Le Pogai Tatou te Manaomia ai le Poto Saʻo Lelei

“O le mea foi lea o i maua, talu le aso na ma faalogologo i ai, ma te leʻi mapu e tatalo mo outou ma talosaga atu ina ia faatumuina outou i le poto saʻo lelei e uiga i lona finagalo i le atamai uma ma le malamalama faaleagaga.”—KOLOSE 1:9, “NW”.

1. Faataʻitaʻi le eseesega i le va o le poto lautele ma le poto saʻo lelei.

TOETOE lava o tagata uma ua latou iloa po o le ā le uati, ae pe toafia ua latou iloa pe faapefea ona galue se uati? Atonu ua ia te oe se manatu lautele, ae pe mafai ona e talaia se uati, toe faafou, ma toe tuu faatasi? E mautinoa lava e mafai e se fai uati ona fai o lena mea. Aiseā? Auā e ia te ia le poto saʻo lelei ma le atoatoa i le auala e galue ai se uati. Ma ua faataʻitaʻia e lena mea le eseesega i le va o le poto lautele ma le poto saʻo lelei e uiga i se mataupu.

2. O le ā le eseesega i le va o ituaiga o poto e lua ua e matauina i le tulaga o lotu?

² E faitau miliona tagata ua iai se manatu lautele e uiga i le Atua. Ua latou faapea mai latou te talitonu i le Atua, e ui lava o a latou gaoioiga e masani ona faaalia ai le sese o lena faaupuga. I se isi taimi o le a fesili atu se misionare i lē ona le fale: “Talu ai o oe o se Katoliko, e tatau ona e talitonu i le Atua, pe saʻo ea?” Ma o le tali o le a faapenei, faatasi ai ma le faasino i le lagi: “A, ou te talitonu o loo iai se mea i luga i inā.” Pe e te taʻua lena mea o le poto ma le malamalama saʻo lelei e uiga i le Atua? E leai lava. Ma e masani lava o le iʻuga o lena lē malamalama o amioga lē faa-Kerisiano ia a i latou ua faapea mai o Kerisiano. (Faatusatusa Tito 1:16.) O le tulaga e iʻu i ai e pei ona faamatalaina e Paulo lea mea: “E pei ona latou leʻi malilie e taofi mau i le poto saʻo lelei e uiga i le Atua, na tuuina atu ai i latou e le Atua i se tulaga faalemafaufau lē faamaonia.”—Roma 1:28, NW.

3. O ā iʻuga pe a teena e tagata le poto saʻo lelei o le finagalo o le Atua?

³ O le ā na iʻu i ai lena leai o se poto saʻo lelei i le uluai senituri? Sa faia e tagata “mea e le tusa; o loo tutumu i latou i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ʻoleʻolega, ma le faatāutala; o tuaupua i latou, o e fai tala leaga, o e ʻinoʻino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i mātua, o e valelea, o e tuumavaega, o e le lotoaiga, o e le faamolemoleina, ma ē faalealolofa.” O le leai o so latou poto saʻo lelei o lona uiga e leʻi uunaia o latou loto agaʻi i le faia o galuega amiotonu.—Roma 1:28-31; Faataoto 2:2, 10.

O le ā le Eseesega?

4, 5. E tusa ai ma tagata e suesue i le faa-Eleni, o ā nisi o eseesega i le va o le gnoʹsis ma le e·piʹgno·sis?

⁴ O lenei eseesega i le va o le poto lautele ma le poto saʻo lelei ua faaalia lea i Tusitusiga Eleni. Ua tautala le uluai gagana Eleni e uiga i le gnoʹsis, poto (knowledge), ma le e·piʹgno·sis, poto saʻo lelei (accurate knowledge). O le uluai upu, e tusa ai ma le manatu o le tagata e suesue i le faa-Eleni o W. E. Vine, o lona uiga “muamua lava o se sailiga ina ia iloa, o se suesuega, o se iloiloga,”ae maise lava i upu moni faaleagaga e uiga i faamatalaga o le Tusi Paia.

