Talaʻiga Mai Lea Fale i Lea Fale—Aiseā ua Tāua ai i le Taimi Nei?

“Ua lē aunoa ona latou aʻoaʻo atu i aso uma lava, ma folafola atu le tala lelei e uiga iā Iesu le Keriso, i le malumalu ma mai i lea fale i lea fale.”—GALU. 5:42.

1, 2. (a) O le ā le auala o loo faia ai le talaʻiga lea ua mātaulia ai Molimau a Ieova? (e) O le ā o le a tatou talanoaina i le mataupu lenei?

O SE vaaiga e masani ai i le toetoe lava i atunuu uma i le lalolagi. O ni tagata se toʻalua e laʻei lelei o loo ō atu i se fale ma taumafai e taʻu atu i tagata o aiga se feʻau mai le Tusi Paia e faatatau i le Malo o le Atua. Pe afai e fiafia i le feʻau, e tuu atu e le tagata talaʻi se lomiga faale-Tusi Paia ma ofo atu se suʻesuʻega faale-Tusi Paia e faia fua. Ona la toe ō atu foʻi lea i le fale o sosoo ai. Afai o loo e auai i lenei galuega, e masani ona mātaulia oe e tagata, o se tasi o Molimau a Ieova e tusa lava pe leʻi fai atu sau faamatalaga. Ioe, ua avea le talaʻiga mai lea fale i lea fale ma faailoga e mātaulia ai Molimau a Ieova.

² E tatou te faaaogā metotia eseese e faataunuu ai le faatonuga a Iesu e talaʻi, ma le faia o soo. (Mata. 28:19, 20) E tatou te talaʻi i maketi, i luga o ala tetele, ma isi vaipanoa e maua ai tagata. (Galu. 17:17) E tatou te faafesootaʻia le toʻatele e ala i le telefoni, po o le faia o ni tusi. E tatou te taʻu atu upu moni o le Tusi Paia iā i latou e tatou te feiloaʻi a o faia a tatou galuega i aso taʻitasi. O loo iai foʻi la tatou tuatusi i le Initaneti, lea e maua ai faamatalaga faale-Tusi Paia i le silia i le 300 gagana.a O nei auala eseese o loo maua mai ai iʻuga lelei. Ae peitaʻi, i le tele o nofoaga, o la tatou auala autū e talaʻia ai le tala lelei, o le ō atu mai lea fale i lea fale. O le ā le faavae o lenei faiga o le talaʻiga? Na faapefea ona taatele le faaaogāina e tagata o le Atua i aso nei o lea auala? Ma aiseā e tāua tele ai?

Le Auala na Faaaogā e Aposetolo

3. O ā faatonuga na avatu e Iesu i ona aposetolo e faatatau i le talaʻiga, ma na faapefea ona taʻu atu ai le auala e latou te talaʻi ai?

³ O le talaʻiga mai lea fale i lea fale, e iai lona faavae faale-Tusi Paia. Ina ua auina atu e Iesu ona aposetolo e talaʻi, na ia faatonuina i latou: “E so o se aai po o se nuu tou te ō atu i ai, ia saʻili po o iai sē ua tatau i ai le feʻau.” E faapefea ona latou saʻili ē ua tatau i ai le feʻau? Na taʻu atu e Iesu e ō i fale o aiga i lona faapea atu: “A outou ulufale atu, ia faafeiloaʻi i le aiga. Afai ua tatau le feʻau i lea aiga, ia outou faapea atu ia filemu le aiga nei.” Po o le a latou ō atu ea e aunoa ma le valaaulia muamua o i latou? Mātau upu e sosoo ai a Iesu: “Afai e lē talia outou ma lē fia faalogo foʻi i la outou upu, pe a outou ō ese mai i lenā fale po o lenā aai, ia tūtū atu i ai le pefu mai o outou vae.” (Mata. 10:11-14) Ua faamanino mai e nei faatonuga i aposetolo a o “ō atu . . . i le oganuu atoa, mai i lea nuu i lea nuu, ua folafola atu le tala lelei,” e ao ona latou taulamua e asiasi atu i tagata i o latou aiga.—Luka 9:6.

