Pe o Ola E Ua Oti? Ua Fetalai le Atua

NA LELE se vaalele laititi mai le tasi aai o Aferika i Saute e malaga i se tasi nuu e tusa ma le 250 maila (400 km) le mamao. E na o pailate ma lona afafine laititi e 12 tausaga sa i totonu. Ina ua la taumafai e tulaueleele ona o se faalavelave faafuasei, na paū le vaalele, ma oti ai i laua uma.

“Na o Ieova le Atua na silafia loʻu tiga ona o ē ua toese, a e maise foʻi le tauiviga na fesagai ma aʻu,” o upu na sa manatua e Peti, le avā ma le tinā foʻi. Sa faapefea ona ia gafatia? “Sa ou tatalo maumauaʻi ma le faatauanau mo le loto tele ma le malosi e feagai ai ma nei tulaga ina ia mafai ai ona ou fesoasoani atu i isi ia mafai ona latou fesagaʻi ma le faigata.” Sa maua mai foʻi e Peti le tele o le faamafanafanaga mai mea ua fetalai ai le Atua e uiga i le tulaga o ē ua oti ma le faamoemoe o le toetu.

O le ā fa a le Atua e uiga i ā ua oti? Ua tali le Tusi Paia: “A o ē ua oti, latou te le iloa se mea.” (Failauga 9:5, The Jerusalem Bible) O lea o ē ua oti ua lē toe iloa se mea. O le tulaga faigofie lena. Ai se ā la e talitonu ai le toatele i lona tuʻu feagai ai? Auā ua ooleina i latou e se taufaasese ua tausagā ma le mataʻutia faalelalolagi aoao!

O Se Taufaasese Faalelalolagi Aoao

Na amataina lava i le uluaʻi pepelo na tautalagia. O le faamatalaga faaletalatuufaasolo i le tusi o le Tusi Paia o le Kenese o loo auiliiliina ai. Ua faapea mai: “A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:17) O le fetalaiga lena a Ieova le Atua na tulei atu ai i le uluaʻi tane o Atamu. Seʻi faatusatusa nei la, ma le Kenese 3:1-4, lea na tautala atu ai Satani e ala i le gata, e faaseseina ai Eva ia lē usiusitai i le Atua i lona faapea atu: “Lua te le oti lava.” O lea sa teteʻe ai Satani i le mea na fetalai mai ai le Atua. I lena auala na ia faaupu ai le uluaʻi pepelo, ma avea ai o ia o le “tamā o le pepelo.”—Ioane 8:44; Faaaliga 12:9.

A e peitaʻi na oti lava Atamu ma Eva, ma i lea ua faapena foʻi le faitau miliona o isi. Na faapefea ona sisiʻo e Satani le tala pepelo i lena mea? E ala i le totoina mulimuli ane ai o le manatu faapea, e ui ina oti le tino, a e i ai se mea e ola pea. O lenei mea, na mulimuli ane avea o se aʻoaʻoga faavae a lotu i aso ua mavae ma sa talia e le faafilosofia Eleni. O lea la, o le talitonuga i le ola pea o le solu ua toetoe lava o se talitonuga ua aoao lona taliaina. Ma mo le toatele o ē ua talitonu faapea faapea o ē pele ia i latou ua feoti o loo ola i se nofoaga atonu ua avea o se manatu e faamafanafanaina ai. Peitaʻi o le fesili faitaulia: E moni ea lea mea?

E Ola Pea Lou Solu?

O le upu “ola pea” e faatolu ona taʻua i le Tusi Paia, ma e maua uma lava i Tusitusiga kerisiano Eleni. O le iloiloina o lona faaaogāina e faamanino mai ai le mea lenei: O le tagata e leʻi fanau mai ma le mana e mafai ai ona ola pea.

Seʻi manatu mo se faaaʻoaʻoga i upu a Paulo i le 1 Timoteo 6:15,16 ua ia faamatalaina ai Iesu Keriso “o le Tupu o tupu ma le Alii o alii, o loo na o ia o lē soifua pea lava.” Ua faapefea ona faaesea Iesu mai isi “tupu” ma “alii”? E soifua pea o ia; a o i latou e leai.

E moni, o le ola pea ua folafolaina ia i latou o soʻo o Keriso, o ē ua valaauina ia pule faatasi ma ia i le lagi. (1 Peteru 1:3, 4) O lea, i le 1 Korinito 15:53,54, ua tatou faitau ai: “Auā e tatau ona ofu o lenei tino iu vale i le tino ola pea, . . . ona taunuu ai lea o le upu ua tusia, Ua faaumatia le oti i le manumalo.” A e matau o le ola pea e “ofu.” O se taui mo Kerisiano filifilia faamaoni. O se mea e lē tofia i tagata uma.

