Ia Tuliloaina le Tuutoina i le Atua o ni Kerisiano ua Papatisoina

“A o oe, le tagata o le Atua e, . . . ia tuliloaina le amiotonu, le tuutoina i le Atua.”—1 TIMOTEO 6:11, “NW.”

1. O le a faapefea ona e taliina le fesili, O le ā le aso aupito sili ona tāua i lou olaga? Aiseā ua e tali mai ai faapea?

O LE Ā le aso e aupito sili ona tāua i lou olaga? Afai o oe o se Molimau a Ieova ua papatisoina, e aunoa ma se masalosalo o le a e tali mai, ‘Ioe, o le aso na ou papatiso ai!’ E mautinoa lava, o le papatisoga o se laasaga aupito sili ona tāua i lou olaga. O se faailoga vaaia e faailoa atu ai ua uma ona e faia se tuuina atu atoatoa ma le lē mataofiofia ia Ieova e faia lona finagalo. O lou papatisoga ua faailogaina ai le aso o lou faauuga e avea o se faifeau a le Atua e Silisili ona Maualuga, o Ieova.

2. (a) E mafai faapefea ona faataʻitaʻia faapea o le papatisoga e lē o le laasaga mulimuli lea e te faia i lou ala faa-Kerisiano? (e) O ā laasaga tāua muamua na e faia a o e leʻi papatiso?

² E ui i lea, pe o le papatisoga o le laasaga mulimuli lea e te faia i lou ala faa-Kerisiano? E leai lava! O se faataʻitaʻiga: I le tele o atunuu o le sauniga o se faaipoipoga ua faailogaina ai le iʻuga o se vaitaimi o ni fuafuaga ma ni sauniuniga (ma e masani lava o evaga). I le taimi lava foi lea, ua faailogaina ai le amataga o se olaga nonofo faatasi e avea o se ulugalii faaipoipo. E faapena foi la lou papatisoga, o le faatumutumuga o se vaitaimi o sauniuniga lea na e fai ai le tele o ni laasaga tāua muamua. Na e maua ai le poto e uiga i le Atua ma Keriso. (Ioane 17:3) Na amata ai ona e faatinoina le faatuatua ia Ieova o le Atua moni, ia Keriso o lou Faaola, ma i le Tusi Paia o le Afioga lea a le Atua. (Galuega 4:12; 1 Tesalonia 2:13; Eperu 11:6) Na e faatinoina lena faatuatua ina ua e salamō mai uluai auala o au gaoioiga ma faaliliuina ai oe i se ala amiotonu. (Galuega 3:19) Ona e faia ai lea o se filifiliga e tuuina atu oe lava ia Ieova e faia lona finagalo. (Mataio 16:24) Mulimuli ane, ua e papatiso.—Mataio 28:19, 20.

3. (a) E mafai faapefea ona tatou faataʻitaʻia faapea o lo tatou papatisoga ua faailogaina ai le amataga o se olaga o le auaunaga tuuina atu i le Atua? (e) O ā fesili ua mapuna aʻe, ma aiseā ua avea ai tali o mea tatou te naunau fiafia i ai?

³ E ui lea, o lou papatisoga, e lē o le iʻuga ae o le amataga o se olaga o le tuuina atu o le auaunaga paia i le Atua. E pei ona matauina ai e se tasi tagata aʻoga o le Tusi Paia, faapea e lē tatau i le olaga faa-Kerisiano ona ‘tiotio ma aasa i le uluai taimi, ae mulimuli ane faavaivai ma lē toe gaoioi.’ E mafai la faapefea ona e faatinoina e tusa ai ma lou tulaga, lena mea faapea o le papatisoga e lē na ona ‘tiotio ma aasa i le uluai taimi’? E ala lea i le tuliloaina o se olaga mo le taimi atoa o le tuutoina i le Atua. O le ā lenei tuutoina i le Atua? Aiseā e tatau ai ona tuliloaina? E mafai faapefea ona e atiina aʻe lea mea i se tulaga e sili i lou olaga? O tali e tatau ona avea o ni mea e faafiafiaina ai i tatou, auā e tatau ona avea i tatou o ni tagata e mataulia e ala i “galuega o le tuutoina i le Atua” pe afai tatou te mananao ia faasaoina mai le aso o le faamasinoga a Ieova ua lata tele mai.—2 Peteru 3:11, 12, NW.

