Lipoti a Ē Faalauiloa le Malo

‘Seleselega’ i Venisuela

I se tasi o taimi, na faatusaina ai e Iesu le galuega talaʻi i le seleselega faaletausaga. (Mataio 9:36-38) O le Matai o le seleselega o Ieova le Atua, ma o le mea moni ua matuā tele lava le seleselega e fia faia i le lalolagi atoa uma lava. E aofia ai i lenei le oganuu i Venisuela e seāseā ona galueaiina.

Ua lipotia mai e le ofisa o le lala o le Watch Tower Society i Venisuela le mea na tupu ina o galulue se vaega o ni tuafāfine Molimau i le oganuu o Sabana Grande, i le Setete o Guárico. Ua faamatala mai e Molimau e faapea: “O le fale na matou nonofo ai, o se nofoaga lelei lava mo sauniga, o le mea lea sa matou valaaulia ai loa tagata i sauniga i inā. Sa leʻi iloa e tagata e uiga i Molimau a Ieova. E ui lava sa iai i le aai vaega e fa o tagata faievagelia, ae sa naunautai lava tagata e fia aʻoaʻoina le Tusi Paia.

“Sa matou galulue mo le tolu itula i le taeao ma le tolu itula i le afiafi, i le asiasi atu i lea fale ma lea fale ma valaaulia tagata i se sauniga i le po e sosoo ai. Sa leai ni a matou nofoa o lea na matou valaaulia ai i latou e ō mai ma aumai ni o latou nofoa. Ina ua latalata mai le taimi e amata ai le sauniga, ae amata ona ō mai tagata e tofu lava ma lana nofoa e aumai. Ina ua uma le sauniga, sa matou taʻu atu ia i latou matou te fia tusia uma i lalo igoa o tagata e mananao e faia ni a latou suesuega faale-Tusi Paia i aiga e aunoa ma se totogi. O le 29 uma lava lea na auai sa mananao uma e tusia o latou igoa i le lisi.

“A o matou tapunia le faitotoa ina ua alu i fafo le tagata asiasi mulimuli, sa matou matauina ai ni tamaloloa se toatolu o tutū i le tulimanu o le fale. I le pe tusa ma le ta o le iva, ua matou sauni o le a aai, ae tuʻituʻi mai loa i le faitotoa. Sa latou fesili mai faapea: ‘O le ā lenei talaʻiga ua outou faia i lenei aai? O le ā le mafuaaga ua faia ai la outou sauniga i inei i le po nei?’

“Sa matou fesili atu pe ua matou solia se tulafono. Sa latou tali mai e leai ma faapea mai, o i latou o faifeau o lotu e tolu a le au faievagelia i le aai. Ua feita i latou ona ua leai ni tagata i a latou lotu i lena po. Sa matou valaaulia i totonu o le fale ma faamatala atu ia i latou la matou galuega. Sa matou tuu atu foi ni lomiga ia i latou ma talosaga atu ia i latou ina ia toe foi mai i le Aso Tofi e sosoo ai.

“I le Aso Tofi na sosoo ai, na toe foi mai ai faifeau ma le isi 22 tagata o ē na mananao e faalogo i mea o le a matou fai atu ai. Sa manatu faifeau faapea, ona o i matou o fafine o le a lē mafai ai ona matou gafatia i latou i se talanoaga. Ae peitai, sa manuia le sauniga e tusa ai ma o matou manatu. I le iʻuga, sa matou faamatala atu faapea, o loo matou faia se lisi o igoa o i latou o ē mananao e aʻoaʻo atili le Tusi Paia. O nisi o uo a faifeau sa mananao e faaopoopo o latou igoa i le lisi, ma sa oo lava ina fai mai nisi ua mananao e ō atu ma i matou i le galuega talaʻi!

“Sa matou faamatala atu faapea, latou te manaomia le poto atili mai le Tusi Paia ma le toleniina a o leʻi auai i latou ma i matou i le galuega talaʻi. O aso uma lava e ō mai ai tagata i le fale, ma talosaga mai ia i matou e faamatala atu le Tusi Paia ia i latou. O nisi taimi, pe a matou talanoa seia oo i le leva o le po, sa tatau ona matou fai atu ia i latou e ō i o latou aiga. Ina ua iʻu ina o le a matou tuua le oganuu, sa matuā faanoanoa i latou ma fai mai ia i matou, afai matou te toe foi mai, o le a latou ō faatasi ma i matou i le galuega talaʻi. Sa latou folafola mai faapea, e ono oo atu i lena taimi, ua latou faia ai se agaʻigaʻi i luma e manaomia.”

Ina ua tuua e Molimau lena oganuu, sa iai tagata e 40 na mananao e suesue le Tusi Paia. Sa tuuina atu igoa o nei tagata fiafia i se faapotopotoga latalata ane, lea e tusa ma le 30 maila [50 kilomita] le mamao. O le iʻuga, sa siitia atu nisi Molimau mai se isi aai i le aai lea, ma ua faatuina ai nei se vaega o tagata talaʻi maelega o le tala lelei i lenei aai.