⁵ O le e·piʹgno·sis, e tusa ai ma le tagata e suesue i le faa-Eleni o Thayer, o lona uiga “o le poto saʻo aʻiaʻi (precise) ma le saʻo.” Ma i lona tulaga faaveape, o lona uiga “ia oo ina masani maeʻaeʻa i [se mea], ia iloa maeʻaeʻa; ia iloa saʻo lelei, iloa lelei.” Ua taʻua e W. E. Vine faapea o le e·piʹgno·sis “ua faauiga i ai le poto matuā saʻo po o le atoatoa, le faautauta, le iloatino.” Ua ia faaopoopo mai faapea ua faamatalaina ai “se poto e sili atu ona atoatoa po o se poto atoatoa, o le faia o se sao sili i le mea ua iloaina e lē ua iloa, i lea, ua sili ona taaʻina ai o ia ma le malosi.” (O upu faasisipa o a matou.) E pei ona o le a tatou vaai nei i ai, o lenei faaupuga mulimuli e matuā tāua lava mo se Kerisiano.

6. O ai tusitala o le Tusi Paia ua faaaogāina upu mo le “poto” ma le “poto saʻo lelei,” ma aiseā e tāua ai le poto saʻo lelei?

⁶ E na o le toalua lava tusitala o le Tusi Paia o loo faaaogā le upu Eleni o le e·piʹgno·sis. O i laua ia o Paulo ma Peteru, o ē na faaaogāina le upu e faa 20 taimi.a E ese ai mai ia Luka, ua na o i laua foi ua faaaogāina le upu gnoʹsis, ua faaaogāina faa 23 taimi e Paulo ma faa 4 taimi e Peteru. O le mea lea o a la tusitusiga ua o ni taʻiala aogā la e tusa ai o le tāua o le poto saʻo lelei faatasi ai ma le manatu i le faaolataga. E pei ona taʻua e Paulo ia Timoteo: “O le mea lelei lenei ma le malie i luma o lo tatou Faaola, o le Atua, o lē finagalo ina ia faaolaina ituaiga uma lava o tagata, ma ia oo ina iloa le poto saʻo lelei o le upu moni.”—1 Timoteo 2:3, 4, NW.

Le Pogai e Tāua ai le Poto Saʻo Lelei

7. (a) Ina ia aogā, e tatau faapefea ona aafia i tatou i le poto? (e) O le ā le mataʻutia o iai pe a tatou faatalalē le poto?

⁷ O le mea lea, o le mauaina o le poto saʻo lelei o le upu moni e pei ona aʻoaʻoina i le Tusi Paia o se ki lea i le faaolataga. Ae peitai, o lena poto e tatau ona paʻia ai le loto, le nofoaga o uunaiga. E lē mafai ona tumau pea e avea na o se gaoioiga faalemafaufau po o le faaleaʻoaʻoga. E lē gata i lea, pe a maua ai, e ao loa ona faaaogā le poto o le upu moni ma ia toe faatumu. Aiseā e faapea ai? Auā o le mafaufau e manatua ai se mea, i le pei o se musele ua lē faaaogāina, e mafai ona oo ina vaivai ma lē lavā, ma i lea tulaga e mafai ai ona faigofie ona tuulafoaia lo tatou itu faaleagaga ma amata ona tafetafea malie ese atu ma faalotolotolua ai i lo tatou faatuatua. Atonu e matagataga ai la tatou uu i le “poto i le Atua.” O le a lē pine ae faaatagia lenei faalotolotolua i le leai o se tomai e mafaufau ai ma oo ina faia ai amioga lē faa-Kerisiano.—Faataoto 2:5; Eperu 2:1.

8. O le ā le tāua na vaaia e Solomona i le atamai ma le poto?

⁸ Ua tatou talisapaia ai la le pogai, ina o faamaoni Solomona, na ia faamaualugaina ai le atamai, le faautauta, ma le tomai e mafaufau ai. Na ia tusi: “A oo le poto i lou loto, ma ua mālie ia te oe le atamai; e faafeao le mafaufau ia te oe; e leoleo ia te oe le faautauta; ina ia laveai ia te oe ai le ala leaga.”b (Faataoto 2:10-12) Ua faaalia i nei upu faapea e tatau ona tatou atiina aʻe se faanaunauga aasa mo le poto saʻo lelei, lea e mafai ona aafia ai le loto ma le solu lava ia. Ae lē gata i lea, o le faavae lea mo le iai o le tomai mo mafaufauga lelei. Ma aiseā ua tāua tele ai lenei mea i aso nei?