Le Uiga o le Tuutoina i le Atua

4. O le ā na fautuaina ai e Paulo Timoteo e faia, ma o le ā na moni e uiga ia Timoteo i le taimi lea?

⁴ I se taimi i le va o le 61 ma le 64 T.A., na tusi ai e le aposetolo o Paulo lana uluai tusi faagaeeina i le soʻo Kerisiano o Timoteo. Ina ua uma ona faamatalaina mataʻutia e mafai ona taʻitaʻiina atu i ai e le manao tele i tupe, na tusi Paulo: “A o oe, le tagata o le Atua e, ia e sola ese i ia mea. A ia tuliloaina le . . . tuutoina i le Atua.” (1 Timoteo 6:9-11, NW) E fiafia lava, ona i le taimi lea atonu po ua 30 ma ona tupu tausaga o Timoteo. E tele mea sa ia malaga atu i ai ma le aposetolo o Paulo ma na tuuina atu ai ia te ia le pule e tofia ai ovasia ma auauna o le faiva i faapotopotoga. (Galuega 16:3; 1 Timoteo 5:22) Peitai, na fautuaina e Paulo lenei tagata Kerisiano taʻumatuaina tuuina atu ma papatisoina, ina ia tuliloaina le tuutoina i le Atua.

5. O le ā le uiga o le faaupuga “tuutoina i le Atua”?

⁵ O le ā na uiga i ai Paulo e ala i le faaupuga “tuutoina i le Atua”? O le uluai upu Eleni (eu·seʹbei·a) e mafai ona faaliliuina moni o le “migao lelei.” E tusa ai ma lona uiga, ua tatou faitau ai: “I nisi taimi e aliaʻi mai ai le upu eusebeia i se uiga ua faaalia ai le tuutoina totino faalotu i tusitusiga i lena vaitaimi . . . ae o lona uiga e sili atu ona taatele i le faa-Eleni lauiloa i le vaitaimi o Roma, o le ‘faamaoni.’ . . . Mo Kerisiano, o le eusebeia o se ituaiga aupito sili ona maualuga o le tuutoina i le Atua.” (Christian Words, a Nigel Turner) O lea e pei ona faaaogāina i Tusitusiga Paia, o le faaupuga “tuutoina i le Atua” o loo faasino atu i le migao po o le tuutoina faatasi ma le faamaoni totino ia Ieova le Atua.

6. E faapefea ona tuuina atu e se Kerisiano le faamaoniga o lona tuutoina i le Atua?

⁶ E ui i lea, o lenei tuutoina i le Atua, ua lē na o se faalogona faaletapuaiga. E pei o le “faatuatua ua mate pe a leai ni galuega,” ua faapea foi, o le tuutoina i le Atua e tatau ona faatinoina i le olaga o se tagata. (Iakopo 2:26) I le tusi New Testament Words, na tusi ai William Barclay: “E lē gata ina faamatalaina e le [eu·seʹbei·a ma upu o loo fesootai ai] lena faalogona o le gatete ma le migao, ae ua latou faaalia ai foi se tapuaiga lea ua fetaui ma lena gatete, ma se olaga o le usiusitai tiotio lea ua fetaui ma lena migao.” Ua faamatalaina atili le eu·seʹbei·a e faapea “o le matuā iloa lelei o le Atua i gaoioiga i so o se vala o le olaga.” (The Second Epistle General of Peter and the General Epistle of Jude, a Michael Green) O lea, e tatau ai i le Kerisiano ona tuuina atu se faamaoniga o lona pipii totino atu ia Ieova e ala i le auala o ola ai lona olaga.—1 Timoteo 2:2; 2 Peteru 3:11.

Manaomia Taumafaiga Fitā

7. O le ā na uiga i ai Paulo ina ua ia uunaia Timoteo, e ui lava ua uma ona papatisoina o ia, ina ia “tuliloaina” le tuutoina i le Atua?

