Ia Faateleina le Iloa lelei ma le “Fiafia Tele”

O AUAUNA uma lava a Ieova o loo taumafai e maua lana faamaoniga. Ona o lenā manaʻoga, tatou te naunau ai e faaleleia lo tatou uiga o le faatuatua ma tuuina atu le auaunaga paia ma le maelega. Peitaʻi, o lea ua faauaʻi atu o tatou manatu e le aposetolo o Paulo i tulaga mataʻutia, lea na aafia ai nisi o tagata Iutaia i ona aso: “Ua latou maelega i le Atua; ae e lē tusa ai ma le iloa lelei o le Atua.” (Roma 10:2) Ma le mautinoa lava, o lo tatou faatuatua ma la tatou tapuaʻiga iā Ieova e lē faavaeina na o tatou faalogona. Tatou te mananaʻo ia iloa lelei Lē na Faia i tatou ma lona finagalo.

O isi vaega o ana tusitusiga, na faafesootaʻi atu ai e Paulo amioga e faamaonia e le Atua, i lo tatou naunau i le mauaina o le iloa lelei. Na ia tatalo i soo o Keriso ina ia ‘⁠faatumu i le iloa lelei’ o le finagalo o le Atua “ina ia savavali ai e tusa ma le finagalo o Ieova, ma iʻu ina matuā faafiafiaina ai o ia” a o latou faaauau ona “fua mai fua o galuega lelei uma, ma ia tupu pea lo [latou] iloa lelei o le Atua.” (Kolo. 1:9, 10) Aiseā e sili ai ona tatou manaʻomia le iloa lelei? Ma aiseā e tatau ai ona tatou faateleina lenā iloa?

Le Auala i le Mauaina o le Faatuatua

O le iloa lelei o le Atua ma lona finagalo lea o loo taʻua i le Tusi Paia, o le faavae lea o lo tatou faatuatua. Pe a aunoa ma le mauaina o lenā iloa lelei e maufaatuatuaina, o le a pei lo tatou faatuatua iā Ieova o se fale e fai i pepa o se pelē e na o sina feula laʻitiiti lava malepe i lalo. Ua faalaeiauina i tatou e Paulo e tuuina atu le auaunaga paia i le Atua ma lo tatou “mafaufau lelei” ma ia ‘suia o tatou mafaufau.’ (Roma 12:1, 2) O le suʻesuʻeina o le Tusi Paia e lē aunoa, e fesoasoani iā i tatou i lea tulaga.

Na iloa e Ela o se paeonia sauatoa mai Polani e faapea: “Pe ana fai ou te lē suʻesuʻeina le Afioga a le Atua e lē aunoa, o le a muta ai foʻi ma loʻu tuputupu aʻe i le iloa lelei o Ieova. O le a vave lava ona faasolo ina leaga loʻu tulaga o se Kerisiano, ma o le a vaivai ai foʻi ma loʻu faatuatua i le Atua—O le a agaʻi atu ai ina faaleagaina laʻu faiā ma ia.” Talosia ia aua neʻi tupu se mea faapena iā i tatou! Seʻi iloilo le faaaʻoaʻoga a se tagata o lē na faateleina lona iloa lelei o Ieova, ma olioli ai i le faamaoniga mai iā te ia.

“Ua Tele Lava Loʻu Naunau i Lau Tulafono”

O le pese faafatusolo lea o loo lisiina mai e le Salamo 119, o loo faamatala mai ai faalogona o le faisalamo e faatatau i tulafono, o feʻau, poloaʻiga ma faamasinoga a Ieova. Na tusi le faisalamo: “Ou te fiafia lava aʻu i au tulafono. . . . O au tulafono o loʻu lava fiafia ia.” Na ia tusi mai foʻi: “Ua tele lava loʻu naunau i lau tulafono, ou te mafaufau i ai i le aso atoa.”—Sala. 119:16, 24, 47, 48, 77, 97.

O le upu “fiafia” ma le “mafaufau” e uiga atu i le manatunatu loloto i le Afioga a le Atua, ma o le mea moni e ao ona fiafia e mafaufau loloto i ai. O na faaupuga ua faamamafa ai le alofa na iai i le faisalamo i le suʻesuʻe i le tulafono a le Atua. O lenā alofa e lē na o se mea na mapuna aʻe ma tupu aʻe i faalogona i le loto o le faisalamo. Nai lo lea, sa iā te ia le naunau tele ‘e mafaufau’ i le tulafono ina ia maua le malamalamaga i afioga a Ieova. Ua tatou iloa mai uiga o le faisalamo e manaʻo moni lava ia iloa lelei le Atua, ma lona finagalo i le mea saʻo e tatau ona i ai.

