Ia Talisapaia Atoatoa Uiga o Ieova

1. (i) O ā uiga o Ieova e mafai ona iloiloina e se Kerisiano? (ii) O le ā le aogā iā i tatou?

O Ā NI uiga o Ieova e te ono mafaufau i ai? Atonu e te mafaufau i le alofa, faamasinotonu, atamai ma lona mana. Peitaʻi, e anoanoaʻi isi uiga matagofie o Ieova. E silia ma le 40 isi ona uiga lelei ua talanoaina i a tatou lomiga. O le suʻesuʻeina o na uiga taʻitasi o Ieova, o le a atili ai ona e faatāuaina ma talisapaia atoatoa ona uiga. O le ā le aogā iā i tatou? E mafai ona faaloloto ai lo tatou talisapaia o Ieova, ma faamalosia ai lo tatou faanaunauga e faalatalata, ma faaaʻoaʻo iā te ia.​—Iosua 23:8; Sala. 73:28.

2. (i) Faataʻitaʻi le auala e faasolosolo ona faaloloto ai lo tatou talisapaia o uiga o Ieova. (ii) O le ā o le a tatou iloiloina?

² O le ā e uiga i ai le “talisapaia”? I nei mataupu, e faasino atu i le iloa o le tāua o se mea. E faasolosolo mālie ona tatou atiaʻe le talisapaia. O se faataʻitaʻiga, e faasolosolo ona e fiafia i se meaʻai fou, e ala i le sogisogi ma tofo i ai, ona kukaina lea. E tatou te talisapaia foʻi uiga o Ieova e ala i le suʻesuʻe, manatunatu i ai ma faatatau i o tatou olaga. (Efe. 5:1) O le a fesoasoani lenei mataupu ma isi mataupu e lua e sosoo mai, e faaloloto ai lo tatou talisapaia o nisi o uiga lelei o Ieova. O le a iloiloina ai na uiga, o auala ua faaalia ai e Ieova na uiga, ma pe faapefea ona tatou faataʻitaʻi i ai.

E FAIGOFIE ONA FAALATALATA IĀ IEOVA

3, 4. (i) E faapeʻī se tagata e faigofie ona e faalatalata i ai? (ii) Ua faapefea ona faaalia e Ieova lenā uiga?

³ E faapefea ona e faamatalaina se tagata e faigofie ona faalatalata i ai? E te ono faapea mai, ʻO sē e agalelei ma e faigofie ona talanoa i ai.’ E iloagofie lava le tagata e faigofie ona faalatalata i ai i ana faamatalaga, o ona foliga faaleuō ma le auala e gaoioi ai.

⁴ E ui i le tulaga maualuga o Ieova, peitaʻi e naunau o ia e faafofoga ma tali mai i a tatou tatalo. (Faitau le Salamo 145:18; Isaia 30:18, 19.) E tatou te saʻoloto e tatalo iā te ia i so o se taimi ma so o se nofoaga, e tusa lava foʻi po o le ā le umi e tatalo ai. E lē fiu Ieova e faafofoga mai i a tatou tatalo. (Sala. 65:2; Iako. 1:5) Ua faamatalaina e le Tusi Paia Ieova i se auala e atili uunaʻia ai i tatou e talanoa atu iā te ia. O se faataʻitaʻiga, na taʻua e Tavita, “o loo silasila mai fofoga o Ieova,” ma o loo ia ʻtaofimau i tatou i lona aao taumatau.’ (Sala. 34:15; 63:8) Na faatusa e Isaia Ieova i se leoleo mamoe e faapea: “E na te aoaoina tamaʻi mamoe i lona aao; ma tauave mamoe i lona fatafata.” (Isa. 40:11) Seʻi mafaufau i le naunau mai o Ieova e te faalatalata atu iā te ia, e pei o se tamaʻi mamoe o loo opoina i aao alofa o se leoleo mamoe. O le mafaufau i na vala o le a faaloloto ai lo tatou alofa mo Ieova. E faapefea ona tatou faataʻitaʻi iā Ieova i le faaalia o lenā uiga?