⁷ E ui i lea, o le ā ua aofia i le atiina aʻe ma i le faaalia o le tuutoina i le Atua? Pe ua na o se mataupu ea e oo ai ina papatisoina? Ia manatua Timoteo, e ui lava ina ua uma ona papatisoina, ae sa uunaia ina ia “tuliloaina [i le uiga moni, ‘ia e tuliloa pea’]” i ai.a (1 Timoteo 6:11, Kingdom Interlinear) E manino lava, sa leʻi manatu Paulo faapea sa lē lava le tuutoina i le Atua a le soʻo o Timoteo. Na i lo o lea, sa ia faamamafa atu ia te ia le manaomia ona faaauau ona tuliloa i ai faatasi ma le naunautai ma le maelega. (Faatusatusa Filipi 3:14.) E manino lava, sa o se tuliloaga lenei mo le olaga atoa. Sa mafai e Timoteo ona faaauau ona agaʻigaʻi i luma i le faaalia o le tuutoina i le Atua e pei o isi Kerisiano uma papatisoina.

8. Na faaalia faapefea e Peteru faapea e manaomia taumafaiga fitā mo se Kerisiano tuuina atu ma papatisoina ina ia tuliloaina ai le tuutoina i le Atua?

⁸ E manaomia taumafaiga fitā mo se Kerisiano tuuina atu ma papatisoina ina ia tausisia ai le tuutoina i le Atua. I lana tusi atu i Kerisiano papatisoina o ē na iai le faamoemoe o le ‘tofusia faatasi i uiga tauatua,’ na faapea atu ai le aposetolo o Peteru: “O le mea lava lea ia outou matuā faamalosi ai lava, ina ia faaopoopoina le amio lelei i lo outou faatuatua, ia faaopoopo foi le poto i le amio lelei, ia faaopoopo foi le le gaoiā i le poto, ma ia faaopoopo le onosai i le le gaoiā, o le [tuutoina i le Atua, NW] foi i le onosai.” (2 Peteru 1:4-6) E manino lava, o se fua o le faatuatua e manaomia ina ia tuuina atu ai i tatou lava mo le papatisoga. Ae peitai, mulimuli ane ai pe a uma le papatisoga e lē mafai ona tatou faaseesee e aunoa ma ni taumafaiga, i le faamalieina o i tatou lava i le na o sina lagona faa-Kerisianoina. Na i lo o lea, a o tatou agaʻigaʻi i luma i le olaga faa-Kerisiano, e manaomia ona tatou faaauau le atiina aʻe o isi uiga lelei, e aofia ai le tuutoina i le Atua, lena e mafai ona faaopoopo atu i lo tatou faatuatua. O le mea lenei ua fai mai Peteru ia faia i ai ni taumafaiga faatauanau i la tatou vaega.

9. (a) Ua faataʻitaʻia faapefea e le upu Eleni mo le “faaopoopo” le maualuga o le tulaga o taumafaiga manaomia ina ia atiina aʻe le tuutoina i le Atua? (e) O le ā o loo uunaia i tatou e Peteru e faia?

⁹ O le upu Eleni ua faaaogāina e Peteru mo le “faaopoopo” (e·pi·kho·re·geʹo) e iai sona talaaga lelei ma ua faataʻitaʻia ai le maualuga o taumafaiga e tatau ai. E sau mai le nauna (kho·re·gosʹ) o lona uiga moni “o le taʻitaʻi o se aufaipese.” Ua faasino atu i se tasi o lē na te totogiina tupe faaalu uma o le toleniga ma le tausia o se aufaipese i le faatinoina o se tala. O tagata faapena latou te tauofo i le faia o lenei tiute tauave ona o le alofa mo lo latou aai ma totogiina tupe faaalu mai i a latou lava tupe. Sa o le mimita o na tagata na faaaluina ai le anoanoai o a latou lava mea e saunia ai mea uma ua manaomia mo se faaaliga mamalu. Na tupu aʻe le upu ma uiga ai e faapea “ia faaopoopo, ia matuā anofalea.” (Faatusatusa 2 Peteru 1:11.) O lea ua uunaia ai i tatou e Peteru ina ia faaopoopo mai ia i tatou, e lē gata i le na o sina fua o le tuutoina i le Atua, ae o se faaupuga sili ona atoatoa ua mafai ona faia mo lenei uiga tautele.

