Fesoasoani i Isi Ina ia Maua le Faamafanafanaga
1 E toatele tagata ua fiu e faalogo i tala e uiga i mala, taua, solitulafono, ma mafatiaga. E ui lava la ina iloga mai le leai o ni faamafanafanaga i lipoti o tala fou i aso nei, ae o le mea lena o loo moomia moni e tagata. Ina ia faamafanafana atu, o lona uiga “o le tuuina atu o se faamalosiauga faatasi ma se faamoemoe” ma “ia faatoafilemu le faanoanoa ma le mafatia” o se tasi. I le avea ma Molimau a Ieova, ua faaauupegaina ai i tatou e fesoasoani atu i tagata i lenei auala. (2 Kori. 1:3, 4) O a tatou polosiua e faavae i le Tusi Paia ia o le a tatou ofoina atu ia Iulai ma Aokuso, o loo iai ni feau faamafanafana o le upu moni. (Roma 15:4) O ni nai fautuaga nei mo le ofoina atu o polosiua i tulaga eseese:
2 O se tala matautia mai tala fou e mafai ona maua ai se avanoa e avatu ai se molimau ma avatu ai se faamafanafanaga i isi, atonu e ala i lou faapea atu:
◼ “Pe a tutupu mea faapena, ona tau mānatu ai lea o isi po o soifua moni le Atua, ma afai o lea, po o manatu alofa moni mai o ia ia i tatou? O le ā sou manatu? [Faatali mo se tali.] O le tasi o auala e iloa ai po o iai se Atua, o le faatatauina lea o se mataupu silisili ua faavaeina lelei.” Faitau le Eperu 3:4. Faasino i isi mea o loo siomia ai i tatou o loo manino le tatau ona iai o sē na faia ia mea. Ona e faapea atili atu lea: “O loo ia te au se polosiua ou te iloa o le a faamafanafanaina ai oe. O lona matua e faapea, Po o Silasila Alofa mai ea le Atua ia i Tatou? [Faitau fesili o loo i le faavaa.] O loo iai faamaoniga e mautinoa ai e lē gata ina soifua le Atua, ae ua lē pine ona ia faaiuina loa lea o tulaga lē faamasino tonu uma ia o loo tatou fesagai i aso nei. Pe e te fia faitau i ai?” Fai se fuafuaga e toe foi atu e asia.
3 I le toe asiga, e mafai ona e faapea atu:
◼ “Sa ta talanoa talu ai i le faamaoniga e iloa ai o loo soifua le Atua, lea na ou tuua ai le polosiua, Po o Silasila Alofa mai ea le Atua ia i Tatou? Ai o e matauina le manatu lenei i le itulau e 7. [Faaali atu le ata ma aotele le palakalafa e 15.] Ua na o se faaaoaoga se tasi lenei e faaalia ai e tatau lava ona iai se Atua alofa o loo soifua. [Faitau le palakalafa e 27 i le itulau 8.] O le faia o se suesuega faale-Tusi Paia ua fesoasoani ia te au e feagai ai ma faafitauli o le olaga i aso faisoo, auā o loo aumaia ai le silafaga a le Atua e uiga i mataupu fai.” Ofo i ai e faataitai le faia o se suesuega.
4 E mafai ona molimau atu lē fuafuaina e faaaogā ai le polosiua, “Agaga o Ē ua Maliliu.” E mafai ona e faailoa atu oe ma faapea atu:
◼ “Pe na e vaai i lenei polosiua faaoso naunau? Ua matuā faafiafiaina lava aʻu ina ua ou faitau i ai.” Faitau fesili o loo i le faavaa o le polosiua i se auala e faaoso ai le naunau fia iloa o le tagata. Fesili i ai po o le ā sona manatu ma faatali mo se tali. Suʻe le polosiua i le itulau e 18 ma faapea atu: “Seʻi mātau le mea o fai mai ai le 2 Korinito 11:14. Ua faaalia i lenei fuaiupu, e tatau ona tatou matuā faaeteete ina ia aua neʻi faaseseina i tatou e Satani ma ana agaga leaga. Ua faamatalaina mai i lenei polosiua le mea e tatau ona tatou faia ina ia ʻalo ese ai mai le maileia e Satani. Pe e te fia faitau i ai?” Taumafai ina ia iloa le suafa o le tagata ma fesili po o fea e nonofo ai ina ia mafai ai ona e asiasi atu i ai i lo latou aiga.
5 I le asiasiga e sosoo ai, atonu e te fia faataitaia lenei faafeiloaiga e amata ai se suesuega:
◼ “Ou te manao e faaauau la ta talanoaga talu ai e ala lea i le faaalia atu o le mea o fai mai ai le Tusi Paia e uiga i le lumanai. [Talanoa i le mataupu i le itulau e 28 o le polosiua, Agaga o Ē ua Maliliu.] Ua faamatala mai i le Faaaliga 20:1-3 le mea o le a tupu ia Satani. [Faitau.] O le ā le mea o le a tupu i le lalolagi pe a tafiesea Satani? E mafai ona e maua le tali e ala i le suesueina o le Afioga tusia a le Atua, le Tusi Paia. Ou te fia ofoina atu la ia te oe lena avanoa.” Faamatala i ai le auala e faia ai a tatou suesuega faale-Tusi Paia e aunoa ma se totogi, ma faia ni fuafuaga e amataina se suesuega.
6 O lenei faafeiloaiga mautinoa e mafai ona faamafanafanaina ai i latou o ē ua maliu se tasi e pele:
◼ “O loo oʻu fesoasoani atu ia i latou uma o ē ua maliu se tasi e pele. Talu ai atonu o se tasi lenei o mea e aupito sili ona faigata ua fesagai ma so o se tasi o i tatou, ua saunia ai lenei polosiua, Pe a Maliu se Tasi e Pele i a te Oe. E faitau miliona tagata ua mafai ona fesoasoani atu i ai lenei polosiua. Ou te fia faailoa atu ia te oe le mea o fai mai ai e uiga i se folafolaga faafiafia loto na faia e Iesu Keriso. [Faitau le palakalafa e lima i le itulau 26, e aofia ai ma le Ioane 5:21, 28, 29.] Seʻi mātau lenei ata i le itulau 29 o loo faaatagia ai i le faamatalaga a Evagelia le faatuina moni lava e Iesu o Lasalo nai le oti. Afai e te fia faitau i lenei polosiua faamafanafana loto, ia ou te fiafia e tuu le kopi lenei mo oe.”
7 Pe a e toe foi atu, e mafai ona e faaali atu i ai le ata i le itulau 29 o le polosiua, “Pe a Maliu se Tasi e Pele i a te Oe” ma e faapea atu:
◼ “Manatua la ta talanoaga e uiga i le toe faatuina e Keriso o Lasalo. [Faitau upu o le ata i le itulau 28, ma talanoa le mataupu i lalo o le tamai ulutala i le itulau e 27 e faapea “Pe na Tupu Moni Ea?”] Afai e te fia talitonu e mafai ona e toe vaai i sē pele ua maliu, seʻi oʻu fesoasoani atu ia te oe ina ia avea le faamoemoe o le toe tutū o se mea moni ia te oe.” Ofo i ai se suesuega faale-Tusi Paia i le aiga.
8 Seʻi o tatou faia le mea aupito sili tatou te mafaia i masina o i luma e faataitai ai ia Iesu e ala i le ‘faamafanafana atu i ē uma lava o faanoanoa.’—Isa. 61:2.