O SE UIGA E TĀUA TELE MO TOEAINA

5. Aiseā e tāua ai mo se toeaina ona faigofie ona faalatalata i ai?

⁵ Na fesiligia le toʻatele o Molimau a Ieova i le lalolagi i le fesili lenei: ʻO le ā se uiga e sili ona e fiafia ai i se toeaina?’ Na tali mai le toʻatele, o sē e faigofie ona faalatalata i ai. E tāua ona tatou atiaʻe lenā uiga, aemaise lava i toeaina. (Isa. 32:1, 2) Aiseā? Na taʻua e se tuafafine, e faatoʻā mafai ona ia iloa lelei uiga lelei o se toeaina, pe a faigofie ona faalatalata ma talanoa i ai. Maʻeu le moni o lenā manatu. O lea, e faapefea ona tatou atiaʻe lenā uiga?

6. O le ā se auala e faigofie ai i isi ona talanoa mai iā i tatou?

⁶ E mafai ona atiaʻe lenā uiga pe a tatou faaalia le naunau moni i isi. O le faia faapea, o le a faigofie ai i isi e oo lava i talavou, ona talanoa i toeaina. (Mare. 10:13-16) Na faapea mai se talavou e igoa iā Carlos: “E ese loʻu fiafia pe a vaaia le laumata fiafia ma le agalelei o toeaina i isi i le faapotopotoga.” E lē lava le tau ina faapea mai o se toeaina e naunau e fesoasoani i isi. Peitaʻi, e tatau ona faaalia i ana gaoioiga. (1 Ioa. 3:18) E faapefea ona faia e se toeaina lenā vala?

7. (i) Aiseā e faigofie ai i tagata ona talanoa mai pe a fai a tatou pine fatafata? (ii) O le ā le lesona e tatou te aʻoaʻoina mai ai?

⁷ Seʻi mafaufau i le faataʻitaʻiga lenei: Na malaga se uso i se isi atunuu mo se tauaofiaga. Sa fai lana pine fatafata o loo iai le matua, “Ia oo Mai le Malo o le Atua!” Na vaai i ai se tamāloa e faigaluega i le vaalele ma faapea atu i le uso, “Ia oo mai!” Na amata ai se talanoaga, ma na talia e le tamāloa mekasini. Aiseā na faigofie ai ona amata le talanoaga ona o le pine fatafata? O le pine fatafata na faailoa atu ai i le tagata le faatasiga o loo agaʻi i ai le uso, ma o loo naunau e talanoa i ona talitonuga. I se tulaga talitutusa, e tatau i toeaina ona faailoa atu i uso ma tuafāfine o loo latou naunau e talanoa. O ā ni auala e mafai ona faia ai e toeaina lenā vala?

8. E faapefea ona faaalia e toeaina lo latou naunau moni i isi, ma e faapefea ona aafia ai le faapotopotoga?

⁸ I le tele o atunuu, e faaalia le naunau moni i isi e ala i le laufofoga fiafia, faapea le faafeiloaʻia ma le māfana o i latou. O ai e tatau ona faia lenā vala? Ua faapea mai le Tusi Paia, ina ua feiloaʻi Iesu ma ona soo, ona ia ʻfaalatalata atu lea ma fetalai atu.’ (Mata. 28:18) E tatau foʻi i toeaina ona taumafai e faafeiloaʻi ma talanoa atu i isi. O le ā le aafiaga o lenā mea i le faapotopotoga? Na faapea mai se tuafafine ua 88 tausaga: ʻE pele iā te aʻu toeaina ona o a latou faalaeiauga ma lo latou laufofoga fiafia.’ Ae na faapea mai se isi tuafafine: “E matuā faalaeiauina o aʻu pe a feiloaʻi mai ma le fiafia se toeaina i le sauniga.”

FAAALU SE TAIMI E TALANOA AI MA USO MA TUAFĀFINE

9, 10. (i) O le ā le faaaʻoaʻoga lelei ua faataatia e Ieova? (ii) E faapefea ona faataʻitaʻi toeaina iā Ieova?

