Faasilasilaga
Fesoasoani mo Komiti o le Vaega Pule
O loo faaauau pea ona auauna ma le faamaoni sui e toʻasefulu lua o loo iai nei o le Vaega Pule o Molimau a Ieova i o latou tofiga. Ua lē aunoa ona latou loto faafetai i sui faamaoni o le “motu o tagata e toatele” o loo faatupulaia pea mo la latou lagolagosua ma le maelega. (Faaaliga 7:9, 15) Ona o le faatelega maoaʻe i le lalolagi atoa, e foliga mai ai ua talafeagai i lenei taimi ona tuuina atu i le Vaega Pule sina fesoasoani faaopoopo. O le mea lea, ua filifili ai e valaaulia nisi e fesoasoani, ae maise lava mai le motu o tagata e toatele, ina ia auai i fonotaga a komiti taitasi o le Vaega Pule, o lona uiga, o Komiti o le Pulega, Faasalalauga, Auaunaga, Aʻoaʻoga, ma Fetusiaiga. O lea, o le aofaiga o le a auai i fonotaga a ia komiti taitasi, o le a faateleina i le toʻafitu po o le toʻavalu. I lalo o le taʻitaʻiga a sui o le komiti o loo iai i le Vaega Pule, o le a mafai ai ona auai i latou nei i talanoaga ma faatinoina tofiga eseese e tofia ai i latou e le komiti. Sa amata lenei fuafuaga fou i a Me 1, 1992.
Mo le tele o tausaga, ua faaitiitia ai nei le aofaiga o le vaega totoe o ē faauuina o Molimau a Ieova, ae ua faateleina pea le aofaiga o le motu o tagata e toatele e sili atu i mea na tatou faamoemoe i ai. (Isaia 60:22) Maeu lo tatou loto faafetai ia Ieova mo lenei faatelega ofoofogia! Ina ua taliaina ma le loto fiafia le igoa fou, o Molimau a Ieova i le 1931, o le tumutumuga o tagata talaʻi o le Malo sa iai e 39,372, o le toatele o i latou na sa faapea mai o ni uso faauuina o Keriso. (Isaia 43:10-12; Eperu 2:11) I le 1991, e onosefulu tausaga mulimuli ane ai, o le tumutumuga o tagata talaʻi i le lalolagi atoa e 4,278,820, ae na o le 8,850 o i latou na faapea mai o ni sui o le vaega totoe faauuina. E pei ona muai iloaina i le aʻoaʻoga a le Tusi Paia, ua sili atu nei le aofaiga o le “motu o tagata e toatele” i le vaega totoe o le “lafu mamoe itiiti” i le silia i le 480 tagata o le motu o tagata e toatele i le toʻatasi o le vaega totoe. (Luka 12:32; Faaaliga 7:4-9) I le tausia o le faalauteleina o manaoga o le Malo, e mautinoa le manaomia ma le talisapaia e le vaega totoe o le felagolagomai ma le lagolagosua a le motu o tagata e toatele.
E pei ona faamatalaina i lenei lomiga o Le Olomatamata, o loo iai se vaega o loo galulue faatasi ma le Isaraelu faaleagaga i aso nei, e faatusatusa atu i le au Netini ma le fanauga a auauna a Solomona o ē na toe faafoisia mai le tafeaga i Papelonia faatasi ma le vaega totoe o tagata Iutaia, sa sili atu foi le toatele o na tagata e lē ni Isaraelu i tagata sā Levī na toe foi atu. (Esera 2:40-58; 8:15-20) O ‘ē ua foaiina atu’ mai le motu o tagata e toatele i aso nei, o ni tane Kerisiano taʻumatuaina o ē ua sili atu le agavaa o loo iai ona o le tausia ma le vaavaaia o lālā, le galuega a ovasia faimalaga, ma o loo auai i faapotopotoga e 66,000 ua faavaeina i le lalolagi atoa.
E leʻi mamao atu, sa faia ai Aʻoga o le Faiva o le Malo i le lalolagi atoa mo le aʻoaʻoina o ovasia, ma auauna o le faiva o loo fesoasoani ia i latou. I le Iunaite Setete lava ia, e 59,420 ovasia na auai. Sa faaauupegaina ai nei “toeaina” ina ia faataunuuina a latou avega tauave i se auala e sili ona uigā.—1 Peteru 5:1-3; faatusatusa i le Efeso 4:8, 11.
I ofisa ulu o Molimau a Ieova i Brooklyn, o loo auauna ai nisi o ‘ē ua foaiina atu’ mo le tele naʻuā o tausaga. O loo aofia ai ia i latou na, ni ovasia taʻumatuaina mai le motu o tagata e toatele o ē ua iai le tomai ma le poto masani e sili atu. O lea, ua filifilia ai e le Vaega Pule nisi o na ovasia ina ia fesoasoani i fonotaga a komiti o le Vaega Pule. E lē faapea o i latou ia, o ni tagata ua leva ona auauna. Na i lo lena, o i latou o ni tane taʻumatuaina, ua iai le poto masani ma agavaa e talafeagai ai ona latou tuuina le fesoasoani i matata patino. O le tofia o i latou e galulue faatasi ma se komiti, e lē tuua ai i latou i se tulaga faapitoa. E pei ona fetalai ai Iesu e uiga i ona soʻo, “o outou uma o le au uso outou.” (Mataio 23:8) Peitai, e tele mea o le a maufaatuatuaina atu i na tane, ma e faapena foi ona ‘manaomia o mea e tele’ mai ia i latou.—Luka 12:48.
Tatou te olioli ona o le agaʻigaʻi i luma o le faalapotopotoga a Ieova i aso nei. I le sefulu tausaga ua mavae, toetoe lava 100 pasene le faatelega ua iai o le aofaiga o i latou e galulue i le fanua, i le ōgatasi ma le valoaga e uiga ia Tavita Sili, o Iesu Keriso: “E leai se mea e gata mai ai ona tele o lona malo ma le filemu o lona malo.” (Isaia 9:7) E faapei o le auala na galulue faatasi ai le au Netini ma faitaulaga i le faafouina o pa o Ierusalema, ua faapena foi ona faataunuuina le valoaga e uiga i le faalapotopotoga a Ieova i aso nei e faapea: “E atiina ae ou pa e tagata ese.” (Isaia 60:10; Neemia 3:22, 26) E ao ona faamālō atu i le au Netini faaonaponei ona o le maelega ua latou faaalia i le atiina aʻe o le tapuaiga moni, ma le fesoasoani atu i “faitaulaga a Ieova” i so o se galuega po o so se auaunaga atonu e tofia ai i le faalapotopotoga a Ieova i le lalolagi atoa.—Isaia 61:5, 6.