9. O ai nisi o fili o le itu faaleagaga Kerisiano?

⁹ Ua tatou ola i “aso e gata ai” ua “oo mai ai taimi o omiga” po o “se taimi o faalavelave,” e pei ona valoia e Paulo. (2 Timoteo 3:1, Revised Standard Version; The New English Bible) Ua oo ina sili atu ma sili atu ona faigata ona tausisia lo tatou faamaoni faa-Kerisiano i lenei lalolagi paʻū maulalo. O amioga tatau faa-Kerisiano, o mea tāua faa-Kerisiano, ma ausiaga faa-Kerisiano ua lē faaaloalogia ma amusia. Ua osofaia le faatuatua o Molimau a Ieova mai itu uma lava—e taʻitaʻi lotu o Kerisinetoma o ē inoino i le feau o le Malo o loo tatou avatua i lea fale ma lea fale, e aposetate o ē galulue faatasi ma taʻitaʻi lotu o Kerisinetoma, e pule faafomaʻi o ē mananao ina ia faamalosia le tuiina o le toto ia i tatou ma a tatou fanau, e saienitisi o ē ua teena le talitonu i le Atua ma le foafoaga, ma e i latou o ē taumafai e faamalosia i tatou ina ia faagutugutulua i lo tatou solitu. O nei teteega uma ua faamaopoopoina e Satani, le pule o le pouliuli ma le lē iloa, le fili o le poto saʻo lelei.—2 Korinito 4:3-6; Efeso 4:17, 18; 6:11, 12.

10. O ā omiga atonu e faafaupuʻe mai faasaga ia i tatou, ma o le ā tatou te manaomia ina ia faafetaiaia ai nei mea?

¹⁰ E mafai ona faafaupuʻe mai omiga i le olaga i aso taitasi ina ia faatosina ai se Kerisiano e faia mea o loo faia e isi, pe i le tagofia o vailaau faasaina, le inu ma le lē onomea, le faia o amioga lē mamā tau amio ma le sauā, le gaoi, le pepelo, le faaʻoleʻole, le sosola ese mai aʻoga, pe na o le sailia foi o se olaga manatu faapito mo faafiafiaga. O le mafuaaga lena e matuā tāua ai le poto saʻo lelei. O se poto e sili atu ona atoatoa i le Afioga ma fuafuaga a le Atua e mafai ona taaʻina malosi atili ai o tatou mafaufauga ma a tatou gaoioiga i se auala mautinoa.—Roma 12:1, 2.

Se Atalii Faamaumauoa Faaonaponei

11, 12. O le ā se mea na tupu i le olaga moni ua faataʻitaʻia ai le valea o le teena o le poto saʻo lelei o le upu moni?

¹¹ E mafai ona tatou faataʻitaʻia lenei mea e ala i se mea moni lava na tupu i le olaga o se tama talavou o lē, ina ua faatoʻā 14 ona tausaga ma ua uma ona avea o se Kerisiano papatisoina, na tofotofoina lona naunau mo le upu moni. E pei lava o le toatele o tagata talavou, sa fiafia o ia i taaloga,ae maise lava le soka. Ae sa iai se faafitauli. Sa taaalo soka lana aʻoga i le po lava lea sa fai ai sauniga a le faapotopotoga. Sa lē lava le malosi o lona itu faaleagaga mo ia e fuafua tatau ai le lē aogā o le soka pe a faatusatusa atu i le aogā e tumau o le auai i sauniga faa-Kerisiano faatasi ma lona tinā ua oti lana tane ma lona uso ma lona tuafafine laiti. O lea na ia taofia ai le gaoioi e tusa ma le poto saʻo lelei ma filifili e aluese mai le upu moni. I le iʻuga, na faateʻaina o ia. Mulimuli ane, na ia oo atu i le faia o se auaunaga faavaegaau, o i inā na aafia ai i le tagofia o vailaau faasaina.

¹² I le 1986, ina ua foi mai lenei tama talavou mai le vaegaau, na ia toe mafaufau lelei, ma na ia tusi atu ai se tusi i se uo a lona aiga o lē sa auauna i le komiti faafaamasinoga lea na faateʻaina o ia. I lenei tusi na ia taʻua ai: “Ua ou fiafia e faailoa atu ia te oe nisi o tala tāua: Ua ou toe foi mai i le upu moni. . . . Ua oo ina ou iloa le mea na fai mai ai le aposetolo o Paulo i le 2 Korinito 4:4, faapea e iai le atua o lenei faiga o mea o lē o loo faatauasoina manatu. Mo se taimi umi, sa faatauasoina faaleagaga aʻu i mea sa tutupu i loʻu siosiomaga. Ina ua ou tuua le upu moni, sa ou lē iloa se tulaga matuā lamatia na ou faia. Ae i se taimi ua mavae atu, ma faafetai ia Ieova le Atua, ua mafai ona ou talisapaia ma le manino faapea sa ou sese i laʻu auala leaga o gaoioiga.”—Faatusatusa Luka 15:11-24.