4. O fea patino o le Tusi Paia o loo taʻua ai le talaʻiga mai lea fale i lea fale?

⁴ Ua taʻua patino i le Tusi Paia na talaʻi aposetolo mai lea fale i lea fale. O se faaaʻoaʻoga, ua taʻua i le Galuega 5:42: “Ua lē aunoa ona latou aʻoaʻo atu i aso uma lava, ma folafola atu le tala lelei e uiga iā Iesu le Keriso, i le malumalu ma mai i lea fale i lea fale.” Pe tusa ma le 20 tausaga mulimuli ane ai, na toe faamanatu atu ai e le aposetolo o Paulo i toeaina o le faapotopotoga i Efeso e faapea: “Ou te leʻi taofia foʻi le taʻuina atu iā te outou o mea aogā, ma aʻoaʻo atu iā te outou i luma o le lautele, ma mai i lea fale i lea fale.” Pe sa asiasi atu Paulo i na toeaina a o leʻi avea i latou ma ē talitonu? E mautinoa o le tulaga lenā, ona na ia aʻoaʻo i latou, i le tele o mea e pei o “le salamō i le Atua ma le faatuatua i lo tatou Alii o Iesu.” (Galu. 20:20, 21) Ua faapea mai Robertson’s Word Pictures in the New Testament e faatatau i le Galuega 20:20: “E tāua tele le mātauina faapea, o lenei tagata talaʻi mataʻina, sa talaʻi mai lea fale i lea fale.”

Se ʻAutau o Sē i Aso Nei

5. Ua faapefea ona faaata mai le galuega talaʻi i le valoaga a Ioelu?

⁵ O le talaʻiga na faia i le uluaʻi senituri, o se faaataga o se galuega sili o le a faia i o tatou aso. Na faatusa e le perofeta o Ioelu le galuega talaʻi a Kerisiano faauuina i se mala o sē. (Ioe. 1:4) O le ō atu e pei o se ʻautau, ua faatoʻilalo e nei sē tulaga faigatā e tulaʻi mai, ma ō atu i fale, ma faatamaʻia mea uma i lo latou ala. (Faitau le Ioelu 2:2, 7-9) Maʻeu se ata manino o taumafaiga malolosi ma le māeʻaeʻa a tagata o le Atua i le faia o le galuega molimau atu i aso nei! O le auala sili o loo faaaogāina i le faataunuuina o lenei ata faavaloaga e Kerisiano faauuina ma a latou aumea o “isi mamoe,” o le molimau atu lea mai lea fale i lea fale. (Ioa. 10:16) Na faapefea e i tatou o Molimau a Ieova, ona faataʻitaʻi i lea auala o le talaʻiga na faia e aposetolo?

6. O le ā le faalaeiauga na avatu i le 1922 i le molimau atu mai lea fale i lea fale, ae na faapefea ona tali mai i ai nisi?

⁶ Mai le 1919 faasolo mai ai, na faamamafa mai ai le tiute tauave a le Kerisiano lava ia, o le molimau atu. O se faaaʻoaʻoga, i se mataupu o loo faaulutala faapea, “Service Essential” (E Tāua le Auaunaga) i le Watch Tower o Aokuso 15, 1922 na faamanatu atu ai i Kerisiano faauuina le tāua o le “gaoioi e avatu lomiga i tagata ma talanoa iā i latou i aiga, ma avatu se molimau faapea ua lata mai le malo o le lagi.” Na auʻiliʻili mai taulimaga i le faia o lea galuega i le Puletini (lea ua taʻua nei o La Tatou Faiva o le Malo). Peitaʻi, sa toʻaitiiti pea le fuainumera o i latou sa faia le talaʻiga mai lea fale i lea fale i le amataga. O nisi sa leʻi talaʻi. Na latou faatutū mai ni māfuaaga eseese, ae o le faafitauli autū lava, ona na lagona e nisi ua maulalo tele lea galuega mo lo latou tulaga, o le ō e talaʻi mai lea fale i lea fale. Na faamamafa atili le galuega talaʻi, ma o le toʻatele lava o i latou na faifaimālie ona ō ese mai le faatasitasi atu i le faalapotopotoga a Molimau a Ieova.