⁹ E lē mafai ona talanoa mai isi, pe afai e lē faaavanoa atu i tatou. Ua faataatia e Ieova se faaaʻoaʻoga mo i tatou. Ua taʻua i le Galuega 17:27, “e lē o mamao o ia mai iā i tatou taʻitoʻatasi.” O se tasi o auala e faataʻitaʻi ai toeaina iā Ieova, o le talanoa lea i so o se tasi a o leʻi amata po o le māeʻa foʻi o le sauniga. Na faapea mai se uso paeonia: “Ou te talisapaia pe a fesili mai se toeaina iā te aʻu, ona tū lea ma faalogo mai i laʻu tali atu.” Na faapea mai se tuafafine ua toetoe 50 tausaga o auauna iā Ieova: “Ou te lagona le faatāuaina o aʻu, pe a faaavanoa mai e se toeaina sina taimi e talanoa mai ai pe a māeʻa le sauniga.”

¹⁰ E tele tiute tauave o toeaina. Peitaʻi, ia fai ma o latou sini le faaalu o se taimi e talanoa ai ma uso ma tuafāfine i sauniga.

E LĒ FAAILOGATAGATA IEOVA

11, 12. (i) O le ā le uiga o le lē faailogatagata? (ii) O le ā se faamaoniga i le Tusi Paia o le lē faailogatagata o Ieova?

¹¹ O se tasi o uiga matagofie o Ieova o le lē faailogatagata. (Galu. 10:34) O le ā le uiga o le lē faailogatagata? O lona uiga e tatau ona tutusa le auala e feutagaʻi ai ma tagata uma. Ina ia tatou lē faaituʻau, e tatau ona tatou talitonu e tutusa tagata uma. O sē e lē faailogatagata, e lē vaai maulalo i isi ona o o latou tulaga, foliga vaaia, po o le tulaga tau tamaoaiga.

¹² O Ieova le faaaʻoaʻoga sili o le lē faailogatagata. Ua faapea mai lana Afioga “e lē faailoga tagata” o ia. (Faitau le Teuteronome 10:17; Galuega 10:34, 35.) O lea, seʻi o tatou iloiloina se tasi o ana faaaʻoaʻoga.

13, 14. (i) O le ā le faafitauli na feagai ma afafine o Selofeata? (ii) Na faapefea ona faaalia e Ieova le lē faailogatagata?

¹³ A o toeitiiti ulu atu Isaraelu i le Nuu o le Folafolaga, na tulaʻi mai se faafitauli i afafine e toʻalima a Selofeata. O le ā le faafitauli? Ua maliu lo latou tamā ma lē mafai ai ona maua so latou tofi o le laueleele. Aiseā? E tusa ai ma le Tulafono, sa tatau ona maua e se atalii o Selofeata le tofi o le laueleele. Peitaʻi, na maliu o ia ae e leʻi maua sona atalii. (Nu. 26:33, 52-55) Po o le a foaʻi atu lo latou tofi i isi tauaiga o Selofeata? O le ā na faia e afafine o Selofeata?

¹⁴ Na ō atu afafine o Selofeata iā Mose mo se fesoasoani ma fesili atu: “Aiseā ua aveesea ai le igoa o lo matou tamā mai i lona aiga ona ua leai ni ona atalii?” Pe na tali atu Mose: ʻE lē mafai ona ou fesoasoani atu ona o aiāiga o le Tulafono?’ E leai, nai lo o lea, na ia ʻtuuina atu le mataupu iā Ieova.’ (Nu. 27:2-5) Na fetalai Ieova iā Mose: “E saʻo faamatalaga a afafine o Selofeata. E ao lava ona e avatu iā i latou le tofi faatasi ma uso o lo latou tamā, ma e ao foʻi ona e faia ni fuafuaga e tuu atu le tofi o lo latou tamā iā i latou.” Na fetalai foʻi Ieova iā Mose ina ia faaopoopo i le Tulafono: “Afai e oti se tamāloa ae e leai sona atalii, ia outou faia ni fuafuaga e tuu atu ai le tofi i ona afafine.” (Nu. 27:6-8; Iosua 17:1-6) Talu mai lenā taimi, o so o se fafine Isaraelu na oo i lenā tulaga, na mafai ona maua so latou tofi.

