O le Suiga i Pulega Ua Toeitiiti Oo Mai!

E TOATELE tagata ua lē amanaiaina se mea e sili ona tāua. O le mea lelei: I la latou tauiviga mo le pulea o le lalolagi, ua le taulau i malo o lo tauva ona latou iloa o loo i ai se pule silisili ma le malosi atu na i lo a la pulega. Ua la le amanaiaina le mea moni faapea “ua pule lē Silisiliese i le malo o tagata, na te tuuina atu ai foi i le ua ia finagalo i ai.” (Tanielu 4:25) O ai lenei ua filifilia e le Atua e Ona le Malosi Uma Lava e avea ma Tupu i le lalolagi aoao? O afea o le a ia maua ai le pulea o le lalolagi?

E I Ai se Tasi Tupu

A o leʻi valoia mai e uiga i le ‘tupu o le itu i matu ma le tupu o le itu i toga,’ na iloa ai e Tanielu i le faaaliga faavaloaga lenei mea e uiga i le Tupu filifilia a le Atua: “Ua afio mai i ao o le lagi Lē e pei o le Atalii o le tagata, ua oo foi ia i Lē ua mai anamua ona aso [o Ieova le Atua] . . . Ua foaiina atu ia te ia le pule, ma le viiga, ma le malo, ina ia auauna ia te ia o nuu uma, ma atunuu, ma gagana eseese; o lana pule . . . e le mavae atu ia, o lona malo foi e le faaumatia.”—Tanielu 7:13, 14.

Sa faaatagia e lena faaaliga le faagasologa o malo o le lalolagi i ni manu feʻai. Ma, o le mea moni, “e pule ai le tasi tagata i le tasi, e leaga ai o ia lava” i sauaga faamanu. (Failauga 8:9) Sa pule foʻi tagata i lalo o puleaga faamanu a alii agaga fouvale, a lo latou alii sili o Satani. (Tanielu 7:17; 10:3; faatusatusa le Faaaliga 12:9; 13:2-4) I le faaeseesega, o “lē e pei o le Atalii o le tagata” ua na maua le pule sili mai ia Ieova le Atua. O lenei pule tofia a le Atua e i ai uiga e tatau mo sē pule o le fanau a tagata o e na muaʻi faia i le amataga i “le faatusa o le Atua.” (Kenese 1:27) A e o ai o ia?

Sa faatatauina e Iesu ia te ia lava le taʻu o le “Atalii o le tagata” a o i ai o ia i le lalolagi e tusa ua 1,900 tausaga ua mavae. O lea, i le avea o se tagata, sa avea o ia o le “Atalii o le tagata” i le faaletino, ma sa ia faaalia ma le lelei atoatoa uiga tonu, e pei o le alofa, tigaalofa, ma le faamasino tonu. Sa ia tuuina atu foʻi lona ola e fai ma togiola o tagata, o lea ua faagaoioia ai e ia le vaega o le aiga vavalalata o le fanau a tagata—o le “Atalii o le tagata.”—Mataio 20:28; Eperu 2:11-17.

E le gata i lea, i le faatatauina o le valoaga a Tanielu, na fetalai ai Iesu: “Latou te iloa atu foi le Atalii o le tagata ua sau i ao o le lagi ma le mana ma le mamalu tele.” Sa ia faaatagia mulimuli ane ai o ia i se ata tutusa faapena, i lona faapea mai: “Pe a sau le Atalii o le tagata i lona mamalu . . . ona tietie ai lea o ia i lona nofoālii mamalu.” (Mataio 24:30; 25:31) Ua le o toe avea nei Iesu ua na o se tagata faatauvaa i luga o le lalolagi i aso nei. Talu lona maliu ma le toetu mai i le 33 T.A., ua avea nei o ia o se agaga faalelagi e foliga i le Atua. I le faaeseesega ma pule faaletagata, ua na o ia lava le tupu “o lē soifua pea lava, o lē afio i le malamalama e le masao i ai se tasi; e lei vaaia o ia e se tasi tagata, e le mafai foi ona vaai i ai.” (1 Timoteo 6:16) O le pulega a lona Malo o le a lē i ai uiga faamanu o agaga leaga o ē ua afaina ai malo faaletagata.

Ua na o Iesu lava le Tupu na tofia e le Atua e avea o Lana Mesia, po o le Keriso, ma ua tofia e pule i le lalolagi aoao. (Tanielu 7:14) O le uiga o lenei mea o malo faaletagata uma lava, e aofia ai ma le “tupu o le itu i matu” ma le “tupu o le itu i toga” e tatau ona oo atu i lo latou iʻuga a e suia e le Malo o le Atua i lalo o le pulega a Keriso.—Tanielu 2:44; faatusatusa Salamo 2:7,8,12.