7. I le amatamataga o tausaga mai le 1950, o le ā le manaʻoga na manino mai?

⁷ I le faitau sefulu o tausaga mulimuli ane ai, na oo ina faatoʻateleina tagata na auai i le talaʻiga. O lea, na manino mai, sa manaʻomia nisi toleniga mo le faiva i le fale i le fale. Seʻi fai ma faataʻitaʻiga le tulaga i le Iunaite Setete. A o faagasolo le amatamataga o tausaga mai i le 1950, o le 28 pasene o Molimau i lenā atunuu na pau lava la latou talaʻiga sa fai o le tufaina atu o sāvali po o le tutū foʻi i magāala ma mekasini. E silia i le 40 pasene e leʻi talaʻi pea lava pea, o nisi masina e aunoa ma le faia o se galuega molimau atu. O le ā sa tatau ona fai e fesoasoani ai i na Kerisiano tuuina atu e talaʻi mai lea fale i lea fale?

8, 9. O ā ni polokalame o toleniga na amata i le 1953, ma o ā iʻuga na maua mai ai?

⁸ I se tauaofiaga faavaomalo na faia i le Aai o Niu Ioka i le 1953, na taulaʻi faapitoa atu i le talaʻiga. Na faalauiloa atu e le uso o Nathan H. Knorr, o le galuega autū a ovasia Kerisiano uma, o le fesoasoani i Molimau uma e avea o ni faifeʻau e talaʻi pea lava pea mai lea fale i lea fale. Na ia faapea mai, “O tagata uma e tatau ona talaʻi le tala lelei mai lea fale i lea fale.” Na amata se polokalame i le lalolagi aoao i le faia o toleniga, ina ia ausia ai lea tulaga. O i latou e leʻi talaʻi lava mai lea fale i lea fale, na faia i ai se toleniga i le auala e talanoa atu ai i tagata i o latou aiga, fefulifulisaʻi ma i latou mai le Tusi Paia, ma tali a latou fesili.

⁹ O iʻuga o lenei toleniga e matilatila lona lelei. I totonu o le sefulu tausaga, na oso i luga le aofaʻi o tagata talaʻi i le 100 pasene i le lalolagi atoa, na oso i luga le aofaʻi o toe asiga i le 126 pasene, ma le aofaʻi o suʻesuʻega faale-Tusi Paia e 150 pasene. I aso nei, ua toeitiiti lava atoa le fitu miliona o tagata talaʻi o le Malo o loo talaʻia le tala lelei i le lalolagi aoao. O lenei faatelega, o se faamaoniga lea o le faamanuia a Ieova i taumafaiga a ona tagata i le talaʻiga mai lea fale i lea fale.—Isa. 60:22.

Faailogaina o Tagata mo le Faasaoina

10, 11. (a) O le ā le faaaliga na avatu iā Esekielu, e pei ona faamauina i le mataupu e 9 o le Esekielu? (e) O faapefea ona faataunuuina lenā faaaliga i aso nei?

¹⁰ E mafai ona iloa le tāua o le talaʻiga mai lea fale i lea fale, i le faaaliga lea na avatu i le perofeta o Esekielu. I lenā faaaliga, na iloa ai e Esekielu tamāloloa e toʻaono ma a latou mea e tā aʻi po o auupega i o latou lima, faatasi ma le tamāloa lona fitu e ofu i le ie lino, ma e i lona itū le fagu vaitusi a le tusiupu. Ua taʻu atu i le tamāloa lona fitu e faapea: “Inā ui ane ia i totonu o le aai” ma “faailogaina muaulu o tagata o ē mapuitiga, ma feoi ona o mea inosia uma ua latou fai i ai.” Na uma loa ona faia le galuega o le faailogaina, ona faatonu loa lea o tamāloloa e toʻaono o loo iai mea e tā aʻi, e fasioti i latou uma e lē o iai le faailoga.—Faitau le Esekielu 9:1-6.