15. (i) Na faapefea ona feutagaʻi Ieova ma ona tagata? (ii) O ā nisi faaaʻoaʻoga faale-Tusi Paia o le lē faailogatagata o Ieova?

¹⁵ Maʻeu se faaaʻoaʻoga lelei o le lē faailogatagata. E leai se isi na mafai ona sulu i ai afafine o Selofeata mo se fesoasoani. Peitaʻi, na feutagaʻi Ieova ma i latou i se auala lelei ma faaaloalo, e pei o le auala na ia feutagaʻi ai ma isi tagata Isaraelu. (Sala. 68:5) Ua na o se faaaʻoaʻoga lea mai le anoanoaʻi o tala mai le Tusi Paia, i le auala na feagai ai Ieova ma ona tagata e aunoa ma le faailogatagata.​—1 Samu. 16:1-13; Galu. 10:30-35, 44-48.

IA FAATAʻITAʻI IĀ IEOVA

16. E faapefea ona tatou faaaʻoaʻo i le lē faailogatagata o Ieova?

¹⁶ E faapefea ona tatou faaaʻoaʻo i le lē faailogatagata o Ieova? Ia manatua, e tatou te lē faaituʻau, pe a tatou talitonu e tutusa tagata uma. Atonu e tatou te manatu e tatou te lē faailogatagata. Peitaʻi e faigatā ona iloa o tatou manatu moni e faatatau i isi i nisi taimi. O le ā e fesoasoani iā i tatou? Na faataatia e Iesu se faaaʻoaʻoga i lenā vala. Ina ua ia fia iloa manatu o tagata e faatatau iā te ia, na ia fesili atu i ona soo: “O le ā se tala a tagata, po o ai le Atalii o le tagata?” (Mata. 16:13, 14) E mafai ona e fesili i sau uō maufaatuatuaina: ʻPo o tutusa le auala o loo oʻu feutagaʻi ai ma tagata uma? Pe e manatu nisi iā te aʻu o sē e faailogatagata?’ Atonu e faapea atu lau uō e lē tutusa le auala o loo e feutagaʻi ai ma isi, ona o o latou lanu, tulaga tau tamaoaiga po o aʻoaʻoga foʻi. O le ā e tatau ona e faia? Ia tatalo i le fesoasoani a Ieova ina ia suia le auala e te manatu ai i isi, ma faataʻitaʻi ai i lana faaaʻoaʻoga.—Mata. 7:7; Kolo. 3:10, 11.

17. O ā auala e tatou te feutagaʻi ai ma isi ma le lē faailogatagata?

¹⁷ E mafai ona tatou faataʻitaʻi iā Ieova e ala i le feutagaʻi ma tagata uma i le faapotopotoga i se auala agalelei ma faaaloalo. Pe e tatou te valaaulia tagata e eseese a tatou aganuu? Pe e tatou te valaaulia i latou e vaivai le tamaoaiga, ē ua maliliu a latou paaga faaipoipo, po o talavou foʻi e lē upu moni o latou aiga? (Faitau le Kalatia 2:10; Iakopo 1:27.) E tatou te talanoa i so o se tagata i le talaʻiga, e aofia ai ma tagata mai i isi atunuu. Ua lomia foʻi e Molimau a Ieova lomiga fale-Tusi Paia i le silia ma le 600 gagana. O lea, ua avea i tatou ma faaaʻoaʻoga lelei o le lē faailogatagata.

18. E faapefea ona iloa lo tatou talisapaia o le faigofie ona faalatalata iā Ieova, ma lona lē faailogatagata?

¹⁸ O le mafaufau loloto i le faigofie ona faalatalata iā Ieova ma lona lē faailogatagata, o le faalolotoina foʻi lenā o lou talisapaia o na uiga. O le iʻuga, o le a tatou naunau ai e faataʻitaʻi iā Ieova, ma faaalia atu na uiga i a tatou feutagaʻiga ma isi uso, faapea i latou e tatou te feiloaʻi ai i le talaʻiga.