13. Afai latou te salamō moni, o le ā le iʻuga mautinoa e mafai ona maua e nisi o ē na paʻūūese mai le auala? (2 Timoteo 2:24-26)

¹³ Ua toe foi nei lenei tama talavou i le auala o le poto saʻo lelei. Ua mafai nei ona ia ‘savali e taʻuaogāina ia Ieova seia oo i le iʻuga o le faafiafiaina atoatoa o ia.’ Ua mafai foi ona ia ‘fua mai ni fua i galuega lelei uma ma ua faateleina le poto saʻo lelei e uiga i le Atua’ a o ia tuliloaina lana aufaatasiga ma le faapotopotoga Kerisiano. Ma maeu le faamanuiaga e faafouina ai ua avea ai o ia mo lona aiga ina ua toe avea o ia ma soʻo o Keriso! Pe e te iloa ea nisi faaaʻoaʻoga faapena?—Kolose 1:9, 10; Mataio 11:28-30.

Iʻuga Leaga Tele o le Faatalalē Faaleagaga

14. (a) Ina ia alofia le paʻūūese, o le ā e tatau ona tatou faia? (e) O le ā ua tupu i nisi Kerisiano?

¹⁴ O le ā se lesona e mafai ona aʻoaʻoina mai lenei mea ma isi tulaga faapena? E faapea, pe a uma ona tatou maua ai le poto saʻo lelei e uiga i le upu moni, e manaomia ai ona tatou maumauai i le toe faafouina o faataamilosaga faaleagaga o le mafaufau ina ia lē paʻūūese. O a tatou mea faaleagaga e mafai ona oo ina vaivai pe afai tatou te faatalalē suesuega totino ma faaleaiga, sauniga faa-Kerisiano, ma le faiva. O le ā la e mafai ona tupu? E mafai ona tafetafea ese atu se Kerisiano sa malosi mai le faatuatua, atonu e oo lava ina paʻū atu i le faia o amioga sese, e pei o amioga lē mamā, po o le sesee atu foi i lalo i le faaseega maseesee o masalosaloga ma faamatalaga sese ma oo ina aposetate. (Eperu 2:1; 3:12; 6:11, 12) Ma le valea lava, ua oo ai ina toe foi atu nisi i aʻoaʻoga faa-Papelonia o le Tasitolu ma le lē mafai ona oti o le solu!

15. O le ā le lapataiga na tuuina mai e Peteru e uiga i le paʻūūese?

¹⁵ E mautinoa lava le talafeagai o upu a Peteru: “Auā afai na latou sosola ai mea leaga a le lalolagi ina ua iloa lelei o le Alii o le Faaola lea o Iesu Keriso, a e toe faalavelaveina, ma toilalo i latou i na mea, ona tele ai lea o le leaga o lo latou iuga i lo latou amataga. Auā e lelei pe a na latou le iloa le ala o le amiotonu, a e leaga ina ua latou iloa, ma toe liliu ese i le poloaiga paia sa tuuina mai ia te i latou. A ua taunuu ia te i latou le upu faataoto moni, Ua toe foi le ulī i lona lava puaiga; i le ma lea, O le puaa na faataeleina ua toe foi ia e taafili i le palapala.”—2 Peteru 2:20-22.

16. (a) Ua faapefea ona taʻitaʻiseseina nisi talu ai nei? (e) I ā gaoioiga o amioga ua taʻitaʻiseseina ai i latou ua paʻūū?

¹⁶ O i latou o ē teena le poto saʻo lelei o le upu moni e masani lava ona latou filifilia le auala o le faia o na o mea latou te manatu e lelei mo i latou lava. Ua latou lē toe talia le tiute tauave o le auai e lē aunoa i sauniga faa-Kerisiano po o le auai i le faiva i lea fale ma lea fale. O nisi ua toe foi atu lava e ulaula! O isi o loo fiafia ona ua lē toe tu matilatilaese i latou faapea e ese ona o mataupu o le solitu faa-Kerisiano ma le faaaogāseseina o le toto. Maeu se saolotoga! I le taimi nei ua oo lava foi ina mafai ona latou palota mo se tasi o itu faapolotiki a le “manu feai.” (Faaaliga 13:1, 7) I lea, i le avea o ni tagata lē mautū, ua faatosinaina ai nisi ma ua taʻitaʻiseseina mai le ala saʻo o le poto saʻo lelei e i latou o ē, a o ‘folafolaina atu ia i latou le saolotoga, ae o loo avea foi i latou lava ma pologa a le iʻuvale.’—2 Peteru 2:15-19.

