Fesili Mai le Au Faitau
Talu ai o le faitaulaga anamua e suafa ia Mekisateko o se tagata moni, aisea ua fai mai ai le Tusi Paia e “leai ni ona tupuga”?
O lenei faamatalaga e maua i le Eperu 7:3. Seʻi mātau lea fuaiupu i lona aotelega e faapea:
“Auā o lenei Mekisateko, o le tupu o Salema, o le faitaulaga a le Atua silisili ese, o le na fetaiai ma Aperaamo ina o foi mai o ia mai le fasiga o tupu, ma na faamanuia atu ia te ia; sa foai atu foi e Aperaamo ia te ia mea e sefulu aʻi o mea uma, (o le uiga muamua o lona igoa, o le tupu o le amiotonu, i le ma le tupu o Salema o le tupu o le filemu lea;) e leai sona tamā, e leai sona tinā, e leai ni ona tupuga, e leai se amataga i ona aso, po o se gataaga i lona soifua, a ua faapei o le Alo o le Atua, ua tumau o ia o le faitaulaga e faavavau.”—Eperu 7:1-3.
E pei ona sa taʻua, o Mekisateko sa o se tagata moni, e pei lava ona sa moni o Aperaamo, lea sa la faafeagai tonu. (Kenese 14:17-20; Eperu 7:4-10) Afai la o lea, sa tatau ona iai ni mātua o Mekisateko, sona tamā ma sona tinā, ma atonu na iai sana fanau. O lea, ona o se tagata, sa iai sona gafa, sona tupuaga. Sa tatau foi ona iai se faaiuga o lona soifuaga faaletino. I se taimi, na maliu ai o ia, e tusa ma le faamatalaga a le aposetolo o Paulo i le Roma 5:12, 14. Ae talu ai tatou te lē o iloaina po o anafea na maliu ai Mekisateko ma faamutaina ai lana auaunaga o se faitaulaga, o le tulaga lena ua ia auauna ai e aunoa ma se gataaga.
Sa faia ni faamatalaga a Paulo i le tusi o Eperu e faatatau ia Mekisateko ina ua ia talanoaina le vaega a Iesu Keriso o se Faitaulaga Sili e sili atu. I lona faasino atu ia Mekisateko o le ituaiga po o se ata o Iesu i lona tulaga faafaitaulaga, sa faapea mai ai Paulo: “O . . . Iesu, . . . ua fai o ia ma faitaulaga sili e faavavau, e uiga faatasi ma Mekisateko.” (Eperu 6:20) I le a le uiga?
Sa iloa e Paulo e lē o maua i le Tusi Paia faamatalaga e faatatau i le tupuaga o Mekisateko—i ona tuaa ma ni ana fanau. O lena faamatalaga ua lē o iai i faamaumauga o le Tusi Paia. O lea la, e tusa ai ma mea na iloa e Paulo po o i tatou foi, e mafai la ona faapea atu ma le saʻo, o Mekisateko “e leai ni ona tupuga” (New World Translation of the Holy Scriptures; American Standard Version), “e aunoa ma se faasologa o tupuaga” (W. J. Conybeare), po o le “leai o se tupuaga.”—J. B. Phillips.
I le ā le auala ua tutusa ai ma Iesu? O le mea moni, ua tatou iloa o le Tamā o Iesu, o Ieova le Atua lea, ma o lona tinā faaletagata o Maria, o lē e sau mai le ituaiga o Iuta. Ae peitai, e iai se mea sa tutusa ai Mekisateko ma Iesu. E faapefea? Sa leʻi fanau mai Iesu i le ituaiga o Levi, o le ituaiga lea mo ositaulaga i le nuu o Isaraelu. E leai, sa leʻi avea Iesu ma faitaulaga e ala mai i se tupuga faaletagata. Sa faapena foi ona leʻi avea Mekisateko o se faitaulaga, ona “o se tulafono o se poloaiga faaletino ua fai ai o ia,” o lona uiga, e ala lea i lona fanau mai i se ituaiga, po o se aiga tau faitaulaga. (Eperu 7:15, 16) Na i lo o le avea ma faitaulaga e ala i se tamā faaletagata o lē sa avea foi ma faitaulaga, ae o Iesu “ua taʻua e le Atua o le faitaulaga sili, e uiga faatasi ma Mekisateko.”—Eperu 5:10.
E lē gata i lea, sa leai ni fanau po o ni suli o Iesu i lona tulaga faaositaulaga. I lenei foi uiga, ua leai ai sona gafa. O le a ia tauaveina e faavavau lana auaunaga faaositaulaga o se aʻoaʻo loto fesoasoani. Sa faapea mai Paulo i lenei auaunaga e faavavau:
“O ia [Iesu] ua tumau e faavavau, o le mea lea ua i ai ia te ia le faiva o faitaulaga e tumau pea; o le mea foi lea e mafai ai ia te ia ona faaola pea lava i e faalatalata atu i le Atua ona o ia, auā o loo soifua pea ia e fautua mo i latou.”—Eperu 7:24, 25.
O lo tatou talanoaina o upu a Paulo o loo sii mai i le Eperu 7:3, e tatau ona sili atu lea, na i lo na o sina iloa e tau ina teu i o tatou mafaufau. E tatau ona faamalosia ai lo tatou loto talisapaia mo le fuafuaga alofa ua saunia e Ieova le Atua mo i tatou e maua ai le faamagaloga o agasala e faavavau, atoa foi ma le auala ua ia fuafuaina mo i tatou e maua ai le fesoasoani ma le taitaiga e faavavau.