O le ā e tatau ona e faia? (Efe. 4:32) E tatau ona e faagalo lenā tala po o lenā gaoioiga, e tai pei o le tapē ese o se ata e lē manaia. E mafai ona tatou faagalo lenā mea sesē, ona e tele mea lelei e tatou te manatua ai lenā uso po o lenā tuafafine i taimi na tatou faatasitasi ai. O mea lelei na e tatou te mananaʻo e manatua pea ma faapelepele i ai. w23.11 12 ¶16-17

O upu Eleni o loo faaaogāina i lenei mau, e uiga atu i le manaʻomia e se tuafafine Kerisiano ona laʻei i se auala faaaloalo ma faaalia le manatu mamafa i faalogona o isi. E mautinoa lo tatou mitamita i tuafāfine Kerisiano taʻumatuaina e laʻei i se auala onomea. O se isi uiga tāua e ao i tuafāfine Kerisiano taʻumatuaina ona atiaʻe, o le faautaga loloto. O le ā le faautaga loloto? O le faia o se filifiliga lelei po o le iai o le tomai e iloa ai le mea saʻo ma le mea sesē, ona filifili lea o le ala atamai. Seʻi mafaufau i le faaaʻoaʻoga a Apikaila. Na faia e lana tane se filifiliga leaga na ono oo ai se mala i lona aiga atoa. Peitaʻi, na vave ona gaoioi Apikaila, ma o le faautaga loloto na ia laveaʻia ai o latou ola. (1 Samu. 25:​14-23, 32-35) O le faautaga loloto foʻi e tatou te iloa ai le taimi e tautala ai ma le taimi e filemu ai. E fesoasoani foʻi lenei uiga iā i tatou, e maua ai le vaaiga paleni pe a faaalia le naunau moni i isi.—1 Tesa. 4:11. w23.12 20 ¶8-9

Na tusi atu e le aposetolo o Paulo na upu i le faapotopotoga i Roma. Na aʻoaʻoina le ʻauuso i inā i mea e faatatau iā Ieova ma Iesu, faaalia le faatuatua, ma avea i latou ma Kerisiano. O lea, na “taʻuamiotonuina” i latou e le Atua “ona o le faatuatua,” ma faauuina i latou i le agaga paia. (Roma 5:1) Ioe, sa latou maua se faamoemoe matagofie ma mautinoa. Mulimuli ane na tusi atu Paulo i Kerisiano faauuina i Efeso, e faatatau i le faamoemoe na valaauina ai i latou. O lenā faamoemoe e aofia ai le mauaina o le “tofi mo le ʻaupaia.” (Efe. 1:18) Na faailoa atu foʻi e Paulo i Kerisiano i Kolose po o fea e maua ai lo latou faamoemoe, e ala i le faapea atu “o le faamoemoe ua teuina mo outou i le lagi.” (Kolo. 1:​4, 5) O le faamoemoe la mo Kerisiano faauuina, o le faatutūina lea o i latou i le ola e faavavau i le lagi e pule faatasi ai ma Keriso.—1 Tesa. 4:​13-17; Faaa. 20:6. w23.12 9 ¶4-5

O le upu i le uluaʻi gagana mo le “leoleoina,” o se upu sa faaaogā e vaegaʻau. Sa faasino atu i fitafita e leoleoina se aai mai i osofaʻiga. Na momoe saogalemu tagata o le aai ona na latou iloa o loo leoleo e fitafita faitotoʻa o le aai. I se tulaga talitutusa, pe a leoleoina o tatou loto ma mafaufau i le filemu mai i le Atua, o le a tatou lagona le toʻafilemu ma le malupuipuia. (Sala. 4:8) E pei o Hana, e tusa pe e lē suia faafuaseʻi o tatou tulaga, ae e tatou te lagona lava le toʻafilemu. (1 Samu. 1:​16-18) Pe a tatou lagona foʻi le toʻafilemu, e faigofie ona tatou mafaufau lelei ma faia filifiliga atamai. O le ā e mafai ona tatou faia? Pe a tatou aafia i faafitauli, ia valaau atu i leoleo i se uiga faafaatusa. E faapefea? Ia tatalo seʻia oo ina tatou lagona le filemu mai i le Atua. (Luka 11:9; 1 Tesa. 5:17) Pe a e feagai ma se faafitauli, ia finafinau i le tatalo, ona e maua lea o le filemu o Ieova lea e leoleoina ai lou loto ma le mafaufau.—Roma 12:12. w24.01 21 ¶5-6