17. O le ā le mataʻutia o iai mo i latou o ē ua paʻūūese mai le poto saʻo lelei o le upu moni?

¹⁷ Seʻi vaganā ua salamō i latou na ma toe foi mai i le upu moni, ona tuuina atu lea e i latou i latou lava i le faamasinoga lena na faaauivi mai e Paulo: “Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala, na o le faatali ma le mataʻu tele i le faasala, ma le toasa e mumū e susunu ai i e o tetee atu.” Pagā le valea ma le lē vaai mamao i le lafoaia o le poto saʻo lelei ia Ieova le Atua ma Keriso Iesu ona o aʻoaʻoga faaaposetate a Kerisinetoma!—Eperu 6:4-6; 10:26, 27.

Maelega Faatasi ma le Poto Saʻo Lelei

18. E tusa ai ma upu a Paulo, aiseā na lē taulau ai i taʻitaʻi lotu Iutaia ona talia Keriso?

¹⁸ E mautinoa lava sa iai le poto e uiga i Tusitusiga Eperu i taʻitaʻi lotu Iutaia i aso o Paulo. Ae pe sa o le poto saʻo lelei ea? Pe sa tataʻi atu ai i latou agaʻi ia Keriso o le Mesia folafolaina? Ua faamatala mai Paulo faapea ona o le tele o lo latou tuuina atu i le faavaeina o a latou lava amiotonu a ala i le Tulafono, ua latou teena ai e i latou ona gauai atu ia “Keriso [o lē] o le iʻuga o le Tulafono.” O le mea lea ua mafai ai ona faapea mai Paulo e uiga ia i latou: “Auā ou te molimau ia i latou, ua latou maelega mo le Atua; ae lē tusa ma le poto saʻo lelei.”—Roma 10:1-4, NW.

19, 20. (a) E mafai faapefea ona tatou maua le poto saʻo lelei? (e) O ā fesili o loo tumau pea e manaomia ona taliina?

¹⁹ E mafai la faapefea ona tatou maua lenei poto saʻo lelei? E ala i suesuega totino ma le mafaufau loloto i ai, faatasi ai ma le tatalo ma le auai i sauniga. O le uiga o lenei mea o le toe fafagaina pea lava pea o a tatou maauila faaleagaga, i se faaupuga. Tatou te lē gafatia ona faalagolago i le na o le poto na tatou muai maua ina ua tatou talia le upu moni. E tatau ona faaauau pea ona tatou ave i fale meaʻai aano faaleagaga, le poto saʻo lelei, e ala i suesuega totino fitā. O lea, ua alagatatau ai le fautuaga a Paulo: “A o mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga. O le mea lea ina tatou tuua ai ia o mataupu muamua a Keriso, a ia tatou faaoo atu i le faaatoatoaga; aua le toe tuuina i lalo le faavae o le salamo i galuega e oti ai, ma le faatuatua i le Atua, . . . Tatou te faia foi lena mea, pe a finagalo i ai le Atua.”—Eperu 5:14–6:3.

²⁰ O fesili la nei, O ā meafaigaluega o ia i tatou e fesoasoani ai ia i tatou ina ia maua le poto saʻo lelei? Ma ona o o tatou olaga pisi, o afea e mafai ai ona tatou suesueina le Afioga a le Atua? O le a talanoaina i le mataupu o loo mulimuli mai nei mea ma isi mataupu e fesootai atu i ai.

[Faaopoopoga i lalo]

Fesili e Taliina

◻ O le ā le eseesega i le va o le “poto” ma le “poto saʻo lelei”?

◻ Aiseā e tāua tele ai le poto saʻo lelei i nei aso e gata ai?

◻ E mafai faapefea ona faaosoosoina nisi ina ia paʻūūese mai le upu moni?

◻ O le ā le lapataiga ua tuuina mai e Peteru ia i tatou e uiga i le teena o le poto saʻo lelei?

◻ O le ā e tatau ona tatou faia ina ia maua ai ma tumau ai i le poto saʻo lelei?