10, 11. (a) Aiseā e manaomia ai taumafaiga ina ia atiina aʻe ma faaalia le tuutoina i le Atua? (e) E mafai faapefea ona tatou manumalo i le tauiviga?

¹⁰ E ui i lea, aiseā ua manaomia ai sea taumafaiga ina ia atiina aʻe ma faaalia le tuutoina i le Atua? Mo le mea e tasi, ona o loo iai se tauiviga faasaga i le tino agasala. Talu ai ona ua “leaga o manatu o loto o tagata e afua mai ina o tama iti,” ua lē faigofie ai ona tuliloaina se olaga o le usiusitai ma le tiotio i le Atua. (Kenese 8:21; Roma 7:21-23) “O i latou uma foi o e loto ina nonofo ma le [tuutoina i le Atua, NW] ia Keriso Iesu, e sauaina i latou,” ua fai mai ai le aposetolo o Paulo. (2 Timoteo 3:12) Ioe, o se Kerisiano o lē e taumafai e ola i se auala e faafiafia ai le Atua e tatau ona tuese mai le lalolagi. E ese ana tulaga ma e ese foi ona sini. E pei ona sa lapatai Iesu, o lenei mea e faatupuina ai le inoino o le lalolagi leaga.—Ioane 15:19; 1 Peteru 4:4.

¹¹ Ae peitai, e mafai ona tatou manumalo i le tauiviga, auā “ua silafia e Ieova le auala e laveaiina ai tagata o ē tuutoina i le Atua mai tofotofoga.” (2 Peteru 2:9, NW) E ui i lea, e tatau ona faia la tatou vaega e ala i le faaauau pea ona tuliloaina le tuutoina i le Atua.

Atiina aʻe le Tuutoina i le Atua

12. Ua faapefea ona faaalia e Peteru le mea ua manaomia e atiina aʻe ai le tuutoina i le Atua i se fua sili?

¹² E mafai la faapefea ona e atiina aʻe lenei tuutoina i le Atua i se fua e sili atu? Ua saunia e le aposetolo o Peteru le tali. I le 2 Peteru 1:5, 6, ina ua lisiina mai uiga e tatau ona faaopoopo atu i lo tatou faatuatua, ua ia lisiina mai ai le poto e muamua atu i le tuutoina i le Atua. Muamua lava i le mataupu lava lenei, na ia tusi ai: “O lona mana tauatua ua tuuina mai ai ia te i tatou ma le saoloto mea uma lava e faatatau i le ola ma le tuutoina i le Atua, e ala i le poto saʻo e uiga i lē na valaauina i tatou.” (2 Peteru 1:3, NW) O lea ua faafesootai ai e Peteru le tuutoina i le Atua ma le poto saʻo e uiga ia Ieova.

13. Aiseā e matuā manaomia ai le poto saʻo i le atiina aʻe o le tuutoina i le Atua?

¹³ O le mea moni, a aunoa ma le poto saʻo e lē mafai ona atiina aʻe le tuutoina i le Atua. Aiseā? Ia, ia manatua o le tuutoina i le Atua e faia totino agaʻi ia Ieova ma e faaalia lea i le auala o loo ola ai o tatou olaga. O lea ua matuā manaomia ai le poto saʻo e uiga ia Ieova, talu ai o loo aafia ai le oo ina iloa totino o ia, i se uiga loloto, ia matuā faamasani i ona uiga ma ona ala. E sili atu i lena, e aafia ai le tauivi ina ia faaaʻoaʻo ia te ia. (Efeso 5:1) O le tele tatou te agaʻigaʻi ai i luma i le aʻoaʻoina e uiga ia Ieova ma i le faaataina o ona ala ma ona uiga i o tatou olaga, o le sili foi lea ona oo ina tatou iloa lelei o ia. (2 Korinito 3:18; faatusatusa 1 Ioane 2:3-6.) I se isi itu, o lenei mea e iʻu ai i le talisapaia loloto mo uiga tautele o Ieova, i se fua sili o le tuutoina i le Atua.

