Ia Aogā le Faaaogaina o le Polosiua Fou
1 I la tatou tauaofiaga itumalo na faatoʻā mavae atu, sa tatou fiafia ai e mauaina le polosiua fou, Pe a Maliu se Tasi e Pele i a te Oe. E tatau ona fiafia i ai so o se tagata, auā e toatele ua faanoanoa ona o le toesea e le maliu o se tasi sa pele. O le faatosina mata o ata moni na tapue o loo iai, ma ata tusi, e ao ona faafaigofie ai le ofoina. I le itulau e 29, o loo iai le ata tusi o Lasalo lea na toe faatuina mai le oti, ua faaalia ai le ‘faanaunauga sili o Iesu ina ia aveesea faatamaiaga o le oti.’ I le itulau e sosoo ai lena o loo tumu atoa i le ata tusi, ua faaata mai ai se vaaiga olioli o le toetu i le lalolagi fou. Maeu le tatau i lenei mea ona faamafanafanaloto i ē o loo faavauvau!
2 E mafai ona avea lenei polosiua o se fesoasoani sili, mo le faamafanafanaina o ē ua faanoanoa. Ua fuafuaina mo ni talanoaga fetufaai. O fesili e toe faamatilatila ai manatu tāua, ua i le pusa o loo i le faaiuga o vaega taitasi, na i lo le pito i lalo o itulau taitasi. E mafai ona e faaaogā “Fesili e Manatunatu i Ai” i so o se auala e te lagona o le a sili ona aogā i lau tagata aʻoga.
3 A o faia toe asiga, ia filifili lelei ni manatu mo talanoaga na o loo i le polosiua. Atonu e te manatu e talafeagai ona faaali i ai le itulau e 2, o loo iai faasologa o mataupu, ma fesiligia lē e ona le fale i se mataupu e fiafia i ai. Ia mataalia i manaoga o tagata taitoatasi. Ia tuu le avanoa e faaali mai ai ona lagona, ona faaali lea i ai o le auala ua aumaia ai e le polosiua se faamafanafanaga. Ua faaalia i vaega taitasi, le tāua o le faaaogā o mau o le Tusi Paia, na o loo iai faavae mo lo tatou faamoemoe.
4 O le tamai ulutala i le itulau e 5, “O loo Iai se Faamoemoe Moni,” ua faamatilatila ai le faamoemoe faamafanafanaloto mo ē ua maliliu, lea ua faavae mai i le Tusi Paia. E ao ona faagaee e lenei mea le naunautai mo se talanoaga i le mataupu, “Se Faamoemoe Mautinoa mo Ē ua Maliliu” i le itulau e 26-31. O le pusa i le itulau e 27 ua aumaia atili ai “Mau mo Faamafanafanaga.” O le tagata e ōna le fale, o lē o loo faavauvau, o le a vave lava ona ia iloaina, e moni lava, o Ieova “o le Atua foi e ana le faamafanafanaga uma.”—2 Kori. 1:3-7.
5 I se auala faautauta, ua talanoaina ai i vaega faaopoopo, uiga eseese e faaalia, pe a maliu se tasi e pele. Ua latou faaalia le auala e foia ai le faanoanoa, ma le auala e mafai e isi ona fesoasoani ai i taimi faapena o mafatiaga. Ua iai se pusa i le itulau e 25 e faapea, “Ia Fesoasoani i Fanau e Faafetaiaia le Oti.” E tatau ona fesoasoani lenei i mātua, o ē e tatau ona onosaia lenei faafitauli.
6 Ia iai pea se isi kopi e faaleoleo i taimi uma, ma faaaogā mo le molimau atu lē fuafuaina. Atonu e te manao e asiasi atu i ni falemaliu o loo iai i la outou oganuu, e fesili i ai pe latou te fia maua ni kopi ina ia faamafanafana atu ai i aiga o loo faanoanoa. Po o lou faalatalata atu foi ma le faautauta i ē o loo faavauvau o loo iai i fanuatanu, i taimi latou te toe foi ai e asiasi i le tuugamau o sē e pele.
7 Tatou te olioli, ona o Ieova, o le Atua “o le na te faamafanafanaina e ua faamaulaloina.” (2 Kori. 7:6) Tatou te manatu i ai, o se faaeaga le iai o se sao i le ‘faamatalaloto atu i a i latou nei o loo faanoanoa.’—Isa. 61:2.