Ua Lē Taofia Lo Latou Molimau Atu

¹ Ua mataulia i tatou i lo tatou igoa o Molimau a Ieova, ma ua faamatalaina ai mea o loo tatou faia. Ua tatou molimau atu i uiga silisiliese o lo tatou Atua, o Ieova. (Isa. 43:10, 12) E tatau i tagata taitoatasi o fia avea ma sui o le faapotopotoga, ona auai i le avatuina o lenei molimau. O le auala autū o faia ai le molimau atu, e ala lea i la tatou faiva i le lautele, lea e aofia ai le ō atu mai lea fale i lea fale, le galuega i magaala, le faia o toe asiga, ma le faia o suesuega faale-Tusi Paia. Ua talafeagai ai le uunaia o i tatou uma ina ia aapa atu e faia se sao atoatoa.—1 Kori. 15:58.

² Peitai, o nisi tagata o le faapotopotoga e faatapulaa le tele o mea latou te mafaia. O ni maʻi matuia po o le lē malosi lelei o le tino e mafai ona saisaitia ai i latou. E ono faatulai mai e tauaiga tetee ni toatugā e faavaivaia ai. Atonu e faasāsā se talavou e sona matua e lē talitonu. O i latou e nonofo i nofoaga mamao ese e leai ni taavale atonu o le a lagona le faigata ona molimau atu. O se uiga masani o le matamuli e ono faapogai ai le au matafefefe e faatalatu. O nisi tagata talaʻi o ē o loo aafia i nei tulaga po o nisi mea e tali tutusa, atonu e iai le lagona ua lē o ausia e i latou mea o manaomia mo Kerisiano, talu ai o mea o loo latou mafaia e matuā itiiti lava na i lo o mea o loo faia e isi, ma e itiiti foi na i lo o mea o loo latou matuā mananao e fai. E leai se mafuaaga o le a latou taʻu faatauvaaina ai fua ā latou lava taumafaiga. (Kala. 6:4) E faalototeleina i latou i le iloa e faapea, o loo finagalo malie Ieova pe a latou faia mea silisili i so o se tulaga ua latou iai.—Luka 21:1-4.

³ Mauaina o se Auala e Fai ai se Sao: E faitau afe mea na tutupu ua faamatalaina e faaalia ai le auala na lē faatagaina ai e nisi o ē na iai i tulaga faigata, toatuga e taofia ai la latou molimau atu. Ua latou taulamua i le amataina o ni auala eseese e faia ai le molimau atu lē fuafuaina. O i latou ua taofiofia i aiga, ua latou faaaogā le telefoni e saunia ai avanoa e tele e molimau atu ai. E faitauina uma lava so o se tasi e asiasi mai o sē o le a fia faalogo. E tusa lava pe lē mafai e se avā e tetee lona aiga ona molimau atu i lona aiga, ae na te faaaogaina avanoa e talanoa atu ai i ona tuaoi po o isi latou te fetaiai i ana galuegafai o aso taitasi.

⁴ Atonu e faasāina se talavou e sona matua lē talitonu ina ia aua neʻi auai i la tatou molimau atu i le lautele. Na i lo o le faatagaina o lena mea e avea o se toatuga ua lē mafoia, ae atonu o le a ia vaai atu i ē o latou vasega ma ona faiaoga, o sana ia lava “oganuu” lea, ma mafai ai ona ia molimau lelei atu, ma atonu foi na te faia ai ni suesuega faale-Tusi Paia. E toatele i latou o loo nonofo i nofoaga vavae ese ua mafai ona faia se sao e ala i le tusiaina o ni tusi. O i latou ua uunaia i le maelega faa-Kerisiano o le a saili pea mo ni auala ina ia alofia ai le avea o i latou ma “ē paie pe lē fua mai e tusa ai ma le poto saʻo i lo tatou Alii o Iesu Keriso.”—2 Pete. 1:8, NW.

⁵ I lo tatou sao i le galuega o le molimau atu, ua faataatia ai e Ieova se faatulagaga maopoopo mo tagata uma, e faapea, e ao ona tatou “faia ma le loto.” (Kolo. 3:23) E ui lava e eseese le tele o le taimi tatou te faaaluina ma e eseese foi mea tatou te mafai ona faataunuu, ae o loo tutusa pea le uunaiga na mafua ai—o le alofa moni lea e mapuna aʻe mai “le loto atoa.” (1 No. 28:9; 1 Kori. 16:14) Pe afai tatou te tuuina i ai le mea silisili tatou te mafai, o le a lē taitai la ona iai se mafuaaga tatou te lagona ai faapea ua leai so tatou faatuatua, po o i tatou o ni sui lē aogā o le faapotopotoga ona o le itiiti o ni mea ua mafai ona tatou faia. I le pei o Paulo, ua mafai moni ai ona tatou faapea atu, ua tatou ‘lē faafitia le taʻutaʻu atu o mea e aogā po ua tatou lē faafiti foi i le aʻoaʻo atu i le lautele.’—Galu. 20:20.