I le ma lea, e le o fai mai le Tusi Paia e i ai pe na tuuina atu i le tagata se solu. Na i lo o lea, ua faapea mai: “Ona faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola; ona avea ai lea o le tagata ma tagata ola.” (Kenese 2:7; faatusatusa le 1 Korinito 15:45) I le avea o se mea, e ese mamao lava ma le i ai o se mea. E leai se tasi e finau mai i lea mea moni faapea o le avea o se taʻifau e ese mai le i ai o se taʻifau! E faapena foʻi le avea o se solu e lē tutusa ma le i ai o se solu.

Mai le tele o faasinoga a le Tusi Paia e uiga i le oti o le solu, ua manino ai e le maua e tagata uma le faaeaga o le ola pea. Mo se faaaʻoaʻoga: “O le tagata e agasala e oti lava ia.” (Esekielu 18:4, 20) “E iu foi ina faaumatia nai le nuu o tagata uma lava o e le faalogo i lena perofeta.”—Galuega 3:23.

Talu ai ona e lē ola pea o tatou solu, o le ā e tupu pe a tatou oti? Tatou te “momoe” ona e tusa ai ma le taulaga togiola a Keriso, ua i ai le faamoemoe o le toetu. (1 Korinito 15:22) Ina ua oti Lasalo sa fetalai atu Iesu: “Ou te alu atu e fafagu ia te ia.” Ona ia faamatala atu lea ia te i latou: “Ua oti Lasalo.” (Ioane 11:11-14) Sa tautala foʻi Paulo e uiga ia i latou “o e o momoe.” (1 Tesalonia 4:13, 14; 1 Korinito 15:20) Ia, o lea, afai o loo momoe e ua oti . . .

Pe o le a Toe Fafaguina Mai?

Seʻi manatu i lenei vaaiga ofoofogia: O loo potopoto le motu o tagata i luma o se ana i Petania e latalata ane i Ierusalema. O loo i ai Iesu faatasi ma Maria ma Mareta i ina, o tuafafine o Lasalo o le na seʻi maliu atu nei ma o lona tino o loo i totonu o se ana ua tapunia i se maa tele. Sa poloaʻi atu Iesu: “Ave ese ia le maa.” Ua teteʻe Mareta: “Le Alii e, ua oo ina manogi, auā o lona po fa lenei.” A e ina ua uma se tatalo puupuu ona alaga atu le o Iesu ma le leo tele: “Lasalo e, ina sau ia i fafo.” Ona sau ai lea o le tagata o Lasalo i fafo! (Ioane 11:38-44) E mafai ona e manatunatu i le ofo ma le olioli o le motu o tagata—a e maise lava Maria ma Mareta?

Ana fai sa ola Lasalo i na aso e fa, pe na le ao ea ona ia faaalia atu lena mea i tagata uma? A e leai se faamaumauga faapea na ia talanoa atu i ni mea na oo ia te ia a o oti, a e le gata foʻi i lea ua faailoa mai e le Tusi Paia, “O e ua oti latou te le iloa se mea.”—Failauga 9:5, JB.

Sa leʻi tutasi le mea na tupu ia Lasalo. I se aai e taʻua o Naina, na fetaiaʻi ai Iesu ma le solo o le maliu o se taulealea talavou o le a ave e tanu. Sa fetalai atu Iesu: “Le taulealea e, ou te fai atu ia te oe, Ina tulai ia.” Ma o le ā na tupu? “Ona nofo ai lea i luga o le na oti, ua tautala.” (Luka 7:11-17) A e, i i nei foʻi, pe sa fai mai se tala a le taulealea e uiga i se nofoaga e ō i ai tagata pe a oti? E leai, auā o le mea moni lava na oti o ia.

Na faatutuina e Iesu, Paulo, Peteru, Elia ma Elisaia tagata oti. E leai lava se isi o i latou na oti na fai mai se upu e uiga i se ola pea a mavae le oti.

O nei vavega ofoofogia ua aumaia ai se uluaʻi tofo o le auala e tasi o le a mafai ai ona toe ola le faitauaofaʻi tele o tagata ua oti—e ala i le toe faatutuina mai i luga o le lalolagi i lalo o le Malo o le Atua. Sa fetalai Iesu: “Aua tou te ofo i lenei mea, auā e oo mai le aso e faalogo ai i [loʻu] leo o i latou uma ua i tuugamau, ma latou o mai ai.” (Ioane 5:28, 29) O se mea lena o le a sili atu ona faamanititino mo i latou o le a faaeaina e ola i lalo o le pulega a le Malo o Keriso i le afe o tausaga, ua lata tele mai. (Faaaliga 20:4, 6) O le toetu lava ia ua faamaonia ai e lē mafai ona ola ē ua oti. Afai e tatau ona toe faatutuina tagata, e tatau la ona muaʻi oti pe ua leai se ola.

Atonu o le a Fesili Nisi . . .

