Liliu Tagata mai le Pouliuli i le Malamalama
1 Ua ufitia le lalolagi i le pouliuli faaleagaga. (Isaia 60:2) Ona ua toilalo le fanau a tagata i le agasala, ua taofia ai tagata i le pouliuli faaleagaga, e Satani, “le atua o le lalolagi nei,” ma o le iʻuga ua paʻū maualalo ai le tulaga tau amio mamā.—2 Kori. 4:4.
2 O lenei la ua faapupulaina i tatou e le upu moni, pe tatou te lagona ea le alofa mutimutivale mo tagata e pei ona sa faia e Iesu? (Mata. 9:36) Afai o lea, o le a tatou talisapaia la le uiga o le tofiga na ia tuu atu i le aposetolo o Paulo ina ia ‘faapupula i mata o tagata ma ia liliu mai i latou nai le pouliuli i le malamalama ma nai le pule a Satani i le Atua.’—Galu. 26: 16-18.
FAAPUPULAINA MAFAUFAU MA LOTO
3 Ona ua faatauasoina e Satani mafaufau ma faamaʻaaina loto o ē ua ia puʻea faamanu o ofaga, o le ā la e mafai ona tatou faia e fesoasoani ai ia i latou? E manaomia ona tatou faaoo atu i o latou mafaufau ma loto le Afioga a le Atua. Sa tatalo Paulo mo tagata Efeso ina ia faapupulaina mata o o latou loto. (Efe. 1:17, 18) E leai se isi mea e sili atu ona malosi na i lo le Afioga a le Atua ina ia paʻia ai le loto. (Efe. 4:12) O le iloaina o lenei mea e ao ona uunaia ai i tatou e atiina aʻe le tomai i le faaaogāina o le Tusi Paia pe a talanoa ma isi.
4 O au tali i fesili o loo mulimuli mai atonu o le a fesoasoani ia te oe e faimeamaeʻa atili ai i le faiva. Pe e te sauniuni lelei mo le auaunaga i le fanua? E fai ea ni au vaega faataʻitaʻi e te faamasani ai ma upu amata o talanoaga e puʻea ai le naunau o tagata o aiga? O tāua ea ia te oe le aʻoaʻoina o le Mataupu mo Talanoaga o loo iai ma taumafai e faaaogā? Pe e te tauivi ea e felafolafoai faatauanau i le Tusi Paia ma aiga?—Galu. 17:2.
LE OLOMATAMATA O SE FESOASOANI
5 Ua fesoasoani Le Olomatamata i le faitau miliona ina ia liliu mai nai le pouliuli i le malamalama. Ua ia faailoa mai ia i tatou le auala e faatatau ai mataupu silisili tau amio a le Tusi Paia, ia malamalama i ona valoaga mo o tatou aso, ma le faaeseesega i le va o le tapuaiga moni ma le tapuaiga sese ina ia savavali ai i le ala ua faamaonia e Ieova.
6 O le ā ua saunia e upu moni o le Tusi Paia o se autū i Le Olomatamata? Ua fesoasoani ai i ituaiga uma lava o tagata agaʻi i le faaolataga e ala i le poto saʻo i le Atua ma lona Alo. (Ioane 17:3; 1 Timo. 2:4) Na tusi mai se tasi tagata faitau: ‘Maeu loʻu talisapaia o Le Olomatamata! E ao ona fesoasoani ona mataupu i tagata uma lava ina ia iloa manino ai taimi ma tau o loo tatou ola ai. Faafetai lava mo le aofaiga tele o sailiiliga, suesuega, ma le galuega ua faaaluina i le sauniunia o Le Olomatamata, lea ua ioeina o se meaʻai faaleagaga.’
FAAAOGĀ LE FAAUTAUTA
7 A o faagasolo lenei masina lona lua o le tauiviga o le tusiga o le Olomatamata, e manaomia ona tatou sailia avanoa e liliu mai ai tagata nai le pouliuli i le malamalama. O le a fesoasoani ia i tatou talanoaga faale-Tusi Paia ma tagata tatou te asiasi i ai i lea fale ma le fale ina ia faia ai lenei mea. A tatou tau i tagata o ē e faaalia le naunau moni i le feau o le Malo, e mafai ona tatou faasino i ai le aogā o le faitauina pea o Le Olomatamata. Na aumaia i La Tatou Faiva o le Malo o Me 1990 ni manatu i le auala e iloagofie ai le naunau. O se mea lelei le toe faitauina o lena faiva. Afai e masani lē ona le fale i le mekasini ma talisapaiaina, e mafai ona e fesiligia o ia pe manao e fai ai sana tusiga. E faitalia oe pe amata le tusiga fou a le tagata i se tusiga e ono masina pe afai e aliali mai e talafeagai lena i lea taimi. A o faaauau ona e asiasi atu e atiina aʻe le naunau o le tagata, e mafai ona e faamautinoaina pe faamata e ao ona toe faafou le tusiga.
8 A o tatou ō atu i lea fale ma lea fale, auai i le molimau i magaala, pe molimau lē fuafuaina i uo faigaluega, uo i aʻoga, ma tauaiga, o lena tatou te auai i le faasalalauina o le upu moni e mafai ona tuu saʻolotoina ai tagata. (Ioane 8:32) O Le Olomatamata o se meafaigaluega faapitoa lea e mafai ai ona fesoasoani ia i latou ina ia maua le saʻolotoga ma iloatino ai le faamoemoe o le ola e faavavau, ma liliuina ai i latou nai le pouliuli i le malamalama.