Ia Faamanū atu ia Ieova “i Aso Uma Lava”
1 O loo iai i le Salamo 145:2 se folafolaga na faia e le tupu o Tavita ia Ieova e faapea: “Ou te faamanu atu ia te oe i aso uma lava; ou te vivii atu foi i lou suafa e faavavau faavavau lava.” Ua ia i tatou foi la se mafuaaga e faamanū ma vivii atu ai i lo tatou Tamā faalelagi! Ae e mafai faapefea ona tatou faataʻitaʻi i le faaaoaoga a Tavita i le faasilisilia o le pule silisili ese a Ieova “i aso uma lava”?
2 Ia Faatutumuina O Tatou Loto i le Faafetai ia Ieova: O le suesueina e lē aunoa o le Afioga a le Atua, e matuā faateleina ai lo tatou loto faafetai mo le mea ua faia, o loo faia, ma o le a faia e Ieova mo i tatou. A o faatupuina lo tatou talisapaia mo ana galuega ofoofogia, o le a faagaeeina ai i tatou e taʻutaʻu atu ona lelei. (Sala. 145:7) O le a tatou vivii atu ai ma le naunautai ia Ieova i taimi talafeagai uma lava.
3 Vivii ia Ieova i Talanoaga i Aso Faisoo: Pe a talanoa ma tuaoi, uo i le aʻoga, aumea i galuega, ma isi e masani ona tatou feiloai i aso faisoo, e mafai ona tatou maua ai ni avanoa e faailoa atu ai lo tatou faamoemoe ia i latou. O se tuaoi atonu o faaalia le popole e uiga i le solitulafono i le nuu; o se uo i le aʻoga atonu o loo popole e uiga i le faaaogaseseina o vailaau faasaina po o amioga lē mamā; o se aumea i le galuega atonu o faaalia se manatu e uiga i mataupu faapolotiki. E mafai ona tatou faasino atu i mataupu silisili ma folafolaga i le Afioga a le Atua o loo faaalia ai le auala saʻo e ui ai i le taimi nei, ma le vaifofo mulimuli mo nei faafitauli. O upu faapena e fai atu i le ‘taimi tatau’ e ono avea ma faamanuiaga!—Faata. 15:23.
4 Ia Talanoa e Uiga ia Ieova i Taimi Uma: O le tagata na te matuā talisapaiaina Ieova, e manao e talaʻi atu le tala lelei i le toatele o tagata e mafai ona ia oo atu i ai. (Sala. 40:8-10) E tusa ai ma lenei tulaga, e tatau ona tatou fesili ifo ia i tatou lava e faapea, ‘Po o oʻu faia ea mea uma ou te mafaia e tusa ai ma loʻu tulaga?’ Ua iloa e le toatele, o le faia o ni suiga talafeagai, ua mafai ai ona avea i latou ma paeonia sauatoa. Afai ua lē mafai i le taimi nei ona faia lena mea ona o tulaga o loo iai, ae pe mafai ona auai e avea o ni paeonia lagolago? Talu ai o le vaitaimi o le Faamanatuga o loo fotuai mai o se taimi mo gaoioiga faateleina, o masina la o Mati ma Aperila o le a avea o se taimi lelei lea e faateleina ai la tatou auaunaga e ala i le avea o se paeonia lagolago.
5 Fesoasoani i Ē Fou ina ia Aufaatasi ma i Tatou i le Faamanūina o Ieova: O le faamanatuina o le Faamanatuga o le maliu o Iesu, ua faamanatu mai ai pea ia i tatou e uiga i mafuaaga e tatau ai ona tatou loto faafetai ia Ieova ma vivii atu i Lona suafa. O se taimi faapitoa lenei e sili ona lelei e faalaeiau ai a tatou tagata aʻoga ina ia aufaatasi ma i tatou i le taʻutaʻuina atu i le lautele e uiga i le pulega tautupu a Ieova. Ia uunaia i latou ina ia manatunatu faatasi ma le tatalo i mea o loo taʻua i palakalafa 7-9 i le itulau e 173-175 o le tusi, Le Poto e Taʻitaʻia ai i le Ola e Faavavau. Afai ua agavaa i latou, e leai se pogai e latou te faatalatū ai ona o le leai o so latou poto masani. O loo iai tagata talaʻi tomai e mafai ona faailoa atu ia i latou le auala o loo faia ai le galuega talaʻi o le Malo. Afai e mafai e tagata fou ona maua le lototele e tautala atu ai e uiga i le tala lelei, e mafai ona latou mautinoa, o le a fesoasoani Ieova ia i latou.—Galu. 4:31; 1 Tesa. 2:2.
6 Afai tatou te saili ina ia faamanū ia Ieova i aso uma lava, o le a maua ai e i tatou lava faapea ma isi aogā tumau.