Na onosaia e Iesu puapuaga, taufaifaiga, ma tuuaʻiga sesē uma faasaga iā te ia, ina ia faapaia ai le suafa o lona Tamā. E leʻi iai se mea e māsiasi ai o ia, auā na ia iloa sa ia usiusitaʻi i lona Tamā i mea uma. (Epe. 12:2) Na ia iloa foʻi sa osofaʻia tuusaʻo o ia e Satani i lenā taimi faigatā. (Luka 22:​2-4; 23:​33, 34) E mautinoa sa naunau Satani ina ia lē faamaoni Iesu. Peitaʻi, e leʻi taulau ana taumafaiga. Na faamaonia atoatoa e Iesu le pepelo taufaaleaga o Satani, ma e iai auauna faamaoni a Ieova o loo tutumau e ui i tofotofoga ogaoga. Pe e te manaʻo e faafiafia lo tatou Tupu tofia? Ia faaauau ona vivii i le suafa o Ieova, ma fesoasoani i isi ina ia iloa lelei lo tatou Atua. O le faia faapea, ua e mulimulituʻi ai i tulaga aao o Iesu. (1 Pete. 2:21) E pei lava o Iesu, o le a e faafiafiaina Ieova ma faamaonia atu le matuā pepelo o Lona fili o Satani. w24.02 11 ¶11-13

A o faagasolo le lima tausaga ua mavae, e silia i le tasi miliona tagata ua papatisoina e avea ma Molimau a Ieova. Pe a tuuina atu oe iā Ieova, ua e filifili ai e avea ma soo o Iesu Keriso, ma faamuamua i lou olaga le faia o le finagalo o le Atua. O ā mea e aofia ai i lou tuuina atu o se Kerisiano? Na fetalai Iesu: “A fia mulimuli mai se tasi iā te aʻu, ia faafitia e ia o ia lava.” (Mata. 16:24) I le avea ai o oe o se auauna tuuina atu a Ieova, e manaʻomia ona e teena so o se mea e feteenaʻi ma lona finagalo. (2 Kori. 5:​14, 15) E aofia ai le teena o “galuega a le tino” e pei o amioga lē mamā taufeusuaʻiga. (Kala. 5:​19-21; 1 Kori. 6:18) Pe e faigatā ona usitaʻia na poloaʻiga? E lē faigatā pe afai e te alofa iā Ieova, ma mautinoa o ana poloaʻiga e mo lou lava lelei.—Sala. 119:97; Isa. 48:​17, 18. w24.03 2 ¶1; 3 ¶4

E foaʻi mai e Ieova lona agaga paia iā i latou e finagalo malie i ai. (Mata. 12:18) Ia fesili ifo, ʻPo o oʻu faaalia se vala o le fua o le agaga o le Atua i loʻu olaga?’ Po ua sili atu ona e onosaʻi i le taimi lenei nai lo o le taimi faatoʻā e aʻoaʻoina ai e faatatau iā Ieova? O le tele lava e te faaalia ai le fua o le agaga o le Atua, o le atili foʻi lenā ona e mautinoa o loo finagalo malie Ieova iā te oe. E faatatau e Ieova le tāua o le togiola iā i latou e finagalo malie i ai. (1 Timo. 2:​5, 6) Ae e faapefea pe afai e tatou te lē talitonu e finagalo malie Ieova iā i tatou, e tusa po ua tatou papatiso ma faatuatua i le togiola? Ia manatua, e lē o taimi uma e tatou te faatuatuaina ai i tatou lava, ae e mafai ona tatou maufaatuatuaina Ieova. E silasila o ia iā i latou e faatuatua i le togiola o ni ē e amiotonu, ma ua ia folafola mai e na te faamanuiaina i latou.—Sala. 5:12; Roma 3:26. w24.03 30 ¶15; 31 ¶17