14. Ina ia maua le poto saʻo, o le ā e tatau ona aofia ai i la tatou polokalama o suesuega totino, ma aiseā?

¹⁴ E mafai faapefea ona e maua lea poto saʻo? E leai ni auala vave. Ina ia maua le poto saʻo, e tatau ona tatou filigā i le suesueina o le Afioga a le Atua ma lomiga e faavae i le Tusi Paia. O lena suesuega totino e tatau ona aofia ai se polokalama o le faitauina e lē aunoa o le Tusi Paia, e pei ona faia e tusa ai ma le Aʻoga o le Faiva Faatiokarate. (Salamo 1:2) Talu ai o le Tusi Paia o se meaalofa mai ia Ieova, o le mea la tatou te faia e auala i suesuega totino faale-Tusi Paia o se ata lea o le tele o loo tatou talisapaia ai lena meaalofa. O le ā o faaalia e au masani o le faia o suesuega totino e uiga i le loloto o lou talisapaia mo sauniuniga faaleagaga a Ieova?—Salamo 119:97.

15, 16. (a) O le ā e mafai ona fesoasoani ia i tatou e atiina aʻe se mataʻai faaleagaga mo suesuega totino faale-Tusi Paia? (e) Afai ina ia iʻu ai le suesuega totino faale-Tusi Paia i le atiina aʻe o le tuutoina i le Atua, o le ā e tatau ona faia pe a faitauina se vaega o le Afioga a le Atua?

¹⁵ E ioeina faapea, o le faitau ma le suesue e lē faigofie mo nisi. Peitai i le faaalu ai o le taimi ma ni taumafaiga, e mafai ai ona e atiina aʻe se mataʻai faaleagaga mo suesuega totino faale-Tusi Paia. (1 Peteru 2:2) Pe a e manatunatu ma le talisapaia i mea uma ua faia, o loo faia, ma o le a faia e Ieova le Atua ona o oe, o le a uunaia ai oe e lou loto e aʻoaʻo mea uma e te mafaia e uiga ia te ia.—Salamo 25:4.

¹⁶ Ae afai o lea suesuega totino faale-Tusi Paia o le a iʻu i lou atiina aʻe o le tuutoina i le Atua, e lē mafai la e lou sini ona tau ina taumafai e ufitia itulau o mataupu po o le faatumuina o lou mafaufau i faamatalaga. Na i lo lea, pe a e faitauina se vaega o le Afioga a le Atua, e tatau ona e faaalu se taimi e toe mafaufau ai i le mataupu, i le fesili ifo ia te oe lava i ni fesili e pei o le: ‘O le ā ua ia aʻoaʻo mai ia te aʻu e uiga i uiga ma ala agamalu o Ieova? E mafai faapefea ona sili atu ona ou pei o Ieova i nei tulaga?’

17. (a) O le ā ua tatou aʻoaʻoina e uiga i le alofa mutimutivale o Ieova mai le tusi o Hosea? (e) E ao faapefea ona aafia i tatou i le toe manatunatu e uiga i le alofa mutimutivale o Ieova?

¹⁷ Manatu i se faaaʻoaʻoga. I se taimi ua mavae atu na oo atu ai la tatou faitau faatulagaina o le Tusi Paia i le Aʻoga o le Faiva Faatiokarate, i le tusi o Hosea. Ina ua uma ona faitauina o lenei tusi o le Tusi Paia, na e fesili ifo ai ia te oe lava: ‘O le ā ua ou aʻoaʻoina e uiga ia Ieova o se Peresona—ona uiga ma ona ala—mai lenei tusi?’ O le auala ua faaaogāina ai lenei tusi e tusitala mulimuli ane o le Tusi Paia ua faaalia ai faapea e tele mea ua tatou aʻoaʻoina ai e uiga i le alofa mutimutivale o Ieova mai le tusi a Hosea. (Faatusatusa le Mataio 9:13 ma le Hosea 6:6; Roma 9:22-26 ma le Hosea 1:10 ma le 2:21-23.) O le finagalo malie o Ieova e faaalia le alofa tunoa ia Isaraelu na faataʻitaʻia e ala i feutagaiga a Hosea ma lana avā o Komeri. (Hosea 1:2; 3:1-5) E ui lava sa taatele le faamasaatoto, le gaoi, le faitaaga, ma le ifo i tupua i Isaraelu, ae ‘sa fetalai atu Ieova i le loto o Isaraelu.’ (Hosea 2:13, 14; 4:2) Sa lē o se avega tauave a Ieova le faaalia o lea alofa tunoa ae o le a ia faia faapea ‘i lona lava finagalo malie,’ tau lava ina ia faaalia e tagata Isaraelu le salamō mai le loto ma liliuese mai o latou auala agasala. (Hosea 14:4; faatusatusa le Hosea 3:3.) A o e manatunatu i lenei auala i le alofa mutimutivale silisili o Ieova, o le a uunaia ai lou loto, ma faamalosia ai lou pipii totino atu ia te ia.