E manino mai, o le fiafia o le faisalamo mo Afioga a le Atua sa sau mai lona loto. Tatou te fesili ifo iā i tatou lava: ‘Pe ou te fiafia moni i le Afioga a le Atua? Po o oʻu fiafia e faitau ma iloilo se vaega o le Tusi Paia i aso taʻitasi? Po o oʻu filigā i le faitauina o le Afioga a le Atua ma tatalo faatauanau a o leʻi faia?’ O lo tatou tali atu ioe i na fesili, ua foliga mai o loo ‘tupu pea lo tatou iloa lelei o le Atua.’

Fai mai le faamatalaga a Ela: “Ou te taumafai e lē aunoa ina ia faaleleia le tulaga o aʻu suʻesuʻega totino. Ina ua ou mauaina le polosiua ‘Matamata i le Nuu Lelei’ sa ou faaaogāina e toetoe lava o taimi uma ou te suʻesuʻe ai. Sa ou taumafai pea lava pea e tilofaʻia mea i le tusi Insight on the Scriptures ma isi faasino tusi pe a manaʻomia.”

Seʻi manatu mai i faaaoaoga a Koloseta ma Makota, o ē sa tele o la tiute tauave faaleaiga. Sa faapefea ona la fuafua e faaofi suʻesuʻega totino faale-Tusi Paia i le la faasologa? “Ma te faaavanoa le taimi e fai ai suʻesuʻega a le tagata lava latou o le Afioga a le Atua. O lea la, a o faagasolo le ma suʻesuʻega faaleaiga ma talanoaga i aso taʻitasi, ma te faasoa atu ni manatu sa ma fiafia ma faagaeetia ai.” O suʻesuʻega loloto a le tagata lava ia, ua aumaia ai le olioli tele ma fesoasoani iā i laʻua e ‘⁠tupu ai pea lo la iloa lelei o le Atua.’

Suʻesuʻe ma Taofimau i le Mafaufau

I le avea ai o ni Kerisiano, tatou te talitonu o le finagalo o le Atua “ia faaolaina ituaiga uma o tagata, ma ia oo ina iloa lelei le upu moni.” (1 Timo. 2:3, 4) O lenei mea moni ua faamamafa mai ai le tāua o le faitauina o le Tusi Paia ma taumafai “ia malamalama.” (Mata. 15:10) O se tasi o fesoasoani e faataunuuina ai lenā tulaga, o le suʻesuʻe ma taofimau i le mafaufau. O le uiga lenā na faaalia e tagata Perea anamua ina ua faasoa atu e Paulo le tala lelei iā i latou: “Auā ua latou taliaina le upu ma le fiafia tele, ua latou matuā iloiloina Tusitusiga Paia i aso taʻitasi pe e moni nei mea.”—Galu. 17:11.

Po o e mulimuli i le faaaʻoaʻoga a tagata Perea, o le iai o le fiafia ma ʻalofia le taulaʻi atu o le mafaufau i mea lē talafeagai e faatosina ese ai a o suʻesuʻeina le Tusi Paia? E mafai e se Kerisiano ona gaoioi e faataʻitaʻi i tagata Perea, e ui lava o taimi ua teʻa sa ia leʻi manatu o le suʻesuʻe o se mea e fiafia ai. Ae e lē gata i lea, o nisi tagata ua mafuli atu ina faaitiitia le faitau ma le suʻesuʻe a o agaʻi atu ina matutua, ae e lē o le mea lenā e tatau ona iai i se Kerisiano. Po o le ā lava le tulaga matua ua i ai, ae mafai ona gaoioi e ʻalofia le tosina ese atu i se isi mea. Ma a o e faitau, e te ono mātauina se manatu e mafai ona fetufaaʻi ai ma isi. Mo se faataʻitaʻiga, pe mafai ona fai ma ou sini le taʻu atu i lau paaga po o se aumea Kerisiano mea na e faitau ai pe na e aʻoaʻoina a o faia au suʻesuʻega? O le faia faapea, o le a faigofie ai ona taofimau i lou mafaufau ma lou loto manatu lea e mafai foʻi ona i ai ni aafiaga lelei i isi.