¹¹ E tatou te malamalama o le faataunuuga o lenā valoaga, o le tagata ua “ofu i le ie lino,” o loo faaata mai ai le vaega totoe o Kerisiano ua faauuina i le agaga. E ala i le galuega talaʻi ma le faia o soo, ua tuu ai e le vasega faauuina se faailoga faafaatusa iā i latou ua avea ma vaega o “isi mamoe” a Keriso. (Ioa. 10:16) O le ā le faailoga? O le faamaoniga, e pei ua faailoga muaulu o na mamoe o soo o Iesu Keriso ua tuuina atu ma papatisoina, ma ua oofu i le tagata fou i uiga fou e pei o Keriso. (Efe. 4:20-24) O i latou nei e pei o ni mamoe ua avea ma lafu e tasi ma Kerisiano faauuina, ma ua latou fesoasoani atu i le ʻau faauuina i la latou galuega tāua o le faailogaina pea o isi tagata.—Faaa. 22:17.

12. Ua faapefea i le faaaliga na avatu iā Esekielu i le faailogaina o muaulu o tagata, ona faamatilatila mai ai le tāua tele o la tatou saʻiliga faifai pea o i latou pei o ni mamoe?

¹² O le faaaliga na avatu iā Esekielu, o loo faamatilatila mai ai se māfuaaga o le faanatinati o le saʻilia o tagata o loo “mapuitiga, ma feoi.” Ua i se tulaga lamatia ola o tagata. Ua toeitiiti nei, ona faaumatia loa lea e ʻautau faalelagi a Ieova, lea e faaata mai e tagata e toʻaono ma a latou mea e tā aʻi, i latou e lē o iai le faailoga faafaatusa. E faatatau i lenā faaumatiaga, na tusi le aposetolo o Paulo e faapea, o le Alii o Iesu o loo aufaatasi ma “ana agelu malolosi,” o le a latou “faaoo mai le tauimasui i ē e lē iloa le Atua, ma ē e lē usiusitai i le tala lelei a lo tatou Alii o Iesu.” (2 Tesa. 1:7, 8) Mātau mai, o le a faamasinoina tagata e faavae i la latou tali mai i le tala lelei. O lea la, e ao lava ona faaauau ona folafola atu ma le malosi le feʻau a le Atua seʻia oo i le iʻuga. (Faaa. 14:6, 7) Ua tuuina mai i auauna tuuina atu a Ieova se tiute tauave mamafa e fai.—Faitau le Esekielu 3:17-19.

13. (a) O le ā le tiute tauave na lagona e le aposetolo o Paulo, ma aiseā? (e) O le ā le tiute tauave o loo e lagona i tagata o i lau oganuu?

¹³ Na lagona e le aposetolo o Paulo lona tiute tauave, o le folafola atu o le tala lelei i isi. Na ia tusi e faapea: “Ua iai loʻu tiute tauave i tagata Eleni ma nuu ese, o ē popoto ma ē e lē malamalama: o lea la, ua ou naunau tele ai e folafola atu le tala lelei iā te outou foʻi i Roma.” (Roma 1:14, 15) O lona lotofaafetai i le faaalia o le alofa mutimutivale iā te ia, na lagona ai e Paulo lona tiute e taumafai e fesoasoani i isi ina ia aogā iā i latou le agalelei faifua o le Atua e pei foʻi ona aogā iā te ia. (1 Timo. 1:12-16) Sa pei o loo nofo aitalafu Paulo i tagata na ia feiloaʻi i ai, pei o se aitalafu e pau le auala e totogia ai o le folafola atu lea o le tala lelei i lenā tagata. Po o e lagonaina o loo iā te oe se aitalafu i tagata i lau oganuu?—Faitau le Galuega 20:26, 27.

14. O le ā le māfuaaga autū mo le talaʻiga i le lautele faapea ma lea fale i lea fale?

¹⁴ E ui lava ina tāua le faasaoina o le ola o tagata, ae e iai se māfuaaga e sili atu ona tāua mo le talaʻiga mai lea fale i lea fale. I le valoaga o loo faamauina i le Malaki 1:11, na folafola e Ieova e faapea: “E fua mai i le mea e alu aʻe ai le lā, e oo i le mea e alu ifo ai, e viia ai loʻu igoa i nuu ese . . . atoa ma le taulaga lelei; auā e viia loʻu igoa i nuu ese, ua fetalai mai ai Ieova o ʻau.” O le faataunuuina o lenei valoaga, ua viia ai i le lautele e auauna tuuina atu a Ieova lona suafa i le lalolagi atoa, a o latou tauaveina ma le loto maulalo la latou faiva. (Sala. 109:30; Mata. 24:14) O le ofoina atu o le “taulaga o viiga” iā Ieova o le māfuaaga autū lea mo le talaʻiga i le lautele ma mai lea fale i lea fale.—Epe. 13:15.