“O le Alii Sili” ua Tauaveina le Pule

A e peitaʻi, sa leʻi amataina e Iesu lana pulega i luga o le fanau a tagata i le 33 T.A. Sa i ai se vaitaimi na ia faatali ai. Ina ua mavae lena taimi ona faamalosia lo lea o ia e Ieova “e pule i totonu o ona fili.” (Salamo 110:1,2; Galuega 2:32,36) I le valoia mai o lenei mea na faapea mai Tanielu: “O ona po foi ia e tulai ai Mekaeli, o le alii sili . . . e oo mai foi aso vale, e leai sona tusa talu ona faatoa tupu o nuu.”—Tanielu 12:1.

O lenei valoaga na mulimuli mai ina ua mavae ona faailoa mai e Tanielu le tauiviga i le va “o le tupu o le itu i matu” ma le “tupu o le itu i toga” i “ona po o le iuga” o le a oo atu ai i lona taualuga. I lenei tulaga, o le a alu atu ai se tasi o nei ‘tupu’ “ma le ita tele” ina ia faaumatia tagata e toatele. (Tanielu 11:40, 44, 45) Ona oo loa lea i le taimi mo Mekaeli “o le na te tulai ona o” ona o tagata o le Atua ma o le a ia gaoioi ma le poto ina ia mafai ona latou sosola ese.—Faatusatusa le Tanielu 11:2, 3, 7, 20, 21; 12:1.

O lea la, e faapefea ona faafesoʻotai o lenei mea ia Iesu? Manatua sa ia faaaofia le valoaga a Tanielu i lona valoia o ia lava o le a avea ma Tupu o le lumanai. E tusa ai foʻi ma lenei mea sa ia fetalai ai e uiga i le “puapuaga tele” e leai sona tusa. (Mataio 24:21, 29-31) Sa ia faasino manino atu lava i le taimi e oo mai ai “aso vale” na taʻua e Tanielu e tusa ai ma Mekaeli. (Faatusatusa Mataio 24:15; Tanielu 11:31) O lea, ua faaalia ai lava e Iesu o ia o Mekaeli o lē o le a tulai e pule.

Na tuuina mai e Iesu ma Tanielu nei valoaga ia la faamatalaga o mea o le a tutupu i le “gataaga.” O nei mea tutupu sa amataina lo latou faataunuuga talu mai le 1914. Na tagofia ai e Iesu le pule o se Tupu i le lagi ma sa ia pule ai i totonu o ona fili.—Mataio 24:3,7-12.

Parataiso Faalekelope—Ua Toeitiiti oo Mai!

Atonu ua uma ona e iloa faapea ua le taulau ona talia e nuu le Malo o Keriso. Ua latou teʻena le feau e uiga i lona faavaeina ma faaauau pea ona faatuina o latou tulaga fia silisili ese. O lena feau o se mea valea ia i latou. O lea, o le poto o le Atua i le filifilia o Keriso e avea o se Tupu “o le mea na le iloa e se alii e tasi o lenei lalolagi.” Ua faatauasoina e le faiga ua pulea e Satani ma ana alii agaga fouvale, ua latou teteʻe atu i le Malo Faa-Mesia.—1 Korinito 2:8; faatusatusa le Luka 4:5,6; 2 Korinito 4:4.

O lea, e pei ona valoia e Iesu, o i latou e talaʻia ma le faamaoni le Malo e sauaina. O le a oo lava i lalo o osofaʻiga e sili atu. (Mataio 24:9, 14; Tanielu 11:44, 45; faatusatusa le Esekielu 38:14-16) O lea, o le a afio mai Iesu o le “Tupu o tupu” ma le “Alii o alii” e tau ona o ona tagata. O lenei taua o le a iʻu i le manumalo aʻiaʻi mo le Tupu filifilia a le Atua. O ē na osofaʻia ona tagata ‘o o le a ō atu i lo latou iuga, ma o le a leai se fesoasoani mo i latou.’ O le a faaumatia atoatoa foʻi isi ‘tupu.’ —Faaaliga 11:15, 18; 19:11, 16, 19:21; Salamo 2:1-3, 6-9.

I le amata mai i le 1914, ua sili ona lalata le vaivaa o le “gataaga.” Sa fetalai Iesu o le tupulaga e vaaia le amataga o nei mea o le a vaaia foʻi lona iʻuga. (Mataio 24:32, 34) O le mea lea, ua faanatinati nei ona tatou tulata atu i lena vaitaimi mamalu le taimi o le a aaoina atoatoa ai e Keriso Iesu le pulega o mea i l.e lalolagi ma aufaatasi ai le fanau usiusitaʻi uma a tagata i lalo o lona malo e tasi.

Ioe, ua le pine a e oo mai le suiga o pulega. O lea, o le ā le uiga o lenei mea ia te oe? E mafai ona uiga faapea o lou lumanaʻi o le a iʻu faatasi ai ma malo faaletagata i aso nei ma ē o loo latou lagolagoina. A lē o lea, e faalagolago foʻi i auala o au gaoioiga, e mafai ona iʻu i le ola e faavavau ma le saogalemu i le lalolagi parataiso, e faatumauina ma pulea e le Malo o le Atua. E mafai ona faamaonia o lea pe afai e te lagolagoina ma le faamaoni le pulega a Keriso faatasi ai ma le faitau miliona o Molimau a Ieova i le lalolagi aoao.