E tusa ai ma taimi e te suʻesuʻe ai, e lelei pe a mulimuli i le faaaʻoaʻoga a Esera, o se auauna a le Atua anamua o lē ‘⁠na saunia lona loto e saʻili i le tulafono a Ieova.’ (Esera 7:10) E faapefea ona e faia lenā mea? E mafai ona e saʻilia se nofoaga e sili ona lelei e fesoasoani iā te oe i au suʻesuʻega. Ona e nofo lea i lalo ma tatalo iā Ieova mo lana taʻitaʻiga ma le atamai. (Iako. 1:5) Fesili ifo iā te oe lava, ‘O le ā ou te faatalitalia o le a ou aʻoaʻoina a o faagasolo le taimi lea ou te suʻesuʻe ai?’ A o e faitau, ia mātau manatu autū. E mafai ona e tusia se faamatalaga e faatatau i lenā manatu, po o le faailoga foʻi o le vaega lea e sili ona e manaʻo e te manatua. Iloilo pe faapefea ona faaaogā lenā mea i le talaʻiga, pe a fai au filifiliga, ia po o le faalaeiauina foʻi o uso talitonu. A o leʻi faaiʻuina le taimi lea e te suʻesuʻe ai, ia toe autalu puupuu mea ia sa e suʻesuʻeina. O le a mafai ai ona manatua mea ia sa e aʻoaʻoina.

Na faamatalaina e Ela e faapea: “A o oʻu faitauina le Tusi Paia, ou te faaaogāina faasino tusi, o le Watch Tower Publications Index, (Faasino Mataupu mo le Olomatamata) ma le Watchtower Library i le CD-ROM. Ou te faia ni aʻu lava faamaumauga mo le fuafuaga ina ia ou faaaogā i laʻu faiva.”

O nisi e umi lava ona fiafia e faia ni suʻesuʻega loloto, ma avea o ni ē uaʻi atu i mataupu faaleagaga. (Faata. 2:1-5) Ae e iai foʻi le tele o latou tiute tauave ma faigatā ai ona faataatia ese se taimi mo suʻesuʻega totino. Afai e te ioe i lenā mea, o le ā la se fetuunaʻiga e ao ona e faia i lau faasologa?

E Faapefea Ona Ou Maua le Taimi?

E mautinoa e te ioe mai e faigofie ona faaavanoa le taimi e faia ai mea e te fiafia i ai. Ua iloa e le toʻatele, o le faataatia o se sini talafeagai, o le a fesoasoani lea i le faia o suʻesuʻega totino, e pei o le faitauina atoa o le Tusi Paia. O le mea moni, atonu e faigatā ona faitau ni tala uumi i talaaga o gafa, o faamatalaga auʻiliʻili o le malumalu anamua, po o valoaga lavelave lea e leai se fesootaʻiga i le olaga i aso fai soo. Taumafai e uia laasaga talafeagai ina ia ausia ai ou sini. Mo se faaaʻoaʻoga, a o leʻi iloiloina se vaega o le Tusi Paia lea e foliga mai e faigatā, e mafai ona e faitauina lona talaaga po o sona faatatauga aogā. O na faamatalaga e mafai ona maua mai i le polosiua “O Tusitusiga Paia Uma”—E Moni Aʻiaʻi ma Aogā, o loo maua i gagana e 67.

E faagaee loto le faaaogā o tatou mafaufau a o faitauina le Tusi Paia. O le a fesoasoani lea iā te oe e faaata i lou mafaufau ia tagata o loo taʻua ai ma mea na tutupu o loo aofia ai. O le faatatauina o nisi nei o fautuaga, o le a avea ai lau polokalame o le suʻesuʻe o se mea e tauia ma olioli ai. O lea la, o le a sili atu ona e fiafia e faaavanoa se taimi e faia ai faapea. O le a faigofie foʻi ona e tausisia le masaniga o le faitau o le Tusi Paia i aso uma.

