Ia Aʻoaʻo Lau Fanau

Le Pogai e Leʻi Faavave Atu ai Iesu

NA LOGOTALA Iesu ua maʻi tigāina lana uō mamae o Lasalo. Na taʻu mai e se tagata na sau mai i tuafāfine o Lasalo, o Maria ma Mareta, le tala iā Iesu. O lea tagata e sau mai i Petania, le nuu o Lasalo ma ona tuafāfine. E talitonu lenei ʻauso e mafai e Iesu ona faamālōlō lo la tuagane, e ui lava e latou te nonofo i le isi itu o le vaitafe o Ioritana. Ua la iloa na faamālōlō e Iesu tagata o loo nonofo i mea e mamao mai iā te ia.—Mataio 8:5-13; Ioane 11:1-3.

Ina ua oo atu le tagata iā Iesu ma taʻu atu le tala faanoanoa, e leʻi faia i ai e Iesu se mea. Ua taʻua i le Tusi Paia: “Ona ia nofo ai pea lea i le mea o loo iai mo aso e lua.” (Ioane 11:6) Pe e te iloa le pogai ua lē faavave atu ai Iesu e fesoasoani iā Lasalo?—a Seʻi o tatou talanoa i ai.

Ua silafia e Iesu ua oti Lasalo ona o lona maʻi. O lea na fai atu ai o ia i ona aposetolo: “Ō mai tatou toe ō i Iutaia.” Ua latou finau mai: “Na faatoʻā uma atu lava ona saʻili tagata Iutaia e fetogi iā te oe, ae pe e te toe maliu atu foʻi i ai?” Ua faamatala atu e Iesu: “O loo mālōlō la tatou uō o Lasalo, ae ou te alu atu e fafagu iā te ia auā o loo moe.”

Ua tali mai le ʻauaposetolo: “Le Alii e, afai o loo mālōlō o ia, e toe malosi.” Ua taʻu atu nei e Iesu: “Ua oti Lasalo.” Ona ia fai atu lea o se tala atonu na faateʻia ai i latou: “Ua ou olioli ona o outou, ona ou te leʻi iai i inā . . . Ae seʻi tatou ō atu iā te ia.”

Ua fai atu ma le lototele Toma: ‘Seʻi tatou ō ina ia tatou oti faatasi ma Iesu.’ Ua iloa e Toma o le a toe taumafai fili e fasioti Iesu, ma atonu e fasiotia ai foʻi ma le ʻauaposetolo. Peitaʻi na ō uma lava i latou. Pe tusa ma le lua aso ae latou taunuu loa i Petania, le nuu o Lasalo. E tusa ma le lua maila le mamao ese mai i Ierusalema.— Ioane 11:7-18.

Pe e te iloa le pogai ua fiafia ai Iesu ona e leʻi taunuu vave i inā?— E moni na toe faatūina e Iesu isi tagata i le taimi muamua atu, ae e na o ni nai itula na feoti ai i latou ae toe faatutū e Iesu. (Luka 7:11-17, 22; 8:49-56) Peitaʻi na iai le tino o Lasalo i le tuugamau mo ni aso. E mautinoa e ioe tagata uma ua oti moni lava o ia!

Ina ua faalogo Mareta le tuafafine o Lasalo ua latalata mai Iesu i Petania, ona tamoʻe atu lea e faafeiloaʻi o ia. Ua fai atu o ia: “Le Alii e, ana e iai i inei, semanū e lē oti loʻu tuagane.” Ua taʻutino mai e Iesu iā te ia: “O le a toetū lou tuagane.” Ua toe momoʻe atu Mareta ma musumusu atu i lona uso o Maria: “Ua oo mai le Aʻoaʻo ma o loo fia vaai iā te oe.”

Ua alu atu loa Maria iā Iesu. Ua manatu le motu o tagata o le a alu atu o ia i le tuugamau, ona latou mulimuli atu lea iā te ia. Ina ua silasila atu Iesu o loo fetagisi Maria ma le motu o tagata, ona “tagi” foʻi lea o ia. E leʻi pine ae taunuu uma i latou i le tuugamau, a ua punitia i se maa telē. Ua poloaʻi atu Iesu: “Ia aveese le maa.” A ua tetee Mareta ma faapea mai: “Le Alii e, ua tatau ona manogi lona tino, auā o lona fā lenei o aso.”

Ua usitaʻi tagata iā Iesu ma aveese le maa. Ona tatalo lea o ia, ua faafetai atu i le Atua ona o le mana lea o le a avatu iā te ia e toe faatū ai Lasalo. Ua alaga atu Iesu “ma le leotele: ‘⁠Lasalo e, inā sau ia i fafo!’” Ua savali mai Lasalo i fafo, o loo ‘⁠fusifusia i ʻie.’ Ona faatonu atu lea e Iesu: “Ia tatala o ia ma tuu atu e alu.”—Ioane 11:19-44.

Po ua e malamalama la i le pogai e leʻi faavave atu ai Iesu?— Na silafia e ia o le a avatu se molimau sili e uiga i lona Tamā o Ieova, pe afai e faatali. Ona sa ia filifilia le taimi e sili ona lelei, e toʻatele na talitonu ai i le Atua. (Ioane 11:45) O le ā se mea e aʻoaʻoina mai i le faaaʻoaʻoga a Iesu?—

E mafai foʻi ona e filifilia se taimi lelei e talaʻi atu ai e uiga i mea ofoofogia na faia, ma o le a faia e le Atua. Atonu e mafai ona e talanoa atu i tamaiti e tou te aʻoaʻoga faatasi po o faiaʻoga e uiga i na mea. E oo foʻi i taimi e fai ai le aʻoga, e faamatala atu ai e nisi talavou faamanuiaga o le a aumaia e le Malo o le Atua i tagata. E moni e lē mafai ona e toe faatū se tagata ua oti, ae e mafai ona e fesoasoani i isi ia iloa le Atua, o lē o le a toe faatūina mai ē e pele iā i tatou ua maliliu.

[Faaopoopoga i lalo]

FESILI:

▪ Aiseā ua lē faavave atu ai Iesu e fesoasoani iā Lasalo?

▪ Aiseā na fai atu ai Toma: ‘Seʻi tatou ō ina ia tatou oti faatasi ma Iesu’?

▪ Na mafai faapefea ona toe faatū e Iesu Lasalo?

▪ O le ā e faaalia ai ua e aʻoaʻoina se lesona mai i le faaaʻoaʻoga a Iesu?