A e faapefea le fai mai o tagata faataulaitu ma isi faapea ua latou maua feau ma i ē ua oti? Pe le faamaonia ai i lenei mea e ola pea ē ua oti? E leai. E poto tele Satani, o le taufaasese sili o lē e masani lava ona “teu pei se agelu o le malamalama.” (2 Korinito 11:14, The New English Bible) E mafai e ia ma ana temoni ona faafoliga faapena, teteu e foliga mai o agaga o tagata ua oti! O lea, na taʻu manino mai ai e le tulafono a Ieova ia Isaraelu: “O se tasi . . . e fesili atu i aitu . . . po o se saili atu i e ua oti . . . e inosia e Ieova oi latou uma.” (Teuteronome 18:10-12) Ua fetalai mai foʻi Ieova o ē faitogafiti faataulaitu “e le fai le Malo o le Atua mo latou tofi” a e o le a faaumatia.—Kalatia 5:19-21; Faaaliga 21:8.a

A e faapefea i latou ua faapea mai sa i le tulaga toeitiiti o o i le oti? Ua lē faamonia ai ea i lena mea fapea e tuʻua e le agaga po o le solu le tino pe a oti? O Geoge Gallup, Jr, o se tasi na te taulimaina felafolafoaiga o manatu o le lautele po o le palota i Amerika, na ia suʻesuʻeina lenei mataupu ma faasalalauina i le iʻuga i le Adventures in Inmortality. O fomaʻi ma saienitesi o ē sa faatalanoaina na faigata ona talitonu e moni nei faamatalaga e uiga i tagata o ē na toetoe lava a feoti. Sa faapea mai se tagata suʻesuʻe tau i mea faiola i Maryland: “O nei mea o ni mea e oo i le mafaufau . . . o le faia o se totoga lavelave ma e tele togafiti na te faia pe a le lelei ona e tausia—tagai foʻi i mea e tutupu pe a faaaogā fualaau e faafoliga ai o loo e faalogo i ni leo pe vaai atu foʻi i ni mea.” Fai mai se fomai o le mafaufau i Ohio: “O nei lipoti o ni mafaufauga po o ni manatu e faafoliga ai o loo faalogo atu i ni leo po o le vaai foʻi i ni mea.” Na taʻua e se saienitisi i Michigan faapea: “O ni mafaufauga e oo i ai ona o tulaga faaletonu i faalogona e ootia po o se mea e tupu.”

Sa faaiuina e Gallup faapea o faamatalaga e uiga i le tulaga tali oti e leai lava “se auala e talitonu ai i le mea na talanoaina o se faamaoniga o le ola pea a mavae le oti.” Na ia faaopoopo mai: “Atonu o ni mafaufauga i totonu o loo i mafaufau o i latou ua i tulaga faaletonu o le tino.” Sa ia faapea mai foʻi o nisi tagata lotu fai mafaufau ua latou faamatala mai, o nei mea “o se vaega o pulega faatemoni e maileia ai le fanau a tagata.” E tumau pea le mea na fetalai mai ai Ieova i aso ua mavae: “O e oti latou te le iloa se mea.”—Failauga 9:5, JB.

O le ā e Tatau Ona E Faia?

Ia faaeteete i manatu ma aʻoaʻoga e faavae i le ululaʻi pepelo a Satani—“lua te le oti lava.” (Kenese 3:1-5) Ia talia le mea ua aʻoaʻoina e le Afioga a le Atua, faapea a oti le tagata “e faaumatia i lea lava aso ona manatunatu.” (Salamo 146:4) Ia talia foʻi faapea, o ē o momoe i le oti o le a toetutu mai i le vaitaimi o le pulega mamalu a le Atua, lea e tatalo pea i ai le toatele, “o le a toe tutū mai o e ua oti, o e ua amiotonu atoa ma e ua amioletonu.”—Galuega 24:15; Mataio 6:9, 10.

O le fafine maʻi e pei ona taʻua i la tatou uluaʻi mataupu sa olioli ina ua tau atu i ai le mea o fetalai mai ai le Atua e uiga i ē ua oti ma temoni agaga taufaasese. Na ia lafoaʻia ana mea mananaia ma isi mea faataulaitu, ma i ni nai aso sa matuā sili ona lelei ona faalogona. Ua fesoasoani nei o ia e faasaoloto isi mai tapuaiga i temoni.

O le fafine na maliliu ē ua pele ia te ia ina ua paū le vaalele sa faamafanafanaina foʻi i lenei manatu: Talu ai o ē ua oti ua lē iloa se mea, ua leai foʻi la se toe manatu i le taimi mo i latou. O lea e tusa ai ma lo latou tulaga e toe ala mai mo se isi avanoa i le parataiso faalelalolagi i lalo o le Malo o le Atua! Ua maʻimaʻi tele o ia e fesoasoani atu i isi ina ia iloa ua toeitiiti “soloiesea foi e le Alii o Ieova o loimata i mata uma lava.” (Isaia 25:8) Ua ia vaavaai atu nei i luma i le aso o le a toe ola mai ai ē ua pele ia te ia e ala i le toetu.

[Faaopoopoga i lalo]