Mea Mataʻina o le a Tutupu i le Lumanaʻi

15. (a) Na faapefea ona faateteleina e tagata Isaraelu a latou gaoioiga a o savavali faataamilo i le aai o Ieriko i le aso lona fitu? (e) O le ā ua taʻu mai ai iā i tatou e faatatau i le galuega talaʻi?

¹⁵ O ā mea o le a tutupu i le lumanaʻi mo le galuega talaʻi? O le vagaia o Ieriko e pei ona faamauina i le tusi o Iosua, ua saunia ai se ata o mea o le a tutupu. Manatua foʻi, a o toetoe lava aumaia e le Atua le faaumatiaga o Ieriko, na faatonuina tagata Isaraelu e savavali faataamilo i le aai e faatasi i le aso, mo aso e ono. Ae o le aso lona fitu, o le a faateteleina a latou gaoioiga e fai. Na taʻu atu e Ieova iā Iosua: “O le aso fitu tou te faataamilo faafitu ai i le aai; e ilia foʻi pu e le ʻau faitaulaga. A faalevaleva ona ili o le pu o le iupelī, . . . ona alalaga lea o le nuu uma ma le leo tele; ona solo ai lea i lalo o le pa o le aai.” (Iosua 6:2-5) E foliga mai o le mea lena o le a iai, o le a faateteleina la tatou galuega talaʻi. O le a lē fesiligia le mea moni, e oo mai le faaumatiaga o lenei faiga o mea, ua tatou vāai i se molimau e aupito sili ona tele ua faia i le suafa o le Atua ma lona Malo, i le talafaasolopito o le lalolagi.

16, 17. (a) O le ā o le a faataunuuina a o leʻi uma “le puapuaga tele? (e) O le ā o le a tatou iloiloina i le mataupu o loo sosoo mai?

¹⁶ O le a oo mai le taimi o le a avea ai le feʻau o loo tatou talaʻia e pei o se ‘⁠alaga tele o se taua.’ I le tusi o Faaaliga, o loo faaataina ai feʻau malolosi faafaamasinoga i “uatoʻa tetele, e tusa o se taleni le mamafa o le uatoʻa e tasi.”b Ma ua taʻua ai i le Faaaliga 16:21: “O se mala e matuā tele lava.” E tatou te lē o iloa i le taimi nei le mea o le a faia e le talaʻiga i lea fale i lea fale, i le folafolaina o feʻau mulimuli faafaamasinoga a le Atua. Ae e tatou te mautinoa, a o leʻi uma “le puapuaga tele,” ua faalauiloaina le suafa o Ieova i le tele e leʻi faapea ona faia ai muamua.—Faaa. 7:14; Eseki. 38:23.

¹⁷ A o tatou nofo tatali i mea mataʻina o le a tutupu i le lumanaʻi, seʻi o tatou faaauau pea ona tatou folafola atu ma le maelega le tala lelei o le Malo. I le faataunuuina o lenā tofiga, o ā ni luʻi o loo tatou fesagaʻia i le galuega mai lea fale i lea fale, ma e faapefea ona tatou taulimaina na luʻi? O le a iloiloina na fesili i le mataupu o loo sosoo mai.

[Faaopoopoga i lalo]

O le ā Lau Tali?

• O le ā le faavae faale-Tusi Paia mo le talaʻiga mai lea fale i lea fale?

• O faapefea ona ave le faamamafaga i le galuega talaʻi i le fale i le fale i aso nei?

• Aiseā ua iai ai i auauna tuuina atu a Ieova se tiute tauave e talaʻi?

• O ā mea mataʻina o le a tutupu i le lumanaʻi?

[Ata i le itulau 4]

I le pei o le aposetolo o Paulo, po o e lagona se tiute tauave o le talaʻi atu i isi?

[Ata i le itulau 5]

Uso o Knorr, i le 1953