18. Ina ua uma ona toe manatunatu i le alofa mutimutivale o Ieova e pei ona faamamafaina mai e Hosea, o le ā atonu o le a e fesili ifo ai ia te oe lava?

¹⁸ E ui i lea, e tele atu mea e manaomia. “Amuia ē alolofa atu; auā e alofaina mai i latou,” na fetalai ai Iesu. (Mataio 5:7) O le mea lea, pe a uma ona manatunatu i le alofa tunoa o Ieova e pei ona faamamafaina mai i le tusi o Hosea, fesili ifo ia te oe lava: ‘E mafai faapefea ona sili atu ona lelei ona ou faaaʻoaʻo i le alofa tunoa o Ieova i a matou feutagaiga ma isi? Afai o se uso po o se tuafafine o lē ua faia se agasala faasaga ia te aʻu ua talosaga mai mo se faamagaloga, pe ou te faamagaloina ea “ma le loto fiafia”?’ (Roma 12:8; Efeso 4:32) Afai o loo e auauna i le faapotopotoga o se toeaina tofia, e mafai ona e fesili ifo ia te oe lava: ‘Pe a taulimaina mataupu faafaamasinoga, e mafai faapefea ona sili atu ona lelei ona ou faaaʻoaʻo ia Ieova, o lē e ‘nofo sauni e faamagalo,’ae maise lava pe afai e faaalia e lē ua faia le mea sese le salamō moni mai le loto?’ (Salamo 86:5; Faataoto 28:13) ‘O le ā e tatau ona ou vaavaai i ai mo se faavae e faalauteleina atu ai le alofa mutimutivale?’—Faatusatusa Hosea 5:4 ma le 7:14.

19, 20. (a) O ā iʻuga pe afai e faia se suesuega faale-Tusi Paia i se auala maeʻaeʻa? (e) O le ā le isi fesoasoani atili i le atiina aʻe o le tuutoina i le Atua, ma o le ā o le a talanoaina i le isi mataupu o loo sosoo mai?

¹⁹ Maeu le tauia o au suesuega totino faale-Tusi Paia pe afai e faia i se auala maeʻaeʻa! O le a fefete lou loto i le talisapaia mo uiga tautele o Ieova. Ma e ala i le faaauau pea ona tauivi e faaaʻoaʻo i nei uiga i lou olaga, o le a faamalosia ai lou pipii totino atu ia te ia. O lea o le a e tuliloaina ai le tuutoina i le Atua e avea o se auauna tuuina atu ma papatisoina a Ieova.—1 Timoteo 6:11.

²⁰ O se isi fesoasoani atili i le atiina aʻe o lenei uiga tautele e mafai ona maua mai ia Iesu Keriso—le faaaʻoaʻo lelei atoatoa o le tuutoina i le Atua. O le a faapefea ona fesoasoani ia te oe le mulimuli atu i le faaaʻoaʻoga a Iesu e atiina aʻe ma faaalia ai le tuutoina i le Atua? O le a talanoaina e le mataupu o loo sosoo mai lenei mea ma fesili e fesootai atu i ai.

[Faaopoopoga i lalo]

O le a Faapefea ona E Tali?

◻ Aiseā ua lē avea ai le papatisoga ma laasaga mulimuli e te faia i lou auala faa-Kerisiano?

◻ O le ā le uiga o le “tuutoina i le Atua,” ma e faapefea ona e faaalia lea mea?

◻ Aiseā e manaomia ai taumafaiga fitā e atiina aʻe ai le tuutoina i le Atua?

◻ E mafai faapefea ona e atiina aʻe le tuutoina i le Atua ina ia faatele ai?