O manatu o loo taʻua i luga e fesoasoani iā i tatou taʻitoʻatasi ina ia laugatasia ai, ae o le ā e tatau ona faia e se aiga e pisi tele? Aiseā e lē nonofo faatasi ai i lalo ma talatalanoa faasamasamanoa i aogā e maua mai i suʻesuʻega faaleaiga? O na talanoaga atonu o le a maua ai ni manatu aogā, e pei o le vave ala i luga i ni nai minute i aso taʻitasi, po o ni aso patino ina ia talanoaina ai se vaega o le Tusi Paia. Atonu o lenā talanoaga o le a iloa ai le manaʻoga o le fetuunaʻi o le faasologa a le aiga. Mo se faataʻitaʻiga, o nisi aiga latou te manatu e iloilo le mau mo le aso ia po o le faitauina o se vaega o le Tusi Paia, i le māeʻa ai o le taumafataga a le aiga. A o leʻi tuua e sui o le aiga le laulau ma gasolo atu i isi galuega fai, e tatau i le aiga ona faaalu le 10 po o le 15 minute e talanoaina ai Mau, po o le faitauina o le Tusi Paia o loo i le faasologa o le faitau Tusi Paia. I le uluaʻi taimi, o le a foliga mai e avea o se luʻi, ae mulimuli ane o le a avea o se mea e masani ai le aiga ma sili ona fiafia ai.

Na faamatala mai e Koloseta ma Masoreta le mea na fesoasoani i lo la aiga: “I le taimi ua teʻa, sa faaalu lo ma taimi i mea e lē tāua, ma gaoioiga masani. Sa ma filifili loa e faaitiitia le taimi e faaalu i le lafoina o imeli. E lē gata i lea, ua ma faaitiitia foʻi le taimi e alu i faafiafiaga ma evaevaga faapea ma o ma mausa, ae faatulaga se aso patino ma le taimi mo a maʻua suʻesuʻega loloto.” E mautinoa lava, e leʻi faanoanoa lenei aiga ona o fetuutuunaʻiga na la faia, ma e mafai foʻi ona tatou iloa le moni o lenei mea i totonu o tatou aiga.

E Aogā le Faateleina o le Iloa Lelei!

O le suʻesuʻe loloto i le Afioga a le Atua e fua mai ai “fua o galuega lelei uma.” (Kolo. 1:10) A o faamaonia mai lenā tulaga i lou olaga, o le a faaalia ai i le toʻatele lou agaʻigaʻi i luma. O le a avea oe o se tagata faaleagaga e malamalama lelei i upu moni o le Tusi Paia. O le a sili atu ona paleni au filifiliga, ma o le a e poto ma lava saunia ai e avatu se fesoasoani i isi, ma saʻoloto mai ai i le soona faamamafa o mea e masani ona iloa ai tagata e leʻi aʻoaʻoina. Ae o le sili o na mea uma, o le a e vavalalata atu ai iā Ieova. O le a loloto ai lou talisapaia o ona uiga, ma o le a manino mai a o e talanoa atu i isi e faatatau iā te ia.—1 Timo. 4:15; Iako. 4:8.

Po o le ā lava lou matua ma lou iloa o iai, ia faia taumafaiga uma ina ia faaauau ai pea ona maua le fiafia i le Afioga a le Atua, ma ia tumau ona suʻesuʻe ma taofimau i le mafaufau. Ia e mautinoa e lē mafai e Ieova ona faagaloina au taumafaiga. (Epe. 6:10) O le a ia liligi ifo iā te oe le anoanoaʻi o ana faamanuiaga.

[Pusa i le itulau 13]

PE A ‘FAATELEINA LO TATOU ILOA LELEI’. . .

E faamalosia ai lo tatou faatuatua i le Atua ma savavali ai e tusa ma le finagalo o Ieova.—Kolo. 1:9, 10

O le a tatou maua ai le malamalama, ma mafai ai ona faaaogā le tofā mamao ma faia ni filifiliga atamai.—Sala. 119:99

O le a faateleina ai lo tatou fiafia e fesoasoani atu i isi ina ia faalatalata atu iā Ieova.—Mata. 28:19, 20

[Ata i le itulau 14]

O se luʻi le saʻilia o se nofoaga lelei e faia ai suʻesuʻega, ae o se mea e manaʻomia

[Ata i le itulau 15]

O nisi aiga latou te faitau se vaega o le Tusi Paia pe a māeʻa le taumafataga